10. ராஜஸிக்கா²பத³வண்ணனா

ராஜதோ போ⁴க்³க³ந்தி ராஜதோ லத்³த⁴போ⁴க்³க³ம். ராஜபோ⁴க்³கோ³தி ராஜாமத்தோ. ராஜதோ போ⁴கோ³தி ரஞ்ஞா தி³ன்னம் இஸ்ஸரியம். இமினாதிஆதீ³தி ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஹீ’’தி இத³ம். ஆக³மனஸுத்³தி⁴ந்தி மூலஸுத்³தி⁴ம். யதி³ ஹி இமினா கப்பியனீஹாரேன அபேஸேத்வா ‘‘இத³ம் இத்த²ன்னாமஸ்ஸ பி⁴க்கு²னோ தே³ஹீ’’தி பேஸேய்ய, ஸோபி தூ³தோ தம் பி⁴க்கு²ம் உபஸங்கமித்வா ஏவம் வதே³ய்ய ‘‘இத³ம் கோ², ப⁴ந்தே, ஆயஸ்மந்தம் உத்³தி³ஸ்ஸ சீவரசேதாபன்னம் ஆப⁴தம், படிக்³க³ண்ஹாது ஆயஸ்மா சீவரசேதாபன்ன’’ந்தி (பாரா. 538), ததா³ படிக்கி²பித்வாபி கப்பியகாரகம் புட்டே²ன தம் நித்³தி³ஸிதும் ந வட்டதி. தேனாஹ ‘‘ஸசே ஹீ’’திஆதி³. அகப்பியவத்து²ம் ஆரப்³பா⁴தி ஹிரஞ்ஞாதி³ம் ஆரப்³ப⁴. ஈதி³ஸேன தூ³தவசனேனாதி ‘‘படிக்³க³ண்ஹாது ஆயஸ்மா சீவரசேதாபன்ன’’ந்தி ஏவரூபேன தூ³தவசனேன. தஸ்மாதி யஸ்மா ஸம்படிச்சி²தும் அகப்பியம் ஹோதி, தஸ்மா. ஸுவண்ணந்தி ஜாதரூபம். ரஜதந்தி ரூபியம். கஹாபணேனாதி ஸுவண்ணமயோ வா ரூபியமயோ வா பாகதிகோ வா கஹாபணோ. மாஸகோதி லோஹமாஸகோ வா ஹோது, தா³ருமாஸகோ வா ஹோது, ஜதுமாஸகோ வா ஹோது, யோ யோ யத்த² யத்த² ஜனபதே³ யதா³ யதா³ வோஹாரம் க³ச்ச²தி, அந்தமஸோ அட்டி²மயோபி சம்மமயோபி ருக்க²ப²லபீ³ஜமயோபி ஸமுட்டா²பிதரூபோபி அஸமுட்டா²பிதரூபோபி ஸப்³போ³ இத⁴ மாஸகோதி வேதி³தப்³போ³. ஏத்த² ச யம் வத்தப்³ப³ம், தம் ரூபியஸிக்கா²பதே³ வக்கா²ம.

