நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

கங்கா²விதரணீபுராண-டீகா

க³ந்தா²ரம்ப⁴கதா²

பு³த்³த⁴ம் த⁴ம்மஞ்ச ஸங்க⁴ந்தி-ஆதி³னா யா பகாஸிதா;

ப⁴த³ந்தபு³த்³த⁴கோ⁴ஸேன, மாதிகாட்ட²கதா² ஸுபா⁴;

தஸ்ஸா ஹி லீனபத³ம் வி-காஸனகோயமாரம்போ⁴.

க³ந்தா²ரம்ப⁴கதா²வண்ணனா

விப்பஸன்னேனாதி விவித⁴ப்பஸன்னேன. கத²ம்? ‘‘இதிபி ஸோ…பே… பு³த்³தோ⁴ ப⁴க³வா, ஸ்வாக்கா²தோ…பே… விஞ்ஞூஹி, ஸுப்படிபன்னோ…பே… லோகஸ்ஸா’’தி (அ. நி. 5.10) ஏவமாதி³னா. ‘‘சேதஸா’’தி வுத்தத்தா தீஸு வந்த³னாஸு சேதோவந்த³னா அதி⁴ப்பேதா. தன்னின்னதாதி³வஸேன காயாதீ³ஹி பணாமகரணம் வந்த³னா, கு³ணவஸேன மனஸாபி ததா²வ கரணம் மானம், பச்சயப்படிபத்தியாதீ³ஹி பூஜாகரணம் பூஜா, பச்சயாதீ³னம் அபி⁴ஸங்க²ரணம் ஸக்கச்ச கரணம் ஸக்காரோ, தேஸம். பா⁴ஜனந்தி ஆதா⁴ரோ, அதி⁴கரணம் வா.

தே²ரா மஹாகஸ்ஸபாத³யோ, தேஸம் வம்ஸோதி தே²ரவம்ஸோ, ஆக³மாதி⁴க³மஸம்பதா³ய தஸ்ஸ வம்ஸஸ்ஸ பதீ³பபூ⁴தாதி தே²ரவம்ஸப்பதீ³பா, தேஸம் தே²ரவம்ஸப்பதீ³பானம். அஸம்ஹீரத்தா தி²ரானம். வினயக்கமேதி வினயபிடகே, ஆரம்பா⁴னுரூபவசனமேதம். ஸுத்தாபி⁴த⁴ம்மேஸுபி தே தி²ரா ஏவ. ‘‘பு³த்³த⁴ம் த⁴ம்மஞ்ச ஸங்க⁴ஞ்ச புப்³பா³சரியஸீஹானஞ்சா’’தி அவத்வா கஸ்மா விஸும் வுத்தந்தி சே? பயோஜனவிஸேஸத³ஸ்ஸனத்த²ம். வத்து²த்தயஸ்ஸ ஹி பணாமகரணஸ்ஸ அந்தராயனிவாரணம் பயோஜனம் அத்தனோ நிஸ்ஸயபூ⁴தானம் ஆசரியானம் பணாமகரணஸ்ஸ உபகாரஞ்ஞுதாத³ஸ்ஸனம். தேன பு³த்³த⁴ஞ்ச த⁴ம்மஞ்ச ஸங்க⁴ஞ்ச வந்தி³த்வா, ச-ஸத்³தே³ன புப்³பா³சரியஸீஹானஞ்ச நமோ கத்வாதி யோஜனா. அத² வா ‘‘வந்தி³த்வா’’தி சேதோவந்த³னம் த³ஸ்ஸேத்வா ததோ ‘‘நமோ கத்வா’’தி வாசாவந்த³னா, ‘‘கதஞ்ஜலீ’’தி காயவந்த³னாபி த³ஸ்ஸிதாதி யோஜேதப்³ப³ம்.

இதா³னி அபி⁴தா⁴னப்பயோஜனம் த³ஸ்ஸேதும் ‘‘பாமோக்க²’’ந்திஆதி³மாஹ. தத்த² பாமோக்க²ந்தி பதா⁴னம். ஸீலஞ்ஹி ஸப்³பே³ஸம் குஸலத⁴ம்மானம் பதா⁴னம் ஆதி³பா⁴வதோ. யதா² ச ஸத்தானம் க²ஜ்ஜபோ⁴ஜ்ஜலேய்யபேய்யவஸேன சதுப்³பி³தோ⁴பி ஆஹாரோ முகே²ன பவிஸித்வா அங்க³மங்கா³னி ப²ரதி, ஏவம் யோகி³னோபி சாதுபூ⁴மகம் குஸலம் ஸீலமுகே²ன பவிஸித்வா அத்த²ஸித்³தி⁴ம் ஸம்பாதே³தி. தேன வுத்தம் ‘‘முக²’’ந்திஆதி³. அத² வா முக²ந்தி உபாயோ, தேன மோக்க²ப்பவேஸாய நிப்³பா³னஸச்சி²கிரியாய முக²ம் உபாயோதி அத்தோ². மஹேஸினா யம் பாதிமோக்க²ம் பகாஸிதந்தி ஸம்ப³ந்தோ⁴. மஹந்தே ஸீலாதி³க்க²ந்தே⁴ ஏஸி க³வேஸீதி மஹேஸி.

ஸூரதேன நிவாதேனாதி ‘‘தத்த² கதமம் ஸோரச்சம்? யோ காயிகோ அவீதிக்கமோ’’திஆதி³னா (த⁴. ஸ. 1349) ஸூரதேன, நீசவுத்தினா மானுத்³த⁴ச்சவஸேன அத்தானம் அனுக்கி²பனபா⁴வேன நிவாதேன. வினயாசாரயுத்தேன சாரித்தவாரித்தேஹி யுத்தேன. ‘‘ஸோணத்தே²ரேன யாசிதோ’’தி அவத்வா ‘‘ஸூரதேனா’’திஆதி³ கஸ்மா வுத்தம், கிம் து³ஸ்ஸீலேன வா து³ட்டே²ன வா அலஜ்ஜினா வா யாசிதேன வண்ணனா காதும் ந வட்டதீதி சே? ந ந வட்டதி. தே²ரஸ்ஸ வசனம் படிக்கி²பிதும் ந ஸக்கா, ஏவரூபகு³ணோ தே²ரோவ, யாசனவஸேன கத்தப்³போ³ ஆத³ரேனாதி த³ஸ்ஸேதும் வுத்தம்.

நாமேனாதி அத்தனோ கு³ணனாமேன. ஸத்³த³லக்க²ணஸுப⁴தோ, வினிச்ச²யஸுப⁴தோ, விஞ்ஞேய்யஸுப⁴தோ ச ஸுப⁴ம்.

க³ந்தா²ரம்ப⁴கதா²வண்ணனா நிட்டி²தா.

நிதா³னவண்ணனா

‘‘ஆவிகதா ஹிஸ்ஸ பா²ஸு ஹோதி, தத்தா²யஸ்மந்தே புச்சா²மி…பே… துண்ஹீ, ஏவமேதம் தா⁴ரயாமீ’’தி வத்வா ‘‘உத்³தி³ட்ட²ம் கோ² ஆயஸ்மந்தோ நிதா³ன’’ந்திஆதி³னா நயேன வுத்தம். ஏத்தே²வ யாவததியானுஸாவனகதா²வஸானே அத² கோ² உத்³தே³ஸகாலே ‘‘ஆவிகதா ஹிஸ்ஸ பா²ஸு ஹோதீ’’தி வத்வா ‘‘உத்³தி³ட்ட²ம் கோ² ஆயஸ்மந்தோ நிதா³னம். தத்தா²யஸ்மந்தே புச்சா²மீ’’திஆதி³னா நயேன ஆக³தம். உபோஸத²க்க²ந்த⁴கேபி ஏவமேவ ஆக³தம். தத்த² புப்³பே³ வுத்தம் பச்சா² ஆக³தஸுத்தேன விருஜ்ஜ²தி. தஸ்மா யதா² ந விருஜ்ஜ²தி, ததா² உபபரிக்கி²த்வா க³ஹேதப்³ப³ம். ஏவம் ந விருஜ்ஜ²தீதி ஏகே. கத²ம்? ‘‘ஆவிகதா ஹிஸ்ஸ பா²ஸு ஹோதீ’’தி வத்வா ‘‘உத்³தி³ட்ட²ம் கோ² ஆயஸ்மந்தோ நிதா³னம். தத்தா²யஸ்மந்தே புச்சா²மீ’’திஆதி³னா ஸுஉத்³தி³ட்ட²ம் ஹோதீதி ஏதம் உத்³தே³ஸலக்க²ணம் இதா⁴பி க²ந்த⁴கேபி வுத்தத்தா. தஸ்மா ‘‘பா²ஸு ஹோதீ’’தி வத்வா ‘‘தத்தா²யஸ்மந்தே புச்சா²மீ’’தி வுத்தட்டா²னே அவுத்தம்பி ஆனேத்வா க³ஹேதப்³ப³ம். கஸ்மா? இத⁴ நிதா³னம் ந த³ஸ்ஸிதம், உத்³தே³ஸோ உத்³தே³ஸகாலே உத்³தி³ஸிதப்³ப³லக்க²ணஸ்ஸ தத்த² வுத்தத்தா. அபிச ‘‘நிதா³னுத்³தே³ஸோ’’தி பத³ம் உத்³த⁴ரித்வா நிதா³னுத்³தே³ஸம் த³ஸ்ஸேதுகாமோபி ‘‘ஸுணாது மே, ப⁴ந்தே, ஸங்கோ⁴…பே… ஆவிகதா ஹிஸ்ஸ பா²ஸு ஹோதீ’’தி பாட²வஸேன ஆக³தம் நிதா³னம் நிட்டா²பேத்வா உபரி அட்ட²கதா²வஸேன யோஜேதப்³ப³ம் பாளிம் இத⁴ யோஜேத்வா ‘‘தத்தா²யஸ்மந்தே புச்சா²மி…பே… தா⁴ரயாமீ’’தி நிதா³னபாளிம் பரிபுண்ணம் கத்வா புன ‘‘தத்த² நிதா³னுத்³தே³ஸோ’’தி உத்³த⁴டபத³வஸேன ஸங்கே²பதோ நிதா³னுத்³தே³ஸலக்க²ணம் த³ஸ்ஸேதும் ‘‘ஏவமேதம் தா⁴ரயாமீ’’தி வத்வா ‘‘உத்³தி³ட்ட²ம் கோ² ஆயஸ்மந்தோ நிதா³ன’’ந்திஆதி³ வுத்தம், தஸ்மா ஏவம் உபரி ச க²ந்த⁴கே ச, அத² கோ² உத்³தே³ஸகாலே ‘‘ஆவிகதா ஹிஸ்ஸ பா²ஸு ஹோதீ’’தி வத்வா ‘‘உத்³தி³ட்ட²ம் கோ² ஆயஸ்மந்தோ நிதா³னம். தத்தா²யஸ்மந்தே புச்சா²மீ’’திஆதி³ நிதா³னுத்³தே³ஸோவ த³ஸ்ஸிதோ, ந நிதா³னம்.

ஸவனாணத்திவசனந்தி ஏத்த² ஸங்க⁴னவகதரேன வத்தும் அயுத்தந்தி சே? யுத்தமேவ. ‘‘பாதிமோக்கு²த்³தே³ஸகேன ஏவம் வத்தப்³ப³’’ந்தி ப⁴க³வதா வுத்தத்தா ப⁴க³வதோவ ஆணத்தி, ந உத்³தே³ஸகஸ்ஸ. இத⁴ நவகதரவஸேன வுத்தம். தே²ரோபி பன உத்³தி³ஸிதும் லப⁴தீதி த³ஸ்ஸனத்த²ம் ‘‘தே²ராதி⁴கம் பாதிமோக்க²’’ந்தி வுத்தம். இமினா ஸுத்தேன நவகதரோ ந லப⁴தீதி சே? தம் த³ஸ்ஸேதும் ‘‘யோ தத்த² பி⁴க்கூ²’’திஆதி³ வுத்தம்.

யதா² சதுவக்³கே³ன ட²பேத்வா உபஸம்பதா³பவாரணாஅப்³பா⁴னானி ஸப்³ப³ம் ஸங்க⁴கம்மம் காதும் வட்டதி, ஏவம் ‘‘அதிரேகவீஸதிவக்³கே³ன இமம் நாம கம்மம் காதப்³ப³’’ந்தி அவத்வா அதிரேகவசனத்தா அஞ்ஞம் அத்த²ம் ஸூசேதி, கிம் தந்தி ‘‘சதுவக்³கா³தி³னா’’திஆதி³. தஞ்ஹி தேஹி ஏவ ஸித்³த⁴ம். கத²ம்? சதுவக்³கே³ன உபஸம்பதா³பவாரணா…பே… வீஸதிவக்³கே³ன ந கிஞ்சி ஸங்க⁴கம்மம் காதும் ந வட்டதீதி. ஏத்த² ‘‘த³ஸவக்³கே³ன அப்³பா⁴னகம்மமத்தம் ட²பேத்வா’’தி வத³ந்தேன சதுபஞ்சவக்³கே³ன கரணீயானிபி த³ஸவக்³கே³ன காதும் அனுஞ்ஞாதானி. தஸ்மா அதிரேகேன வட்டதீதி தீ³பிதம், ‘‘ட²பேத்வா’’தி வசனேன ஊனதரேன ந வட்டதீதி தீ³பிதமேவ. தஸ்மா ந வத்தப்³ப³ம் அதிரேகவீஸதிவக்³கோ³தி சே? வத்தப்³ப³மேவ. சதுபஞ்சவக்³கே³ன கத்தப்³ப³ம் ச²ஸத்தஅட்ட²னவவக்³கே³ன காதப்³ப³ந்தி ச, த³ஸவக்³கே³ன காதப்³ப³ம் ஏகாத³ஸத்³வாத³ஸ…பே… ஏகூனவீஸதிவக்³கே³ன காதப்³ப³ந்தி ச தீ³பிதம். ஊனதரேன ந வட்டதீதி தீ³பிதம் பாகடதோ. ஸப்³ப³ப்பகாரேன பன அதிரேகவீஸதிஅனதிரேகவீஸதிவக்³கே³ வுத்தேபி தீ³பிதம் ஹோதீதி வஜிரபு³த்³தி⁴த்தே²ரேன லிகி²தம். இதோ பட்டா²ய ‘‘லிகி²த’’ந்தி வுத்தே வஜிரபு³த்³தி⁴த்தே²ரேனாதி க³ஹேதப்³ப³ம்.

ஸசே அனுபோஸதே²பி வட்டேய்ய, ‘‘உபோஸத²ம் கரேய்யா’’தி ந வதே³ய்ய, யஸ்மா அனுபோஸதே² காதும் ந வட்டதி, தஸ்மா ‘‘அஜ்ஜுபோஸதோ²’’தி வத்வா புன ‘‘உபோஸத²ம் கரேய்யா’’தி வுத்தம். ‘‘பச்சி²மகத்திகபுண்ணமா ஏவா’’தி அவதா⁴ரணம் ததோ பரம் பவாரணாதி³வஸஸ்ஸ நத்தி²தாய கதம். உத்³த⁴ம் பகதிஉபோஸதே² வுத்தேன பகதிசாரித்தேன ஸத்³தி⁴ம் இத³ம்பி.

‘‘நிமித்தேன நிமித்தம் ஸம்ப³ந்தி⁴த்வா’’தி ந வத்தப்³ப³ம் ‘‘திவித⁴ஸம்பத்தியுத்தா’’தி வுத்தத்தாதி சே? வத்தப்³ப³மேவ. கஸ்மா? திவித⁴ஸம்பத்தி நாம நிமித்தஸம்பத்தி, பரிஸாஸம்பத்தி, கம்மவாசாஸம்பத்தீதிஆதி³ம் வத்வா ‘‘நிமித்தஸம்பத்தி நாம பப்³ப³தனிமித்தம், பாஸாணனிமித்த’’ந்திஆதி³ வுத்தம், ந நிமித்தேன நிமித்தஸம்ப³ந்த⁴னம் வுத்தம். அபிச ‘‘திவித⁴ஸம்பத்தியுத்தா’’தி ஸம்பயோக³ங்கே³ஸு த³ஸ்ஸேத்வா புன தமேவ பஹானங்கே³ஸு த³ஸ்ஸேதும் ‘‘நிமித்தேன நிமித்தம் ஸம்ப³ந்தி⁴த்வா’’தி வுத்தம். நதி³ஸமுத்³த³ஜாதஸ்ஸரேஸு ஸம்மதஸீமாதோ கம்மானி ந விபஜ்ஜந்தி உத³குக்கே²பஸீமத்தாதி ‘‘விபத்திஸீமாயோ நாமா’’தி கஸ்மா வுத்தாதி சே? ஸேஸலக்க²ணானி ஸம்பாதே³த்வா நதி³யம் ஸீமாய ப³த்³தா⁴ய உத³கபரியந்தம் கத்வா ஸீமாக³தத்தா புன தம் நதி³ம் அந்தோ கத்வா தளாகே கதே ஸசே தஸ்ஸா ஸீமாய கம்மம் காதும் வட்டேய்ய, ஸீமாதோ கம்மானி ந விபஜ்ஜேய்யும். யஸ்மா பன ஏவம் காதும் ந வட்டதி, தஸ்மா ‘‘உத³குக்கே²பஸீமத்தா’’தி வுத்தம் அகாரணம்.

வீஸதிவக்³க³கரணீயத்தா ஸங்க⁴கம்மஸ்ஸ கம்மாரஹேன ஸத்³தி⁴ம் ஏகவீஸதி பி⁴க்கூ² நிஸீதி³தும் ந ஸக்கோந்தீ’’தி வுத்தம், ஸுக²னிஸஜ்ஜாவஸேன நிஸீதி³துந்தி அதி⁴ப்பாயோ. ‘‘பரிமண்ட³லாகாரேன நிஸீதி³து’’ந்தி அட்ட²கதா²யம் வுத்தம். தியோஜனம் அதிக்கமித்வாதி மஜ்ஜே² ட²த்வா தி³யட்³ட⁴ம் கத்வா தியோஜனம். கோணதோ ஹி கோணம் தியோஜனம் அதிக்காமேதி, ஆபத்திஞ்ச ஆபஜ்ஜதி, ஸீமா ச அஸீமா ஹோதி. கித்தேத்வாதி நிமித்தானி ஸம்பன்னானிபி அஞ்ஞமஞ்ஞனாமவிபரியாயேன, அனிமித்தானம் நாமேஹி ச கித்தேத்வாதி அத்தோ².

ராஸிகதம் பம்ஸுபி ருக்கே²ஸு ஜாதேஸு ஸுத்³த⁴பம்ஸுபப்³ப³தோ ஹோதி. கு³ளபிண்ட³பரிமாணோ தூ²லதாய, ந துலக³ணனாய. பூ⁴மியம் பதிட்டி²தோ’’தி இமினா குடஸராவாதீ³ஸு ரோபிதம் படிக்கி²பதி, ததோ அபனேத்வா பன தங்க²ணம்பி பூ⁴மியம் ரோபிதோ வட்டதி. நவமூலஸாகா²னிக்³க³மனம் பன அகாரணம். க²ந்த⁴ம் சி²ந்தி³த்வா ரோபிதே பன ஏதம் யுஜ்ஜதி. ஸூசித³ண்ட³கப்பமாணோ கனிட்ட²ங்கு³லிபரிமாணமத்தோ. ‘‘அட்ட²ங்கு³லுப்³பே³தோ⁴’’தி இமினா உப்³பே³தோ⁴ பரிச்சி²ன்னோ ஹோதி, ‘‘கோ³விஸாணமத்தோ’’தி இமினா பரிணாஹோ. ‘‘ஏவம் ஸந்தேபி கோ³விஸாணபரிணாஹே பரிச்சே²தோ³ நத்தி², தஸ்மா கு²த்³த³கோபி மஹந்தோபி வட்டதி ஏவாதி வத³ந்தி.

ஜாதஸ்ஸரே பரிபுண்ணமேவ உத³கம் நிமித்தூபக³ம் தி³ஸ்வா அபரிபுண்ணம் அந்தரா டி²திபூ⁴தம் ‘‘ஜாதஸ்ஸரே ஸம்மதா’’தி வுத்தம் விபத்திம் ந ஆபஜ்ஜதீதி ‘‘நதி³யா ஸம்மதா, ஸமுத்³தே³ ஸம்மதா, ஜாதஸ்ஸரே ஸம்மதா’’தி ஏத்தா²பி லோணீ ந க³ஹிதா. ப³த்³த⁴ஸீமம் வா நதி³ஸமுத்³த³ஜாதஸ்ஸரே வா அனோக்கமித்வாதி ஏத்தா²பி ‘‘நதி³யா வா, பி⁴க்க²வே, ஸமுத்³தே³ வா ஜாதஸ்ஸரே வா’’தி (மஹாவ. 147) ஏத்தா²பி ந க³ஹிதா. தஸ்மா லோணீ ந அப³த்³த⁴ஸீமாதி சே? அப³த்³த⁴ஸீமாவ. ‘‘யோபி நதி³ம் வா ஸமுத்³த³ம் வா பி⁴ந்தி³த்வா நிக்க²ந்தஉத³கேன கதோ ஸோப்³போ⁴ ஏதம் லக்க²ணம் பாபுணாதி, அயம்பி ஜாதஸ்ஸரோயேவா’’தி (கங்கா². அட்ட². நிதா³னவண்ணனா) வுத்தத்தா ஜாதஸ்ஸரக்³க³ஹணேன க³ஹிதாதி தத்த² தத்த² அவுத்தா. ‘‘யாவதிகா தஸ்மிம் கா³மகே²த்தே’’தி வுத்தத்தா அஞ்ஞம்பி கா³மம் அந்தோ கத்வா ஸமானஸம்வாஸகஸீமாஸம்மன்னனகாலே தஸ்மிம் கா³மே பி⁴க்கூ² ஆக³ச்ச²ந்து வா மா வா, வட்டதி. அவிப்பவாஸஸீமாஸம்மன்னனகாலே ஆக³ந்தப்³ப³மேவ.

அக³மனபதே²ஸூதி ஏத்த² ஏகதி³வஸேன க³ந்த்வா பச்சாக³ந்தும் அஸக்குணேய்யட்டா²னேதி வத³ந்தி, ப³த்³த⁴ஸீமாபா⁴வம் படிக்கி²பித்வாதி அத்தோ².

‘‘ஸமந்தா உத³குக்கே²பா’’தி வுத்தத்தா ஸப்³ப³தி³ஸாஸு க³ஹேதப்³ப³மேவாதி சே? யதோ லப்³ப⁴தி, ததோ க³ஹேதப்³போ³ ‘‘யஸ்மிம் பதே³ஸே பகதிவீசியோ ஓத்த²ரித்வா ஸண்ட²ஹந்தி, ததோ பட்டா²ய கப்பியபூ⁴மி, தத்த² ட²த்வா உபோஸதா²தி³கம்மம் காதும் வட்டதீ’’தி வுத்தத்தா. அனுப³ந்தோ⁴ அட்³ட⁴மாஸோ அன்வட்³ட⁴மாஸோ, அட்³ட⁴மாஸஸ்ஸ வா அனு. யோ பன கேனசி அந்தமஸோ திரச்சா²னேனபி க²ணித்வா அகதோதி அதி⁴ப்பாயோ.

‘‘அஞ்ஞம் தத்தகம்யேவ பரிச்சே²த³ம் அனதிக்கமித்வா டி²தோபி கம்மம் கோபேதீ’’தி வுத்தத்தா அதிக்கமித்வா டி²தோ ந கோபேதீதி தீ³பிதமேவ ஹோதீதி உபதிஸ்ஸத்தே²ரோ, தம் பன ‘‘த்³வின்னம் உத³குக்கே²பானம் அந்தரே அஞ்ஞோ ஏகோ உத³குக்கே²போ உபசாரத்தா²ய ட²பேதப்³போ³’’தி வசனேன விருஜ்ஜ²தி. ஸமந்தபாஸாதி³காயஞ்ஹி ‘‘அஞ்ஞம் தத்தகம்யேவா’’தி பத³ம் நத்தி². தஸ்மா தஸ்ஸாதி⁴ப்பாயோ பரியேஸிதப்³போ³. அந்தோஉத³குக்கே²பஸீமாய உபசாரத்தா²ய ட²பிதம் உத³குக்கே²பபரிச்சே²த³ம் அனதிக்கமித்வாதி அத்தோ² க³ஹேதப்³போ³. தே²ரேன அஞ்ஞதா² பபஞ்சித்வா லிகி²தம்.

