1. சீவரவக்³கோ³

1. கதி²னஸிக்கா²பத³வண்ணனா

நிட்டி²தசீவரஸ்மிந்தி (பாரா. அட்ட². 2.462-463) நிட்டி²தஞ்ச தம் சீவரஞ்சாதி நிட்டி²தசீவரம், நிட்டி²தே ஆனிஸம்ஸமூலகே சீவரே, பச்சாஸாசீவரே சாதி அத்தோ². யஸ்மா பன தம் சீவரம் கரணேனபி நிட்டி²தம் ஹோதி நாஸனாதீ³ஹிபி, தஸ்மா ‘‘ஸூசிகம்மபரியோஸானேன வா’’திஆதி³ வுத்தம். தத்த² யம் கிஞ்சி ஸூசியா கத்தப்³ப³ம் பாஸகபட்டக³ண்டி²கபட்டபரியோஸானகம்மம், தம் ஸூசிகம்மபரியோஸானம் நாம, தேன. நட்ட²ந்தி சோராதீ³ஹி ஹடம். ஏதம்பி ஹி கரணபலிபோ³த⁴ஸ்ஸ நிட்டி²தத்தா ‘‘நிட்டி²த’’ந்தி வுச்சதி. வினட்ட²ந்தி உபசிகாதீ³ஹி கா²தி³தம். த³ட்³ட⁴ந்தி அக்³கி³னா த³ட்³ட⁴ம். சீவராஸா வா உபச்சி²ன்னாதி ‘‘அஸுகஸ்மிம் நாம குலே சீவரம் லபி⁴ஸ்ஸாமீ’’தி யா சீவராஸா உப்பன்னா ஹோதி, ஸா உபச்சி²ன்னா. ஏதேஸம்பி கரணபலிபோ³த⁴ஸ்ஸேவ நிட்டி²தத்தா நிட்டி²தபா⁴வோ வேதி³தப்³போ³. தேனாஹ ‘‘இமேஸு வா’’திஆதி³. ஏதேன சீவரபலிபோ³தா⁴பா⁴வோ வுத்தோ. தேனாஹ ‘‘சீவரஸ்ஸ கரணபலிபோ³தே⁴ உபச்சி²ன்னேதி அத்தோ²’’தி. கத²மேதம் விஞ்ஞாயதீதி ஆஹ ‘‘அத்த²தகதி²னஸ்ஸ ஹீ’’திஆதி³. பஞ்சானிஸம்ஸே அஞ்ஞத்த² க³ந்தும் அத³த்வா ஸங்க³ண்ஹனட்டே²ன கதி²னம், தி²ரந்தி அத்தோ², அத்த²தம் கதி²னம் யேன ஸோ அத்த²தகதி²னோ, தஸ்ஸ அத்த²தகதி²னஸ்ஸ. ஹீதி காரணத்தே² நிபாதோ. தாவ கதி²னானிஸம்ஸம் லப⁴தீதி ஏத்த² யோ அத்த²தகதி²னோ பி⁴க்கூ²தி அஜ்ஜா²ஹரிதப்³ப³ம், தாவ ஸோ அத்த²தகதி²னோ பி⁴க்கூ²தி வேதி³தப்³போ³, அனாமந்தசாராதி³கம் கதி²னானிஸம்ஸம் லப⁴தீதி அத்தோ². ‘‘அத்த²தகதி²னஸ்ஸ பி⁴க்கு²னோ’’தி இத³ம் வா ‘‘அத்த²தகதி²னோ பி⁴க்கூ²’’தி விப⁴த்திவிபரிணாமம் கத்வா யோஜேதப்³ப³ம். இத³ம் வுத்தம் ஹோதி – சீவரபலிபோ³தோ⁴ ஆவாஸபலிபோ³தோ⁴தி த்³வே பலிபோ³தா⁴. தேஸு ஏகபலிபோ³தே⁴பி ஸதி யஸ்மா அனாமந்தசாராதி³கம் ஆனிஸம்ஸம் லப⁴தி, நாஸதி. கஸ்மா? ‘‘நிட்டி²தசீவரஸ்மி’’ந்தி ஏதஸ்ஸ சீவரஸ்ஸ கரணபலிபோ³தே⁴ உபச்சி²ன்னேதி அயமத்தோ² விஞ்ஞாயதீதி. ஸங்க⁴ஸ்ஸாதி ஸங்கே⁴ன. கத்தரி சேதம் ஸாமிவசனம். உப்³ப⁴தேதி அட்ட²ன்னம் மாதிகானமஞ்ஞதரேன, அந்தருப்³பா⁴ரேன வா உத்³த⁴டே.

தத்ராதி தஸ்மிம் கதி²னே. உப்³பா⁴ரோ உத்³த⁴ரணம். புரிமவஸ்ஸம்வுட்டே² திம்ஸமத்தே பாவேய்யகே பி⁴க்கூ² உத்³தி³ஸ்ஸ ‘‘அனுஜானாமி, பி⁴க்க²வே, வஸ்ஸம்வுட்டா²னம் பி⁴க்கூ²னம் கதி²னம் அத்த²ரிது’’ந்தி கதி²னக்க²ந்த⁴கே (மஹாவ. 306) ப⁴க³வதா கதி²னஸ்ஸ அனுஞ்ஞாதத்தா ‘‘அயஞ்ஹி கதி²னத்தா²ரோ நாம…பே… அனுஞ்ஞாதோ’’தி வுத்தம். தத்த² புரிமவஸ்ஸம்வுட்டா²னந்தி வஸ்ஸச்சே²த³ம் அகத்வா புரிமவஸ்ஸம்வுட்டா²னந்தி அத்தோ². ஏதேன வுட்ட²வஸ்ஸவஸேன தாவ புரிமிகாய வஸ்ஸம் உபக³தாயேவ கதி²னத்தா²ரம் லப⁴ந்தி, ந பச்சி²மிகாய உபக³தாதி த³ஸ்ஸேதி. வுட்ட²வஸ்ஸவஸேன தாவ ஏவம் ஹோது, க³ணனவஸேன தம் கித்தகா லப⁴ந்தீதி ஆஹ ‘‘ஸோ’’திஆதி³. ஸோதி கதி²னத்தா²ரோ. ஸப்³ப³ந்திமேன பரிச்சே²தே³னாதி க³ணனவஸேன பச்சி²மகோடியா. பஞ்சன்னம் ஜனானம் வட்டதீதி பச்சி²மகோடியா சத்தாரோ கதி²னது³ஸ்ஸஸ்ஸ தா³யகா, ஏகோ படிக்³கா³ஹகோதி பஞ்சன்னம் ஜனானம் வட்டதி. கேசி பன ‘‘பஞ்சவக்³க³கரணீயத்தா ‘பஞ்சன்னம் ஜனானம் வட்டதீ’தி வுத்த’’ந்தி வத³ந்தி, தம் தேஸம் மதிமத்தம் ‘‘தத்ர, பி⁴க்க²வே, ய்வாயம் சதுவக்³கோ³ பி⁴க்கு²ஸங்கோ⁴ ட²பேத்வா தீணி கம்மானி உபஸம்பத³ம் பவாரணம் அப்³பா⁴ன’’ந்தி சம்பேய்யக்க²ந்த⁴கே (மஹாவ. 388) வுத்தத்தா. தஸ்மாதி யஸ்மா வுட்ட²வஸ்ஸவஸேன புரிமவஸ்ஸம்வுட்டா²னம் அனஞ்ஞாதோ, யஸ்மா ச ஸப்³ப³ந்திமேன பரிச்சே²தே³ன பஞ்சன்னம் ஜனானம் வட்டதி, தஸ்மா. யத்தா²தி யஸ்மிம் விஹாரே. ஆனிஸம்ஸேதி அனாமந்தசாராதி³கே கதி²னானிஸம்ஸே. அத² பன சத்தாரோ பி⁴க்கூ² வஸ்ஸம் உபக³தா, ஏகோ பரிபுண்ணவஸ்ஸோ ஸாமணேரோ ஸசே பச்சி²மிகாய உபஸம்பஜ்ஜதி, க³ணபூரகோ சேவ ஹோதி, ஆனிஸம்ஸஞ்ச லப⁴தி. தயோ பி⁴க்கூ², த்³வே ஸாமணேரா, த்³வே பி⁴க்கூ², தயோ ஸாமணேரா, ஏகோ பி⁴க்கு², சத்தாரோ ஸாமணேராதி ஏத்தா²பி ஏஸேவ நயோ.

க²ந்த⁴கே வுத்தாய ஞத்திது³தியகம்மவாசாயாதி –

‘‘ஸுணாது மே, ப⁴ந்தே, ஸங்கோ⁴, இத³ம் ஸங்க⁴ஸ்ஸ கதி²னது³ஸ்ஸம் உப்பன்னம். யதி³ ஸங்க⁴ஸ்ஸ பத்தகல்லம், ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ த³தே³ய்ய கதி²னம் அத்த²ரிதும், ஏஸா ஞத்தி. ஸுணாது மே, ப⁴ந்தே, ஸங்கோ⁴, இத³ம் ஸங்க⁴ஸ்ஸ கதி²னது³ஸ்ஸம் உப்பன்னம், ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ தே³தி கதி²னம் அத்த²ரிதும். யஸ்ஸாயஸ்மதோ க²மதி இமஸ்ஸ கதி²னது³ஸ்ஸஸ்ஸ இத்த²ன்னாமஸ்ஸ பி⁴க்கு²னோ தா³னம் கதி²னம் அத்த²ரிதும், ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய. தி³ன்னம் இத³ம் ஸங்கே⁴ன கதி²னது³ஸ்ஸம் இத்த²ன்னாமஸ்ஸ பி⁴க்கு²னோ கதி²னம் அத்த²ரிதும், க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி (மஹாவ. 307) –

ஏவம் கதி²னக்க²ந்த⁴கே வுத்தாய ஞத்திது³தியகம்மவாசாய. கதி²னத்தா²ராரஹஸ்ஸாதி கதி²னம் அத்த²ரிதும் ப⁴ப்³ப³ஸ்ஸ. ஸோ ச கோ² புப்³ப³கரணஜானனாதீ³ஹி அட்ட²ஹி அங்கே³ஹி ஸமன்னாக³தோதி வேதி³தப்³போ³. வுத்தஞ்ஹேதம் வினயவினிச்ச²யே ‘‘அட்ட²த⁴ம்மகோவிதோ³ பி⁴க்கு², கதி²னத்தா²ரமரஹதீ’’தி. பரிவாரேபி (பரி. 409) வுத்தம் –

‘‘அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும். கதமேஹி அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும்? புப்³ப³கரணம் ஜானாதி, பச்சுத்³தா⁴ரம் ஜானாதி, அதி⁴ட்டா²னம் ஜானாதி, அத்தா²ரம் ஜானாதி, மாதிகம் ஜானாதி, பலிபோ³த⁴ம் ஜானாதி, உத்³தா⁴ரம் ஜானாதி, ஆனிஸம்ஸம் ஜானாதி, இமேஹி அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிது’’ந்தி.

ஏத்த² ச புப்³ப³கரணம் நாம தோ⁴வனவிசாரணச்சே²த³னப³ந்த⁴னஸிப்³ப³னரஜனகப்பகரணம். பச்சுத்³தா⁴ரோ நாம புராணஸங்கா⁴டிஆதீ³னம் பச்சுத்³த⁴ரணம். அதி⁴ட்டா²னம் நாம கதி²னசீவராதி⁴ட்டா²னம். அத்தா²ரோ நாம கதி²னத்தா²ரோ. மாதிகா நாம அட்ட² மாதிகா. பலிபோ³தோ⁴ நாம ஆவாஸபலிபோ³தோ⁴ சீவரபலிபோ³தோ⁴தி த்³வே பலிபோ³தா⁴. உத்³தா⁴ரோ நாம பக்கமனந்திகாத³யோ. ஆனிஸம்ஸோ நாம பஞ்சானிஸம்ஸா.

யம் பன ஸமந்தபாஸாதி³காயம் (மஹாவ. அட்ட². 306) வுத்தம் ‘‘கதி²னம் பன கேன அத்த²ரிதப்³ப³ம்? யஸ்ஸ ஸங்கோ⁴ கதி²னசீவரம் தே³தி, ஸங்கே⁴ன பன கஸ்ஸ தா³தப்³ப³ம்? யோ ஜிண்ணசீவரோ ஹோதி, ஸசே ப³ஹூ ஜிண்ணசீவரா ஹோந்தி, வுட்³ட⁴ஸ்ஸ தா³தப்³ப³ம். வுட்³டே⁴ஸுபி யோ மஹாபரிஸோ தத³ஹேவ சீவரம் கத்வா அத்த²ரிதும் ஸக்கோதி, தஸ்ஸ தா³தப்³ப³ம். ஸசே வுட்³டோ⁴ ந ஸக்கோதி, நவகதரோ ஸக்கோதி, தஸ்ஸ தா³தப்³ப³ம். அபிச ஸங்கே⁴ன மஹாதே²ரஸ்ஸ ஸங்க³ஹம் காதும் வட்டதி, தஸ்மா ‘தும்ஹே, ப⁴ந்தே, க³ண்ஹத², மயம் கத்வா த³ஸ்ஸாமா’தி வத்தப்³ப³’’ந்தி, தம்பி கதி²னத்தா²ராரஹம்யேவ க³ஹேத்வாவ தா³தப்³ப³ம். தே³ந்தேன பன தீஸு சீவரேஸு யம் யம் ஜிண்ணம் ஹோதி, தம் தத³த்தா²ய தா³தப்³ப³ம். பகதியா து³பட்டசீவரஸ்ஸ து³பட்டத்தா²யேவ தா³தப்³ப³ம். ஸசேபிஸ்ஸ ஏகபட்டசீவரம் க⁴னம் ஹோதி, கதி²னஸாடகோ ச பேலவோ, ஸாருப்பத்தா²ய து³பட்டப்பஹோனகமேவ தா³தப்³ப³ம். ‘‘அஹம் அலப⁴ந்தோ ஏகபட்டம் பாருபாமீ’’தி வத³ந்தஸ்ஸாபி து³பட்டம் தா³தும் வட்டதி. யோ பன லோப⁴பகதிகோ ஹோதி, தஸ்ஸ ந தா³தப்³ப³ம். தேனாபி கதி²னம் அத்த²ரித்வா பச்சா² ஸிப்³பே³த்வா ‘‘த்³வே சீவரானி கரிஸ்ஸாமீ’’தி ந க³ஹேதப்³ப³ம்.

தேனாதி கதி²னத்தா²ரகேன பி⁴க்கு²னா. தத³ஹேவாதி தஸ்மிம்யேவ தி³வஸே. பஞ்ச வா அதிரேகானி வா க²ண்டா³னி சி²ந்தி³த்வாதி யதா² பஞ்சக²ண்டி³காதீ³னம் ஸங்கா⁴டிஆதீ³னம் திண்ணம் சீவரானம் அஞ்ஞதரப்பஹோனகானி மஹாமண்ட³லஅட்³ட⁴மண்ட³லாதி³வஸேன பஞ்ச க²ண்டா³னி வா அதிரேகானி வா ஸத்தாதி³க²ண்டா³னி ஹோந்தி, ஏவம் சி²ந்தி³த்வா. தஸ்மிஞ்ச கதி²னசீவரே கரியமானே ‘‘அஹம் தே²ரோ’’தி வா ‘‘ப³ஹுஸ்ஸுதோ’’தி வா ஏகேனாபி அகாதும் ந லப்³ப⁴தி. அனாத³ரியேன அகரோந்தஸ்ஸ து³க்கடம். தஸ்மா ஸப்³பே³ஹேவ ஸன்னிபதித்வா தோ⁴வனசே²த³னஸிப்³ப³னரஜனானி நிட்டா²பேதப்³பா³னி. தேனாஹ ‘‘ஸேஸபி⁴க்கூ²ஹிபி தஸ்ஸ ஸஹாயேஹி ப⁴விதப்³ப³’’ந்தி. கதசீவரமேவாதி நிட்டி²தபரிகம்மமேவ கதி²னது³ஸ்ஸம். ஸப்³ப³ந்திமேன பரிச்சே²தே³ன அந்தரவாஸகோபி சி²ந்தி³த்வாவ காதப்³போ³ அஞ்ஞதா² அத்தா²ரவிபத்திதோ. யதா²ஹ –

‘‘கத²ஞ்ச பன, பி⁴க்க²வே, அனத்த²தம் ஹோதி கதி²னம்? ந உல்லிகி²தமத்தேன அத்த²தம் ஹோதி கதி²னம்…பே… ந அஞ்ஞத்ர பஞ்சகேன வா அதிரேகபஞ்சகேன வா தத³ஹேவ ஸஞ்சி²ன்னேனா’’தி (மஹாவ. 308).

தேனேவாஹ ‘‘அச்சி²ன்னாஸிப்³பி³தம் பன ந வட்டதீ’’தி. தேன பி⁴க்கு²னாதி அத்தா²ரகேன பி⁴க்கு²னா. அத்த²ரிதப்³ப³ந்தி அத்த²ரணம் காதப்³ப³ம். தஞ்ச கோ² ததா²வசீபே⁴த³கரணமேவாதி த³ட்ட²ப்³ப³ம். யதா²ஹ –

‘‘ஸசே ஸங்கா⁴டியா கதி²னம் அத்த²ரிதுகாமோ ஹோதி, போராணிகா ஸங்கா⁴டி பச்சுத்³த⁴ரிதப்³பா³, நவா ஸங்கா⁴டி அதி⁴ட்டா²தப்³பா³, ‘இமாய ஸங்கா⁴டியா கதி²னம் அத்த²ராமீ’தி வாசா பி⁴ந்தி³தப்³பா³’’தி (பரி. 413) –

வித்தா²ரோ. ‘‘ப⁴ந்தே, ஆவுஸோ’’தி ச ‘‘அனுமோத³த², அனுமோதா³ஹீ’’தி ச வசனபே⁴த³ம் ஸந்தா⁴ய ‘‘தே²ரானஞ்சா’’திஆதி³ வுத்தம்.

ஏவம் அத்தா²ரகேன படிபஜ்ஜிதப்³ப³விதி⁴ம் த³ஸ்ஸேத்வா இதா³னி அனுமோத³கேஹி படிபஜ்ஜிதப்³ப³விதி⁴ம் த³ஸ்ஸேதும் ‘‘தேஹிபீ’’திஆதி³ வுத்தம். ‘‘அனுமோதா³மா’’தி அத்தனாவ அத்தனி கா³ரவவஸேன வுத்தம். கிஞ்சாபி ஏவம் வுத்தம், ததா²பி ஏககேன ‘‘அனுமோதா³மா’’தி வத்தும் ந வட்டதி, ‘‘அனுமோதா³மி’’ச்சேவ வத்தப்³ப³ந்தி வத³ந்தி, வீமம்ஸித்வா க³ஹேதப்³ப³ம். இதா³னி கதி²னானிஸம்ஸே த³ஸ்ஸேதும் பூ⁴மிம் விசாரயந்தோ ‘‘புரிமவஸ்ஸம்வுட்டே²ஸுபீ’’திஆதி³மாஹ. தத்த² தேஸம்யேவாதி அத்தா²ரகஅனுமோத³கானம்யேவ. வுத்தஞ்ஹேதம் பரிவாரே ‘‘த்³வின்னம் புக்³க³லானம் அத்த²தம் ஹோதி கதி²னம் அத்தா²ரகஸ்ஸ ச அனுமோத³கஸ்ஸ சா’’தி (பரி. 403). தேதி அத்தா²ரகஅனுமோத³கா. ததோ பட்டா²யாதி அத்தா²ரானுமோத³னதோ பட்டா²ய. யாவ கதி²னஸ்ஸுப்³பா⁴ராதி ந கேவலம் சீவரமாஸேயேவ, அத² கோ² அட்ட²ன்னம் மாதிகானம் அஞ்ஞதரேன வா அந்தருப்³பா⁴ரேன வா யாவ கதி²னஸ்ஸுப்³பா⁴ரா பஞ்சானிஸம்ஸே லப⁴ந்தி, உத்³த⁴டே பன ந லப⁴ந்தீதி அத்தோ².

இதா³னி தே பஞ்சானிஸம்ஸே ஸரூபதோ த³ஸ்ஸேதும் ‘‘அனாமந்தசாரோ’’திஆதி³மாஹ. தத்த² அனாமந்தசாரோ நாம பஞ்சன்னம் போ⁴ஜனானம் அஞ்ஞதரேன நிமந்திதஸ்ஸ ஸந்தம் பி⁴க்கு²ம் அனாபுச்சா² குலேஸு சாரித்தாபஜ்ஜனம். அஸமாதா³னசாரோ நாம நாமேனாதி⁴ட்டி²தஸ்ஸ சீவரஸ்ஸ அஸமாதா³னசரணம், நாமேனாதி⁴ட்டி²தானம் திண்ணம் சீவரானமஞ்ஞதரம் சீவரம் யத்த² கத்த²சி நிக்கி²பித்வா அஞ்ஞத்த² அருணுட்டா²பனந்தி அத்தோ², சீவரவிப்பவாஸோதி வுத்தம் ஹோதி. யாவத³த்த²சீவரந்தி யாவதா சீவரேன அத்தோ² ஹோதி, தாவதகம் அனதி⁴ட்டி²தம் அவிகப்பிதம் சீவரதா⁴ரணம், த³ஸாஹமதிக்கமித்வா சீவரஸ்ஸ ட²பனந்தி அத்தோ². க³ணஸ்ஸ போ⁴ஜனம் க³ணபோ⁴ஜனம். க³ணோதி சேத்த² சத்தாரோ வா ததுத்தரி வா பி⁴க்கூ². தேஸம் விஞ்ஞத்திதோ வா நிமந்தனதோ வா லத்³த⁴ஸ்ஸ ஓத³னாதீ³னம் பஞ்சன்னம் அஞ்ஞதரபோ⁴ஜனஸ்ஸ ஸஹ க³ஹணந்தி அத்தோ². யோ ச தத்த² சீவருப்பாதோ³தி தத்த² கதி²னத்த²தஸீமாய மதகசீவரம் வா ஹோது, ஸங்க⁴ம் உத்³தி³ஸ்ஸ தி³ன்னம் வா ஸங்கி⁴கேன தத்ருப்பாதே³ன ஆப⁴தம் வா யேன கேனசி ஆகாரேன யம் ஸங்கி⁴கம் சீவரம் உப்பஜ்ஜதி, தம் தேஸம் ப⁴விஸ்ஸதீதி அத்தோ². தேனாஹ ‘‘தஸ்மிம் ஆவாஸே ஸங்க⁴ஸ்ஸ உப்பன்னசீவரஞ்சா’’தி.

‘‘யம் பன தத்த² ஸங்க⁴ஸ்ஸ உப்பன்னம் பத்தாதி³ வா அஞ்ஞம் ப⁴ண்ட³ம் வா, தம் ஸப்³பே³ஸம் பாபுணாதி. யம் பன தத்ருப்பாதே³ன தண்டு³லாதி³னா வத்த²ம் சேதாபிதம், அத்த²தகதி²னானமேவ தானி வத்தா²னி பாபுணந்தி. வத்தே²ஹி பன தண்டு³லாதீ³ஸு சேதாபிதேஸு ஸப்³பே³ஸம் தானி பாபுணந்தீ’’தி க³ண்டி²பதே³ வுத்தம், தம்பி சேதாபிதகாலதோ பட்டா²ய சீவருப்பாதோ³ ந ஹோதீதி ஸுவுத்தந்தி த³ட்ட²ப்³ப³ம். அனத்த²தகதி²னா பன இமேஸு பஞ்சஸு ஆனிஸம்ஸேஸு சீவரமாஸே அஸமாதா³னசாரம் ட²பேத்வா ஸேஸானிஸம்ஸே லப⁴ந்தி. யதி³ அஸமாதா³னசாரோபி லப்³பே⁴ய்ய, பாவேய்யகா பி⁴க்கூ² வஸ்ஸம்வுட்டா² ஓகபுண்ணேஹி சீவரேஹி ந ப⁴க³வந்தம் உபஸங்கமேய்யும். யஸ்மா தம் ந லப்³ப⁴தி, தஸ்மா சீவரமாஸேபி சீவரம் ஸமாதா³ய ஏவ ப⁴க³வந்தம் உபஸங்கமிம்ஸு.

