5. து³தியஸேனாஸனஸிக்கா²பத³வண்ணனா

யம் கிஞ்சி சம்மந்தி கப்பியாகப்பியம் யம் கிஞ்சி சம்மம். நனு ‘‘ந, பி⁴க்க²வே, மஹாசம்மானி தா⁴ரேதப்³பா³னி ஸீஹசம்மம் ப்³யக்³க⁴சம்மம் தீ³பிசம்மம், யோ தா⁴ரேய்ய, ஆபத்தி து³க்கடஸ்ஸா’’தி (மஹாவ. 255) க²ந்த⁴கே ஸீஹசம்மாதீ³னம் படிக்கே²போ கதோதி ஆஹ ‘‘ஸீஹசம்மாதீ³னஞ்ஹீ’’திஆதி³. பரிஹரணேயேவ படிக்கே²போதி அத்தனோ ஸந்தகம் கத்வா தம் தம் விஹாரம் ஹரித்வா மஞ்சபீடா²தீ³ஸு அத்த²ரித்வா பரிபோ⁴கே³யேவ படிக்கே²போ, ஸேனாஸனஸந்தகம் கத்வா பூ⁴மத்த²ரணவஸேன பன பரிபோ⁴கே³ நேவத்தி² தோ³ஸோ. தேனாஹ ‘‘ஸேனாஸனபரிபோ⁴கே³ பன அகப்பியசம்மம் நாம நத்தீ²’’தி. பாவாரேந்தி ஸஞ்சா²தே³ந்தி ஸரீரம் ஏதேனாதி பாவாரோ. கோஜவோதி உத்³த³லோமிஏகந்தலோமிஆதி³கோஜவத்த²ரணம். ஸேஸந்தி பி⁴ஸி நிஸீத³னம் திணஸந்தா²ரோ பண்ணஸந்தா²ரோதி அவஸிட்ட²ம் ஸேனாஸனம். தத்த² பி⁴ஸீதி மஞ்சகபி⁴ஸி வா பீட²கபி⁴ஸி வா. நிஸீத³னந்தி ஸத³ஸம் வேதி³தப்³ப³ம். திணஸந்தா²ரோதி யேஸம் கேஸஞ்சி திணானம் ஸந்தா²ரோ. ஏஸ நயோ பண்ணஸந்தா²ரே. ஏத்த² ச பி⁴ஸி ஹேட்டா² வுத்தத்தா பாகடா. நிஸீத³னம் நிஸீத³னஸிக்கா²பதே³னேவ (பாசி. 531 ஆத³யோ) பாகடம். திணஸந்தா²ரபண்ணஸந்தா²ரானி பன லோகபஸித்³தா⁴னியேவ. தேனேவாஹ ‘‘பாகடமேவா’’தி.

