நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

வினயவினிச்ச²யோ

க³ந்தா²ரம்ப⁴கதா²

1. வந்தி³த்வா ஸிரஸா ஸேட்ட²ம், பு³த்³த⁴மப்படிபுக்³க³லம்;

ப⁴வாபா⁴வகரம் த⁴ம்மம், க³ணஞ்சேவ நிரங்க³ணம்.

2. பி⁴க்கூ²னம் பி⁴க்கு²னீனஞ்ச, ஹிதத்தா²ய ஸமாஹிதோ;

பவக்கா²மி ஸமாஸேன, வினயஸ்ஸவினிச்ச²யம்.

3. அனாகுலமஸம்கிண்ணம், மது⁴ரத்த²பத³க்கமம்;

படுபா⁴வகரம் ஏதம், பரமம் வினயக்கமே.

4. அபாரம் ஓதரந்தானம், ஸாரம் வினயஸாக³ரம்;

பி⁴க்கூ²னம் பி⁴க்கு²னீனஞ்ச, நாவாபூ⁴தம் மனோரமம்.

5. தஸ்மா வினயனூபாயம், வினயஸ்ஸவினிச்ச²யம்;

அவிக்கி²த்தேன சித்தேன, வத³தோ மே நிபோ³த⁴த².

பி⁴க்கு²விப⁴ங்கோ³

பாராஜிககதா²

பட²மபாராஜிககதா²

6. திவிதே⁴ திலமத்தம்பி, மக்³கே³ ஸேவனசேதனோ;

அங்க³ஜாதம் பவேஸேந்தோ, அல்லோகாஸே பராஜிதோ.

7. பவேஸனம் பவிட்ட²ம் வா, டி²தமுத்³த⁴ரணம்பி வா;

ஸஸிக்கோ² ஸாதி³யந்தோ ஸோ, ட²பேத்வா கிரியம் சுதோ.

8. ஸந்த²தேனங்க³ஜாதேன, ஸந்த²தம் வா அஸந்த²தம்;

மக்³க³ம் பன பவேஸேந்தோ, ததே²வாஸந்த²தேன ச.

9. உபாதி³ன்னேனுபாதி³ன்னே, அனுபாதி³ன்னகேன வா;

க⁴ட்டிதே அனுபாதி³ன்னே, ஸசே ஸாதி³யதேத்த² ஸோ.

10. ஹோதி பாராஜிகக்கே²த்தே, பவிட்டே² து பராஜிதோ;

கே²த்தே து²ல்லச்சயம் தஸ்ஸ, து³க்கடஞ்ச வினித்³தி³ஸே.

11. மதே அக்கா²யிதே சாபி, யேபு⁴ய்யக்கா²யிதேபி ச;

மேது²னம் படிஸேவந்தோ, ஹோதி பாராஜிகோ நரோ.

12. யேபு⁴ய்யக்கா²யிதே சாபி, உபட்³ட⁴க்கா²யிதேபி ச;

ஹோதி து²ல்லச்சயாபத்தி, ஸேஸே ஆபத்தி து³க்கடம்.

13. நிமித்தமத்தம் ஸேஸேத்வா, கா²யிதேபி ஸரீரகே;

நிமித்தே மேது²னம் தஸ்மிம், ஸேவதோபி பராஜயோ.

14. உத்³து⁴மாதாதி³ஸம்பத்தே, ஸப்³ப³த்தா²பி ச து³க்கடம்;

கா²யிதாக்கா²யிதம் நாம, ஸப்³ப³ம் மதஸரீரகே.

15. சி²ந்தி³த்வா பன தச்சே²த்வா, நிமித்துப்பாடிதே பன;

வணஸங்கே²பதோ தஸ்மிம், ஸேவம் து²ல்லச்சயம் பு²ஸே.

16. ததோ மேது²னராகே³ன, பதிதாய நிமித்ததோ;

தாயம் உபக்கமந்தஸ்ஸ, து³க்கடம் மம்ஸபேஸியம்.

17. நக²பிட்டி²ப்பமாணேபி, மம்ஸே ந்ஹாரும்ஹி வா ஸதி;

மேது²னம் படிஸேவந்தோ, ஜீவமானே பராஜிதோ.