ஏவம் கதி²னத்தா²ரம் த³ஸ்ஸேத்வா இதா³னி உப்³பா⁴ரம் த³ஸ்ஸேந்தோ ‘‘தம் பனேதம் கதி²ன’’ந்திஆதி³மாஹ. தத்த² மாதிகாதி மாதரோ, ஜனேத்தியோதி அத்தோ². கதி²னுப்³பா⁴ரஞ்ஹி ஏதா அட்ட² ஜனேந்தி. தாஸு பக்கமனம் அந்தோ ஏதிஸ்ஸாதி பக்கமனந்திகா. ஏவம் ஸேஸாபி வேதி³தப்³பா³. தத்த² யோ பி⁴க்கு² அத்த²தகதி²னோ கதி²னசீவரம் ஆதா³ய தஸ்மிம் ஆவாஸே நிரபேக்கோ² ‘‘ந பச்சேஸ்ஸ’’ந்தி பக்கமதி, தஸ்ஸேவம் பக்கமதோ கதி²னுத்³தா⁴ரோ அதிக்கந்தமத்தாய ஸீமாய ஹோதீதி பக்கமனந்திகோ கதி²னுத்³தா⁴ரோதி வேதி³தப்³போ³.

யோ பன ஆனிஸம்ஸசீவரம் ஆதா³ய பக்கமதி, தஸ்ஸ ப³ஹிஸீமாக³தஸ்ஸ ஏவம் ஹோதி ‘‘இதே⁴விமம் கரிஸ்ஸாமி, ந புன தம் விஹாரம் க³ச்சி²ஸ்ஸாமீ’’தி தஸ்மிம் ஆவாஸே நிரபேக்கோ² ஹுத்வா தம் சீவரம் காரேதி, தஸ்ஸ பி⁴க்கு²னோ நிட்டா²னந்திகோ கதி²னுத்³தா⁴ரோ.

யதி³ பன ஆனிஸம்ஸமூலசீவரம் ஆதா³ய ப³ஹிஸீமாக³தோ ‘‘நேவிமம் சீவரம் கரிஸ்ஸாமி, ந ச தம் ஆவாஸம் க³ச்சி²ஸ்ஸாமீ’’தி ஸன்னிட்டா²னம் கரோதி, ததா³ ஸன்னிட்டா²னந்திகோ கதி²னுத்³தா⁴ரோ.

ததே³வ ஆனிஸம்ஸசீவரம் லத்³தா⁴ தம் ஆதா³ய ப³ஹிஸீமம் க³ந்த்வா ‘‘இதே⁴விமம் சீவரம் கரிஸ்ஸாமி, ந க³ச்சி²ஸ்ஸாமீ’’தி கரோந்தஸ்ஸ ஸசே தம் சீவரம் நஸ்ஸதி வினஸ்ஸதி ட³ய்ஹதி, நாஸனந்திகோ கதி²னுத்³தா⁴ரோ ஹோதி.

ஸசே பன ஆனிஸம்ஸசீவரம் லத்³தா⁴ தஸ்மிம் விஹாரே ஸாபேக்கோ²வ ப³ஹிஸீமாக³தோ ‘‘விஹாரே பி⁴க்கூ²ஹி அந்தருப்³பா⁴ரம் கத’’ந்தி ஸுணாதி, தஸ்ஸ ஸவனந்திகோ கதி²னுத்³தா⁴ரோ ஹோதி.

ஆஸாய அவச்சே²தோ³ ஏதிஸ்ஸாதி ஆஸாவச்சே²தி³கா. யோ பன யேன கேனசி ‘‘துய்ஹம் சீவரம் த³ஸ்ஸாமீ’’தி வுத்தோ தஸ்மிம் சீவரே ஆஸாய விஹாரே அபேக்க²ம் பஹாய ப³ஹிஸீமாக³தோ புன தேன ‘‘ந ஸக்கோமி தா³து’’ந்தி வுத்தே ஆஸம் சி²ந்த³தி, தஸ்ஸ ஆஸாவச்சே²தி³கோ கதி²னுத்³தா⁴ரோ ஹோதி.

யோ பன வஸ்ஸம்வுட்ட²விஹாரதோ அஞ்ஞம் விஹாரம் ஸாபேக்கோ²வ க³ந்த்வா ஆக³ச்ச²ந்தோ அந்தராமக்³கே³யேவ கதி²னுத்³தா⁴ரம் வீதினாமேதி, தஸ்ஸ ஸீமாதிக்கமனந்திகோ கதி²னுத்³தா⁴ரோ.

ஸஹ உப்³பா⁴ரேனாதி ஸஹுப்³பா⁴ரா. ஆனிஸம்ஸசீவரம் ஆதா³ய ஸாபேக்கோ²வ ப³ஹி க³ந்த்வா கதி²னுத்³தா⁴ரம் ஸம்பு⁴ணந்தஸ்ஸ கதி²னுத்³தா⁴ரோ ஸஹுப்³பா⁴ரோதி வேதி³தப்³போ³.

‘‘ஏதஸ்மிம் பன பக்கமனந்திகே கதி²னுத்³தா⁴ரே பட²மம் சீவரபலிபோ³தோ⁴ சி²ஜ்ஜதீ’’திஆதி³னா சீவரபலிபோ³து⁴பச்சே²தா³தி³கஸ்ஸ வினிச்ச²யஸ்ஸ வித்தா²ரதோ ஸமந்தபாஸாதி³காயம் (மஹாவ. அட்ட². 311) வுத்தத்தா 8 ‘‘தத்த² வித்தா²ரவினிச்ச²யோ’’திஆதி³மாஹ. அத்தா²ருப்³பா⁴ரானம்யேவ வா வித்தா²ரவினிச்ச²யஸ்ஸ தத்தா²க³தத்தா ஏவம் வுத்தந்தி த³ட்ட²ப்³ப³ம். ஸேஸபலிபோ³தா⁴பா⁴வந்தி அவஸேஸஸ்ஸ பலிபோ³த⁴ஸ்ஸ அபா⁴வம், ஆவாஸபலிபோ³தா⁴பா⁴வந்தி அத்தோ².

அஸ்ஸாதி காலஸ்ஸ. த³ஸாஹபரமந்தி அச்சந்தஸம்யோகே³ உபயோக³வசனந்தி ஆஹ ‘‘தம் த³ஸாஹபரமம் கால’’ந்தி. அதிரேகந்தி அதி⁴கம், ஸோ ச அதி⁴கபா⁴வோ அதி⁴ட்டி²தவிகப்பிதசீவரதோதி ஆஹ ‘‘அதி⁴ட்டி²தவிகப்பிதேஸூ’’திஆதி³. கோ²மந்தி (பாரா. அட்ட². 2.636-638) கோ²மஸுத்தேஹி வாயிதம் கோ²மபட்டசீவரம். ததா² ஸேஸானி. கம்ப³லம் நாம மனுஸ்ஸலோமவாளலோமே ட²பேத்வா ஸேஸலோமேஹி வாயித்வா கதவத்த²ம். ஸாணம் நாம ஸாணவாகேஹி கதவத்த²ம். ப⁴ங்க³ம் நாம கோ²மஸுத்தாதீ³ஹி பஞ்சஹி மிஸ்ஸேத்வா கதவத்த²ம். ‘‘பாடேக்கம் வாகமயமேவா’’திபி வத³ந்தி. தத³னுலோமானம் வாதி து³கூலம் பத்துண்ணம் ஸோமாரபட்டம் சீனபட்டம் இத்³தி⁴ஜம் தே³வதி³ன்னந்தி தேஸம் கோ²மாதீ³னம்யேவ அனுலோமானம் ச²ன்னம் சீவரானம் வா, தத்த² து³கூலம் ஸாணஸ்ஸ அனுலோமம் வாகமயத்தா. பத்துண்ணதே³ஸே பாணகேஹி ஸஞ்ஜாதவத்த²ம் பத்துண்ணம். ஸோமாரதே³ஸே ஜாதம் வத்த²ம் ஸோமாரபட்டம். ததா² சீனபட்டம். இமானி தீணிபி கோஸேய்யஸ்ஸ அனுலோமானி பாணகேஹி கதஸுத்தமயத்தா. இத்³தி⁴ஜம் ஏஹிபி⁴க்கூ²னம் புஞ்ஞித்³தி⁴யா நிப்³ப³த்தசீவரம். தம் பன கோ²மாதீ³னமஞ்ஞதரம் ஹோதீதி தேஸம்யேவ அனுலோமம். தே³வேஹி தி³ன்னம் சீவரம் தே³வதி³ன்னம், தம் கப்பருக்கே² நிப்³ப³த்தம் ஜாலினியா தே³வகஞ்ஞாய அனுருத்³த⁴த்தே²ரஸ்ஸ தி³ன்னவத்த²ஸதி³ஸம், தம்பி கோ²மாதீ³னம்யேவ அனுலோமம் ஹோதி தேஸு அஞ்ஞதரபா⁴வதோ.

தீ³க⁴தோ வட்³ட⁴கிஹத்த²ப்பமாணம், வித்தா²ரதோ ததோ உபட்³ட⁴ப்பமாணம் விகப்பனுபக³ம் பச்சி²மம். அட்ட²ங்கு³லம் ஸுக³தங்கு³லேனாதி ஏத்த² ஸுக³தங்கு³லம் நாம இதா³னி மஜ்ஜி²மஸ்ஸ புரிமஸ்ஸ தீணி அங்கு³லானி, தேன ஸுக³தங்கு³லேன அட்ட²ங்கு³லம் வட்³ட⁴கிஹத்த²ப்பமாணந்தி அத்தோ². சதுரங்கு³லவித்த²தந்தி ஏத்தா²பி யதா²வுத்தானுஸாரேனேவ அத்தோ² வேதி³தப்³போ³. யேஸம் பன அதி⁴ட்டா²னவிகப்பனானம் அபா⁴வதோ அதி⁴ட்டி²தவிகப்பிதேஸு அபரியாபன்னத்தா இத³ம் அதிரேகசீவரம் நாம ஹோதி.

தம் அதி⁴ட்டா²னவிகப்பனம் கேனாகாரேன ஜானிதப்³ப³ந்தி அனுயோக³ம் ஸந்தா⁴ய தம் த³ஸ்ஸேதும் ‘‘யம் பன வுத்த’’ந்திஆதி³ ஆரத்³த⁴ம். தத்த² யம் பன வுத்தந்தி அதிரேகசீவரம் த³ஸ்ஸேதும் ‘‘அதி⁴ட்டி²தவிகப்பிதேஸு அபரியாபன்னத்தா’’தி அம்ஹேஹி யம் வுத்தந்தி அத்தோ². திசீவரம் அதி⁴ட்டா²துந்தி நாமம் வத்வா அதி⁴ட்டா²தும். ந விகப்பேதுந்தி ஸங்கா⁴டிஆதி³னாமேன விகப்பேதும் ந அனுஜானாமீதி அத்தோ². ‘‘இமம் சீவரம் விகப்பேமீ’’தி பன விகப்பேதும் வட்டதியேவ. ஸாமஞ்ஞவசனம் பன திசீவரஸ்ஸ கண்டு³படிச்சா²தி³வஸ்ஸிகஸாடிகானம் விய காலவஸேன விஸேஸாபா⁴வா சஸ்ஸ விகப்பேதப்³ப³தாதி த³ஸ்ஸனத்த²ம், ந பன ஸப்³ப³தா² விகப்பனபடிஸேத⁴னத்த²ந்தி த³ட்ட²ப்³ப³ம். ததா² ஹி புராணசீவரம் பச்சுத்³த⁴ரித்வா நவஸ்ஸ அதி⁴ட்டா²னவசனதோ, ‘‘அனாபத்தி அதி⁴ட்டே²தி விகப்பேதீ’’திஆதி³வசனதோ (பாரா. 469) ச திசீவரஸ்ஸபி விகப்பனாய ஓகாஸோ தி³ன்னோ. ஏஸ நயோ ஸப்³ப³த்த². திசீவராதீ³னி ஹி அதி⁴ட்ட²ஹந்தேன ‘‘இமம் ஸங்கா⁴டிம் அதி⁴ட்டா²மீ’’திஆதி³னா தம் தம் நாமம் வத்வா அதி⁴ட்டா²தப்³ப³ம். விகப்பேந்தேன பன ‘‘இமம் ஸங்கா⁴டி’’ந்திஆதி³னா தஸ்ஸ தஸ்ஸ சீவரஸ்ஸ நாமம் அக்³க³ஹேத்வா ‘‘இமம் சீவரம் துய்ஹம் விகப்பேமீ’’தி விகப்பேதப்³ப³ம். திசீவரம் வா ஹோது, அஞ்ஞம் வா, யதி³ தம் தம் நாமம் க³ஹேத்வா விகப்பேதி, அவிகப்பிதம் ஹோதி, அதிரேகசீவரட்டா²னேயேவ திட்ட²தி. ததோ பரம் விகப்பேதுந்தி சதுமாஸதோ பரம் ‘‘இமம் சீவரம் விகப்பேமீ’’தி விகப்பேதும். இத³ஞ்ச பரிபு⁴ஞ்ஜிதும் அனுஞ்ஞாதம். கேசி பன (ஸாரத்த². டீ. 2.469) ‘‘ததோ பரம் விகப்பேத்வா யாவ ஆகா³மிஸம்வச்ச²ரே வஸ்ஸானம் சதுமாஸம், தாவ ட²பேதும் அனுஞ்ஞாத’’ந்தி வத³ந்தி. ததோ பரந்தி ஆபா³த⁴தோ பரம். ‘‘இமாஸஞ்ச பன வஸ்ஸிகஸாடிககண்டு³படிச்சா²தீ³னம் ததோ பரம் விகப்பேத்வா பரிபோ⁴க³ஸ்ஸ அனுஞ்ஞாதத்தா ததா²விகப்பிதம் அஞ்ஞனாமேன அதி⁴ட்ட²ஹித்வா பரிபு⁴ஞ்ஜிதப்³ப³’’ந்தி க³ண்டி²பதே³ஸு வுத்தம். அதி⁴ட்டா²தப்³ப³விகப்பேதப்³ப³தா ஜானிதப்³பா³தி அதி⁴ட்டா²தப்³ப³ம் விகப்பேதப்³ப³ந்தி ஏவம் அதி⁴ட்டா²னவிகப்பனா ஜானிதப்³பா³தி அத்தோ².

பஞ்சபரிமாணம் அஸ்ஸாதி பஞ்சகம், முட்டி²ஸ்ஸ முட்டி²ஹத்த²ஸ்ஸ ஸம்ப³ந்த⁴ம் பஞ்சகம் முட்டி²பஞ்சகம். ஏஸ ந யோ முட்டி²த்திகந்தி ஏத்தா²பி. பாருபனேனபி ஸக்கா நாபி⁴ம் படிச்சா²தே³துந்தி ஆஹ ‘‘த்³விஹத்தோ²பி வட்டதீ’’தி. ந கேவலம் அட்³ட⁴தேய்யோவ வட்டதி, அத² கோ² த்³விஹத்தோ²பி வட்டதீதி பி-ஸத்³த³ஸ்ஸ அத்தோ² த³ட்ட²ப்³போ³. அதிரேகஞ்சாதி ஸுக³தசீவரப்பமாணம்பி ததோ அதி⁴கம்பி. பச்சுத்³த⁴ராமீதி ட²பேமி, பரிச்சஜாமீதி வா அத்தோ². ‘‘இமம் சீவரம் ஸங்கா⁴டிம் அதி⁴ட்டா²மீ’’தி (ஸாரத்த². டீ. 2.469) ஏவம்பி வத்தும் வட்டதி. காயவிகாரம் கரோந்தேனாதி ஹத்தா²தி³னா சீவரம் பராமஸந்தேன, சாலேந்தேன வா. இத³ஞ்ஹி அதி⁴ட்டா²னம் யேன கேனசி ஸரீராவயவேன அபு²ஸந்தஸ்ஸ ந வட்டதி. து³வித⁴ந்தி ஸம்முகா²பரம்முக²பே⁴தே³ன து³வித⁴ம். வாசா பி⁴ந்தி³தப்³பா³தி வசனம் நிச்சா²ரேதப்³ப³ம். அந்தோக³ப்³பா⁴தீ³ஸூதி அந்தோக³ப்³ப⁴உபரிபாஸாதே³ஸு. ஸாமந்தவிஹாரேதி யத்த² தத³ஹேவ க³ந்த்வா நிவத்தேதும் ஸக்கா, ஏவரூபே ஸமீபவிஹாரே. இத³ஞ்ச தே³ஸனாஸீஸமத்தம், தஸ்மா தூ³ரே டி²தம்பி அதி⁴ட்டா²தப்³ப³ந்தி வத³ந்தி. ‘‘ட²பிதட்டா²னம் ஸல்லக்கே²த்வா’’தி இமினா சீவரஸம்லக்க²ணம் வுத்தம். ந ஹி ட²பிதட்டா²னமத்தஸல்லக்க²ணேன கிஞ்சி பயோஜனம் அத்தி².

அதி⁴ட்ட²ஹித்வா ட²பிதவத்தே²ஹீதி பச்சத்த²ரணமுக²புஞ்ச²னசோளபரிக்கா²ரசோளவஸேன அதி⁴ட்ட²ஹித்வா ட²பிதவத்தே²ஹி. அதி⁴ட்டா²னதோ புப்³பே³ ஸங்கா⁴டிஆதி³வோஹாரஸ்ஸ அபா⁴வதோ ‘‘இமம் பச்சுத்³த⁴ராமீ’’தி பச்சத்த²ரணாதீ³னம் விஸும் பச்சுத்³த⁴ரணவிதி⁴ம் த³ஸ்ஸேதி. பச்சத்த²ரணாதி³னாமேன பன அதி⁴ட்டா²தப்³ப³த்தா ‘‘இமம் பச்சத்த²ரணம் பச்சுத்³த⁴ராமீ’’திஆதி³னா வுத்தேபி நேவத்தி² தோ³ஸோ. புன அதி⁴ட்டா²தப்³பா³னீதி ஸங்கா⁴டிஆதி³னாமேன அதி⁴ட்டா²தப்³பா³னி. பரிக்கா²ரசோளகஸ்ஸ பன பரிக்கா²ரசோளவஸேன அதி⁴ட்ட²ஹித்வா ட²பிதவத்தே²ஹிபி ஸங்கா⁴டிஆதி³ம்ஹி கதே பச்சுத்³த⁴ரித்வா புன அதி⁴ட்டா²தப்³ப³ந்தி நத்தி². புப்³பே³ கதாதி⁴ட்டா²னமேவ அதி⁴ட்டா²னம். அதி⁴ட்டி²தேன பன தேன ஸத்³தி⁴ம் மஹந்ததரமேவ து³தியம் பட்டம் வா க²ண்ட³ம் வா ஸம்ஸிப்³ப³ந்தேன அதி⁴ட்டா²தப்³ப³ம், ஸமே வா கு²த்³த³கே வா அதி⁴ட்டா²னகிச்சம் நத்தி². ஸுக²பரிபோ⁴க³த்த²ந்தி விப்பவாஸதோ³ஸாபா⁴வதோ யத்த² கத்த²சி ட²பேத்வா த⁴ம்மஸ்ஸவனாதி³னா கிச்சேன அஞ்ஞத்த² அருணம் உட்டா²பேத்வா ஆக³ந்த்வா நிஸ்ஸஜ்ஜனம் வினாவ பரிபு⁴ஞ்ஜிதும் ஸக்குணேய்யதாய ஸுக²பரிபோ⁴க³த்த²ம். பரிக்கா²ரசோளம் அதி⁴ட்டா²துந்தி பரிக்கா²ரசோளம் கத்வா அதி⁴ட்டா²தும்.

அனதிரித்தபமாணாதி ‘‘தீ³க⁴ஸோ ச² வித³த்தி²யோ ஸுக³தவித³த்தி²யா, திரியம் அட்³ட⁴தேய்யா’’தி (பாசி. 543) வுத்தப்பமாணதோ அனதி⁴கபமாணா. பச்சுத்³த⁴ரித்வா விகப்பேதப்³பா³தி வஸ்ஸிகஸாடிகபா⁴வதோ அபனேத்வா விகப்பேதப்³பா³, ஹேமந்தஸ்ஸ பட²மதி³வஸதோ பட்டா²ய அந்தோத³ஸாஹே வஸ்ஸிகஸாடிகாவஸ்ஸிகஸாடிகபா⁴வதோ அபனேத்வா ‘‘இமம் சீவரம் துய்ஹம் விகப்பேமீ’’திஆதி³னா நயேன விகப்பேதப்³பா³தி வுத்தம் ஹோதி. அஞ்ஞதா² ஹி ‘‘வஸ்ஸிகஸாடிகா வஸ்ஸானமாஸாதிக்கமேனாபி, கண்டு³படிச்சா²தி³ ஆபா³த⁴வூபஸமேனாபி அதி⁴ட்டா²னம் விஜஹதீ’’தி (கங்கா². அட்ட². கதி²னஸிக்கா²பத³வண்ணனா) வக்க²மானத்தா வஸ்ஸானமாஸதோ பரம் அஸதி அதி⁴ட்டா²னே கிம் பச்சுத்³த⁴ரேய்யாதி ‘‘பச்சுத்³த⁴ரித்வா’’தி வசனமேவ நோபபஜ்ஜேய்ய.

கேசி பன (ஸாரத்த². டீ. 2.469) ‘‘யதா² கதி²னமாஸப்³ப⁴ந்தரே உப்பன்னசீவரம் கதி²னமாஸாதிக்கமே நிஸ்ஸக்³கி³யம் ஹோதி, ஏவமயம் வஸ்ஸிகஸாடிகாபி வஸ்ஸானமாஸாதிக்கமே நிஸ்ஸக்³கி³யா ஹோதி. தஸ்மா கத்திகபுண்ணமதி³வஸே பச்சுத்³த⁴ரித்வா ததோ பரம் ஹேமந்தஸ்ஸ பட²மதி³வஸே விகப்பேதப்³பா³தி ஏவமத்தோ² க³ஹேதப்³போ³, பச்சுத்³த⁴ரித்வா ததோ பரம் விகப்பேதப்³பா³தி பத³யோஜனா வேதி³தப்³பா³’’தி ச வத³ந்தி, தம் ந யுத்தம். கதி²னமாஸே உப்பன்னஞ்ஹி சீவரம் அதிரேகசீவரட்டா²னே டி²தத்தா அவஸானதி³வஸே அனதி⁴ட்டி²தம் கதி²னமாஸாதிக்கமே நிஸ்ஸக்³கி³யம் ஹோதி. அயம் பன வஸ்ஸிகஸாடிகா அதி⁴ட்ட²ஹித்வா ட²பிதத்தா ந தேன ஸதி³ஸாதி வஸ்ஸானாதிக்கமே கத²ம் நிஸ்ஸக்³கி³யம் ஹோதி அனதி⁴ட்டி²தஅவிகப்பிதமேவ ஹி தம் காலாதிக்கமே நிஸ்ஸக்³கி³யம் ஹோதி, தஸ்மா ஹேமந்தேபி வஸ்ஸிகஸாடிகா த³ஸாஹபரிஹாரம் லப⁴தி. ஏவம் கண்டு³படிச்சா²தி³பி அதி⁴ட்டா²னவிஜஹனதோ பரம் த³ஸாஹபரிஹாரம் லப⁴தி. த³ஸாஹம் பன அனதிக்காமேத்வா விகப்பேதப்³பா³. நஹானத்தா²ய அனுஞ்ஞாதத்தா வண்ணபே⁴த³மத்தரத்தாபி சேஸா வட்டதீதி வுத்தம். ‘‘த்³வே பன ந வட்டந்தீ’’தி த்³வின்னம் அதி⁴ட்டா²னாபா⁴வதோ வுத்தம். ‘‘ஸசே வஸ்ஸானே அபரா வஸ்ஸிகஸாடிகா உப்பன்னா ஹோதி, புரிமவஸ்ஸிகஸாடிகம் பச்சுத்³த⁴ரித்வா, விகப்பேத்வா ச அதி⁴ட்டா²தப்³பா³’’தி வத³ந்தி.