முத்தாதி ஹத்தி²கும்ப⁴ஜாதி³கா அட்ட²விதா⁴ முத்தா. ததா² ஹி ஹத்தி²கும்ப⁴ம் வராஹதா³ட²ம், பு⁴ஜங்க³ஸீஸம், வலாஹகம், வேளு, மச்ச²ஸிரோ, ஸங்கோ², ஸிப்பீதி அட்ட² முத்தாயோனியோ. தத்த² யா மச்ச²ஸங்க²ஸிப்பிஜாதா, ஸா ஸாமுத்³தி³கா, பு⁴ஜங்க³ஜாபி காசி ஸாமுத்³தி³கா ஹோதி. இதரா அஸாமுத்³தி³கா. யஸ்மா பன ப³ஹுலம் ஸாமுத்³தி³காவ முத்தா லோகே தி³ஸ்ஸந்தி, தத்தா²பி ஸிப்பிஜாவ, இதரா கதா³சி. தஸ்மா ஸம்மோஹவினோத³னியம் ‘‘முத்தாதி ஸாமுத்³தி³கமுத்தா’’தி (விப⁴. அட்ட². 172) வுத்தம். மணீதி ட²பேத்வா வேளுரியாதி³கே அந்தமஸோ ஜாதிப²லிகம் உபாதா³ய ஸப்³போ³பி நீலபீதாதி³வண்ணபே⁴தோ³ மணீதி வேதி³தப்³போ³, பசித்வா கதோ பன காசமணியேவேகோ பத்தாதி³ப⁴ண்ட³மூலத்த²ம் ஸம்படிச்சி²தும் வட்டதி. வேளுரியோ நாம வம்ஸவண்ணமணி. ஸங்கோ²தி த⁴மனஸங்கோ² தோ⁴தவித்³தோ⁴ ரதனமிஸ்ஸோ, பானீயஸங்கோ² பன ரதனாமிஸ்ஸகதோ, ஸோ ச அஞ்ஜனாதி³பே⁴ஸஜ்ஜத்தா²ய, ப⁴ண்ட³மூலத்தா²ய ச ஸம்படிச்சி²தும் வட்டதி. ஸிலாதி தோ⁴தவித்³தா⁴ ரதனஸம்யுத்தா முக்³க³வண்ணா ஸிலா. ரதனேன பன அமிஸ்ஸா ஸத்த²கனிஸானாதி³அத்தா²ய படிக்³க³ண்ஹிதும் வட்டதி. ஏத்த² ச ‘‘ரதனஸம்யுத்தாதி ஸுவண்ணேன ஸத்³தி⁴ம் யோஜேத்வா பசித்வா கதா’’தி வத³ந்தி. பவாளந்தி தோ⁴தம்பி அதோ⁴தம்பி ஸப்³ப³ம் பவாளம். லோஹிதங்கோதி ரத்தமணி. மஸாரக³ல்லந்தி கப³ரமணி. யம் ‘‘மரகத’’ந்திபி வுச்சதி.

ஸத்த த⁴ஞ்ஞானீதி ஸானுலோமானி ஸாலிஆதீ³னி ஸத்த த⁴ஞ்ஞானி. நீவாராதி³உபத⁴ஞ்ஞஸ்ஸ பன ஸாலிஆதி³மூலத⁴ஞ்ஞந்தோக³த⁴த்தா ‘‘ஸத்த த⁴ஞ்ஞானீ’’தி வுத்தம். தா³ஸிதா³ஸகே²த்தவத்து²புப்பா²ராமப²லாராமாத³யோதி ஏத்த² தா³ஸீ நாம அந்தோஜாதத⁴னக்கீதகரமரானீதப்பபே⁴தா³. ததா² தா³ஸோ. கே²த்தம் நாம யஸ்மிம் புப்³ப³ண்ணம் ருஹதி. வத்து² நாம யஸ்மிம் அபரண்ணம் ருஹதி. யத்த² வா உப⁴யம்பி ருஹதி, தம் கே²த்தம். தத³த்தா²ய அகதபூ⁴மிபா⁴கோ³ வத்து². கே²த்தவத்து²ஸீஸேன சேத்த² வாபிதளாகாதீ³னிபி ஸங்க³ஹிதானேவ. வஸ்ஸிகாதீ³னம் புப்ப²னகோ புப்பா²ராமோ. அம்ப³ப²லாதீ³னம் ப²லனகோ ப²லாராமோ. ந கேவலஞ்ச அத்தனோயேவத்தா²ய ஸம்படிச்சி²தும் ந வட்டதி, ஸசேபி கோசி ஜாதரூபரஜதம் ஆனேத்வா ‘‘இத³ம் ஸங்க⁴ஸ்ஸ த³ம்மி, ஆராமம் வா கரோத², சேதியம் வா போ⁴ஜனஸாலாதீ³னம் வா அஞ்ஞதர’’ந்தி வத³தி, இத³ம்பி ஸம்படிச்சி²தும் ந வட்டதி. ‘‘யஸ்ஸ கஸ்ஸசி ஹி அஞ்ஞஸ்ஸ அத்தா²ய ஸம்படிச்ச²ந்தஸ்ஸ து³க்கடம் ஹோதீ’’தி (பாரா. அட்ட². 2.538-539) மஹாபச்சரியம் வுத்தம். தேனாஹ ‘‘சேதியஸங்க⁴க³ணபுக்³க³லானம் வா அத்தா²ய ஸம்படிச்சி²தும் ந வட்டந்தீ’’தி.