நேவ உத்³த⁴ரேய்ய, ந உத்³த⁴ராபேய்யாதி அத்தனா வா உத்³த⁴ரித்வா பதிரூபே டா²னே ந ட²பேய்ய, பரேன வா ததா² ந காரேய்ய. தேனாஹ ‘‘யதா² ட²பித’’ந்திஆதி³. தம் ட²பேந்தேன ச ‘‘சதூஸு பாஸாணேஸூ’’திஆதி³னா (பாசி. அட்ட². 116) புப்³பே³ வுத்தனயேனேவ அந்தோகே³ஹே அனோவஸ்ஸகே நிக்கி²பிதப்³ப³ம். ஸசே பன ஸேனாஸனம் ஓவஸ்ஸதி, ச²த³னத்த²ஞ்ச திணம் வா இட்ட²கா வா ஆனீதா ஹோந்தி. ஸசே உஸ்ஸஹதி, சா²தே³தப்³ப³ம். நோ சே ஸக்கோதி, யோ ஓகாஸோ அனோவஸ்ஸகோ, தத்த² நிக்கி²பிதப்³ப³ம். ஸசே ஸப்³ப³ம்பி ஓவஸ்ஸதி, உஸ்ஸஹந்தேன அந்தோகா³மே உபாஸகானம் க⁴ரே ட²பேதப்³ப³ம். ஸசே தேபி ‘‘ஸங்கி⁴கம் நாம, ப⁴ந்தே, பா⁴ரியம், அக்³கி³தா³ஹாதீ³னம் பா⁴யாமா’’தி ந ஸம்படிச்ச²ந்தி, அஜ்ஜோ²காஸே பாஸாணானம் உபரி மஞ்சம் ட²பேத்வா ஸேஸம் புப்³பே³ வுத்தனயேனேவ நிக்கி²பித்வா திணேஹி ச பண்ணேஹி ச படிச்சா²தே³தப்³ப³ம். யஞ்ஹி தத்த² அங்க³மத்தம்பி அவஸிஸ்ஸதி, தம் அஞ்ஞேஸம் தத்த² ஆக³தானம் பி⁴க்கூ²னம் உபகாரம் ப⁴விஸ்ஸதீதி. உபசாரந்தி ஸப்³ப³பச்சி²மஸேனாஸனதோ த்³வே லேட்³டு³பாதா.

அயமேத்த² ஆபுச்சி²தப்³பா³னாபுச்சி²தப்³ப³வினிச்ச²யோ – (பாசி. அட்ட². 118) யா தாவ பூ⁴மியம் தீ³க⁴ஸாலா வா பண்ணஸாலா வா ஹோதி, யம் வா ருக்க²த்த²ம்பே⁴ஸு கதகே³ஹம் உபசிகானம் உட்டா²னட்டா²னம் ஹோதி, ததோ பக்கமந்தேன ஆபுச்சி²த்வாவ பக்கமிதப்³ப³ம். தஸ்மிஞ்ஹி கதிபயானி தி³வஸானி அஜக்³கி³யமானே வம்மிகாவ ஸந்திட்ட²ந்தி. யம் பன பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம் ஸிலுச்சயலேணம் வா ஸுதா⁴லித்தஸேனாஸனம் வா, யத்த² உபசிகாஸங்கா நத்தி², ததோ பக்கமந்தஸ்ஸ ஆபுச்சி²த்வாபி அனாபுச்சி²த்வாபி க³ந்தும் வட்டதி. தேனாஹ ‘‘யத்த² பனா’’திஆதி³. ஸசே தாதி³ஸேபி ஸேனாஸனே ஏகேன பஸ்ஸேன உபசிகா ஆரோஹந்தி, ஆபுச்சி²த்வாவ க³ந்தப்³ப³ம். ஆபுச்ச²னம் பன வத்தந்தி ஆபுச்ச²னம் க³மிகவத்தம். இத³ஞ்ச இதிகத்தப்³ப³தாத³ஸ்ஸனத்த²ம் வுத்தம், ந பன வத்தபே⁴த³து³க்கடந்தி (ஸாரத்த². டீ. பாசித்திய 3.118) த³ஸ்ஸனத்த²ம். கேசி பன ‘‘து³க்கடந்தி த³ஸ்ஸனத்த²’’ந்தி வத³ந்தி, தம் ந யுஜ்ஜதி வத்தக்க²ந்த⁴கட்ட²கதா²ய ‘‘யம் பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம், யத்த² உபசிகானாரோஹந்தி, தம் அனாபுச்ச²ந்தஸ்ஸாபி அனாபத்தீ’’தி (சூளவ. அட்ட². 360) வுத்தத்தா. ஆபுச்ச²ந்தேன பன பி⁴க்கு²ம்ஹி (பாசி. அட்ட². 116) ஸதி பி⁴க்கு² ஆபுச்சி²தப்³போ³, தஸ்மிம் அஸதி ஸாமணேரோ, தஸ்மிம் அஸதி ஆராமிகோ, தஸ்மிம்பி அஸதி யேன விஹாரோ காராபிதோ, ஸோ விஹாரஸாமிகோ, தஸ்ஸ வா குலே யோ கோசி ஆபுச்சி²தப்³போ³.