பமாணயுத்தந்தி ‘‘தீ³க⁴ஸோ ஸுக³தவித³த்தி²யா த்³வே வித³த்தி²யோ, வித்தா²ரதோ தி³யட்³ட⁴ம் த³ஸா வித³த்தீ²’’தி (பாசி. 531 ஆத³யோ) இமினா பமாணேன யுத்தம். பமாணிகாதி ‘‘ஸுக³தவித³த்தி²யா தீ³க⁴ஸோ சதஸ்ஸோ வித³த்தி²யோ, திரியம் த்³வே வித³த்தி²யோ’’தி ஏவம் வுத்தப்பமாணயுத்தா. பச்சுத்³த⁴ரித்வா விகப்பேதப்³பா³தி ஏத்த² யம் வத்தப்³ப³ம், தம் ஹேட்டா² வுத்தமேவ. யஸ்மா பி⁴க்கூ²னம் திசீவரே பரிபுண்ணே, அத்தே² ச ஸதி பரிஸ்ஸாவனாதீ³ஹி ‘‘அனுஜானாமி, பி⁴க்க²வே, பரிக்கா²ரசோளக’’ந்தி (மஹாவ. 357) ப³ஹூனம் பத்தத்த²விகபரிஸ்ஸாவனாதீ³னம் ஸங்க³ஹவஸேன பரிக்கா²ரசோளாதி⁴ட்டா²னமனுஞ்ஞாதம், தஸ்மா ‘‘பரிக்கா²ரசோளே க³ணனா நத்தீ²’’திஆதி³ வுத்தம். ப⁴க³வதா ஹி யம் யம் பி⁴க்கூ² லப⁴ந்தி, தம் தம் இமினா விதா⁴னேன அதி⁴ட்ட²ஹித்வா புன ‘‘யேன யேன பரிஸ்ஸாவனாதி³னா அத்தோ² ஹோதி, தம் தம் கத்வா க³ண்ஹந்தூ’’தி அனுகம்பாய அனுஞ்ஞாதம். தேனேவாஹ ‘‘த²விகாபீ’’திஆதி³. ஆதி³ஸத்³தே³ன ‘‘ஏதானி சீவரானி பரிக்கா²ரசோளானி அதி⁴ட்டா²மீ’’தி அஸம்முகா²தி⁴ட்டா²னம் ஸங்க³ண்ஹாதி. ‘‘ஸேனாஸனபரிக்கா²ரத்தா²ய தி³ன்னபச்சத்த²ரணே சா’’தி இமினா அத்தனோ ஸந்தகம் படிக்கி²பதி. கேசி பன (ஸாரத்த². டீ. 2.469) ‘‘அனிவாஸேத்வா, அபாருபித்வா ச கேவலம் பஞ்சபீடே²ஸுயேவ அத்த²ரித்வா பரிபு⁴ஞ்ஜியமானம் பச்சத்த²ரணம் அத்தனோ ஸந்தகம்பி அனதி⁴ட்டி²தம் வட்டதீ’’தி வத³ந்தி, தம் அயுத்தம் ஸேனாஸனபரிக்கா²ரத்தா²ய தி³ன்ன’’ந்தி பச்சத்த²ரணஸ்ஸ விஸேஸிதத்தா. பி⁴ஸிபி³ப்³போ³ஹனபாவாரகோஜவானம்பி ஸேனாஸனபரிக்கா²ரதோயேவ அதி⁴ட்டா²னகிச்சம் நத்தீ²தி வேதி³தப்³ப³ம்.

அதி⁴ட்டி²தஞ்ச பனேதம் சீவரம் பரிபு⁴ஞ்ஜதோ கத²ம் அதி⁴ட்டா²னம் விஜஹதீதி ஆஹ ‘‘ஸப்³ப³ஞ்ச பனேத’’ந்திஆதி³. தத்த² அச்சி²ந்தி³த்வா க³ஹணேனாதி சோராதீ³ஹி அச்சி²ந்தி³த்வா க³ஹணேன. ஹீனாயாவத்தனேனாதி கி³ஹிபா⁴வாய ஆவத்தனேன, விப்³ப⁴மேனாதி அத்தோ², ‘‘ஸீலவந்தோவ ஹுத்வா கி³ஹீ ப⁴விஸ்ஸாமீ’’தி ஸேதவத்த²னிவாஸனேனாதி வுத்தம் ஹோதி. ‘‘அந்திமவத்து²ம் அஜ்ஜா²பன்னஸ்ஸ ஸேதவத்த²னிவாஸோ வா காஸாயசஜனம் வா ஹீனாயாவத்தன’’ந்தி கேசி. ‘‘‘ஹீனாயாவத்தனேனா’தி இமினா பி⁴க்கு²னியா ஏவ அதி⁴ட்டா²னவிஜஹனம் க³ஹிதம் ஹோதி. ஸா ஹி யதா³ விப்³ப⁴மதி, ததா³ அஸ்ஸமணீ ஹோதி. பி⁴க்கு² பன விப்³ப⁴மந்தோபி யாவ ஸிக்க²ம் ந பச்சக்கா²தி, தாவ பி⁴க்கு²யேவாதி அதி⁴ட்டா²னம் ந விஜஹதீ’’தி அபரே. ஸிக்கா²பச்சக்கா²னேனாதி லிங்கே³ டி²தஸ்ஸேவ ஸிக்கா²ய பச்சக்கா²னேன. யோ ஹி பி⁴க்கு²லிங்கே³ டி²தோவ ஸிக்க²ம் பச்சக்கா²தி, தஸ்ஸ காயலக்³க³ம்பி சீவரம் அதி⁴ட்டா²னம் விஜஹதீதி. காலங்கிரியாயாதி மரணேன. லிங்க³பரிவத்தனேனாதி புரிஸலிங்க³ஸ்ஸ, இத்தி²லிங்க³ஸ்ஸ வா பரிவத்தனேன, புரிஸஸ்ஸ இத்தி²லிங்க³பாதுபா⁴வேன, இத்தி²யா வா புரிஸலிங்க³பாதுபா⁴வேனாதி வுத்தம் ஹோதி.

கனிட்ட²ங்கு³லினக²பிட்டி²ப்பமாணேனாதி ஹேட்டி²மபரிச்சே²த³ம் த³ஸ்ஸேதி. ஓரதோதி அப்³ப⁴ந்தரதோ. யோ பன து³ப்³ப³லட்டா²னே பட²மம் அக்³க³ளம் த³த்வா பச்சா² து³ப்³ப³லட்டா²னம் சி²ந்தி³த்வா அபனேதி, அதி⁴ட்டா²னம் ந பி⁴ஜ்ஜதி. மண்ட³லபரிவத்தனேபி ஏஸேவ நயோ. து³பட்டஸ்ஸ பன ஏகஸ்மிம் படலே சி²த்³தே³ வா ஜாதே, க³லிதே வா அதி⁴ட்டா²னம் ந பி⁴ஜ்ஜதி. கு²த்³த³கம் சீவரம் மஹந்தம் கரோதி, மஹந்தம் வா கு²த்³த³கம் கரோதி, அதி⁴ட்டா²னம் ந பி⁴ஜ்ஜதி. உபோ⁴ கோடியோ மஜ்ஜே² கரோந்தோ ஸசே பன பட²மம் சி²ந்தி³த்வா பச்சா² க⁴டேதி, அதி⁴ட்டா²னம் பி⁴ஜ்ஜதி. அத² க⁴டேத்வா சி²ந்த³தி, ந பி⁴ஜ்ஜதி. ரஜகேஹி தோ⁴வாபேத்வா ஸேதம் கரோந்தஸ்ஸாபி அதி⁴ட்டா²னம் அதி⁴ட்டா²னமேவ. வஸ்ஸானமாஸாதிக்கமேனாபீதி ஏத்த² பி-ஸத்³தோ³ ஸம்பிண்ட³னத்தோ². தேன ந கேவலம் புப்³பே³ வுத்தேன தா³னாதி³னா அட்ட²விதே⁴னேவ காரணேன வஸ்ஸிகஸாடிகா அதி⁴ட்டா²னம் விஜஹதி, அத² கோ² வஸ்ஸானமாஸாதிக்கமேனபீதி ஏவமேத்த² அத்தோ² த³ட்ட²ப்³போ³. ஏஸ நயோ ஆபா³த⁴வூபஸமேனாபீதி ஏத்தா²பி. விகப்பனஸிக்கா²பதே³தி (பாசி. 372 ஆத³யோ) பாசித்தியே ஸுராபானவக்³க³ஸ்ஸ நவமஸிக்கா²பதே³.

தம் அதிக்காமயதோதி ஏத்த² தந்தி சீவரம், காலம் வா பராமஸதீதி ஆஹ ‘‘தம் யதா²வுத்தஜாதிப்பமாண’’ந்திஆதி³. அஸ்ஸாதி பி⁴க்கு²ஸ்ஸ. தஸ்ஸ யோ அருணோதி தஸ்ஸ சீவருப்பாத³தி³வஸஸ்ஸ யோ அதிக்கந்தோ அருணோ. சீவருப்பாத³தி³வஸேன ஸத்³தி⁴ந்தி சீவருப்பாத³தி³வஸஸ்ஸ அருணேன ஸத்³தி⁴ம். தி³வஸஸத்³தே³ன சேத்த² தம்தி³வஸனிஸ்ஸிதோ அருணோ வுத்தோ. இதா³னி யஸ்ஸ ச நிஸ்ஸஜ்ஜிதப்³ப³ம், யதா² ச நிஸ்ஸஜ்ஜிதப்³ப³ம், தம் த³ஸ்ஸேதும் ‘‘தம் க³ஹேத்வா’’திஆதி³ வுத்தம். தத்ராயம் நயோதி தஸ்மிம் நிஸ்ஸஜ்ஜனே அயம் விதி⁴. அஞ்ஞதா²பீதி பா⁴ஸந்தரேனாபி, யாய காயசி பா⁴ஸாயபீதி அத்தோ². படிப³லேனாதி வத்தும் ஸமத்தே²ன. ஆயதிம் ஸம்வரேய்யாஸீதி உபரி ஸம்வரமாபஜ்ஜேய்யாஸி, ஸம்வுதகாயவசீத்³வாரோ ப⁴வேய்யாஸீதி அத்தோ². இமானி ச ‘‘பஸ்ஸஸீ’’திஆதீ³னி யதா²க்கமம் படிக்³கா³ஹகதே³ஸகேஹி வத்தப்³ப³வசனானி. ததா² ஹி ‘‘பஸ்ஸஸீ’’தி படிக்³கா³ஹகேன வத்தப்³ப³வசனம், ‘‘ஆம பஸ்ஸாமீ’’தி தத³னுதே³ஸகேன வத்தப்³ப³வசனம். ‘‘ஆயதிம் ஸம்வரேய்யாஸீ’’தி தத³னுப்படிக்³கா³ஹகேன வத்தப்³ப³வசனம், ‘‘ஸாது⁴ ஸுட்டு² ஸம்வரிஸ்ஸாமீ’’தி தத³னுதே³ஸகேன வத்தப்³ப³வசனம். இமினா ச அத்தனோ ஆயதிம் ஸம்வரே பதிட்டி²தபா⁴வம் த³ஸ்ஸேதி. த்³வீஸு, பன ஸம்ப³ஹுலாஸு வாதி த்³வீஸு வா ஸம்ப³ஹுலாஸு வா ஆபத்தீஸு புரிமனயேனேவ வசனபே⁴தோ³ காதப்³போ³. ஞத்தியம் ஆபத்திம் ஸரதி விவரதீதி ஏத்த² ‘‘த்³வே ஆபத்தியோ’’தி வா ‘‘ஸம்ப³ஹுலா ஆபத்தியோ’’தி வா வசனபே⁴தோ³ காதப்³போ³. த்³வீஸு, ப³ஹூஸு வா வசனபே⁴தோ³ காதப்³போ³தி ‘‘ஸங்கோ⁴ இமானி சீவரானீ’’தி வத்து²வஸேன வசனபே⁴தோ³ காதப்³போ³.

ஏவம் ஸங்க⁴ஸ்ஸ நிஸ்ஸஜ்ஜனவிதி⁴ம் த³ஸ்ஸேத்வா க³ணஸ்ஸ நிஸ்ஸஜ்ஜனவிதி⁴ம் த³ஸ்ஸேதும் ‘‘க³ணஸ்ஸ பன நிஸ்ஸஜ்ஜந்தேனா’’திஆதி³மாஹ. தத்த² ஸேஸம் புரிமஸதி³ஸமேவாதி நிஸ்ஸஜ்ஜனாபத்திப்படிக்³க³ஹணனிஸ்ஸட்ட²சீவரதா³னேஸு ‘‘ஆயஸ்மந்தான’’ந்திஆதி³னா வுத்தவசனபே⁴த³ம் வினா அவஸேஸம் ஸங்க⁴ஸ்ஸ நிஸ்ஸஜ்ஜனாதீ³ஸு வுத்தஸதி³ஸமேவாதி அத்தோ².

இதா³னி புக்³க³லஸ்ஸ நிஸ்ஸஜ்ஜனவிதி⁴ம் த³ஸ்ஸேதும் ‘‘புக்³க³லஸ்ஸ பனா’’திஆதி³ வுத்தம். தத்த² த்³வீஸு, தீஸு வாதி த்³வீஸு, தீஸு வா ஆபத்தீஸு சேவ தா³தப்³ப³சீவரேஸு ச. யதா² ச க³ணஸ்ஸ நிஸ்ஸஜ்ஜனே, ஏவம் த்³வின்னம் நிஸ்ஸஜ்ஜனேபி பாளி வேதி³தப்³பா³. யதி³ ஹி விஸேஸோ ப⁴வேய்ய, யதே²வ ‘‘அனுஜானாமி, பி⁴க்க²வே, திண்ணம் பாரிஸுத்³தி⁴உபோஸத²ம் காதும், ஏவஞ்ச பன, பி⁴க்க²வே, காதப்³போ³ – ப்³யத்தேன பி⁴க்கு²னா படிப³லேன தே பி⁴க்கூ² ஞாபேதப்³பா³’’திஆதி³னா (மஹாவ. 168) நயேன திண்ணம் பாரிஸுத்³தி⁴உபோஸத²ம் வத்வா ‘‘அனுஜானாமி, பி⁴க்க²வே, த்³வின்னம் பாரிஸுத்³தி⁴உபோஸத²ம் காதும், ஏவஞ்ச பன, பி⁴க்க²வே, கத்தப்³போ³ – தே²ரேன பி⁴க்கு²னா ஏகம்ஸம் உத்தராஸங்க³’’ந்திஆதி³னா நயேன விஸும்யேவ த்³வின்னம் பாரிஸுத்³தி⁴உபோஸதோ² வுத்தோ, ஏவம் இதா⁴பி விஸும் பாளிம் வதே³ய்ய. யஸ்மா பன நத்தி², தஸ்மா அவத்வாவ க³தோதி க³ணஸ்ஸ வுத்தா பாளியேவேத்த² பாளி. ஆபத்திப்படிக்³க³ஹணே பன அயம் விஸேஸோ – யதா² க³ணஸ்ஸ நிஸ்ஸஜ்ஜித்வா ஆபத்தியா தே³ஸியமானாய ஆபத்திப்படிக்³கா³ஹகோ பி⁴க்கு² ஞத்திம் ட²பேதி, ஏவம் அட்ட²பேத்வா த்³வீஸு அஞ்ஞதரேன யதா² ஏகபுக்³க³லோ படிக்³க³ண்ஹாதி, ஏவம் ஆபத்தி படிக்³க³ஹேதப்³பா³. த்³வின்னஞ்ஹி ஞத்திட்ட²பனம் நாம நத்தி². யதி³ ஸியா, த்³வின்னம் பாரிஸுத்³தி⁴உபோஸத²ம் விஸும் ந வதே³ய்ய. நிஸ்ஸட்ட²சீவரதா³னேபி யதா² ‘‘இமம் சீவரம் ஆயஸ்மதோ த³ம்மீ’’தி ஏகோ வத³தி, ஏவம் ‘‘மயம் இமம் சீவரம் ஆயஸ்மதோ தே³மா’’தி வத்தும் வட்டதி. இதோ க³ருகதரானிபி ஹி ஞத்திது³தியகம்மானி அபலோகேத்வா காதப்³பா³னீதி வுத்தானி அத்தி², தேஸம் ஏதம் அனுலோமம். தேனேவாஹ ‘‘த்³வின்னம் பனா’’திஆதி³. நிஸ்ஸட்ட²சீவரம் பன தா³தப்³ப³மேவ, அதா³தும் ந லப்³ப⁴தி. வினயகம்மமத்தமேவ ஹேதம். ந தம் தேன ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா தி³ன்னமேவ ஹோதி. தேனாஹ ‘‘நிஸ்ஸட்ட²வத்து²’’ந்திஆதி³.

அனிஸ்ஸஜ்ஜித்வா பரிபு⁴ஞ்ஜந்தஸ்ஸ து³க்கடந்தி ஸகிம் நிவத்த²ம் வா ஸகிம் பாருதம் வா காயதோ அமோசேத்வா தி³வஸம்பி சரதி, ஏகமேவ து³க்கடம். மோசேத்வா நிவாஸேதி வா பாருபதி வா, பயோகே³ பயோகே³ து³க்கடம். து³ன்னிவத்த²ம் வா து³ப்பாருதம் வா ஸண்டா²பேந்தஸ்ஸ அனாபத்தி. அஞ்ஞஸ்ஸ தம் பரிபு⁴ஞ்ஜதோபி அனாபத்தி. ‘‘அஞ்ஞேன கதம் படிலபி⁴த்வா பரிபு⁴ஞ்ஜதீ’’திஆதி³வசனஞ்சேத்த² (பாரா. 570) ஸாத⁴கம். த³ஸாஹம் அனதிக்கந்தேபி அதிக்கந்தஸஞ்ஞினோ, வேமதிகஸ்ஸ ச து³க்கடந்தி ஏத்தா²பி ‘‘பரிபு⁴ஞ்ஜந்தஸ்ஸா’’தி ஆனேத்வா ஸம்ப³ந்தி⁴தப்³ப³ம். அதிக்கந்தே அனதிக்கந்தஸஞ்ஞினோபீதி த³ஸாஹம் அதிக்கந்தே சீவரே ‘‘அனதிக்கந்தம் இத³’’ந்தி ஏவம் ஸஞ்ஞினோ, த³ஸாஹே வா அதிக்கந்தே ‘‘அனதிக்கந்தோ த³ஸாஹோ’’தி ஏவம் ஸஞ்ஞினோ.

இதா³னி ‘‘அனதி⁴ட்டி²தே அதி⁴ட்டி²தஸஞ்ஞினோ நிஸ்ஸக்³கி³ய’’ந்திஆதி³ஆபத்திவாரம் ஸங்க³ஹேத்வா த³ஸ்ஸேந்தோ ‘‘ததா²’’திஆதி³மாஹ. ததா²தி யதா² த³ஸாஹம் அதிக்கந்தே ஸஞ்ஞாபே⁴தே³ன திகபாசித்தியம், ததா² அனதி⁴ட்டி²தாதீ³ஸு ஸத்தஸு விகப்பேஸு அதி⁴ட்டி²தாதி³ஸஞ்ஞாபே⁴த³தோதி அத்தோ². தத்த² அவிஸ்ஸஜ்ஜிதே விஸ்ஸஜ்ஜிதஸஞ்ஞினோதி கஸ்ஸசி அதி³ன்னே அபரிச்சத்தே ‘‘தி³ன்னம் பரிச்சத்தம் மயா’’தி ஏவம் ஸஞ்ஞினோ. அனட்டே² நட்ட²ஸஞ்ஞினோதி அத்தனோ சீவரேன ஸத்³தி⁴ம் ப³ஹூனி அஞ்ஞேஸம் சீவரானி ஏகதோ ட²பிதானி, தானி சே சோரா ஹரந்தி, தத்ரேஸ அத்தனோ சீவரே அனட்டே² நட்ட²ஸஞ்ஞீ ஹோதி, தஸ்ஸ நட்ட²ஸஞ்ஞினோ. ஏஸ நயோ அவினட்டா²தீ³ஸுபி. அவிலுத்தேதி ஏத்த² பன க³ப்³ப⁴ம் பி⁴ந்தி³த்வா பஸய்ஹாவஹாரவஸேன அவிலுத்தேதி வேதி³தப்³ப³ம்.

விஸ்ஸஜ்ஜிதேதி (பாரா. அட்ட². 2.469) அஞ்ஞஸ்ஸ தி³ன்னே. கத²ம் பன தி³ன்னம் ஹோதி, கத²ம் க³ஹிதம்? ‘‘இமம் துய்ஹம் தே³மி, த³தா³மி, த³ஜ்ஜாமி, ஓணோஜேமி, பரிச்சஜாமி, விஸ்ஸஜ்ஜாமி, நிஸ்ஸஜ்ஜாமீ’’தி வா வத³தி, ‘‘இத்த²ன்னாமஸ்ஸ தே³மி…பே… நிஸ்ஸஜ்ஜாமீ’’தி வா வத³தி, ஸம்முகா²பி பரம்முகா²பி தி³ன்னம்யேவ ஹோதி. ‘‘துய்ஹம் க³ண்ஹாஹீ’’தி வுத்தே ‘‘மய்ஹம் க³ண்ஹாமீ’’தி வத³தி, ஸுதி³ன்னம், ஸுக்³க³ஹிதஞ்ச. ‘‘தவ ஸந்தகம் கரோஹி, தவ ஸந்தகம் ஹோது, தவ ஸந்தகம் கரிஸ்ஸஸீ’’தி வுத்தே ‘‘மம ஸந்தகம் கரோமி, மம ஸந்தகம் ஹோது, மம ஸந்தகம் கரிஸ்ஸாமீ’’தி வத³தி, து³த்³தி³ன்னம், து³க்³க³ஹிதஞ்ச. நேவ தா³தா தா³தும் ஜானாதி, ந இதரோ க³ஹேதும். ஸசே பன ‘‘தவ ஸந்தகம் கரோஹீ’’தி வுத்தே ‘‘ஸாது⁴, ப⁴ந்தே, மய்ஹம் க³ண்ஹாமீ’’தி க³ண்ஹாதி, ஸுக்³க³ஹிதம், ஸசே பன ஏகோ ‘‘க³ண்ஹாஹீ’’தி வத³தி, இதரோ ‘‘ந க³ண்ஹாமீ’’தி வத³தி, புன ஸோ ‘‘தி³ன்னம் மயா துய்ஹம், க³ண்ஹாஹீ’’தி வத³தி, இதரோபி ‘‘ந மய்ஹம் இமினா அத்தோ²’’தி வத³தி. ததோ புரிமோபி ‘‘மயா தி³ன்ன’’ந்தி த³ஸாஹம் அதிக்காமேதி, பச்சி²மோபி ‘‘மயா படிக்கி²த்த’’ந்தி, கஸ்ஸாபத்தீதி? ந கஸ்ஸசி. யஸ்ஸ பன ருச்சதி, தேன அதி⁴ட்ட²ஹித்வா பரிபு⁴ஞ்ஜிதப்³ப³ம். யோ பன அதி⁴ட்டா²னே வேமதிகோ, தேன கிம் காதப்³ப³ம்? வேமதிகபா⁴வம் ஆரோசேத்வா ‘‘ஸசே அனதி⁴ட்டி²தம் ப⁴விஸ்ஸதி, ஏவம் மே கப்பியம் ஹோதீ’’தி வத்வா வுத்தனயேனேவ நிஸ்ஸஜ்ஜிதப்³ப³ம். ந ஹி ஏவம் ஜானாபேத்வா வினயகம்மம் கரோந்தஸ்ஸ முஸாவாதோ³ ஹோதி.