18. கண்ணச்சி²த்³த³க்கி²னாஸாஸு, வத்தி²கோஸே வணேஸு வா;

அங்க³ஜாதம் பவேஸேந்தோ, ராகா³ து²ல்லச்சயம் பு²ஸே.

19. அவஸேஸஸரீரஸ்மிம், உபகச்சூ²ருகாதி³ஸு;

வஸா மேது²னராக³ஸ்ஸ, ஸேவமானஸ்ஸ து³க்கடம்.

20. அஸ்ஸகோ³மஹிஸாதீ³னம், ஓட்ட²க³த்³ரப⁴த³ந்தினம்;

நாஸாஸு வத்தி²கோஸேஸு, ஸேவம் து²ல்லச்சயம் பு²ஸே.

21. ததா² ஸப்³ப³திரச்சா²னம், அக்கி²கண்ணவணேஸுபி;

அவஸேஸஸரீரேஸு, ஸேவமானஸ்ஸ து³க்கடம்.

22. தேஸம் அல்லஸரீரேஸு, மதானம் ஸேவதோ பன;

திவிதா⁴பி ஸியாபத்தி, கே²த்தஸ்மிம் திவிதே⁴ ஸதி.

23. ப³ஹி மேது²னராகே³ன, நிமித்தம் இத்தி²யா பன;

நிமித்தேன சு²பந்தஸ்ஸ, தஸ்ஸ து²ல்லச்சயம் ஸியா.

24. காயஸம்ஸக்³க³ராகே³ன, நிமித்தேன முகே²ன வா;

நிமித்தம் இத்தி²யா தஸ்ஸ, சு²பதோ க³ருகம் ஸியா.

25. ததே²வோப⁴யராகே³ன, நிமித்தம் புரிஸஸ்ஸபி;

நிமித்தேன சு²பந்தஸ்ஸ, ஹோதி ஆபத்தி து³க்கடம்.

26. நிமித்தேன நிமித்தம் து, திரச்சா²னக³தித்தி²யா;

து²ல்லச்சயம் சு²பந்தஸ்ஸ, ஹோதி மேது²னராக³தோ.

27. காயஸம்ஸக்³க³ராகே³ன, திரச்சா²னக³தித்தி²யா;

நிமித்தேன நிமித்தஸ்ஸ, சு²பனே து³க்கடம் மதம்.

28. அங்க³ஜாதம் பவேஸேத்வா, தமாவட்டகதே முகே²;

தத்தா²காஸக³தம் கத்வா, நீஹரந்தஸ்ஸ து³க்கடம்.

29. ததா² சதூஹி பஸ்ஸேஹி, இத்தி²யா ஹேட்டி²மத்தலம்;

அசு²பந்தம் பவேஸேத்வா, நீஹரந்தஸ்ஸ து³க்கடம்.

30. உப்பாடிதோட்ட²மம்ஸேஸு, ப³ஹி நிக்க²ந்தகேஸு வா;

த³ந்தேஸு வாயமந்தஸ்ஸ, தஸ்ஸ து²ல்லச்சயம் ஸியா.

31. அட்டி²ஸங்க⁴ட்டனம் கத்வா, மக்³கே³ து³வித⁴ராக³தோ;

ஸுக்கே முத்தேபி வாமுத்தே, வாயமந்தஸ்ஸ து³க்கடம்.

32. இத்தி²ம் மேது²னராகே³ன, ஆலிங்க³ந்தஸ்ஸ து³க்கடம்;

ஹத்த²க்³கா³ஹபராமாஸ-சும்ப³னாதீ³ஸ்வயம் நயோ.

33. அபதே³ அஹயோ மச்சா², கபோதா த்³விபதே³பி ச;

கோ³தா⁴ சதுப்பதே³ ஹேட்டா², வத்து² பாராஜிகஸ்ஸிமே.

34. ஸேவேதுகாமதாசித்தம், மக்³கே³ மக்³க³ப்பவேஸனம்;

இத³மங்க³த்³வயம் வுத்தம், பட²மந்திமவத்து²னோ.

35. து³க்கடம் பட²மஸ்ஸேவ, ஸாமந்தமிதி வண்ணிதம்;

ஸேஸானம் பன திண்ணம்பி, து²ல்லச்சயமுதீ³ரிதம்.

