2. ஏளகலோமவக்³கோ³

1. கோஸியஸிக்கா²பத³வண்ணனா

கோஸியமிஸ்ஸகந்தி ‘‘கோஸகாரகா’’தி லத்³த⁴வோஹாரானம் பாணகானம் கோஸதோ நிப்³ப³த்தம் அம்ஸு கோஸியம், தேன மிஸ்ஸம் கோஸியமிஸ்ஸகம். தேன பன கோஸியேன அப்பகேனாபி மிஸ்ஸிதம் கோஸியமிஸ்ஸகமேவ, ந இத³ம் அப்³போ³ஹாரிகந்தி வத்தும் லப்³பா⁴. தேனாஹ ‘‘ஏகேனாபீ’’திஆதி³. கோஸியம்ஸுனாதி கிமிகோஸஸம்ப⁴வேன அம்ஸுனா. ‘‘அந்தமஸோ’’திஆதி³கம் பன இமஸ்ஸ ஸிக்கா²பத³ஸ்ஸ அசித்தகத்தா வுத்தம். ஸந்த²தம் நாம ஸந்த²ரித்வா கதம் அவாயிமம். தேனாஹ ‘‘ஸமே பூ⁴மிபா⁴கே³’’திஆதி³. இமஸ்ஸேவ வசனஸ்ஸ அனுஸாரேனாதி இமஸ்ஸேவ பட²மஸந்த²தஸ்ஸ நிஸ்ஸஜ்ஜனவிதா⁴னவசனானுஸாரேன. ஸப்³ப³ஸந்த²தந்தி ஸப்³ப³ஸந்த²தனிஸ்ஸஜ்ஜனவிதா⁴னம்.

அஞ்ஞஸ்ஸத்தா²ய காராபனே து³க்கடத்தா அத்தனோ அத்தா²ய காராபனவஸேன ‘‘ஸாணத்திக’’ந்தி வுத்தம். அத்தனா விப்பகதபரியோஸாபனனயேனாதி ‘‘அத்தனா விப்பகதம் அத்தனா பரியோஸாபேதி, நிஸ்ஸக்³கி³யம் பாசித்தியம். அத்தனா விப்பகதம் பரேஹி பரியோஸாபேதி, நிஸ்ஸக்³கி³யம் பாசித்தியம். பரேஹி விப்பகதம் அத்தனா பரியோஸாபேதி, நிஸ்ஸக்³கி³யம் பாசித்தியம். பரேஹி விப்பகதம் பரேஹி பரியோஸாபேதி, நிஸ்ஸக்³கி³யம் பாசித்திய’’ந்தி (பாரா. 545) இமினா நயேன. விதானாதி³கரணேதி விதானபூ⁴மத்த²ரணஸாணிபாகாரபி⁴ஸிபி³ப்³போ³ஹனகரணே. யதா² ச விதானாதி³கரணே, ஏவம் தேனாகாரேன பரிபோ⁴கே³பி அனாபத்தி. ‘‘அவாயிம’’ந்தி (பாரா. 544) வுத்தத்தா வாயித்வா கரோந்தஸ்ஸாபி அனாபத்தி.

கோஸியஸிக்கா²பத³வண்ணனா நிட்டி²தா.

2. ஸுத்³த⁴காளகஸிக்கா²பத³வண்ணனா

காளகானந்தி ஸபா⁴வேன வா ரஜனேன வா காளகானம். யதா²ஹ ‘‘காளகம் நாம த்³வே காளகானி ஜாதியா காளகம் வா ரஜனகாளகம் வா’’தி. அஞ்ஞேஹி அமிஸ்ஸிதானந்தி அஞ்ஞேஹி அமிஸ்ஸிதகாளகானந்தி அத்தோ². ‘‘யதா² பட²மே ‘ஏகேனாபி கோஸியம்ஸுனா’தி (கங்கா². அட்ட². கோஸியஸிக்கா²பத³வண்ணனா) வுத்தம், ததா² இதா⁴பி ‘ஏகேனாபி அஞ்ஞேன அமிஸ்ஸேத்வா’தி அவுத்தத்தா அஞ்ஞேன பன மிஸ்ஸகபோ⁴கே³பி அபஞ்ஞாயமானரூபகம் சே ‘ஸுத்³த⁴காளக’மிச்சேவ வுச்சதீ’’தி (வஜிர. டீ. பாராஜிக 547) வத³ந்தி.

ஏத்த² ச ‘‘இத³ம் மே, ப⁴ந்தே, ஸுத்³த⁴காளகானம் ஏளகலோமானம் ஸந்த²த’’ந்திஆதி³னா (பாரா. 549) நிஸ்ஸஜ்ஜனவிதா⁴னம் வேதி³தப்³ப³ம். ஸேஸந்தி புப்³ப³பயோக³து³க்கடசதுக்கபாசித்தியாதி³கம். அங்கே³ஸு பன ‘‘ஸுத்³த⁴காளகபா⁴வோ’’தி அயம் விஸேஸோ.

ஸுத்³த⁴காளகஸிக்கா²பத³வண்ணனா நிட்டி²தா.