ஸசே பன ஸங்க⁴ம் வா க³ணம் வா புக்³க³லம் வா அனாமஸித்வா ‘‘இத³ம் ஹிரஞ்ஞஸுவண்ணம் சேதியஸ்ஸ தே³ம, விஹாரஸ்ஸ தே³ம, நவகம்மஸ்ஸ தே³மா’’தி வத³ந்தி, படிக்கி²பிதும் ந வட்டதி. ‘‘இமே இத³ம் ப⁴ணந்தீ’’தி கப்பியகாரகானம் ஆசிக்கி²தப்³ப³ம். ‘‘சேதியாதீ³னம் அத்தா²ய தும்ஹே க³ஹேத்வா ட²பேதா²’’தி வுத்தே பன ‘‘அம்ஹாகம் க³ஹேதும் ந வட்டதீ’’தி படிக்கி²பிதப்³ப³ம்.

வேய்யாவச்சகரோதி கிச்சகரோ. இத⁴ பன ஸப்³போ³ கிச்சகரோவ ‘‘வேய்யாவச்சகரோ’’தி அதி⁴ப்பேதோதி ஆஹ ‘‘கப்பியகாரகோ’’தி. ஏஸோ கோ²தி ‘‘அஸுகவீதி²யம் அஸுகக⁴ரே அஸுகனாமோ’’தி பரம்முக²ம் வத³தி. இதரம்பீதி பரம்முகா²னித்³தி³ட்ட²ம்பி. ‘‘அத்தோ² மே, ஆவுஸோ, சீவரேனா’’தி ஏதம் சோத³னாலக்க²ணனித³ஸ்ஸனந்தி ஸம்ப³ந்தோ⁴. தத்த² சோத³னாலக்க²ணனித³ஸ்ஸனந்தி வாசாய சோத³னாலக்க²ணனித³ஸ்ஸனம். தேனாஹ ‘‘ஸசே ஹீ’’திஆதி³. இத³ம் வா வசனம் வத்தப்³ப³ந்தி ஸம்ப³ந்தோ⁴. ஏதஸ்ஸ வா அத்தோ² யாய காயசி பா⁴ஸாய வத்தப்³போ³தி ஸம்ப³ந்தோ⁴. ‘‘தே³ஹி மே சீவரம், ஆஹர மே சீவரம், பரிவத்தேஹி மே சீவரம், சேதாபேஹி மே சீவர’’ந்தி ஏதானி பன வசனானி ஏதேஸம் வா அத்தோ² யாய காயசி பா⁴ஸாய ந வத்தப்³போ³. தேனாஹ ‘‘தே³ஹி மே’’திஆதி³. ஸாதே⁴ய்யாதி நிப்பா²தே³ய்ய. இச்சேதம் குஸலந்தி ஏவம் யாவததியம் சோத³னேன தஸ்ஸ சீவரஸ்ஸ யதே³தம் அபி⁴னிப்பா²த³னம், ஏதம் குஸலம் ஸாது⁴ ஸுட்டூ²தி அத்தோ². தேனாஹ ‘‘ஏதம் ஸுந்த³ர’’ந்தி.