‘‘ஸபா⁴க³வத்து²னா லஹுகாபத்தி’’ந்தி வுத்தத்தா ஸபா⁴க³ஸங்கா⁴தி³ஸேஸம் ஆரோசேதும் வட்டதீதி சே? ந வட்டதி தே³ஸனாகா³மினிம் ஸந்தா⁴ய இத⁴ வுத்தத்தா. தஸ்மா ஏவ ஸமுச்சயக்க²ந்த⁴கே ‘‘ஸபா⁴க³ஸங்கா⁴தி³ஸேஸம் ஆபன்னஸ்ஸ பன ஸந்திகே ஆவிகாதும் ந வட்டதி. ஸசே ஆவிகரோதி, ஆபத்தி ஆவிகதா ஹோதி, து³க்கடா பன ந முச்சதீ’’தி (சூளவ. அட்ட². 102) வுத்தம். யதா² ஸங்கே⁴ன ‘‘ஸுணாது மே, ப⁴ந்தே, ஸங்கோ⁴…பே… படிகரிஸ்ஸதீ’’தி வத்வா உபோஸத²ம் காதும் லப⁴தி, ஏவம் தீஹி த்³வீஹிபி அஞ்ஞம் ஸுத்³த⁴ம் பஸ்ஸித்வா ‘‘படிகரிஸ்ஸாமா’’தி வத்வா உபோஸத²ம் காதும் வட்டதி. ஏகேனாபி ‘‘பரிஸுத்³த⁴ம் லபி⁴த்வா படிகரிஸ்ஸாமீ’’தி ஆபோ⁴க³ம் கத்வா உபோஸத²ம் காதும் வட்டதீதி. அட்ட²கதா²யம்பி ‘‘ஸாமந்தோ பி⁴க்கு² ஏவமஸ்ஸ வசனீயோதி ஏத்த² ஸபா⁴கோ³ ஏவ வத்தப்³போ³. விஸபா⁴க³ஸ்ஸ ஹி வுச்சமானே ப⁴ண்ட³னகலஹஸங்க⁴பே⁴தா³தீ³னிபி ஹோந்தி, தஸ்மா தஸ்ஸ அவத்வா இதோ வுட்ட²ஹித்வா படிகரிஸ்ஸாமீ’’தி ஆபோ⁴க³ம் கத்வா உபோஸதோ² காதப்³போ³தி அந்த⁴கட்ட²கதா²யம் வுத்த’’ந்தி வத்வா தஸ்ஸ அப்படிக்கி²த்தத்தா வட்டதீதி தீ³பிதமேவ. ‘‘யதா³ அஞ்ஞம் ஸுத்³த⁴ம் பி⁴க்கு²ம் அனாபத்திகம் பஸ்ஸிஸ்ஸதி, ததா³ தஸ்ஸ ஸந்திகே’’தி வுத்தத்தா லஹுகஸ்ஸேவ அனுஞ்ஞாதத்தா ஸமுச்சயக்க²ந்த⁴கே வுத்தத்தா ஸபா⁴க³ஸங்கா⁴தி³ஸேஸம் பன ஞத்தியா ஆரோசேத்வா உபோஸத²ம் காதும் ந வட்டதி.

தே³வப்³ரஹ்மா பன ‘‘திரச்சா²னக³தோ’’தி பத³ம் ட²பேத்வா யேன கேனசி பதே³ன அஸங்க³ஹிதாபி இமினா ஸங்க³ஹிதாதி த³ஸ்ஸனத்த²ம் ‘‘யஸ்ஸ உபஸம்பதா³ படிக்கி²த்தா’’தி வுத்தம்.

‘‘சாதுமாஸினியம் பன பவாரிதானம் ஸந்திகே அனுபக³தேன வா சி²ன்னவஸ்ஸேன வா வுட்ட²வஸ்ஸேன வா’’தி அவத்வா ‘‘அனுபக³தேன வா சி²ன்னவஸ்ஸேன வா’’தி ஏத்தகமேவ வுத்தம். வுட்ட²வஸ்ஸோ பன தஸ்மிம் காலே அனுபக³தத்தா ‘‘அனுபக³தோ’’தி ஸங்க்²யம் க³தோதி. ஸப்³பா³ய வுட்டி²தாய ஸப்³பே³ வுட்ட²ஹித்வா க³தே ஸன்னிபாதேதும் ந ஸக்கா, ஏகச்சே ஸன்னிபாதேத்வா பாரிஸுத்³தி⁴ம் ஆரோசேதும் வட்டதீதி வத³ந்தி. கஸ்மா? ஞத்திம் ட²பேத்வா கத்தப்³ப³ஸங்க⁴கம்மாபா⁴வா வக்³க³ம் ந ஹோதீதி. பவாரணாயபி ஏஸேவ நயோ. அயஞ்ஹேத்த² விஸேஸோ – ஸசே புரிமிகாய உபக³தேஹி பச்சி²மிகாய உபக³தா தோ²கதரா சேவ ஹோந்தி ஸமஸமா ச, ஸங்க⁴பவாரணாய ச க³ணம் பூரேந்தி, ஸங்க⁴பவாரணாவஸேன ஞத்தி ட²பேதப்³பா³தி. ‘‘ஏகோவ பி⁴க்கு² ஹோதி…பே… அஞ்ஞேஸம் அனாக³தபா⁴வம் ஞத்வா’’தி வுத்தத்தா அதி⁴ட்டா²னுபோஸத²ம் ஸீமம் பவிஸித்வா காதும் ந ஸக்காதி வத³ந்தி.

‘‘கிம் ஸங்க⁴ஸ்ஸ புப்³ப³கிச்ச’’ந்தி இத³ம் ந ஞத்திம் ட²பேத்வா வத்தப்³ப³ம். தஞ்ஹி ஞத்திதோ புரேதரமேவ கரீயதி. தஸ்மா ‘‘ஸுணாது மே, ப⁴ந்தே, ஸங்கோ⁴, கிம் ஸங்க⁴ஸ்ஸ புப்³ப³கிச்சம், யதி³ ஸங்க⁴ஸ்ஸ பத்தகல்ல’’ந்தி வத்தப்³ப³ம் ஸியாதி. ததா²பி ந வத்தப்³ப³ம். ந ஹி தம் ஞத்தியா அந்தோ கரீயதீதி. ஏவம் ஸந்தே நேதம் வத்தப்³ப³ந்தி ஆபஜ்ஜதி பயோஜனாபா⁴வாதி சே? ந, யதா²க³தட்டா²னே ஏவ வத்தப்³ப³தோ, பரபதா³பேக்க²தாயாதி வுத்தம் ஹோதி. இத³ம் புப்³ப³கிச்சம் அகத்வா உபோஸத²கம்மம் கரோந்தோ ஸங்கோ⁴, புக்³க³லோ வா ட²பனக்கே²த்தாதிக்கமே ஆபஜ்ஜதி. தஸ்மிஞ்ஹி கே²த்தே அதிக்கந்தே ஸம்மஜ்ஜனாதி³கரணே ஆபத்திமோக்கோ² ந ஹோதி உபோஸத²கம்மதோ புப்³பே³ கத்தப்³ப³கம்மாகரணபச்சயத்தா தஸ்ஸா ஆபத்தியா. ந ஸா கம்மபரியோஸானாபேக்கா² ஏத்தா²க³தஸம்பஜானமுஸாவாதா³பத்தி விய, தஸ்மா பாதிமோக்கு²த்³தே³ஸகோ பி⁴க்கு² ‘‘பாரிஸுத்³தி⁴ம் ஆயஸ்மந்தோ ஆரோசேதா²’’தி வத்துகாமோ பட²மமேவ பாரிஸுத்³தா⁴பாரிஸுத்³தி⁴பச்சயம் புப்³ப³கிச்சம் ஸராபேதி. தஞ்ஹி கதம் பாரிஸுத்³தி⁴பச்சயோ ஹோதி, அகதம் அபாரிஸுத்³தி⁴பச்சயோ. தேனேவ உப⁴யாபேக்கா²தி⁴ப்பாயேன கதம், ந கதந்தி அவத்வா ‘‘கிம் ஸங்க⁴ஸ்ஸ புப்³ப³கிச்ச’’மிச்சேவாஹ. தத்த² அகதபக்கே² தாவ பாரிஸுத்³தி⁴ஆரோசனக்கமனித³ஸ்ஸனத்த²ம் பரதோ ‘‘யஸ்ஸ ஸியா ஆபத்தி, ஸோ ஆவிகரேய்யா’’தி ச, கதபக்கே² ‘‘அஸந்தியா ஆபத்தியா துண்ஹீ ப⁴விதப்³ப³’’ந்தி ச வக்க²தி.

‘‘ஸப்³ப³ந்திமேன பரிச்சே²தே³ன சதூஹி பி⁴க்கூ²ஹி ஸன்னிபதித்வா’’தி ச, ‘‘உபோஸத²கரணத்த²ம் ஸன்னிபதிதே ஸங்கே⁴ ப³ஹி…பே… அதே³ந்தேன ச²ந்தோ³ தா³தப்³போ³’’தி ச வத³ந்தி. அஸன்னிபதிதேபி பன வட்டதி. இத³ஞ்ஹி ச²ந்த³தா³னஸமயத³ஸ்ஸனத்த²ம் வுத்தம். உபோஸத²கரணத்த²ம் ஸன்னிபதிதே ஸங்கே⁴ ப³ஹி உபோஸத²ம் கத்வா ஆக³தஸ்ஸ கத்தப்³பா³காரத³ஸ்ஸனத்த²ஞ்ச வுத்தம். பதா⁴னக⁴ரவாஸினோ பதா⁴னக⁴ரம் பவிஸிதுகாமா அத்தனோ ஸபா⁴க³பி⁴க்கூ²னம் ச²ந்த³ம் த³த்வா ஸசே ஸங்கோ⁴ ஸன்னிபததி, ‘‘மய்ஹம் ச²ந்தோ³ ஆரோசேதப்³போ³’’தி வத்வா பதா⁴னக⁴ரம் பவிஸந்தி. அயம் ஸீஹளதீ³பே பயோகோ³. ஆரோசேந்தேன பன ஸன்னிபதிதே ஆரோசேதப்³ப³ம். பஞ்சஸு பி⁴க்கூ²ஸு ஏகஸ்மிம் விஹாரே வஸந்தேஸு ஏகஸ்ஸ ச²ந்த³பாரிஸுத்³தி⁴ம் ஆஹரித்வா சதுன்னம் பாதிமோக்க²ம் உத்³தி³ஸிதும் அனுஞ்ஞாதத்தா ஸன்னிபதிதே ச²ந்தோ³ க³ஹேதப்³போ³ ஆரோசேதப்³போ³தி வசனம் நிரத்த²கம் விய. ‘‘தே²ய்யஸம்வாஸகோ படிஜானாதீதி (மஹாவ. 165) வசனதோ ஸாமணேரேன ஆஹடாபி வட்டதி. கம்மம் ந கோபேதீ’’தி ச, ‘‘ஸசே புப்³பே³ ச²ந்த³ம் த³த்வா ப³ஹிஸீமாக³தோ புன பவிஸதி, பச்சா² ச²ந்த³க்³க³ஹணகிச்சம் நத்தி², தஸ்ஸ பயோகோ³ ஸீமாஸம்முதிவஸேன வேதி³தப்³போ³’’தி ச ‘‘ச²ந்த³தா³னே திக்க²த்தும் வசனே இத³ம் பயோஜனம் – பட²மம் ஸமக்³க³பா⁴வம், து³தியம் பச்சா² விதா⁴தப்³ப³பா⁴வம், ததியம் ச²ந்த³ஹாரகஸ்ஸ து³க்கடமோசனம் தீ³பேதீ’’தி (வஜிர. டீ. மஹாவக்³க³ 164) ச லிகி²தம். பி³ளாலஸங்க²லிகாப³த்³தா⁴வ ஹோதி அந்தோகே³ஹே ஏவ ஸம்பயோஜனத்தா, யதா² ஸா ந கத்த²சி க³ச்ச²தி, ததா² ஸாபி ந கத்த²சி க³ச்ச²தீதி அதி⁴ப்பாயோ. இதரதா² விஸேஸனம் நிரத்த²கம் ஹோதீதி ஆசரியேன க³ஹிதம்.

‘‘ந ஹி தம் அகத்வா உபோஸத²ம் காதும் வட்டதீ’’தி புப்³பே³ த³ஸ்ஸிதத்தா ‘‘இத³ம்பி ஹி உப⁴ய’’ந்தி கஸ்மா வுத்தந்தி சே? ஸேஸானி தே²ரேன ஆணத்தேன காதப்³பா³னி த³ஸ்ஸிதானி, இமே பன த்³வே தே²ரேன வா பாதிமோக்கு²த்³தே³ஸகேன வா ஞத்திட்ட²பனகேன வா யேன வா தேன வா காதப்³பா³னீதி ச, ஸம்மஜ்ஜனாதீ³னி தத்த² தத்த² தாதி³ஸானி பயோஜனானி நிப்பா²தே³ந்தி, இமே பன த்³வே தத்த² தத்த² ந கிஞ்சி கம்மம் ஸாதே⁴ந்தி, தஸ்மா ‘‘கிம் இமினா’’தி அவத்வா காதப்³ப³மேவாதி த³ஸ்ஸேதுஞ்ச ‘‘இத³ம்பி ஹி உப⁴ய’’ந்திஆதி³ வுத்தம். ‘‘ஆயஸ்மந்தானம் பாதே³ வந்த³தீ’’தி க³ணவஸேன வத்வா புக்³க³லவஸேன ந வுத்தம் தேன ஆரோசேதப்³ப³ஸ்ஸ அஞ்ஞஸ்ஸ அபா⁴வா.

ஸங்க⁴ஸ்ஸ உத்³தி³ட்ட²ம் ஹோதீதி ஸங்கே⁴ன உத்³தி³ட்ட²ம் ஹோதீதி அத்தோ². ஸமக்³க³ஸ்ஸ ஹி ஸங்க⁴ஸ்ஸாதி ஏத்த² ஸமக்³க³பா⁴வஸ்ஸ காயஸாமக்³கி³காரணத்தா நத்தி² தோ³ஸோதி சே? தம் ந, உத்³தே³ஸேபி ஸவனேபி ஸமக்³க³பா⁴வஸ்ஸ இச்சி²தப்³ப³த்தா. ‘‘ஸுணாது மே, ப⁴ந்தே’’தி ஹி இமினா சித்தஸாமக்³கி³ம் தீ³பேதி ஸவனே ஸப்³பே³ஹி ஏகீபூ⁴தபா⁴வதோ.

ஸஞ்சிச்ச ஆபத்திம் ஆபஜ்ஜதீதி ஏத்த² அனாத³ரியவஸேன ஆபஜ்ஜந்தோ ஏவ அலஜ்ஜீ ஹோதி, ந இதரோதி. ஆபத்திம் பரிகூ³ஹதீதி ஏத்த² லஜ்ஜாய பரிகூ³ஹந்தோ அலஜ்ஜீ ந ஹோதி, ‘கிம் இமினா’தி அனாத³ரியவஸேன பரிகூ³ஹந்தோ ஹோதீ’’தி ச லிகி²தம்.

‘‘ஸத்தன்னம் ஆபத்திக்க²ந்தா⁴ன’’ந்தி ந வத்தப்³ப³ம், ‘‘ச²ன்ன’’ந்தி வத்தப்³ப³ந்தி சே? ஸத்தன்னமேவாதி வத்தப்³ப³ம். பாராஜிகாபத்திம் ஆபன்னோ ஹி ஸசே அத்தனோ ஸாபத்திகபா⁴வம் பகாஸேதி, ஸங்க⁴ஸ்ஸ ச உபோஸதோ² ஸம்பஜ்ஜதி, தஸ்ஸ ச கி³ஹிபா⁴வேன வா ஸாமணேரபா⁴வேன வா ஸுத்³தி⁴ ஹோதீதி.

ஏகச்சே ஆசரியா நாம த⁴ம்மபா⁴ரிகோ கிர ஆசரியோ. கஸ்மா ஏவம் வுத்தந்தி சே? யாவததியானுஸாவனா நாம திக்க²த்தும் வசனம். ததா² பாடே² அனாக³தத்தா கேவலம் ‘‘யாவததியம் அனுஸாவித’’ந்தி பத³மேவ தி³ஸ்வா ‘‘யஸ்ஸ ஸியா ஆபத்தி, ஸோ ஆவிகரேய்யா’’தி இத³ம் ‘‘ஸசே ஆபத்திம் ஆபன்னா, ஆவிகரோதா²’’தி இமமத்த²ம் தீ³பேதி. ‘‘அஸந்தியா ஆபத்தியா துண்ஹீ ப⁴விதப்³ப³’’ந்தி இத³ம்பி தமேவத்த²ம் தீ³பேதி. ‘‘துண்ஹீபா⁴வேன கோ² பனாயஸ்மந்தே பரிஸுத்³தா⁴தி வேதி³ஸ்ஸாமீ’’தி இத³ம்பி தமேவாதி ஏவமத்த²ம் க³ஹேத்வா வுத்தம் கிர.

அபரேதி அத்த²த³ஸ்ஸித்தே²ரோ கிர. ஏதம் ஸந்தா⁴யாதி ஏத்த² ‘‘ஸகிம்பி அனுஸாவித’’ந்தி பத³ஸ்ஸ வசனேன திக்க²த்தும் அனுஸாவனா காதப்³பா³தி ஏத்தகமேவ தீ³பிதம் விய தி³ஸ்ஸதி.

இமமத்த²ம் ஸந்தா⁴ய வுத்தந்தி கத²ம் விஞ்ஞாயதீதி சே? ‘‘அயமேத்த² ஆசரியபரம்பராப⁴தோ வினிச்ச²யோ’’தி வுத்தம்.

‘‘ஸரமானேனா’’தி இமினா ஸம்பஜானமுஸாவாத³ஸ்ஸ ஸசித்தகத்தம் த³ஸ்ஸேதி. ஸங்க⁴மஜ்ஜே² வாதிஆதி³ லக்க²ணவசனம் கிர. ஸங்கு⁴போஸத²கரணத்த²ம் ஸங்க⁴மஜ்ஜே² சே நிஸின்னோ, தஸ்மிம் ஸங்க⁴மஜ்ஜே² ஆவிகாதப்³பா³. க³ணுபோஸத²கரணத்த²ஞ்சே க³ணமஜ்ஜே² நிஸின்னோ, தஸ்மிம் க³ணமஜ்ஜே². ஏகஸ்ஸேவ ஸந்திகே சே பாரிஸுத்³தி⁴உபோஸத²ம் கத்துகாமோ, தஸ்மிம் ஏகபுக்³க³லே ஆவிகாதப்³பா³தி, ஏதேன ந கேவலம் ஸங்க⁴மஜ்ஜே² ஏவாயம் முஸாவாதோ³ ஸம்ப⁴வதி, அத² கோ² ஏத்த² வுத்தலக்க²ணேன அஸதிபி ‘‘பாரிஸுத்³தி⁴ம் ஆயஸ்மந்தோ ஆரோசேதா²’’திஆதி³விதா⁴னே க³ணுபோஸதே²பி ஸாபத்திகோ ஹுத்வா உபோஸத²ம் கத்துகாமோ அனாரோசேத்வா துண்ஹீபூ⁴தோவ சே கரோதி, அயம் ஸம்பஜானமுஸாவாதா³பத்திம் ஆபஜ்ஜதீதி இமஸ்ஸத்த²ஸ்ஸ ஆவிகரணதோ லக்க²ணவசனம் கிரேதந்தி வுத்தந்தி தக்கிகா. அஞ்ஞதா² ‘‘க³ணமஜ்ஜே² வா’’தி ந வத்தப்³ப³ந்தி தேஸம் அதி⁴ப்பாயோ. ஆரோசனாதி⁴ப்பாயவஸேன வுத்தந்தி ஆசரியஸ்ஸ தக்கோ. ஆரோசேந்தோ ஹி ‘‘ஸங்க⁴ஸ்ஸ ஆரோசேமீ’’தி அதி⁴ப்பாயேன ஆவிகரோந்தோ ஸங்க⁴மஜ்ஜே² ஆவிகரோதி நாம, உப⁴தோபஸ்ஸே நிஸின்னானம் ஆரோசேந்தோ க³ணமஜ்ஜே² ஆவிகரோதி நாம, ‘‘ஏகஸ்ஸேவ ஆரோசேஸ்ஸாமீ’’தி அதி⁴ப்பாயேன ஆவிகரோந்தோ ஏகபுக்³க³லே ஆவிகரோதி நாம. ஸசேபி வேமதிகோ ஹோதி…பே… படிகரிஸ்ஸாமீதி ஏவம் கதே யாவ வேமதிகோ ஹோதி, தாவ ஸபா⁴கா³பத்திம் படிக்³க³ஹேதும் லப⁴தி, அஞ்ஞேஸஞ்ச கம்மானம் பரிஸுத்³தோ⁴ நாம ஹோதி. புன நிப்³பே³மதிகோ ஹுத்வா தே³ஸேதப்³ப³ம் வா ந வாதி நேவ பாளியம், ந அட்ட²கதா²யம் அத்தி², தே³ஸிதே பன தோ³ஸோ நத்தி². ததா² இதோ வுட்ட²ஹித்வா தம் ஆபத்திம் படிகரிஸ்ஸாமீதி ஏத்த² ச ஸகலஸங்கே⁴ ஸபா⁴கா³பத்திம் ஆபன்னே, வேமதிகே சாதி லிகி²தம் (வஜிர. டீ. மஹாவக்³க³ 169-170).

நிதா³னவண்ணனா நிட்டி²தா.

பாராஜிககண்ட³ம்

1. பட²மபாராஜிகவண்ணனா

இத⁴ பன ட²த்வா ஸிக்கா²பதா³னம் கமபே⁴தோ³ பகாஸேதப்³போ³. கத²ம் – ஸப்³ப³ஸிக்கா²பதா³னம் யதா²ஸம்ப⁴வம் தே³ஸனாக்கமோ, பஹானக்கமோ, படிபத்திக்கமோ, உப்பத்திக்கமோதி சதுப்³பி³தோ⁴ கமோ லப்³ப⁴தி. தத்த² ப⁴க³வதா ராஜக³ஹே பி⁴க்கூ²னம் பாதிமோக்கு²த்³தே³ஸம் அனுஜானந்தேன பாதிமோக்கு²த்³தே³ஸஸ்ஸ யோ தே³ஸனாக்கமோ அனுஞ்ஞாதோ, தம் தே³ஸனாக்கமம் அனுக்கமந்தோவ மஹாகஸ்ஸபோ பட²மம் பாராஜிகுத்³தே³ஸம் புச்சி², தத³னந்தரம் ஸங்கா⁴தி³ஸேஸுத்³தே³ஸம், தத³னந்தரம் அனியதுத்³தே³ஸம், தத³னந்தரம் வித்தா²ருத்³தே³ஸம். தத³னந்தரம் பி⁴க்கு²னிவிப⁴ங்க³ஞ்ச தேனேவ அனுக்கமேன புச்சி². ததோ பரம் தயோ ஆபத்திக்க²ந்தே⁴ ஸங்க³ஹேதும் வினா க³ணனபரிச்சே²தே³ன ஸேகி²யத⁴ம்மே புச்சி². ஆபத்திக்க²ந்தே⁴ ஸபா⁴க³தோ பட்டா²ய புச்ச²ந்தோ வீஸதிக²ந்த⁴கே புச்சி². நிதா³னுத்³தே³ஸந்தோக³தா⁴னம் வா ஸரூபேன அனுத்³தி³ட்டா²னம் புச்ச²னத்த²ம் க²ந்த⁴கே புச்சி². ஏதேன க²ந்த⁴கே பஞ்ஞத்தா து²ல்லச்சயாபி ஸங்க³ஹிதா ஹோந்தி. புச்சி²தானுக்கமேனேவ ஆயஸ்மா உபாலித்தே²ரோ ப்³யாகாஸி. அயமேத்த² தே³ஸனாக்கமோ. உப⁴தோவிப⁴ங்க³க²ந்த⁴கதோ பன உச்சினித்வா ததா³ பரிவாரோ விஸும் பாளி கதோ, இமமேவ வசனம் ஸந்தா⁴ய அட்ட²கதா²யம் வுத்தம் ‘‘ஏதேனேவ உபாயேன க²ந்த⁴கம் பரிவாரேபி ஆரோபயிம்ஸூ’’திஆதி³ (பாரா. அட்ட². 1.பட²மமஹாஸங்க³ஈதிகதா²). அபிச பாளியம் ‘‘ஏதேனேவ உபாயேன உப⁴தோவிப⁴ங்கே³ புச்சி². புட்டோ² புட்டோ² ஆயஸ்மா உபாலி விஸ்ஸஜ்ஜேஸீ’’தி (சூளவ. 439) ஏத்தகமேவ வுத்தம். தஸ்மா தே²ரோ உப⁴தோவிப⁴ங்கே³ ஏவ புச்சி². விஸ்ஸஜ்ஜந்தோ பன ஆயஸ்மா உபாலி நிரவஸேஸம் த³ஸ்ஸேந்தோ க²ந்த⁴கபரிவாரே அந்தோ கத்வா தே³ஸேஸி. க³ணஸஜ்ஜா²யகாலே பன ததா³ க²ந்த⁴கபரிவாரா விஸும் பாளி கதாதி அயமேத்த² தே³ஸனாக்கமோ.