யதா² ச இத³ம், ஏவம் இதோ பரானிபீதி யதா² இத³ம் அதிரேகசீவரதா⁴ரணஸிக்கா²பத³ம் ஆசாரவிபத்தி, ஏவம் இதோ பரானிபி ஸிக்கா²பதா³னி ஆசாரவிபத்தியேவாதி அத்தோ². தேனாஹ ‘‘உப⁴தோபாதிமோக்கே²ஸூ’’திஆதி³. ஆஜீவவிபத்திபச்சயா பன ட²பேத்வா து³ப்³பா⁴ஸிதம் ச² ஆபத்திக்க²ந்தா⁴ பஞ்ஞத்தாதி –

‘‘ஆஜீவஹேது ஆஜீவகாரணா பாபிச்சோ² இச்சா²பகதோ அஸந்தம் அபூ⁴தம் உத்தரிமனுஸ்ஸத⁴ம்மம் உல்லபதி, ஆபத்தி பாராஜிகஸ்ஸ. ஆஜீவஹேது ஆஜீவகாரணா ஸஞ்சரித்தம் ஸமாபஜ்ஜதி, ஆபத்தி ஸங்கா⁴தி³ஸேஸஸ்ஸ. ஆஜீவஹேது ஆஜீவகாரணா ‘யோ தே விஹாரே வஸதி, ஸோ பி⁴க்கு² அரஹா’தி ப⁴ணதி, படிவிஜானந்தஸ்ஸ ஆபத்தி து²ல்லச்சயஸ்ஸ. ஆஜீவஹேது ஆஜீவகாரணா பி⁴க்கு² பணீதபோ⁴ஜனானி அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி பாசித்தியஸ்ஸ. ஆஜீவஹேது ஆஜீவகாரணா பி⁴க்கு²னீ பணீதபோ⁴ஜனானி அகி³லானா அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. ஆஜீவஹேது ஆஜீவகாரணா பி⁴க்கு² ஸூபம் வா ஓத³னம் வா அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி து³க்கடஸ்ஸா’’தி (பரி. 287) –

ஏவம் பாராஜிகாதி³வஸேன ட²பேத்வா து³ப்³பா⁴ஸிதம் ஆஜீவவிபத்திபச்சயா ச² ஆபத்திக்க²ந்தா⁴ பஞ்ஞத்தா. தி³ட்டி²விபத்திபச்சயா பாசித்தியது³க்கடவஸேன த்³வே ஆபத்திக்க²ந்தா⁴ பஞ்ஞத்தாதி ஸமனுபா⁴ஸனாய பாபிகாய தி³ட்டி²யா அப்படினிஸ்ஸஜ்ஜனே ஞத்தியா து³க்கடம், கம்மவாசாபரியோஸானே பாசித்தியந்தி ஏவம் தி³ட்டி²விபத்திபச்சயா பாசித்தியது³க்கடவஸேன த்³வே ஆபத்திக்க²ந்தா⁴ பஞ்ஞத்தா. ஏத்தா²தி விபத்திகதா²ஸு.

க³ணனுபக³தாதி தி³வஸக³ணனம் உபக³தபா⁴வோ. அஞ்ஞேஹி ‘‘இமம் சீவரம் இத்த²ன்னாமஸ்ஸ தே³மா’’தி பரஹத்தே² தி³ன்னம்பி ‘‘ந தாவ தம் க³ணனுபக³ம், யாவ ந ஹத்த²ம் க³ச்ச²தீ’’தி (மஹாவ. 259) சம்மக்க²ந்த⁴கே வுத்தத்தா யாவ ஆஹரித்வா வா ந தி³ன்னம், ‘‘தும்ஹாகம், ப⁴ந்தே, சீவரம் உப்பன்ன’’ந்தி பஹிணித்வா வா அனாரோசிதம், தாவ தி³வஸக³ணனம் ந உபேதி, அனதி⁴ட்டி²தம் வட்டதி. யதா³ பன ஆனேத்வா தி³ன்னம் ஹோதி, ‘‘உப்பன்ன’’ந்தி வா ஸுதம், ததோ பட்டா²ய க³ணனுபக³ம் ஹோதி, அந்தோத³ஸாஹே அதி⁴ட்டா²தப்³ப³ம். கதி²னஸஞ்ஞிதம் ஸமுட்டா²னமஸ்ஸாதி கதி²னஸமுட்டா²னம், ததியச²ட்ட²ஸமுட்டா²னவஸேன த்³விஸமுட்டா²னந்தி அத்தோ². காயவாசாஹி கத்தப்³ப³அதி⁴ட்டா²னவிகப்பனானம் அகரணேன காயவாசதோ, சித்தே பன ஸதி காயவாசாசித்ததோ ச ஸமுட்டா²தீதி வுத்தம் ஹோதி. அனதி⁴ட்டா²னாவிகப்பனவஸேன ஆபஜ்ஜனதோ அகிரியம். அஜானந்தோபி ஆபஜ்ஜதீதி நோஸஞ்ஞாவிமோக்க²ம். காயத்³வாரே ச வசீத்³வாரே ச கத்தப்³பா³கரணதோ காயகம்மம் வசீகம்மம்.

கதி²னஸிக்கா²பத³வண்ணனா நிட்டி²தா.

2. உதோ³ஸிதஸிக்கா²பத³வண்ணனா

பி⁴க்கு²னாதி பி⁴க்கு²ஸ்ஸாதி அத்தோ², ஸாமிஅத்தே² சேதம் கரணவசனம். தேனாஹ ‘‘புரிமஸிக்கா²பதே³ வியா’’திஆதி³. அத² கஸ்மா கரணவஸேனேவ கரணவசனஸ்ஸ அத்த²ம் அக்³க³ஹேத்வா ஸாமிவஸேன அத்தோ² வேதி³தப்³போ³தி ஆஹ ‘‘கரணவஸேன ஹீ’’திஆதி³. ஹீதி காரணத்தே² நிபாதோ. சி²ன்னபலிபோ³தோ⁴தி சி²ன்னசீவராவாஸபலிபோ³தோ⁴. ஏகாவ ரத்தி ஏகரத்தம், ஸமாஸந்தக³தஸ்ஸ அத்த²ம். திண்ணம் சீவரானம் ஸமாஹாரோதி திசீவரம். தேன திசீவரேன, தீஹி சீவரேஹீதி அத்தோ². ஏகேன விப்பவுத்தோ²பி (பாரா. அட்ட². 2.475-476) ஹி திசீவரேன விப்பவுத்தோ² நாம ஹோதி படிஸித்³த⁴பரியாபன்னேன விப்பவுத்த²த்தா, அவயவேபி வா ஸமுதா³யவோஹாரதோ. தேனாஹ ‘‘திசீவராதி⁴ட்டா²னனயேனா’’திஆதி³.

இதா³னி விப்பவாஸலக்க²ணவவத்தா²பனத்த²ம் ‘‘கா³மோ ஏகூபசாரோ’’திஆதி³மாஹ. தத்த² நிவேஸனந்தி உதோ³ஸிதாதீ³னம் வஸேன அகதாய பதிஸ்ஸயவிகதியா அதி⁴வசனம். உதோ³ஸிதோதி (பாரா. அட்ட². 2.482-487) யானாதீ³னம் ப⁴ண்டா³னம் ஸாலா. யோ ‘‘உத³வஸிதோ’’திபி வுச்சதி. அட்டோதி படிராஜாதி³படிபா³ஹனத்த²ம் இட்ட²காஹி கதோ ப³ஹலபி⁴த்திகோ சதுபஞ்சபூ⁴மிகோ பதிஸ்ஸயவிஸேஸோ. ‘‘அட்டோதி ப³ஹலபி⁴த்திககே³ஹம், யஸ்ஸ கோ³பானஸியோ அக்³க³ஹேத்வா இட்ட²காஹி ஏவ ச²த³னம் ஹோதீ’’தி அபரே. ‘‘அட்டாகாரேன கரீயதீ’’திபி வத³ந்தி. மாளோதி ஏககூடஸங்க³ஹிதோ சதுரஸ்ஸபாஸாதோ³, ஏககூடஸங்க³ஹிதோ வா அனேககோணவந்தோ பதிஸ்ஸயவிஸேஸோ. ‘‘மாளோதி வட்டாகாரேன கதஸேனாஸன’’ந்தி அபரே. பாஸாதோ³தி தீ³க⁴பாஸாதோ³, அட்³ட⁴யோகா³தி³பே⁴தோ³ அட்டமாளஹம்மியவஜ்ஜிதோ ஸப்³போ³ வா பாஸாதோ³. ஹம்மியந்தி முண்ட³ச்ச²த³னபாஸாதோ³. ‘‘சந்தி³யங்க³ணயுத்த’’ந்தி அபரே. நாவாதி த²லட்ட²உத³கட்ட²வஸேன த்³விதா⁴ நாவா. ஸத்தோ²தி ஜங்க⁴ஸத்தோ², ஸகடஸத்தோ² வா. த⁴ஞ்ஞகரணந்தி (பாரா. அட்ட². 2.491-494) க²லம் வுச்சதி. ஆராமோதி புப்பா²ராமோ, ப²லாராமோ வா. விஹாரோதி ஸபரிக்கி²த்தோ வா அபரிக்கி²த்தோ வா ஸகலோ ஆவாஸோ. ‘‘கே³ஹம்பீ’’தி கேசி. நிவேஸனாதீ³னி சேத்த² கா³மதோ ப³ஹி நிவிட்டா²னி க³ஹிதானி. அந்தோகா³மே டி²தானம் பன கா³மக்³க³ஹணேனேவ க³ஹிதத்தா கா³மபரிஹாரோயேவாதி. ‘‘நிவேஸனாத³யோ ஹம்மியபரியோஸானா கா³மபரிக்கே²பதோ ப³ஹி நிவிட்டா²’’தி அபரே. ஹத்த²பாஸாதிக்கமேதி ஏத்த² ஹத்த²பாஸோ நாம அட்³ட⁴தேய்யரதனப்பமாணோ பதே³ஸோ, தஸ்ஸ அதிக்கமோ ஹத்த²பாஸாதிக்கமோ, தஸ்மிம் ஹத்த²பாஸாதிக்கமே. ஹத்த²பாஸப்³ப⁴ந்தரே பன வத்து²ம் வட்டதி. தம் பமாணம் அதிக்கமித்வா ஸசேபி இத்³தி⁴மா பி⁴க்கு² ஆகாஸே அருணம் உட்டா²பேதி, நிஸ்ஸக்³கி³யமேவ ஹோதி.

அயம் பனேத்த² வினிச்ச²யோ – ஸசே (பாரா. அட்ட². 2.477-478) கா³மோ ஏகஸ்ஸ ரஞ்ஞோ வா போ⁴ஜகஸ்ஸ வா வஸேன ஏககுலஸ்ஸ ஹோதி, பாகாராதி³னா பரிக்கி²த்தத்தா ஏகூபசாரோ ச, ஏவரூபே கா³மே சீவரம் நிக்கி²பித்வா தஸ்மிம் கா³மப்³ப⁴ந்தரே யதா²ருசிதட்டா²னே வஸிதப்³ப³ம், ஸசே அபரிக்கி²த்தோ, யஸ்மிம் க⁴ரே சீவரம் நிக்கி²த்தம் ஹோதி, தஸ்மிம் க⁴ரே வஸிதப்³ப³ம், தஸ்ஸ க⁴ரஸ்ஸ ஸமந்ததோ ஹத்த²பாஸா வா ந விஜஹிதப்³ப³ம்.

ஸசே கா³மோ வேஸாலிகுஸினாராத³யோ விய நானாராஜூனம் வா போ⁴ஜகானம் வா ஹோதி, வுத்தப்பகாரேன பரிக்கி²த்தோ ச, ஏவரூபே கா³மே யஸ்மிம் க⁴ரே சீவரம் நிக்கி²த்தம் ஹோதி, தஸ்மிம் க⁴ரே வா வத்த²ப்³ப³ம், தஸ்ஸ க⁴ரஸ்ஸ ஹத்த²பாஸா வா ந விஜஹிதப்³ப³ம். யஸ்ஸா வீதி²யா க⁴ரம் ஹோதி, தஸ்ஸா வீதி²யா தஸ்ஸ க⁴ரஸ்ஸ ஸம்முகா²ட்டா²னே ஸபா⁴யம் வா க⁴ரத்³வாரே வா வத்த²ப்³ப³ம், தேஸம் ஸபா⁴த்³வாரானம் ஹத்த²பாஸா வா ந விஜஹிதப்³ப³ம்.

ஸசே ஸோ கா³மோ அபரிக்கி²த்தோ, யஸ்மிம் க⁴ரே சீவரம் நிக்கி²த்தம், தத்த² வா தஸ்ஸ ஹத்த²பாஸே வா வத்த²ப்³ப³ம். நிவேஸனே பன ஸசே ஏககுலஸ்ஸ நிவேஸனம் ஹோதி, பரிக்கி²த்தஞ்ச, அந்தோனிவேஸனே சீவரம் நிக்கி²பித்வா அந்தோனிவேஸனே வத்த²ப்³ப³ம். அபரிக்கி²த்தம் சே ஹோதி, யஸ்மிம் க³ப்³பே⁴ சீவரம் நிக்கி²த்தம், தஸ்மிம் வத்த²ப்³ப³ம், தஸ்ஸ க³ப்³ப⁴ஸ்ஸ ஹத்த²பாஸா வா ந விஜஹிதப்³ப³ம்.

ஸசே நானாகுலஸ்ஸ நிவேஸனம் ஹோதி, பரிக்கி²த்தஞ்ச, யஸ்மிம் க³ப்³பே⁴ சீவரம் நிக்கி²த்தம், தஸ்மிம் க³ப்³பே⁴ வத்த²ப்³ப³ம், ஸப்³பே³ஸம் ஸாதா⁴ரணத்³வாரமூலே வா தேஸம் க³ப்³ப⁴த்³வாரமூலானம் ஹத்த²பாஸா வா ந விஜஹிதப்³ப³ம். அபரிக்கி²த்தம் சே, யஸ்மிம் க³ப்³பே⁴ சீவரம் நிக்கி²த்தம், தஸ்மிம் க³ப்³பே⁴ வத்த²ப்³ப³ம், தஸ்ஸ க³ப்³ப⁴ஸ்ஸ ஹத்த²பாஸா வா ந விஜஹிதப்³ப³ம். ஏஸ நயோ உதோ³ஸிதாதீ³ஸுபி.

ஸத்தோ² பன ஜங்க⁴ஸத்தோ² வா ஹோது, ஸகடஸத்தோ² வா. ஸசே ஏககுலஸ்ஸ ஸத்தோ² ஹோதி, ஸத்தே² சீவரம் நிக்கி²பித்வா புரதோ வா பச்ச²தோ வா ஸத்தப்³ப⁴ந்தரா ந விஜஹிதப்³பா³, பஸ்ஸதோ அப்³ப⁴ந்தரம் ந விஜஹிதப்³ப³ம். ஸசே (பாரா. அட்ட². 2.489) ஸத்தோ² க³ச்ச²ந்தோ கா³மம் வா நதி³ம் வா பரியாதி³யித்வா திட்ட²தி, அந்தோபவிட்டே²ன ஸத்³தி⁴ம் ஏகாப³த்³தோ⁴ ஹுத்வா ஓரஞ்ச பாரஞ்ச ப²ரித்வா டி²தோ ஹோதி, ஸத்த²பரிஹாரோவ லப்³ப⁴தி. அத² கா³மே வா நதி³யா வா பரியாபன்னோ ஹோதி அந்தோபவிட்டோ², கா³மபரிஹாரோ சேவ நதி³பரிஹாரோ ச லப்³ப⁴தி. ஸசே விஹாரஸீமம் அதிக்கமித்வா திட்ட²தி, அந்தோஸீமாய ச சீவரம் ஹோதி, விஹாரம் க³ந்த்வா வஸிதப்³ப³ம். ஸசே ப³ஹிஸீமாய சீவரம் ஹோதி, ஸத்த²ஸமீபேயேவ வஸிதப்³ப³ம். ஸசே க³ச்ச²ந்தோ ஸகடே வா ப⁴க்³கே³, கோ³ணே வா நட்டே² அந்தரா சி²ஜ்ஜதி, யஸ்மிம் கோட்டா²ஸே சீவரம் நிக்கி²த்தம், தத்த² வஸிதப்³ப³ம்.

கே²த்தேபி (பாரா. அட்ட². 2.490) ஸசே ஏககுலஸ்ஸ கே²த்தம் ஹோதி, பரிக்கி²த்தஞ்ச, அந்தோகே²த்தே சீவரம் நிக்கி²பித்வா அந்தோகே²த்தே வத்த²ப்³ப³ம். ஸசே அபரிக்கி²த்தம், ஹத்த²பாஸா சீவரம் ந விஜஹிதப்³ப³ம். ஸசே நானாகுலஸ்ஸ கே²த்தம் ஹோதி, பரிக்கி²த்தஞ்ச, அந்தோகே²த்தே சீவரம் நிக்கி²பித்வா கே²த்தத்³வாரமூலே வா வத்த²ப்³ப³ம், தஸ்ஸ ஹத்த²பாஸா வா ந விஜஹிதப்³ப³ம். ஸசே அபரிக்கி²த்தம், சீவரம் ஹத்த²பாஸா ந விஜஹிதப்³ப³ம். ஏஸ நயோ த⁴ஞ்ஞகரணாராமேஸு த்³வீஸுபி. விஹாரே பன நிவேஸனே வுத்தஸதி³ஸோவ வினிச்ச²யோ.

ருக்க²மூலே பன யம் மஜ்ஜ²ன்ஹிகே காலே ஸமந்தா சா²யா ப²ரதி, தஸ்மிம் டா²னே அவிரளே பதே³ஸே தஸ்ஸ சா²யாய பு²ட்டோ²காஸஸ்ஸ அந்தோயேவ நிக்கி²பிதப்³ப³ம். ஸசே விரளஸாக²ஸ்ஸ ருக்க²ஸ்ஸ ஆதபேன பு²ட்டோ²காஸே ட²பேதி, அருணுக்³க³மனே ச ஸோ பி⁴க்கு² தஸ்ஸ ஹத்த²பாஸே ந ஹோதி, அஞ்ஞஸ்மிம் டா²னே தஸ்ஸ சா²யாயபி ஹோதி, நிஸ்ஸக்³கி³யம் ஹோதி. ஸசே நானாகுலஸ்ஸ ருக்கோ² ஹோதி, சீவரஸ்ஸ ஹத்த²பாஸா ந விஜஹிதப்³ப³ம்.

அஜ்ஜோ²காஸே பன விஞ்ஜா²டவிஆதீ³ஸு அரஞ்ஞேஸுபி ஸமுத்³த³மஜ்ஜே² மச்ச²ப³ந்தா⁴னம் அக³மனபத²தீ³பகேஸுபி சீவரம் ட²பேத்வா ததோ ஸமந்தா ஸத்தப்³ப⁴ந்தரே பதே³ஸே யத்த² கத்த²சி வஸிதப்³ப³ம், இதோ அஞ்ஞத்த² வஸந்தோ விப்பவுத்தோ² நாம ஹோதீதி த³ட்ட²ப்³ப³ம்.

இமஸ்ஸ பன வித்தா²ரஸ்ஸ இத⁴ அவுத்தத்தா, ஸமந்தபாஸாதி³காயஞ்ச வுத்தத்தா ‘‘அயமேத்த² ஸங்கே²போ’’திஆதி³ வுத்தம். ஏத்தா²தி ‘‘திசீவரேன விப்பவஸேய்யா’’தி ஏதஸ்மிம் பதே³. ஸங்கே²போதி ஸங்கே²பவண்ணனா. ஏத்த² பன பாளியம் (பாரா. 477) ‘‘கா³மோ ஏகூபசாரோ நானூபசாரோ’’திஆதி³னா அவிஸேஸேன மாதிகம் நிக்கி²பித்வாபி கா³மனிவேஸனஉதோ³ஸிதகே²த்தத⁴ஞ்ஞகரணஆராமவிஹாரானம் ஏகூபசாரனானூபசாரதா ‘‘கா³மோ ஏகூபசாரோ நாம ஏககுலஸ்ஸ கா³மோ ஹோதி பரிக்கி²த்தோ ச அபரிக்கி²த்தோ சா’’திஆதி³னா (பாரா. 478) பரிக்கி²த்தாபரிக்கி²த்தவஸேன விப⁴த்தா. அட்டமாளபாஸாத³ஹம்மியனாவாஸத்த²ருக்க²மூலஅஜ்ஜோ²காஸானம் பன ஏவம் அவத்வா ‘‘ஏககுலஸ்ஸ அட்டோ ஹோதி, நானாகுலஸ்ஸ அட்டோ ஹோதீ’’திஆதி³னா (பாரா. 484) நயேன ஏககுலனானாகுலவஸேன ச அந்தே ‘‘அஜ்ஜோ²காஸோ ஏகூபசாரோ நாம அகா³மகே அரஞ்ஞே ஸமந்தா ஸத்தப்³ப⁴ந்தரா ஏகூபசாரோ, ததோ பரம் நானூபசாரோதி (பாரா. 494) ச ஏவம் ஏகூபசாரனானூபசாரதா விப⁴த்தா. தஸ்மா கா³மாதீ³ஸு பரிக்கி²த்தம் ஏகூபசாரம், அபரிக்கி²த்தம் நானூபசாரந்தி ச, அட்டாதி³ஸு யம் ஏககுலஸ்ஸ, தம் ஏகூபசாரம், யம் நானாகுலஸ்ஸ, தம் நானூபசாரந்தி ச க³ஹேதப்³ப³ம். அஜ்ஜோ²காஸே வுத்தனயேன க³ஹேதப்³ப³ம். உபசாரோதி ஹி ‘‘கா³மோ ஏகூபசாரோ நானூபசாரோ’’திஆதீ³ஸு த்³வாரம், ‘‘அஜ்ஜோ²காஸோ ஏகூபசாரோ’’தி ஏத்த² ஸமந்தா ஸத்தப்³ப⁴ந்தரஸங்கா²தம் பமாணந்தி அபரே.

அஞ்ஞத்ர பி⁴க்கு²ஸம்முதியாதி பி⁴க்கு²னோ ஸங்கே⁴ன தி³ன்னா ஸம்முதி பி⁴க்கு²ஸம்முதி, தம் வினாதி அத்தோ². தேனாஹ ‘‘யம் ஸங்கோ⁴’’திஆதி³. அவிப்பவாஸஸம்முதிம் தே³தீதி அவிப்பவாஸா ஸம்முதி, அவிப்பவாஸாய வா ஸம்முதி அவிப்பவாஸஸம்முதி, தம் ஞத்திது³தியேன கம்மேன தே³தீதி அத்தோ².

ஸந்தருத்தரேனாதி ‘‘அந்தர’’ந்தி அந்தரவாஸகோ வுச்சதி, ‘‘உத்தர’’ந்தி உத்தராஸங்கோ³, ஸஹ அந்தரேன உத்தரம் ஸந்தருத்தரம், தேன ஸந்தருத்தரேன, ஸஹ அந்தரவாஸகேன உத்தராஸங்கே³னாதி அத்தோ². அந்தோஅருணே பச்சுத்³த⁴டேதி நிவத்தித்வா ஸம்பாபுணிதுமஸக்கோந்தேன தத்தே²வ ட²த்வா அந்தோ அருணே பச்சுத்³த⁴டே. பச்சாக³ந்தப்³ப³ந்தி யதா² ரோகோ³ ந குப்பதி, ததா² புன சீவரஸ்ஸ ட²பிதட்டா²னம் ஆக³ந்தப்³ப³ம். யதோ பட்டா²ய ஹி ஸத்த²ம் வா பரியேஸதி, ‘‘க³ச்சா²மீ’’தி ஆபோ⁴க³ம் வா கரோதி, ததோ பட்டா²ய வட்டதி. ‘‘ந தா³னி க³மிஸ்ஸாமீ’’தி ஏவம் பன து⁴ரனிக்கே²பம் கரோந்தேன பச்சுத்³த⁴ரிதப்³ப³ம் ‘‘அதிரேகசீவரட்டா²னே ட²ஸ்ஸதீ’’தி. தேனாஹ ‘‘தத்தே²வ வா டி²தேன பச்சுத்³த⁴ரிதப்³ப³’’ந்தி. ஸோதி யஸ்ஸ ஸம்முதி தி³ன்னா, ஸோ ரோகோ³. லத்³த⁴கப்பியமேவ புன ஸம்முதிதா³னகிச்சம் நத்தீ²தி அதி⁴ப்பாயோ.

அதி⁴ட்டி²தசீவரதாதி திசீவராதி⁴ட்டா²னனயேன அதி⁴ட்டி²தசீவரதா. விப்பவாஸோ நாம யதி³ ப³த்³த⁴ஸீமாயம் சீவரம் ஹோதி, ததோ ப³ஹி அருணுட்டா²பனம். அத² அப³த்³த⁴ஸீமாயம், யதா²வுத்தகா³மாதீ³னம் ப³ஹி ஹத்த²பாஸாதிக்கமே அருணுட்டா²பனம். ப³த்³த⁴ஸீமாயம் பன யத்த² கத்த²சி சீவரம் ட²பேத்வா அந்தோஸீமாயமேவ யத்த² கத்த²சி வஸிதும் வட்டதி. இத⁴ அபச்சுத்³த⁴ரணம் அகிரியாதி ஸம்ப³ந்தோ⁴.

