3. பத்தவக்³கோ³

1. பத்தஸிக்கா²பத³வண்ணனா

அவிகப்பிதோதி ‘‘இமம் பத்தம் துய்ஹம் விகப்பேமீ’’திஆதி³னா நயேன அவிகப்பிதோ. அட்³டா⁴ள்ஹகோத³னம் க³ண்ஹாதீதி மக³த⁴னாளியா த்³வின்னம் தண்டு³லனாளீனம் ஓத³னம் க³ண்ஹாதி. ‘‘மக³த⁴னாளி நாம அட்³ட⁴தேரஸபலா ஹோதீ’’தி அந்த⁴கட்ட²கதா²யம் வுத்தம். ‘‘ஸீஹளதீ³பே பகதினாளி மஹந்தா, த³மிளனாளி கு²த்³த³கா, மக³த⁴னாளி பமாணயுத்தா, தாய மக³த⁴னாளியா தி³யட்³ட⁴னாளி ஏகா ஸீஹளனாளி ஹோதீ’’தி (பாரா. அட்ட². 2.602) மஹாஅட்ட²கதா²யம் வுத்தம். அனுத்தண்டு³லந்தி பாகதோ உக்கந்தம் தண்டு³லம் உத்தண்டு³லம், ந உத்தண்டு³லம் அனுத்தண்டு³லம். ஸப்³ப³ஸம்பா⁴ரஸங்க²தோதி ஜீரகாதி³ஸப்³ப³ஸம்பா⁴ரேஹி ஸங்க²தோ. ஆலோபஸ்ஸ சதுத்த²பா⁴க³ப்பமாணம் ப்³யஞ்ஜனம் ஆலோபஸ்ஸ அனுரூபப்³யஞ்ஜனம்.

ஏவம் உக்கட்ட²பத்தம் த³ஸ்ஸேத்வா இதா³னி மஜ்ஜி²மோமகானி த³ஸ்ஸேதும் ‘‘உக்கட்ட²தோ’’திஆதி³மாஹ. தத்ராயம் நயோ – ஸசே நாளிகோத³னாதி³ ஸப்³ப³ம்பி பக்கி²த்தம் வுத்தனயேனேவ ஹேட்டி²மராஜிஸமம் திட்ட²தி, அயம் மஜ்ஜி²மோ நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் மஜ்ஜி²மோமகோ நாம பத்தோ. ஸசே தம் ராஜிம் ந ஸம்பாபுணாதி, அந்தோக³த⁴மேவ ஹோதி, அயம் மஜ்ஜி²முக்கட்டோ² நாம பத்தோ. ஸசே பத்தோத³னாதி³ ஸப்³ப³ம்பி பக்கி²த்தம் ஹேட்டி²மராஜிஸமம் திட்ட²தி, அயம் ஓமகோ நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் ஓமகோமகோ நாம பத்தோ. ஸசே தம் ராஜிம் ந ஸம்பாபுணாதி, அந்தோக³த⁴மேவ ஹோதி, அயம் ஓமகுக்கட்டோ² நாம பத்தோதி. தேனாஹ ‘‘தேஸம்பி வுத்தனயேனேவ பே⁴தோ³ வேதி³தப்³போ³’’தி.

இதா³னி தேஸு அதி⁴ட்டா²னவிகப்பனானதி⁴ட்டா²னாவிகப்பனுபகே³ த³ஸ்ஸேதும் ‘‘இச்சேதேஸூ’’திஆதி³மாஹ. தத்த² உக்கட்டு²க்கட்டோ²தி உக்கட்ட²தோ உக்கட்டோ². ததோ ஹி ஸோ ‘‘அபத்தோ’’தி வுத்தோ. ஓமகோமகோதி ஓமகதோ ஓமகோ. ததோ ஹி ஸோ ‘‘அபத்தோ’’தி வுத்தோ. ஏதே பன பா⁴ஜனபரிபோ⁴கே³ன பரிபு⁴ஞ்ஜிதப்³பா³, ந அதி⁴ட்டா²னுபகா³ ந விகப்பனுபகா³, இதரே பன ஸத்த அதி⁴ட்ட²ஹித்வா வா விகப்பேத்வா வா பரிபு⁴ஞ்ஜிதப்³பா³. தேனாஹ ‘‘ஸேஸா ஸத்த பத்தா பமாணயுத்தா நாமா’’தி.

தஸ்மாதி யஸ்மா ஸத்த பத்தா பமாணயுத்தா, தஸ்மா. ஸமணஸாருப்பேன பக்கந்தி ஏத்த² அயோபத்தோ பஞ்சஹி பாகேஹி (பாரா. அட்ட². 2.608) பக்கோ ஸமணஸாருப்பேன பக்கோ ஹோதி, மத்திகாபத்தோ த்³வீஹி பாகேஹி. ஸசே ஏகோ பாகோ ஊனோ ஹோதி, ந அதி⁴ட்டா²னுபகோ³. யதா² ச ஸமணஸாருப்பேன பக்கோயேவ அதி⁴ட்டா²னுபகோ³, ததா² உபோ⁴பி யம் மூலம் தா³தப்³ப³ம், தஸ்மிம் தி³ன்னேயேவ அதி⁴ட்டா²னுபகா³. யதி³ பன அப்பகம்பி அதி³ன்னம் ஹோதி, ந அதி⁴ட்டா²னுபகா³. தேனாஹ ‘‘ஸசே பனா’’திஆதி³. ‘‘காகணிகமத்தம் நாம தி³யட்³ட⁴வீஹீ’’தி வத³ந்தி. ஸசேபி பத்தஸாமிகோ வத³தி ‘‘யதா³ தும்ஹாகம் மூலம் ப⁴விஸ்ஸதி, ததா³ த³ஸ்ஸத², அதி⁴ட்ட²ஹித்வா பரிபு⁴ஞ்ஜதா²’’தி, நேவ அதி⁴ட்டா²னுபகோ³ ஹோதி. பாகஸ்ஸ ஹி ஊனத்தா பத்தஸங்க²ம் ந க³ச்ச²தி. மூலஸ்ஸ ஸகலஸ்ஸ வா ஏகதே³ஸஸ்ஸ வா அதி³ன்னத்தா ஸகபா⁴வம் ந உபேதி, அஞ்ஞஸ்ஸேவ ஸந்தகோ ஹோதி. தஸ்மா பாகே ச மூலே ச நிட்டி²தேயேவ அதி⁴ட்டா²னுபகோ³ ஹோதி. யோ அதி⁴ட்டா²னுபகோ³, ஸ்வேவ விகப்பனுபகோ³ ச. தேனாஹ ‘‘அபச்சுத்³த⁴ரந்தேனா’’திஆதி³. அபச்சுத்³த⁴ரந்தேன விகப்பேதப்³போ³தி புராணபத்தம் அபச்சுத்³த⁴ரந்தேன நவோ பத்தோ விகப்பேதப்³போ³தி அத்தோ², ட²பேதப்³போ³தி அதி⁴ப்பாயோ. கங்கு³ஸித்த²ந்தி ஸத்தன்னம் த⁴ஞ்ஞானம் லாமகத⁴ஞ்ஞஸித்த²ந்தி ஆஹ ‘‘கங்கு³ஸித்த²னிக்க²மனமத்தேன சி²த்³தே³னா’’தி.

பத்தஸிக்கா²பத³வண்ணனா நிட்டி²தா.

2. ஊனபஞ்சப³ந்த⁴னஸிக்கா²பத³வண்ணனா

அஸ்ஸாதி இமஸ்ஸ பத்தஸ்ஸ. தேன ஊனபஞ்சப³ந்த⁴னேனாதி தேன ஊனபஞ்சப³ந்த⁴னேன பத்தேன உபலக்கி²தோ ஹுத்வாதி அத்தோ². ஊனபஞ்சப³ந்த⁴னோ ஹி பத்தோ ஏத்த² லக்க²ணபா⁴வேன க³ஹிதோ. தேனேவாஹ ‘‘இத்த²ம்பூ⁴தஸ்ஸ லக்க²ணே கரணவசன’’ந்தி. தத்த² இத்த²ம்பூ⁴தஸ்ஸாதி கஞ்சி பகாரம் பத்தஸ்ஸ. லக்கீ²யதே அனேனாதி லக்க²ணம், தஸ்மிம் கரணவசனம், ததியாவிப⁴த்தீதி அத்தோ². ‘‘பகாரோ’’தி ச ஸாமஞ்ஞஸ்ஸ பே⁴த³கோ விஸேஸோ வுச்சதி. ததா² ஹி ஊனபஞ்சப³ந்த⁴னேன பத்தேனாதி ஏத்த² பி⁴க்கு²பா⁴வஸாமஞ்ஞஸ்ஸ ஊனபஞ்சப³ந்த⁴னபத்தபா⁴வோ பகாரோ, தம் பி⁴க்கு² ஆபன்னோ, தஸ்ஸ பத்தோ லக்க²ணம். யதி³ அபரிபுண்ணபஞ்சப³ந்த⁴னோ பத்தோ ஊனபஞ்சப³ந்த⁴னோ நாம ஹோதி, அத² கஸ்மா இமஸ்ஸ பத³பா⁴ஜனியம் அப³ந்த⁴னோபி வுத்தோதி ஆஹ ‘‘தத்தா²’’திஆதி³. தத்த² தத்தா²தி வாக்யோபஞ்ஞாஸே. ப³ந்த⁴னோகாஸே ஸதி வா அஸதி வா ப³ந்த⁴னவிரஹிதோ பத்தோ அப³ந்த⁴னோ, பஞ்சப³ந்த⁴னானம் ஓகாஸோ அஸ்ஸாதி பஞ்சப³ந்த⁴னோகாஸோ. அபத்தோதி பத்தோ நாம ந ஹோதீதி அத்தோ², பாகதிகம் காதும் அஸமத்தோ²தி வுத்தம் ஹோதி. இத³ஞ்ச அஞ்ஞஸ்ஸ விஞ்ஞாபனே காரணவசனம். தேனாஹ ‘‘தஸ்மா அஞ்ஞம் விஞ்ஞாபேதும் வட்டதீ’’தி.