யதி³ ஏவம் நிதா³னுத்³தே³ஸோ பட²மதே³ஸனாதி சே? ந, உபோஸத²க்க²ந்த⁴கே (மஹாவ. 133) ‘‘யானி மயா பி⁴க்கூ²னம் ஸிக்கா²பதா³னி பஞ்ஞத்தானி, தானி நேஸம் பாதிமோக்கு²த்³தே³ஸம் அனுஜானேய்ய’’ந்தி வசனதோ, ‘‘யஸ்ஸ ஸியா ஆபத்தீ’’தி (மஹாவ. 134) வசனதோ ச. அகுஸலாப்³யாகதானம் ஆபத்தீனம் தி³ட்ட²த⁴ம்மஸம்பராயிகாஸவட்டா²னியத்தா யதா²பூ⁴தம் ஸீலஸம்வரகேன பரிவஜ்ஜனேன பஹாதப்³ப³த்தா பஹானக்கமோபேத்த² ஸம்ப⁴வதி ‘‘தாவதே³வ சத்தாரி அகரணீயானி ஆசிக்கி²தப்³பா³னீ’’தி வசனதோ. ததா² ‘‘ஸமாதா³ய ஸிக்க²தி ஸிக்கா²பதே³ஸூ’’தி (ம. நி. 3.75; விப⁴. 508) வசனதோ யதா²பூ⁴தம் ஆசிக்க²னஸிக்க²னேன படிபத்திக்கமோபி ஸம்ப⁴வதி. யது²த்³தே³ஸக்கமம் பரியாபுணிதப்³ப³பரியத்திஅத்தே²னாபி படிபத்திக்கமோ, ஏவமிமேஹி தீஹி கமேஹி தே³ஸேதப்³பா³னமேதேஸம் ஸிக்கா²பதா³னம் யதா²ஸம்ப⁴வம் உப்பத்திக்கமோ ஸம்ப⁴வதி. ததா² ஹி யம் யம் ஸாதா⁴ரணம், தம் தம் பி⁴க்கு²ம் ஆரப்³ப⁴ உப்பன்னே ஏவ வத்து²ஸ்மிம் ‘‘யா பன பி⁴க்கு²னீ ச²ந்த³ஸோ மேது²னம் த⁴ம்ம’’ந்திஆதி³னா நயேன பி⁴க்கு²னீனம்பி பஞ்ஞத்தம். யதோ பி⁴க்கு²னீனம் தம் அனுப்பன்னபஞ்ஞத்தி ந ஸியா, ததோ அனுப்பன்னபஞ்ஞத்தி தஸ்மிம் நத்தீ²தி (பரி. 201-202) பரிவாரவசனம் ந விருஜ்ஜ²தி. ஏத்தாவதா புரிமேன கமத்தயேன யம் பட²மம் தே³ஸேதப்³ப³ம், தம் பாராஜிகுத்³தே³ஸே பட²முப்பன்னத்தா மேது²னத⁴ம்மபாராஜிகம் ஸப்³ப³பட²மம் தே³ஸேதுகாமோ ஆயஸ்மா உபாலித்தே²ரோ ‘‘தத்ர ஸுத³ம் ப⁴க³வா வேஸாலியம் விஹரதீ’’தி (பாரா. 23) வேஸாலியமேவ பாபேத்வா ட²பேஸி.

இதா³னி ஸப்³பே³ஸம் ஸிக்கா²பதா³னம் பஞ்ஞாபனவிதா⁴னம் வேதி³தப்³ப³ம். கத²ம்? ‘‘ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாதா²’’தி (பாரா. 39, 43) ஏவம் ஸஉத்³தே³ஸஅனுத்³தே³ஸபே⁴த³தோ து³வித⁴ம். தத்த² பாதிமோக்கே² ஸரூபதோ ஆக³தா பஞ்ச ஆபத்திக்க²ந்தா⁴ ஸஉத்³தே³ஸபஞ்ஞத்தி நாம. ஸாபி த்³விதா⁴ ஸபுக்³க³லாபுக்³க³லனித்³தே³ஸபே⁴த³தோ. தத்த² யஸ்ஸா பஞ்ஞத்தியா அந்தோ ஆபத்தியா ஸஹ, வினா வா புக்³க³லோ த³ஸ்ஸிதோ, ஸா ஸபுக்³க³லனித்³தே³ஸா. இதரா அபுக்³க³லனித்³தே³ஸா.

தத்த² ஸபுக்³க³லனித்³தே³ஸா த்³விதா⁴ அத³ஸ்ஸிதத³ஸ்ஸிதாபத்திபே⁴த³தோ. தத்த² அத³ஸ்ஸிதாபத்திகா நாம அட்ட² பாராஜிகா த⁴ம்மா வேதி³தப்³பா³. ‘‘பாராஜிகோ ஹோதி அஸம்வாஸோ’’தி (பாரா. 39, 44, 89, 91, 167, 171, 195, 197) ஹி புக்³க³லோவ தத்த² த³ஸ்ஸிதோ, நாபத்தி. த³ஸ்ஸிதாபத்திகா நாம பி⁴க்கு²னிபாதிமோக்கே² ஆக³தா ஸத்தரஸ ஸங்கா⁴தி³ஸேஸா த⁴ம்மா. ‘‘அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸ’’ந்தி (பாசி. 683, 687) ஹி தத்த² ஆபத்தி த³ஸ்ஸிதா ஸத்³தி⁴ம் புக்³க³லேன.

ததா² அபுக்³க³லனித்³தே³ஸாபி அத³ஸ்ஸிதத³ஸ்ஸிதாபத்திபே⁴த³தோ த்³விதா⁴. தத்த² அத³ஸ்ஸிதாபத்திகா நாம ஸேகி²யா த⁴ம்மா. வுத்தாவஸேஸா த³ஸ்ஸிதாபத்திகாதி வேதி³தப்³பா³.

ஸாபி த்³விதா⁴ அனித்³தி³ட்ட²காரகனித்³தி³ட்ட²காரகபே⁴த³தோ. தத்த² அனித்³தி³ட்ட²காரகா நாம ஸுக்கவிஸட்டி²முஸாவாதோ³மஸவாத³பேஸுஞ்ஞபூ⁴தகா³மஅஞ்ஞவாத³கஉஜ்ஜா²பனகக³ணபோ⁴ஜனபரம்பரபோ⁴ஜனஸுராமேரயஅங்கு³லிபதோத³கஹஸத⁴ம்மஅனாத³ரியதலகா⁴தகஜதுமட்ட²கஸிக்கா²பதா³னம் வஸேன பஞ்சத³ஸவிதா⁴ ஹோந்தி. தத்த² நித்³தி³ட்ட²காரகே மிஸ்ஸாமிஸ்ஸபே⁴தோ³ வேதி³தப்³போ³ – தத்த² உபயோக³பு⁴ம்மவிப⁴த்தியோ ஏகம்ஸேன மிஸ்ஸா. அவஸேஸா மிஸ்ஸா ச அமிஸ்ஸா ச. ஸேய்யதி²த³ம் – பச்சத்தம் தாவ த்³வீஸு அனியதேஸு உபயோகே³ன மிஸ்ஸம், த்³வாத³ஸஸு பாடிதே³ஸனீயேஸு கரணேன மிஸ்ஸம், ஊனபஞ்சப³ந்த⁴னபத்தஸிக்கா²பதே³ஸு ஸாமிகரணேஹி, ஊனவீஸதிவஸ்ஸே பு⁴ம்மேன, மோஹனகே உபயோக³ஸாமிபு⁴ம்மேஹி. யஸ்மா ‘‘விவண்ணக’’ந்தி பா⁴வோ அதி⁴ப்பேதோ, ந கத்தா, தஸ்மா விவண்ணகஸிக்கா²பத³ம் யதா³ ந ஸம்ப⁴வதி, ஏவம் பச்சத்தம் பஞ்சவித⁴ம் மிஸ்ஸம் ஹோதி. ஸேஸேஸு பட²மானியதம் ட²பேத்வா ஆதி³ம்ஹி ‘‘யோ பன பி⁴க்கூ²’’தி ஏவமாக³தம் பச்சத்தம் வா, து³தியானியதம் ட²பேத்வா பணீதபோ⁴ஜனஸமணுத்³தே³ஸததியசதுத்த²பாடிதே³ஸனீயஸிக்கா²பதே³ஸு மஜ்ஜே² ‘‘யோ பன பி⁴க்கூ²’’தி ஏவமாக³தம் பச்சத்தம் வா, து³ப்³ப³சகுலதூ³ஸகஸம்ஸட்ட²ஸிக்கா²பதே³ஸு ஆதி³ம்ஹி கேவலம் ‘‘பி⁴க்கூ²’’தி ஆக³தம் பச்சத்தம் வா, பே⁴தா³னுவத்தகஸிக்கா²பதே³ மஜ்ஜே² ஆக³தம் பச்சத்தம் வா அஞ்ஞாய விப⁴த்தியா அமிஸ்ஸமேவ ஹோதி. தத்த² பே⁴தா³னுவத்தகதுவட்டனத்³வயஸம்ஸட்ட²து³தியபாடிதே³ஸனீயஸிக்கா²பதே³ஸு ப³ஹுவசனம், இதரத்த² ஸப்³ப³த்த² ஏகவசனமேவாதி வேதி³தப்³ப³ம்.

ததா² உபயோகோ³ த்³வீஸு விகப்பனஸிக்கா²பதே³ஸு, தந்தவாயஸிக்கா²பதே³ ச பச்சத்தேன மிஸ்ஸோ, அபி⁴ஹடஸிக்கா²பதே³ கரணேன, ராஜஸிக்கா²பதே³ கரணஸாமிபச்சத்தேஹீதி உபயோகோ³ திதா⁴ மிஸ்ஸோ ஹோதி. கரணஞ்ச குடிகாரமஹல்லகது³தியகதி²னத்³வேபா⁴க³னிஸீத³னஸந்த²தது³ப்³ப³ண்ணகரணஸிக்கா²பதே³ஸு ச²ஸு பச்சத்தேன மிஸ்ஸம், பட²மததியகதி²னஅட்ட²ங்கு³லபாத³கனிஸீத³னகண்டு³ப்படிச்சா²தி³கவஸ்ஸிகஸாடிகஉத³கஸாடிகத்³வேத⁴ம்மபச்சாஸீஸனஸிக்கா²பதே³ஸு அட்ட²ஸு ஸாமினா மிஸ்ஸந்தி கரணம் த்³விதா⁴ மிஸ்ஸம் ஹோதி. அவஸேஸேஸு ச²ப்³ப³ஸ்ஸவஸ்ஸிகஸாடிகத்³வத்திச்ச²த³னாவஸத²பிண்ட³மஹானாமக³ருலஹுபாவுரணஸிக்கா²பதே³ஸு ஸத்தஸு கரணவிப⁴த்தி அஞ்ஞவிப⁴த்தியா அமிஸ்ஸா, அச்சேகஏளகலோமஸிக்கா²பதே³ஸு ஸாமிவிப⁴த்தி கரணவிப⁴த்தியா மிஸ்ஸா. அதிரேகபத்தபே⁴ஸஜ்ஜஸிக்கா²பதே³ஸு அக்³க³ஹிதக்³க³ஹணேன ஸாமிவிப⁴த்தி அமிஸ்ஸாவ ஹோதீதி வேதி³தப்³பா³. ஏவம் தாவ நித்³தி³ட்ட²காரகேஸு ஸிக்கா²பதே³ஸு –

பஞ்சதா⁴ ச திதா⁴ சேவ, த்³விதா⁴ சேபி ததே²கதா⁴;

பி⁴ன்னா விப⁴த்தியோ பஞ்ச, ஸப்³பே³காத³ஸதா⁴ ஸியும்.

ஏவம் தாவ யதா²வுத்தேஸு ஸஉத்³தே³ஸபஞ்ஞத்திஸங்கா²தேஸு ஸிக்கா²பதே³ஸு அக்³க³ஹிதக்³க³ஹணேன பஞ்ஞாஸுத்தரேஸு திஸதேஸு நவுதிஅனித்³தி³ட்ட²காரகே வஜ்ஜேத்வா நித்³தி³ட்ட²காரகானி அதிரேகஸட்டி²த்³விஸதானி ஹோந்தி. தேஸு பச்சத்தகரணானி திம்ஸுத்தரானி த்³விஸதானி ஹோந்தி. தேஸு அமிஸ்ஸபச்சத்தகரணானி த்³வாத³ஸுத்தரானி த்³விஸதானி, மிஸ்ஸபச்சத்தகரணானி அட்டா²ரஸ ஹோந்தி. அவஸேஸேஸு திம்ஸதியா ஸிக்கா²பதே³ஸு மிஸ்ஸோபயோக³கரணானி பஞ்ச ஹோந்தி, மிஸ்ஸகரணானி சுத்³த³ஸ, அமிஸ்ஸானி ஸத்த, மிஸ்ஸாமிஸ்ஸகரணானி த்³வே, அமிஸ்ஸானி த்³வேதி ஸப்³பே³ஸுபி நித்³தி³ட்ட²காரகேஸு பே⁴தா³னுவத்தகது³ப்³ப³சகுலதூ³ஸகபட²மது³தியததியகதி²னஅபி⁴ஹடகுடிகாரமஹல்லகவிகப்பனத்³வயத்³வேபா⁴க³ச²ப்³ப³ஸ்ஸனிஸீத³னஸந்த²தஏளகலோமாதிரேகபத்தபே⁴ஸஜ்ஜவஸ்ஸிகஸாடிகதந்தவாயஅச்சேகசா²ரத்தத்³வ பஞ்சத்திம்ஸேஸு ‘‘யோ பன பி⁴க்கூ²’’தி நத்தி². து³தியானியதபணீதபோ⁴ஜனஸமணுத்³தே³ஸததியசதுத்த²பாடிதே³ஸனீயேஸு மஜ்ஜே² அத்தி².

ஏத்தாவதா ஸஉத்³தே³ஸானுத்³தே³ஸது³கம், ஸபுக்³க³லாபுக்³க³லனித்³தே³ஸது³கம், பச்சேகத³ஸ்ஸிதாபத்திது³கத்³வயம், அனித்³தி³ட்ட²காரகது³கம், தத்த² நித்³தி³ட்ட²காரகேஸு பச்சத்தபு⁴ம்மது³கம், ஸயோபனாயோபனது³கம், அயோபனமஜ்ஜே²யோபனது³கம், ஏகானேகவசனது³கந்தி நவ து³கானி த³ஸ்ஸிதானி ஹோந்தி. விஸேஸகாரணம் தஸ்மிம் தஸ்மிம் ஸிக்கா²பதே³ ஸம்பத்தே ஆவிப⁴விஸ்ஸதி. ஏவம் தாவ ஸஉத்³தே³ஸபஞ்ஞத்திம் ஞத்வா ஸேஸவினயபிடகே யா காசி பஞ்ஞத்தி அனுத்³தே³ஸபஞ்ஞத்தீதி வேதி³தப்³பா³. ஸா பத³பா⁴ஜனந்தராபத்திவினீதவத்து²படிக்கே²பபஞ்ஞத்திஅவுத்தஸித்³தி⁴ஸிக்கா²பத³வஸேன ச²ப்³பி³தா⁴ ஹோதி.

தத்த² ‘‘யேபு⁴ய்யேன க²யிதே ஆபத்தி து²ல்லச்சயஸ்ஸ (பரி. 157-158), வட்டகதே முகே² அச்சு²பந்தஸ்ஸ ஆபத்தி து³க்கடஸ்ஸா’’தி (பாரா. 73) ஏவமாதி³கா பத³பா⁴ஜனே ஸந்தி³ஸ்ஸமானாபத்தி பத³பா⁴ஜனஸிக்கா²பத³ம் நாம. ‘‘ந ச, பி⁴க்க²வே, ஸப்³ப³மத்திகாமயா குடி காதப்³பா³, யோ கரேய்ய, ஆபத்தி து³க்கடஸ்ஸா’’திஆதி³ (பாரா. 85) அந்தராபத்திஸிக்கா²பத³ம் நாம. ‘‘அனுஜானாமி, பி⁴க்க²வே, தி³வாபடிஸல்லீயந்தேன த்³வாரம் ஸம்வரித்வா படிஸல்லீயிது’’ந்தி (பாரா. 77) ஏவமாதி³ வினீதவத்து²ஸிக்கா²பத³ம் நாம. ‘‘ஸங்க⁴பே⁴த³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³’’தி (மஹாவ. 115) ஏவமாதி³ படிக்கே²பஸிக்கா²பத³ம் நாம.

யஸ்மா பன தேன தேன படிக்கே²பேன ‘‘யோ பன பி⁴க்கு² ஸமக்³க³ம் ஸங்க⁴ம் அத⁴ம்மஸஞ்ஞீ பி⁴ந்தே³ய்ய, பாராஜிகோ ஹோதி அஸம்வாஸோ. யோ பன பி⁴க்கு² து³ட்ட²சித்தோ ப⁴க³வதோ ஜீவமானகஸரீரே லோஹிதம் உப்பாதே³ய்ய, பாராஜிகோ ஹோதி அஸம்வாஸோ’’தி ஸிக்கா²பதா³னி பஞ்ஞத்தானி ஹோந்தி. யானி ஸந்தா⁴ய ‘‘ஏகஸ்ஸ சே²ஜ்ஜகா ஹோதி, சதுன்னம் து²ல்லச்சயம், சதுன்னஞ்சேவ அனாபத்தி, ஸப்³பே³ஸம் ஏகவத்து²கா’’தி வுத்தம். ‘‘அத்தா²பத்தி திட்ட²ந்தே ப⁴க³வதி ஆபஜ்ஜதி, நோ பரினிப்³பு³தே’’தி (பரி. 323) ச வுத்தம். தேன ந கேவலம் ‘‘ந, பி⁴க்க²வே, ஜானம் ஸங்க⁴பே⁴த³கோ அனுபஸம்பன்னோ உபஸம்பாதே³தப்³போ³…பே… ஆபத்தி து³க்கடஸ்ஸா’’தி இத³மேவ ஸிக்கா²பத³ம் பஞ்ஞத்தம் ஹோதி ஸாத⁴கம் ஹோதி. ‘‘பண்ட³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’தி (மஹாவ. 109) ஏவமாதீ³ஸு பன உபஜ்ஜா²யாதீ³னம் து³க்கடமேவ பஞ்ஞத்தம், ந பண்ட³காதீ³னம் பாராஜிகாபத்தி. ந ஹி தேஸம் பி⁴க்கு²பா⁴வோ அத்தி². யதோ ஸியா பாராஜிகாபத்தி. ததா² ‘‘ந அச்சி²ன்னே தே²வே பக்கமிதப்³ப³’’ந்தி (மஹாவ. 66, 67, 78, 79) ஏவமாதி³கஞ்ச படிக்கே²பஸிக்கா²பத³மேவ நாம.

க²ந்த⁴கேஸு பஞ்ஞத்தது³க்கடது²ல்லச்சயானி பஞ்ஞத்திஸிக்கா²பத³ம் நாம. ‘‘தேன ஹி, ஸாரிபுத்த, பே⁴தா³னுவத்தகே து²ல்லச்சயம் தே³ஸாபேஹீ’’தி (சூளவ. 345) வுத்தம், து²ல்லச்சயம்பி தத்தே²வ ஸமோதா⁴னம் க³ச்ச²தி. இத³ம் தேஸம் விப⁴த்திகம்மக்க²ணே அபஞ்ஞத்தத்தா அவிஜ்ஜமானம்பி ப⁴க³வதோ வசனேன விஸுத்³த⁴க்க²ணேபி விஜ்ஜமானம் ஜாதந்தி ஏகே. ‘‘பே⁴தா³னுவத்தகே தே³ஸாபேஹீ’’தி வசனதோ ஸேஸபே⁴தா³னுவத்தகானம் ‘‘யோ பன பி⁴க்கு² ஜானம் ஸங்க⁴பே⁴த³கானம் அனுவத்தேய்ய, ஆபத்தி து²ல்லச்சயஸ்ஸா’’தி ஸிக்கா²பத³ம் பஞ்ஞத்தம் ஹோதீதி வேதி³தப்³ப³ம். ததா² ஸப்³பா³னி க²ந்த⁴கவத்தானி, வினயகம்மானி ச தத்தே²வ ஸமோதா⁴னம் க³ச்ச²ந்தி. யதா²ஹ ‘‘பஞ்ஞத்தே தம் உபாலி மயா ஆக³ந்துகானம் பி⁴க்கூ²னம் ஆக³ந்துகவத்தம்…பே… ஏவம் ஸுபஞ்ஞத்தே கோ² மயா உபாலி ஸிக்கா²பதே³’’திஆதி³. ‘‘யா பன பி⁴க்கு²னீ நச்சம் வா கீ³தம் வா வாதி³தம் வா த³ஸ்ஸனாய க³ச்சே²ய்ய, பாசித்திய’’ந்தி (பாசி. 834) இமினா ஸுத்தேன பி⁴க்கு²னீ நச்சேய்ய வா கா³யேய்ய வா வாதே³ய்ய வா, பாசித்தியந்தி ஏவமாதி³கம் யம் கிஞ்சி அட்ட²கதா²ய தி³ஸ்ஸமானம் ஆபத்திஜாதம் வினயகம்மம் வா அவுத்தஸித்³தி⁴ஸிக்கா²பத³ம் நாம. ச²ப்³பி³த⁴ம்பேதம் ச²ஹி ஆகாரேஹி உத்³தே³ஸாரஹம் ந ஹோதீதி அனுத்³தே³ஸஸிக்கா²பத³ம் நாமாதி வேதி³தப்³ப³ம். ஸேய்யதி²த³ம் – பஞ்சஹி உத்³தே³ஸேஹி யதா²ஸம்ப⁴வம் விஸபா⁴க³த்தா து²ல்லச்சயது³ப்³பா⁴ஸிதானம் ஸபா⁴க³வத்து²கம்பி து³க்கடது²ல்லச்சயத்³வயம் அஸபா⁴கா³பத்திகத்தா அந்தராபத்திபஞ்ஞத்திஸிக்கா²பதா³னம், நானாவத்து²காபத்திகத்தா படிக்கே²பஸிக்கா²பதா³னம், கேஸஞ்சி வினீதவத்து²பஞ்ஞத்திஸிக்கா²பதா³னஞ்ச அத³ஸ்ஸிதாபத்திகத்தா, அத³ஸ்ஸிதவத்து²கத்தா பே⁴தா³னுவத்தகது²ல்லச்சயஸ்ஸ, அத³ஸ்ஸிதாபத்திவத்து²கத்தா அவுத்தஸித்³தி⁴ஸிக்கா²பதா³னந்தி. ஏத்தாவதா ‘‘து³வித⁴ம் ஸிக்கா²பத³பஞ்ஞாபனம் ஸஉத்³தே³ஸானுத்³தே³ஸபே⁴த³தோ’’தி யம் வுத்தம், தம் ஸமாஸதோ பகாஸிதம் ஹோதி.

பஞ்ஞத்தியம் தாவ –

‘‘காரகோ இத⁴ நித்³தி³ட்டோ², அபேக்கா²ய அபா⁴வதோ;

புப்³பே³ வத்தப்³ப³விதா⁴னா-பா⁴வதோ ச ஆதி³தோ யோபனேன ஸஹா’’தி. –

அயம் நயோ வேதி³தப்³போ³. தஸ்ஸத்தோ² – யே தே அனித்³தி³ட்ட²காரகா புப்³பே³ வுத்தப்பபே⁴தா³ ஸுக்கவிஸட்டி²ஆத³யோ ஸிக்கா²பத³விஸேஸா, தேஸு அதி⁴ப்பாயகம்மவத்து²புக்³க³லபயோகே³ அபேக்கா²ய பா⁴வதோ காரகோ ந நித்³தி³ட்டோ² தேஸம் ஸாபேக்க²பா⁴வத³ஸ்ஸனத்த²ம். தம் ஸப்³ப³ம் தஸ்மிம் தஸ்மிம் ஸிக்கா²பதே³ ஆவிப⁴விஸ்ஸதி, இத⁴ பன பாராஜிகபஞ்ஞத்தியம் அபேக்கா²ய அபா⁴வதோ காரகோ நித்³தி³ட்டோ². யோ பன காரகோ ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மி’’ந்திஆதீ³ஸு (பாரா. 462, 472, 475) விய புப்³பே³ வத்தப்³ப³விதா⁴னாபா⁴வதோ கரணாதி³வஸேன அனித்³தி³ஸித்வா பச்சத்தவஸேன நித்³தி³ட்டோ² அபேக்கா²ய அபா⁴வதோ. தத்த² நித்³தி³ஸியமானோ ஸேஸது³தியானியதபணீதபோ⁴ஜனம் ஸமணுத்³தே³ஸததியசதஉத்த²பாடிதே³ஸனீயேஸு விய மஜ்ஜே² அனித்³தி³ஸித்வா ‘‘ந ஹேவ கோ² பன…பே… ஓபா⁴ஸிது’’ந்திஆதி³ (பாரா. 453) விய புப்³பே³ வத்தப்³ப³விதா⁴னாபா⁴வதோ ஏவ ஆதி³ம்ஹி நித்³தி³ட்டோ². ஆதி³ம்ஹி நித்³தி³ஸியமானோபி புப்³பே³ வுத்தப்பபே⁴தே³ஸு பே⁴தா³னுவத்தகாதீ³ஸு பஞ்சத்திம்ஸேஸு ஸிக்கா²பதே³ஸு விய அனித்³தி³ஸித்வா புப்³பே³ வத்தப்³ப³விதா⁴னாபா⁴வதோ ஏவ ‘‘யோ பன பி⁴க்கூ²’’திஆதி³தோவ யோபன-ஸத்³தே³ன ஸஹ நித்³தி³ட்டோ². ஏவம் நித்³தி³ஸியமானோபி ஸோ யஸ்மா ‘‘யா பன பி⁴க்கு²னியோ த்³வே ஏகமஞ்சே துவட்டேய்யு’’ந்திஆதி³ (பாசி. 933) ஆபத்தி விய பரப்பப⁴வம் ஆபத்திம் ந ஆபஜ்ஜதி, தஸ்மா ‘‘யோ பன பி⁴க்கூ²’’தி ஏகவசனேன நித்³தி³ட்டோ². மேது²னத⁴ம்மாபத்திபி பரப்பப⁴வா ‘‘த்³வயம்த்³வயஸமாபத்தீ’’தி (பாரா. 39) வசனதோதி சே? தம் ந, அதி⁴ப்பாயஜானனதோ. அனேகிஸ்ஸா ஏவ பி⁴க்கு²னியா ஆபத்தி, ந ஏகிஸ்ஸாதி நியமோ தத்த² அத்தி², ந ஏவம் இத⁴ நியமோதி அனியமிதாதி⁴ப்பாயோ. லம்பீ³முது³பிட்டீ²னம் குதோ ‘‘த்³வயம்த்³வயஸமாபத்தீ’’தி (பாரா. 55) வசனதோ தேஸம் மேது²னத⁴ம்மாபத்தி. அயமத்தோ² சதஸ்ஸோ மேது²னத⁴ம்மபச்சயாதி அட்ட²வத்து²கம் ஸந்தா⁴ய ‘‘சே²ஜ்ஜம் ஸியா மேது²னத⁴ம்மபச்சயா’’தி (பரி. 481) ச பரிவாரே வுத்தவசனேன ஸாதே⁴தப்³போ³.