36. ‘‘அனாபத்தீ’’தி ஞாதப்³ப³ம், அஜானந்தஸ்ஸ பி⁴க்கு²னோ;

ததே²வாஸாதி³யந்தஸ்ஸ, ஜானந்தஸ்ஸாதி³கம்மினோ.

37. வினயே அனயூபரமே பரமே;

ஸுஜனஸ்ஸ ஸுகா²னயனே நயனே;

படு ஹோதி பதா⁴னரதோ ந ரதோ;

இத⁴ யோ பன ஸாரமதே ரமதே.

38. இமம் ஹிதவிபா⁴வனம் பா⁴வனம்;

அவேதி³ ஸுரஸம்ப⁴வம் ஸம்ப⁴வம்;

ஸ மாரப³ளிஸாஸனே ஸாஸனே;

ஸமோ ப⁴வதுபாலினா பாலினா.

இதி வினயவினிச்ச²யே பட²மபாராஜிககதா² நிட்டி²தா.

து³தியபாராஜிககதா²

39. ஆதி³யந்தோ ஹரந்தோவ-ஹரந்தோ இரியாபத²ம்;

விகோபேந்தோ ததா² டா²னா, சாவேந்தோபி பராஜிதோ.

40. தத்த² நானேகப⁴ண்டா³னம், பஞ்சகானம் வஸா பன;

அவஹாரா த³ஸேவேதே, விஞ்ஞாதப்³பா³ விபா⁴வினா.

41. ஸாஹத்தா²ணத்திகோ சேவ, நிஸ்ஸக்³கோ³ அத்த²ஸாத⁴கோ;

து⁴ரனிக்கே²பனஞ்சாதி, இத³ம் ஸாஹத்த²பஞ்சகம்.

42. புப்³ப³ஸஹபயோகோ³ ச, ஸம்விதா³ஹரணம்பி ச;

ஸங்கேதகம்மம் நேமித்தம், புப்³ப³யோகா³தி³பஞ்சகம்.

43. தே²ய்யபஸய்ஹபரிகப்ப-படிச்ச²ன்னகுஸாதி³கா;

அவஹாரா இமே பஞ்ச, வேதி³தப்³பா³வ விஞ்ஞுனா.

44. வத்து²காலக்³க⁴தே³ஸே ச, பரிபோ⁴க³ஞ்ச பஞ்சபி;

ஞத்வா ஏதானி காதப்³போ³, பண்டி³தேன வினிச்ச²யோ.

45. து³தியம் வாபி குத்³தா³லம், பிடகம் பரியேஸதோ;

க³ச்ச²தோ தே²ய்யசித்தேன, து³க்கடம் புப்³ப³யோக³தோ.

46. தத்த²ஜாதககட்ட²ம் வா, லதம் வா சி²ந்த³தோ பன;

து³க்கடம் உப⁴யத்தா²பி, வுத்தம் ஸஹபயோக³தோ.

47. பத²விம் க²ணதோ வாபி, ப்³யூஹதோ பம்ஸுமேவ வா;

ஆமஸந்தஸ்ஸ வா கும்பி⁴ம், ஹோதி ஆபத்தி து³க்கடம்.

48. முகே² பாஸம் பவேஸேத்வா, கா²ணுகே ப³த்³த⁴கும்பி⁴யா;

ப³ந்த⁴னானம் வஸா ஞேய்யோ, டா²னபே⁴தோ³ விஜானதா.

49. த்³வே டா²னானி பனேகஸ்மிம், கா²ணுகே ப³த்³த⁴கும்பி⁴யா;

வலயம் ருக்க²மூலஸ்மிம், பவேஸேத்வா கதாய வா.

50. உத்³த⁴ரந்தஸ்ஸ கா²ணும் வா, சி²ந்த³தோ ஸங்க²லிம்பி வா;

து²ல்லச்சயம் ததோ கும்பி⁴ம், டா²னா சாவேதி சே சுதோ.

51. பட²மம் பன கும்பி⁴ம் வா, உத்³த⁴ரித்வா ததா² புன;

டா²னா சாவேதி கா²ணும் வா, ஸங்க²லிம் வாபி ஸோ நயோ.

52. இதோ சிதோ ச க⁴ம்ஸந்தோ, மூலே ஸாரேதி ரக்க²தி;

வலயம் கே²க³தம் தத்த², கரோந்தோவ பராஜிதோ.