ப³ந்த⁴னஞ்ச நாமேதம் யஸ்மா ப³ந்த⁴னோகாஸே ஸதி ஹோதி, அஸதி ந ஹோதி, தஸ்மா தஸ்ஸ லக்க²ணம், ப³ந்த⁴னவிதி⁴ஞ்ச த³ஸ்ஸேதும் ‘‘யஸ்மிம் பனா’’திஆதி³ வுத்தம். முக²வட்டிஸமீபே பன பத்தவேத⁴கேன விஜ்ஜி²யமானே கபாலஸ்ஸ ப³ஹலத்தா பி⁴ஜ்ஜதி, தஸ்மா ஹேட்டா² விஜ்ஜி²தப்³போ³. தேனாஹ ‘‘ஹேட்டி²மபரியந்தே’’திஆதி³. ஸுகு²மம் வா சி²த்³த³ம் கத்வா ப³ந்தி⁴தப்³போ³தி ஸுகு²மே சி²த்³தே³ திபுபட்டாதீ³ஹி பயோஜனம் நத்தி², ஸுத்தம் பக்கி²பித்வாவ அதி⁴ட்டா²தப்³போ³தி அதி⁴ப்பாயோ. ந கேவலம் திபுஸுத்தகாதி³னாவ ப³ந்தி⁴தப்³போ³தி ஆஹ ‘‘பா²ணித’’ந்திஆதி³. பா²ணிதம் ஜா²பேத்வா பாஸாணசுண்ணேனாதி பாஸாணசுண்ணேன ஸத்³தி⁴ம் பா²ணிதம் பசித்வா ததா²பக்கேன பாஸாணசுண்ணேனாதி அத்தோ². நிஸ்ஸஜ்ஜிதப்³போ³தி ‘‘அயம் மே, ப⁴ந்தே, பத்தோ ஊனபஞ்சப³ந்த⁴னேன பத்தேன சேதாபிதோ நிஸ்ஸக்³கி³யோ, இமாஹம் ஸங்க⁴ஸ்ஸ நிஸ்ஸஜ்ஜாமீ’’தி (பாரா. 613) நிஸ்ஸஜ்ஜிதப்³போ³. தேனாஹ ‘‘நிஸ்ஸஜ்ஜந்தேனா’’திஆதி³. ஸம்மதேனாதி –

‘‘ஸுணாது மே, ப⁴ந்தே, ஸங்கோ⁴, யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் பத்தக்³கா³ஹாபகம் ஸம்மன்னேய்ய, ஏஸா ஞத்தி. ஸுணாது மே, ப⁴ந்தே, ஸங்கோ⁴, ஸங்கோ⁴ இத்த²ன்னாமம் பி⁴க்கு²ம் பத்தக்³கா³ஹாபகம் ஸம்மன்னதி, யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ பத்தக்³கா³ஹாபகஸ்ஸ ஸம்முதி, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய. ஸம்மதோ ஸங்கே⁴ன இத்த²ன்னாமோ பி⁴க்கு² பத்தக்³கா³ஹாபகோ, க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி (பாரா. 614) –

ஏவம் பத³பா⁴ஜனே வுத்தாய ஞத்திது³தியகம்மவாசாய ஸம்மதேன. பத்தஸ்ஸ விஜ்ஜமானகு³ணம் வத்வாதி ‘‘அயம், ப⁴ந்தே, பத்தோ பமாணயுத்தோ ஸுந்த³ரோ தே²ரானுரூபோ’’திஆதி³னா (பாரா. அட்ட². 2.615) விஜ்ஜமானானிஸம்ஸம் வத்வா. பத்தபரியந்தோதி பரியந்தே டி²தபத்தோ. அதே³ஸேதி மஞ்சபீட²ச்ச²த்தனாக³த³ந்தகாதி³கே அதே³ஸே. பத்தஸ்ஸ ஹி நிக்கி²பனதே³ஸோ ‘‘அனுஜானாமி, பி⁴க்க²வே, ஆதா⁴ரக’’ந்திஆதி³னா நயேன க²ந்த⁴கே வுத்தோயேவ. அபரிபோ⁴கே³னாதி யாகு³ரந்த⁴னரஜனபசனாதி³னா அயுத்தபரிபோ⁴கே³ன. அந்தராமக்³கே³ பன ப்³யாதி⁴ம்ஹி உப்பன்னே அஞ்ஞஸ்மிம் பா⁴ஜனே அஸதி மத்திகாய லிம்பித்வா யாகு³ம் பசிதும், உத³கம் வா தாபேதும் வட்டதி. விஸ்ஸஜ்ஜேதீதி அஞ்ஞஸ்ஸ தே³தி. ஸசே பன ஸத்³தி⁴விஹாரிகோ வா அந்தேவாஸிகோ வா அஞ்ஞம் வரபத்தம் ட²பேத்வா ‘‘அயம் மய்ஹம் ஸாருப்போ, அயம் தே²ரஸ்ஸா’’தி க³ண்ஹாதி, வட்டதி. அஞ்ஞோ வா தம் க³ஹேத்வா அத்தனோ பத்தம் தே³தி, வட்டதி. ‘‘மய்ஹமேவ பத்தம் ஆஹரா’’தி வத்தப்³ப³கிச்சம் நத்தி².

ஞாதகப்பவாரிதேதி ஏத்த² ஸங்க⁴வஸேன பவாரிதட்டா²னே பஞ்சப³ந்த⁴னேனேவ வட்டதி, புக்³க³லவஸேன பன பவாரிதட்டா²னே ஊனபஞ்சப³ந்த⁴னேனாபி. அகதவிஞ்ஞத்தி நாம ‘‘வத³, ப⁴ந்தே, பச்சயேனா’’தி ஏவம் அகதட்டா²னே விஞ்ஞத்தி.

ஊனபஞ்சப³ந்த⁴னஸிக்கா²பத³வண்ணனா நிட்டி²தா.

3. பே⁴ஸஜ்ஜஸிக்கா²பத³வண்ணனா

உக்³க³ஹேத்வாதி உக்³க³ஹிதகம் கத்வா, அப்படிக்³க³ஹிதம் ஸயமேவ க³ஹேத்வாதி அத்தோ². ஸத்தாஹாதிக்கமேபி அனாபத்திகதா சேத்த² அனஜ்ஜோ²ஹரணீயதம் ஆபன்னத்தாதி வேதி³தப்³ப³ம். கஸ்மா ஏதேன இத³ம் த³ஸ்ஸிதம் ஹோதீதி ஆஹ ‘‘தானி ஹீ’’திஆதி³. பி⁴ஸக்கஸ்ஸ இமானி தேன அனுஞ்ஞாதத்தாதி பே⁴ஸஜ்ஜானி, யேஸம் கேஸஞ்சி ஸப்பாயானமேதம் அதி⁴வசனம். தேனாஹ ‘‘பே⁴ஸஜ்ஜகிச்சம் கரோந்து வா, மா வா, ஏவம் லத்³த⁴வோஹாரானீ’’தி. இதா³னி ஸத்தாஹகாலிகம் நிஸ்ஸக்³கி³யவத்து²பூ⁴தம் ஸப்பினவனீதம் த³ஸ்ஸேதும் ‘‘ஸப்பி நாம க³வாதீ³ன’’ந்திஆதி³ வுத்தம். ஆதி³ஸத்³தே³ன அஜிகாதீ³னம் க³ஹணம். ‘‘யேஸம் மம்ஸம் கப்பதீ’’தி இமினா பாகடேஹி கோ³அஜிகாதீ³ஹி அஞ்ஞானிபி மிக³ரோஹிதாதீ³னி ஸங்க³ண்ஹாதி. யேஸஞ்ஹி கீ²ரம் அத்தி², ஸப்பிபி தேஸம் அத்தி²யேவ. தம் பன ஸுலப⁴ம் வா ஹோது, து³ல்லப⁴ம் வா, அஸம்மோஹத்த²ம் வுத்தம். மக்கி²காமது⁴மேவாதி கு²த்³த³கப⁴மரமது⁴கரீஹி தீஹி மக்கி²காஹி கதம் மது⁴மேவ. உச்சு²ரஸந்தி ஸுத்³தோ⁴த³கஸம்பி⁴ன்னானம் வஸேன து³வித⁴ம்பி உச்சு²ரஸம். ‘‘அகி³லானஸ்ஸ கு³ளோத³க’’ந்தி (மஹாவ. 284) பன உத்³தி³ஸ்ஸ அனுஞ்ஞாதத்தா உத³கஸம்பி⁴ன்னோ அகி³லானஸ்ஸ வட்டதி. ‘‘அவத்து²கபக்கா வா’’தி இமினா ஸவத்து²கபக்கா ந வட்டதீதி த³ஸ்ஸேதி. மஹாபச்சரியம் பன ‘‘ஏதம் ஸவத்து²கபக்கம் வட்டதி, நோ வட்டதீதி புச்ச²ம் கத்வா உச்சு²பா²ணிதம் பச்சா²ப⁴த்தம் நோவட்டனகம் நாம நத்தீ²’’தி வுத்தம், தம் யுத்தந்தி ஸமந்தபாஸாதி³காயம் (பாரா. அட்ட². 2.623) வுத்தம். உச்சு²விகதீதி உச்சு²ம்ஹா நிப்³ப³த்தா ரஸலஸிகாதி³கா. பகதத்தானம் படினித்³தே³ஸத்தா தம்-ஸத்³த³ஸ்ஸ தேன பகதானம் பே⁴ஸஜ்ஜானம் ஏவ க³ஹணம், ந தேஸம் வத்தூ²னந்தி ஆஹ ‘‘தானி பே⁴ஸஜ்ஜானீ’’திஆதி³. ந தேஸம் வத்தூ²னீதி தேஸம் ஸப்பிஆதீ³னம் காரணானி கீ²ராதீ³னி அப்படிக்³க³ஹேத்வாதி அத்தோ².

வஸாதேலந்தி (பாரா. அட்ட². 2.623) ‘‘அனுஜானாமி, பி⁴க்க²வே, வஸானி பே⁴ஸஜ்ஜானி அச்ச²வஸம் மச்ச²வஸம் ஸுஸுகாவஸம் ஸூகரவஸம் க³த்³ரப⁴வஸ’’ந்தி (மஹாவ. 262) ஏவம் அனுஞ்ஞாதவஸானம் தேலம். யானீதி யானி பே⁴ஸஜ்ஜானி. ‘‘அனுஜானாமி, பி⁴க்க²வே, வஸானி பே⁴ஸஜ்ஜானி அச்ச²வஸம் மச்ச²வஸம் ஸுஸுகாவஸம் ஸூகரவஸம் க³த்³ரப⁴வஸம் காலே படிக்³க³ஹிதம் காலே நிப்பக்கம் காலே ஸம்ஸட்ட²ம் தேலபரிபோ⁴கே³ன பரிபு⁴ஞ்ஜிது’’ந்தி ஏவம் தேலத்த²ம் வஸாபடிக்³க³ஹணஸ்ஸ அனுஞ்ஞாதத்தா ‘‘வஸாதேலம் பனா’’திஆதி³ வுத்தம். காலேதி புரேப⁴த்தம். ஸம்ஸட்ட²ந்தி பரிஸ்ஸாவிதம். தஸ்மாதி யஸ்மா அனுஞ்ஞாதம், தஸ்மா. ‘‘அச்ச²வஸ’’ந்தி வசனேன ட²பேத்வா மனுஸ்ஸவஸம் ஸப்³பே³ஸம் அகப்பியமம்ஸானம் வஸாய அனுஞ்ஞாதத்தா ‘‘ட²பேத்வா மனுஸ்ஸவஸ’’ந்தி வுத்தம்.

ஸாமம் பசித்வாதி காலேயேவ ஸாமம் பசித்வா. நிப்³ப³த்திததேலம்பீதி காலேயேவ அத்தனா விவேசிததேலம்பி. திவித⁴ம்பி சேதம் காலேயேவ வட்டதி. வுத்தம்பி சேதம் ‘‘காலே சே, பி⁴க்க²வே, படிக்³க³ஹிதம் காலே நிப்பக்கம் காலே ஸம்ஸட்ட²ம், தம் சே பரிபு⁴ஞ்ஜேய்ய, அனாபத்தீ’’தி. பச்சா²ப⁴த்தம் பன படிக்³க³ஹேதும் வா காதும் வா ந வட்டதியேவ. வுத்தம்பி சேதம் ‘‘விகாலே சே, பி⁴க்க²வே, படிக்³க³ஹிதம் விகாலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி திண்ணம் து³க்கடானம். காலே சே, பி⁴க்க²வே, படிக்³க³ஹிதம் விகாலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி த்³வின்னம் து³க்கடானம். காலே சே, பி⁴க்க²வே, படிக்³க³ஹிதம் காலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி து³க்கடஸ்ஸா’’தி (மஹாவ. 262). ‘‘ஸத்தாஹம் நிராமிஸபரிபோ⁴கே³ன வட்டதீ’’தி இமினா பன ‘‘காலே படிக்³க³ஹிதம் காலே நிப்பக்கம் காலே ஸம்ஸட்ட²ம் தேலபரிபோ⁴கே³ன பரிபு⁴ஞ்ஜிது’’ந்தி இத³ம் நிராமிஸபரிபோ⁴க³ம் ஸந்தா⁴ய வுத்தந்தி த³ஸ்ஸேதி.