பே⁴தா³னுவத்தகஸிக்கா²பதே³ திண்ணம் உத்³த⁴ம் ந ஸமனுபா⁴ஸிதப்³பா³, ந ஸங்கே⁴ன ஸங்க⁴ம் ஏகதோ காதப்³ப³ந்தி. நயத³ஸ்ஸனத்த²ம் ஆதி³தோவ ‘‘பி⁴க்கூ² ஹோந்தீ’’தி ப³ஹுவசனனித்³தே³ஸம் கத்வா புன ‘‘ஏகோ வா த்³வே வா தயோ வா’’தி (பாரா. 418) வுத்தம், அஞ்ஞதா² ந ததோ உத்³த⁴ம் ‘‘அனுவத்தகா ஹோந்தீ’’தி ஆபஜ்ஜதி. ததோ நிதா³னவிரோதோ⁴. பஞ்சஸதமத்தா ஹி தத³னுவத்தகா அஹேஸும். யம் பன ஸத்தஸதிகக்க²ந்த⁴கே ‘‘ஸங்கோ⁴ சத்தாரோ பாசீனகே பி⁴க்கூ², சத்தாரோ பாவேய்யகே பி⁴க்கூ² ஸம்மன்னேய்ய …பே… ஸம்மதா’’திஆதி³ (சூளவ. 456) ஞத்திது³தியகம்மம் வுத்தம், தம் ‘‘உப்³பா³ஹிகாய இமம் அதி⁴கரணம் வூபஸமேது’’ந்தி வுத்தத்தா தேஹி கத்தப்³ப³விதா⁴னம். ஸம்முதிகரணமேவ வா ததியம் கத்வா கப்பதி. ந ஹி தே தேன கம்மேன கம்மாரஹா கம்மகதா ஹோந்தி. யஸ்ஸ ஸங்கோ⁴ கம்மம் கரோதி, ஸோ கம்மாரஹோதி லக்க²ணம். ந ச ததா³ ஸங்கோ⁴ தேஸம் அட்ட²ன்னம்பி பி⁴க்கூ²னம் கம்மம் அகாஸி. ப⁴ஜாபியமானா தே கம்மபத்தபா⁴வம் ப⁴ஜந்தி. அதி⁴கரணவூபஸமகம்மஸ்ஸ பத்தா யுத்தா ஸங்கே⁴ன கதாதி கத்வா கம்மபத்தா ஏவ ஹி தே ஹோந்தி. ‘‘தே பி⁴க்கூ² பி⁴க்கூ²ஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³யா’’தி (பாரா. 418) வசனதோ தேஹி கத்தப்³ப³விதா⁴னம். ஸம்முதிகரணமேவ கம்மம் ஹோதீதி சே? தம் ந, அதி⁴ப்பாயஜானனதோ, தஸ்ஸ படினிஸ்ஸக்³கா³ய ஏவ தே பி⁴க்கூ² கம்மாரஹா காதப்³பா³, ந தோ³ஸாக³திவஸேனாதி அயமேத்த² அதி⁴ப்பாயோ. ந ஹி பாசீனகாதீ³னம் ஸம்முதியா அதி⁴கரணவூபஸமஸித்³தி⁴ விய தேஸம் ஸமனுபா⁴ஸனகம்மேன தஸ்ஸ படினிஸ்ஸக்³க³ஸித்³தி⁴ ஹோதி, ஸம்முதி நாமேஸா பட²மம் அனுமதிம் க³ஹேத்வா யாசித்வாவ கரீயதி, ந ததா² கம்மந்தி. கம்மகரணே பன தத³த்த²ஸித்³தி⁴ ஹோதியேவ. பரஸம்முதியா ப³ஹுதராவ ஸம்மன்னிதப்³பா³தி வேதி³தப்³ப³ம்.

‘‘மேது²னத⁴ம்ம’’ந்தி ஏவம் பா³ஹுல்லனயேன லத்³த⁴னாமகம் ஸகபயோகே³ன வா பரபயோகே³ன வா அத்தனோ நிமித்தஸ்ஸ ஸகமக்³கே³ வா பரமக்³கே³ வா பரனிமித்தஸ்ஸ வா ஸகமக்³கே³ ஏவ பவேஸனபவிட்ட²ட்டி²தஉத்³த⁴ரணேஸு யம் கிஞ்சி ஏகம் படிஸாதி³யனவஸேன ஸேவேய்ய, பாராஜிகோ ஹோதி அஸம்வாஸோதி. கேசி பன ‘‘பவேஸனாதீ³னி சத்தாரி வா தீணி வா த்³வே வா ஏகம் வா படிஸேவேய்ய, பாராஜிகோ ஹோதி. வுத்தஞ்ஹேதம் ‘ஸோ சே பவேஸனம் ஸாதி³யதி, பவிட்ட²ம் ஸாதி³யதி, டி²தம் ஸாதி³யதி, உத்³த⁴ரணம் ஸாதி³யதி, ஆபத்தி பாராஜிகஸ்ஸா’திஆதீ³’’தி (பாரா. 58) வத³ந்தி. தேஸம் மதேன சதூஸுபி சதஸ்ஸோ பாராஜிகாபத்தியோ ஆபஜ்ஜதி. தேயேவ ஏவம் வத³ந்தி – ஆபஜ்ஜது மேது²னத⁴ம்மபாராஜிகாபத்தி, மேது²னத⁴ம்மபாராஜிகாபத்தியா தம்பா⁴கி³யாதி அத்தனோ வீதிக்கமே பாராஜிகாபத்தியோ, ஸங்கா⁴தி³ஸேஸாபத்திஞ்ச ஆபஜ்ஜித்வா ஸிக்க²ம் பச்சக்கா²ய க³ஹட்ட²காலே மேது²னாதி³கம் பாராஜிகம் ஆபஜ்ஜித்வா புன பப்³ப³ஜித்வா உபஸம்பஜ்ஜித்வா ஏகம் ஸங்கா⁴தி³ஸேஸாபத்திம் ஏகமனேகம் வா படிகரித்வாவ ஸோ புக்³க³லோ யஸ்மா நிராபத்திகோ ஹோதி, தஸ்மா ஸோ க³ஹட்ட²காலே ஸாபத்திகோவாதி. அந்திமவத்து²அஜ்ஜா²பன்னஸ்ஸாபி அத்தே²வ ஆபத்தி. வுட்டா²னதே³ஸனாஹி பன அஸுஜ்ஜ²னதோ ‘‘பயோகே³ பயோகே³ ஆபத்தி பாராஜிகஸ்ஸா’’தி ந வுத்தம். க³ணனபயோஜனாபா⁴வதோ கிஞ்சாபி ந வுத்தம், அத² கோ² பத³பா⁴ஜனே (பாரா. 58) ‘‘ஆபத்தி பாராஜிகஸ்ஸா’’தி வசனேனாயமத்தோ² ஸித்³தோ⁴தி யுத்திஞ்ச வத³ந்தி.

யதி³ ஏவம் மாதிகாயம்பி ‘‘யோ பன பி⁴க்கு² மேது²னம் த⁴ம்மம் படிஸேவேய்ய, பாராஜிக’’ந்தி வத்தப்³ப³ம் ப⁴வேய்ய, பாராஜிகஸ்ஸ அனவஸேஸவசனம்பி ந யுஜ்ஜேய்ய. ஸப்³பே³பி ஹி ஆபத்திக்க²ந்தே⁴, பி⁴க்கு²க³ணனஞ்ச அனவஸேஸேத்வா திட்ட²தீதி அனவஸேஸவசனந்தி கத்வா பவேஸேவ ஆபத்தி, ந பவிட்டா²தீ³ஸு. தமேவேகம் ஸந்தா⁴ய ‘‘யஸ்ஸ ஸியா ஆபத்தீ’’தி (மஹாவ. 134) பாராஜிகாபத்திம்பி அந்தோ கத்வா நிதா³னுத்³தே³ஸவசனம் வேதி³தப்³ப³ம். தஸ்மா மாதிகாயம் ‘‘பாராஜிக’’ந்தி அவத்வா ‘‘பாராஜிகோ ஹோதீ’’தி (பாரா. 42, 44) புக்³க³லனித்³தே³ஸவசனம் தேன ஸரீரப³ந்த⁴னேன உபஸம்பதா³ய அப⁴ப்³ப³பா⁴வதீ³பனத்த²ம். ‘‘ஆபத்தி பாராஜிகஸ்ஸா’’தி பத³பா⁴ஜனே வசனம் அந்திமவத்து²ம் அஜ்ஜா²பன்னஸ்ஸாபி பாராஜிகஸ்ஸ அஸம்வாஸஸ்ஸ ஸதோ புக்³க³லஸ்ஸ அதே²ய்யஸம்வாஸகபா⁴வதீ³பனத்த²ம். ந ஹி ஸோ ஸம்வாஸம் ஸாதி³யந்தோபி தே²ய்யஸம்வாஸகோ ஹோதி, தஸ்மா உபஸம்பன்னோ ‘‘பி⁴க்கூ²’’த்வேவ வுச்சதி. தேனேவாஹ ‘‘அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ, தஞ்சே ஸுத்³த⁴தி³ட்டி² ஸமானோ அனோகாஸம் காராபேத்வா அக்கோஸாதி⁴ப்பாயோ வத³தி, ஆபத்தி ஓமஸவாதே³ன து³க்கடஸ்ஸா’’தி (பாரா. 389) அனுபஸம்பன்னஸ்ஸ தத³பா⁴வதோ ஸித்³தோ⁴ ஸோ உபஸம்பன்னோ ‘‘பி⁴க்கூ²’’த்வேவ வுச்சதீதி, தேன பத³ஸோத⁴ம்மம், ஸஹஸேய்யஞ்ச ஜனேதி, பி⁴க்கு²பேஸுஞ்ஞாதி³ஞ்ச ஜனேதீதி வேதி³தப்³ப³ம் (வஜிர. டீ. பாராஜிக 39).

நிதா³னா மாதிகாபே⁴தோ³, விப⁴ங்கோ³ தன்னியாமகோ;

ததோ ஆபத்தியா பே⁴தோ³, அனாபத்தி தத³ஞ்ஞதா²தி. (வஜிர. டீ. பாராஜிக 43-44) –

அயம் நயோ வேதி³தப்³போ³. தத்த² ஸுதி³ன்னவத்து² (பாரா. 24 ஆத³யோ)-மக்கடிவத்து² (பாரா. 40 ஆத³யோ)-வஜ்ஜிபுத்தகவத்து² (பாரா. 43) சாதி திப்பபே⁴த³வத்து² இமஸ்ஸ ஸிக்கா²பத³ஸ்ஸ நிதா³னம் நாம. ததோ நிதா³னா ‘‘யோ பன பி⁴க்கு² பி⁴க்கூ²னம்…பே… அஸம்வாஸோ’’தி (பாரா. 44) இமிஸ்ஸா மாதிகாய பே⁴தோ³ ஜாதோ. தத்த² ஹி ‘‘அந்தமஸோ திரச்சா²னக³தாயா’’தி (பாரா. 44) இத்தி²லிங்க³வஸேன ‘‘ஸச்சம், ஆவுஸோ, ப⁴க³வதா ஸிக்கா²பத³ம் பஞ்ஞத்தம், தஞ்ச கோ² இத்தி²யா, நோ புரிஸே, நோ பண்ட³கே, நோ உப⁴தோப்³யஞ்ஜனகே சா’’தி மக்கடிபாராஜிகோ விய அஞ்ஞோபி லேஸம் ஓட்³டே³தும் ஸக்கோதி, தஸ்மா தாதி³ஸஸ்ஸ அலேஸோகாஸஸ்ஸ த³ஸ்ஸனத்த²ம் இத³ம் வுச்சதி, மக்கடிஸங்கா²தா நிதா³னா ‘‘அந்தமஸோ திரச்சா²னக³தாயபீ’’தி மாதிகாய வசனபே⁴தோ³, ந இத்தி²யா ஏவ மேது²னஸித்³தி⁴த³ஸ்ஸனதோ. தஸ்மா விப⁴ங்கோ³ தன்னியாமகோ தஸ்ஸா மாதிகாய அதி⁴ப்பேதத்த²னியாமகோ விப⁴ங்கோ³தி. விப⁴ங்கே³ ஹி ‘‘திஸ்ஸோ இத்தி²யோ, தயோ உப⁴தோப்³யஞ்ஜனகா, தயோ பண்ட³கா, தயோ புரிஸா. மனுஸ்ஸித்தி²யா தயோ மக்³கே³, திரச்சா²னக³தபுரிஸஸ்ஸ த்³வே மக்³கே³’’திஆதி³னா (பாரா. 56) நயேன ஸப்³ப³லேஸோகாஸம் பித³ஹித்வா நியமோ கதோ. ஏத்தா²ஹ – யதி³ ஏவம் ஸாதா⁴ரணஸிக்கா²பத³வஸேன வா லிங்க³பரிவத்தனவஸேன வா ந கேவலம் பி⁴க்கூ²னம், பி⁴க்கு²னீனம்பி ‘‘ஸிக்கா²ஸாஜீவஸமாபன்னோ’’தி விப⁴ங்கே³ வத்தப்³ப³ம் ஸியா. தத³வசனேன ஹி பி⁴க்கு²னீ புரிஸலிங்க³பாதுபா⁴வேன பி⁴க்கு²பா⁴வே டி²தா ஏவம் வதே³ய்ய ‘‘நாஹம் உபஸம்பதா³கரணகாலே பி⁴க்கூ²னம் ஸிக்கா²ஸாஜீவஸமாபன்னா, தஸ்மா ந அபச்சக்கா²தஸிக்கா²பி மேது²னத⁴ம்மேன பாராஜிகா ஹோமீ’’தி. வுச்சதே – யதா² வுத்தம், ததா² ந வத்தப்³ப³ம் அனிட்ட²ப்பஸங்க³தோ. ததா² வுத்தே பி⁴க்கு²னீனம்பி ஸிக்கா²பச்சக்கா²னம் அத்தீ²தி ஆபஜ்ஜதி. தஞ்சானிட்ட²ம். இத³மபரமனிட்ட²ம் ‘‘ஸப்³ப³ஸிக்கா²பதா³னி ஸாதா⁴ரணானேவ நாஸாதா⁴ரணானீ’’தி. அபிசாயம் பி⁴க்கூ²னம் ஸிக்கா²ஸாஜீவஸமாபன்னாவ ஹோதீதி த³ஸ்ஸனத்த²ம் ‘‘அனுஜானாமி, பி⁴க்க²வே, தம்யேவ உபஜ்ஜ²ம் தமேவ உபஸம்பத³ம் தானி வஸ்ஸானி பி⁴க்கூ²ஹி ஸங்க³மிது’’ந்திஆதி³ (பாரா. 69) வுத்தம். ததோ ஆபத்தியா பே⁴தோ³தி ததோ விப⁴ங்க³தோ ‘‘அக்க²யிதே ஸரீரே பாராஜிகம், யேபு⁴ய்யேன க²யிதே து²ல்லச்சய’’ந்திஆதி³ (பாரா. 73, பரி. 157) ஆபத்தியா பே⁴தோ³ ஹோதி. அனாபத்தி தத³ஞ்ஞதா²தி ததோ ஏவ விப⁴ங்க³தோ யேன ஆகாரேன ஆபத்தி வுத்தா, ததோ அஞ்ஞேனாகாரேன அனாபத்திபே⁴தோ³வ ஹோதி. ‘‘ஸாதி³யதி, ஆபத்தி பாராஜிகஸ்ஸ, ந ஸாதி³யதி, அனாபத்தீ’’தி ஹி விப⁴ங்கே³ அஸதி ந பஞ்ஞாயதி. ஏத்தாவதா ‘‘நிதா³னா மாதிகாபே⁴தோ³’’தி அயம் கா³தா² ஸமாஸதோ வுத்தத்தா² ஹோதி. விஸேஸகாரணம் பன தஸ்மிம் தஸ்மிம் ஸிக்கா²பதே³ ஆவிப⁴விஸ்ஸதி.

பட²மபஞ்ஞத்தி தாவ பட²மபோ³தி⁴ம் அதிக்கமித்வா பஞ்ஞத்தத்தா, ஆயஸ்மதோ ஸுதி³ன்னஸ்ஸ அட்ட²வஸ்ஸிககாலே பஞ்ஞத்தத்தா ச ரத்தஞ்ஞுமஹத்தம் பத்தகாலே பஞ்ஞத்தா, து³தியபஞ்ஞத்தி பா³ஹுஸச்சமஹத்தம் பத்தகாலே. ஸோ ஹி ஆயஸ்மா மக்கடிபாராஜிகோ யதா² மாதுகா³மப்படிஸம்யுத்தேஸு ஸிக்கா²பதே³ஸு திரச்சா²னக³தித்தீ² ந அதி⁴ப்பேதா, ததா² இதா⁴பீதி ஸஞ்ஞாய ‘‘ஸச்சம், ஆவுஸோ…பே… தஞ்ச கோ² மனுஸ்ஸித்தி²யா, நோ திரச்சா²னக³தாயா’’தி (பாரா. 41) ஆஹ. ததியபஞ்ஞத்தி லாப⁴க்³க³மஹத்தம் பத்தகாலே உப்பன்னா ‘‘யாவத³த்த²ம் பு⁴ஞ்ஜித்வா’’திஆதி³ (பாரா. 43) வசனதோ, வேபுல்லமஹத்தம்பி ஏத்தே²வ லப்³ப⁴தீதி இமம் பட²மபாராஜிகஸிக்கா²பத³ம் திவித⁴ம்பி வத்து²ம் உபாதா³ய சதுப்³பி³த⁴ம்பி தம் காலம் பத்வா பஞ்ஞத்தந்தி வேதி³தப்³ப³ம்.

தத்த² யோ பனாதி அனவஸேஸபரியாதா³னபத³ம். பி⁴க்கூ²தி தஸ்ஸ அதிப்பஸங்க³னியமபத³ம். பி⁴க்கூ²னம் ஸிக்கா²ஸாஜீவஸமாபன்னோதி தஸ்ஸ விஸேஸனவசனம். ந ஹி ஸப்³போ³பி பி⁴க்கு²னாமகோ, யா ப⁴க³வதா யாய காயசி உபஸம்பதா³ய உபஸம்பன்னபி⁴க்கூ²னம் ஹேட்டி²மபரிச்சே²தே³ன ஸிக்கி²தப்³பா³ ஸிக்கா² விஹிதா, ‘‘ஏத்த² ஸஹ ஜீவந்தீ’’தி யோ ச ஸாஜீவோ வுத்தோ, தம் உப⁴யம் ஸமாபன்னோவ ஹோதி. கதா³ பன ஸமாபன்னோ ஹோதி? யாய காயசி உபஸம்பதா³ய உபஸம்பன்னஸமனந்தரமேவ தது³ப⁴யம் ஜானந்தோபி அஜானந்தோபி தத³ஜ்ஜு²பக³தத்தா ஸமாபன்னோவ நாம ஹோதி. ஸஹ ஜீவந்தீதி யாவ ஸிக்க²ம் ந பச்சக்கா²தி, பாராஜிகபா⁴வம் வா ந பாபுணாதி. யம் பன வுத்தம் அந்த⁴கட்ட²கதா²யம் ‘‘ஸிக்க²ம் பரிபூரேந்தோ ஸிக்கா²ஸமாபன்னோ ஸாஜீவம் அவீதிக்கமந்தோ ஸாஜீவஸமாபன்னோ’’தி, தம் உக்கட்ட²பரிச்சே²த³வஸேன வுத்தம். ந ஹி ஸிக்க²ம் அபரிபூரேந்தோ, காமவிதக்காதி³ப³ஹுலோ வா ஏகச்சம் ஸாவஸேஸம் ஸாஜீவம் வீதிக்கமந்தோ வா ஸிக்கா²ஸாஜீவஸமாபன்னோ நாம ந ஹோதி.

உக்கட்ட²பரிச்சே²தே³ன பன சதுக்கம் லப்³ப⁴தி – ‘‘அத்தி² பி⁴க்கு² ஸிக்கா²ஸமாபன்னோ ஸீலானி பச்சவேக்க²ந்தோ ந ஸாஜீவஸமாபன்னோ அசித்தகம் ஸிக்கா²பத³ம் வீதிக்கமந்தோ, அத்தி² ந ஸிக்கா²ஸமாபன்னோ காமவிதக்காதி³ப³ஹுலோ ஸாஜீவஸமாபன்னோ நிராபத்திகோ, அத்தி² ந ஸிக்கா²ஸமாபன்னோ ந ச ஸாஜீவஸமாபன்னோ அனவஸேஸம் ஆபத்திம் ஆபன்னோ, அத்தி² உப⁴யஸமாபன்னோ ஸிக்க²ம் பரிபூரேந்தோ ஸாஜீவஞ்ச அவீதிக்கமந்தோ’’தி. அயமேத்த² சதுத்தோ² பி⁴க்கு² உக்கட்டோ² இத⁴ அதி⁴ப்பேதோ ஸியா. ந ஹி ப⁴க³வா அனுக்கட்ட²ம் வத்தும் யுத்தோதி சே? ந, ‘‘தத்ர யாயம் அதி⁴ஸீலஸிக்கா², அயம் இமஸ்மிம் அத்தே² அதி⁴ப்பேதா ஸிக்கா²’’தி வசனவிரோத⁴தோ, உக்கட்ட²க்³க³ஹணாதி⁴ப்பாயே ஸதி ‘‘ஸிக்கா²தி திஸ்ஸோ ஸிக்கா²’’தி ஏத்தகமேவ வத்தப்³ப³ந்தி அதி⁴ப்பாயோ. ஸிக்க²த்தயஸமாபன்னோ ஹி ஸப்³பு³க்கட்டோ². ‘‘மேது²னம் த⁴ம்மம் படிஸேவேய்யா’’தி பரதோ வசனம் அபேக்கி²த்வா அதி⁴ஸீலஸிக்கா²வ வுத்தாதி சே? ந, தஸ்ஸாபி அப⁴ப்³ப³த்தா. ந ஹி அதி⁴ஸீலஸிக்க²ம் பரிபூரேந்தோ, ஸாஜீவஞ்ச அவீதிக்கமந்தோ மேது²னத⁴ம்மம் படிஸேவிதும் ப⁴ப்³போ³, தம் ஸிக்க²ம் அபரிபூரேந்தோ, ஸாஜீவஞ்ச வீதிக்கமந்தோயேவ ஹி படிஸேவேய்யாதி அதி⁴ப்பாயா. தஸ்மா ஏவமேத்த² அத்தோ² க³ஹேதப்³போ³. யஸ்மா ஸிக்கா²பத³ஸங்கா²தோ ஸாஜீவோ அதி⁴ஸீலஸிக்க²மேவ ஸங்க³ண்ஹாதி, ந இதரஸிக்கா²த்³வயம், தஸ்மா ‘‘தத்ர யாயம் அதி⁴ஸீலஸிக்கா², அயம் இமஸ்மிம் அத்தே² அதி⁴ப்பேதா ஸிக்கா²’’தி வுத்தம். தஸ்மா அதி⁴ஸீலஸிக்கா²ய ஸங்கா³ஹகோ ஸாஜீவோ ஸிக்கா²ஸாஜீவோதி வுத்தோ. இதி ஸாஜீவவிஸேஸனத்த²ம் ஸிக்கா²க்³க³ஹணம் கதம். தத³த்த²தீ³பனத்த²மேவ விப⁴ங்கே³ ஸிக்க²ம் அபராமஸித்வா ‘‘தஸ்மிம் ஸிக்க²தி, தேன வுச்சதி ஸாஜீவஸமாபன்னோ’’தி (பாரா. 45) வுத்தம். தேன ஏகமேவித³ம் அத்த²பத³ந்தி தீ³பிதம் ஹோதி. தஞ்ச உபஸம்பதூ³பக³மனந்தரதோ பட்டா²ய ஸிக்க²னாதி⁴காரத்தா ‘‘ஸிக்க²தீ’’தி ச ‘‘ஸமாபன்னோ’’தி ச வுச்சதி. யோ ஏவம் ‘‘ஸிக்கா²ஸாஜீவஸமாபன்னோ’’தி ஸங்க²ம் க³தோ, தாதி³ஸம் பச்சயம் படிச்ச அபரபா⁴கே³ ஸாஜீவஸங்கா²தமேவ ஸிக்க²ம் அபச்சக்கா²ய தஸ்மிம்யேவ து³ப்³ப³ல்யம் அனாவிகத்வா மேது²னம் த⁴ம்மம் படிஸேவேய்யாதி அயமத்தோ² யுஜ்ஜதி.