உதோ³ஸிதஸிக்கா²பத³வண்ணனா நிட்டி²தா.

3. அகாலசீவரஸிக்கா²பத³வண்ணனா

புரிமஸிக்கா²பதே³ விய ஏத்தா²பி பி⁴க்கு²னாதி ஸாமிஅத்தே² கரணவசனந்தி ஆஹ ‘‘நிட்டி²தசீவரஸ்மிம் பி⁴க்கு²னா’’திஆதி³. ‘‘அகாலசீவரம் நாம அனத்த²தே கதி²னே ஏகாத³ஸமாஸே உப்பன்னம், அத்த²தே கதி²னே ஸத்தமாஸே உப்பன்னம், காலேபி ஆதி³ஸ்ஸ தி³ன்னம், ஏதம் அகாலசீவரம் நாமா’’தி (பாரா. 500) பத³பா⁴ஜனியம் வுத்தத்தா ‘‘ய்வாயம் அனத்த²தே கதி²னே’’திஆதி³மாஹ. ய்வாயம் சீவரகாலோ வுத்தோதி ஸம்ப³ந்தோ⁴. வஸ்ஸானஸ்ஸாதி வஸ்ஸானஸங்கா²தஸ்ஸ உதுனோ. பச்சி²மோ மாஸோ நாம சீவரமாஸோ. தஸ்மிஞ்ஹி அனத்த²தேபி கதி²னே உப்பன்னம் சீவரம் அனதி⁴ட்டி²தம், அவிகப்பிதம் ட²பேதும் வட்டதி. பஞ்ச மாஸாதி பச்சி²மகத்திகமாஸோ, ஹேமந்திகா சத்தாரோ சாதி பஞ்ச மாஸா. அஞ்ஞதா³தி அனத்த²தே கதி²னே ஏகாத³ஸமாஸே, அத்த²தே கதி²னே ஸத்தமாஸே. காலேபீதி ‘‘அனத்த²தே கதி²னே சீவரமாஸோ, அத்த²தே கதி²னே பஞ்ச மாஸா’’தி யதா²வுத்தசீவரகாலேபி. ‘‘ஆதி³னா நயேனா’’தி இமினா ‘‘த³தா³மி த³ஜ்ஜாமீ’’திஆதீ³னம் (பாரா. அட்ட². 2.469) ஸங்க³ஹோ. கிஞ்சாபி சேதானி ஸப்³பா³னி ‘‘அகாலசீவர’’ந்தி வுத்தானி, ததா²பி பிட்டி²ஸமயேயேவ உப்பன்னானி ‘‘அகாலசீவர’’ந்தி இதா⁴தி⁴ப்பேதானி.

‘‘காலே ஸங்க⁴ஸ்ஸ இத³ம் அகாலசீவர’’ந்தி தி³ன்னம் பன அகாலசீவரஸாமஞ்ஞதோ அத்து²த்³தா⁴ரவஸேன வுத்தம். யதா² பிட்டி²ஸமயே உப்பன்னம் சீவரம் வுட்ட²வஸ்ஸேஹி, ஸேஸேஹி ச ஸம்முகீ²பூ⁴தேஹி பா⁴ஜேதும் லப்³ப⁴தீதி அகாலசீவரம் நாம ஜாதம், ததே²வித³ம்பீதி ததி³த³ம் அகாலசீவரஸாமஞ்ஞம். யதி³ ஏவம் ‘‘புக்³க³லஸ்ஸ வா இத³ம் துய்ஹம் ‘த³ம்மீ’திஆதி³னா நயேன தி³ன்ன’’ந்தி கஸ்மா வுத்தம், ந ஹி புக்³க³லஸ்ஸ ஆதி³ஸ்ஸ தி³ன்னம் கேனசி பா⁴ஜனீயம் ஹோதீதி? நாயம் விரோதோ⁴, ஆதி³ஸ்ஸ தா³னஸாமஞ்ஞதோ லப்³ப⁴மானமத்த²ம் த³ஸ்ஸேதும் ததா² வுத்தந்தி. அத்தனோ வா த⁴னேனாதி அத்தனோ கப்பாஸஸுத்தாதி³னா த⁴னேன. இமஸ்ஸ ‘‘உப்பஜ்ஜேய்யா’’தி இமினா ஸம்ப³ந்தோ⁴ வேதி³தப்³போ³. ‘‘ஸீமாய தே³தீ’’திஆதி³ புக்³க³லாதி⁴ட்டா²னனயேன வுத்தம். ஏத்த² பன ஸீமாய தா³னம் ஏகா மாதிகா, கதிகாய தா³னம் து³தியா…பே… புக்³க³லஸ்ஸ தா³னம் அட்ட²மா.

‘‘பரிக்கே²பாரஹட்டா²னேனா’’தி இமினா அபரிக்கி²த்தஸ்ஸ விஹாரஸ்ஸ து⁴வஸன்னிபாதட்டா²னாதி³தோ பட²மலேட்³டு³பாதஸ்ஸ அந்தோ உபசாரஸீமாதி த³ஸ்ஸேதி. இதா³னி து³தியலேட்³டு³பாதஸ்ஸபி அந்தோ உபசாரஸீமாயேவாதி த³ஸ்ஸேதும் ‘‘அபிசா’’திஆதி³ ஆரத்³த⁴ம். து⁴வஸன்னிபாதட்டா²னம்பி ஸீமாபரியந்தக³தமேவ வேதி³தப்³ப³ம். ஆவாஸே வட்³ட⁴ந்தே வட்³ட⁴தீதி ஸசே உபசாரதோ அப³ஹிபூ⁴தோ ஹுத்வா ஆவாஸோ வட்³ட⁴தீதி அதி⁴ப்பாயோ. மஹாபச்சரியம் பன ‘‘பி⁴க்கூ²ஸுபி வட்³ட⁴ந்தேஸு வட்³ட⁴தீ’’தி வுத்தம். ‘‘ஸசே விஹாரே ஸன்னிபதிதபி⁴க்கூ²ஹி ஸத்³தி⁴ம் ஏகாப³த்³தா⁴ ஹுத்வா யோஜனஸதம்பி பூரேத்வா நிஸீத³ந்தி, யோஜனஸதம்பி உபசாரஸீமாவ ஹோதி, ஸப்³பே³ஸம் லாபோ⁴ பாபுணாதீ’’தி (மஹாவ. அட்ட². 379) ஸமந்தபாஸாதி³காயம் வுத்தம். பி⁴க்கு²னீனம் ஆராமபவேஸனஸேனாஸனாபுச்ச²னானீதி ஆக³ந்துகக³மிகானம் பி⁴க்கு²னீனம் ஆராமபவேஸனாபுச்ச²னம், ஸேனாஸனாபுச்ச²னஞ்சாதி அத்தோ². ததா² ஹி ஆக³ந்துகாய பி⁴க்கு²னியா ஆராமபவேஸனம் ஆபுச்சி²தப்³ப³ம், க³மிகாய ஸங்கி⁴கம் த³ஸவித⁴ம் ஸேனாஸனம். ஏத்த² ச கிஞ்சாபி ‘‘பி⁴க்கு²னீன’’ந்தி வுத்தம், க³மிகஸ்ஸ பன பி⁴க்கு²ஸ்ஸாபி இமிஸ்ஸாயேவ ஸீமாய வஸேன ஸேனாஸனாபுச்ச²னம் வேதி³தப்³ப³ம்.

பரிவாஸமானத்தாரோசனந்தி பாரிவாஸிகமானத்தசாரீனம் பரிவாஸாரோசனம், மானத்தாரோசனஞ்ச. வஸ்ஸச்சே²த³னிஸ்ஸயஸேனாஸனக்³கா³ஹாதி³விதா⁴னந்தி வஸ்ஸச்சே²த³விதா⁴னம், நிஸ்ஸயக்³கா³ஹவிதா⁴னம், ஸேனாஸனக்³கா³ஹவிதா⁴னந்தி அத்தோ². ஆதி³ஸத்³தே³ன நிஸ்ஸயபடிப்பஸ்ஸத்³தி⁴, லாப⁴க்³கா³ஹோ ஆக³ந்துகவத்தம் பூரேத்வா ஆராமபவேஸனந்தி ஏவமாதி³கம் ஸங்க³ண்ஹாதி. இமிஸ்ஸாவ ஸீமாய வஸேனாதி உபசாரஸீமாயேவாதி யதா²ஸம்ப⁴வம் அந்தோ, ப³ஹி ச இமஸ்ஸ ஸப்³ப³ஸ்ஸ லப்³ப⁴னதோ வுத்தம்.

லாப⁴த்தா²ய ட²பிதா ஸீமா லாப⁴ஸீமா (மஹாவ. 379), ஸா ச கோ² நேவ ஸம்மாஸம்பு³த்³தே⁴ன அனுஞ்ஞாதா, ந த⁴ம்மஸங்கா³ஹகத்தே²ரேஹி ட²பிதா, அபிச கோ² லாப⁴தா³யகேஹி. தேனாஹ ‘‘யம் ராஜராஜமஹாமத்தாத³யோ’’திஆதி³. ஸமந்தாதி விஹாரஸ்ஸ ஸமந்தா. யந்தி ஸுங்கஸஸ்ஸாதி³. ‘‘ஸீமம் ட²பேந்தீ’’தி பாட²ஸேஸோ. ஏகஸ்ஸ ரஞ்ஞோ ஆணாபவத்திட்டா²னந்தி சோளபோ⁴கோ³ கேரளபோ⁴கோ³தி ஏவம் ஏகேகஸ்ஸ ரஞ்ஞோ ஆணாபவத்திட்டா²னம். த்³விதா⁴ ஆபோ க³தோ ஏத்தா²தி தீ³போ, ஓகே⁴ன அனஜ்ஜோ²த்த²தோ பூ⁴மிபா⁴கோ³, ஸோவ ஸீமா தீ³பஸீமா. தேனாஹ ஸமுத்³த³ந்தேனா’’திஆதி³. சக்கவாளஸீமா சக்கவாளபப்³ப³தேனேவ பரிச்சி²ன்னாதி ஆஹ ‘‘ஏகசக்கவாளபப்³ப³தபரிக்கே²பப்³ப⁴ந்தரம் சக்கவாளஸீமா’’தி.

ஸேஸாதி க²ண்ட³ஸீமாத³யோ. க²ண்ட³ஸீமாய தே³மாதி தி³ன்னந்தி க²ண்ட³ஸீமாய கேனசி கம்மேன ஸன்னிபதிதம் ஸங்க⁴ம் தி³ஸ்வா ‘‘க²ண்ட³ஸீமாயம் ஸங்க⁴ஸ்ஸ தே³மா’’தி தி³ன்னம். க²ண்ட³ஸீமாய டி²தே ருக்கே² வா பப்³ப³தே வா டி²தோபி ஹேட்டா² வா பத²விவேமஜ்ஜ²க³தோபி க²ண்ட³ஸீமாயேவ டி²தோதி வேதி³தப்³போ³. ஸமானஸம்வாஸஸீமாய தி³ன்னந்தி ‘‘ஸமானஸம்வாஸஸீமாய த³ம்மீ’’தி தி³ன்னம். ஏஸ நயோ ஸேஸேஸுபி. க²ண்ட³ஸீமா ஸீமந்தரிகட்டா²னம் ந பாபுணாதி தத்த² ஸமானஸம்வாஸஸீமாய அபா⁴வதோதி அதி⁴ப்பாயோ. ஸமானஸம்வாஸஅவிப்பவாஸஸீமாஸு தி³ன்னஸ்ஸ இத³ம் நானாத்தம் – ‘‘அவிப்பவாஸஸீமாய த³ம்மீ’’தி தி³ன்னம் கா³மட்டா²னம் ந பாபுணாதி. கஸ்மா? ‘‘ட²பேத்வா கா³மஞ்ச கா³மூபசாரஞ்சா’’தி (மஹாவ. 144) வுத்தத்தா. ‘‘ஸமானஸம்வாஸஸீமாய த³ம்மீ’’தி தி³ன்னம் பன கா³மே டி²தானம்பி பாபுணாதீதி. அப்³ப⁴ந்தரஸீமாஉத³குக்கே²பஸீமாஸு தி³ன்னந்தி தத்த² உபோஸதா²தி³அத்தா²ய ஸன்னிபதிதே தி³ஸ்வா ‘‘இமிஸ்ஸா அப்³ப⁴ந்தரஸீமாய தே³மா’’திஆதி³னா தி³ன்னம். ஜனபத³ரட்ட²ரஜ்ஜதீ³பசக்கவாளஸீமாஸுபி கா³மஸீமாதீ³ஸு வுத்தஸதி³ஸோவ வினிச்ச²யோதி ஆஹ ‘‘ஜனபத³ஸீமாதீ³ஸூ’’திஆதி³. ஏகோபி க³ந்த்வா ஸப்³பே³ஸம் ஸங்க³ண்ஹிதும் லப⁴தீதி ஏகோபி க³ந்த்வா இத⁴ வஸ்ஸக்³கே³ன பா⁴ஜேத்வா க³ஹேத்வா ஆக³ந்தும் லப⁴தீதி அத்தோ². ஏகோதி ஸபா⁴கோ³ ஏகோ பி⁴க்கு², அயம்பி பா⁴க³மேவ க³ஹேதும் லப⁴தி. தேனாஹ ‘‘ஸபா⁴கா³னம் பா⁴க³ம் க³ண்ஹாதீ’’தி.

ஏவம் தாவ யோ ஸீமம் பராமஸித்வா தே³தி, தஸ்ஸ தா³னே வினிச்ச²யம் வத்வா இதா³னி யோ ‘‘அஸுகஸீமாயா’’தி வத்தும் ந ஜானாதி, கேவலம் ‘‘ஸீமா’’தி வசனமத்தமேவ ஜானந்தோ விஹாரம் ஆக³ந்த்வா ‘‘ஸீமாய த³ம்மீ’’தி வா ‘‘ஸீமட்ட²கஸங்க⁴ஸ்ஸ த³ம்மீ’’தி வா ப⁴ணதி, தத்த² வினிச்ச²யம் த³ஸ்ஸேதும் ‘‘யோ பன விஹாரம் பவிஸித்வா’’திஆதி³மாஹ. கதரந்தி கதரஸீமம். அஹமேதம் பே⁴த³ம் ந ஜானாமீதி அஹம் ‘‘அஸுகா ஸீமா’’தி ஏதம் விபா⁴க³ம் ந ஜானாமி. உபசாரஸீமட்டே²ஹி பா⁴ஜேதப்³ப³ம் லாப⁴ஸ்ஸ உபசாரஸீமாய பரிச்சி²ன்னத்தாதி அதி⁴ப்பாயோ. ஸாதி ஸமானலாப⁴கதிகா.

யத்த² மய்ஹம் து⁴வகாரா கரீயந்தீதி (மஹாவ. அட்ட². 379) ஏத்த² யஸ்மிம் விஹாரே தஸ்ஸ சீவரதா³யகஸ்ஸ ஸந்தகம் ஸங்க⁴ஸ்ஸ பாகவத்தம் வா வத்ததி. யஸ்மிம் விஹாரே பி⁴க்கூ² அத்தனோ பா⁴ரம் கத்வா ஸதா³ கே³ஹே போ⁴ஜேதி, யத்த² வா அனேன ஆவாஸோ வா காரிதோ, ஸலாகப⁴த்தாதீ³னி வா நிப³த்³தா⁴னி, இமே து⁴வகாரா நாம. யேன பன ஸகலோபி விஹாரோ பதிட்டா²பிதோ, தத்த² வத்தப்³ப³மேவ நத்தி². தேனாஹ ‘‘யத்த² தஸ்ஸ பாகவத்தம் வா வத்ததீ’’திஆதி³. தத்த² பாகவத்தந்தி தா³னவத்தம். வத்ததீதி பவத்ததி. யதோதி யஸ்மா விஹாரா. யத்தா²தி யஸ்மிம் விஹாரே. ஸப்³ப³த்தா²தி ஸப்³பே³ஸு விஹாரேஸு. மாதிகம் ஆரோபேத்வாதி ஏகஸ்மிம் விஹாரே பி⁴க்கூ² ப³ஹுதரா, ஏகஸ்மிம் தோ²கதரா, ஏகஞ்ச வத்த²ம், து⁴வகாரட்டா²னஞ்ச ப³ஹுகம், கத்த² தே³மாதி புச்சி²த்வா, யதி³ பன மஞ்சோ வா பீட²ம் வா ஏகமேவ ஹோதி, தம் புச்சி²த்வா யஸ்ஸ வா விஹாரஸ்ஸ, ஏகவிஹாரேபி வா யஸ்ஸ ஸேனாஸனஸ்ஸ ஸோ விசாரேதி, தத்த² தா³தப்³ப³ம். ஸசேபி ‘‘அஸுகபி⁴க்கு² க³ண்ஹதூ’’தி வத³தி, வட்டதி. அத² ‘‘மய்ஹம் து⁴வகாரே தே³தா²’’தி வத்வா அவிசாரேத்வாவ க³ச்ச²தி, ஸங்க⁴ஸ்ஸபி விசாரேதும் வட்டதி. ஏவம் பன விசாரேதப்³ப³ம் – ‘‘ஸங்க⁴த்தே²ரஸ்ஸ வஸனட்டா²னே தே³தா²’’தி வத்தப்³ப³ம். ஸசே தத்த² ஸேனாஸனம் பரிபுண்ணம் ஹோதி, யத்த² நப்பஹோதி, தத்த² தா³தப்³ப³ம். ஸசே ஏகோ பி⁴க்கு² ‘‘மய்ஹம் வஸனட்டா²னே ஸேனாஸனபரிபோ⁴க³ப⁴ண்ட³ம் நத்தீ²’’தி வத³தி, தத்த² தா³தப்³ப³ம்.

ஸங்க⁴ஸ்ஸ த³ம்மீதி தி³ன்னந்தி ‘‘இமானி சீவரானி ஸங்க⁴ஸ்ஸ த³ம்மீ’’தி ஏவம் தி³ன்னம். ததோ ப³ஹித்³தா⁴பீதி உபசாரஸீமாதோ ப³ஹித்³தா⁴பி. தேஹி ஸத்³தி⁴ந்தி உபசாரஸீமாக³தேஹி ஸத்³தி⁴ம். ஏகாப³த்³தா⁴னஞ்ச பாபுணாதி பரிஸாவஸேன வட்³டி⁴தா ஸீமா ஹோதீதி கத்வாதி அதி⁴ப்பாயோ. தஸ்மாதி யஸ்மா உபசாரஸீமாக³தானம் பாபுணாதி, யஸ்மா ச ததோ ப³ஹித்³தா⁴பி உபசாரஸீமோக்கந்தேஹி ஏகாப³த்³தா⁴னம் பாபுணாதி, தஸ்மா. தேஸந்தி உபசாரஸீமாக³தானம், ததோ ப³ஹித்³தா⁴ தேஹி ஸத்³தி⁴ம் ஏகாப³த்³தா⁴னஞ்ச. கா³ஹதே ஸதீதி அந்தேவாஸிகாதி³கே க³ண்ஹந்தே ஸதி. அஸம்பத்தானம்பீதி உபசாரஸீமாயம் டி²தேஹி க⁴ண்டிம் பஹரித்வா காலம் கோ⁴ஸேத்வா லாப⁴பா⁴ஜனட்டா²னம் அஸம்பத்தானம்பி உபசாரஸீமாய பவிட்டா²னம், தேஹி வா ஸத்³தி⁴ம் ஏகாப³த்³தா⁴னம் ஹுத்வா அத்தனோ விஹாரத்³வாரே வா அந்தோவிஹாரேயேவ வா டி²தானஞ்சாதி அத்தோ². பா⁴கோ³ தா³தப்³போ³தி ஸங்க⁴னவகஸ்ஸ தி³ன்னேபீதி அதி⁴ப்பாயோ. து³தியபா⁴கே³ பன தே²ராஸனம் ஆருள்ஹே ஆக³தானம் பட²மபா⁴கோ³ ந பாபுணாதி. து³தியபா⁴க³தோ வஸ்ஸக்³கே³ன தா³தப்³ப³ம்.

ஸசே பன ‘‘ப³ஹிஉபசாரஸீமாயம் டி²தானம் தே³தா²’’தி வத³ந்தி, ந தா³தப்³ப³ம். யதி³ பன விஹாரோ மஹா ஹோதி, தே²ராஸனதோ பட்டா²ய வத்தே²ஸு தீ³யமானேஸு அலஸஜாதிகா மஹாதே²ரா பச்சா² ஆக³ச்ச²ந்தி, ‘‘ப⁴ந்தே, வீஸதிவஸ்ஸானம் தீ³யதி, தும்ஹாகம் டி²திகா அதிக்கந்தா’’தி ந வத்தப்³பா³. டி²திகம் ட²பேத்வா தேஸம் த³த்வா பச்சா² டி²திகாய தா³தப்³ப³ம்.

‘‘அஸுகவிஹாரே கிர ப³ஹுசீவரம் உப்பன்ன’’ந்தி ஸுத்வா யோஜனந்தரிகவிஹாரதோபி பி⁴க்கூ² ஆக³ச்ச²ந்தி, ஸம்பத்தஸம்பத்தானம் டி²தட்டா²னதோ பட்டா²ய தா³தப்³ப³ம், அயமேத்த² ஸங்கே²போ. வித்தா²ரோ பன ஸமந்தபாஸாதி³காய சீவரக்க²ந்த⁴கவண்ணனாயம் (மஹாவ. அட்ட². 379) வுத்தனயேன வேதி³தப்³போ³.

ஏவம் விஹாரம் பவிஸித்வா ‘‘இமானி சீவரானி ஸங்க⁴ஸ்ஸ த³ம்மீ’’தி தி³ன்னேஸு வினிச்ச²யம் வத்வா இதா³னி ப³ஹிஉபசாரஸீமாயம் பி⁴க்கு²ம் தி³ஸ்வா ‘‘ஸங்க⁴ஸ்ஸ த³ம்மீ’’தி தி³ன்னேஸு வினிச்ச²யம் த³ஸ்ஸேதும் ‘‘யம் பனா’’திஆதி³ வுத்தம். ஏகாப³த்³த⁴பரிஸாய பாபுணாதீதி ஸசே யோஜனம் ப²ரித்வா பரிஸா டி²தா ஹோதி, ஏகாப³த்³தா⁴ சே, ஸப்³பே³ஸம் பாபுணாதீதி அத்தோ². ஏகாப³த்³த⁴தா சேத்த² த்³வாத³ஸஹத்த²ப்³ப⁴ந்தரதோ பரிச்சி²ந்தி³தப்³பா³. தேனாஹ ‘‘யே பனா’’திஆதி³.

உப⁴தோஸங்க⁴ஸ்ஸ தி³ன்னந்தி (மஹாவ. அட்ட². 379) ‘‘உப⁴தோஸங்க⁴ஸ்ஸ த³ம்மீ’’தி தி³ன்னம். ‘‘த்³வேதா⁴ஸங்க⁴ஸ்ஸ த³ம்மி, த்³வின்னம் ஸங்கா⁴னம் த³ம்மி, பி⁴க்கு²ஸங்க⁴ஸ்ஸ ச பி⁴க்கு²னிஸங்க⁴ஸ்ஸ ச த³ம்மீ’’தி வுத்தேபி உப⁴தோஸங்க⁴ஸ்ஸ தி³ன்னமேவ ஹோதி. உபட்³ட⁴ம் பி⁴க்கூ²னம், உபட்³ட⁴ம் பி⁴க்கு²னீனம் தா³தப்³ப³ந்தி த்³வே பா⁴கே³ ஸமே கத்வா ஏகோ பா⁴கோ³ பி⁴க்கூ²னம், ஏகோ பா⁴கோ³ பி⁴க்கு²னீனம் தா³தப்³போ³. க³ஹேதும் லப⁴தி உப⁴தோஸங்க⁴க்³க³ஹணேன க³ஹிதத்தாதி அதி⁴ப்பாயோ. சேதியஸ்ஸாதி தூ²பாதி³னோ. தஞ்ஹி தா⁴தாயதனாதி³பா⁴வேன சிதத்தா, லோகஸ்ஸ சித்தீகாரட்டா²னதாய ச ‘‘சேதிய’’ந்தி வுச்சதி. ந கோசி விஸேஸோதி ஆஹ ‘‘இத⁴ பன சேதியஸ்ஸா’’திஆதி³.