யம் பனேத்த² (பாரா. அட்ட². 2.623) ஸுகு²மரஜஸதி³ஸம் மம்ஸம் வா ந்ஹாரு வா அட்டி² வா லோஹிதம் வா ஹோதி, தம் அப்³போ³ஹாரிகம். ஸசே பன அனுபஸம்பன்னோ தாய படிக்³க³ஹிதவஸாய தேலம் கத்வா தே³தி, தம் கத²ந்தி ஆஹ ‘‘அனுபஸம்பன்னேனா’’திஆதி³. தத³ஹூதி யஸ்மிம் அஹனி படிக்³க³ஹிதம், தத³ஹு. பச்சா²ப⁴த்ததோ பட்டா²ய பன ஸத்தாஹம் நிராமிஸமேவ வட்டதி. தத்ராபி அப்³போ³ஹாரிகம் அப்³போ³ஹாரிகமேவ. யாவகாலிகவத்தூ²னம் அஞ்ஞேஸம் வத்து²ம் பசிதும் ந வட்டதீதி ஸம்ப³ந்தோ⁴. தத்த² யாவகாலிகவத்தூ²னந்தி யாவகாலிகம் வத்து² ஏதேஸந்தி யாவகாலிகவத்தூ²னி, தேஸம், யாவகாலிகவத்து²மந்தானந்தி அத்தோ². அஞ்ஞேஸந்தி வஸாதேலதோ அஞ்ஞேஸம் ஸப்பிஆதீ³னம். வத்து²ந்தி கீ²ராதி³கம் யாவகாலிகபூ⁴தம் வத்து²ம், பசிதும் ந வட்டதியேவ, ஸாமம்பாகத்தாதி அதி⁴ப்பாயோ.

நிப்³ப³த்திதஸப்பிம் வாதி யாவகாலிகவத்து²தோ விவேசிதஸப்பிம் வா. யதா² தத்த² த³தி⁴க³தம் வா தக்கக³தம் வா க²யம் க³மிஸ்ஸதி, ஏவம் ஜா²பிதம் வாதி அத்தோ². நவனீதம் வாதி தக்கபி³ந்தூ³னிபி த³தி⁴கு³ளிகாயோபி அபனேத்வா ஸுதோ⁴தனவனீதம் பசிதும் வட்டதி ஸாமம்பக்காபா⁴வதோதி அதி⁴ப்பாயோ. யதி³ ஸயம்பசிதஸத்தாஹகாலிகேன ஸத்³தி⁴ம் ஆமிஸம் பு⁴ஞ்ஜதி, தம் ஆமிஸம் ஸயம்பசிதஸத்தாஹகாலிகேன மிஸ்ஸிதம் அத்தனோ யாவகாலிகபா⁴வம் ஸத்தாஹகாலிகேன க³ண்ஹாபேதி. ததா² ச யாவகாலிகம் அபக்கம்பி ஸயம்பக்கபா⁴வம் உபக³ச்ச²தீதி ‘‘தம் பன தத³ஹுபுரேப⁴த்தம்பி ஸாமிஸம் பரிபு⁴ஞ்ஜிதும் ந வட்டதீ’’தி வுத்தம். யதா² ஸயம்பக்கஸத்தாஹகாலிகம் வஸாதேலம், ஸயம்ப⁴ஜ்ஜிதஸாஸபாதி³யாவஜீவிகவத்தூ²னம் தேலஞ்ச ஸாமிஸம் தத³ஹுபுரேப⁴த்தம்பி ந வட்டதி, ததா² நவனீதஸப்பீதி வேதி³தப்³ப³ம். வுத்தஞ்ச –

‘‘யாவகாலிகஆதீ³னி, ஸம்ஸட்டா²னி ஸஹத்தனா;

கா³ஹாபயந்தி ஸப்³பா⁴வ’’ந்தி ச;

‘‘தேஹேவ பி⁴க்கு²னா பத்தம், கப்பதே யாவஜீவிகம்;

நிராமிஸம்வ ஸத்தாஹம், ஸாமிஸே ஸாமபாகதா’’தி ச.

கீ²ராதி³தோதி ஏத்த² ஆதி³ஸத்³தே³ன திலாதீ³னம் க³ஹணம். ஸாமிஸானிபீதி ந கேவலம் நிராமிஸானேவாதி அத்தோ². பச்சா²ப⁴த்ததோ பன பட்டா²ய ந வட்டந்தியேவ. ஸத்தாஹாதிக்கமேபி அனாபத்தி ஸவத்து²கானம் படிக்³க³ஹிதத்தா. ‘‘தானி படிக்³க³ஹேத்வா’’தி (பாரா. 622) ஹி வுத்தம். தேனாஹ ‘‘பச்சா²ப⁴த்ததோ பட்டா²யா’’திஆதி³. பச்சா²ப⁴த்தம் படிக்³க³ஹிதகேஹி கதம் பன அப்³ப⁴ஞ்ஜனாதீ³ஸு உபனேதப்³ப³ம், புரேப⁴த்தம்பி ச உக்³க³ஹிதகேஹி கதம். உப⁴யேஸம்பி ஸத்தாஹாதிக்கமேபி அனாபத்தி. அந்தோஸத்தாஹேதி ஸத்தாஹப்³ப⁴ந்தரே. அப்³ப⁴ஞ்ஜனாதீ³னந்தி ஏத்த² ஆதி³ஸத்³தே³ன முத்³த⁴னிதேலஅருமக்க²னக⁴ரதூ⁴பனாதீ³னம் க³ஹணம். அதி⁴ட்ட²ஹித்வாதி ‘‘இதா³னி ந மய்ஹம் அஜ்ஜோ²ஹரணத்தா²ய ப⁴விஸ்ஸதி, இத³ம் ஸப்பி ச தேலஞ்ச வஸா ச முத்³த⁴னிதேலத்த²ம் வா அப்³ப⁴ஞ்ஜனத்த²ம் வா ப⁴விஸ்ஸதி, மது⁴ அருமக்க²னத்த²ம் வா பா²ணிதம் க⁴ரதூ⁴பனத்த²ம் வா ப⁴விஸ்ஸதீ’’தி ஏவம் சித்தம் உப்பாதே³த்வா.

கோ பனேத்த² யாவகாலிகயாவஜீவிகவத்தூ²ஸு விஸேஸோதி ஆஹ ‘‘யாவஜீவிகானீ’’திஆதி³. யாவ அருணஸ்ஸ உக்³க³மனா திட்ட²தீதி ஸத்தமதி³வஸே கததேலம் ஸசே யாவ அருணுக்³க³மனா திட்ட²தீதி அத்தோ². பாளியம் அனாக³தஸப்பிஆதீ³னந்தி ஏத்த² தாவ மிக³ரோஹிதாதீ³னம் ஸப்பி பாளியம் அனாக³தஸப்பி, ததா² நவனீதம், நாளிகேரனிம்ப³கோஸம்ப³கரமந்த³ஸாஸபஆதீ³னம் தேலம் பன பாளியம் அனாக³ததேலம், ததா² மது⁴கபுப்ப²பா²ணிதம் பாளியம் அனாக³தபா²ணிதந்தி வேதி³தப்³ப³ம். ந ஸப்³ப³ம் மது⁴கபுப்ப²பா²ணிதம் பா²ணிதக³திகந்தி ஆஹ ‘‘ஸீதுத³கேனா’’திஆதி³. ஸீதுத³கேன கதந்தி மது⁴கபுப்பா²னி ஸீதுத³கே பக்கி²பித்வா அமத்³தி³த்வா புப்ப²ரஸே உத³கக³தே ஸதி தம் உத³கம் க³ஹேத்வா பசித்வா கதம். ‘‘பா²ணிதக³திகமேவா’’தி இமினா ஸத்தாஹகாலிகந்தி த³ஸ்ஸேதி, ந பன நிஸ்ஸக்³கி³யவத்து²ந்தி. தஸ்மா ஸத்தாஹம் அதிக்காமயதோ து³க்கடந்தி வேதி³தப்³ப³ம். வுத்தம்பி சேதம் ஸமந்தபாஸாதி³காயம் ஸீதுத³கேன கதம் மது⁴கபுப்ப²பா²ணிதம் புரேப⁴த்தம் ஸாமிஸம் வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ, ஸத்தாஹாதிக்கமே வத்து²க³ணனாய து³க்கட’’ந்தி. ஸசே பன கீ²ரம் பக்கி²பித்வா கதம், யாவகாலிகம். க²ண்ட³ஸக்க²ரம் பன கீ²ரஜல்லிகம் அபனேத்வா ஸோதே⁴ந்தி, தஸ்மா வட்டதி, அம்ப³ஜம்பு³பனஸகத³லிக²ஜ்ஜுரிசிஞ்சாதீ³னம் ஸப்³பே³ஸம் யாவகாலிகப²லானம் பா²ணிதம் யாவகாலிகமேவாதி ஆஹ ‘‘அம்ப³பா²ணிதாதீ³னி யாவகாலிகானீ’’தி.

காயிகபரிபோ⁴க³ம் வட்டதீதி காயஸ்ஸ வா காயே அருனோ வா மக்க²னம் வட்டதி, அஜ்ஜோ²ஹரிதும் பன ந வட்டதி. யந்தி ஸத்தாஹாதிக்கந்தம் பே⁴ஸஜ்ஜம். நிரபேக்கோ² பரிச்சஜித்வாதி அனபேக்கோ² ஸாமணேரஸ்ஸ த³த்வா. தந்தி ஏவம் பரிச்சஜித்வா புன லத்³த⁴பே⁴ஸஜ்ஜம். ஏவஞ்ஹி தி³ன்னம் பே⁴ஸஜ்ஜம் ஸசே ஸோ ஸாமணேரோ அபி⁴ஸங்க²ரித்வா வா அனபி⁴ஸங்க²ரித்வா வா தஸ்ஸ பி⁴க்கு²னோ த³தே³ய்ய, க³ஹேத்வா நத்து²கம்மம் வா காதப்³ப³ம், அஞ்ஞம் வா கஞ்சி பரிபோ⁴க³ம். தேனாஹ ‘‘அஜ்ஜோ²ஹரிதும்பி வட்டதீ’’தி. ஸசே ஸோ பா³லோ ஹோதி, தா³தும் ந ஜானாதி, அஞ்ஞேன பி⁴க்கு²னா வத்தப்³போ³ ‘‘அத்தி² தே, ஸாமணேர, பே⁴ஸஜ்ஜ’’ந்தி, ‘‘ஆம, ப⁴ந்தே, அத்தீ²’’தி. ‘‘ஆஹர, தே²ரஸ்ஸ பே⁴ஸஜ்ஜம் கரிஸ்ஸாமா’’தி, ஏவம்பி வட்டதி. வத்து²க³ணனாயாதி ஸப்பிஆதி³வத்து²க³ணனாய சேவ ஸப்பிபிண்டா³தி³வத்து²க³ணனாய ச. மிஸ்ஸிதேஸு பன ஏகம் நிஸ்ஸக்³கி³யம் பாசித்தியம். ஏத்த² ச ‘‘இத³ம் மே, ப⁴ந்தே, பே⁴ஸஜ்ஜம் ஸத்தாஹாதிக்கந்தம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி (பாரா. 623) நிஸ்ஸஜ்ஜனவிதா⁴னம் வேதி³தப்³ப³ம்.