கிந்து அட்ட²கதா²னயோ படிக்கி²த்தோ ஹோதி, ஸோ ச ந படிக்கே²பாரஹோ ஹோதி, அதி⁴ப்பாயோ பனேத்த² பரியேஸிதப்³போ³. ஸப்³பே³ஸு ஸிக்கா²பதே³ஸு இத³மேவ பி⁴க்கு²லக்க²ணம் ஸாதா⁴ரணம் யதி³த³ம் ‘‘பி⁴க்கூ²னம் ஸிக்கா²ஸாஜீவஸமாபன்னோ’’தி. கீ²ணாஸவோபி ஸாவகோ ஆபத்திம் ஆபஜ்ஜதி அசித்தகம், ததா² ஸேக்கோ², புது²ஜ்ஜனோ பன ஸசித்தகம்பி, தஸ்மா ஸேக்கா²ஸேக்க²புது²ஜ்ஜனானம் ஸாமஞ்ஞமித³ம் பி⁴க்கு²லக்க²ணந்தி கத்வா கேவலம் ஸிக்கா²ஸமாபன்னோ, கேவலம் ஸாஜீவஸமாபன்னோ, உப⁴யஸமாபன்னோ சாதி ஸரூபேகதே³ஸஏகஸேஸனயேன ‘‘ஸிக்கா²ஸாஜீவஸமாபன்னோ’’த்வேவ ஸம்பிண்டே³த்வா உக்கட்ட²க்³க³ஹணேன அனுக்கட்டா²னம் க³ஹணஸித்³தி⁴தோ அட்ட²கதா²யம் உக்கட்டோ²வ வுத்தோ. தமேவ ஸம்பாதே³தும் ‘‘தஸ்மிம் ஸிக்க²தி, தேன வுச்சதி ஸாஜீவஸமாபன்னோ’’தி ஏத்த² ஸிக்கா²ஸத்³த³ஸ்ஸ அவசனே பரிஹாரம் வத்வா யஸ்மா பன ஸோ ஸிக்க²ம்பி ஸமாபன்னோ, தஸ்மா ஸிக்கா²ஸமாபன்னோதிபி அத்த²தோ வேதி³தப்³போ³தி ச வத்வா ‘‘யம் ஸிக்க²ம் ஸமாபன்னோ, தம் அபச்சக்கா²ய, யஞ்ச ஸாஜீவம் ஸமாபன்னோ, தத்த² து³ப்³ப³ல்யம் அனாவிகத்வா’’தி வுத்தந்தி அயமட்ட²கதா²ய அதி⁴ப்பாயோ வேதி³தப்³போ³. ஏதஸ்மிம் பன அதி⁴ப்பாயே அதி⁴ஸீலஸிக்கா²ய ஏவ க³ஹணம் ஸப்³ப³த்தி²கத்தா, ஸீலாதி⁴காரதோ ச வினயஸ்ஸாதி வேதி³தப்³ப³ம். யதா² ச ஸிக்கா²பத³ம் ஸமாதி³யந்தோ ஸீலம் ஸமாதி³யதீதி வுச்சதி, ஏவம் ஸிக்கா²பத³ம் பச்சக்க²ந்தோ ஸீலம் பச்சக்கா²தீதி வத்தும் யுஜ்ஜதி, தஸ்மா தத்த² வுத்தம் ‘‘யம் ஸிக்க²ம் ஸமாபன்னோ, தம் அபச்சக்கா²யா’’தி (பாரா. அட்ட². ஸிக்கா²பச்சக்கா²னவிப⁴ங்க³வண்ணனா). ஏத்தாவதா ஸமாஸதோ ‘‘ஸிக்கா²ஸாஜீவஸமாபன்னோ’’தி ஏத்த² வத்தப்³ப³வினிச்ச²யோ நிட்டி²தோ ஹோதி.

கிம் இமினா விஸேஸவசனேன பயோஜனம், நனு ‘‘யோ பன பி⁴க்கு² ஸிக்க²ம் அபச்சக்கா²ய து³ப்³ப³ல்யம் அனாவிகத்வா…பே… அஸம்வாஸோ’’தி ஏத்தகமேவ வத்தப்³ப³ந்தி சே? ந வத்தப்³ப³ம் அனிட்ட²ப்பஸங்க³தோ. ‘‘யோ பன ஸிக்கா²ஸாஜீவஸமாபன்னோ தே²ய்யஸம்வாஸாதி³கோ கேவலேன ஸமஞ்ஞாமத்தேன, படிஞ்ஞாமத்தேன வா பி⁴க்கு², தஸ்ஸாபி ஸிக்கா²பச்சக்கா²னம் அத்தி², ஸிக்க²ம் அபச்சக்கா²ய ச மேது²னம் த⁴ம்மம் படிஸேவந்தஸ்ஸ பாராஜிகாபத்தி. யோ வா பச்சா² பாராஜிகம் ஆபத்திம் ஆபஜ்ஜித்வா ந ஸிக்கா²ஸாஜீவஸமாபன்னோ, தஸ்ஸ ச, யோ வா பக்க²பண்ட³கத்தா பண்ட³கபா⁴வூபக³மனேன ந ஸிக்கா²ஸாஜீவஸமாபன்னோ, தஸ்ஸ ச தது³ப⁴யம் அத்தீ²தி ஆபஜ்ஜதி. பண்ட³கபா⁴வபக்கே² ச பண்ட³கோ உபஸம்பதா³ய ந வத்தூ²’’தி வுத்தம். தஸ்மா இதரஸ்மிம் பக்கே² வத்தூ²தி ஸித்³த⁴ம். தஸ்மிம் பக்கே² உபஸம்பன்னோ பண்ட³கபா⁴வபக்கே² பண்ட³கத்தா ந ஸிக்கா²ஸாஜீவஸமாபன்னோ, ஸோ பரிச்சஜிதப்³பா³ய ஸிக்கா²ய அபா⁴வேன ஸிக்க²ம் அபச்சக்கா²ய முகே²ன பரஸ்ஸ அங்க³ஜாதக்³க³ஹணனயேன மேது²னம் த⁴ம்மம் படிஸேவேய்ய, தஸ்ஸ குதோ பாராஜிகாபத்தீதி அதி⁴ப்பாயோ. அயம் நயோ அபண்ட³கபக்க²ம் அலப⁴மானஸ்ஸேவ பரதோ யுஜ்ஜதி, லப⁴ந்தஸ்ஸ பன அரூபஸத்தானம் குஸலாதி³ஸமாபத்திக்க²ணே ப⁴வங்க³விச்சே²தே³ ஸதிபி அமரணம் விய பண்ட³கபா⁴வபக்கே²பி பி⁴க்கு²பா⁴வோ அத்தி². ஸம்வாஸம் வா ஸாதி³யந்தஸ்ஸ ந தே²ய்யஸம்வாஸகபா⁴வோ அத்தி² அந்திமவத்து²அஜ்ஜா²பன்னஸ்ஸ விய. ந ச ஸஹஸேய்யாதி³ம் ஜனேதி. க³ணபூரகோ பன ந ஹோதி அந்திமவத்து²ம் அஜ்ஜா²பன்னோ விய. ந ஸோ ஸிக்கா²ஸாஜீவஸமாபன்னோ. இதரஸ்மிம் பன பக்கே² ஹோதி, அயம் இமஸ்ஸ ததோ விஸேஸோ. கிமயம் ஸஹேதுகோ, உதா³ஹு அஹேதுகோதி? ந அஹேதுகோ. யதோ உபஸம்பதா³ தஸ்ஸ அபண்ட³கபக்கே² அனுஞ்ஞாதா ஸஹேதுகப்படிஸந்தி⁴கத்தா. பண்ட³கபா⁴வபக்கே²பி கிஸ்ஸ நானுஞ்ஞாதாதி சே? பண்ட³கபூ⁴தத்தா ஓபக்கமிகபண்ட³கஸ்ஸ விய.

அபிச ‘‘ஸிக்கா²ஸாஜீவஸமாபன்னோ’’தி இமினா தஸ்ஸ ஸிக்கா²ஸமாதா³னம் தீ³பேத்வா தம் ஸமாதி³ன்னம் ஸிக்க²ம் அபச்சக்கா²ய, தத்த² ச து³ப்³ப³ல்யம் அனாவிகத்வாதி வத்தும் யுஜ்ஜதி, ந அஞ்ஞதா²தி இமினா காரணேன யதா²வுத்தானிட்ட²ப்பஸங்க³தோ ‘‘யோ பன பி⁴க்கு² பி⁴க்கூ²னம் ஸிக்கா²ஸாஜீவஸமாபன்னோ ஸிக்க²ம் அபச்சக்கா²யா’’திஆதி³ வுத்தம். யதா² சேத்த², ஏவம் ‘‘யோ பன பி⁴க்கு² பி⁴க்கூ²னம் ஸிக்கா²ஸாஜீவஸமாபன்னோ ஸிக்க²ம் அபச்சக்கா²ய து³ப்³ப³ல்யம் அனாவிகத்வா கா³மா வா அரஞ்ஞா வா அதி³ன்னம்…பே… யோ பன பி⁴க்கு² பி⁴க்கூ²னம் ஸிக்கா²ஸாஜீவஸமாபன்னோ ஸிக்க²ம் அபச்சக்கா²ய து³ப்³ப³ல்யம் அனாவிகத்வா ஸுக³தசீவரப்பமாணம் சீவரம் காராபேய்யா’’தி ஸப்³ப³த்த² யோஜேதப்³ப³ம்.

‘‘அந்தமஸோ திரச்சா²னக³தாயபீ’’தி மனுஸ்ஸித்தி²ம் உபாதா³ய வுத்தம். ந ஹி பகே³வ பண்ட³கே, புரிஸே வாதி வத்தும் யுஜ்ஜதி. ஸேஸம் தத்த² தத்த² வுத்தனயமேவ. அயம் தாவ மாதிகாய வினிச்ச²யோ அஞ்ஞத்தா²பி யதா²ஸம்ப⁴வம் யோஜேத்வா தீ³பேதப்³போ³.

ஸாரிபுத்தபே³லட்ட²ஸீஸானந்தா³த³யோபி ஸிக்கா²பத³பஞ்ஞத்திகாரணத்தா ச ஆபத்திஆபஜ்ஜனதோ ச கஸ்மா மஹாவிப⁴ங்கே³ ஞத்திசதுத்த²உபஸம்பதா³யேவ ஆக³தாதி? படிக்கி²த்தாய ஸரணக³மனூபஸம்பதா³ய அனுஞ்ஞாதப்பஸங்க³ப⁴யாதி உபதிஸ்ஸத்தே²ரோ. ஆபத்தியா ப⁴ப்³ப³தம் ஸந்தா⁴ய தஸ்மிம்பி வுத்தே புப்³பே³ படிக்கி²த்தாபி ப⁴க³வதா புன அனுஞ்ஞாதாதி பி⁴க்கூ²னம் மிச்சா²கா³ஹோ வா விமதி வா உப்பஜ்ஜதி, தஸ்மா ந வுத்தாதி வுத்தம் ஹோதி.

‘‘அத⁴ம்மகம்மம் வக்³க³கம்ம’’தி (மஹாவ. 387) வசனதோ குப்பகம்மம்பி கத்த²சி ‘‘கம்ம’’ந்தி வுச்சதி, தஸ்மா ‘‘அகுப்பேனா’’தி வுத்தம். யஸ்மா அகுப்பகம்மம்பி ஏகச்சம் ந டா²னாரஹம், யேன அபத்தோ ஓஸாரணம் ஸுஓஸாரிதோதி வுச்சதி, தஸ்மா ‘‘டா²னாரஹேனா’’தி வுத்தம். யதி³ ஏவம் ‘‘டா²னாரஹேனா’’தி இத³மேவ வத்தப்³ப³ம் இமினா அகுப்பஸித்³தி⁴தோதி சே? ந, அட்டா²னாரஹேன அகுப்பேன உபஸம்பன்னோ இமஸ்மிம் அத்தே² ந அதி⁴ப்பேதோ அனிட்ட²ப்பஸங்க³தோ. த்³வீஹி பனேதேஹி ஏகதோ வுத்தேஹி அயமத்தோ² பஞ்ஞாயதி – கேவலம் தேன அகுப்பேன உபஸம்பன்னோ அயம்பி இமஸ்மிம் அத்தே² அதி⁴ப்பேதோ பி⁴க்கூ²தி, டா²னாரஹேன ச அகுப்பேன ச உபஸம்பன்னோ அயம்பி இமஸ்மிம் அத்தே² அதி⁴ப்பேதோ பி⁴க்கூ²தி, குப்பேன உபஸம்பன்னோ நாதி⁴ப்பேதோதி.

‘‘படிஸந்தி⁴க்³க³ஹணதோ பட்டா²ய அபரிபுண்ணவீஸதிவஸ்ஸோ’’தி வுத்தத்தா ஓபபாதிகஞ்சாதி ஸோளஸவஸ்ஸுத்³தே³ஸிகா ஓபபாதிகா படிஸந்தி⁴தோ பட்டா²ய அபரிபுண்ணவீஸதிவஸ்ஸாதி வத³ந்தி. ‘ஸோளஸவஸ்ஸுத்³தே³ஸிகா ஹோந்தீ’தி வுத்தத்தா புன சத்தாரி வஸ்ஸானி இச்சி²தப்³பா³னி, ‘படிஸந்தி⁴க்³க³ஹணதோ பட்டா²யா’தி இத³ம் க³ப்³ப⁴ஸேய்யகானம் வஸேன வுத்த’’ந்தி ஏகே. ‘‘கேசி வத³ந்தீ’’தி யத்த² யத்த² லிகீ²யதி, தத்த² தத்த² விசாரேத்வா அத்த²ம் ஸுட்டு² உபலக்க²யே. ஓபக்கமிகே பண்ட³கபா⁴வோ ஆருள்ஹனயேன வேதி³தப்³போ³. ‘‘பக்க²பண்ட³கோ அபண்ட³கபக்கே² பப்³பா³ஜேத்வா பண்ட³கபக்கே² நாஸேதப்³போ³’’தி (வஜிர. டீ. மஹாவக்³க³ 109) லிகி²தம்.

‘‘பி³ந்து³ம் அத³த்வா சே நிவாஸேதி, தே²ய்யஸம்வாஸகோ ந ஹோதீ’’தி வத³ந்தி, வீமம்ஸிதப்³ப³ம். லிங்கா³னுரூபஸ்ஸாதி ஸாமணேராரஹஸ்ஸ ஸம்வாஸஸ்ஸ ஸாதி³தத்தாதி அதி⁴ப்பாயோ.

ராஜப⁴யாதீ³ஹி க³ஹிதலிங்கா³னம் ‘‘கி³ஹீ மம் ‘ஸமணோ’தி ஜானந்தூ’’தி வஞ்சனசித்தே ஸதிபி பி⁴க்கூ²னம் வஞ்சேதுகாமதாய ச தேஹி ஸம்வஸிதுகாமதாய ச அபா⁴வா தோ³ஸோ ந ஜாதோதி. ‘‘யோ ஏவம் பப்³ப³ஜதி, ஸோ தே²ய்யஸம்வாஸகோ நாம ஹோதீ’’தி வா ‘‘ஏவம் காதும் ந லப்³ப⁴தீ’’தி வா ‘‘ஏவம் பப்³ப³ஜிதோ ஸாமணேரோ ந ஹோதீ’’தி வா ந ஜானாதி, வட்டதி. ‘‘ஜானாதி, ந வட்டதீ’’தி ச லிகி²தம். ‘‘ராஜது³ப்³பி⁴க்கா²தி³அத்தா²ய சீவரம் பாருபித்வா ஸம்வாஸம் ஸாதி³யந்தோ தே²ய்யஸம்வாஸகோ ஹோதி. கஸ்மா? அஸுத்³த⁴சித்தத்தா. புன ஸோ ‘ஸுத்³த⁴ம் ப்³ரஹ்மசரியம் கரிஸ்ஸாமி, கிம் ஏதேனாதி விப்படிஸாரேன வா பச்சயாதி³ஸுலப⁴தாய வா கரிஸ்ஸாமீ’தி ஸுத்³த⁴மானஸோ ஹுத்வா யாவ ஸோ ஸம்வாஸம் நாதி⁴வாஸேதி, தாவ தே²ய்யஸம்வாஸகோ ந ஹோதி. ஏவம் ஸுத்³த⁴சித்துப்பத்திதோ பட்டா²ய ஸம்வாஸம் ஸாதி³யதி சே, தே²ய்யஸம்வாஸகோ ஹோதீதி அதி⁴ப்பேதோ. இதரதா² ஸப்³ப³ம் விருஜ்ஜ²தீ’’தி ஏகே.

‘‘நாபி⁴பராமாஸாதி³னா ஜாதோ ததா²ரூபம் பிதரம் கா⁴தேதி சே, பிதுகா⁴தகோ ஹோதீ’’தி வத³ந்தி.

யோ பன காயஸம்ஸக்³கே³ன ஸீலவினாஸம் பாபேதி, ந ஸோ பி⁴க்கு²னிதூ³ஸகோ ‘‘திண்ணம் மக்³கா³ன’’ந்தி வசனதோ. பி⁴க்கு²னிம் பன ஏகதோஉபஸம்பன்னம் தூ³ஸேத்வாபி பி⁴க்கு²னிதூ³ஸகோ ஹோதி, ஸோபி பாராஜிகோ ஹோதீதி வினிச்ச²யோ. பி⁴க்கு²னீ பன தே²ய்யஸம்வாஸிகா, மாதுபிதுஅரஹந்தகா⁴திகா, லோஹிதுப்பாதி³கா, தித்தி²யபக்கந்திகா ச ஹோதி, அட்ட²கதா²ஸு அனாக³தம் வினயத⁴ரா ஸம்படிச்ச²ந்தி.

‘‘ஸம்பஜானமுஸாவாதே³ பாசித்திய’’ந்தி (பாசி. 2) வுத்தம் மரியாத³ம் அவீதிக்கமந்தோ தஸ்மிஞ்ச ஸிக்கா²பதே³ ஸிக்க²தீதி வுச்சதி. ஸிக்கா²பத³ந்தி அஸபா⁴வத⁴ம்மோ ஸங்கேதோவ, இத⁴ பஞ்ஞத்தி அதி⁴ப்பேதா. ‘‘மேது²னஸம்வரஸ்ஸேதம் அதி⁴வசன’’ந்தி ஸமந்தபாஸாதி³காயம் வுத்தம், தம் பனத்த²ம் ஸந்தா⁴யாதி லிகி²தம். ஸிக்கா²தி தம் தம் ஸிக்கா²பத³ம், ஸிக்க²னபா⁴வேன பவத்தசித்துப்பாதோ³. ஸாஜீவந்தி பஞ்ஞத்தி. தத³த்த²த³ஸ்ஸனத்த²ம் புப்³பே³ ‘‘மேது²னஸம்வரஸ்ஸேதம் அதி⁴வசன’’ந்தி வுத்தம். யஸ்மா ஸிக்கா²ய கு³ணஸம்மதாய புஞ்ஞஸம்மதாய தந்தியா அபா⁴வதோ லோகஸ்ஸ து³ப்³ப³ல்யாவிகம்மம் தத்த² ந ஸம்ப⁴வதி. பத்த²னீயா ஹி ஸா, தஸ்மா ‘‘யஞ்ச ஸாஜீவம் ஸமாபன்னோ, தஸ்மிம் து³ப்³ப³லபா⁴வம் அப்பகாஸேத்வா’’தி வுத்தம். ஆணாய ஹி து³ப்³ப³ல்யம் ஸம்ப⁴வதீதி உபதிஸ்ஸோ. து³ப்³ப³ல்யாவிகம்மபத³ம் ஸிக்கா²பச்சக்கா²னபத³ஸ்ஸ ப்³யஞ்ஜனஸிலிட்ட²தாய வா பரிவாரகபா⁴வேன வா வேதி³தப்³ப³ம். அத² வா யஸ்மா ஸிக்கா²பச்சக்கா²னஸ்ஸ ஏகச்சம் து³ப்³ப³ல்யாவிகம்மம் அகதம் ஹோதி, தஸ்மா தம் ஸந்தா⁴ய ‘‘ஸிக்க²ம் அபச்சக்கா²யா’’தி பத³ஸ்ஸ அத்த²ம் விவரந்தோ ‘‘து³ப்³ப³ல்யம் அனாவிகத்வா’’தி ஆஹ. தத்த² ஸியா யஸ்மா ந ஸப்³ப³ம் து³ப்³ப³ல்யாவிகம்மம் ஸிக்கா²பச்சக்கா²னம், தஸ்மா ‘‘து³ப்³ப³ல்யம் அனாவிகத்வா’’தி பட²மம் வத்வா தஸ்ஸ அத்த²னியமத்த²ம் ‘‘ஸிக்க²ம் அபச்சக்கா²யா’’தி வத்தப்³ப³ந்தி? தம் ந, கஸ்மா? அத்தா²னுக்கமாபா⁴வதோ. ‘‘ஸிக்கா²ஸாஜீவஸமாபன்னோ’’தி ஹி வுத்தத்தா ‘‘யம் ஸிக்க²ம் ஸமாபன்னோ, தம் அபச்சக்கா²ய, யஞ்ச ஸாஜீவம் ஸமாபன்னோ, தத்த² து³ப்³ப³ல்யம் அனாவிகத்வா’’தி வுச்சமானே அனுக்கமேனேவ அத்தோ² வுத்தோ ஹோதி, ந அஞ்ஞதா², தஸ்மா இத³மேவ பட²மம் வுத்தந்தி. தேஸம்யேவாதி சுத்³த³ஸன்னம்.

‘‘ஸிக்க²ம் அபச்சக்கா²யா’’தி ஸப்³ப³ஸிக்கா²பதா³னம் ஸாதா⁴ரணத்த²ம் ‘‘அயமேத்த² அனுபஞ்ஞத்தீ’’தி வுத்தம்.

பவேஸனம் நாம அங்க³ஜாதம் பவேஸேந்தஸ்ஸ அங்க³ஜாதேன ஸம்பு²ஸனம். பவிட்ட²ம் நாம யாவ மூலம் பவேஸேந்தஸ்ஸ விப்பகதகாலோ வாயாமகாலோ. ஸுக்கவிஸட்டி²ஸமயே அங்க³ஜாதம் டி²தம் நாம. உத்³த⁴ரணம் நாம நீஹரணகாலோ. வினயக³ண்டி²பதே³ பன ‘‘வாயாமதோ ஓரமித்வா டா²னம் டி²தம் நாமா’’தி வுத்தம், தம் அஸங்கரதோ த³ஸ்ஸனத்த²ம் வுத்தம். பவேஸனபவிட்ட²உத்³த⁴ரணகாலேஸுபி ஸுக்கவிஸட்டி² ஹோதியேவ. ஸாதி³யனம் நாம ஸேவனசித்தஸ்ஸ அதி⁴வாஸனசித்தஸ்ஸ உப்பாத³னம்.

உப⁴தோவிப⁴ங்கே³ ஏவ பஞ்ஞத்தானி ஸந்தா⁴ய ‘‘இத³ஞ்ஹி ஸப்³ப³ஸிக்கா²பதா³னம் நிதா³ன’’ந்தி வுத்தம். ‘‘வினயத⁴ரபஞ்சமேன க³ணேன உபஸம்பதா³’’தி (மஹாவ. 259) வுத்தத்தா இத⁴ ததியா ஸஹயோகே³ன வுத்தா. தஸ்மா வீஸதிபி பி⁴க்கூ² சே நிஸின்னா, பஞ்சமோ வினயத⁴ரோவ இச்சி²தப்³போ³, ஏவம் ஸதி பாராஜிகோ சே வினயத⁴ரோ, உபஸம்பதா³கம்மம் கோபேதீதி சே? ந, பரிவாராவஸானே கம்மவக்³கே³ (பரி. 482 ஆத³யோ) யம் கம்மவிபத்திலக்க²ணம் வுத்தம், தஸ்ஸ தஸ்மிம் நத்தி²தாய. ‘‘கத²ம் வத்து²தோ வா ஞத்திதோ வா அனுஸ்ஸாவனதோ வா ஸீமதோ வா பரிஸதோ வா’’தி ஏத்தகம் வுத்தம், நனு அயம் ‘‘பரிஸதோ வா’’தி வசனேன ஸங்க³ஹிதோதி சே? ந, ‘‘த்³வாத³ஸஹி ஆகாரேஹி பரிஸதோ கம்மானி விபஜ்ஜந்தீ’’தி (பரி. 487) ஸுத்தஸ்ஸ ஹி விப⁴ங்கே³ தஸ்ஸ அனாமட்ட²த்தாதி அயமத்தோ² யஸ்மா தத்த² தத்த² ஸரூபேன வுத்தபாளிவஸேனேவ ஸக்கா ஜானிதும், தஸ்மா நயமுக²ம் த³ஸ்ஸேத்வா ஸம்கி²த்தோதி லிகி²தம். ‘‘அங்க³’’ந்தி பத³ம் உத்³த⁴ரித்வா ‘‘ஸப்³ப³ஸிக்கா²பதே³ஸு ஆபத்தீனம் அங்கா³னங்க³ம் வேதி³தப்³ப³’’ந்தி வுத்தம், இத⁴ பன ‘‘அங்க³’’ந்தி வுத்தம், கஸ்மா? ஸமுட்ட²னாதீ³னம் பரிவாராதீ³ஸு ஸங்கே²பேன ஆக³தத்தா தத்த² க³ஹேத்வா இதா⁴பி நித்³தி³ட்டா²னம் அனங்கா³னம் வவத்தா²னாபா⁴வதோ, ஸப்³ப³த்த² ஸங்கே²பதோ ச வித்தா²ரதோ ச அனங்க³த்தே வுச்சமானே அதிவித்தா²ரதாய தஸ்மிம் தஸ்மிம் ஸிக்கா²பதே³ அனூனம் வத்தப்³ப³தோ சாதி வேதி³தப்³போ³, ஸப்³பா³பத்தீனம் ஸங்கா³ஹகவஸேனாதி அத்தோ².