‘‘உப⁴தோஸங்க⁴ஸ்ஸ ச துய்ஹஞ்ச சேதியஸ்ஸ சா’’தி வுத்தே பன த்³வாவீஸதிகோட்டா²ஸே கத்வா த³ஸ பி⁴க்கூ²னம், த³ஸ பி⁴க்கு²னீனம், ஏகோ புக்³க³லஸ்ஸ, ஏகோ சேதியஸ்ஸ தா³தப்³போ³. தத்த² புக்³க³லோ ஸங்க⁴தோபி அத்தனோ வஸ்ஸக்³கே³ன புன க³ஹேதும் லப⁴தி, சேதியஸ்ஸ ஏகோயேவ. அயம் பன வாரோ யதா²வுத்தேனேவ நயேன ஞாயதீதி கத்வா இத⁴ ந வுத்தோ. ஸமந்தபாஸாதி³காயம் (மஹாவ. அட்ட². 379) பன வுத்தோயேவ.

ந மஜ்ஜே² பி⁴ந்தி³த்வா தா³தப்³ப³ம் ‘‘பி⁴க்கு²னீன’’ந்தி புக்³க³லிகவஸேன வுத்தத்தா. புக்³க³லோ விஸும் ந லப⁴தீதி புப்³பே³ விய விஸும் புக்³க³லிககோட்டா²ஸம் ந லப⁴தி. பாபுணனட்டா²னதோ ஏகமேவ லப⁴தீதி அத்தனோ வஸ்ஸக்³கே³ன பத்தப்³ப³ட்டா²னதோ ஏகமேவ கோட்டா²ஸம் லப⁴தி. கஸ்மா? பி⁴க்கு²ஸங்க⁴க்³க³ஹணேன க³ஹிதத்தா. ‘‘பி⁴க்கு²ஸங்க⁴ஸ்ஸ ச பி⁴க்கு²னீனஞ்ச துய்ஹஞ்ச சேதியஸ்ஸ சா’’தி வுத்தேபி சேதியஸ்ஸ ஏகபுக்³க³லபடிவீஸோ லப்³ப⁴தி, புக்³க³லஸ்ஸ விஸும் ந லப்³ப⁴தி. தஸ்மா ஏகம் சேதியஸ்ஸ த³த்வா அவஸேஸம் பி⁴க்கூ² ச பி⁴க்கு²னியோ ச க³ணேத்வா பா⁴ஜேதப்³ப³ம். தேனாஹ ‘‘சேதியஸ்ஸ சாதி வுத்தே பனா’’திஆதி³.

தேஹி ஸத்³தி⁴ம் புக்³க³லசேதியபராமஸனம் அனந்தரனயஸதி³ஸமேவாதி தேஹி பி⁴க்கூ²ஹி பி⁴க்கு²னீஹி ஸத்³தி⁴ம் புக்³க³லஸ்ஸ ச சேதியஸ்ஸ ச க³ஹணம் அனந்தரனயஸதி³ஸமேவாதி அத்தோ². ‘‘பி⁴க்கூ²னஞ்ச பி⁴க்கு²னீனஞ்ச துய்ஹஞ்ச, பி⁴க்கூ²னஞ்ச பி⁴க்கு²னீனஞ்ச சேதியஸ்ஸ ச, பி⁴க்கூ²னஞ்ச பி⁴க்கு²னீனஞ்ச துய்ஹஞ்ச சேதியஸ்ஸ சா’’தி வுத்தேபி சேதியஸ்ஸ ஏகபடிவீஸோ லப்³ப⁴தி, புக்³க³லஸ்ஸ விஸும் நத்தி², பி⁴க்கூ² ச பி⁴க்கு²னியோ ச க³ணேத்வாவ பா⁴ஜேதப்³ப³ந்தி வுத்தம் ஹோதி. புக்³க³லஸ்ஸ விஸும் ந லப்³ப⁴தீதி புக்³க³லஸ்ஸ விஸும் படிவீஸோ ந லப்³ப⁴தி, வஸ்ஸக்³கே³ன ஏகோவ லப்³ப⁴தீதி அத்தோ². ‘‘பி⁴க்கு²ஸங்க⁴ஸ்ஸ ச சேதியஸ்ஸ சா’’தி வுத்தே பன சேதியஸ்ஸ விஸும் படிவீஸோ லப்³ப⁴தீதி ஆஹ ‘‘சேதியஸ்ஸ பன லப்³ப⁴தீ’’தி. ‘‘பி⁴க்கு²ஸங்க⁴ஸ்ஸ ச துய்ஹஞ்ச சேதியஸ்ஸ சா’’தி வுத்தேபி சேதியஸ்ஸேவ விஸும் லப்³ப⁴தி, ந புக்³க³லஸ்ஸ. சேதியஸ்ஸ பன லப்³ப⁴தியேவாதி ‘‘பி⁴க்கூ²னஞ்ச சேதியஸ்ஸ சா’’தி வுத்தே பன சேதியஸ்ஸ விஸும் படிவீஸோ லப்³ப⁴தீதி அத்தோ². ‘‘பி⁴க்கூ²னஞ்ச துய்ஹஞ்ச சேதியஸ்ஸ சா’’தி வுத்தேபி சேதியஸ்ஸேவ விஸும் லப்³ப⁴தி, ந புக்³க³லஸ்ஸ. பி⁴க்கு²னிஸங்க⁴ம் ஆதி³ம் கத்வாபி ஏவமேவ யோஜேதப்³ப³ம்.

ஏத்தா²ஹ – யம் பனேதரஹி (மஹாவ. அட்ட². 379) பண்டி³தமனுஸ்ஸா ஸதா⁴துகம் படிமம் வா சேதியம் வா ட²பேத்வா பு³த்³த⁴ப்பமுக²ஸ்ஸ உப⁴தோஸங்க⁴ஸ்ஸ தா³னம் தே³ந்தி, படிமாய வா சேதியஸ்ஸ வா புரதோ ஆதா⁴ரகே பத்தம் ட²பேத்வா த³க்கி²ணோத³கம் த³த்வா ‘‘பு³த்³தா⁴னம் தே³மா’’தி, தத்த² யம் பட²மம் கா²த³னீயம் போ⁴ஜனீயம் தே³ந்தி, விஹாரம் வா ஆஹரித்வா ‘‘இத³ம் சேதியஸ்ஸ தே³மா’’தி பிண்ட³பாதஞ்ச மாலாக³ந்தா⁴தீ³னி ச தே³ந்தி, தத்த² கத²ம் படிபஜ்ஜிதப்³ப³ந்தி? வுச்சதே – மாலாக³ந்தா⁴தீ³னி தாவ சேதியே ஆரோபேதப்³பா³னி, வத்தே²ஹி படாகா, தேலேன பதீ³பா காதப்³பா³, பிண்ட³பாதமது⁴பா²ணிதாதீ³னி பன யோ நிப³த்³த⁴சேதியஜக்³க³கோ ஹோதி பப்³ப³ஜிதோ வா க³ஹட்டோ² வா, தஸ்ஸ தா³தப்³பா³னி. நிப³த்³த⁴ஜக்³க³கே அஸதி ஆஹடப⁴த்தம் ட²பேத்வா வத்தம் கத்வா பரிபு⁴ஞ்ஜிதும் வட்டதி. உபகட்டே² காலே பு⁴ஞ்ஜித்வா பச்சா²பி வத்தம் காதும் வட்டதியேவ.

மாலாக³ந்தா⁴தீ³ஸு ச யம் கிஞ்சி ‘‘இத³ம் ஹரித்வா சேதியபூஜம் கரோதா²’’தி வுத்தே தூ³ரம்பி ஹரித்வா பூஜேதப்³ப³ம். ‘‘பி⁴க்கு²ஸங்க⁴ஸ்ஸ ஹரா’’தி வுத்தேபி ஹரிதப்³ப³ம். ஸசே பன ‘‘அஹம் பிண்டா³ய சராமி, ஆஸனஸாலாயம் பி⁴க்கூ² அத்தி², தே ஹரிஸ்ஸந்தீ’’தி வுத்தே ‘‘ப⁴ந்தே, துய்ஹம்யேவ த³ம்மீ’’தி வத³தி, பு⁴ஞ்ஜிதும் வட்டதி. அத² பன ‘‘பி⁴க்கு²ஸங்க⁴ஸ்ஸ த³ஸ்ஸாமீ’’தி ஹரந்தஸ்ஸ க³ச்ச²தோ அந்தராவ காலோ உபகட்டோ² ஹோதி, அத்தனோ பாபேத்வா பு⁴ஞ்ஜிதும் வட்டதி.

வஸ்ஸம்வுட்ட²ஸங்க⁴ஸ்ஸ த³ம்மீதி வத³தீதி (மஹாவ. அட்ட². 379) ‘‘வஸ்ஸம்வுட்ட²ஸங்க⁴ஸ்ஸ இமானி சீவரானி த³ம்மீ’’தி வத³தி. தேஸம் ப³ஹிஸீமட்டா²னம்பி பாபுணாதீதி அத்த²தே கதி²னே ப³ஹிஸீமட்டா²னம்பி யாவ கதி²னஸ்ஸ உப்³பா⁴ரா பாபுணாதி, தஸ்மா தி³ஸாபக்கந்தஸ்ஸாபி ஸதி படிக்³கா³ஹகே தா³தப்³ப³ம். அனத்த²தே பன கதி²னே அந்தோஹேமந்தே, ஏவஞ்ச பன வத்வா தி³ன்னம் பச்சி²மவஸ்ஸம்வுட்டா²னம்பி பாபுணாதி. யத்த² கத்த²சீதி யேஸு கேஸுசி விஹாரேஸு. ஏவம் வத³தீதி ‘‘வஸ்ஸம்வுட்ட²ஸங்க⁴ஸ்ஸ த³ம்மீ’’தி வத³தி. தத்ர ஸம்முகீ²பூ⁴தானம் ஸப்³பே³ஸம் பாபுணாதி பிட்டி²ஸமயே உப்பன்னத்தா. ஸசே பன ‘‘வஸ்ஸம் வஸந்தானம் த³ம்மீ’’தி வத³தி, அந்தோவஸ்ஸேயேவ வஸ்ஸம் வஸந்தாவ லப⁴ந்தி, சி²ன்னவஸ்ஸா ந லப⁴ந்தி. சீவரமாஸே பன ‘‘வஸ்ஸம் வஸந்தானம் த³ம்மீ’’தி வுத்தே பச்சி²மிகாய வஸ்ஸூபக³தானம்யேவ பாபுணாதி, புரிமிகாய வஸ்ஸூபக³தானஞ்ச சி²ன்னவஸ்ஸானஞ்ச ந பாபுணாதி.

சீவரமாஸதோ பட்டா²ய யாவ ஹேமந்தஸ்ஸ பச்சி²மோ தி³வஸோ, தாவ ‘‘வஸ்ஸாவாஸிகம் தே³மா’’தி வுத்தே கதி²னம் அத்த²தம் வா ஹோது, அனத்த²தம் வா, அதீதவஸ்ஸம்வுட்டா²னம்யேவ பாபுணாதி. கி³ம்ஹானம் பட²மதி³வஸதோ பட்டா²ய வுத்தே பன மாதிகா ஆரோபேதப்³பா³ ‘‘அதீதவஸ்ஸாவாஸஸ்ஸ பஞ்ச மாஸா அதிக்கந்தா, அனாக³தோ சதுமாஸச்சயேன ப⁴விஸ்ஸதி, கதரவஸ்ஸாவாஸஸ்ஸ தே³ஸீ’’தி. ஸசே ‘‘அதீதவஸ்ஸம்வுட்டா²னம் த³ம்மீ’’தி வத³தி, தம்அந்தோவஸ்ஸம்வுட்டா²னமேவ பாபுணாதி, தி³ஸா பக்கந்தானம்பி ஸபா⁴கா³ க³ண்ஹிதும் லப⁴ந்தி.

ஸசே ‘‘அனாக³தே வஸ்ஸாவாஸிகம் த³ம்மீ’’தி வத³தி, தம் ட²பேத்வா வஸ்ஸூபனாயிகதி³வஸே க³ஹேதப்³ப³ம். அத² ‘‘அகு³த்தோ விஹாரோ, சோரப⁴யம் அத்தி², ந ஸக்கா ட²பேதும், க³ண்ஹித்வா வா ஆஹிண்டி³து’’ந்தி வுத்தே ‘‘ஸம்பத்தானம் த³ம்மீ’’தி வத³தி, பா⁴ஜேத்வா க³ஹேதப்³ப³ம். ஸசே வத³தி ‘‘இதோ மே, ப⁴ந்தே, ததியே வஸ்ஸே வஸ்ஸாவாஸிகம் ந தி³ன்னம், தம் த³ம்மீ’’தி, தஸ்மிம் அந்தோவஸ்ஸே வுட்ட²பி⁴க்கூ²னம் பாபுணாதி. ஸசே தே தி³ஸா பக்கந்தா, அஞ்ஞோ விஸ்ஸாஸிகோ க³ண்ஹாதி, தா³தப்³ப³ம். அத² ஏகோயேவ அவஸிட்டோ², ஸேஸா காலங்கதா, ஸப்³ப³ம் ஏகஸ்ஸேவ பாபுணாதி. ஸசே ஏகோபி நத்தி², ஸங்கி⁴கம் ஹோதி, ஸம்முகீ²பூ⁴தேஹி பா⁴ஜிதப்³ப³ம்.

யேஹி நிமந்திதேஹி யாகு³ பீதாதி (மஹாவ. அட்ட². 379) நிமந்திதேஹி யேஹி பி⁴க்கூ²ஹி யாகு³ பீதா, யேஹி பன பி⁴க்கா²சாரவத்தேன க⁴ரத்³வாரேன க³ச்ச²ந்தேஹி வா க⁴ரம் பவிட்டே²ஹி வா யாகு³ லத்³தா⁴, யேஸம் வா ஆஸனஸாலதோ பத்தம் ஆஹரித்வா மனுஸ்ஸேஹி நீதா, யேஸம் வா தே²ரேஹி பேஸிதா, தேஸம் ந பாபுணாதி. ஸசே பன நிமந்திதபி⁴க்கூ²ஹி ஸத்³தி⁴ம் அஞ்ஞேபி ப³ஹூ ஆக³ந்த்வா அந்தோகே³ஹஞ்ச ப³ஹிகே³ஹஞ்ச பூரேத்வா நிஸின்னா, தா³யகோ ச ஏவம் வத³தி ‘‘நிமந்திதா வா ஹோந்து, அனிமந்திதா வா, யேஸம் மயா யாகு³ தி³ன்னா, ஸப்³பே³ஸம் இமானி வத்தா²னி ஹோந்தூ’’தி, ஸப்³பே³ஸம் பாபுணாதி. யேஹி பன தே²ரானம் ஹத்த²தோ யாகு³ லத்³தா⁴, தேஸம் ந பாபுணாதி. அத² ஸோ ‘‘யேஹி மய்ஹம் யாகு³ பீதா, ஸப்³பே³ஸம் ஹோதூ’’தி வத³தி, ஸப்³பே³ஸம் பாபுணாதி. ப⁴த்தக²ஜ்ஜகாதீ³ஹீதி ஏத்த² ஆதி³ஸத்³தே³னபி சீவரஸேனாஸனபே⁴ஸஜ்ஜானம் க³ஹணம்.

புக்³க³லஸ்ஸாதி (மஹாவ. அட்ட². 379) ஸம்முகா²ஸம்முக²பூ⁴தஸ்ஸ புக்³க³லஸ்ஸ. தேனாஹ ‘‘இத³ம் சீவர’’ந்திஆதி³. ஸசே பன ‘‘இத³ம் தும்ஹாகஞ்சேவ தும்ஹாகம் அந்தேவாஸிகானஞ்ச த³ம்மீ’’தி ஏவம் வத³தி, தே²ரஸ்ஸ ச அந்தேவாஸிகானஞ்ச பாபுணாதி. உத்³தே³ஸம் க³ஹேதும் ஆக³தோ, க³ஹேத்வா க³ச்ச²ந்தோ ச அத்தி², தஸ்ஸாபி பாபுணாதி. தும்ஹேஹி ஸத்³தி⁴ம் நிப³த்³த⁴சாரிகபி⁴க்கூ²னம் த³ம்மீ’’தி வுத்தே உத்³தே³ஸந்தேவாஸிகானம் வத்தம் கத்வா உத்³தே³ஸபரிபுச்சா²தீ³னி க³ஹேத்வா விசரந்தானம் ஸப்³பே³ஸம் பாபுணாதி. ஏத்தா²தி அட்ட²ஸு மாதிகாஸு. யதி³ பன அயமேத்த² ஸங்கே²பகதா², வித்தா²ரோ பன கத²ம் ஞாதப்³போ³தி ஆஹ ‘‘ஸமந்தபாஸாதி³காயம் வுத்தோ’’தி. ஸமந்தபாஸாதி³காயம் சீவரக்க²ந்த⁴கவண்ணனாயம் (மஹாவ. அட்ட². 379) வுத்தோதி அத்தோ².

‘‘ஞாதகேஹி வா மே சீவரத்தா²ய பேஸிதம், மித்தேஹி வா பேஸிதம், தே ஆப⁴தே சீவரே த³ஸ்ஸந்தீ’’தி ஏவம் ஞாதிதோ வா மித்ததோ வா பச்சாஸா ஹோதீதி வேதி³தப்³ப³ம். கப்பியப⁴ண்டே³னாதி கப்பாஸஸுத்தாதி³னா அத்தனோ த⁴னேன. ஸண்ஹந்தி ஸுகு²மம். அஞ்ஞம் பச்சாஸாசீவரம் லபி⁴த்வா ஏவ காலப்³ப⁴ந்தரே காரேதப்³ப³ந்தி அஞ்ஞம் மூலசீவரஸதி³ஸம் பச்சாஸாசீவரம் லபி⁴த்வாயேவ மாஸப்³ப⁴ந்தரே காரேதப்³ப³ம். தஞ்ச கோ² ஸதியாயேவ பச்சாஸாய, அஸதியா பன பச்சாஸாய மூலசீவரம் த³ஸாஹம் சே ஸம்பத்தம், தத³ஹேவ அதி⁴ட்டா²தப்³ப³ம். தேனாஹ ‘‘ஸசே ந லப⁴தீ’’திஆதி³. பச்சாஸாசீவரம்பி பரிக்கா²ரசோளம் அதி⁴ட்டா²தப்³ப³ந்தி பட²மதரம் உப்பன்னம் தூ²லபச்சாஸாசீவரம்பி ஸந்தா⁴ய வுத்தம். பி-ஸத்³தே³ன ந கேவலம் மூலசீவரமேவாதி த³ஸ்ஸேதி.

அகாலசீவரஸிக்கா²பத³வண்ணனா நிட்டி²தா.

4. புராணசீவரஸிக்கா²பத³வண்ணனா

‘‘அம்ஹாகமேவ ஞாதீ’’தி ஞாயதீதி ஞாதி, ஸாவ ஞாதிகா, ந ஞாதிகா அஞ்ஞாதிகா, தாய அஞ்ஞாதிகாய. தேனாஹ ‘‘ந ஞாதிகாயா’’தி. மாதிதோ வா பிதிதோ வாதி மாதிபக்க²தோ வா பிதிபக்க²தோ வா. யாவ ஸத்தமம் யுக³ந்தி (பாரா. அட்ட². 2.503-505) யாவ ஸத்தமஸ்ஸ புரிஸஸ்ஸ, ஸத்தமாய வா இத்தி²யா ஆயுப்பமாணம், யாவ பிதாமஹயுக³ம் பிதாமஹியுக³ம் மாதாமஹயுக³ம் மாதாமஹியுக³ந்தி வுத்தம் ஹோதி. அத² வா யாவ ஸத்தமம் யுக³ந்தி யாவ ஸத்தமத்³வந்த³ந்தி அத்தோ². யுக³ஸத்³தோ³ சேத்த² ஏகஸேஸனயேன த³ட்ட²ப்³போ³ ‘‘யுகோ³ ச யுகோ³ ச யுகா³’’தி. ஏவஞ்ஹி தத்த² தத்த² த்³வந்த³ம் க³ஹிதம் ஹோதி. கேனசி ஆகாரேன அஸம்ப³த்³தா⁴யாதி பா⁴துப⁴கி³னிபா⁴கி³னேய்யபுத்தபபுத்தாதீ³ஸு யேன கேனசி ஆகாரேன அஸம்ப³த்³தா⁴ய. பிதா, பிதுபிதா, தஸ்ஸ பிதா, தஸ்ஸாபி பிதாதி ஏவம் யாவ ஸத்தமா யுகா³, பிதா, பிதுமாதா, தஸ்ஸா பிதா ச மாதா ச பா⁴தா ச ப⁴கி³னீ ச, புத்தா ச, தீ⁴தரோ சாதி ஏவம்பி உத்³த⁴ஞ்ச அதோ⁴ ச யாவ ஸத்தமா யுகா³, பிதா, பிதுபா⁴தா, பிதுப⁴கி³னீ, பிதுபுத்தா, பிதுதீ⁴தரோ, தேஸம்பி புத்ததீ⁴துபரம்பராதி ஏவம்பி யாவ ஸத்தமா யுகா³, மாதா, மாதுமாதா, தஸ்ஸா மாதா, தஸ்ஸாபி மாதாதி ஏவம் யாவ ஸத்தமா யுகா³, மாதா, மாதுபிதா, தஸ்ஸ பிதா ச மாதா ச பா⁴தா ச ப⁴கி³னீ ச புத்தா ச தீ⁴தரோ சாதி ஏவம்பி உத்³த⁴ஞ்ச அதோ⁴ ச யாவ ஸத்தமா யுகா³, மாதா, மாதுபா⁴தா, மாதுப⁴கி³னீ, மாதுபுத்தா, மாதுதீ⁴தரோ, தேஸம்பி புத்ததீ⁴துபரம்பராதி ஏவம்பி யாவ ஸத்தமா யுகா³, தாவ நேவ மாதுஸம்ப³ந்தே⁴ன, ந பிதுஸம்ப³ந்தே⁴ன யா ஸம்ப³த்³தா⁴, ஸா ‘‘அஞ்ஞாதிகா நாமா’’தி வுத்தம் ஹோதி.

ஸாகியானியோ வியாதி பஞ்சஸதமத்தா ஸாகியானியோ விய. நித³ஸ்ஸனமத்தஞ்சேதம், தஸ்மா பி⁴க்கு²பா⁴வே ட²த்வா பரிவத்தலிங்கா³ பி⁴க்கு²னியோபி இத⁴ ஸுத்³த⁴பி⁴க்கு²ஸங்கே⁴ ‘‘உபஸம்பன்னா’’ இச்சேவ வேதி³தப்³பா³. உப⁴தோஸங்கே⁴ வாதி பி⁴க்கு²னிஸங்கே⁴ ஞத்திசதுத்தே²ன, பி⁴க்கு²ஸங்கே⁴ ஞத்திசதுத்தே²னாதி ஏவம் உப⁴தோஸங்கே⁴ வா. புராணசீவரந்தி ஏத்த² சீவரந்தி நிவாஸனபாருபனுபக³மேவ அதி⁴ப்பேதந்தி ஆஹ ‘‘ரஜித்வா’’திஆதி³. கப்பம் கத்வாதி கப்பபி³ந்து³ம் த³த்வா. ‘‘இமினா அதி³ன்னகப்பம் பாசித்தியவத்து² ந ஹோதீதி த³ஸ்ஸேதீ’’தி (ஸாரத்த². டீ. 2.505) வத³ந்தி. பரிபோ⁴க³ஸீஸேனாதி காயேன பு²ஸித்வா பரிபோ⁴க³ஸீஸேன. அம்ஸேதி ஜத்தும்ஹி. மத்த²கேதி ஸீஸமத்த²கே. ஸசே பன பச்சத்த²ரணஸ்ஸ ஹேட்டா² கத்வா நிபஜ்ஜதி, ஹத்தே²ஹி வா உக்கி²பித்வா ஆகாஸே விதானம் கத்வா ஸீஸேன அஸம்பு²ஸந்தோ க³ச்ச²தி, அயம் பரிபோ⁴கோ³ நாம ந ஹோதி.