ஸாதா⁴ரணபஞ்ஞத்தி. ஸத்தாஹம் அனதிக்கந்தேபி அதிக்கந்தஸஞ்ஞினோ சேவ வேமதிகஸ்ஸ ச து³க்கடம். அதிக்கந்தே அனதிக்கந்தஸஞ்ஞினோபி வேமதிகஸ்ஸபி நிஸ்ஸக்³கி³யம் பாசித்தியமேவ, ததா² அனதி⁴ட்டி²தாவிஸ்ஸஜ்ஜிதானட்டா²வினட்டா²த³ட்³டா⁴விலுத்தேஸு அதி⁴ட்டி²தாதி³ஸஞ்ஞினோ. அந்தோஸத்தாஹம் அதி⁴ட்டி²தே, விஸ்ஸஜ்ஜிதே, நட்டே², வினட்டே², த³ட்³டே⁴, அச்சி²ன்னே, விஸ்ஸாஸேன க³ஹிதே உம்மத்தகாதீ³னஞ்ச அனாபத்தி. ஆசாரவிபத்தி. ஸப்பிஆதீ³னம் அத்தனோ ஸந்தகதா, க³ணனுபக³தா, ஸத்தாஹாதிக்கமோதி இமானேத்த² தீணி அங்கா³னி. கதி²னஸமுட்டா²னம், அகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னம். தேனாஹ ‘‘ஸேஸம் சீவரவக்³க³ஸ்ஸ பட²மஸிக்கா²பதே³ வுத்தனயேனேவ வேதி³தப்³ப³’’ந்தி (கங்கா². அட்ட². கதி²னஸிக்கா²பத³வண்ணனா).

பே⁴ஸஜ்ஜஸிக்கா²பத³வண்ணனா நிட்டி²தா.

4. வஸ்ஸிகஸாடிகஸிக்கா²பத³வண்ணனா

பச்சி²மமாஸஸ்ஸ பட²மதி³வஸதோ பட்டா²யாதி ஜேட்ட²மூலபுண்ணமாஸியா பச்சி²மபாடிபத³தி³வஸதோ பட்டா²ய. தாவாதி தாவ பரிமாணே காலே. ஜேட்ட²மூலபுண்ணமாஸியா பச்சி²மபாடிபத³தி³வஸதோ பட்டா²ய யாவ கத்திகபுண்ணமா, இமஸ்மிம் பஞ்சமாஸேதி அத்தோ². காலோ வஸ்ஸிகஸாடிகாயாதிஆதி³னாதி ஏத்த² ஆதி³ஸத்³தே³ன ‘‘ஸமயோ வஸ்ஸிகஸாடிகாய, அஞ்ஞேபி மனுஸ்ஸா வஸ்ஸிகஸாடிகசீவரம் தே³ந்தீ’’தி (பாரா. 628) இமேஸம் க³ஹணம். தே³த² மே வஸ்ஸிகஸாடிகசீவரந்திஆதி³காயாதி ஏத்த² ஆதி³ஸத்³தே³ன பன ‘‘ஆஹரத² மே வஸ்ஸிகஸாடிகசீவரம், பரிவத்தேத² மே வஸ்ஸிகஸாடிகசீவரம், சேதாபேத² மே வஸ்ஸிகஸாடிகசீவர’’ந்தி இமேஸம் க³ஹணம். அத்தனோ அஞ்ஞாதகஅப்பவாரிதேஸு தது³ப⁴யம் கரோந்தஸ்ஸ கிம் ஹோதீதி ஆஹ ‘‘அஞ்ஞாதகஅப்பவாரிதட்டா²னே’’திஆதி³. ‘‘வத்தபே⁴தே³ து³க்கட’’ந்தி இத³ம் வஸ்ஸிகஸாடிகம் புப்³பே³ அதே³ந்தே ஸந்தா⁴ய வுத்தம். யே பன புப்³பே³பி தே³ந்தி, தேஸு வத்தபே⁴தோ³ நத்தி². வுத்தஞ்ஹி ஸமந்தபாஸாதி³காயம் ‘‘யே மனுஸ்ஸா புப்³பே³பி வஸ்ஸிகஸாடிகசீவரம் தே³ந்தி, இமே பன ஸசேபி அத்தனோ அஞ்ஞாதகஅப்பவாரிதா ஹோந்தி, வத்தபே⁴தோ³ நத்தி² தேஸு ஸதுப்பாத³கரணஸ்ஸ அனுஞ்ஞாதத்தா’’தி (பாரா. அட்ட². 2.628). அஞ்ஞாதகவிஞ்ஞத்திஸிக்கா²பதே³ன நிஸ்ஸக்³கி³யம் பாசித்தியந்தி ‘‘யோ பன பி⁴க்கு² அஞ்ஞாதகம் க³ஹபதிம் வா க³ஹபதானிம் வா சீவரம் விஞ்ஞாபேய்ய அஞ்ஞத்ர ஸமயா, நிஸ்ஸக்³கி³யம் பாசித்திய’’ந்தி (பாரா. 518) இமினா ஸிக்கா²பதே³ன நிஸ்ஸக்³கி³யம் பாசித்தியம். இத³ம் பன பகதியா வஸ்ஸிகஸாடிகதா³யகேஸுபி ஹோதியேவ.

கி³ம்ஹானம் பச்சி²மத்³த⁴மாஸஸ்ஸ பட²மதி³வஸதோ பட்டா²யாதி ஏத்த² ஜேட்ட²மூலகாளபக்கூ²போஸத²ஸ்ஸ பச்சி²மபாடிபத³தி³வஸதோ பட்டா²ய யாவ ஆஸாள்ஹிபுண்ணமா, அயமத்³த⁴மாஸோ கி³ம்ஹானம் பச்சி²மத்³த⁴மாஸோ நாம, தஸ்ஸ பட²மதி³வஸதோ பட்டா²யாதி அத்தோ², அத்³த⁴மாஸஸ்ஸ பட²மபாடிபத³தி³வஸதோ பட்டா²யாதி வுத்தம் ஹோதி. கத்திகமாஸஸ்ஸ பச்சி²மதி³வஸோ நாம பச்சி²மகத்திகமாஸஸ்ஸ புண்ணமா. ஏத்தாவதாதி ‘‘மாஸோ ஸேஸோ கி³ம்ஹானந்தி பி⁴க்கு²னா வஸ்ஸிகஸாடிகசீவரம் பரியேஸிதப்³ப³ம், அத்³த⁴மாஸோ ஸேஸோ கி³ம்ஹானந்தி கத்வா நிவாஸேதப்³ப³’’ந்தி ஏத்தகேன க³ணனேன. பரியேஸனக்கே²த்தந்தி பரியேஸனஸ்ஸ கே²த்தம். ஏதஸ்மிஞ்ஹி மாஸே வஸ்ஸிகஸாடிகம் அலத்³த⁴ம் பரியேஸிதும் வட்டதி. கரணனிவாஸனக்கே²த்தம்பீதி கரணக்கே²த்தஞ்சேவ நிவாஸனக்கே²த்தஞ்ச. பி-ஸத்³தே³ன பரியேஸனக்கே²த்தம் ஸம்பிண்டே³தி. ஏதஸ்மிஞ்ஹி அத்³த⁴மாஸே பரியேஸிதும், காதும், நிவாஸேதுஞ்ச வட்டதி, அதி⁴ட்டா²தும்யேவ ந வட்டதி. யம் பன ஸமந்தபாஸாதி³காயம் கத்த²சி போத்த²கே ‘‘ஜேட்ட²மூலபுண்ணமாஸியா பச்சி²மபாடிபத³தி³வஸதோ பட்டா²ய யாவ காலபக்கு²போஸதோ², அயமேகோ அத்³த⁴மாஸோ பரியேஸனக்கே²த்தஞ்சேவ கரணக்கே²த்தஞ்ச. ஏதஸ்மிஞ்ஹி அந்தரே வஸ்ஸிகஸாடிகம் அலத்³த⁴ம் பரியேஸிதும், லத்³த⁴ம் காதுஞ்ச வட்டதி, நிவாஸேதும், அதி⁴ட்டா²துஞ்ச ந வட்டதீ’’தி (பாரா. அட்ட². 2.628) வசனம் தி³ஸ்ஸதி, தம் பமாத³லிகி²தம் மாதிகாய விரோத⁴தோதி த³ட்ட²ப்³ப³ம். ‘‘அத்³த⁴மாஸோ ஸேஸோ கி³ம்ஹானந்தி கத்வா நிவாஸேதப்³ப³’’ந்தி (பாரா. 627) ஹி பாளி. ஸப்³ப³ம்பீதி பரியேஸனம், கரணம், நிவாஸனம், அதி⁴ட்டா²னஞ்சாதி ஸப்³ப³ம்பி. இமினா இமே சத்தாரோ மாஸா பரியேஸனகரணனிவாஸனாதி⁴ட்டா²னானம் சதுன்னம்பி கே²த்தந்தி த³ஸ்ஸேதி. ஏதேஸு ஹி சதூஸு மாஸேஸு அலத்³த⁴ம் பரியேஸிதும், லத்³த⁴ம் காதும், நிவாஸேதும், அதி⁴ட்டா²துஞ்ச வட்டதி.

வஸ்ஸம் உக்கட்³டீ⁴யதீதி ஸம்வச்ச²ரம் உத்³த⁴ம் கட்³டீ⁴யதி வட்³டீ⁴யதி, ஆருய்ஹதீதி அத்தோ², வஸ்ஸானஸ்ஸ பட²மமாஸம் உக்கட்³டி⁴த்வா கி³ம்ஹானம் பச்சி²மமாஸமேவ கரோந்தீதி வுத்தம் ஹோதி. வஸ்ஸூபனாயிகதி³வஸே அதி⁴ட்டா²தப்³பா³தி வஸ்ஸானதோ புப்³பே³யேவ த³ஸாஹஸ்ஸ அதிக்கந்தத்தா வஸ்ஸூபனாயிகதி³வஸேயேவ அதி⁴ட்டா²தப்³பா³. தஞ்ஹி தி³வஸம் அதிக்காமேதும் ந வட்டதி. அந்தோவஸ்ஸே பன லத்³தா⁴ சேவ நிட்டி²தா ச தஸ்மிம்யேவ அந்தோவஸ்ஸே லத்³த⁴தி³வஸதோ பட்டா²ய த³ஸாஹம் நாதிக்காமேதப்³பா³, த³ஸாஹாதிக்கமே நிட்டி²தா பன தத³ஹேவ அதி⁴ட்டா²தப்³பா³. த³ஸாஹே அப்பஹோந்தே சீவரகாலம் நாதிக்காமேதப்³பா³. அயம் தாவ கதாய பரிஹாரோ. அகதாய பன கோ பரிஹாரோதி ஆஹ ‘‘ஸசே’’திஆதி³. ஏகாஹம்பி ந லப⁴தி இதோ அஞ்ஞஸ்ஸ பரிஹாரஸ்ஸாபா⁴வதோதி அதி⁴ப்பாயோ.

ஸோ குதோ ஹோதீதி ஆஹ ‘‘யாவ ஹேமந்தஸ்ஸ பட²மதி³வஸோ’’தி, ஜேட்ட²மூலபுண்ணமாஸிதோ பட்டா²ய யாவ கத்திகபுண்ணமாஸியா பச்சி²மபாடிபத³தி³வஸோ, தாவாதி அத்தோ². ஏதேஸு ஸத்தஸு பிட்டி²ஸமயமாஸேஸூதி படிலோமக்கமேன வுத்தேஸு கத்திகபுண்ணமாஸியா பச்சி²மபாடிபதா³தீ³ஸு ஜேட்ட²மூலபுண்ணமாஸாவஸானேஸு ஏதேஸு ஸத்தஸு பிட்டி²ஸமயனாமகேஸு மாஸேஸு. ஸதுப்பாத³கரணேனாதி ‘‘காலோ வஸ்ஸிகஸாடிகாயா’’திஆதி³னா நயேன ஸதுப்பாத³கரணேன. விஞ்ஞாபேந்தஸ்ஸாதி ‘‘தே³த² மே வஸ்ஸிகஸாடிகசீவர’’ந்திஆதி³னா (பாரா. 628) நயேன விஞ்ஞத்திம் கரோந்தஸ்ஸ. தேன ஸிக்கா²பதே³ன அனாபத்தீதி அஞ்ஞாதகவிஞ்ஞத்திஸிக்கா²பதே³ன அனாபத்தி, இமினா பன ஸிக்கா²பதே³ன ஆபத்தியேவ அஸமயத்தா. வுத்தஞ்ஹேதம் ப⁴த³ந்தபு³த்³த⁴த³த்தாசரியேன –

‘‘கத்வா பன ஸதுப்பாத³ம், வஸ்ஸஸாடிகசீவரம்;

நிப்பா²தே³ந்தஸ்ஸ பி⁴க்கு²ஸ்ஸ, ஸமயே பிட்டி²ஸம்மதே.