ச²க்க²த்தும் பரமோ பரிச்சே²தோ³ அஸ்ஸாதி ச²க்க²த்துபரமம். இத³ஞ்ஹி ‘‘டா²தப்³ப³’’ந்தி இமிஸ்ஸா கிரியாய விஸேஸனம், ச²க்க²த்துபரமம் டா²னம் காதப்³ப³ந்தி அத்தோ². தேனாஹ ‘‘பா⁴வனபும்ஸகவசனமேத’’ந்தி, ஏதம் பா⁴வே டா²தப்³ப³ந்தி வுத்ததா⁴த்வத்த²மத்தே ஸாதே⁴தப்³பே³ நபும்ஸகலிங்க³வசனந்தி அத்தோ². ந நிஸீதி³தப்³ப³ந்தி ‘‘இத⁴, ப⁴ந்தே, நிஸீத³தா²’’தி வுத்தேபி ந நிஸீதி³தப்³ப³ம். ந ஆமிஸம் படிக்³க³ஹேதப்³ப³ந்தி யாகு³க²ஜ்ஜகாதி³பே⁴த³ம் கிஞ்சி ஆமிஸம் ‘‘க³ண்ஹத², ப⁴ந்தே’’தி யாசியமானேனாபி ந க³ண்ஹிதப்³ப³ம். ந த⁴ம்மோ பா⁴ஸிதப்³போ³தி (பாரா. அட்ட². 2.538-539) ‘‘மங்க³லம் வா அனுமோத³னம் வா பா⁴ஸதா²’’தி யாசியமானேனாபி ந கிஞ்சி பா⁴ஸிதப்³ப³ம். டா²னம் ப⁴ஞ்ஜதீதி டி²திம் வினாஸேதி. ட²த்வா சீவரம் க³ஹேதும் ஆக³தேன ஹி தம் உத்³தி³ஸ்ஸ துண்ஹீபூ⁴தேன டா²தப்³ப³மேவ, ந நிஸஜ்ஜாதி³கம் காதப்³ப³ம். இமினா பன தம் கதந்தி டா²னம் வினாஸிதம் ஹோதி. தேனாஹ ‘‘ஆக³தகாரணம் வினாஸேதீ’’தி. ‘‘ஆக³தகாரணம் நாம டா²னமேவ, தஸ்மா ‘ந காதப்³ப³’ந்தி வாரிதஸ்ஸ கதத்தா நிஸஜ்ஜாதீ³ஸு கதேஸு ச²ஸு டா²னேஸு ஏகம் டா²னம் ப⁴ஞ்ஜதீ’’தி (ஸாரத்த². டீ. 2.537-539) அயமேத்த² அதி⁴ப்பாயோ. ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³ம். ‘‘ந அஞ்ஞம் கிஞ்சி காதப்³ப³’’ந்தி ஹி இத³ம் டா²னலக்க²ணம். தேனேவாஹ ‘‘இத³’’ந்திஆதி³. தத்த² இத³ந்தி ‘‘சதுக்க²த்தும் பஞ்சக்க²த்தும், ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³’’ந்தி வசனம். ஏத்த² ச ‘‘நிஸீத³னாதி³ம்ஹி கதே புன சீவரம் க³ஹேதும் ந லப⁴தீ’’தி கேசி. ‘‘த்³வே டா²னானி பரிஹாயந்தீ’’தி அஞ்ஞே. ‘‘ஏகம் டா²னம் பரிஹாயதீ’’தி அபரே. உப⁴யம் கரோதீதி சோதே³திபி திட்ட²திபி.

‘‘தத்ர தத்ர டா²னே திட்ட²தீ’’தி இத³ம் சோத³கஸ்ஸ டி²தட்டி²தட்டா²னதோ அபக்கம்ம தத்ர தத்ர சீவரம் உத்³தி³ஸ்ஸ டா²னம்யேவ ஸந்தா⁴ய வுத்தம். ஏத்தா²தி ஏதேஸு த்³வீஸு சோத³னாட்டா²னேஸு.

கிம் பன ஸப்³ப³கப்பியகாரகேஸு (பாரா. அட்ட². 2.538-539; வி. ஸங்க³. அட்ட². 65) ஏவம் படிபஜ்ஜிதப்³ப³ந்தி? ந படிபஜ்ஜிதப்³ப³ம். அயஞ்ஹி கப்பியகாரகோ நாம ஸங்கே²பதோ து³விதோ⁴ நித்³தி³ட்டோ² ச அனித்³தி³ட்டோ² ச. தத்த² ச நித்³தி³ட்டோ² து³விதோ⁴ பி⁴க்கு²னா நித்³தி³ட்டோ², தூ³தேன நித்³தி³ட்டோ²தி. அனித்³தி³ட்டோ²பி து³விதோ⁴ முக²வேவடிககப்பியகாரகோ, பரம்முக²கப்பியகாரகோதி. தேஸு பி⁴க்கு²னா நித்³தி³ட்டோ² ஸம்முகா²ஸம்முக²வஸேன சதுப்³பி³தோ⁴ ஹோதி, ததா² தூ³தேன நித்³தி³ட்டோ²பி.