3. த்³வேபா⁴க³ஸிக்கா²பத³வண்ணனா

க³ஹேதப்³பா³தி யதா² காளகா அதி⁴கா ந ஹோந்தி, ததா² க³ஹேதப்³பா³. ட²பேத்வா சேத்த² காளகஓதா³தே அவஸேஸா கோ³சரியேஸுயேவ ஸங்க³ஹம் க³ச்ச²ந்தீதி (ஸாரத்த². டீ. 2.552) த³ட்ட²ப்³ப³ம். ஏத்த² ச த்³வே பா⁴கா³தி உக்கட்ட²பரிச்சே²தோ³ காளகானம் அதி⁴கக்³க³ஹணஸ்ஸ படிக்கே²பவஸேன ஸிக்கா²பத³ஸ்ஸ பஞ்ஞத்தத்தா. தஸ்மா காளகானம் பா⁴க³த்³வயதோ அதி⁴கம் ந வட்டதி, ஊனகம் வட்டதி. தேனாஹ ‘‘ஏகஸ்ஸாபீ’’திஆதி³. ஏகஸ்ஸாபி காளகலோமஸ்ஸ அதிரேகபா⁴வேதி துலாய தா⁴ரயித்வா ட²பிதேஸு அந்தமஸோ வாதவேகே³னபி பஹிதஸ்ஸ ஏகஸ்ஸாபி காளகலோமஸ்ஸ அதி⁴கபா⁴வே ஸதீதி அத்தோ². ‘‘ததியம் ஓதா³தானம், சதுத்த²ம் கோ³சரியான’’ந்தி இத³ம் பன ஹேட்டி²மபரிச்சே²தோ³ தேஸம் அதி⁴கக்³க³ஹணே படிக்கே²பாபா⁴வதோ. தஸ்மா தேஸம் வுத்தப்பமாணதோ அதி⁴கம்பி வட்டதி.

ஏத்த² ச ‘‘இத³ம் மே, ப⁴ந்தே, ஸந்த²தம் அனாதி³யித்வா த்³வே துலே ஸுத்³த⁴காளகானம் ஏளகலோமானம், துலம் ஓதா³தானம், துலம் கோ³சரியானம் ஸந்த²தம் காராபிதம் நிஸ்ஸக்³கி³ய’’ந்தி (பாரா. 554) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம். ஆதா³ய ச வுத்தபரிச்சே²தே³ன அனாதா³ய ச கரணதோ கிரியாகிரியம். ஸேஸந்தி புப்³ப³பயோக³து³க்கடசதுக்கபாசித்தியாதி³கம். அயம் பன விஸேஸோ – துலம் ஓதா³தானம் துலம் கோ³சரியானம் ஆதி³யித்வா கரணே, ப³ஹுதரம் ஓதா³தானம் ப³ஹுதரம் கோ³சரியானம் ஆதி³யித்வா கரணே, ஸுத்³த⁴ம் ஓதா³தானம் ஸுத்³த⁴ம் கோ³சரியானம் ஆதி³யித்வா கரணே ச அனாபத்தீதி.

அங்கே³ஸு பன பட²மங்க³ம் காளகானம் த்³வேபா⁴க³தோ அதிரேகபா⁴வோதி த³ட்ட²ப்³ப³ம். இமானி தீணி ந கேவலம் அனிஸ்ஸட்டா²னேவ பரிபு⁴ஞ்ஜிதும் ந வட்டந்தீதி ஆஹ ‘‘இமானி பனா’’திஆதி³. ‘‘பரிபு⁴ஞ்ஜிதும் ந வட்டந்தீ’’தி இமினா யதி³ பரிபு⁴ஞ்ஜதி, து³க்கடந்தி த³ஸ்ஸேதி.

த்³வேபா⁴க³ஸிக்கா²பத³வண்ணனா நிட்டி²தா.

4. ச²ப்³ப³ஸ்ஸஸிக்கா²பத³வண்ணனா

யம் ஸந்த²தஸம்முதிம் தே³தீதி ஸம்ப³ந்தோ⁴. கி³லானஸ்ஸ பி⁴க்கு²னோதி யஸ்ஸ வினா ஸந்த²தா ந பா²ஸு ஹோதி, ந ஸக்கோதி ச ஸந்த²தம் ஆதா³ய பக்கமிதும், ஏவம்பூ⁴தஸ்ஸ கி³லானஸ்ஸ பி⁴க்கு²னோ. ஸந்த²தஸம்முதிம் தே³தீதி ‘‘ஸுணாது மே, ப⁴ந்தே, ஸங்கோ⁴, அயம் இத்த²ன்னாமோ பி⁴க்கு² கி³லானோ ந ஸக்கோதி ஸந்த²தம் ஆதா³ய பக்கமிது’’ந்திஆதி³னா (பாரா. 560) பத³பா⁴ஜனே வுத்தாய ஞத்திது³தியகம்மவாசாய ஸந்த²தஸம்முதிம் தே³தி.