‘‘ஹோதி நிஸ்ஸக்³கி³யாபத்தி, ஞாதகாஞ்ஞாதகாதி³னோ;

தேஸுயேவ ச விஞ்ஞத்திம், கத்வா நிப்பா²த³னே ததா²’’தி.

ஏத்த² ச ‘‘இத³ம் மே, ப⁴ந்தே, வஸ்ஸிகஸாடிகசீவரம் அதிரேகமாஸே ஸேஸே கி³ம்ஹானே பரியிட்ட²ம் அதிரேகத்³த⁴மாஸே ஸேஸே கி³ம்ஹானே கத்வா பரித³ஹிதம் நிஸ்ஸக்³கி³ய’’ந்தி இமினா (பாரா. 628) நயேன நிஸ்ஸஜ்ஜனவிதா⁴னம் வேதி³தப்³ப³ம்.

வஸ்ஸிகஸாடிகபரியேஸனவத்து²ஸ்மிந்தி படிகச்சேவ வஸ்ஸிகஸாடிகபரியேஸனவத்து²ஸ்மிம். திகபாசித்தியந்தி அதிரேகமாஸத்³த⁴மாஸேஸு அதிரேகஸஞ்ஞிவேமதிகஊனகஸஞ்ஞீனம் பரியேஸனனிவாஸனவஸேன தீணி பாசித்தியானி, ஏகஸேஸனித்³தே³ஸோ சாயம், ஸாமஞ்ஞனித்³தே³ஸோ வா. ஊனகமாஸத்³த⁴மாஸேஸூதி ஊனகமாஸே சேவ ஊனகத்³த⁴மாஸே ச. அதிரேகஸஞ்ஞினோ, வேமதிகஸ்ஸ வா து³க்கடந்தி ஏத்த² ‘‘பரியேஸனனிவாஸனம் கரோந்தஸ்ஸா’’தி பாட²ஸேஸோ. இத³ம் வுத்தம் ஹோதி – ‘‘ஊனகமாஸே ஸேஸே கி³ம்ஹானே அதிரேகஸஞ்ஞினோ, வேமதிகஸ்ஸ வா பரியேஸந்தஸ்ஸ து³க்கடம், ஊனகத்³த⁴மாஸே ஸேஸே கி³ம்ஹானே ச அதிரேகஸஞ்ஞினோ, வேமதிகஸ்ஸ வா நிவாஸேந்தஸ்ஸ து³க்கட’’ந்தி. ‘‘ததா²’’தி இமினா து³க்கடம் அதிதி³ஸதி, தஞ்ச து³க்கடம் உத³கபு²ஸிதக³ணனாய அகத்வா ந்ஹானபரியோஸானவஸேன பயோகே³ பயோகே³ காரேதப்³ப³ம், தஞ்ச கோ² விவடங்க³ணே ஆகாஸதோ பதிதஉத³கேனேவ ந்ஹாயந்தஸ்ஸ, ந ந்ஹானகோட்ட²கவாபிஆதீ³ஸு க⁴டேஹி ஆஸித்தூத³கேன ந்ஹாயந்தஸ்ஸ. தேனேவாஹ ‘‘ஸதியா வஸ்ஸிகஸாடிகாயா’’திஆதி³. போக்க²ரணியாதீ³ஸு பன நக்³க³ஸ்ஸ ந்ஹாயந்தஸ்ஸ அனாபத்தீதி ஸம்ப³ந்தோ⁴, போக்க²ரணியாதீ³ஸு பன ஸதியாபி வஸ்ஸிகஸாடிகாய நக்³க³ஸ்ஸ ந்ஹாயந்தஸ்ஸ நத்தி² து³க்கடாபத்தீதி அத்தோ².

ஏவம் அந்தராபத்தியா அனாபத்திம் த³ஸ்ஸேத்வா இதா³னி நிஸ்ஸக்³கி³யேன அனாபத்திம் த³ஸ்ஸேதும் ‘‘அச்சி²ன்னசீவரஸ்ஸா’’திஆதி³ வுத்தம். தத்த² அச்சி²ன்னசீவரஸ்ஸாதி அச்சி²ன்னஸேஸசீவரஸ்ஸ. தஸ்ஸாபி அஸமயே நிவாஸதோ அனாபத்தி. ஏஸ நயோ நட்ட²சீவரஸ்ஸ வாதி ஏத்தா²பி. யதா² சேத்த² நிவாஸேந்தானம் தேஸம் அனாபத்தி, ஏவம் தத்த² பரியேஸந்தானம்பீதி த³ட்ட²ப்³ப³ம். ஏத்த² பன மஹக்³க⁴வஸ்ஸிகஸாடிகம் ட²பேத்வா ந்ஹாயந்தஸ்ஸ சோரூபத்³த³வோ ஆபதா³ நாமாதி ஆஹ ‘‘அனிவத்த²’’ந்திஆதி³. ஆபதா³ஸு வா நிவாஸயதோதி ஆபதா³ஸு விஜ்ஜமானாஸு அஸமயே நிவாஸேந்தஸ்ஸ. யம் பன ஸமந்தபாஸாதி³காயம் ‘‘அச்சி²ன்னசீவரஸ்ஸாதி ஏதம் வஸ்ஸிகஸாடிகம்யேவ ஸந்தா⁴ய வுத்தம். தேஸஞ்ஹி நக்³கா³னம் காயோவஸ்ஸாபனே அனாபத்தி. ஏத்த² ச மஹக்³க⁴வஸ்ஸிகஸாடிகம் நிவாஸேத்வா ந்ஹாயந்தஸ்ஸ சோரூபத்³த³வோ ஆபதா³ நாமா’’தி அச்சி²ன்னசீவராதி³னோ நிஸ்ஸக்³கி³யேன அனாபத்திம் அத³ஸ்ஸேத்வா நக்³க³ஸ்ஸ ந்ஹாயதோ து³க்கடேனேவ அனாபத்தித³ஸ்ஸனம், தம் யுத்தம் விய ந தி³ஸ்ஸதி. ஸப்³ப³ஸிக்கா²பதே³ஸு ஹி மூலாபத்தியா ஏவ ஆபத்திப்பஸங்கே³ அனாபத்தித³ஸ்ஸனத்த²ம் அனாபத்திவாரோ ஆரபீ⁴யதி, ந அந்தராபத்தியாதி, தஸ்மா உபபரிக்கி²தப்³ப³ம். ஸசீவரதாதி அந்தரவாஸகஉத்தராஸங்கே³ஹி ஸசீவரதா.

வஸ்ஸிகஸாடிகஸிக்கா²பத³வண்ணனா நிட்டி²தா.

5. சீவரஅச்சி²ந்த³னஸிக்கா²பத³வண்ணனா

‘‘த³த்வா’’தி யம் கிஞ்சி பச்சாஸீஸமானஸ்ஸேவ தா³னமிஹ அதி⁴ப்பேதம், ந நிஸ்ஸட்ட²தா³னந்தி ஆஹ ‘‘வேய்யாவச்சாதீ³னீ’’திஆதி³. ஸகஸஞ்ஞாயாதி ‘‘ஸக’’ந்தி ஸஞ்ஞாய. இமினா பாராஜிகாபா⁴வம் த³ஸ்ஸேதி. சஜித்வா தி³ன்னம்பி ஹி ஸகஸஞ்ஞாய க³ண்ஹதோ நத்தி² பாராஜிகம். அச்சி²ந்த³ந்தஸ்ஸாதி ஏகதோ அப³த்³தா⁴னி, விஸும் ட²பிதானி ச ப³ஹூனி அச்சி²ந்த³தோ, ‘‘ஸங்கா⁴டிம் ஆஹர, உத்தராஸங்க³ம் ஆஹரா’’தி ஏவம் ஆஹராபயதோ ச. தேனாஹ ‘‘வத்து²க³ணனாய ஆபத்தியோ’’தி. ‘‘மயா தி³ன்னானி ஸப்³பா³னி ஆஹரா’’தி வத³தோபி ஏகவசனேனேவ ஸம்ப³ஹுலா ஆபத்தியோ. ஏகம் சீவரம் பன ஏகாப³த்³தா⁴னி ச ப³ஹூனி அச்சி²ந்த³தோ ஏகா ஆபத்தி. ‘‘அச்சி²ந்தா³’’தி ஆணத்தியா து³க்கடந்தி ‘‘மயா தி³ன்னானி ஸப்³பா³னி க³ண்ஹா’’தி ஆணத்தியா ஏகம் து³க்கடம், அச்சி²ன்னேஸு பன ஏகவசனேனேவ ஸம்ப³ஹுலா பாசித்தியோ. தேனாஹ ‘‘அச்சி²ன்னேஸு வத்து²க³ணனாய ஆபத்தியோ’’தி. அச்சி²ன்னேஸூதி தேனாணத்தேன அச்சி²ன்னேஸு சீவரேஸு. யத்த² பன போத்த²கேஸு ‘‘அச்சி²ன்னேஸு யத்தகானி ஆணத்தானி, தேஸம் க³ணனாய ஆபத்தியோ’’தி பாடோ², தத்த² யத்தகானி ஆணத்தானீதி யத்தகானி சீவரானி க³ண்ஹிதும் ஆணத்தானீதி அத்தோ². யம் பன ஸமந்தபாஸாதி³காயம் ‘‘சீவரம் ‘க³ண்ஹா’தி ஆணாபேதி, ஏகம் து³க்கடம். ஆணத்தோ ப³ஹூனி க³ண்ஹாதி, ஏகம் பாசித்திய’’ந்தி (பாரா. அட்ட². 2.633) வுத்தம், தம் ஏகாப³த்³த⁴ம் ஸந்தா⁴ய. ஏவஞ்ச கத்வா ஸமந்தபாஸாதி³காய ஸத்³தி⁴ம் இமாய அட்ட²கதா²ய ந கோசி விரோதோ⁴. ஸசே பன ‘‘ஸங்கா⁴டிம் க³ண்ஹ, உத்தராஸங்க³ம் க³ண்ஹா’’தி ஆணாபேதி, வாசாய வாசாய து³க்கடம். அச்சி²ன்னேஸு வத்து²க³ணனாய ஆபத்தியோ. ஏத்த² ச ‘‘இத³ம் மே, ப⁴ந்தே, சீவரம் பி⁴க்கு²ஸ்ஸ ஸாமம் த³த்வா அச்சி²ன்னம் நிஸ்ஸக்³கி³ய’’ந்தி (பாரா. 633) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம்.

திகபாசித்தியந்தி உபஸம்பன்னே உபஸம்பன்னஸஞ்ஞிவேமதிகஅனுபஸம்பன்னஸஞ்ஞீனம் வஸேன தீணி பாசித்தியானி. அஞ்ஞம் பரிக்கா²ரந்தி பத்தாதி³ம் அஞ்ஞம் பரிக்கா²ரம், அந்தமஸோ ஸூசிம்பீதி அத்தோ². ந கேவலம் அனுபஸம்பன்னஸ்ஸ சீவரம்யேவ அச்சி²ந்த³தோ து³க்கடந்தி ஆஹ ‘‘அனுபஸம்பன்னஸ்ஸ சா’’திஆதி³. தத்த² யம் கிஞ்சீதி சீவரம் வா ஹோது, பத்தாதி³, யம் கிஞ்சி பரிக்கா²ரம் வா. தஸ்ஸ விஸ்ஸாஸம் க³ண்ஹந்தஸ்ஸாதி யஸ்ஸ தி³ன்னம், தஸ்ஸ விஸ்ஸாஸேன க³ண்ஹந்தஸ்ஸ, ததியத்தே² சேதம் உபயோக³வசனம். உபஸம்பன்னதாதி அச்சி²ந்த³னஸமயே உபஸம்பன்னபா⁴வோ. கிஞ்சாபி உபஸம்பன்னபா⁴வோ பாளியம், மாதிகட்ட²கதா²யஞ்ச தா³னக்³க³ஹணேஸு தி³ஸ்ஸதி, ததா²பி அனுபஸம்பன்னகாலே சீவரம் த³த்வா உபஸம்பன்னகாலே அச்சி²ந்த³ந்தஸ்ஸ ஆபத்திதோ அச்சி²ந்த³னகாலேயேவ உபஸம்பன்னதா அங்க³ந்தி வேதி³தப்³ப³ம்.