காயவிகாரம் வா கரோதீதி யதா² ஸா ‘‘தோ⁴வாபேதுகாமோ அய’’ந்தி ஜானாதி, ஏவம் காயவிகாரம் கரோதி. ‘‘அந்தோத்³வாத³ஸஹத்தே² ஓகாஸே ட²த்வா உபரி வா கி²பதீ’’தி இமினா உபசாரம் முஞ்சித்வா ஓரதோ கி²பந்தஸ்ஸ அனாபத்தீதி த³ஸ்ஸேதி. அஞ்ஞஸ்ஸ வா ஹத்தே² பேஸேதீதி அந்தோத்³வாத³ஸஹத்தே² ஓகாஸே ட²த்வா ஸிக்க²மானஸாமணேரஸாமணேரிஉபாஸகஇத்தி²யாதீ³ஸு யஸ்ஸ கஸ்ஸசி அஞ்ஞஸ்ஸ ஹத்தே² வா பேஸேதி. ஸோதி உபாஸகோ ச ஸாமணேரோ ச. உபஸம்பஜ்ஜித்வா தோ⁴வதீதி ஏத்த² உபாஸகோ லிங்கே³ பரிவத்தே பி⁴க்கு²னீஸு பப்³ப³ஜித்வா உபஸம்பஜ்ஜித்வா தோ⁴வதி, ஸாமணேரோ லிங்கே³ பரிவத்தே பி⁴க்கு²னீஸு உபஸம்பஜ்ஜித்வா தோ⁴வதீதி யதா²யோக³ம் அத்தோ² க³ஹேதப்³போ³. ஸசே பன பி⁴க்கு²னியா ஹத்தே² தி³ன்னம் ஹோதி, ஸசே லிங்கே³ பரிவத்தே தோ⁴வதி, வட்டதி.

ஏத்த² ச ஏகஸ்ஸ திக்க²த்தும் நிஸ்ஸஜ்ஜனாபா⁴வதோ தீணிபி காரேந்தஸ்ஸ ஏகேன நிஸ்ஸக்³கி³யம், த்³வீஹி த்³வே து³க்கடானி. த்³வே காரேந்தஸ்ஸ ஏகேன நிஸ்ஸக்³கி³யம், து³தியேன து³க்கடம். தேனாஹ ‘‘தோ⁴வனாதீ³னி தீணீ’’திஆதி³. ‘‘ஏகேன வத்து²னா’’தி பட²மம் கத்வா நிட்டா²பிதம் ஸந்தா⁴ய வுத்தம். ஸசே பன ‘‘இமம் சீவரம் ரஜித்வா தோ⁴வித்வா ஆனேஹீ’’தி வுத்தே ஸா பி⁴க்கு²னீ பட²மம் தோ⁴வித்வா பச்சா² ரஜதி, நிஸ்ஸக்³கி³யேன து³க்கடமேவ, ஏவம் ஸப்³பே³ஸு விபரீதவசனேஸு நயோ நேதப்³போ³. ஸசே பன ‘‘தோ⁴வித்வா ஆனேஹீ’’தி வுத்தா தோ⁴வதி சேவ ரஜதி ச, தோ⁴வாபனபச்சயா ஏவ ஆபத்தி, ரஜனே அனாபத்தி. ஏவம் ஸப்³ப³த்த². தேனாஹ ‘‘ஸசே பன‘தோ⁴வா’தி வுத்தா’’திஆதி³. பி⁴க்கூ²னம் வஸேன ஏகதோ உபஸம்பன்னாய தோ⁴வாபேந்தஸ்ஸ யதா²வத்து²கமேவாதி ஆஹ ‘‘பி⁴க்கு²னிஸங்க⁴வஸேனா’’திஆதி³.

அஞ்ஞஸ்ஸ வா ஸந்தகந்தி அஞ்ஞஸ்ஸ ஸந்தகம் புராணசீவரம் தோ⁴வாபேந்தஸ்ஸாதி அத்தோ². நிஸீத³னபச்சத்த²ரணந்தி அஞ்ஞஸ்ஸ வா அத்தனோ வா ஸந்தகம் நிஸீத³னஞ்சேவ பச்சத்த²ரணஞ்ச. நிவாஸனபாருபனுபக³ஸ்ஸேவ ச இத⁴ ‘‘புராணசீவர’’ந்தி அதி⁴ப்பேதத்தா அத்தனோ ஸந்தகம்பி நிஸீத³னபச்சத்த²ரணம் தோ⁴வாபேந்தஸ்ஸ து³க்கடமேவ ஹோதி, ந நிஸ்ஸக்³கி³யம். அவுத்தா வா தோ⁴வதீதி உத்³தே³ஸாய வா ஓவாதா³ய வா ஆக³தா கிலிட்ட²சீவரம் தி³ஸ்வா ட²பிதட்டா²னதோ வா க³ஹேத்வா, ‘‘தே³த² அய்ய, தோ⁴விஸ்ஸாமீ’’தி ஆஹராபேத்வா வா தோ⁴வதி சேவ ரஜதி ச ஆகோடேதி ச, அயம் அவுத்தா தோ⁴வதி நாம. யாபி ‘‘இமம் சீவரம் தோ⁴வா’’தி த³ஹரம் வா ஸாமணேரம் வா ஆணாபேந்தஸ்ஸ பி⁴க்கு²னோ வசனம் ஸுத்வா ‘‘ஆஹரத²ய்ய, அஹம் தோ⁴விஸ்ஸாமீ’’தி தோ⁴வதி, தாவகாலிகம் வா க³ஹேத்வா தோ⁴வித்வா ரஜித்வா தே³தி, அயம்பி அவுத்தா தோ⁴வதி நாம.

அஞ்ஞம் வா பரிக்கா²ரந்தி உபாஹனத்த²விகபத்தத்த²விகஅம்ஸப³த்³த⁴ககாயப³ந்த⁴னமஞ்சபீட²தட்டிகாதி³ம் யம் கிஞ்சி. ‘‘உபசாரே ட²த்வா’’தி வசனதோ பேஸித்வா தோ⁴வனேபி அனாபத்தி. உபசாரேதி அந்தோத்³வாத³ஸஹத்தே² ஓகாஸே.

புராணசீவரஸிக்கா²பத³வண்ணனா நிட்டி²தா.

5. சீவரப்படிக்³க³ஹணஸிக்கா²பத³வண்ணனா

ச²ன்னந்தி கோ²மாதீ³னம் ச²ன்னம் சீவரானம் மஜ்ஜே². உபசாரம் முஞ்சித்வாதி த்³வாத³ஸஹத்தூ²பசாரம் முஞ்சித்வா. பி-ஸத்³தே³ன த⁴ம்மகத²ம் கதே²ந்தஸ்ஸ சதஸ்ஸோ பரிஸா சீவரானி ச நானாவிராக³வத்தா²னி ச ஆஹரித்வா பாத³மூலே ட²பேந்தி, உபசாரே வா ட²த்வா உபரி கி²பந்தி, ‘‘ஸசே ஸாதி³யதி, படிக்³க³ஹிதமேவா’’தி ஏத்த² வத்தப்³ப³மேவ நத்தீ²தி த³ஸ்ஸேதி. கி²பதூதி தி³வா வா ரத்திபா⁴கே³ வா கி²பது. படிக்³க³ஹிதமேவ ஹோதீதி கிஞ்சாபி ‘‘இத³ம் பி⁴க்கு²னியா, இத³ம் அஞ்ஞேஸ’’ந்தி ஞாதும் ந ஸக்கா, ததா²பி அசித்தகபா⁴வேன க³ஹிதமேவ ஹோதி. யஸ்ஸ கஸ்ஸசி பன அனுபஸம்பன்னஸ்ஸாதி ஸிக்க²மானஸாமணேரஸாமணேரிஉபாஸகஉபாஸிகாதீ³ஸு யஸ்ஸ கஸ்ஸசி அனுபஸம்பன்னஸ்ஸ. ட²பிதந்தி பி⁴க்கு²னியா ட²பிதம். பம்ஸுகூலம் அதி⁴ட்ட²ஹித்வாதி ‘‘அஸ்ஸாமிகம் இத³’’ந்தி ஸஞ்ஞம் உப்பாதே³த்வா. அஸ்ஸாமிகஞ்ஹி ‘‘பம்ஸுகூல’’ந்தி வுச்சதி. இமினா ‘‘அம்ஹாகமத்தா²ய ட²பித’’ந்திஆதி³காய ஸஞ்ஞாய க³ஹேதும் ந வட்டதீதி த³ஸ்ஸேதி. அஞ்ஞத்ர பாரிவத்தகாதி பரிவத்தேதப்³ப³ம் பரிவத்தம், பரிவத்தமேவ பாரிவத்தகம், பரிவத்தேத்வா தி³ய்யமானம், தம் வினாதி அத்தோ². தேனாஹ ‘‘யம் அந்தமஸோ ஹரீடகக்க²ண்ட³ம்பீ’’திஆதி³. ஆபோ⁴க³ம் கத்வாதி சித்தேன ஸமன்னாஹரித்வா. ஸசே பி⁴க்கு²னீ வஸ்ஸாவாஸிகம்பி தே³தி, தம்பி யதா²வுத்தவிதா⁴னம் அகத்வா க³ஹேதும் ந வட்டதீதி வேதி³தப்³ப³ம்.

படிலாபே⁴னாதி க³ஹணேன. திகபாசித்தியந்தி தீணி பரிமாணானி அஸ்ஸாதி திகம்,திகஞ்ச தம் பாசித்தியஞ்சாதி திகபாசித்தியம், அஞ்ஞாதிகாய ஞாதிகஸஞ்ஞிவேமதிகஅஞ்ஞாதிகஸஞ்ஞீனம் வஸேன தீணி பாசித்தியானீதி அத்தோ². ஏகதோஉபஸம்பன்னாயாதி பி⁴க்கு²னீனம் ஸந்திகே உபஸம்பன்னாய. தாய ஹி ஹத்த²தோ அஞ்ஞத்ர பாரிவத்தகா சீவரம் படிக்³க³ண்ஹந்தஸ்ஸ து³க்கடம், பி⁴க்கூ²னம் ஸந்திகே உபஸம்பன்னாய பன பாசித்தியமேவ. ‘‘பத்தத்த²விகாதி³ம்ஹி ச அனதி⁴ட்டா²தப்³ப³பரிக்கா²ரே’’தி இமினா பி⁴ஸிச்ச²விம்பி ஸங்க³ண்ஹாதி. ஸா ஹி மஹந்தாபி ஸேனாஸனஸங்க³ஹிதத்தா சீவரஸங்க²ம் ந க³ச்ச²தீதி நேவ அதி⁴ட்டா²னுபகா³, ந விகப்பனுபகா³ ச. வுத்தஞ்ஹி ஸமந்தபாஸாதி³காயம் ‘‘ஸசேபி மஞ்சப்பமாணா பி⁴ஸிச்ச²வி ஹோதி, வட்டதியேவா’’தி (பாரா. அட்ட². 2.514). ‘‘ஹத்த²தோ சீவரம் படிக்³க³ண்ஹாதீ’’தி வசனதோ பன அஞ்ஞாதிகாய பி⁴க்கு²னியா பேஸிதக்³க³ஹணேபி அனாபத்தி. படிக்³க³ஹணதோ, பரிவத்தனாகரணதோ ச கிரியாகிரியம்.

சீவரப்படிக்³க³ஹணஸிக்கா²பத³வண்ணனா நிட்டி²தா.

6. அஞ்ஞாதகவிஞ்ஞத்திஸிக்கா²பத³வண்ணனா

கே³ஹஸ்ஸ பதி ஜேட்டோ²தி க³ஹபதி, தம் க³ஹபதிம், இத⁴ பன அபப்³ப³ஜிதோ யோ கோசி மனுஸ்ஸோ அதி⁴ப்பேதோ. தேனாஹ ‘‘பி⁴க்கூ²ஸு அபப்³ப³ஜிதமனுஸ்ஸ’’ந்தி. ஏஸேவ நயோ க³ஹபதானிந்தி ஏத்தா²பி. ‘‘விஞ்ஞாபேய்யா’’தி இத³ம் ஸுத்³த⁴கத்துஅத்தே² ச ஹேதுகத்துஅத்தே² ச வத்ததீதி ஆஹ ‘‘யாசேய்ய வா யாசாபேய்ய வா’’தி. யாசாபனஞ்சேத்த² அத்தனோ அத்தா²யேவாதி த³ட்ட²ப்³ப³ம். ஏவஞ்ச பன கத்வா ‘‘அனாணத்திக’’ந்தி இத³ம் ஸமத்தி²தம் ஹோதி. அஞ்ஞத்ர ஸமயாதி ஸமேதி ஏத்த², ஏதேன வா ஸம்க³ச்ச²தி ஸத்தோ, ஸபா⁴வத⁴ம்மோ வா ஸஹஜாதாதீ³ஹி, உப்பாதா³தீ³ஹி வாதி ஸமயோ, காலோ, த⁴ம்மப்பவத்திமத்ததாய அத்த²தோ அபூ⁴தோபி ஹி காலோ த⁴ம்மப்பவத்தியா அதி⁴கரணம், கரணம் விய ச கப்பனாமத்தஸித்³தே⁴ன ரூபேன வோஹரீயதி, தம் ஸமயம் ட²பேத்வாதி அத்தோ². தேனாஹ ‘‘யோ அச்சி²ன்னசீவரோ வா ஹோதீ’’திஆதி³. தத்த² ராஜாதீ³ஸு யேஹி கேஹிசி அச்சி²ன்னம் சீவரம் ஏதஸ்ஸாதி அச்சி²ன்னசீவரோ. யதா²ஹ ‘‘அச்சி²ன்னசீவரோ நாம பி⁴க்கு²ஸ்ஸ சீவரம் அச்சி²ன்னம் ஹோதி, ராஜூஹி வா சோரேஹி வா து⁴த்தேஹி வா யேஹி கேஹிசி வா அச்சி²ன்னம் ஹோதீ’’தி. அக்³கி³ஆதீ³ஸு யேன கேனசி நட்ட²ம் சீவரமேதஸ்ஸாதி நட்ட²சீவரோ. யதா²ஹ ‘‘நட்ட²சீவரோ நாம பி⁴க்கு²ஸ்ஸ சீவரம் அக்³கி³னா வா த³ட்³ட⁴ம் ஹோதி, உத³கேன வா வூள்ஹம் ஹோதி, உந்தூ³ரேஹி வா உபசிகாஹி வா கா²யிதம் ஹோதி, பரிபோ⁴க³ஜிண்ணம் வா ஹோதீ’’தி (பாரா. 519). ஸமயாதி அஞ்ஞத்ரஸத்³தா³பேக்கா²ய உபயோக³த்தே² நிஸ்ஸக்கவசனந்தி ஆஹ ‘‘தம் ஸமய’’ந்தி. அஞ்ஞஸ்மிந்தி அஞ்ஞஸ்மிம் ஸமயே.

திகபாசித்தியந்தி அஞ்ஞாதகே அஞ்ஞாதகஸஞ்ஞிவேமதிகஞ்ஞாதகஸஞ்ஞீனம் வஸேன தீணி பாசித்தியானி. ஸமயேதி யதா²வுத்தே அச்சி²ன்னசீவரகாலே ச நட்ட²சீவரகாலே ச. ஞாதகப்பவாரிதே வா விஞ்ஞாபேந்தஸ்ஸாதி ஞாதகே, பவாரிதே ச ‘‘தும்ஹாகம் ஸந்த²தம் தே³தா²’’தி யாசந்தஸ்ஸ. ஏத்த² (பாரா. அட்ட². 2.521) ச ஸங்க⁴வஸேன பவாரிதே பமாணமேவ யாசிதும் வட்டதி, புக்³க³லிகவஸேன பவாரிதே பன யம் யம் பவாரேந்தி, தம் தமேவ விஞ்ஞாபேதப்³ப³ம். யோ ஹி சதூஹி பச்சயேஹி பவாரேத்வா ஸயமேவ ஸல்லக்கே²த்வா காலானுகாலம் சீவராதீ³னி தி³வஸே தி³வஸே யாகு³ப⁴த்தாதீ³னி தே³தி, ஏவம் யேன யேன அத்தோ², தம் தம் தே³தி, தஸ்ஸ விஞ்ஞாபனகிச்சம் நத்தி². யோ பன பவாரேத்வா பா³லதாய வா ஸதிஸம்மோஸேன வா ந தே³தி, ஸோ விஞ்ஞாபேதப்³போ³. யோ ‘‘மய்ஹம் கே³ஹம் பவாரேமீ’’தி வத³தி, தஸ்ஸ கே³ஹம் க³ந்த்வா யதா²ஸுக²ம் நிஸீதி³தப்³ப³ம் நிபஜ்ஜிதப்³ப³ம், ந கிஞ்சி க³ஹேதப்³ப³ம். யோ பன ‘‘யம் மய்ஹம் கே³ஹே அத்தி², தம் பவாரேமீ’’தி வத³தி, யம் தத்த² கப்பியம், தம் விஞ்ஞாபேதப்³ப³ம். கே³ஹே பன நிஸீதி³தும் வா நிபஜ்ஜிதும் வா ந லப்³ப⁴தி. தஸ்ஸேவத்தா²யாதி ‘‘அஞ்ஞஸ்ஸா’’தி லத்³த⁴வோஹாரஸ்ஸ தஸ்ஸேவ பு³த்³த⁴ரக்கி²தஸ்ஸ வா த⁴ம்மரக்கி²தஸ்ஸ வா அத்தா²ய. அத்தனோ த⁴னேன க³ண்ஹந்தஸ்ஸாதி அத்தனோ கப்பியப⁴ண்டே³ன கப்பியவோஹாரேனேவ க³ண்ஹந்தஸ்ஸ சேதாபேந்தஸ்ஸ, பரிவத்தாபேந்தஸ்ஸாதி அத்தோ².

அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.

7. ததுத்தரிஸிக்கா²பத³வண்ணனா

தம்-ஸத்³தோ³ சேத்த² பகதத்த²வசனோ. சேதி நிபாதமத்தம். சேதி வா யதீ³தி அத்தோ², தஸ்ஸ ‘‘பவாரேய்யா’’தி இமினா ஸம்ப³ந்தோ⁴ வேதி³தப்³போ³. பவாரேய்ய சேதி யதி³ பவாரேய்யாதி அத்தோ². ‘‘அபீ⁴தி உபஸக்³கோ³’’தி (ஸாரத்த². டீ. 2.523-524) இமினா தஸ்ஸ அத்த²விஸேஸாபா⁴வம் த³ஸ்ஸேதி. தேனாஹ ‘‘ஹரிதுந்தி அத்தோ²’’தி. பவாரஸத்³த³ஸ்ஸ இச்சா²யம் வத்தமானத்தா ‘‘இச்சா²பேய்யா’’தி வுத்தம். இச்ச²ம் உப்பாதே³ய்யாதி பச்சயே இச்ச²ம் உப்பாதே³ய்ய. உபனிமந்தனாயேதம் அதி⁴வசனம். தேனாஹ ‘‘யாவத்தக’’ந்திஆதி³. நேக்க²ம்மந்தி பப்³ப³ஜ்ஜம். த³ட்டூ²தி த³ட்டு²ம். ச²ந்தா³னுரக்க²ணத்த²ஞ்ஹேத்த² அனுனாஸிகலோபோ. கே²மதோதி நிப்³ப⁴யதோ. காயேன வா வாசாய வா அபி⁴ஹரித்வா நிமந்தேய்யாதி ஸம்ப³ந்தோ⁴. யதா² ச காயேன அபி⁴ஹரேய்ய, வாசாய ச, தம் விதி⁴ம் த³ஸ்ஸேதும் ‘‘உபனேத்வா’’திஆதி³ வுத்தம் ஸஅந்தரந்தி அந்தரவாஸகஸஹிதம். உத்தரந்தி உத்தராஸங்க³ம். பரமந்தி அவஸானம். அஸ்ஸ சீவரஸ்ஸாதி அஸ்ஸ ஸமுதா³யபூ⁴தஸ்ஸ ஹரிதப்³ப³ஸ்ஸ சீவரஸ்ஸ. தக்³கு³ணஸம்விஞ்ஞாணோ ஹி அயம் பா³ஹிரத்த²ஸமாஸோ யதா² ‘‘லம்ப³கண்ணோ’’தி த³ட்ட²ப்³ப³ம். தேனாஹ ‘‘நிவாஸனேனா’’திஆதி³. உக்கட்ட²பரிச்சே²தே³ன ஹி ஸப்³பே³ தம்பரமம்யேவ க³ஹேதும் லப⁴ந்தி.

யஸ்மா அச்சி²ன்னஸப்³ப³சீவரேன திசீவரமத்தகேனேவ பி⁴க்கு²னா ஏவம் படிபஜ்ஜிதப்³ப³ம், அஞ்ஞேன பன அஞ்ஞதா²பி, தஸ்மா தம் விபா⁴க³ம் த³ஸ்ஸேதும் ‘‘தத்ராயம் வினிச்ச²யோ’’திஆதி³ வுத்தம். அதி⁴ட்டி²தசீவரஸ்ஸாதி திசீவராதி⁴ட்டா²னனயேன வா பரிக்கா²ரசோளவஸேன வா யேன கேனசி அதி⁴ட்டி²தசீவரஸ்ஸ, இத³ஞ்ச யேபு⁴ய்யேன அதி⁴ட்ட²ஹித்வா சீவரம் பரிபு⁴ஞ்ஜதோ வுத்தம், ந பன அனதி⁴ட்டி²தசீவரஸ்ஸ சீவரே அச்சி²ன்னே அயம் விதி⁴ ந ஸம்ப⁴வதீதி. யஸ்ஸ வா திசீவரதோ அதி⁴கம்பி சீவரம் அஞ்ஞத்த² அத்தி², தத்த² நத்தி², தேனாபி ததா³ தத்த² அபா⁴வதோ த்³வே ஸாதி³தும் வட்டதி. பகதியாவ ஸந்தருத்தரேன சரதீதி (ஸாரத்த². டீ. 2.523-524) அத்த²தகதி²னத்தா வா ஸாஸங்கஸிக்கா²பத³வஸேன வா அவிப்பவாஸஸம்முதிவஸேன வா ததியஸ்ஸ அலாபே⁴ன வா சரதி. ‘‘த்³வே நட்டா²னீ’’தி அதி⁴காரத்தா வுத்தம் ‘‘த்³வே ஸாதி³தப்³பா³னீ’’தி. ஏகம் ஸாதி³யந்தேனேவ ஸமோ ப⁴விஸ்ஸதீதி திண்ணம் சீவரானம் த்³வீஸு நட்டே²ன ஏகம் ஸாதி³யந்தேன ஸமோ ப⁴விஸ்ஸதி உபி⁴ன்னம்பி ஸந்தருத்தரபரமதாய அவட்டா²னதோ. யஸ்ஸ ஏகம்யேவ ஹோதி அஞ்ஞேன கேனசி காரணேன வினட்ட²ஸேஸசீவரத்தா.

பஞ்சஸு நட்டே²ஸூதி திசீவரம் உத³கஸாடிகா ஸம்கச்சிகாதி இமேஸு பஞ்சஸு சீவரேஸு நட்டே²ஸு. ‘‘ஏகஸ்மிம் வா நட்டே²’’தி வசனவிபரிணாமம் கத்வா யோஜேதப்³ப³ம். ததோ உத்தரீதி ஸந்தருத்தரபரமதோ உத்தரி.

ஸேஸகம் ஆஹரிஸ்ஸாமீதி த்³வே சீவரானி கத்வா ‘‘ஸேஸகம் புன ஆஹரிஸ்ஸாமீ’’தி அத்தோ². ஸேஸகம் துய்ஹம்யேவ ஹோதூதி வுத்தஸ்ஸாதி தா³னஸமயே ஏவம் வுத்தஸ்ஸ. ஸசே பன ‘‘ஸேஸகம் ஆஹரிஸ்ஸாமீ’’தி வத்வா க³ஹேத்வா க³மனஸமயேபி ‘‘ஸேஸகம் துய்ஹம்யேவ ஹோதூ’’தி வத³ந்தி, லத்³த⁴கப்பியமேவ. ந அச்சி²ன்னனட்ட²காரணா தி³ன்னந்தி பா³ஹுஸச்சாதி³கு³ணவஸேன தி³ன்னம். வுத்தனயேனாதி ‘‘ஞாதகப்பவாரிதே வா விஞ்ஞாபேந்தஸ்ஸ, ஸமயே ச அஞ்ஞஸ்ஸ வா ஞாதகப்பவாரிதே தஸ்ஸேவத்தா²ய விஞ்ஞாபேந்தஸ்ஸ’’தி வுத்தனயேன.