ஸாதி ஸந்த²தஸம்முதி. வூபஸந்தோ வா புன குப்பதீதி வூபஸந்தோ வா ஸோ ஆபா³தோ⁴ புன குப்பதி, அனுவஸ்ஸம்பி காதும் வட்டதி, புன ஸம்முதிதா³னகிச்சம் நத்தீ²தி அதி⁴ப்பாயோ. ந கேவலம் தஸ்மிம்யேவ ரோகே³ குப்பிதே, அத² கோ² அஞ்ஞஸ்மிம் ரோகே³ குப்பிதேபி க³தக³தட்டா²னே அனுவஸ்ஸம் காதும் லப⁴தி. தேனேவ ஹி ஸமந்தபாஸாதி³காயம் ‘‘ஸசே அரோகோ³ ஹுத்வா புன மூலப்³யாதி⁴னாவ கி³லானோ ஹோதி, ஸோயேவ பரிஹாரோ, நத்த²ஞ்ஞம் ‘ஸம்முதிகிச்ச’ந்தி பு²ஸ்ஸதே³வத்தே²ரோ ஆஹ. உபதிஸ்ஸத்தே²ரோ பன ஸோ வா ப்³யாதி⁴ படிகுப்பது, அஞ்ஞோ வா, ஸகிம் ‘கி³லானோ’தி நாமம் லத்³த⁴ம் லத்³த⁴மேவ, புன ‘ஸம்முதிகிச்சம் நத்தீ²’தி ஆஹா’’தி (பாரா. அட்ட². 2.557) உபதிஸ்ஸத்தே²ரவாதோ³ பச்சா² வுத்தோ.

ஏத்த² ச ‘‘இத³ம் மே, ப⁴ந்தே, ஸந்த²தம் ஊனகச²ப்³ப³ஸ்ஸானி காராபிதம் அஞ்ஞத்ர பி⁴க்கு²ஸம்முதியா நிஸ்ஸக்³கி³ய’’ந்தி (பாரா. 562) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம். ‘‘ஸேஸம் பட²மஸதி³ஸமேவா’’தி இமினா ‘‘அத்தனா கதம் பரேஹி பரியோஸாபேதீ’’திஆதி³கம் அதிதி³ட்ட²ம். அயம் பன விஸேஸோ – பரிபுண்ணே ச²ப்³ப³ஸ்ஸே வா அதிரேகச²ப்³ப³ஸ்ஸே வா அனாபத்தி. அங்கே³ஸு ச ச²ப்³ப³ஸ்ஸானம் அந்தோபா⁴வோ நானாத்தம்.

ச²ப்³ப³ஸ்ஸஸிக்கா²பத³வண்ணனா நிட்டி²தா.

5. நிஸீத³னஸிக்கா²பத³வண்ணனா

நிஸீத³னஸந்த²தந்தி ‘‘நிஸீத³னம் நாம ஸத³ஸம் வுச்சதீ’’தி ஏத்த² பத³பா⁴ஜனியம் (பாரா. 568) வுத்தத்தா ஸத³ஸம் ஸந்த²தம், ஏத்த² ச நிஸீத³னக்³க³ஹணம் ஸந்த²தே சீவரஸஞ்ஞானிவாரணத்த²ம், யதோ தே பி⁴க்கூ² கம்ப³லசீவரஸஞ்ஞாய ஸந்த²தம் ச²ட்³டே³த்வா து⁴தங்கா³னி ஸமாதி³யிம்ஸு. ஸயனாஸனப்பயோஜனத்தா ஸந்த²தஸ்ஸ ‘‘புராணஸந்த²தம் நாமா’’திஆதி³ வுத்தம். யத்தா²தி யஸ்மிம் ஸந்த²தே. வித³த்தி²மத்தந்தி ஸுக³தவித³த்தி²மத்தம். உக்கட்ட²பரிச்சே²தோ³ சாயம் ‘‘அனாபத்தி அலப⁴ந்தோ தோ²கதரம் ஆதி³யித்வா கரோதீ’’தி (பாரா. 570) பத³பா⁴ஜனே வுத்தத்தா. ஏகதே³ஸேதி இதா³னி கத்தப்³ப³னவஸந்த²தஸ்ஸ ஏகப்பதே³ஸே. விஜடேத்வாதி வித்³த⁴ம்ஸேத்வா. அனாதா³தி ய-காரலோபேனாயம் நித்³தே³ஸோதி ஆஹ ‘‘ஸதி புராணஸந்த²தே அக்³க³ஹேத்வா’’தி.