சீவரஅச்சி²ந்த³னஸிக்கா²பத³வண்ணனா நிட்டி²தா.

6. ஸுத்தவிஞ்ஞத்திஸிக்கா²பத³வண்ணனா

ச²ப்³பி³த⁴ம் கோ²மஸுத்தாதி³ந்தி ‘‘ஸுத்தம் நாம ச² ஸுத்தானி கோ²மம் கப்பாஸிகம் கோஸேய்யம் கம்ப³லம் ஸாணம் ப⁴ங்க³’’ந்தி (பாரா. 638) ஏவம் வுத்தம் ச²ப்³பி³த⁴ம் கோ²மஸுத்தாதி³ம். தத்த² கோ²மந்தி (பாரா. அட்ட². 2.636-38) கோ²மவாகேஹி கதஸுத்தம். கப்பாஸிகந்தி கப்பாஸதோ நிப்³ப³த்தம். கோஸேய்யந்தி கோஸியம்ஸூஹி கந்தித்வா கதஸுத்தம். கம்ப³லந்தி ஏளகலோமஸுத்தம். ஸாணந்தி ஸாணவாகேன கதஸுத்தம். ப⁴ங்க³ந்தி பாடேக்கம் வாகஸுத்தமேவாதி ஏகே. பஞ்சஹிபி மிஸ்ஸேத்வா கதஸுத்தம் பன ‘‘ப⁴ங்க³’’ந்தி வேதி³தப்³ப³ம். தேஸம் அனுலோமந்தி தேஸம் கோ²மாதீ³னம் அனுலோமம் து³கூலம் பத்துண்ணம் ஸோமாரபட்டம் சீனபட்டம் இத்³தி⁴ஜம் தே³வதி³ன்னந்தி ச²ப்³பி³த⁴ம் ஸுத்தம்.

துரீதி வாயனூபகரணோ ஏகோ த³ண்டோ³, வீதவீதட்டா²னம் யத்த² ஸம்ஹரித்வா ட²பேந்தி. வேமந்தி வாயனூபகரணோ ஏகோ த³ண்டோ³, ஸுத்தம் பவேஸேத்வா யேன ஆகோடேந்தோ க⁴னபா⁴வம் ஸம்பாதே³ந்தி. தஸ்ஸ ஸப்³ப³ப்பயோகே³ஸு து³க்கடந்தி தந்தவாயஸ்ஸ யே தே துரிவேமஸஜ்ஜனாதி³கா பயோகா³, தேஸு ஸப்³பே³ஸு பயோகே³ஸு பி⁴க்கு²ஸ்ஸ து³க்கடம், தஸ்ஸ தந்தவாயஸ்ஸ பயோகே³ பயோகே³ பி⁴க்கு²ஸ்ஸ து³க்கடந்தி வுத்தம் ஹோதி. துரிஆதீ³னம் அபா⁴வே தேஸம் கரணத்த²ம் வாஸிப²ரஸுஆதீ³னம் மக்³க³னனிஸானருக்க²ச்சே²த³னாதி³ஸப்³ப³ப்பயோகே³பி ஏஸேவ நயோ. தந்தூனம் அத்தனோ ஸந்தகத்தா வீதவீதட்டா²னம் படிலத்³த⁴மேவ ஹோதீதி ஆஹ ‘‘படிலாபே⁴ன நிஸ்ஸக்³கி³யம் ஹோதீ’’தி, விகப்பனுபக³பச்சி²மசீவரப்பமாணே வீதே நிஸ்ஸக்³கி³யம் ஹோதீதி வுத்தம் ஹோதி. தேனேவ வக்க²தி ‘‘தீ³க⁴தோ வித³த்தி²மத்தே, திரியஞ்ச ஹத்த²மத்தே வீதே நிஸ்ஸக்³கி³யம் பாசித்திய’’ந்தி. ஏத்த² ச ‘‘இத³ம் மே, ப⁴ந்தே, சீவரம் ஸாமம் ஸுத்தம் விஞ்ஞாபேத்வா தந்தவாயேஹி வாயாபிதம் நிஸ்ஸக்³கி³ய’’ந்தி இமினா நயேன நிஸ்ஸஜ்ஜனவிதா⁴னம் வேதி³தப்³ப³ம்.

தேனேவாதி விஞ்ஞாபிததந்தவாயேனேவ. ஏவம் இத⁴ து³க்கடந்தி இதா⁴பி தந்தவாயேனேவ தீ³க⁴தோ வித³த்தி²மத்தே, திரியம் ஹத்த²மத்தே வீதே து³க்கடந்தி அத்தோ². அகப்பியஸுத்தமயேதி விஞ்ஞாபிதஸுத்தமயே. இதரஸ்மிந்தி அவிஞ்ஞத்திஸுத்தமயே பரிச்சே²தே³. ததோ சே ஊனதராதி வுத்தப்பமாணதோ சே ஊனதரா, அந்தமஸோ (பாரா. அட்ட². 2.636-638) அச்சி²மண்ட³லப்பமாணாபீதி அதி⁴ப்பாயோ. கப்பியதந்தவாயேனபி அகப்பியஸுத்தம் வாயாபேந்தஸ்ஸ யதா² புப்³பே³ நிஸ்ஸக்³கி³யம், ஏவமித⁴ து³க்கடம். தேனேவ கப்பியஞ்ச அகப்பியஞ்ச ஸுத்தம் வாயாபேந்தஸ்ஸ ஸசே பச்சி²மசீவரப்பமாணா வா ஊனகா வா அகப்பியஸுத்தபரிச்சே²தா³ ஹோந்தி, தேஸு பரிச்சே²த³க³ணனாய து³க்கடம். கப்பியஸுத்தபரிச்சே²தே³ஸு அனாபத்தி. அத² ஏகந்தரிகேன வா ஸுத்தேன, தீ³க⁴தோ வா கப்பியம் திரியம் அகப்பியம் கத்வா வீதம் ஹோதி, பமாணயுத்தே பரிச்சே²தே³ பரிச்சே²தே³ து³க்கடம்.

யதி³ பன (பாரா. அட்ட². 2.636-638) த்³வே தந்தவாயா ஹோந்தி ஏகோ கப்பியோ ஏகோ அகப்பியோ, ஸுத்தஞ்ச அகப்பியம், தே சே வாரேன வினந்தி, அகப்பியதந்தவாயேன வீதே பமாணயுத்தே பரிச்சே²தே³ பரிச்சே²தே³ பாசித்தியம், ஊனதரே து³க்கடம். இதரேன வீதே உப⁴யத்த² து³க்கடம். ஸசே த்³வேபி வேமம் க³ஹேத்வா ஏகதோ வினந்தி, பமாணயுத்தே பரிச்சே²தே³ பரிச்சே²தே³ பாசித்தியம். அத² ஸுத்தம் கப்பியம், சீவரஞ்ச கேதா³ரப³த்³தா⁴தீ³ஹி ஸபரிச்சே²த³ம், அகப்பியதந்தவாயேன வீதே பரிச்சே²தே³ பரிச்சே²தே³ து³க்கடம், இதரேன வீதே அனாபத்தி. ஸசே த்³வேபி ஏகதோ வினந்தி, பமாணயுத்தே பரிச்சே²தே³ பரிச்சே²தே³ து³க்கடம். அத² ஸுத்தம்பி கப்பியஞ்ச அகப்பியஞ்ச, தே சே வாரேன வினந்தி, அகப்பியதந்தவாயேன அகப்பியஸுத்தமயேஸு பச்சி²மசீவரப்பமாணேஸு பரிச்சே²தே³ஸு வீதேஸு பரிச்சே²த³க³ணனாய பாசித்தியம், ஊனதரேஸு கப்பியஸுத்தமயேஸு ச து³க்கடம். கப்பியதந்தவாயேன அகப்பியஸுத்தமயேஸு பமாணயுத்தேஸு வா ஊனகேஸு வா து³க்கடமேவ, கப்பியஸுத்தமயேஸு அனாபத்தி.

அத² ஏகந்தரிகேன வா ஸுத்தேன, தீ³க⁴தோ வா அகப்பியம் திரியம் அகப்பியம் கத்வா வினந்தி, உபோ⁴பி வா தே வேமம் க³ஹேத்வா ஏகதோ வினந்தி, அபரிச்சே²தே³ சீவரே பமாணயுத்தே பரிச்சே²தே³ பரிச்சே²தே³ து³க்கடம், ஸபரிச்சே²தே³ பரிச்சே²த³வஸேன து³க்கடானி. தேனாஹ ‘‘ஏதேனேவ உபாயேனா’’திஆதி³.

ஏத்த² ச தந்தவாயோ தாவ அஞ்ஞாதகஅப்பவாரிததோ விஞ்ஞத்தியா லத்³தோ⁴ அகப்பியோ, ஸேஸோ கப்பியோ. ஸுத்தம்பி ஸாமம் விஞ்ஞாபிதம் அகப்பியம், ஸேஸம், ஞாதகாதி³வஸேன உப்பன்னஞ்ச கப்பியந்தி வேதி³தப்³ப³ம். திகபாசித்தியந்தி வாயாபிதே வாயாபிதஸஞ்ஞிவேமதிகஅவாயாபிதஸஞ்ஞீனம் வஸேன தீணி பாசித்தியானி. சீவரத்தா²ய விஞ்ஞாபிதஸுத்தந்தி ஸாமம் வா அஞ்ஞேன வா சீவரத்தா²ய விஞ்ஞாபிதஸுத்தம். கிஞ்சாபி பாளியம் ‘‘ஸாமம் ஸுத்தம் விஞ்ஞாபேத்வா’’தி வுத்தம், ததா²பி இத⁴ ‘‘சீவரத்தா²ய ஸாமம் விஞ்ஞாபிதஸுத்த’’ந்தி அவத்வா கேவலம் ‘‘சீவரத்தா²ய விஞ்ஞாபிதஸுத்த’’ந்தி அங்கே³ஸு வுத்தத்தா அஞ்ஞேன சீவரத்தா²ய விஞ்ஞாபிதஸுத்தம்பி ஸங்க³ஹம் க³ச்ச²தீதி வேதி³தப்³ப³ம். அகப்பியவிஞ்ஞத்தியாதி ‘‘சீவரம் மே, ஆவுஸோ, வாயதா²’’தி ஏவம்பூ⁴தாய அகப்பியவிஞ்ஞத்தியா.

ஸுத்தவிஞ்ஞத்திஸிக்கா²பத³வண்ணனா நிட்டி²தா.