‘‘உபசாரே’’தி ஏதஸ்ஸேவ விவரணம் ‘‘ப³ஹி ஆஸன்னே’’தி, விஹாரஸ்ஸ ப³ஹி ஆஸன்னட்டா²னேதி அத்தோ². உபட்டா²னஸாலாய வாதி போ⁴ஜனஸாலாயம் வா. து³க்கடமேவாதி வுத்தப்பகாரஞ்ஹி த³ஸவித⁴ம் ஸேய்யம் அந்தோக³ப்³பா⁴தி³ம்ஹி கு³த்தட்டா²னே பஞ்ஞபேத்வா க³ச்ச²ந்தஸ்ஸ யஸ்மா ஸேய்யாபி ஸேனாஸனம்பி உபசிகாஹி பலுஜ்ஜதி, வம்மிகராஸியேவ ஹோதி, தஸ்மா பாசித்தியம் வுத்தம். ப³ஹி பன உபட்டா²னஸாலாதீ³ஸு பஞ்ஞபேத்வா க³ச்ச²ந்தஸ்ஸ ஸேய்யாமத்தமேவ நஸ்ஸேய்ய டா²னஸ்ஸ அகு³த்ததாய, ந ஸேனாஸனம், தஸ்மா ஏத்த² து³க்கடம் வுத்தம். மஞ்சபீட²ம் பன யஸ்மா ந ஸக்கா ஸஹஸா உபசிகாஹி கா²யிதும், தஸ்மா தம் விஹாரேபி ஸந்த²ரித்வா க³ச்ச²ந்தஸ்ஸ து³க்கடம் வுத்தம். விஹாரூபசாரே பன தம் விஹாரசாரிகம் ஆஹிண்ட³ந்தா தி³ஸ்வாவ படிஸாமேந்தி.

உத்³த⁴ரணானி கத்வாதி ஏத்த² உத்³த⁴ரித்வா க³ச்ச²ந்தேன மஞ்சபீட²கவானம் ஸப்³ப³ம் அபனேத்வா (பாசி. அட்ட². 118) ஸம்ஹரித்வா சீவரவம்ஸே லக்³கே³த்வா க³ந்தப்³ப³ம். பச்சா² ஆக³ந்த்வா வஸனகபி⁴க்கு²னாபி புன மஞ்சபீட²ம் வா பஞ்ஞபேத்வா ஸயித்வா க³ச்ச²ந்தேன ததே²வ காதப்³ப³ம். அந்தோகுட்டதோ ஸேய்யம் ப³ஹிகுட்டே பஞ்ஞபேத்வா வஸந்தேன க³மனகாலே புன க³ஹிதட்டா²னேயேவ படிஸாமேதப்³ப³ம். உபரிபாஸாத³தோ ஓரோபேத்வா ஹேட்டா²பாஸாதே³ வஸந்தஸ்ஸாபி ஏஸேவ நயோ. ரத்திட்டா²னதி³வாட்டா²னேஸு மஞ்சபீட²ம் பஞ்ஞபேத்வாபி க³மனகாலே புன க³ஹிதட்டா²னேயேவ ட²பேதப்³ப³ம். உத்³த⁴ராபேத்வா க³மனேபி ஏஸேவ நயோ. ஆபுச்சி²த்வா க³ச்ச²ந்தேன பன ‘‘பி⁴க்கு²ம்ஹி ஸதி பி⁴க்கு² ஆபுச்சி²தப்³போ³’’திஆதி³னா (பாசி. அட்ட². 116) ஹேட்டா² வுத்தனயேனேவ ஆபுச்சி²த்வா க³ந்தப்³ப³ம்.

து³தியஸேனாஸனஸிக்கா²பத³வண்ணனா நிட்டி²தா.