ஏத்த² ச ‘‘இத³ம் மே, ப⁴ந்தே, நிஸீத³னஸந்த²தம் அனாதி³யித்வா புராணஸந்த²தஸ்ஸ ஸாமந்தா ஸுக³தவித³த்தி²ம் காராபிதம் நிஸ்ஸக்³கி³ய’’ந்தி (பாரா. 568) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம். ஸந்த²தவிஸ்ஸஜ்ஜனவத்து²ஸ்மிம் பஞ்ஞத்தந்தி ப⁴க³வதா ஸந்த²தானி விப்பகிண்ணானி தி³ஸ்வா ‘‘ஸத்³தா⁴தே³ய்யவினிபாதனே காரணம் நத்தி², பரிபோ⁴கு³பாயம் நேஸம் த³ஸ்ஸேஸ்ஸாமீ’’தி (பாரா. அட்ட². 2.566) ஸந்த²தவிஸ்ஸஜ்ஜனவத்து²ஸ்மிம் பஞ்ஞத்தம். கிரியாகிரியத்தா இமஸ்ஸ ஸிக்கா²பத³ஸ்ஸ ‘‘ஸேஸம் ததியஸதி³ஸமேவா’’தி வுத்தம், த்³வேபா⁴க³ஸிக்கா²பத³ஸதி³ஸமேவாதி அத்தோ². அயம் பன விஸேஸோ – புராணஸந்த²தஸ்ஸ ஸாமந்தா ஸுக³தவித³த்தி²யா ஆதா³ய கரணே, அலப⁴ந்தஸ்ஸ தோ²கதரம் ஆதா³ய கரணே, ஸப்³ப³தா² அலப⁴ந்தஸ்ஸ அனாதா³ய கரணே ச அனாபத்தீதி. அங்கே³ஸு பனேத்த² பட²மங்க³புராணஸந்த²தஸ்ஸ ஸாமந்தா ஸுக³தவித³த்தி²அனாதி³யனாதி த³ட்ட²ப்³ப³ம்.

நிஸீத³னஸிக்கா²பத³வண்ணனா நிட்டி²தா.

6. ஏளகலோமஸிக்கா²பத³வண்ணனா

அத்³தா⁴னமக்³க³ப்படிபன்னஸ்ஸாதி அத்³தா⁴னமேவ மக்³கோ³ அத்³தா⁴னமக்³கோ³, தம் படிபன்னஸ்ஸாதி அத்தோ². தேனாஹ ‘‘அத்³தா⁴னஸங்கா²த’’ந்திஆதி³. அத்³தா⁴னஸத்³தே³ன விஸேஸிதத்தா பன ‘‘தீ³க⁴மக்³க³’’ந்தி வுத்தம். அத்³தா⁴னக³மனஸமயஸ்ஸ விப⁴ங்கே³ ‘‘அத்³த⁴யோஜனம் க³ச்சி²ஸ்ஸாமீதி பு⁴ஞ்ஜிதப்³ப³’’ந்திஆதி³வசனதோ (பாசி. 218) அத்³த⁴யோஜனம்பி அத்³தா⁴னமக்³கோ³ ஹோதி. ஏளகலோமானி சேதானி அத்³தா⁴னமக்³க³தோ அஞ்ஞத்த² உப்பன்னானி படிக்³க³ஹேதும் ந வட்டந்தி, யதோ ‘‘அத்³தா⁴னமக்³க³ப்படிபன்னஸ்ஸா’’திஆதி³கம் வுத்தந்தி அனுயோக³ம் ஸந்தா⁴யாஹ ‘‘ஸப்³ப³ஞ்சேத’’ந்திஆதி³. தத்த² ஸப்³ப³ஞ்சேதந்தி ‘‘பி⁴க்கு²னோ பனேவ அத்³தா⁴னமக்³க³ப்படிபன்னஸ்ஸ ஏளகலோமானி உப்பஜ்ஜேய்யு’’ந்திஆதி³கம் ஏதம் ஸப்³ப³ம். வத்து²மத்ததீ³பனமேவாதி ‘‘தேன கோ² பன ஸமயேன அஞ்ஞதரஸ்ஸ பி⁴க்கு²னோ கோஸலேஸு ஜனபதே³ ஸாவத்தி²ம் க³ச்ச²ந்தஸ்ஸ அந்தராமக்³கே³ ஏளகலோமானி உப்பஜ்ஜிம்ஸூ’’திஆதி³கஸ்ஸ (பாரா. 571) வத்து²மத்தஸ்ஸ தீ³பனமேவ. யத்த² கத்த²சீதி அத்³தா⁴னதோ அஞ்ஞத்தா²பி யத்த² கத்த²சி டா²னேஸு. ஸஹத்தா²தி கரணத்தே² நிஸ்ஸக்கவசனந்தி ஆஹ ‘‘ஸஹத்தே²னா’’தி. லக்க²ணவசனஞ்சேதம், தஸ்மா யேன கேனசி ஸரீராவயவேனாதி அத்தோ² த³ட்ட²ப்³போ³. தேனாஹ ‘‘அத்தனா ஹரிதப்³பா³னீதி அத்தோ²’’தி. அஸந்தே ஹாரகேதி ஏத்த² பதா³னம் அந்தோக³தா⁴வதா⁴ரணதோ அவதா⁴ரணத்தோ² லப்³ப⁴தீதி ஆஹ ‘‘அஸந்தேயேவா’’திஆதி³.