கத²ம்? இதே⁴கச்சோ பி⁴க்கு²ஸ்ஸ சீவரத்தா²ய தூ³தேன அகப்பியவத்து²ம் பஹிணதி, தூ³தோ ச தம் பி⁴க்கு²ம் உபஸங்கமித்வா ‘‘இத³ம், ப⁴ந்தே, இத்த²ன்னாமேன தும்ஹாகம் சீவரத்தா²ய பஹிதம், க³ண்ஹத² ந’’ந்தி வத³தி. பி⁴க்கு² ‘‘இத³ம் ந கப்பதீ’’தி படிக்கி²பதி. தூ³தோ ‘‘அத்தி² பன தே, ப⁴ந்தே, வேய்யாவச்சகரோ’’தி புச்ச²தி, புஞ்ஞத்தி²கேஹி ச உபாஸகேஹி ‘‘பி⁴க்கூ²னம் வேய்யாவச்சம் கரோதா²’’தி ஆணத்தா வா பி⁴க்கூ²னம் வா ஸந்தி³ட்டா² ஸம்ப⁴த்தா கேசி வேய்யாவச்சகரா ஹோந்தி, தேஸம் அஞ்ஞதரோ தஸ்மிம் க²ணே பி⁴க்கு²ஸ்ஸ ஸந்திகே நிஸின்னோ ஹோதி, பி⁴க்கு² தம் நித்³தி³ஸதி ‘‘அயம் பி⁴க்கூ²னம் வேய்யாவச்சகரோ’’தி. தூ³தோ தஸ்ஸ ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் கிணித்வா தே³ஹீ’’தி க³ச்ச²தி, அயம் பி⁴க்கு²னா ஸம்முகா²னித்³தி³ட்டோ².

நோ சே பி⁴க்கு²ஸ்ஸ (பாரா. அட்ட². 2.537; வி. ஸங்க³. அட்ட². 65) ஸந்திகே நிஸின்னோ ஹோதி, அபிச கோ² பி⁴க்கு² நித்³தி³ஸதி ‘‘அஸுகஸ்மிம் நாம கா³மே இத்த²ன்னாமோ பி⁴க்கூ²னம் வேய்யாவச்சகரோ’’தி. ஸோ க³ந்த்வா தஸ்ஸ ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் கிணித்வா த³தே³ய்யாஸீ’’தி ஆக³ந்த்வா பி⁴க்கு²ஸ்ஸ ஆரோசேத்வா க³ச்ச²தி, அயமேகோ பி⁴க்கு²னா அஸம்முகா²னித்³தி³ட்டோ².

ந ஹேவ கோ² ஸோ தூ³தோ அத்தனா ஆக³ந்த்வா ஆரோசேதி, அபிச கோ² அஞ்ஞம் பஹிணதி ‘‘தி³ன்னம் மயா, ப⁴ந்தே, தஸ்ஸ ஹத்தே² சீவரசேதாபன்னம், சீவரம் க³ண்ஹேய்யாதா²’’தி, அயம் து³தியோ பி⁴க்கு²னா அஸம்முகா²னித்³தி³ட்டோ².

ந ஹேவ கோ² அஞ்ஞம் பஹிணதி, அபிச கோ² க³ச்ச²ந்தோவ பி⁴க்கு²ம் வத³தி ‘‘அஹம் தஸ்ஸ ஹத்தே² சீவரசேதாபன்னம் த³ஸ்ஸாமி, தும்ஹே சீவரம் க³ண்ஹேய்யாதா²’’தி, அயம் ததியோ பி⁴க்கு²னா அஸம்முகா²னித்³தி³ட்டோ²தி ஏவம் ஏகோ ஸம்முகா²னித்³தி³ட்டோ² தயோ அஸம்முகா²னித்³தி³ட்டா²தி இமே சத்தாரோ பி⁴க்கு²னா நித்³தி³ட்ட²வேய்யாவச்சகரா நாம. ஏதேஸு இமஸ்மிம் ராஜஸிக்கா²பதே³ வுத்தனயேனேவ படிபஜ்ஜிதப்³ப³ம்.