7. மஹாபேஸகாரஸிக்கா²பத³வண்ணனா

சீவரஸாமிகேஹி புப்³பே³ அப்பவாரிதோ ஹுத்வாதி ‘‘கீதி³ஸேன தே, ப⁴ந்தே, சீவரேன அத்தோ², கீதி³ஸம் தே சீவரம் வாயாபேமி, வத³, ப⁴ந்தே, யதி³ச்ச²ஸீ’’தி சீவரஸாமிகேஹி புப்³பே³ அவுத்தோ ஹுத்வா. ஏத்த² ச ஆயதாதீ³ஹி தீஹி ஸுத்தவட்³ட⁴னாகாரேன ஸஹ வாயனாகாரம் த³ஸ்ஸேதி, ஸுவீதாதீ³ஹி சதூஹி வாயனாகாரமேவ. ‘‘கிஞ்சிமத்தம் அனுபத³ஜ்ஜேய்யாமா’’திஆதி³ தஸ்ஸ கத்தப்³பா³காரமத்தத³ஸ்ஸனம், ந பன அங்க³த³ஸ்ஸனம் ஸுத்தவட்³ட⁴னவஸேனேவ ஆபஜ்ஜிதப்³ப³த்தாதி ஆஹ ‘‘ந பி⁴க்கு²னோ பிண்ட³பாததா³னமத்தேனா’’திஆதி³. ஏத்த² ச ‘‘இத³ம் மே, ப⁴ந்தே, சீவரம் புப்³பே³ அப்பவாரிதேன அஞ்ஞாதகஸ்ஸ க³ஹபதிகஸ்ஸ தந்தவாயே உபஸங்கமித்வா சீவரே விகப்பம் ஆபன்னம் நிஸ்ஸக்³கி³ய’’ந்தி (பாரா. 643) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம். திகபாசித்தியந்தி அஞ்ஞாதகே அஞ்ஞாதகஸஞ்ஞிவேமதிகஞாதகஸஞ்ஞீனம் வஸேன தீணி பாசித்தியானி.

மஹாபேஸகாரஸிக்கா²பத³வண்ணனா நிட்டி²தா.

8. அச்சேகசீவரஸிக்கா²பத³வண்ணனா

பட²மபத³ஸ்ஸாதி ‘‘த³ஸாஹானாக³த’’ந்தி பத³ஸ்ஸ. புரிமனயேனேவாதி அச்சந்தஸம்யோக³வஸேனேவ. தானி தி³வஸானீதி தேஸு தி³வஸேஸு. அச்சந்தமேவாதி நிரந்தரமேவ, தேஸு த³ஸாஹேஸு யத்த² கத்த²சி தி³வஸேதி வுத்தம் ஹோதி. பவாரணாமாஸஸ்ஸாதி புப்³ப³கத்திகமாஸஸ்ஸ. ஸோ ஹி இத⁴ பட²மபவாரணாயோக³தோ ‘‘பவாரணாமாஸோ’’தி வுத்தோ. ஜுண்ஹபக்க²பஞ்சமிதோ பட்டா²யாதி ஸுக்கபக்க²பஞ்சமிம் ஆதி³ம் கத்வா. பவாரணாமாஸஸ்ஸ ஜுண்ஹபக்க²பஞ்சமிதோதி வா பவாரணாமாஸஸ்ஸ பகாஸனதோ புரிமஸ்ஸ ஜுண்ஹபக்க²ஸ்ஸ பஞ்சமிதோ பட்டா²யாதி அத்தோ². யோ பனேத்த² ‘‘காமஞ்சேஸ (ஸாரத்த². டீ. 2.650) ‘த³ஸாஹபரமம் அதிரேகசீவரம் தா⁴ரேதப்³ப³’ந்தி (பாரா. 463) இமினாவ ஸித்³தோ⁴, அட்டு²ப்பத்திவஸேன பன அபுப்³ப³ம் விய அத்த²ம் த³ஸ்ஸேத்வா ஸிக்கா²பத³ம் ட²பித’’ந்தி பாடோ² தி³ஸ்ஸதி, ஸோ பமாத³பாடோ² ‘‘த³ஸாஹானாக³த’’ந்தி இமினா விரோத⁴தோதி த³ட்ட²ப்³ப³ம். கிஞ்ச ‘‘ஜுண்ஹபக்க²பஞ்சமிதோ பட்டா²யா’’தி வுத்தத்தா அட்ட²கதா²யேவ புப்³பா³பரவிரோதோ⁴பி ஸியா.

அச்சேகசீவரந்தி அச்சாயிகசீவரம் வுச்சதி, ஸோ ச அச்சாயிகபா⁴வோ தா³யகஸ்ஸ க³மிகாதி³பா⁴வேனாதி த³ஸ்ஸேதும் ‘‘க³மிககி³லானக³ப்³பி⁴னிஅபி⁴னவுப்பன்னஸத்³தா⁴னம் புக்³க³லான’’ந்திஆதி³ வுத்தம். தத்த² க³மிகோ நாம ‘‘ஸேனாய வா க³ந்துகாமோ ஹோதி, பவாஸம் வா க³ந்துகாமோ ஹோதீ’’தி (பாரா. 649) வுத்தோ. அஞ்ஞதரேன ‘‘வஸ்ஸாவாஸிகம் த³ஸ்ஸாமீ’’தி ஏவம் ஆரோசேத்வா தி³ன்னந்தி க³மிகாதீ³னம் அஞ்ஞதரேன க³மனாதீ³ஹி காரணேஹி தா³துகாமேன தூ³தம் வா பேஸேத்வா, ஸயம் வா ஆக³ந்த்வா ‘‘வஸ்ஸாவாஸிகம் த³ஸ்ஸாமீ’’தி ஏவம் ஆரோசேத்வா தி³ன்னம் சீவரம். ஏத்த² ச ‘‘இத³ம் மே, ப⁴ந்தே, அச்சேகசீவரம் சீவரகாலஸமயம் அதிக்காமிதம் நிஸ்ஸக்³கி³ய’’ந்தி (பாரா. 649) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம்.

ஸேஸந்தி ‘‘ஸாதா⁴ரணபஞ்ஞத்தீ’’திஆதி³கம். அயம் பன விஸேஸோ – தத்த² அதிரேகசீவரே அதிரேகசீவரஸஞ்ஞிஆதி³னோ த³ஸாஹாதிக்கமோ, இத⁴ அச்சேகசீவரே அச்சேகசீவரஸஞ்ஞிஆதி³னோ சீவரகாலாதிக்கமோ. ததா² அனச்சேகசீவரே அச்சேகசீவரஸஞ்ஞினோ, வேமதிகஸ்ஸ ச து³க்கடம். ஜாதிப்பமாணஸம்பன்னஸ்ஸ அச்சேகசீவரஸ்ஸ அத்தனோ ஸந்தகதா, த³ஸாஹானாக³தாய கத்திகதேமாஸிகபுண்ணமாய உப்பன்னபா⁴வோ, அனதி⁴ட்டி²தஅவிகப்பிததா, சீவரகாலாதிக்கமோதி சதுரங்க³பா⁴வோவ ஏத்த² விஸேஸோ.

அச்சேகசீவரஸிக்கா²பத³வண்ணனா நிட்டி²தா.

9. ஸாஸங்கஸிக்கா²பத³வண்ணனா

உபஸம்பஜ்ஜந்திஆதீ³ஸு வியாதி ‘‘பட²மம் ஜா²னம் உபஸம்பஜ்ஜ விஹரதீ’’தி (விப⁴. 508) இமஸ்ஸ விப⁴ங்கே³ ‘‘உபஸம்பஜ்ஜா’’தி உத்³த⁴ரிதப்³பே³ ‘‘உபஸம்பஜ்ஜ’’ந்தி உத்³த⁴டம். ததி³ஹ நித³ஸ்ஸனம் கதம். ஆதி³ஸத்³தே³ன பன ‘‘அனாபுச்ச²ம் வா க³ச்சே²ய்யா’’திஆதீ³னம் (பாசி. 111, 115) ஸங்க³ஹோ த³ட்ட²ப்³போ³. உபக³ந்த்வாதி உபஸத்³த³ஸ்ஸத்த²மாஹ. வஸித்வாதி அக்க²ண்ட³ம் வஸித்வா. ‘‘யேன யஸ்ஸ ஹி ஸம்ப³ந்தோ⁴, தூ³ரட்ட²ம்பி ச தஸ்ஸ த’’ந்தி வசனதோ ‘‘இமஸ்ஸ…பே… இமினா ஸம்ப³ந்தோ⁴’’தி வுத்தம். தத்த² இமஸ்ஸாதி ‘‘உபவஸ்ஸ’’ந்தி பத³ஸ்ஸ. வினயபரியாயேன அரஞ்ஞலக்க²ணம் அதி³ன்னாதா³னபாராஜிகே ஆக³தம். தத்த² ஹி ‘‘கா³மா வா அரஞ்ஞா வா’’தி அனவஸேஸதோ அவஹாரட்டா²னபரிக்³க³ஹேன தது³ப⁴யம் அஸங்கரதோ த³ஸ்ஸேதும் ‘‘ட²பேத்வா கா³மஞ்சா’’திஆதி³ வுத்தம். கா³மூபசாரோ ஹி லோகே கா³மஸங்க²மேவ க³ச்ச²தீதி. இத⁴ பன ஸுத்தந்தபரியாயேன ‘‘பஞ்சத⁴னுஸதிகம் பச்சி²ம’’ந்தி (பாரா. 654) ஆக³தம் ஆரஞ்ஞகம் பி⁴க்கு²ம் ஸந்தா⁴ய. ந ஹி ஸோ வினயபரியாயிகே அரஞ்ஞே வஸந்தோ ‘‘ஆரஞ்ஞகோ பந்த²ஸேனாஸனோ’’தி (ம. நி. 1.61) ஸுத்தே வுத்தோ, தஸ்மா தத்த² ஆக³தமேவ லக்க²ணம் க³ஹேதப்³ப³ந்தி த³ஸ்ஸேந்தோ ‘‘ஸப்³ப³பச்சி²மானி ஆரோபிதேன ஆசரியத⁴னுனா’’திஆதி³மாஹ. தத்த² ‘‘ஆசரியத⁴னு நாம பகதிஹத்தே²ன நவவித³த்தி²பமாணம். ஜியாய பன ஆரோபிதாய சதுஹத்த²பமாண’’ந்தி வத³ந்தி. கா³மஸ்ஸாதி பரிக்கி²த்தஸ்ஸ கா³மஸ்ஸ. இந்த³கீ²லதோதி உம்மாரதோ. பரிக்கே²பாரஹட்டா²னதோதி பரியந்தே டி²தக⁴ரஸ்ஸ உபசாரே டி²தஸ்ஸ மஜ்ஜி²மஸ்ஸ புரிஸஸ்ஸ பட²மலேட்³டு³பாததோ. கித்தகேன மக்³கே³ன மினிதப்³ப³ந்தி ஆஹ ‘‘ஸசே’’திஆதி³. மஜ்ஜி²மட்ட²கதா²யம் பன ‘‘விஹாரஸ்ஸாபி கா³மஸ்ஸேவ உபசாரம் நீஹரித்வா உபி⁴ன்னம் லேட்³டு³பாதானம் அந்தரா மினிதப்³ப³’’ந்தி வுத்தம். சோரானம் நிவிட்டோ²காஸாதி³த³ஸ்ஸனேனாதி ஆராமே, ஆராமூபசாரே ச சோரானம் நிவிட்டோ²காஸாதி³த³ஸ்ஸனேன காரணேன. ஆதி³ஸத்³தே³ன பு⁴த்தோகாஸட்டி²தோகாஸனிஸின்னோகாஸனிபன்னோகாஸானம் க³ஹணம். சோரேஹி மனுஸ்ஸானம் ஹதவிலுத்தாகோடிதபா⁴வத³ஸ்ஸனதோதி ஆராமே, ஆராமூபசாரே ச ஹதவிலுத்தாகோடிதபா⁴வத³ஸ்ஸனதோ.