ஏத்த² ச ‘‘இமானி மே, ப⁴ந்தே, ஏளகலோமானி தியோஜனம் அதிக்காமிதானி நிஸ்ஸக்³கி³யானீ’’திஆதி³னா (பாரா. 573) நிஸ்ஸஜ்ஜனவிதா⁴னம் வேதி³தப்³ப³ம். திகபாசித்தியந்தி அதிரேகதியோஜனே அதிரேகதியோஜனஸஞ்ஞிவேமதிகஊனகஸஞ்ஞீனம் வஸேன தீணி பாசித்தியானி. வாஸாதி⁴ப்பாயேன க³ந்த்வா ததோ பரம் ஹரணேதி யத்த² க³தோ, தத்த² உத்³தே³ஸபரிபுச்சா²தீ³னம் வா பச்சயாதீ³னம் வா அலாபே⁴ன ததோ பரம் அஞ்ஞத்த² ஹரணே, ததோபி அஞ்ஞத்தா²தி ஏவம் யோஜனஸதம்பி ஹரணே அனாபத்தி. அச்சி²ன்னம் வா நிஸ்ஸட்ட²ம் வாதி சோரேஹி அச்சி²ன்னம் வா வினயகம்மகதம் வா. கதப⁴ண்ட³ந்தி கதம் ப⁴ண்ட³ம் கம்ப³லகோஜவஸந்த²தாதி³ யம் கிஞ்சி அந்தமஸோ ஸுத்தகேன ப³த்³த⁴மத்தம்பி. தேனாஹ ‘‘அந்தமஸோ’’திஆதி³. யோ பன தனுகபத்தத்த²விகந்தரே (பாரா. அட்ட². 2.575) வா ஆயோக³அம்ஸப³த்³த⁴ககாயப³ந்த⁴னாதீ³னம் அந்தரேஸு வா பிப்ப²லிகாதீ³னம் மலரக்க²ணத்த²ம் ஸிபாடிகாயம் வா அந்தமஸோ வாதாபா³தி⁴கோ கண்ணச்சி²த்³தே³பி லோமானி பக்கி²பித்வா க³ச்ச²தி, ஆபத்தியேவ. ஸுத்தகேன பன ப³ந்தி⁴த்வா பக்கி²த்தம் கதப⁴ண்ட³ட்டா²னே திட்ட²தி, வேணிம் கத்வா ஹரதி, இத³ம் நிதா⁴னமுக²ம் நாம, ஆபத்தியேவ.

பட²மப்படிலாபோ⁴தி அத்தனோ அத்தா²ய ஏளகலோமானம் பட²முப்பத்தி. ஏதேன அச்சி²ன்னனிஸ்ஸட்ட²ப்படிலத்³தா⁴னம் படிக்கே²போ. அஞ்ஞஸ்ஸ அஜானந்தஸ்ஸ யானே பக்கி²பித்வாதி (பாரா. அட்ட². 2.572) க³ச்ச²ந்தே ரதா²தி³கே வா ஹத்தி²பிட்டி²ஆதீ³ஸு வா ஸாமிகஸ்ஸ அஜானந்தஸ்ஸேவ ‘‘ஹரிஸ்ஸதீ’’தி பக்கி²பித்வா. அக³ச்ச²ந்தேபி ஏஸேவ நயோ. ஸசே பன அக³ச்ச²ந்தே ரதா²தி³ம்ஹி வா ஹத்தி²பிட்டி²ஆதீ³ஸு வா ட²பேத்வா ஆரோஹித்வா ஸாரேதி, ஹேட்டா² வா க³ச்ச²ந்தோ சோதே³தி, பக்கோஸந்தோ வா அனுப³ந்தா⁴பேதி, ‘‘அஞ்ஞம் ஹராபேதீ’’தி (பாரா. 575) வசனதோ அனாபத்தி. ஏத்த² ச ‘‘அஜானந்தஸ்ஸ யானே’’தி இமினா ஜானந்தஸ்ஸ சே யானே பக்கி²பதி, அஞ்ஞம் ஹராபேதி நாமாதி த³ஸ்ஸேதி. அஹரணபச்சாஹரணந்தி ஹரணபச்சாஹரணானமபா⁴வோ.

ஏளகலோமஸிக்கா²பத³வண்ணனா நிட்டி²தா.

7. ஏளகலோமதோ⁴வாபனஸிக்கா²பத³வண்ணனா

ஸக்கேஸூதி ‘‘ஸக்யா வத, போ⁴ குமாரா’’தி (தீ³. நி. 1.267) உதா³னம் படிச்ச ‘‘ஸக்யா’’தி லத்³த⁴னாமானம் நிவாஸோ ஏகோபி ஜனபதோ³ ருள்ஹிஸத்³தே³ன ‘‘ஸக்கா’’தி வுச்சதி, தஸ்மிம் ஸக்கேஸு ஜனபதே³. ச²ப்³ப³க்³கி³யா நாம பண்டு³கலோஹிதகாத³யோ ச²மூலகா, தேஸம் ஸிஸ்ஸா ச.

ஏளகலோமதோ⁴வாபனஸிக்கா²பத³வண்ணனா நிட்டி²தா.