அபரோ பி⁴க்கு² புரிமனயேனேவ தூ³தேன புச்சி²தோ நத்தி²தாய வா அவிசாரேதுகாமதாய வா ‘‘நத்த²ம்ஹாகம் கப்பியகாரகோ’’தி வத³தி, தஸ்மிஞ்ச க²ணே கோசி மனுஸ்ஸோ ஆக³ச்ச²தி, தூ³தோ தஸ்ஸ ஹத்தே² அகப்பியவத்து²ம் த³த்வா ‘‘இமஸ்ஸ ஹத்த²தோ சீவரம் க³ண்ஹேய்யாதா²’’தி வத்வா க³ச்ச²தி, அயம் தூ³தேன ஸம்முகா²னித்³தி³ட்டோ².

அபரோ தூ³தோ கா³மம் பவிஸித்வா அத்தனா அபி⁴ருசிதஸ்ஸ கஸ்ஸசி ஹத்தே² அகப்பியவத்து²ம் த³த்வா புரிமனயேனேவ ஆக³ந்த்வா வா ஆரோசேதி, அஞ்ஞம் வா பஹிணதி, ‘‘அஹம் அஸுகஸ்ஸ நாம ஹத்தே² சீவரசேதாபன்னம் த³ஸ்ஸாமி, தும்ஹே சீவரம் க³ண்ஹேய்யாதா²’’தி வத்வா வா க³ச்ச²தி, அயம் ததியோ தூ³தேன அஸம்முகா²னித்³தி³ட்டோ²தி ஏவம் ஏகோ ஸம்முகா²னித்³தி³ட்டோ², தயோ அஸம்முகா²னித்³தி³ட்டா²தி இமே சத்தாரோ தூ³தேன நித்³தி³ட்ட²வேய்யாவச்சகரா நாம. ஏதேஸு மேண்ட³கஸிக்கா²பதே³ வுத்தனயேனேவ படிபஜ்ஜிதப்³ப³ம்.

வுத்தஞ்ஹேதம் –

‘‘ஸந்தி, பி⁴க்க²வே, மனுஸ்ஸா ஸத்³தா⁴ பஸன்னா, தே கப்பியகாரகானம் ஹத்தே² ஹிரஞ்ஞம் உபனிக்கி²பந்தி ‘இமினா அய்யஸ்ஸ யம் கப்பியம், தம் தே³தா²’தி. அனுஜானாமி, பி⁴க்க²வே, யம் ததோ கப்பியம், தம் ஸாதி³தும், ந த்வேவாஹம், பி⁴க்க²வே, கேனசி பரியாயேன ஜாதரூபரஜதம் ஸாதி³தப்³ப³ம் பரியேஸிதப்³ப³ந்தி வதா³மீ’’தி (மஹாவ. 299).

ஏத்த² ச சோத³னாய பரிமாணம் நத்தி². மூலம் அஸாதி³யந்தேன ஸஹஸ்ஸக்க²த்தும்பி சோத³னாய வா டா²னேன வா கப்பியப⁴ண்ட³ம் ஸாதி³தும் வட்டதி. நோ சே தே³தி, அஞ்ஞம் கப்பியகாரகம் ட²பேத்வாபி ஆஹராபேதப்³ப³ம். ஸசே இச்ச²தி, மூலஸாமிகானம்பி கதே²தப்³ப³ம். நோ சே இச்ச²தி, ந கதே²தப்³ப³ம்.

அபரோ பி⁴க்கு² புரிமனயேனேவ தூ³தேன புச்சி²தோ ‘‘நத்த²ம்ஹாகம் கப்பியகாரகோ’’தி வத³தி, தத³ஞ்ஞோ ஸமீபே டி²தோ ஸுத்வா ‘‘ஆஹர, போ⁴, அஹம் அய்யஸ்ஸ சீவரம் சேதாபேத்வா த³ஸ்ஸாமீ’’தி வத³தி. தூ³தோ ‘‘ஹந்த³, போ⁴, த³தே³ய்யாஸீ’’தி தஸ்ஸ ஹத்தே² த³த்வா பி⁴க்கு²ஸ்ஸ அனாரோசேத்வாவ க³ச்ச²தி, அயம் முக²வேவடிககப்பியகாரகோ.