53. ஜாதம் சி²ந்த³தி சே ருக்க²ம், து³க்கடம் கும்பி⁴மத்த²கே;

ஸமீபே சி²ந்த³தோ தஸ்ஸ, பாசித்தியமதத்த²ஜம்.

54. அந்தோகும்பி⁴க³தம் ப⁴ண்ட³ம், ப²ந்தா³பேதி ஸசே பன;

அபப்³யூஹேதி தத்தே²வ, தஸ்ஸ து²ல்லச்சயம் ஸியா.

55. ஹரந்தோ கும்பி⁴யா ப⁴ண்ட³ம், முட்டி²ம் சி²ந்த³தி அத்தனோ;

பா⁴ஜனே வா க³தம் கத்வா, ஹோதி பி⁴க்கு² பராஜிதோ.

56. ஹாரம் வா பன பாமங்க³ம், ஸுத்தாருள்ஹம் து கும்பி⁴யா;

ப²ந்தா³பேதி யதா²வத்து²ம், டா²னா சாவேதி சே சுதோ.

57. ஸப்பிஆதீ³ஸு யம் கிஞ்சி, பிவதோ பாத³பூரணம்;

ஏகேனேவ பயோகே³ன, பீதமத்தே பராஜயோ.

58. கத்வாவ து⁴ரனிக்கே²பம், பிவந்தஸ்ஸ புனப்புனம்;

ஸகலம்பி ச தம் கும்பி⁴ம், பிவதோ ந பராஜயோ.

59. ஸசே கி²பதி யம் கிஞ்சி, ப⁴ண்ட³கம் தேலகும்பி⁴யம்;

தம் பாத³க்³க⁴னகம் தேலம், து⁴வம் பிவதி தாவதே³.

60. ஹத்த²தோ முத்தமத்தேவ, தே²ய்யசித்தோ வினஸ்ஸதி;

ஆவிஞ்ஜேத்வாபி வா கும்பி⁴ம், தேலம் கா³ளேதி சே ததா².

61. தேலஸ்ஸாகிரணம் ஞத்வா, கி²த்தம் ரித்தாய கும்பி⁴யா;

பீதம் தேலஞ்ச தம் ப⁴ண்ட³ம், உத்³த⁴ரந்தோவ த⁴ம்ஸிதோ.

62. தத்தே²வ பி⁴ந்த³தோ தேலம், ச²ட்³டே³ந்தஸ்ஸ ததே²வ ச;

ஜா²பேந்தஸ்ஸ அபோ⁴க³ம் வா, கரோந்தஸ்ஸ ச து³க்கடம்.

பூ⁴மட்ட²கதா².

63. ட²பிதம் பத்த²ரித்வா ச, ஸாடகத்த²ரணாதி³கம்;

வேடே²த்வா உத்³த⁴ரந்தஸ்ஸ, முத்தே டா²னா பராப⁴வோ.

64. ஓரிமந்தேன வா பு²ட்ட²-மோகாஸம் பாரிமந்ததோ;

பாராஜிகமதிக்கந்தே, கட்³ட⁴தோ உஜுகம்பி வா.

த²லட்ட²கதா².

65. புரதோ முக²துண்ட³ஞ்ச, கலாபக்³க³ஞ்ச பச்ச²தோ;

த்³வீஸு பஸ்ஸேஸு பக்க²ந்தோ, ஹேட்டா² பாத³னகா² ததா².

66. உத்³த⁴ஞ்சாபி ஸிக²க்³க³ந்தி, க³க³னே க³ச்ச²தோ பன;

மோரஸ்ஸ ச² பரிச்சே²தா³, வேதி³தப்³பா³ விபா⁴வினா.

67. பி⁴க்கு² ‘‘ஸஸ்ஸாமிகம் மோரம், க³ஹேஸ்ஸாமீ’’தி கே²க³தம்;

ஹத்த²ம் வாபி பஸாரேதி, புரதோ வாஸ்ஸ திட்ட²தி.

68. மோரோபி க³க³னே பக்கே², சாரேதி ந ச க³ச்ச²தி;

து³க்கடம் க³மனச்சே²தே³, ஆமஸந்தஸ்ஸ சேவ தம்.