8. ஜாதரூபஸிக்கா²பத³வண்ணனா

ரஜதந்தி ந கேவலம் ரூபியமேவ இதா⁴தி⁴ப்பேதம், அத² கோ² யம் கிஞ்சி வோஹாரக³மனீயம் கஹாபணாதி³ ச ஏதம் அதி⁴ப்பேதந்தி ஆஹ ‘‘அபிசா’’திஆதி³. தத்த² கஹாபணோதி (பாரா. அட்ட². 2.583-584) ஸுவண்ணமயோ வா ரூபியமயோ வா பாகதிகோ வா. லோஹமாஸகோ நாம தம்ப³லோஹாதீ³ஹி கதமாஸகோ. தா³ருமாஸகோ நாம ஸாரதா³ருனா வா வேளுபேஸிகாய வா அந்தமஸோ தாலபண்ணேனபி ரூபம் சி²ந்தி³த்வா கதமாஸகோ. ஜதுமாஸகோ நாம லாகா²ய வா நிய்யாஸேன வா ரூபம் ஸமுட்டா²பேத்வா கதமாஸகோ. ‘‘யே வோஹாரம் க³ச்ச²ந்தீ’’தி இமினா பன பதே³ன யோ யோ யத்த² யத்த² ஜனபதே³ யதா³ யதா³ வோஹாரம் க³ச்ச²தி, அந்தமஸோ அட்டி²மயோபி சம்மமயோபி ருக்க²ப²லபீ³ஜமயோபி ஸமுட்டா²பிதரூபோபி அஸமுட்டா²பிதரூபோபி ஸப்³போ³ ஸங்க³ஹிதோ. ததே³வாதி ஜாதரூபரஜதமேவ. ஹிரஞ்ஞம் நாம கஹாபணோ.

‘‘ஸாதி³யதீ’’தி வுத்தமேவத்த²ம் விபா⁴வேதி ‘‘க³ண்ஹிதுகாமோ ஹோதீ’’தி. ந கேவலம் காயவாசாஹி படிக்கி²த்தமேவ படிக்கி²த்தம் ஹோதி, அத² கோ² மனஸாபி படிக்கி²த்தம் படிக்கி²த்தமேவ ஹோதீதி ஆஹ ‘‘காயவாசாஹீ’’திஆதி³. ஸசே பன காயவாசாஹி அப்படிக்கி²பித்வா சித்தேன அதி⁴வாஸேதி, காயவாசாஹி கத்தப்³ப³ஸ்ஸ படிக்கே²பஸ்ஸ அகரணதோ அகிரியஸமுட்டா²னம் காயவசீத்³வாரே ஆபத்திம் ஆபஜ்ஜதி. மனோத்³வாரே பன ஆபத்தி நாம நத்தி².

ஏகோ ஸதம் (பாரா. அட்ட². 2.583-584) வா ஸஹஸ்ஸம் வா பாத³மூலே ட²பேதி ‘‘துய்ஹித³ம் ஹோதூ’’தி, பி⁴க்கு² ‘‘நயித³ம் கப்பதீ’’தி படிக்கி²பதி. உபாஸகோ ‘‘பரிச்சத்தம் மயா தும்ஹாக’’ந்தி க³தோ, அஞ்ஞோ தத்த² ஆக³ந்த்வா புச்ச²தி ‘‘கிம், ப⁴ந்தே, இத³’’ந்தி. யம் தேன ச அத்தனா ச வுத்தம், தம் ஆசிக்கி²தப்³ப³ம். ஸோ சே வத³தி ‘‘கோ³பேஸ்ஸாமி, ப⁴ந்தே, கு³த்தட்டா²னம் த³ஸ்ஸேதா²’’தி, ஸத்தபூ⁴மிகம்பி பாஸாத³ம் அபி⁴ருஹித்வா ‘‘இத³ம் கு³த்தட்டா²ன’’ந்தி ஆசிக்கி²தப்³ப³ம், ‘‘இத⁴ நிக்கி²பாஹீ’’தி ந வத்தப்³ப³ம். ஏத்தாவதா கப்பியஞ்ச அகப்பியஞ்ச நிஸ்ஸாய டி²தம் ஹோதி, த்³வாரம் பித³ஹித்வா ரக்க²ந்தேன வஸிதப்³ப³ம். ஸசே கிஞ்சி விக்காயிகப⁴ண்ட³ம் பத்தம் வா சீவரம் வா ஆக³ச்ச²தி, ‘‘இத³ம் க³ஹேஸ்ஸத², ப⁴ந்தே’’தி வுத்தே ‘‘உபாஸக, அத்தி² அம்ஹாகம் இமினா அத்தோ², வத்து² ச ஏவரூபம் நாம ஸம்விஜ்ஜதி, கப்பியகாரகோ நத்தீ²’’தி வத்தப்³ப³ம். ஸசே ஸோ வத³தி ‘‘அஹம் கப்பியகாரகோ ப⁴விஸ்ஸாமி, த்³வாரம் விவரித்வா தே³தா²’’தி, த்³வாரம் விவரித்வா ‘‘இமஸ்மிம் ஓகாஸே ட²பித’’ந்தி வத்தப்³ப³ம், ‘‘இமம் க³ண்ஹா’’தி ந வத்தப்³ப³ம். ஏவஞ்ச கப்பியஞ்ச அகப்பியஞ்ச நிஸ்ஸாய டி²தமேவ ஹோதி. ஸோ சேதம் க³ஹேத்வா தஸ்ஸ கப்பியப⁴ண்ட³ம் தே³தி, வட்டதி. ஸசே அதி⁴கம் க³ண்ஹாதி, ‘‘ந மயம் தவ ப⁴ண்ட³ம் க³ண்ஹாம, நிக்க²மாஹீ’’தி வத்தப்³போ³.