அபரோ (பாரா. அட்ட². 2.538-539; வி. ஸங்க³. அட்ட². 65) பி⁴க்கு²னோ உபட்டா²கஸ்ஸ வா அஞ்ஞஸ்ஸ வா ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் த³தே³ய்யாஸீ’’தி ஏத்தோவ பக்கமதி, அயம் பரம்முக²கப்பியகாரகோதி இமே த்³வே அனித்³தி³ட்ட²கப்பியகாரகா நாம. ஏதேஸு அஞ்ஞாதகஅப்பவாரிதேஸு விய படிபஜ்ஜிதப்³ப³ம்.

ஸசே ஸயமேவ சீவரம் ஆனேத்வா தே³ந்தி, க³ஹேதப்³ப³ம். நோ சே, ந கிஞ்சி வத்தப்³பா³. தேனாஹ ‘‘ஸசே’’திஆதி³. கப்பியகாரகேதி ஸம்முகா²ஸம்முக²வஸேன சத்தாரோ கப்பியகாரகேதி அத்தோ². ‘‘தா³யகோ ஸயமேவா’’தி இமினா பி⁴க்கு²ம் படிக்கி²பதி, ந தூ³தம். தஸ்மா தூ³தேன நித்³தி³ட்டோ²பி யதா²ருசி சோதே³தும் வட்டதி. முக²ம் விவரித்வா ஸயமேவ கப்பியகாரகத்தம் உபக³தோதி முக²வேவடிககப்பியகாரகோ. ஏவந்தி ‘‘ஏஸோ கோ²’’திஆதி³னா யதா²வுத்தேன ஆகாரேன. த³ஸ்ஸிதா ஹோந்தி ஸங்கே²பதோதி அதி⁴ப்பாயோ.

வுத்தசோத³னாட்டா²னபரிமாணதோதி வுத்தசோத³னாபரிமாணதோ ச வுத்தட்டா²னபரிமாணதோ ச. ஸந்திகந்தி ஸமீபம். தத்தா²தி ஏத்த² கத²மயமத்தோ² லப்³ப⁴தீதி ஆஹ ‘‘ஸமீபத்தே² ஹி இத³ம் பு⁴ம்மவசன’’ந்தி. இத³ம் வுத்தம் ஹோதி – ‘‘க³ங்கா³யம் கோ³யூதா²னி சரந்தி, கூபே க³க்³க³கூல’’ந்திஆதீ³ஸு விய யஸ்மா ஸமீபாதா⁴ரே இத³ம் ஸத்தமீவிப⁴த்திவசனம், தஸ்மா அயமத்தோ² லப்³ப⁴தீதி. ஏவம் அகரோந்தோதி ஸாமம் வா அக³ச்ச²ந்தோ, தூ³தம் வா அபாஹேந்தோ.

அஜ்ஜண்ஹோ, ப⁴ந்தே, ஆக³மேஹீதி, ப⁴ந்தே, அஜ்ஜ ஏகதி³வஸம் அம்ஹாகம் திட்ட², அதி⁴வாஸேஹீதி அத்தோ². திகபாசித்தியந்தி அதிரேகேஸு சோத³னாட்டா²னேஸு அதிரேகஸஞ்ஞிவேமதிகஊனகஸஞ்ஞீனம் வஸேன தீணி பாசித்தியானி. திக்க²த்தும் சோத³னாய ச²க்க²த்தும் டா²னேன, ஊனகதிக்க²த்தும் சோத³னாய ஊனகச்ச²க்க²த்தும் டா²னேன லத்³தே⁴பி அனாபத்தி. அப்பிததாதி பதிட்டா²பிததா, ‘‘ஸஞ்ஞத்தோ ஸோ மயா’’திஆதி³னா (பாரா. 538) கதி²ததாதி வுத்தம் ஹோதி.

ராஜஸிக்கா²பத³வண்ணனா நிட்டி²தா.

சீவரவக்³கோ³ பட²மோ.