அந்தரக⁴ரே நிக்கி²பேய்யாதி அந்தரே அந்தரே க⁴ரானி ஏத்த², ஏதஸ்ஸாதி வா அந்தரக⁴ரம், கா³மோ, தஸ்மிம் ட²பேய்யாதி அத்தோ². தேனாஹ ‘‘ஆரஞ்ஞகஸ்ஸா’’திஆதி³. தஞ்சாதி நிக்கி²பனஞ்ச. ‘‘மஹாபவாரணாய பவாரிதோ ஹோதீ’’தி இத³ம் வஸ்ஸச்சே²த³ம் அகத்வா வுட்ட²பா⁴வம் த³ஸ்ஸேதும் வுத்தம், ந பன பவாரணாய அங்க³பா⁴வம். தேனேவ ஹி ப்³யதிரேகம் த³ஸ்ஸேந்தேன ஸமந்தபாஸாதி³காயம் (பாரா. அட்ட². 2.653-654) வுத்தம் ‘‘ஸசே பச்சி²மிகாய வா உபக³தோ ஹோதி சி²ன்னவஸ்ஸோ வா, நிக்கி²பிதும் ந லப⁴தீ’’தி. கத்திகமாஸோ நாம புப்³ப³கத்திகமாஸஸ்ஸ காளபக்க²பாடிபத³தோ பட்டா²ய யாவ அபரகத்திகபுண்ணமா, தாவ ஏகூனத்திம்ஸ ரத்திந்தி³வா. ஏவ-ஸத்³தே³ன கத்திகமாஸதோ பரம் ந லப⁴தீதி த³ஸ்ஸேதி. ஊனப்பமாணே தாவ அரஞ்ஞலக்க²ணாயோக³தோ ந லப⁴து, கஸ்மா கா³வுததோ அதிரேகப்பமாணே ந லப⁴தீதி ஆஹ ‘‘யத்ர ஹீ’’திஆதி³. நிமந்திதோ பன அத்³த⁴யோஜனம்பி யோஜனம்பி க³ந்த்வா வஸிதும் பச்சேதி, இத³மப்பமாணம். ஸாஸங்கஸப்படிப⁴யமேவ ஹோதீதி ஸாஸங்கஞ்சேவ ஸப்படிப⁴யஞ்ச ஹோதி. ஏவ-ஸத்³தே³ன அனாஸங்கஅப்படிப⁴யேஹி அங்க³யுத்தேபி ஸேனாஸனே வஸந்தோ நிக்கி²பிதும் ந லப⁴தீதி த³ஸ்ஸேதி. ஏத்தாவதா புரிமிகாய உபக³ந்த்வா அக்க²ண்ட³ம் கத்வா வுட்ட²வஸ்ஸோ யம் கா³மம் கோ³சரகா³மம் கத்வா பஞ்சத⁴னுஸதிகபச்சி²மே ஆரஞ்ஞகஸேனாஸனே விஹரதி, தஸ்மிம் கா³மே சீவரம் ட²பேத்வா ஸகலகத்திகமாஸம் தஸ்மிம்யேவ ஸேனாஸனே தேன சீவரேன வினா வத்து²ம் அனுஜானித்வா இதா³னி விஹாரதோ அஞ்ஞத்த² வஸந்தஸ்ஸ சா²ரத்தம் விப்பவாஸம் அனுஜானந்தோ ‘‘ஸியா ச தஸ்ஸ பி⁴க்கு²னோ’’திஆதி³மாஹ. அஸமாதா³னசாரஞ்ஹி அத்த²தகதி²னா ஏவ லப⁴ந்தி, நேதரேதி ஏத்த² இத³ம்பி காரணம் த³ட்ட²ப்³ப³ம். தத்த² சா²ரத்தபரமம் தேன பி⁴க்கு²னா தேன சீவரேன விப்பவஸிதப்³ப³ந்தி யோ பி⁴க்கு² விஹாரே வஸந்தோ ததோ அஞ்ஞத்த² க³மனகிச்சே ஸதி அந்தரக⁴ரே சீவரம் நிக்கி²பதி, தேன பி⁴க்கு²னா தேன சீவரேன சா²ரத்தபரமம் விப்பவஸிதப்³ப³ம், ச² ரத்தியோ தம்ஹா விஹாரா அஞ்ஞத்த² வஸிதப்³பா³தி வுத்தம் ஹோதி. வுத்தஞ்ஹி ப⁴த³ந்தேன பு³த்³த⁴த³த்தாசரியேன –

‘‘யம் கா³மம் கோ³சரம் கத்வா, பி⁴க்கு² ஆரஞ்ஞகே வஸே;

தஸ்மிம் கா³மே ட²பேதும் தம், மாஸமேகம் து வட்டதி.

‘‘அஞ்ஞத்தே²வ வஸந்தஸ்ஸ, சா²ரத்தபரமம் மதம்;

அயமஸ்ஸ அதி⁴ப்பாயோ, படிச்ச²ன்னோ பகாஸிதோ’’தி.

தேனேவாஹ ‘‘ததோ சே உத்தரி விப்பவஸேய்யாதி சா²ரத்ததோ உத்தரி தஸ்மிம் ஸேனாஸனே ஸத்தமம் அருணம் உட்டா²பேய்யா’’திஆதி³. ததா² அஸக்கோந்தேனாதி க³தட்டா²னஸ்ஸ தூ³ரதாய ஸேனாஸனம் ஆக³ந்த்வா ஸத்தமம் அருணம் உட்டா²பேதும் அஸக்கோந்தேன. ஏவம்பி அஸக்கோந்தேன தத்ரேவ டி²தேன பச்சுத்³த⁴ரிதப்³ப³ம் ‘‘அதிரேகசீவரட்டா²னே ட²ஸ்ஸதீ’’தி. வஸித்வாதி அருணம் உட்டா²பேத்வா. பி⁴க்கு²ஸம்முதி உதோ³ஸிதஸிக்கா²பதே³ வுத்தாவ.

ஸேஸந்தி ‘‘அஞ்ஞத்ர பி⁴க்கு²ஸம்முதியாதி அயமேத்த² அனுபஞ்ஞத்தீ’’திஆதி³கம். தத்த² ஹி அங்கே³ஸு யம் ரத்திவிப்பவாஸோ சதுத்த²மங்க³ம், தம் இத⁴ சா²ரத்ததோ உத்தரி விப்பவாஸோ ஹோதீதி அயமேவ விஸேஸோ.

ஸாஸங்கஸிக்கா²பத³வண்ணனா நிட்டி²தா.

10. பரிணதஸிக்கா²பத³வண்ணனா

நனு சாயம் ஸங்க⁴ஸ்ஸ பரிணதோ, ந பரிச்சத்தோ, அத² கத²ம் ஸங்க⁴ஸந்தகோ ஹோதீதி ஆஹ ‘‘ஸோ ஹீ’’திஆதி³. தத்த² ஸோதி லாபோ⁴. ஏகேன பரியாயேனாதி பரிணதபா⁴வஸங்கா²தேன ஏகேன பரியாயேன. ‘‘லபி⁴தப்³ப³’’ந்தி இமினா லாப⁴ஸத்³த³ஸ்ஸ கம்மஸாத⁴னமாஹ. சீவராதி³வத்து²ந்தி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அந்தமஸோ சுண்ணபிண்ட³ம்பி த³ந்தகட்ட²ம்பி த³ஸிகஸுத்தம்பி. பரிணதந்தி ஸங்க⁴ஸ்ஸ நின்னம் ஸங்க⁴ஸ்ஸ போணம் ஸங்க⁴ஸ்ஸ பப்³பா⁴ரம் ஹுத்வா டி²தந்தி அத்தோ². யேன பன காரணேன ஸோ பரிணதோ ஹோதி, தம் த³ஸ்ஸேத்வா தஸ்ஸ அத்த²ம் த³ஸ்ஸேதும் ‘‘த³ஸ்ஸாம கரிஸ்ஸாமா’’திஆதி³ வுத்தம். அத்தனோ பரிணாமேந்தஸ்ஸாதி ‘‘இத³ம் மய்ஹம் தே³ஹீ’’தி ஸங்க⁴ஸ்ஸ பரிணதபா⁴வம் ஞத்வா அத்தனோ பரிணாமேத்வா க³ண்ஹந்தஸ்ஸ. பயோகே³தி பரிணாமனப்பயோகே³. ஏத்த² ச ‘‘இத³ம் மே, ப⁴ந்தே, ஜானம் ஸங்கி⁴கம் லாப⁴ம் பரிணதம் அத்தனோ பரிணாமிகம் நிஸ்ஸக்³கி³ய’’ந்தி இமினா நயேன நிஸ்ஸஜ்ஜனவிதா⁴னம் வேதி³தப்³ப³ம்.

ஸங்க⁴சேதியபுக்³க³லேஸூதி ஏத்த² ச அந்தமஸோ ஸுனக²ம் உபாதா³ய யோ கோசி ஸத்தோ ‘‘புக்³க³லோ’’தி வேதி³தப்³போ³. அஞ்ஞஸங்கா⁴தீ³னந்தி அஞ்ஞஸங்க⁴சேதியபுக்³க³லானம். இத³ம் வுத்தம் ஹோதி – ‘‘ஸங்க⁴ஸ்ஸ பரிணதம் அஞ்ஞஸ்ஸ ஸங்க⁴ஸ்ஸ வா சேதியஸ்ஸ வா புக்³க³லஸ்ஸ வா, சேதியஸ்ஸ பரிணதம் அஞ்ஞஸ்ஸ சேதியஸ்ஸ வா ஸங்க⁴ஸ்ஸ வா புக்³க³லஸ்ஸ வா, புக்³க³லஸ்ஸ பரிணதம் அஞ்ஞஸ்ஸ புக்³க³லஸ்ஸ வா ஸங்க⁴ஸ்ஸ வா சேதியஸ்ஸ வா பரிணாமேந்தஸ்ஸ து³க்கட’’ந்தி.

இதா³னி அனாபத்திம் த³ஸ்ஸேதும் ‘‘அபரிணதஸஞ்ஞினோ’’திஆதி³மாஹ. பரிணதே, அபரிணதே ச அபரிணதஸஞ்ஞினோ சாதி ஸம்ப³ந்தோ⁴, பரிணதே, அபரிணதே சாதி உப⁴யத்தா²பி அனாபத்தீதி அத்தோ². வுத்தஞ்ஹேதம் ‘‘பரிணதே அபரிணதஸஞ்ஞீ அத்தனோ பரிணாமேதி, அனாபத்தி. அபரிணதே அபரிணதஸஞ்ஞீ அனாபத்தீ’’தி (பாரா. 660). தே³ய்யத⁴ம்மோதி சத்தாரோ பச்சயா. ஆதி³ஸத்³தே³ன ‘‘படிஸங்கா²ரம் வா லபே⁴ய்ய, சிரட்டி²திகோ வா அஸ்ஸ, யத்த² வா பன தும்ஹாகம் சித்தம் பஸீத³தி, தத்த² தே³தா²’’தி (பாரா. 661) வசனானம் க³ஹணம். ஸசே பன தா³யகா ‘‘மயம் ஸங்க⁴ப⁴த்தம் கத்துகாமா, சேதியபூஜம் கத்துகாமா, ஏகஸ்ஸ பி⁴க்கு²னோ பரிக்கா²ரம் தா³துகாமா, தும்ஹாகம் ருசியா த³ஸ்ஸாம. ப⁴ணத², கத்த² தே³மா’’தி (பாரா. அட்ட². 2.660) வத³ந்தி, ஏவம் வுத்தே தேன பி⁴க்கு²னா ‘‘யத்த² இச்ச²த², தத்த² தே³தா²’’தி வத்தப்³பா³.

பரிணதஸிக்கா²பத³வண்ணனா நிட்டி²தா.

பத்தவக்³கோ³ ததியோ.

இதி கங்கா²விதரணியா பாதிமோக்க²வண்ணனாய

வினயத்த²மஞ்ஜூஸாயம் லீனத்த²ப்பகாஸனியம்

நிஸ்ஸக்³கி³யவண்ணனா நிட்டி²தா.