யானி ஸிக்கா²பதா³னி ‘‘கிரியானீ’’தி வுச்சந்தி, தேஸம் வஸேன காயவாசா ஸஹ விஞ்ஞத்தியா வேதி³தப்³பா³, அகிரியானம் வஸேன வினா விஞ்ஞத்தியா வேதி³தப்³பா³. சித்தம் பனேத்த² அப்பமாணம் பூ⁴தாரோசனஸமுட்டா²னஸ்ஸ கிரியத்தா, அசித்தகத்தா ச. தத்த² கிரியா ஆபத்தியா அனங்க³ந்தரசித்தஸமுட்டா²னா வேதி³தப்³பா³. அவிஞ்ஞத்திஜனகம்பி ஏகச்சம் பா³ஹுல்லனயேன ‘‘கிரிய’’ந்தி வுச்சதி யதே²வ பட²மபாராஜிகம். விஞ்ஞத்தியா அபா⁴வேபி ‘‘ஸோ சே ஸாதி³யதி, ஆபத்தி பாராஜிகஸ்ஸ, ந ஸாதி³யதி, அனாபத்தீ’’தி ஹி வுத்தம், விஞ்ஞத்திஸங்கா²தாபி கிரியா வினா ஸேவனசித்தேன ந ஹோதி வுத்தசித்தஜத்தா, விகாரரூபத்தா, சித்தானுபரிவத்திகத்தா ச. தஸ்மா கிரியாஸங்கா²தமித³ம் விஞ்ஞத்திரூபம், இதரம் சித்தஜரூபம் விய ஜனகசித்தேன வினா ந திட்ட²தி, இதரம் ஸத்³தா³யதனம் திட்ட²தி, தஸ்மா கிரியாய ஸதி ஏகந்ததோ தஜ்ஜனகம் ஸேவனசித்தம் அத்தி² ஏவாதி கத்வா ந ஸாதி³யதி, அனாபத்தீதி ந யுஜ்ஜதீதி. யஸ்மா விஞ்ஞத்திஜனகம்பி ஸமானம் ஸேவனசித்தம் ந ஸப்³ப³காலம் விஞ்ஞத்திம் ஜனேதி, தஸ்மா வினாபி விஞ்ஞத்தியா ஸயம் உப்பஜ்ஜதீதி கத்வா ‘‘ஸாதி³யதி, ஆபத்தி பாராஜிகஸ்ஸா’’தி வுத்தம். நுப்பஜ்ஜதி சே, ந ஸாதி³யதி நாம, தஸ்ஸ அனாபத்தி. தேனேவ ப⁴க³வா ‘‘கிம்சித்தோ த்வம் பி⁴க்கூ²’’தி (பாரா. 135) சித்தேனேவ ஆபத்திம் பரிச்சி²ந்த³தி, ந கிரியாயாதி வேதி³தப்³ப³ம்.

ஏத்த² ஸமுட்டா²னக்³க³ஹணம் கத்தப்³ப³தோ வா அகத்தப்³ப³தோ வா காயாதி³பே⁴தா³பேக்க²மேவ ஆபத்திம் ஆபஜ்ஜதி, ந அஞ்ஞதா²தி த³ஸ்ஸனப்பயோஜனம். தேஸு கிரியாக்³க³ஹணம் காயாதீ³னம் ஸவிஞ்ஞத்திகாவிஞ்ஞத்திகபே⁴த³த³ஸ்ஸனப்பயோஜனம். ஸஞ்ஞாக்³க³ஹணம் ஆபத்தியா அங்கா³னங்க³சித்தவிஸேஸத³ஸ்ஸனப்பயோஜனம். தேன யம் சித்தம் கிரியலக்க²ணே வா அகிரியலக்க²ணே வா ஸன்னிஹிதம், யதோ வா கிரியா வா அகிரியா வா ஹோதி, ந தம் அவிஸேஸேன ஆபத்தியா அங்க³ம் வா அனங்க³ம் வா ஹோதி. கிந்து யாய ஸஞ்ஞாய ‘‘ஸஞ்ஞாவிமோக்க²’’ந்தி வுச்சதி, தாய ஸம்பயுத்தம் சித்தம் அங்க³ம், இதரம் அனங்க³ந்தி த³ஸ்ஸிதம் ஹோதி. இதா³னி யேன சித்தேன ஸிக்கா²பத³ம் ஸசித்தகம் ஹோதி, தத³பா⁴வா அசித்தகம், தேன தஸ்ஸ அவிஸேஸேன ஸாவஜ்ஜதாய ‘‘லோகவஜ்ஜமேவா’’தி வுத்தம். கிந்து ஸாவஜ்ஜம்யேவ ஸமானம் ஏகச்சம் லோகவஜ்ஜம், ஏகச்சம் பண்ணத்திவஜ்ஜந்தி த³ஸ்ஸனப்பயோஜனம் சித்தலோகவஜ்ஜக்³க³ஹணம். சித்தமேவ யஸ்மா ‘‘லோகவஜ்ஜ’’ந்தி வுச்சதி, தஸ்மா மனோகம்மம்பி ஸியா ஆபத்தீதி அனிட்ட²ப்பஸங்க³னிவாரணப்பயோஜனம் கம்மக்³க³ஹணம்.

யம் பனேத்த² அகிரியலக்க²ணம் கம்மம், தம் குஸலத்திகவினிமுத்தம் ஸியாதி அனிட்ட²ப்பஸங்க³னிவாரணப்பயோஜனம் குஸலத்திகக்³க³ஹணம். யா பனேத்த² அப்³யாகதாபத்தி, தம் ஏகச்சம் அவேத³னம்பி நிரோத⁴ம் ஸமாபன்னோ ஆபஜ்ஜதீதி வேத³னாத்திகம் ஏத்த² ந லப்³ப⁴தீதி அனிட்ட²ப்பஸங்க³னிவாரணத்த²ம் வேத³னாத்திகக்³க³ஹணம். ஸிக்கா²பத³ஞ்ஹி ஸசித்தகபுக்³க³லவஸேன ‘‘திசித்தம் திவேத³ன’’ந்தி லத்³த⁴வோஹாரம் அசித்தகேனாபன்னம்பி ‘‘திசித்தம் திவேத³ன’’மிசேவ வுச்சதி. தத்ரித³ம் ஸாத⁴கஸுத்தம் – ‘‘அத்தா²பத்தி அசித்தகோ ஆபஜ்ஜதி அசித்தகோ வுட்டா²தி (பரி. 324), அத்தா²பத்தி குஸலசித்தோ ஆபஜ்ஜதி குஸலசித்தோ வுட்டா²தீ’’திஆதி³ (பரி. 470). ‘‘ஸசித்தகம் ஆபத்திதீ³பனம், ஸஞ்ஞாவிமோக்க²ம் அனாபத்திதீ³பனம், அசித்தகம் வத்து²அஜானனம், நோஸஞ்ஞாவிமோக்க²ம் வீதிக்கமனாஜானனம். இத³மேவ தேஸம் நானாத்த’’ந்தி (வஜிர. டீ. பாராஜிக 61-66 பகிண்ணககதா²வண்ணனா) லிகி²தம்.

ஸசித்தகபக்கே²தி ஏத்த² அயம் தாவ க³ண்டி²பத³னயோ – ஸசித்தகபக்கே²தி ஸுராபானாதி³அசித்தகே ஸந்தா⁴ய வுத்தம். ஸசித்தகேஸு பன யம் ஏகந்தமகுஸலேனேவ ஸமுட்டா²தி, தஞ்ச உப⁴யம் லோகவஜ்ஜம் நாம. ஸுராபானஸ்மிஞ்ஹி ‘‘ஸுரா’’தி வா ‘‘பாதும் ந வட்டதீ’’தி வா ஜானித்வா பிவனே அகுஸலமேவாதி. தத்த² ‘‘ந வட்டதீதி ஜானித்வா’’தி வுத்தவசனம் ந யுஜ்ஜதி பண்ணத்திவஜ்ஜஸ்ஸபி லோகவஜ்ஜதாபஸங்க³தோ. இமம் அனிட்ட²ப்பஸங்க³ம் பரிஹரிதுகாமதாய ச வஜிரபு³த்³தி⁴த்தே²ரேன லிகி²தம் – ‘‘இத⁴ ‘ஸசித்தக’ந்தி ச ‘அசித்தக’ந்தி ச விசாரணா வத்து²விஜானனே ஏவ ஹோதி, ந பஞ்ஞத்திவிஜானனே. யதி³ பஞ்ஞத்திவிஜானனே ஹோதி, ஸப்³ப³ஸிக்கா²பதா³னி லோகவஜ்ஜானேவ ஸியும், ந ச ஸப்³ப³ஸிக்கா²பதா³னி லோகவஜ்ஜானி. தஸ்மா வத்து²விஜானனே ஏவ ஹோதீதி இத³ம் யுஜ்ஜதி. கஸ்மா? யஸ்மா ஸேகி²யேஸு பஞ்ஞத்திவிஜானனமேவ பமாணம், ந வத்து²மத்தவிஜானன’’ந்தி. அயம் பனேத்த² அத்தோ² ஸிக்கா²பத³ஸீஸேன ஆபத்திம் க³ஹேத்வா யஸ்ஸ ஸிக்கா²பத³ஸ்ஸ ஸசித்தகஸ்ஸ சித்தம் அகுஸலமேவ ஹோதி, தம் லோகவஜ்ஜம், ஸசித்தகாசித்தகஸங்கா²தஸ்ஸ அசித்தகஸ்ஸ ச ஸசித்தகபக்கே² சித்தம் அகுஸலமேவ ஹோதி, தம்பி ஸுராபானாதி³லோகவஜ்ஜந்தி இமமத்த²ம் ஸந்தா⁴ய ‘‘யஸ்ஸா ஸசித்தகபக்கே² சித்தம் அகுஸலமேவ ஹோதி, அயம் லோகவஜ்ஜா நாமா’’தி வுத்தம். ‘‘ஸசித்தகபக்கே²’’தி ஹி இத³ம் வசனம் அசித்தகம் ஸந்தா⁴யாஹ. ந ஹி ஏகம்ஸதோ ஸசித்தகாய ‘‘ஸசித்தகபக்கே²’’தி விஸேஸனே பயோஜனம் அத்தீ²தி, ஏவம் ஸந்தேபி அனியமேன வுத்தஞ்ச நியமவஸேன ஏவ க³ஹேதப்³ப³ந்தி அத்தோ².

திரச்சா²னானம் பனாதி பன-ஸத்³தே³ன து²ல்லச்சயாதி³காரம் நிவத்தேதி. கிரியாதி ஏத்த² ‘‘டி²தம் ஸாதி³யதீ’’தி (பாரா. 58) வுத்தத்தா தம் கத²ந்தி சே? ‘‘ஸாதி³யதீ’’தி வுத்தத்தா கிரியா ஏவ. ஏவம் ஸந்தே ‘‘காயகம்மம் மனோகம்ம’’ந்தி வத்தப்³ப³ந்தி சே? ந, பசுரவோஹாரவஸேன ‘‘காயகம்ம’’ந்தி வுத்தத்தா. உப்³ப⁴ஜாணுமண்ட³லிகாய லப்³ப⁴தி ஏவாதி லிகி²தம். புப்³பே³ வுத்தனயேன ஸம்ஸந்தே³த்வா க³ஹேதப்³ப³ம். ‘‘து³ன்னிக்கி²த்தஸ்ஸ, பி⁴க்க²வே, பத³ப்³யஞ்ஜனஸ்ஸ அத்தோ²பி து³ன்னயோ ஹோதீ’’தி (அ. நி. 2.20) வத³ந்தேனாபி அத்த²ஸ்ஸ ஸுக²க்³க³ஹணத்த²மேவ பத³ப்³யஞ்ஜனஸ்ஸ ஸுனிக்கி²த்தபா⁴வோ இச்சி²தோ, ந அக்க²ரவசனாய, தஸ்மா ஆஹ ‘‘அத்த²ஞ்ஹி நாதோ² ஸரணம் அவோசா’’திஆதி³.

பட²மபாராஜிகவண்ணனா நிட்டி²தா.

2. து³தியபாராஜிகவண்ணனா

கா³மா வா அரஞ்ஞா வாதி லக்க²ணானுபஞ்ஞத்திகத்தா ஆதி³ம்ஹி வுத்தா. ஸப்³ப³ஸ்மிஞ்ஹி வினயபிடகே கா³மோ, கா³மூபசாரோ, கா³மக்கே²த்தம், கா³மஸீமா, கா³மஸீமூபசாரோதி பஞ்சவிதோ⁴ கா³மபே⁴தோ³ வேதி³தப்³போ³. ததா² ஆரஞ்ஞகஸீமாய ஏகம் அகா³மகம் அரஞ்ஞம், ஸம்விதா⁴னஸிக்கா²பதா³னம் (பாசி. 180 ஆத³யோ) ஏகம், ஸகா³மகம் ஏகம், அவிப்பவாஸஸீமாய ஏகம், க³ணம்ஹாஓஹீயனகஸ்ஸ (பாசி. 691) ஏகந்தி பஞ்சவிதோ⁴ அரஞ்ஞபே⁴தோ³ வேதி³தப்³போ³. தத்த² அத்தி² கா³மோ ந கா³மபரிஹாரம் கத்த²சி லப⁴தி, அத்தி² கா³மோ ந கா³மகிச்சம் கரோதி, ததா² அத்தி² அரஞ்ஞம் ந அரஞ்ஞபரிஹாரம் கத்த²சி லப⁴தி, அத்தி² அரஞ்ஞம் ந அரஞ்ஞகிச்சம் கரோதீதி அயம்பி பே⁴தோ³ வேதி³தப்³போ³.

தத்த² அவிப்பவாஸஸீமாஸம்மன்னனகம்மவாசாய ட²பேத்வா ‘‘கா³மஞ்ச கா³மூபசாரஞ்சா’’தி (மஹாவ. 144) ஏத்த² கா³மோ நாம பரிக்கி²த்தோ சே, பரிக்கே²பஸ்ஸ அந்தோ, அபரிக்கி²த்தோ சே, பரிக்கே²போகாஸதோ அந்தோ வேதி³தப்³போ³. அயம் உதோ³ஸிதஸிக்கா²பதே³ ‘‘அந்தோகா³மோ’’தி (பாரா. 478) ஆக³தோ. ஸாஸங்கஸிக்கா²பதே³ ‘‘அந்தரக⁴ர’’ந்தி (பாரா. 654) ஆக³தோ அனாஸங்கதோ. யதா²ஹ ‘‘அந்தரக⁴ரே நிக்கி²பேய்யாதி ஸமந்தா கோ³சரகா³மே நிக்கி²பேய்யா’’தி (பாரா. 654). ததா² அந்தரக⁴ரப்படிஸம்யுத்தானம் ஸேகி²யானம் அயமேவ பரிச்சே²தோ³ வேதி³தப்³போ³. ‘‘யா பன பி⁴க்கு²னீ ஏகா கா³மந்தரம் க³ச்சே²ய்யா’’தி (பாசி. 687) ஏத்தா²பி அயமேவ பரிச்சே²தோ³ அதி⁴ப்பேதோ ‘‘பரிக்கி²த்தஸ்ஸ கா³மஸ்ஸ பரிக்கே²பம் அதிக்கமந்தியா, அபரிக்கி²த்தஸ்ஸ கா³மஸ்ஸ உபசாரம் அதிக்கமந்தியா’’தி வுத்தத்தா.

யேஸு புராணபோத்த²கேஸு ‘‘உபசாரம் ஓக்கமந்தியா’’தி லிகி²தம், தம் விகாலே கா³மப்பவேஸனஸிக்கா²பதே³ஸு ஆசிண்ணம் நயம் க³ஹேத்வா பமாதே³ன லிகீ²யதி, ந பமாணம். யேஸு ச போத்த²கேஸு விகாலே கா³மப்பவேஸனஸிக்கா²பத³ஸ்ஸ விப⁴ங்கே³ (பாசி. 513) ‘‘கா³மம் பவிஸேய்யாதி பரிக்கி²த்தஸ்ஸ கா³மஸ்ஸ பரிக்கே²பம் அதிக்கமந்தஸ்ஸ, அபரிக்கி²த்தஸ்ஸ கா³மஸ்ஸ உபசாரம் அதிக்கமந்தஸ்ஸா’’தி லிகீ²யதி, ஸா பமாத³லேகா². உபசாரம் ஓக்கமந்தஸ்ஸாதி தத்த² பாடோ². வுத்தஞ்ஹி ஸமந்தபாஸாதி³காயம் ‘‘அபரிக்கி²த்தஸ்ஸ கா³மஸ்ஸ உபசாரோ அதி³ன்னாதா³னே வுத்தனயேனேவ வேதி³தப்³போ³’’தி (பாசி. அட்ட². 512). இத⁴ கங்கா²விதரணியம்பி வுத்தம் ‘‘ஸந்தம் பி⁴க்கு²ம் அனாபுச்சி²த்வாதி…பே… உபசாரம் ஓக்கமந்தஸ்ஸா’’திஆதி³ (கங்கா². அட்ட². விகாலகா³மப்பவேஸனஸிக்கா²பத³வண்ணனா).

யம் பன கத்த²சி போத்த²கே ‘‘பி⁴க்கு²னியா கா³மந்தராதி⁴காரே ஏகேன பாதே³ன இதரஸ்ஸ கா³மஸ்ஸ பரிக்கே²பம் வா அதிக்கமந்தே, உபசாரம் வா ஓக்கந்தே து²ல்லச்சயம், து³தியேன அதிக்கந்தமத்தே, ஓக்கந்தமத்தே ச ஸங்கா⁴தி³ஸேஸோ’’தி பாடோ² தி³ஸ்ஸதி. தத்த² ‘‘ஓக்கந்தே, ஓக்கந்தமத்தே’’தி ஏதானி பதா³னி அதி⁴கானி, கேவலம் லிகி²தகேஹி அஞ்ஞேஹி லிகி²தானி. கத்த²சி போத்த²கே ‘‘ஓக்கந்தமத்தே சா’’தி பத³ம் ந தி³ஸ்ஸதி, இதரம் தி³ஸ்ஸதி. தானி த்³வே பதா³னி பாளியா விருஜ்ஜ²ந்தி. ‘‘அபரிக்கி²த்தஸ்ஸ கா³மஸ்ஸ உபசாரம் அதிக்காமேந்தியா’’தி (பாசி. 692) ஹி பாளி. ததா² ஸமந்தபாஸாதி³காய (பாசி. அட்ட². 692) விருஜ்ஜ²ந்தி. ‘‘பரிக்கே²பாரஹட்டா²னம் ஏகேன பாதே³ன அதிக்கமதி, து²ல்லச்சயம், து³தியேன அதிக்கமதி, ஸங்கா⁴தி³ஸேஸோ. அபிசேத்த² ஸககா³மதோ…பே… ஏகேன பாதே³ன இதரஸ்ஸ கா³மஸ்ஸ பரிக்கே²பே வா உபசாரே வா அதிக்கந்தே து²ல்லச்சயம், து³தியேன அதிக்கந்தமத்தே ஸங்கா⁴தி³ஸேஸோ’’தி (பாசி. அட்ட². 692) ஹி வுத்தம்.

க³ண்டி²பதே³ சஸ்ஸ ‘‘பரிக்கே²பம் அதிக்காமேந்தியா’’தி வத்வா ‘‘உபசாரேபி ஏஸேவ நயோ’’தி வுத்தம். அனுக³ண்டி²பதே³ ச ‘‘அபரிக்கி²த்தஸ்ஸ கா³மஸ்ஸ உபசாரம் ‘ஓக்கமந்தியா’திபி போத்த²கேஸு ஏகச்சேஸு தி³ஸ்ஸதி, தம் ந க³ஹேதப்³ப³’’ந்தி வுத்தம். அபரம்பி வுத்தம் ‘‘அபரிக்கி²த்தஸ்ஸ கா³மஸ்ஸ உபசாரம் ‘அதிக்காமேந்தியா’தி வசனேனாபி ஏவம் வேதி³தப்³ப³ம் – விகாலே கா³மப்பவேஸனே த்³வின்னம் லேட்³டு³பாதானம் ஏவ வஸேன உபசாரோ பரிச்சி²ந்தி³தப்³போ³, இதரதா² யதா² ஏத்த² பரிக்கே²பாரஹட்டா²னம் பரிக்கே²பம் விய கத்வா ‘அதிக்காமேந்தியா’தி வுத்தம், ஏவம் தத்தா²பி ‘அபரிக்கி²த்தஸ்ஸ கா³மஸ்ஸ உபசாரம் அதிக்காமேந்தஸ்ஸா’தி வதே³ய்ய. யஸ்மா பன தத்த² பரிக்கே²பாரஹட்டா²னதோ உத்தரிமேகோ லேட்³டு³பாதோ உபசாரோதி அதி⁴ப்பேதோ. தஸ்மா தத³த்த²தீ³பனத்த²ம் ‘அபரிக்கி²த்தஸ்ஸ கா³மஸ்ஸ உபசாரம் ஓக்கமந்தஸ்ஸா’தி வுத்த’’ந்தி.

யம் பன அந்த⁴கட்ட²கதா²யம் பரிக்கே²பாரஹட்டா²னம்யேவ உபசாரந்தி ஸல்லக்கே²த்வா ‘‘பரிக்கே²பபஅக்கே²பாரஹட்டா²னானம் நின்னானாகரணதீ³பனத்த²ம் உபசாரம் ஓக்கமந்தஸ்ஸா’’தி வுத்தம், பாளிவிஸேஸமஸல்லக்கே²த்வா ‘‘அபரிக்கி²த்தஸ்ஸ கா³மஸ்ஸ உபசாரம் அதிக்கமந்தஸ்ஸ இத⁴ உபசாரோ பரிக்கே²போ யதா² ப⁴வேய்ய, தம் உபசாரம் பட²மம் பாத³ம் அதிக்காமேந்தஸ்ஸ ஆபத்தி து³க்கடஸ்ஸ, து³தியம் பாத³ம் அதிக்காமேந்தஸ்ஸ ஆபத்தி பாசித்தியஸ்ஸா’’தி வுத்தம், தம் ந க³ஹேதப்³ப³மேவ பாளியா விஸேஸஸம்ப⁴வதோதி. போராணக³ண்டி²பதே³ ‘‘உபசாரம் அதிக்காமேந்தியா பி⁴க்கு²னியா கா³மந்தராபத்தீ’’தி வுத்தம். தஸ்மா இத⁴ கங்கா²விதரணியா ‘‘ஏகேன பாதே³ன இதரஸ்ஸ…பே… அதிக்கந்தமத்தே ஸங்கா⁴தி³ஸேஸோ’’தி அயமேவ பாடோ² வேதி³தப்³போ³. ஏத்தாவதா இமேஸு யதா²வுத்தேஸு டா²னேஸு யதா²வுத்தபரிச்சே²தோ³வ கா³மோதி வேதி³தப்³போ³. இமஸ்ஸ அத்த²ஸ்ஸ தீ³பனத்த²ம் ‘‘கா³மோ நாம ஏககுடிகோபீ’’திஆதி³ (பாரா. 92) வுத்தம். இமஸ்ஸ வஸேன அஸதிபி பரிக்கே²பாதிக்கமே, உபசாரோக்கமனே வா அந்தராராமதோ வா பி⁴க்கு²னுபஸ்ஸயதோ வா தித்தி²யஸேய்யதோ வா படிக்கமனதோ வா தம் கா³மம் பவிஸந்தஸ்ஸ அந்தராராமபரிக்கே²பஸ்ஸ, உபசாரஸ்ஸ வா அதிக்கமனவஸேன கா³மபச்சயா ஆபத்தியோ வேதி³தப்³பா³.