ஸங்க⁴மஜ்ஜே²யேவ நிஸ்ஸஜ்ஜிதப்³ப³ந்தி ஏத்த² யஸ்மா ரூபியம் நாம அகப்பியம், தஸ்மா ‘‘நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா’’தி ந வுத்தம். யஸ்மா பன தம் படிக்³க³ஹிதமத்தமேவ, ந தேன கிஞ்சி கப்பியப⁴ண்ட³ம் சேதாபிதம், தஸ்மா உபாயேன பரிபோ⁴க³த³ஸ்ஸனத்த²ம் ‘‘ஸங்க⁴மஜ்ஜே²யேவ நிஸ்ஸஜ்ஜிதப்³ப³’’ந்தி வுத்தம். ஆதி³-ஸத்³தே³ன தேலாதீ³னம் க³ஹணம். ஸோதி யோ க³ஹட்டோ² ‘‘ஸப்பி வா தேலம் வா வட்டதி உபாஸகா’’திஆதி³னா நயேன வுத்தோ, ஸோ. அஞ்ஞேன லபி⁴த்வாதி பி⁴க்கு²னா வா ஆராமிகேன வா அத்தனோ வஸ்ஸக்³கே³ன லபி⁴த்வா. ததோ நிப்³ப³த்தருக்க²ச்சா²யாபீதி நிஸ்ஸக்³கி³யவத்து²னா ஆஹடபீ³ஜதோ நிப்³ப³த்தருக்க²பரிச்சே²தே³ன டி²தச்சா²யாபி, பரிச்சே²தா³திக்கந்தா பன ஆக³ந்துகத்தா வட்டதி. நோ சே ச²ட்³டே³தீதி அத² நேவ க³ஹேத்வா க³ச்ச²தி, ந ச²ட்³டே³தி, ‘‘கிம் மய்ஹம் இமினா ப்³யாபாரேனா’’தி யேனகாமம் பக்கமதி. பஞ்சங்க³ஸமன்னாக³தோ ‘‘யோ ந ச²ந்தா³க³திம் க³ச்சே²ய்ய, ந தோ³ஸாக³திம் க³ச்சே²ய்ய, ந மோஹாக³திம் க³ச்சே²ய்ய, ந ப⁴யாக³திம் க³ச்சே²ய்ய, ச²ட்³டி³தாச²ட்³டி³தஞ்ச ஜானேய்யா’’தி (பாரா. 584) ஏவம் வுத்தபஞ்சங்கே³ஹி ஸமன்னாக³தோ. ஸம்மன்னிதப்³போ³தி ‘‘ஸுணாது மே, ப⁴ந்தே, ஸங்கோ⁴, யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் ரூபியச²ட்³ட³கம் ஸம்மன்னேய்யா’’திஆதி³னா பத³பா⁴ஜனே வுத்தாய ஞத்திது³தியகம்மவாசாய ஸம்மன்னிதப்³போ³.

அனிமித்தம் கத்வா கூ³த²ம் விய ச²ட்³டே³தப்³ப³ந்தி பதிதட்டா²னம் ஸல்லக்க²ணவஸேன நிமித்தம் அகத்வா கூ³த²ம் விய ச²ட்³டே³தப்³ப³ம், அக்கீ²னி நிமீலேத்வாவ நதி³யா வா பபாதே வா வனக³ஹனே வா கூ³த²ம் விய அனபேக்கே²ன பதிதோகாஸம் அஸமன்னாஹரந்தேன பாதேதப்³ப³ந்தி வுத்தம் ஹோதி. தேனாஹ ‘‘கூ³த²ம் விய ச²ட்³டே³தப்³ப³’’ந்தி. திகபாசித்தியந்தி ரூபியஸஞ்ஞிவேமதிகஅரூபியஸஞ்ஞீனம் வஸேன தீணி பாசித்தியானி. அரூபியே ரூபியஸஞ்ஞினோதி க²ரபத்தாதீ³ஸு ஸுவண்ணாதி³ஸஞ்ஞினோ. ரதனஸிக்கா²பத³னயேனாதி ‘‘அஜ்ஜா²ராமே வா அஜ்ஜா²வஸதே² வா’’தி (பாசி. 505) ஏத்த² வுத்தவிதி⁴னா.

ஜாதரூபஸிக்கா²பத³வண்ணனா நிட்டி²தா.

9. ரூபியஸம்வோஹாரஸிக்கா²பத³வண்ணனா

கதாதி³வஸேனாதி கதஅகதகதாகதவஸேன. ஸுவண்ணாதி³சதுப்³பி³த⁴ம்பி நிஸ்ஸக்³கி³யவத்து² இத⁴ ரூபியக்³க³ஹணேன க³ஹிதந்தி ஆஹ ‘‘ஜாதரூபரஜதபரிவத்தன’’ந்தி. இத³ஞ்ச உக்கட்ட²பரிச்சே²தே³ன வுத்தந்தி த³ட்ட²ப்³ப³ம். தேனாஹ ‘‘புரிமஸிக்கா²பதே³ன ஹீ’’திஆதி³. பரிவத்தனந்தி ஸாதி³தரூபியஸ்ஸ பரிவத்தனம். புரிமனயானுஸாரேனாதி ‘‘அஹம், ப⁴ந்தே, நானப்பகாரகம் ரூபியஸம்வோஹாரம் ஸமாபஜ்ஜிம், இத³ம் மே நிஸ்ஸக்³கி³ய’’ந்திஆதி³னா (பாரா. 589).

ரூபியஸம்வோஹாரவத்து²ஸ்மிந்தி படிக்³க³ஹணஸ்ஸேவ படிக்கி²த்தத்தா படிக்³க³ஹிதபரிவத்தனே தோ³ஸம் அதி³ஸ்வா ரூபியபரிவத்தனே. தஸ்ஸ வாதி பரிவத்திதஸ்ஸ வா. த⁴னஸ்ஸ வாதி அத்தனோ மூலத⁴னஸ்ஸ வா. அத்தனோ வா ஹி அரூபியேன பரஸ்ஸ ரூபியம் சேதாபேய்ய, அத்தனோ வா ரூபியேன பரஸ்ஸ அரூபியம், உப⁴யதா²பி ரூபியஸம்வோஹாரோ கதோவ ஹோதீதி.

ரூபியஸம்வோஹாரஸிக்கா²பத³வண்ணனா நிட்டி²தா.

10. கயவிக்கயஸிக்கா²பத³வண்ணனா

ரூபியஸம்வோஹாரஸ்ஸ பன ஹேட்டா²ஸிக்கா²பதே³ன க³ஹிதத்தா கப்பியப⁴ண்டா³னமேவேத்த² க³ஹணந்தி ஆஹ ‘‘சீவராதீ³ன’’ந்திஆதி³. தத்த² சீவராதீ³னம் கப்பியப⁴ண்டா³னந்தி அந்தமஸோ த³ஸிகஸுத்தம் உபாதா³ய சீவரபிண்ட³பாதஸேனாஸனகி³லானபச்சயானம் யேஸம் கேஸஞ்சி கப்பியப⁴ண்டா³னம். கயம் நாம பரப⁴ண்ட³ஸ்ஸ க³ஹணம். விக்கயம் நாம அத்தனோ ப⁴ண்ட³ஸ்ஸ தா³னம். தேனாஹ ‘‘இமினா இமம் தே³ஹீ’’திஆதி³. பரஸ்ஸாதி ட²பேத்வா பஞ்ச ஸஹத⁴ம்மிகே அஞ்ஞஸ்ஸ. ஏத்த² ச ‘‘அஹம், ப⁴ந்தே, நானப்பகாரகம் கயவிக்கயம் ஸமாபஜ்ஜிம், இத³ம் மே நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’திஆதி³னா (பாரா. 595) நயேன நிஸ்ஸஜ்ஜிதப்³ப³ம். தேனாஹ ‘‘வுத்தலக்க²ணவஸேனா’’திஆதி³. நனு சேத்த² சீவரதோ⁴வனே வா கேஸச்சே²த³னே வா பூ⁴மிஸோத⁴னாதி³னவகம்மே வா பரப⁴ண்ட³ம் அத்தனோ ஹத்த²க³தம் நிஸ்ஸஜ்ஜிதப்³ப³ம் நாம நத்தி², தத்த² கிம் காதப்³ப³ந்தி ஆஹ ‘‘அஸந்தே பாசித்தியம் தே³ஸேதப்³ப³மேவா’’தி. யதா² நிஸ்ஸக்³கி³யவத்து²ம்ஹி பரிபு⁴த்தே வா நட்டே² வா பாசித்தியம் தே³ஸேதி, ஏவம் இதா⁴பி தே³ஸேதப்³ப³மேவாதி அதி⁴ப்பாயோ.

இத³ம் அம்ஹாகம் அத்தீ²தி இத³ம் படிக்³க³ஹிதம் தேலம் வா ஸப்பி வா அம்ஹாகம் ஸம்விஜ்ஜதி. அம்ஹாகஞ்ச இமினா ச இமினா ச அத்தோ²தி அம்ஹாகஞ்ச தத³ஞ்ஞேன இமினா ச இமினா ச அப்படிக்³க³ஹிதகேன அத்தோ². ‘‘ரூபியஸம்வோஹாரே வுத்தனயமேவா’’தி இமினா ‘‘திகபாசித்தியம் அகயவிக்கயே கயவிக்கயஸஞ்ஞினோ ச வேமதிகஸ்ஸ ச து³க்கட’’ந்தி இமம் நயமதிதி³ஸதி.

கயவிக்கயஸிக்கா²பத³வண்ணனா நிட்டி²தா.

ஏளகலோமவக்³கோ³ து³தியோ.