கா³மூபசாரோ பன ‘‘ட²பேத்வா கா³மஞ்ச கா³மூபசாரஞ்சா’’தி (மஹாவ. 144) ஏத்த² பரிக்கி²த்தஸ்ஸ கா³மஸ்ஸ பரிக்கே²போவ, அபரிக்கி²த்தஸ்ஸ கா³மஸ்ஸ பரிக்கே²போகாஸோவ. வுத்தஞ்ஹேதம் அட்ட²கதா²யம் ‘‘கா³மூபசாரோதி பரிக்கி²த்தஸ்ஸ கா³மஸ்ஸ பரிக்கே²போ, அபரிக்கி²த்தஸ்ஸ கா³மஸ்ஸ பரிக்கே²போகாஸோ. தேஸு அதி⁴ட்டி²ததேசீவரிகோ பி⁴க்கு² பரிஹாரம் ந லப⁴தீ’’தி (மஹாவ. அட்ட². 144). கிம் பனேத்த² காரணம், யேன அயம் கா³மோ, கா³மூபசாரோ ச இத⁴ அஞ்ஞதா², அஞ்ஞத்த² ததா²தி? அட்டு²ப்பத்திதோ ‘‘தேன கோ² பன ஸமயேன பி⁴க்கூ² ‘ப⁴க³வதா திசீவரேன அவிப்பவாஸஸம்முதி அனுஞ்ஞாதா’தி அந்தரக⁴ரே சீவரானி நிக்கி²பந்தீ’’தி (மஹாவ. 143) இமிஸ்ஸா ஹி அட்டு²ப்பத்தியா ‘‘ட²பேத்வா கா³மஞ்ச கா³மூபசாரஞ்சா’’தி (மஹாவ. 144) வுத்தம். தஸ்மா யத்த² அந்தரக⁴ரஸஞ்ஞா, தத்த² அவிப்பவாஸஸீமா ந க³ச்ச²தீதி வேதி³தப்³பா³. தேன ச உதோ³ஸிதஸிக்கா²பதே³ ‘‘அந்தோகா³மே சீவரம் நிக்கி²பித்வா அந்தோகா³மே வத்த²ப்³ப³’’ந்தி (பாரா. 478) ச ‘‘ஸபா⁴யே வா த்³வாரமூலே வா, ஹத்த²பாஸா வா ந விஜஹிதப்³ப³’’ந்தி ச வுத்தம். கப்பியபூ⁴மியம் வஸந்தோயேவ ஹி கப்பியபூ⁴மியம் நிக்கி²த்தசீவரம் ரக்க²தி. ஸாஸங்கஸிக்கா²பதே³ பன ‘‘யஸ்மா யத்த² கா³மே சீவரம் நிக்கி²த்தம், தேன கா³மேன விப்பவஸந்தோ சீவரேன விப்பவஸதீதி வுச்சதி, தஸ்மா புன கா³மஸீமம் ஓக்கமித்வா வஸித்வா பக்கமதீ’’தி வுத்தம். தஸ்மிஞ்ஹி ஸிக்கா²பதே³ கா³மஸீமா கா³மோ நாமாதி அதி⁴ப்பேதோ. தத்த² விகாலே கா³மப்பவேஸனஸிக்கா²பத³விப⁴ங்கே³ ‘‘பரிக்கி²த்தஸ்ஸ கா³மஸ்ஸ பரிக்கே²பம் அதிக்கமந்தஸ்ஸ ஆபத்தி பாசித்தியஸ்ஸா’’தி (பாசி. 513) வசனதோ பரிக்கே²போ ந கா³மோ. கிந்து கா³மூபசாரோதி லேஸேன த³ஸ்ஸிதம் ஹோதி. இமஸ்மிம் பன ஸிக்கா²பத³விப⁴ங்கே³ ‘‘கா³மூபசாரோ நாமா’’தி ஆரபி⁴த்வா ‘‘அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி இமினா அபரிக்கி²த்தஸ்ஸ பரிக்கே²போகாஸோ கா³மூபசாரோதி ஸித்³த⁴ம். தத³த்த²ஸம்ப⁴வதோ தஸ்மிம் க⁴ரூபசாரே டி²தஸ்ஸ லேட்³டு³பாதோ கா³மூபசாரோதி குருந்த³ட்ட²கதா²யம், மஹாபச்சரியம்பி வுத்தம். உபசாரோ ஹி ‘‘கா³மோ ஏகூபசாரோ நானூபசாரோ’’திஆதீ³ஸு த்³வாரம், ‘‘அஜ்ஜோ²காஸோ ஏகூபசாரோ’’தி ஏத்த² ஸமந்தா ஸத்தப்³ப⁴ந்தரஸங்கா²தம் பமாணம், தஸ்மா ‘‘கா³மூபசாரோதி பரிக்கி²த்தஸ்ஸ கா³மஸ்ஸ பரிக்கே²போ, அபரிக்கி²த்தஸ்ஸ கா³மஸ்ஸ பரிக்கே²போகாஸோ’’தி அந்த⁴கட்ட²கதா²யம் வுத்தந்தி வேதி³தப்³ப³ம். ததா² குருந்தி³யம், மஹாபச்சரியஞ்ச. ததா² பாளியம்பி ‘‘அஜ்ஜா²ராமோ நாம பரிக்கி²த்தஸ்ஸ ஆராமஸ்ஸ அந்தோ ஆராமோ, அபரிக்கி²த்தஸ்ஸ உபசாரோ. அஜ்ஜா²வஸதோ² நாம பரிக்கி²த்தஸ்ஸ ஆவஸத²ஸ்ஸ அந்தோ ஆவஸதோ², அபரிக்கி²த்தஸ்ஸ உபசாரோ’’திஆதீ³ஸு தி³ஸ்ஸதி. மஹாஅட்ட²கதா²யம் பன ‘‘கா³மூபசாரோ’’திஆதீ³ஸு தி³ஸ்ஸதி. தஸ்மா து³தியோ லேட்³டு³பாதோ உபசாரோதி அதி⁴ப்பேதோ.

‘‘அபரிக்கி²த்தஸ்ஸ கா³மஸ்ஸ உபசாரம் ஓக்கமந்தஸ்ஸ ஆபத்தி பாசித்தியஸ்ஸா’’தி பாளிவிஸேஸஸம்ப⁴வதோ ச பட²மோ லேட்³டு³பாதோ கா³மோ ஏவ, து³தியோ கா³மூபசாரோதி வுத்தம். பரிக்கி²த்தஸ்ஸ பன கா³மஸ்ஸ இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ கா³மூபசாரோதி வுத்தந்தி ஏத்த² பே⁴தோ³ நத்தி². ஏத்தாவதா பரிக்கி²த்தஸ்ஸ து³விதோ⁴ உபசாரோ, அபரிக்கி²த்தஸ்ஸ சதுப்³பி³தோ⁴ உபசாரோ யத்த² ஸம்ப⁴வதி, யத்த² ச ந ஸம்ப⁴வதி, தம் ஸப்³ப³ம் த³ஸ்ஸிதம் ஹோதி.

கா³மகே²த்தஸ்ஸ ச கா³மஸீமாய ச லக்க²ணம் அட்ட²கதா²யமேவ வுத்தம். உப⁴யஞ்ஹி அத்த²தோ ஏகம். தத்த² கா³மஸீமாய கா³மபா⁴வோ ஸாஸங்கஸிக்கா²பத³வஸேன வேதி³தப்³போ³.

கா³மஸீமூபசாரோ நாம மனுஸ்ஸானம் கட்ட²திணபுப்ப²ப²லாதி³அத்தி²கானம் வனசரகானம் வலஞ்ஜனட்டா²னம். இமஸ்ஸ கா³மஸீமூபசாரபா⁴வோ உதோ³ஸிதஸிக்கா²பதே³, ‘‘அகா³மகே அரஞ்ஞே ஸமந்தா ஸத்தப்³ப⁴ந்தரா’’தி (பாரா. 494) ஆக³தட்டா²னே க²ந்த⁴கே (மஹாவ. 147) ச வேதி³தப்³போ³. ஏத்த² ஹி ப⁴க³வா கா³மந்தவாஸீனம் பி⁴க்கூ²னம் ஸீமம் த³ஸ்ஸேந்தோ ‘‘யம் கா³மம் வா நிக³மம் வா உபனிஸ்ஸாய விஹரதீ’’தி (மஹாவ. 147) வத்வா த³ஸ்ஸேதி. தத³னந்தரமேவ ‘‘அகா³மகே’’திஆதி³னா ஸத்தப்³ப⁴ந்தரஸீமம் த³ஸ்ஸேதி. தஸ்மா யோ பி⁴க்கு² கா³மம் வா நிக³மம் வா உபனிஸ்ஸாய ந விஹரதி, கேவலம் நாவாயம் வா த²லமக்³கே³ன வா அத்³தா⁴னமக்³க³ப்படிபன்னோ ஹோதி, தஸ்ஸ தத்த² தத்த² ஸத்தப்³ப⁴ந்தரஸீமா லப்³ப⁴தீதி வேதி³தப்³போ³. வுத்தஞ்ஹி ‘‘ஏககுலஸ்ஸ ஸத்தோ² ஹோதி, ஸத்தே² சீவரம் நிக்கி²பித்வா புரதோ வா பச்ச²தோ வா ஸத்தப்³ப⁴ந்தரா ந விஜஹிதப்³ப³’’ந்திஆதி³ (பாரா. 489). இத³மேவ அரஞ்ஞம் ஸந்தா⁴ய ‘‘ஆரஞ்ஞகஸீமாய ஏகம் அகா³மகம் அரஞ்ஞ’’ந்தி வுத்தம்.

யம் ஸந்தா⁴ய ‘‘அகா³மகே அரஞ்ஞே அத்³த⁴யோஜனே அத்³த⁴யோஜனே ஆபத்தி பாசித்தியஸ்ஸா’’தி (பாசி. 414) பாளியம் வுத்தம். இத³ம் ஸம்விதா⁴னஸிக்கா²பதா³னம் ஏகம் அகா³மகம் அரஞ்ஞம் நாம.

புரிமேன பன ஸக⁴ரம் ஸங்க³ஹிதம், இமினா தமஸங்க³ஹிதந்தி. யம் ஸந்தா⁴ய க³ணம்ஹா ஓஹீயனாதி⁴காரே அட்ட²கதா²யம் (பாசி. அட்ட². 692) ‘‘அகா³மகே அரஞ்ஞேதி ஏத்த² ‘நிக்க²மித்வா ப³ஹி இந்த³கீ²லா ஸப்³ப³மேதம் அரஞ்ஞ’ந்தி ஏவம் வுத்தம் லக்க²ணம் அரஞ்ஞம். தம் பனேத கேவலம் கா³மாபா⁴வேன ‘அகா³மக’ந்தி வுத்தம், ந விஞ்ஜா²டவிஸதி³ஸதாயா’’தி வுத்தம். யம் ஸந்தா⁴ய ‘‘ஆரஞ்ஞகம் நாம ஸேனாஸனம் பஞ்சத⁴னுஸதிகம் பச்சி²ம’’ந்தி (பாரா. 654; பாசி. 573) வுத்தம். இத³ம் ஆரஞ்ஞகஸேனாஸனம் நாம பரிக்கி²த்தஸ்ஸ பரிக்கே²பதோ ப³ஹி, அபரிக்கி²த்தஸ்ஸ பன பரிக்கே²போகாஸதோ ப³ஹி ஸருக்க²ம் வா அருக்க²ம் வா விஹாரே குன்னதி³ஸமாகிண்ணம்பி அரஞ்ஞம் நாம. ததா² ‘‘க³ணம்ஹா ஓஹீயனகஸ்ஸ ஏக’’ந்தி வுத்தம். இத³ம் அரஞ்ஞம்வ. இத³ம் பன புப்³பே³ அகா³மகபா⁴வேன ஆக³தட்டா²னே வுத்தலக்க²ணமேவ ஹுத்வா நிக்க²மித்வா ப³ஹி இந்த³கீ²லா த³ஸ்ஸனூபசாரவிஜஹனே ஏகமேவ ஆபத்திம் கரோதி, ததோ உத்³த⁴ம் அனாபத்தி. ‘‘ஸம்விதா⁴னஸிக்கா²பதா³னம் ஏக’’ந்தி வுத்தம் பன அத்³த⁴யோஜனே அத்³த⁴யோஜனே ஏகேகம் ஆபத்திம் கரோதி, ந ததோ ஓரம். இதரானி தீணி யதா²வுத்தபரிச்சே²த³தோ ஓரமேவ தத்த² வுத்தவிதி⁴ம் ந ஸம்பாதே³ந்தி, பரம் ஸம்பாதே³ந்தி. ஏவமேதேஸம் அஞ்ஞமஞ்ஞனானத்தம் வேதி³தப்³ப³ம்.

தத்த² பஞ்சவிதே⁴ கா³மே யோ ‘‘பரிக்கி²த்தஸ்ஸ கா³மஸ்ஸ இந்த³கீ²லே டி²தஸ்ஸ லேட்³டு³பாதோ’’தி (பாரா. 92) வுத்தோ, ஸோ ந கத்த²சி வினயபிடகே உபயோக³ம் க³தோ, கேவலம் அபரிக்கி²த்தஸ்ஸ பரிக்கே²போகாஸதோ அபரோ ஏகோ லேட்³டு³பாதோ கா³மூபசாரோ நாமாதி தீ³பனத்த²ம் வுத்தோ. பரிக்கி²த்தஸ்ஸபி சே கா³மஸ்ஸ ஏகோ லேட்³டு³பாதோ கப்பியபூ⁴மிஸமானோ உபசாரோதி வுத்தோ, பகே³வ அபரிக்கி²த்தஸ்ஸ பரிக்கே²போகாஸதோ ஏகோ. ஸோ பன பாகடத்தா ச அஜ்ஜோ²காஸத்தா ச ஓக்கமந்தஸ்ஸ ஆபத்திம் கரோதி ட²பேத்வா பி⁴க்கு²னியா கா³மந்தராபத்திம். பி⁴க்கு²னியோ ஹி தஸ்மிம் து³தியலேட்³டு³பாதஸங்கா²தே கா³மூபசாரே வஸந்தீ ஆபத்திஞ்ச ஆபஜ்ஜந்தி, கா³மம் பவிஸந்தீ கா³மந்தராபத்திஞ்ச. தாஸஞ்ஹி டி²தட்டா²னம் அரஞ்ஞஸங்க்²யம் க³ச்ச²தி ‘‘தாவதே³வ சா²யா மேதப்³பா³…பே… தஸ்ஸா தயோ ச நிஸ்ஸயே, அட்ட² ச அகரணீயானி ஆசிக்கே²ய்யாதா²’’தி (சூளவ. 430) வசனதோ. அரஞ்ஞப்படிஸம்யுத்தானம் ஸிக்கா²பதா³னம், விகாலேகா³மப்பவேஸனஸிக்கா²பத³ஸ்ஸ (பாசி. 508) ச பி⁴க்கு²னீனம் அஸாதா⁴ரணத்தா ச அந்தராராமபி⁴க்கு²னுபஸ்ஸயப்படிக்கமனாதீ³னம் கப்பியபூ⁴மிபா⁴வவசனதோ ச ‘‘ஏகா க³ணம்ஹா ஓஹீயேய்யாதி அகா³மகே அரஞ்ஞே து³தியிகாய பி⁴க்கு²னியா த³ஸ்ஸனூபசாரம் வா ஸவனூபசாரம் வா விஜஹந்தியா ஆபத்தி து²ல்லச்சயஸ்ஸா’’திஆதி³ஸிக்கா²பத³பஞ்ஞத்திதோ (பாசி. 692) ச பி⁴க்கு²னிக்க²ந்த⁴கனயஏன வா யஸ்மா பரிக்கி²த்தஸ்ஸ கா³மஸ்ஸ இந்த³கீ²லதோ பட்டா²ய அபரிக்கி²த்தஸ்ஸ உபசாரதோ பட்டா²ய நீயதி, தத்த² அந்தரக⁴ரே நிக்கி²த்தசீவரே ஸதி சதுரங்க³ஸமோதா⁴னேன பி⁴க்கூ² வஸந்தி, தஸ்மா ஸகா³மகம் நாம ஹோதி.

அவிப்பவாஸஸீமாய ஏகம் நாம ‘‘ந, பி⁴க்க²வே, பி⁴க்கு²னியா அரஞ்ஞே வத்த²ப்³ப³ம், யா வஸேய்ய, ஆபத்தி து³க்கடஸ்ஸா’’தி (சூளவ. 431) வசனதோ பி⁴க்கு²னீனம் அரஞ்ஞவாஸோ நாம நத்தீ²தி ஸித்³த⁴ம். தாய ஹி அரஞ்ஞே பி⁴க்கு²னுபஸ்ஸயே ஸதி அந்தோஆவாஸேபி து³தியிகாய த³ஸ்ஸனஸவனூபசாரம் விஜஹந்தியா ஆபத்தி. தஸ்மா அவிப்பவாஸஸீமாதி⁴காரே ‘‘ட²பேத்வா கா³மஞ்ச கா³மூபசாரஞ்சா’’தி (மஹாவ. 144) ஏத்த² யம் டா²னம் ட²பிதம், தத்தே²வ பி⁴க்கு²னுபஸ்ஸயோபி கப்பதி, ந ததோ பரம்.

தாஸஞ்ச அவிப்பவாஸஸீமாகம்மவாசாயம் ‘‘ட²பேத்வா கா³மஞ்ச கா³மூபசாரஞ்சா’’தி வசனம் நத்தீ²தி கத்வா தேஸ்வேவ கா³மகா³மூபசாரேஸு ப²ரதி. ததோ பரம் து³தியேஸு லேட்³டு³பாதாதீ³ஸு தாஸம் அகப்பியபூ⁴மிகத்தா ந ஸமானஸம்வாஸகஸீமா அரஞ்ஞே ப²ரதி பி⁴க்கூ²னம் கா³மகா³மூபசாரம் விய. தஸ்மா வுத்தம் ‘‘பி⁴க்கு²னியா ட²பேத்வா கா³மந்தராபத்தி’’ந்தி.

ஏவம் தாவ பஞ்சவித⁴ம் கா³மபே⁴த³ம், அரஞ்ஞபே⁴த³ஞ்ச ஞத்வா இதா³னி ‘‘அத்தி² கா³மோ ந கா³மபரிஹாரம் கத்த²சி லப⁴தீ’’திஆதி³பே⁴தோ³ வேதி³தப்³போ³. தத்த² யோ அட்ட²கதா²யம் ‘‘அமனுஸ்ஸோ நாம யோ ஸப்³ப³ஸோ வா மனுஸ்ஸானம் அபா⁴வேன யக்க²பரிக்³க³ஹபூ⁴தோ’’தி வுத்தோ, ஸோ கா³மோ ந கா³மபரிஹாரம் கத்த²சி ஸிக்கா²பதே³ லப⁴தி. யஞ்ஹி ஸந்தா⁴ய அட்ட²கதா²யம் ‘‘தம் பனேதம் பு³த்³த⁴காலே, சக்கவத்திகாலே ச நக³ரம் ஹோதி, ஸேஸகாலே ஸுஞ்ஞம் ஹோதி யக்க²பரிக்³க³ஹித’’ந்தி (பாரா. அட்ட². 1.84; தீ³. நி. அட்ட². 1.150) வுத்தம். யோ பன படிராஜசோராதீ³ஹி விலுத்தத்தா, கேவலம் ப⁴யேன வா ச²ட்³டி³தோ ஸக⁴ரோவ அந்தரஹிதகா³மபூ⁴தோ, ஸோ ‘‘கா³மந்தரே கா³மந்தரே ஆபத்தி பாசித்தியஸ்ஸா’’தி (பாசி. 183) வுத்தபாசித்தியம் ஜனேதி, விகாலே கா³மப்பவேஸனம், ஸேகி²யே சத்தாரி ஜனேதீதி வேதி³தப்³பா³. யோ பன கா³மோ யதோ வா மனுஸ்ஸா கேனசிதே³வ கரணீயேன புனபி ஆக³ந்துகாமா ஏவ அபக்கந்தாதி வுத்தோ, அமனுஸ்ஸோ ஸோ பகதிகா³மஸதி³ஸோவ.

அத்தி² அரஞ்ஞம் ந அரஞ்ஞபரிஹாரம் கத்த²சி லப⁴தீதி ஏத்த² ‘‘அஜ்ஜோ²காஸோ ஏகூபசாரோ நாம அகா³மகே அரஞ்ஞே ஸமந்தா ஸத்தப்³ப⁴ந்தரா ஏகூபசாரோ, ததோ பரம் நானூபசாரோ’’தி (பாரா. 494) ஏத்த² ய்வாயம் நானூபசாரோதி வுத்தோ, தம் வேதி³தப்³ப³ம். யோ பன பரிக்கி²த்தஸ்ஸ ஏகலேட்³டு³பாதஸங்கா²தோ கா³மூபசாரனாமகோ கா³மோ, யோ வா ஸத்தோ² நாதிரேகசாதுமாஸனிவிட்டோ², ஸோ அத்தி² கா³மோ ந கா³மகிச்சம் கரோதி. ந ஹி தம் டா²னம் ஓக்கமந்தோ கா³மப்பவேஸனாபத்திம் ஆபஜ்ஜதி. யம் பன கா³மஸீமாய பரியாபன்னம் மனுஸ்ஸானம் வலஞ்ஜனட்டா²னபூ⁴தம் அரஞ்ஞம், தம் அத்தி² அரஞ்ஞம் ந அரஞ்ஞகிச்சம் கரோதி நாம. ந ஹி தத்த² ஆரஞ்ஞகஸீமா லப்³ப⁴தீதி. ஏத்தாவதா ‘‘கா³மா வா அரஞ்ஞா வா’’தி இமிஸ்ஸா அனுபஞ்ஞத்தியா லக்க²ணானுபஞ்ஞத்திபா⁴வோ த³ஸ்ஸிதோ ஹோதி.

‘‘கோ³னிஸாதி³னிவிட்டோ²பி கா³மோ’’தி ஏத்த² ஸசே தஸ்ஸ கா³மஸ்ஸ கா³மகே²த்தபரிச்சே²தோ³ அத்தி², ஸப்³போ³பி ஏகோ கா³மோ. நோ சே, உபசாரேன வா பரிக்கே²பேன வா பரிச்சி²ந்தி³தப்³போ³. ஸசே கா³மகே²த்தே ஸதி கானிசி தானி க⁴ரானி அஞ்ஞமஞ்ஞஉபசாரப்பஹோனகம் டா²னம் அதிக்கமித்வா தூ³ரே தூ³ரே கதானி ஹோந்தி, விகாலே கா³மப்பவேஸே உபசாரோவ பமாணம். அந்தரக⁴ரப்படிஸம்யுத்தேஸு ஸேகி²யேஸு, பி⁴க்கு²னியா கா³மந்தராபத்தீஸு ச க⁴ரானம் பரிக்கே²பாரஹட்டா²னம் பமாணம், உபோஸதா²தி³கம்மானம் கா³மகே²த்தம் பமாணம், ஆரஞ்ஞகஸேனாஸனஸ்ஸ ஆஸன்னக⁴ரஸ்ஸ து³தியலேட்³டு³பாததோ பட்டா²ய பஞ்சத⁴னுஸதந்தரதா பமாணந்தி ஏவம் நோ படிபா⁴னந்தி ஆசரியா.

‘‘யம்பி ஏகஸ்மிம்யேவ கா³மகே²த்தே ஏகம் பதே³ஸம் ‘அயம்பி விஸும்கா³மோ ஹோதூ’தி பரிச்சி²ந்தி³த்வா ராஜா கஸ்ஸசி தே³தி, ஸோபி விஸும்கா³மஸீமா ஹோதியேவா’’தி (மஹாவ. அட்ட². 147) அட்ட²கதா²வசனதோ தம் பவிஸந்தியா பி⁴க்கு²னியா கா³மந்தராபத்தி ஹோதி ஏவ. ஸசே தத்த² விஹாரோ வா தே³வகுலம் வா ஸபா⁴ வா கே³ஹம் வா நத்தி², கேவலம் வத்து²மத்தகமேவ ஹோதி, கா³மோதி வினயகம்மம் ஸப்³ப³ம் தத்த² கப்பதி. ‘‘அமனுஸ்ஸோ கா³மோ’’தி ஹி வுத்தம். தஞ்ச டா²னம் இதரஸ்ஸ கா³மஸ்ஸ பரிக்கே²பப்³ப⁴ந்தரே வா உபசாரப்³ப⁴ந்தரே வா ஹோதி, விகாலே கா³மப்பவேஸனம் ஆபுச்சி²த்வாவ க³ந்தப்³ப³ம். நோ சே, அரஞ்ஞம் விய யதா²ஸுக²ம் க³ந்தப்³ப³ம். தத்த² சே ஆராமோ வா தித்தி²யஸேய்யாதீ³ஸு அஞ்ஞதரோவா ஹோதி, லத்³த⁴கப்பமேவ. பி⁴க்கு²னுபஸ்ஸயோ சே ஹோதி, கா³மம் பிண்டா³ய பவிஸந்தியா பி⁴க்கு²னியா கா³மந்தராபத்தி பரிஹரிதப்³பா³. ‘‘அரஞ்ஞம் நாம ட²பேத்வா கா³மஞ்ச கா³மூபசாரஞ்ச அவஸேஸம் அரஞ்ஞம் நாமா’’தி (பாரா. 92) ஏத்த² பரிக்கே²பே ஸதி யதா²வுத்தபரிச்சே²த³ம் கா³மமேவ ட²பேத்வா அவஸேஸம் தஸ்ஸ உபசாரம், ததோ பரஞ்ச அரஞ்ஞம் நாம, பரிக்கே²பே அஸதி யதா²வுத்தபரிச்சே²த³ம் கா³மூபசாரமேவ ட²பேத்வா ததோ பரம் அவஸேஸம் அரஞ்ஞம் நாமாதி அதி⁴ப்பாயோ. ஏவம் ஸதி ‘‘நிக்க²மித்வா ப³ஹி இந்த³கீ²லா ஸப்³ப³மேதம் அரஞ்ஞ’’ந்தி (விப⁴. 529) வுத்தலக்க²ணே அகா³மகே அரஞ்ஞே க³ணம்ஹாஓஹீயனாபத்தி, தத்த² அவிப்பவாஸஸீமாய ப²ரணம் விகாலே கா³மப்பவேஸனாபத்தியா அனாபத்தீதி ஏவமாதி³வினயவிதி⁴ ஸமேதி, அஞ்ஞதா² ந ஸமேதி.

‘‘ட²பேத்வா கா³மூபசாரம் அவஸேஸம் அரஞ்ஞம் நாமா’’தி (மஹாவ. 144) வுத்தே கா³மூபசாரதோ பரோ அரஞ்ஞந்தி ஸித்³தே⁴ ‘‘ட²பேத்வா கா³ம’’ந்தி விஸேஸத்தோ² ந தி³ஸ்ஸதி, கா³மஸ்ஸ பன அரஞ்ஞபா⁴வப்பஸங்க³ப⁴யா வுத்தந்தி சே? ந, கா³மூபசாரஸ்ஸ அபா⁴வப்பஸங்க³தோ. ஸதி ஹி கா³மே கா³மூபசாரோ ஹோதி, ஸோ ச தவ மதேன அரஞ்ஞபூ⁴தோ. குதோ தா³னி கா³மூபசாரோ. கா³மூபசாரோபி சே அரஞ்ஞஸங்க்²யம் க³ச்ச²தி, பரோவ கா³மோதி கத்வா ந யுத்தம் கா³மஸ்ஸ அரஞ்ஞபா⁴வப்பஸங்க³தோ ச. தஸ்மா ‘‘கா³மா வா அரஞ்ஞா வா’’தி ஏத்த² கா³மூபசாரோபி ‘‘கா³மோ’’ த்வேவ ஸங்க³ஹிதோ. தஸ்மா கா³மஸ்ஸ அரஞ்ஞபா⁴வப்பஸங்கோ³ ந யுஜ்ஜதி. யதி³ ஏவம் ‘‘ட²பேத்வா கா³மம் அவஸேஸம் அரஞ்ஞம் நாமா’’தி ஏத்தகம் வத்தப்³ப³ந்தி சே? ந, அரஞ்ஞஸ்ஸ பரிச்சே²த³ஜானனப்பஸங்க³தோ. ததா² ஹி வுத்தோ ‘‘அரஞ்ஞபரிச்சே²தோ³ ந பஞ்ஞாயதீ’’தி நோ லத்³தி⁴. கா³மூபசாரபரியந்தோ ஹி இத⁴ கா³மோ நாம. யதி³ ஏவம் ‘‘கா³மஸ்ஸ ச அரஞ்ஞஸ்ஸ ச பரிச்சே²த³த³ஸ்ஸனத்த²ம் வுத்த’’ந்தி அட்ட²கதா²யம் வத்தப்³ப³ம், ‘‘அரஞ்ஞஸ்ஸ பரிச்சே²த³த³ஸ்ஸனத்த²ம் வுத்த’’ந்தி கிமத்த²ம் வுத்தந்தி சே? வுச்சதே – அட்ட²கதா²சரியேன பட²மகா³மூபசாரம்யேவ ஸந்தா⁴ய வுத்தம் ‘‘அரஞ்ஞபரிச்சே²த³த³ஸ்ஸனத்த²’’ந்தி ஸப்³ப³ஸிக்கா²பதே³ ஹி பா³ஹிரஇந்த³கீ²லதோ பட்டா²ய கா³மூபசாரம் அரஞ்ஞம் நாம. கா³மபரிச்சே²த³வசனே பயோஜனம் பனேத்த² நத்தி² பரிக்கே²பேனேவ பாகடபூ⁴தத்தா. து³தியகா³மூபசாரோவ கா³மஸ்ஸ பரிச்சே²த³த³ஸ்ஸனத்த²ம் வுத்தோ பரிக்கே²பபா⁴வேன அபாகடத்தா. தத்த² பட²மகா³மூபசாரோ சே அரஞ்ஞபரிச்சே²த³த³ஸ்ஸனத்த²ம் வுத்தோ, தத்த² ந வத்தப்³போ³. ‘‘நிக்க²மித்வா இந்த³கீ²லா ஸப்³ப³மேதம் அரஞ்ஞ’’ந்தி வத்தப்³ப³ம். ஏவம் ஸந்தே ஸுப்³யத்ததரம் அரஞ்ஞபரிச்சே²தோ³ த³ஸ்ஸிதோ ஹோதி, மிச்சா²கா³ஹோ ச ந ஹோதி.

‘‘மஜ்ஜி²மஸ்ஸ புரிஸஸ்ஸ லேட்³டு³பாதோ’’தி ஹி வுத்தே அயம் கா³மூபசாரோவ அரஞ்ஞம் கா³மூபசாரஸ்ஸ விப⁴ங்க³த்தா. யதி³ அரஞ்ஞபரிச்சே²த³த³ஸ்ஸனத்த²ம் வுத்தம், அவுத்தகமேவ, அரஞ்ஞதோ பரந்தி ச மிச்சா²கா³ஹோ ஹோதீதி சே, நனு வுத்தம் ‘‘பட²மமேவ இத³ம் பரிக்கி²த்தஸ்ஸ கா³மஸ்ஸ உபசாரனியமனத்த²ம் வுத்த’’ந்தி? அரஞ்ஞபரிச்சே²த³த³ஸ்ஸனத்த²ம் கிஞ்சாபி ‘‘கா³மூபசாரோ’’திஆதி³ ஆரத்³த⁴ம், இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோதி பன ஏவம் வசனப்பயோஜனம். அபரிக்கி²த்தஸ்ஸ ச கா³மஸ்ஸ ய்வாயம் லேட்³டு³பாதோ உபசாரோ’’தி மஹாஅட்ட²கதா²யம் வுத்தோ, தஸ்ஸ நியமனந்தி வுத்தம் ஹோதி. கத²ம் பஞ்ஞாயதீதி சே? ‘‘அரஞ்ஞம் நாமா’’தி பத³ம் அனுத்³த⁴ரித்வா ‘‘கா³மூபசாரோ நாமா’’தி உத்³த⁴ரணஸ்ஸ கதத்தா. தத்த² ‘‘கா³மூபசாரோ நாமா’’தி மாதிகாயம் அவிஜ்ஜமானம் பத³ம் உத்³த⁴ரந்தோ தயோ அத்த²வஸே த³ஸ்ஸேதி. ஸேய்யதி²த³ம் – அரஞ்ஞபரிச்சே²த³த³ஸ்ஸனமேகோ அத்தோ², அபரிக்கி²த்தஸ்ஸ கா³மஸ்ஸ உபசாரேன ஸத்³தி⁴ம் பரிச்சே²த³த³ஸ்ஸனமேகோ, ந கேவலம் அபரிக்கி²த்தஸ்ஸயேவ உபசாரோ வினயாதி⁴காரே ஸப்பயோஜனோ த³ஸ்ஸிதப்³போ³, நிப்பயோஜனோபி பரிக்கி²த்தஸ்ஸ உபசாரோ இமினா பரியாயேன லப்³ப⁴தீதி அனுஸங்க³ப்பயோஜனமேகோ அத்தோ²பி வேதி³தப்³போ³.

‘‘அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி இத³ம் ப⁴க³வா தயோ அத்த²வஸே படிச்ச அபா⁴ஸி. ஸேய்யதி²த³ம் – அபரிக்கி²த்தஸ்ஸ கா³மஸ்ஸ பரிச்சே²த³த³ஸ்ஸனமேகோ, அவிப்பவாஸஸீமாதி⁴காரே அயமேவ கா³மூபசாரோதி த³ஸ்ஸனமேகோ, தத்த² டி²தஸ்ஸ து³தியோ லேட்³டு³பாதோ ஸப்³ப³த்த² கா³மப்படிஸம்யுத்தேஸு ஸிக்கா²பதே³ஸு ஸகிச்சகோ உபசாரோதி த³ஸ்ஸனமேகோதி ஏவம் ப⁴க³வா அத்தனோ தே³ஸனாவிலாஸப்பத்தியா ஏகேகபது³த்³தா⁴ரணேன தயோ அத்த²வஸே த³ஸ்ஸேதீதி வேதி³தப்³ப³ம்.

ததா² அவிப்பவாஸஸீமாகம்மவாசாய ‘‘ட²பேத்வா கா³மஞ்ச கா³மூபசாரஞ்சா’’தி (மஹாவ. 144) ஏத்தா²பி பரிக்கே²பே ஸதி கா³மம் ட²பேத்வா, அஸதி கா³மூபசாரம் ட²பேத்வாதி அத்தோ². பரிக்கி²த்தஸ்ஸ, அபரிக்கி²த்தஸ்ஸ ச மஜ்ஜே² ஆராமே அவிப்பவாஸஸீமாஸம்மன்னனகாலே அயம் நயோ அதிவிய யுஜ்ஜதி. உப⁴யபரிவஜ்ஜனதோ புப்³பே³ வுத்தனயேன வா உப⁴யத்த² உப⁴யம் லப்³ப⁴தேவ. ‘‘அந்தராராமேஸு பன ஆசிண்ணகப்பா பி⁴க்கூ² அவிப்பவாஸஸீமம் ஸம்மன்னந்தீ’’தி க³ண்டி²பதே³ வுத்தம். ‘‘அந்தரக⁴ரப்படிஸம்யுத்தானம் ஸேகி²யானம் அந்தராராமேஸு அஸம்ப⁴வதோ அந்தராராமோ ந கா³மஸங்க²ம் க³ச்ச²தி, தஸ்மா தத்த²பி அவிப்பவாஸஸீமா ருஹதேவா’’தி ஏகே. தே பி⁴க்கூ² து³தியஸ்ஸ கா³மூபசாரஸ்ஸ கா³மஸங்கா²ஸபா⁴வதோ தாஸம் இமாய து³தியாய அவிப்பவாஸகம்மவாசாய அபா⁴வம் த³ஸ்ஸேத்வா படிக்கி²பிதப்³பா³. அஜ்ஜா²ராமோ பன கா³மோபி ஸமானோ தித்தி²யஸேய்யாதி³ விய கப்பியபூ⁴மீதி வேதி³தப்³போ³.

ஆபத்தியா பரிச்சே²த³ம், ததா²னாபத்தியாபி ச;

த³ஸ்ஸேதும் கா³மஸம்ப³ந்த⁴-ஸிக்கா²பத³விபா⁴வனே.

கா³மகா³மூபசாரா த்³வே, த³ஸ்ஸிதா இத⁴ தாதி³னா;

ஸீமா ஸீமூபசாரா து, அனேகந்தாதி நுத்³த⁴டா.

உபசாரா ச த்³வே ஹோந்தி, பா³ஹிரப்³ப⁴ந்தரப்³ப³ஸா;

பரிக்கி²த்தாபரிக்கி²த்த-பே⁴தா³ சே சதுரோ ஸியும்.

அயஞ்ஹி உபசாரஸத்³தோ³ வினயபிடகே ‘‘அனுஜானாமி, பி⁴க்க²வே, அகி³லானேனபி ஆராமே ஆராமூபசாரே ச²த்தம் தா⁴ரேது’’ந்தி (சூளவ. 270) ஏவமாதீ³ஸு பா³ஹிரே உபசாரே தி³ஸ்ஸதி. பா³ஹிரோ உபசாரோ நாம பரிக்கே²பதோ, பரிக்கே²பாரஹட்டா²னதோ வா ஏகோ லேட்³டு³பாதோ. ‘‘அஜ்ஜா²ராமோ நாம பரிக்கி²த்தஸ்ஸ ஆராமஸ்ஸ அந்தோஆராமோ, அபரிக்கி²த்தஸ்ஸ உபசாரோ. அஜ்ஜா²வஸதோ² நாம பரிக்கி²த்தஸ்ஸ ஆவஸத²ஸ்ஸ அந்தோஆவஸதோ², அபரிக்கி²த்தஸ்ஸ உபசாரோ’’திஆதீ³ஸு (பாசி. 506) பன உபசாரஸத்³தோ³ அப்³ப⁴ந்தரே உபசாரே தி³ஸ்ஸதி. அப்³ப⁴ந்தரோ உபசாரோ ச நாம பரிக்கே²போ, பரிக்கே²பாரஹட்டா²னஞ்ச ஹோதி. இத⁴ பன பரிக்கே²போ ‘‘அஜ்ஜா²ராமோ, அஜ்ஜா²வஸதோ²’’தி வா ந வுச்சதி, அந்தோ ஏவ ஆராமோ, ஆவஸதோ²தி வா. தேஸு பா³ஹிரப்³ப⁴ந்தரபே⁴த³பி⁴ன்னேஸு த்³வீஸு உபசாரேஸு அவிப்பவாஸஸீமாதி⁴காரே ‘‘ட²பேத்வா கா³மஞ்ச கா³மூபசாரஞ்சா’’தி (மஹாவ. 144) ஏத்த² கா³மூபசாரோ நாம அப்³ப⁴ந்தரூபசாரோ அதி⁴ப்பேதோ, ந பா³ஹிரோ. பி⁴க்கு²னியா அரஞ்ஞஸஞ்ஞிததாய தஸ்ஸ பா³ஹிரஸ்ஸ, தஸ்ஸா கா³மந்தராபத்தியா டா²னபூ⁴தத்தா ச அப்³ப⁴ந்தரஉபசாரஸ்ஸாதி இத³மேத்த² காரணத்³வயம் வேதி³தப்³ப³ம். தத்த² இத⁴ அதி³ன்னாதா³னபாராஜிகவிப⁴ங்கே³யேவ பட²மோ கா³மூபசாரோ த³ஸ்ஸிதோ, ஸோ பா³ஹிரோ, து³தியோ அப்³ப⁴ந்தரோதி வேதி³தப்³போ³. பட²மேன ச அபரிக்கி²த்தஸ்ஸ கா³மஸ்ஸ து³தியலேட்³டு³பாதஸங்கா²தோ பா³ஹிரோ உபசாரோ, து³தியேன ச பரிக்கி²த்தஸ்ஸ கா³மஸ்ஸ பரிக்கே²பதோ பா³ஹிரஸங்கா²தோ அப்³ப⁴ந்தரோ உபசாரோ லேஸேன த³ஸ்ஸிதோதி வேதி³தப்³போ³. ஏவம் சத்தாரோபி உபசாரா இத⁴ ப⁴க³வதா தே³ஸனாவிலாஸப்பத்தேன தே³ஸனாலீலாய த³ஸ்ஸிதா ஹோந்தீதி அயம் நயோ ஸுட்டு² லக்கே²த்வா ஆசரியேஹி ஸம்மந்தயித்வா யதா²னுரூபம் தத்த² யோஜேதப்³போ³. இதரதா² –

அஸம்பு³த⁴ம் பு³த்³த⁴மஹானுபா⁴வம்;

த⁴ம்மஸ்ஸ க³ம்பீ⁴ரனயத்ததஞ்ச;

யோ வண்ணயே நம் வினயம் அவிஞ்ஞூ;

ஸோ து³த்³த³ஸோ ஸாஸனனாஸஹேது.

பாளிம் தத³த்த²ஞ்ச அஸம்பு³த⁴ஞ்ஹி;

நாஸேதி யோ அட்ட²கதா²னயஞ்ச;

அனிச்ச²யம் நிச்ச²யதோ பரேஹி;

கா³மோதி தேயேவ புரக்க²தோ ஸோ.

அனுக்கமேனேவ மஹாஜனேன;

புரக்க²தோ பண்டி³தமானி பி⁴க்கு²;

அபண்டி³தானம் விமதிம் அகத்வா;

ஆசரியலீலம் புரதோ கரோதி.

தத்த² ஹி பாளியம் ‘‘கா³மஸ்ஸ உபசாரோ கா³மூபசாரோ, கா³மஸங்கா²தோ உபசாரோ கா³மூபசாரோ நாமா’’தி உத்³த⁴ரித்வா கா³மஸ்ஸ உபசாரம் த³ஸ்ஸேந்தோ ‘‘இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி (பாரா. 92) வத்வா புன கா³மஸங்கா²தம் உபசாரம் த³ஸ்ஸேந்தோ ‘‘க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி வுத்தம். இமமத்த²ம் ஸந்தா⁴ய விகாலே கா³மப்பவேஸனகா³மந்தரஅஅப்பவாஸஸம்முதிஆதீ³ஸு பரிக்கே²பாரஹட்டா²னமேவ கா³மூபசாரந்தி வுத்தந்தி லிகி²தம்.

அத்த²தோ ஏகந்தி ஏத்த² ஸங்கா²ஸத்³த³ம் ஸங்கா²தஸத்³தே³ன ஸமானயதி. ‘‘ஆதி³யேய்யா’’தி இத³ம் பஞ்சவீஸதியா அவஹாரானம் ஸாதா⁴ரணபத³ம். டா²னாசாவனவஸேன ச கீ²லாதீ³னி ஸங்காமேத்வா கே²த்தாதி³க்³க³ஹணவஸேன சாதி அத்தோ². டா²னாசாவனே யதா² ஸாமிகஸ்ஸ து⁴ரனிக்கே²பாதி³ம் அனோலோகேத்வாவ ஆபத்தி, ததா² இஹாபீதி க³ஹேதப்³பா³.

‘‘அஸுகம் நாம ப⁴ண்ட³ம் அவஹரிஸ்ஸாமீ’’தி ஸப்³பே³ஸம் ஏகாஸயத்தா ‘‘ஏகேனாபீ’’தி வுத்தம். யதி³ ஆணத்தி இச்சி²தப்³பா³, ஸம்விதா⁴வஹாரோ நாம ஏகோ அவஹாரோ பரிஹாயிதப்³போ³.

ஓகாஸபரிகப்பே டா²னாசாவனாய க³ஹிதம்பி ஓகாஸபரிகப்பிதத்தா ரக்க²தி. ஓகாஸாதிக்கமோவ பமாணம் புப்³பே³ அஸுத்³த⁴சித்தேன க³ஹிதத்தா. இதா³னி ஸுத்³த⁴சித்தேன க³ஹிதேபி ஹோதி ஏவாதி வத³ந்தி, தம் ந ஸுந்த³ரம். ஏத்த² பன வினிச்ச²யோ ஸமந்தபாஸாதி³கம் ஓலோகேத்வா க³ஹேதப்³போ³.

உத்³தா⁴ரோ நத்தீ²தி டா²னாசாவனம் நத்தீ²தி அத்தோ².

உத்³த⁴தமத்தே அவஹாரோ ஸகலஸ்ஸ பயோக³ஸ்ஸ நிட்டா²பிதத்தா, ந அத்த²ஸாத⁴கவஸேன. உத்³தா⁴ரேயேவ ரக்க²தீதி ஏத்த² ஏவ-ஸத்³தே³ன பாதனே ந ரக்க²தீதி அத்தே² ஸித்³தே⁴பி அத்த²ஸாத⁴கவஸேன அத்த²ம் த³ஸ்ஸேதும் ‘‘தம் உத்³த⁴ரித்வா’’திஆதி³ வுத்தம்.

‘‘பத²ப்³யாராஜபதே³ஸராஜாத³யோ ப³ஹூ, தேஸம் ஸங்க³ண்ஹனத்த²ம் ‘ராஜானோ’தி ப³ஹுவசனம் வுத்த’’ந்தி லிகி²தம். கிஞ்சாபி ப³ஹுவசனம் கதம், இத³ம் பன ஏகம் பி³ம்பி³ஸாரமேவாதி த³ட்ட²ப்³ப³ம். ராஜானோதி கிஞ்சி அனித்³தி³ஸித்வா ஸாதா⁴ரணவஸேன கிஞ்சாபி வுத்தம், இத³ம் பன பி³ம்பி³ஸாரமேவாதி.

புப்³ப³ப்பயோகே³தி ஏத்த² க³மனகாலே மக்³க³ஸோத⁴னாதி⁴கரணே அபாசித்தியகே²த்தே து³க்கடம், லதாச்சே²த³னாதீ³ஸு பாசித்தியமேவ. க³ந்த்வா பன கும்பி⁴மத்த²கே ஜாதலதாதி³ச்சே²த³னே ஸஹபயோக³த்தா து³க்கடம். ‘‘ஏகப⁴ண்டே³ ஏவம் பா⁴ரியமித³ம், ‘த்வம்பி ஏகபஸ்ஸம் க³ண்ஹ, அஹம்பி ஏகபஸ்ஸம் க³ண்ஹாமீ’தி ஸம்வித³ஹித்வா உப⁴யேஸம் பயோகே³ன டா²னாசாவனே கதே காயவாசாசித்தேஹி ஸமுட்டா²தி. அஞ்ஞதா² ஸாஹத்தி²கம் வா ஆணத்திகஸ்ஸ அங்க³ம் ந ஹோதி, ஆணத்திகம் வா ஸாஹத்தி²கஸ்ஸாதி வுத்தலக்க²ணேன விருஜ்ஜ²தீ’’தி வினயக³ண்டி²பதே³ லிகி²தம். பி-ஸத்³தோ³ பனேத்த² தத்தே²வ லிகி²தோ.

காயவாசாஸமுட்டா²னம், யஸ்ஸா ஆபத்தியா ஸியா;

தத்ர வாசங்க³ம் சித்தம்வ, கம்மம் நஸ்ஸா விதீ⁴யதி.

கிரியாகிரியாதி³கம் யஞ்சே, யம்பி கம்மத்தயம் ப⁴வே;

ந யுத்தம் தம் விருத்³த⁴த்தா, கம்மமேகம்வ யுஜ்ஜதீதி. (வஜிர. டீ. பாராஜிக 131 பகிண்ணககதா²வண்ணனா);

து³தியபாராஜிகவண்ணனா நிட்டி²தா.

3. ததியபாராஜிகவண்ணனா

யதா² ஞாதபரிஞ்ஞா த⁴ம்மானம் ஸபா⁴வஜானனமேவ ‘‘இத³ம் ரூபம், அயம் வேத³னா’’தி, தீரணபரிஞ்ஞா பன த⁴ம்மஸபா⁴வேன ஸத்³தி⁴ம் அனிச்சாதி³வஸேன பவத்தமானம் ‘‘ரூபம் அனிச்சந்தி வா’’திஆதி³, ஏவமித⁴ ஸத்³தி⁴ம் சேதேத்வா ஏகத்தேனாபி பாணாதிபாதாபா⁴வா ‘‘ஜீவிதா வோரோபேய்யா’’தி வுத்தம். ‘‘மனுஸ்ஸவிக்³க³ஹ’’ந்தி வுத்தத்தா க³ப்³ப⁴ஸேய்யகானம் வஸேன ஸப்³ப³ஸுகு²மஅத்தபா⁴வதோ பட்டா²ய த³ஸ்ஸேதும் ‘‘கலலதோ பட்டா²யா’’தி ஆஹ. ஏத்த² ஜீவிதா வோரோபேந்தோ பச்சுப்பன்னதோ வியோஜேதி. தத்த² க²ணபச்சுப்பன்னம் ந ஸக்கா வோரோபேதும், ஸந்ததிபச்சுப்பன்னம் வா அத்³தா⁴பச்சுப்பன்னம் வா ஸக்கா. கத²ம்? தஸ்மிஞ்ஹி உபக்கமே கதே லத்³தூ⁴பக்கமம் ஜீவிதத³ஸகம் நிருஜ்ஜ²மானம் து³ப்³ப³லஸ்ஸ பரிஹீனவேக³ஸ்ஸ பச்சயோ ஹோதி. ஸந்ததிபச்சுப்பன்னம் யதா² த்³வே தயோ ஜவனவாரே ஜவித்வா நிருஜ்ஜ²தி, அத்³தா⁴பச்சுப்பன்னஞ்ச தத³னுரூபம் கத்வா நிருஜ்ஜ²தி, ததா² பச்சயோ ஹோதி. ததோ ஸந்ததிபச்சுப்பன்னம் வா அத்³தா⁴பச்சுப்பன்னம் வா யதா²பரிச்சி²ன்னகாலம் அபத்வா அந்தராவ நிருஜ்ஜ²தி. ஏவம் தது³ப⁴யம்பி வோரோபேதும் ஸக்கா. தஸ்மா பச்சுப்பன்னம் வியோஜேதி.

‘‘இமஸ்ஸ பனத்த²ஸ்ஸா’’தி வோஹாரவஸேன வுத்தமத்த²ம் பரமத்த²வஸேன ஆவிபா⁴வத்த²ம் ‘‘பாணோ வேதி³தப்³போ³’’திஆதி³ வுத்தம். காயவிஞ்ஞத்திஸஹிதாய சேதனாய பயுஜ்ஜதீதி பயோகோ³, கோ ஸோ? ஸரீரே ஸத்தா²தீ³னம் க³மனம் பஹரணந்தி காயவசீவிஞ்ஞத்திஸஹிதாய சேதனாய பரஸரீரே ஸத்த²பாதனம். தூ³ரே டி²தந்தி தூ³ரே வா திட்ட²து, ஸமீபே வா. ஹத்த²தோ முத்தேன பஹாரோ நிஸ்ஸக்³கி³யோ. தத்தா²தி நிஸ்ஸக்³கி³யப்பயோகே³. யோ கோசி மரதூதி ஏத்த² மஹாஜனஸமூஹே ந ஸக்கா. யஸ்ஸூபரி ஸரோ பததி, தஸ்ஸேவ ஜீவிதமரணம் காதும், ந யஸ்ஸ கஸ்ஸசி ஜீவிதமரணம். ஆணாபனந்தி வசீவிஞ்ஞத்திஸஹிதாய சேதனாய அதி⁴ப்பேதத்த²ஸாத⁴னம். தேனேவ ‘‘ஸாவேதுகாமோ ந ஸாவேதீ’’தி (பாரா. 54) வுத்தம். ஆணத்தினியாமகாதி ஆணத்திகப்பயோக³ஸாதி⁴கா. ஏதேஸு ஹி அவிரஜ்ஜி²தேஸு ஏவ ஆணத்திபயோகோ³ ஹோதி, ந அஞ்ஞதா².

ரூபூபஹாரோதி ஏத்த² –

‘‘மமாலாபே⁴ன ஏஸித்தீ², மரதூ’’தி ஸமீபகோ³;