ததுத்தரிஸிக்கா²பத³வண்ணனா நிட்டி²தா.

8. பட²மஉபக்க²டஸிக்கா²பத³வண்ணனா

பி⁴க்கு²ம் பனேவ உத்³தி³ஸ்ஸாதி ஏத்த² பனாதி நிபாதமத்தம், ததா² ஏவ-ஸத்³தோ³பி. தேனாஹ ‘‘இத்த²ன்னாமஸ்ஸா’’திஆதி³. அபதி³ஸித்வாதி கதே²த்வா, ஆரப்³பா⁴தி வா அத்தோ². அஞ்ஞாதகஸ்ஸ க³ஹபதிஸ்ஸாதி அஞ்ஞாதகக³ஹபதினாதி அத்தோ². கரணத்தே² ஹி இத³ம் ஸாமிவசனம். அட்ட²கதா²யம் பன இத³ம் ஸுவிஞ்ஞேய்யந்தி ந விசாரிதம். சீவரம் சேதாபேந்தி பரிவத்தேந்தி ஏதேனாதி சீவரசேதாபன்னம் (ஸாரத்த². டீ. 2.528-529), சீவரமூலம், ந-காரோ பனேத்த² ஆக³மோ, ‘‘சீவரசேதாபன’’ந்திபி பட²ந்தி. தம் பன யஸ்மா ஹிரஞ்ஞாதீ³ஸு அஞ்ஞதரம் ஹோதி, தஸ்மா ‘‘ஹிரஞ்ஞாதி³க’’ந்தி வுத்தம். தத்த² ஹிரஞ்ஞந்தி கஹாபணோ வுச்சதி. ஆதி³ஸத்³தே³ன ஸுவண்ணாதீ³னம் க³ஹணம். உபக்க²டந்தி உபட்டா²பிதம். தம் உபக்க²ரணம் தேஸம் ததா² ஸஜ்ஜிதந்தி ஆஹ ‘‘உபக்க²டம் ஹோதீதி ஸஜ்ஜிதம் ஹோதீ’’தி. ஸம்ஹரித்வா ட²பிதந்தி ராஸிம் கத்வா ட²பிதம். பரிவத்தனஞ்ச அகதஸ்ஸ காராபனம், கதஸ்ஸ கிணனந்தி ஆஹ ‘‘காரேத்வா வா கிணித்வா வாதி அத்தோ²’’தி. அச்சா²தே³ஸ்ஸாமீதி பாருபேஸ்ஸாமீதி வுத்தம் ஹோதி. தேனாஹ ‘‘வோஹாரவசனமேத’’ந்தி. வோஹாரவசனந்தி ச உபசாரவசனந்தி அத்தோ².

‘‘தத்ர சே ஸோ பி⁴க்கூ²’’திஆதீ³ஸு கோ பத³ஸம்ப³ந்தோ⁴தி ஆஹ ‘‘யத்ர ஸோ க³ஹபதி வா’’திஆதி³. புப்³பே³ அப்பவாரிதோதி ‘‘த³ஸ்ஸாமி, கீதி³ஸேன தே, ப⁴ந்தே, சீவரேன அத்தோ², கீதி³ஸம் தே சீவரம் சேதாபேமீ’’தி புப்³பே³ அவுத்தோ. உபஸங்கமித்வாதி க³ந்த்வா. பத³பா⁴ஜனே பசுரவோஹாரவஸேன ‘‘க⁴ரம் க³ந்த்வா’’தி (பாரா. 529) வுத்தம். ஏத்த² ச பசுரவோஹாரவஸேனாதி யேபு⁴ய்யவோஹாரவஸேன. யேபு⁴ய்யேன ஹி க⁴ரஸாமிகம் த³ட்டு²காமா தஸ்ஸ க⁴ரம் க³ச்ச²ந்தீதி ததே²வ ப³ஹுலவோஹாரோ. விகப்பந்தி விஸிட்டோ² கப்போ விகப்போ, வி-ஸத்³தோ³ சேத்த² விஸிட்ட²த்தோ². தேனாஹ ‘‘விஸிட்ட²கப்ப’’ந்தி. இமினா வசனத்த²மாஹ. ‘‘அதி⁴கவிதா⁴ன’’ந்தி இமினா பன அதி⁴ப்பாயத்த²ம். யதா² பன தமாபஜ்ஜதீதி யேனாகாரேன தம் விகப்பம் ஆபஜ்ஜதி. தம் த³ஸ்ஸேதுந்தி தம் ஆகாரம் த³ஸ்ஸேதும்.

‘‘ஸாதூ⁴’’தி அயம் ஸத்³தோ³ ஸம்படிச்ச²னஸம்பஹம்ஸனஸுந்த³ராயாசனாதீ³ஸு தி³ஸ்ஸதி. ததா² ஹேஸ ‘‘ஸாது⁴, ப⁴ந்தேதி கோ² ஸோ பி⁴க்கு² ப⁴க³வதோ பா⁴ஸிதம் அபி⁴னந்தி³த்வா அனுமோதி³த்வா’’திஆதீ³ஸு (ம. நி. 3.86) ஸம்படிச்ச²னே தி³ஸ்ஸதி, ‘‘ஸாது⁴ ஸாது⁴ ஸாரிபுத்தா’’திஆதீ³ஸு (தீ³. நி. 3.349; ம. நி. 1.340) ஸம்பஹம்ஸனே.

‘‘ஸாது⁴ த⁴ம்மருசி ராஜா, ஸாது⁴ பஞ்ஞாணவா நரோ;

ஸாது⁴ மித்தானமத்³து³ப்³போ⁴, பாபஸ்ஸாகரணம் ஸுக²’’ந்திஆதீ³ஸு. (ஜா. 2.18.101) –

ஸுந்த³ரே, ‘‘ஸாது⁴ மே, ப⁴ந்தே ப⁴க³வா, ஸம்கி²த்தேன த⁴ம்மம் தே³ஸேதூ’’திஆதீ³ஸு (ஸம். நி. 3.64-68) ஆயாசனே, இதா⁴பி ஆயாசனேயேவ த³ட்ட²ப்³போ³தி (தீ³. நி. அட்ட². 1.189; ம. நி. அட்ட². 1.1 மூலபரியாயஸுத்தவண்ணனா; ஸு. நி. அட்ட². 1.115 அக்³கி³கபா⁴ரத்³வாஜஸுத்தவண்ணனா; பு³. வம். அட்ட². 1.49) ஆஹ ‘‘ஸாதூ⁴திஆயாசனே நிபாதோ’’தி. தத்த² ஆயாசனேதி அபி⁴முக²ம் யாசனே, அபி⁴பத்த²னாயந்தி அத்தோ². பரிவிதக்கே நிபாதோதி ஸம்ப³ந்தோ⁴. ஆலபதீதி ஆமந்தேதி. ஆயதாதீ³ஸூதி ஏத்த² ஆதி³ஸத்³தே³ன வித்த²தஅப்பிதஸண்ஹானம் க³ஹணம். யஸ்மா பன ந இமஸ்ஸ ஆபஜ்ஜனமத்தேனேவ ஆபத்தி ஸீஸம் ஏதி, தஸ்மா ‘‘தஸ்ஸ வசனேனா’’திஆதி³ வுத்தம். பயோகே³தி ஸுத்தபரியேஸனாதி³பயோகே³.

மஹக்³க⁴ம் சேதாபேதுகாமம் அப்பக்³க⁴ந்தி வீஸதிஅக்³க⁴னகம் சீவரம் சேதாபேதுகாமம் ‘‘அலம் மய்ஹம் தேன, த³ஸஅக்³க⁴னகம் வா அட்ட²க்³க⁴னகம் வா தே³ஹீ’’தி வத³ந்தஸ்ஸாதி அத்தோ². ஏவரூபந்தி ஏவம் ஸமபா⁴க³ம், இமினா ஸமகந்தி வுத்தம் ஹோதி. தஞ்ச கோ² அக்³க⁴வஸேனேவ, ந பமாணவஸேன. அக்³க⁴வட்³ட⁴னகஞ்ஹி இத³ம் ஸிக்கா²பத³ம்.

பட²மஉபக்க²டஸிக்கா²பத³வண்ணனா நிட்டி²தா.

9. து³தியஉபக்க²டஸிக்கா²பத³வண்ணனா

கஸ்மா இமினா நயேன அத்தோ² வேதி³தப்³போ³தி ஆஹ ‘‘இத³ஞ்ஹீ’’திஆதி³. ஹீதி காரணத்தே² நிபாதோ. ந கோசி விஸேஸோதி ஆஹ ‘‘கேவல’’ந்திஆதி³.

து³தியஉபக்க²டஸிக்கா²பத³வண்ணனா நிட்டி²தா.

10. ராஜஸிக்கா²பத³வண்ணனா

ராஜதோ போ⁴க்³க³ந்தி ராஜதோ லத்³த⁴போ⁴க்³க³ம். ராஜபோ⁴க்³கோ³தி ராஜாமத்தோ. ராஜதோ போ⁴கோ³தி ரஞ்ஞா தி³ன்னம் இஸ்ஸரியம். இமினாதிஆதீ³தி ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஹீ’’தி இத³ம். ஆக³மனஸுத்³தி⁴ந்தி மூலஸுத்³தி⁴ம். யதி³ ஹி இமினா கப்பியனீஹாரேன அபேஸேத்வா ‘‘இத³ம் இத்த²ன்னாமஸ்ஸ பி⁴க்கு²னோ தே³ஹீ’’தி பேஸேய்ய, ஸோபி தூ³தோ தம் பி⁴க்கு²ம் உபஸங்கமித்வா ஏவம் வதே³ய்ய ‘‘இத³ம் கோ², ப⁴ந்தே, ஆயஸ்மந்தம் உத்³தி³ஸ்ஸ சீவரசேதாபன்னம் ஆப⁴தம், படிக்³க³ண்ஹாது ஆயஸ்மா சீவரசேதாபன்ன’’ந்தி (பாரா. 538), ததா³ படிக்கி²பித்வாபி கப்பியகாரகம் புட்டே²ன தம் நித்³தி³ஸிதும் ந வட்டதி. தேனாஹ ‘‘ஸசே ஹீ’’திஆதி³. அகப்பியவத்து²ம் ஆரப்³பா⁴தி ஹிரஞ்ஞாதி³ம் ஆரப்³ப⁴. ஈதி³ஸேன தூ³தவசனேனாதி ‘‘படிக்³க³ண்ஹாது ஆயஸ்மா சீவரசேதாபன்ன’’ந்தி ஏவரூபேன தூ³தவசனேன. தஸ்மாதி யஸ்மா ஸம்படிச்சி²தும் அகப்பியம் ஹோதி, தஸ்மா. ஸுவண்ணந்தி ஜாதரூபம். ரஜதந்தி ரூபியம். கஹாபணேனாதி ஸுவண்ணமயோ வா ரூபியமயோ வா பாகதிகோ வா கஹாபணோ. மாஸகோதி லோஹமாஸகோ வா ஹோது, தா³ருமாஸகோ வா ஹோது, ஜதுமாஸகோ வா ஹோது, யோ யோ யத்த² யத்த² ஜனபதே³ யதா³ யதா³ வோஹாரம் க³ச்ச²தி, அந்தமஸோ அட்டி²மயோபி சம்மமயோபி ருக்க²ப²லபீ³ஜமயோபி ஸமுட்டா²பிதரூபோபி அஸமுட்டா²பிதரூபோபி ஸப்³போ³ இத⁴ மாஸகோதி வேதி³தப்³போ³. ஏத்த² ச யம் வத்தப்³ப³ம், தம் ரூபியஸிக்கா²பதே³ வக்கா²ம.

முத்தாதி ஹத்தி²கும்ப⁴ஜாதி³கா அட்ட²விதா⁴ முத்தா. ததா² ஹி ஹத்தி²கும்ப⁴ம் வராஹதா³ட²ம், பு⁴ஜங்க³ஸீஸம், வலாஹகம், வேளு, மச்ச²ஸிரோ, ஸங்கோ², ஸிப்பீதி அட்ட² முத்தாயோனியோ. தத்த² யா மச்ச²ஸங்க²ஸிப்பிஜாதா, ஸா ஸாமுத்³தி³கா, பு⁴ஜங்க³ஜாபி காசி ஸாமுத்³தி³கா ஹோதி. இதரா அஸாமுத்³தி³கா. யஸ்மா பன ப³ஹுலம் ஸாமுத்³தி³காவ முத்தா லோகே தி³ஸ்ஸந்தி, தத்தா²பி ஸிப்பிஜாவ, இதரா கதா³சி. தஸ்மா ஸம்மோஹவினோத³னியம் ‘‘முத்தாதி ஸாமுத்³தி³கமுத்தா’’தி (விப⁴. அட்ட². 172) வுத்தம். மணீதி ட²பேத்வா வேளுரியாதி³கே அந்தமஸோ ஜாதிப²லிகம் உபாதா³ய ஸப்³போ³பி நீலபீதாதி³வண்ணபே⁴தோ³ மணீதி வேதி³தப்³போ³, பசித்வா கதோ பன காசமணியேவேகோ பத்தாதி³ப⁴ண்ட³மூலத்த²ம் ஸம்படிச்சி²தும் வட்டதி. வேளுரியோ நாம வம்ஸவண்ணமணி. ஸங்கோ²தி த⁴மனஸங்கோ² தோ⁴தவித்³தோ⁴ ரதனமிஸ்ஸோ, பானீயஸங்கோ² பன ரதனாமிஸ்ஸகதோ, ஸோ ச அஞ்ஜனாதி³பே⁴ஸஜ்ஜத்தா²ய, ப⁴ண்ட³மூலத்தா²ய ச ஸம்படிச்சி²தும் வட்டதி. ஸிலாதி தோ⁴தவித்³தா⁴ ரதனஸம்யுத்தா முக்³க³வண்ணா ஸிலா. ரதனேன பன அமிஸ்ஸா ஸத்த²கனிஸானாதி³அத்தா²ய படிக்³க³ண்ஹிதும் வட்டதி. ஏத்த² ச ‘‘ரதனஸம்யுத்தாதி ஸுவண்ணேன ஸத்³தி⁴ம் யோஜேத்வா பசித்வா கதா’’தி வத³ந்தி. பவாளந்தி தோ⁴தம்பி அதோ⁴தம்பி ஸப்³ப³ம் பவாளம். லோஹிதங்கோதி ரத்தமணி. மஸாரக³ல்லந்தி கப³ரமணி. யம் ‘‘மரகத’’ந்திபி வுச்சதி.

ஸத்த த⁴ஞ்ஞானீதி ஸானுலோமானி ஸாலிஆதீ³னி ஸத்த த⁴ஞ்ஞானி. நீவாராதி³உபத⁴ஞ்ஞஸ்ஸ பன ஸாலிஆதி³மூலத⁴ஞ்ஞந்தோக³த⁴த்தா ‘‘ஸத்த த⁴ஞ்ஞானீ’’தி வுத்தம். தா³ஸிதா³ஸகே²த்தவத்து²புப்பா²ராமப²லாராமாத³யோதி ஏத்த² தா³ஸீ நாம அந்தோஜாதத⁴னக்கீதகரமரானீதப்பபே⁴தா³. ததா² தா³ஸோ. கே²த்தம் நாம யஸ்மிம் புப்³ப³ண்ணம் ருஹதி. வத்து² நாம யஸ்மிம் அபரண்ணம் ருஹதி. யத்த² வா உப⁴யம்பி ருஹதி, தம் கே²த்தம். தத³த்தா²ய அகதபூ⁴மிபா⁴கோ³ வத்து². கே²த்தவத்து²ஸீஸேன சேத்த² வாபிதளாகாதீ³னிபி ஸங்க³ஹிதானேவ. வஸ்ஸிகாதீ³னம் புப்ப²னகோ புப்பா²ராமோ. அம்ப³ப²லாதீ³னம் ப²லனகோ ப²லாராமோ. ந கேவலஞ்ச அத்தனோயேவத்தா²ய ஸம்படிச்சி²தும் ந வட்டதி, ஸசேபி கோசி ஜாதரூபரஜதம் ஆனேத்வா ‘‘இத³ம் ஸங்க⁴ஸ்ஸ த³ம்மி, ஆராமம் வா கரோத², சேதியம் வா போ⁴ஜனஸாலாதீ³னம் வா அஞ்ஞதர’’ந்தி வத³தி, இத³ம்பி ஸம்படிச்சி²தும் ந வட்டதி. ‘‘யஸ்ஸ கஸ்ஸசி ஹி அஞ்ஞஸ்ஸ அத்தா²ய ஸம்படிச்ச²ந்தஸ்ஸ து³க்கடம் ஹோதீ’’தி (பாரா. அட்ட². 2.538-539) மஹாபச்சரியம் வுத்தம். தேனாஹ ‘‘சேதியஸங்க⁴க³ணபுக்³க³லானம் வா அத்தா²ய ஸம்படிச்சி²தும் ந வட்டந்தீ’’தி.

ஸசே பன ஸங்க⁴ம் வா க³ணம் வா புக்³க³லம் வா அனாமஸித்வா ‘‘இத³ம் ஹிரஞ்ஞஸுவண்ணம் சேதியஸ்ஸ தே³ம, விஹாரஸ்ஸ தே³ம, நவகம்மஸ்ஸ தே³மா’’தி வத³ந்தி, படிக்கி²பிதும் ந வட்டதி. ‘‘இமே இத³ம் ப⁴ணந்தீ’’தி கப்பியகாரகானம் ஆசிக்கி²தப்³ப³ம். ‘‘சேதியாதீ³னம் அத்தா²ய தும்ஹே க³ஹேத்வா ட²பேதா²’’தி வுத்தே பன ‘‘அம்ஹாகம் க³ஹேதும் ந வட்டதீ’’தி படிக்கி²பிதப்³ப³ம்.

வேய்யாவச்சகரோதி கிச்சகரோ. இத⁴ பன ஸப்³போ³ கிச்சகரோவ ‘‘வேய்யாவச்சகரோ’’தி அதி⁴ப்பேதோதி ஆஹ ‘‘கப்பியகாரகோ’’தி. ஏஸோ கோ²தி ‘‘அஸுகவீதி²யம் அஸுகக⁴ரே அஸுகனாமோ’’தி பரம்முக²ம் வத³தி. இதரம்பீதி பரம்முகா²னித்³தி³ட்ட²ம்பி. ‘‘அத்தோ² மே, ஆவுஸோ, சீவரேனா’’தி ஏதம் சோத³னாலக்க²ணனித³ஸ்ஸனந்தி ஸம்ப³ந்தோ⁴. தத்த² சோத³னாலக்க²ணனித³ஸ்ஸனந்தி வாசாய சோத³னாலக்க²ணனித³ஸ்ஸனம். தேனாஹ ‘‘ஸசே ஹீ’’திஆதி³. இத³ம் வா வசனம் வத்தப்³ப³ந்தி ஸம்ப³ந்தோ⁴. ஏதஸ்ஸ வா அத்தோ² யாய காயசி பா⁴ஸாய வத்தப்³போ³தி ஸம்ப³ந்தோ⁴. ‘‘தே³ஹி மே சீவரம், ஆஹர மே சீவரம், பரிவத்தேஹி மே சீவரம், சேதாபேஹி மே சீவர’’ந்தி ஏதானி பன வசனானி ஏதேஸம் வா அத்தோ² யாய காயசி பா⁴ஸாய ந வத்தப்³போ³. தேனாஹ ‘‘தே³ஹி மே’’திஆதி³. ஸாதே⁴ய்யாதி நிப்பா²தே³ய்ய. இச்சேதம் குஸலந்தி ஏவம் யாவததியம் சோத³னேன தஸ்ஸ சீவரஸ்ஸ யதே³தம் அபி⁴னிப்பா²த³னம், ஏதம் குஸலம் ஸாது⁴ ஸுட்டூ²தி அத்தோ². தேனாஹ ‘‘ஏதம் ஸுந்த³ர’’ந்தி.

ச²க்க²த்தும் பரமோ பரிச்சே²தோ³ அஸ்ஸாதி ச²க்க²த்துபரமம். இத³ஞ்ஹி ‘‘டா²தப்³ப³’’ந்தி இமிஸ்ஸா கிரியாய விஸேஸனம், ச²க்க²த்துபரமம் டா²னம் காதப்³ப³ந்தி அத்தோ². தேனாஹ ‘‘பா⁴வனபும்ஸகவசனமேத’’ந்தி, ஏதம் பா⁴வே டா²தப்³ப³ந்தி வுத்ததா⁴த்வத்த²மத்தே ஸாதே⁴தப்³பே³ நபும்ஸகலிங்க³வசனந்தி அத்தோ². ந நிஸீதி³தப்³ப³ந்தி ‘‘இத⁴, ப⁴ந்தே, நிஸீத³தா²’’தி வுத்தேபி ந நிஸீதி³தப்³ப³ம். ந ஆமிஸம் படிக்³க³ஹேதப்³ப³ந்தி யாகு³க²ஜ்ஜகாதி³பே⁴த³ம் கிஞ்சி ஆமிஸம் ‘‘க³ண்ஹத², ப⁴ந்தே’’தி யாசியமானேனாபி ந க³ண்ஹிதப்³ப³ம். ந த⁴ம்மோ பா⁴ஸிதப்³போ³தி (பாரா. அட்ட². 2.538-539) ‘‘மங்க³லம் வா அனுமோத³னம் வா பா⁴ஸதா²’’தி யாசியமானேனாபி ந கிஞ்சி பா⁴ஸிதப்³ப³ம். டா²னம் ப⁴ஞ்ஜதீதி டி²திம் வினாஸேதி. ட²த்வா சீவரம் க³ஹேதும் ஆக³தேன ஹி தம் உத்³தி³ஸ்ஸ துண்ஹீபூ⁴தேன டா²தப்³ப³மேவ, ந நிஸஜ்ஜாதி³கம் காதப்³ப³ம். இமினா பன தம் கதந்தி டா²னம் வினாஸிதம் ஹோதி. தேனாஹ ‘‘ஆக³தகாரணம் வினாஸேதீ’’தி. ‘‘ஆக³தகாரணம் நாம டா²னமேவ, தஸ்மா ‘ந காதப்³ப³’ந்தி வாரிதஸ்ஸ கதத்தா நிஸஜ்ஜாதீ³ஸு கதேஸு ச²ஸு டா²னேஸு ஏகம் டா²னம் ப⁴ஞ்ஜதீ’’தி (ஸாரத்த². டீ. 2.537-539) அயமேத்த² அதி⁴ப்பாயோ. ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³ம். ‘‘ந அஞ்ஞம் கிஞ்சி காதப்³ப³’’ந்தி ஹி இத³ம் டா²னலக்க²ணம். தேனேவாஹ ‘‘இத³’’ந்திஆதி³. தத்த² இத³ந்தி ‘‘சதுக்க²த்தும் பஞ்சக்க²த்தும், ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³’’ந்தி வசனம். ஏத்த² ச ‘‘நிஸீத³னாதி³ம்ஹி கதே புன சீவரம் க³ஹேதும் ந லப⁴தீ’’தி கேசி. ‘‘த்³வே டா²னானி பரிஹாயந்தீ’’தி அஞ்ஞே. ‘‘ஏகம் டா²னம் பரிஹாயதீ’’தி அபரே. உப⁴யம் கரோதீதி சோதே³திபி திட்ட²திபி.

‘‘தத்ர தத்ர டா²னே திட்ட²தீ’’தி இத³ம் சோத³கஸ்ஸ டி²தட்டி²தட்டா²னதோ அபக்கம்ம தத்ர தத்ர சீவரம் உத்³தி³ஸ்ஸ டா²னம்யேவ ஸந்தா⁴ய வுத்தம். ஏத்தா²தி ஏதேஸு த்³வீஸு சோத³னாட்டா²னேஸு.

கிம் பன ஸப்³ப³கப்பியகாரகேஸு (பாரா. அட்ட². 2.538-539; வி. ஸங்க³. அட்ட². 65) ஏவம் படிபஜ்ஜிதப்³ப³ந்தி? ந படிபஜ்ஜிதப்³ப³ம். அயஞ்ஹி கப்பியகாரகோ நாம ஸங்கே²பதோ து³விதோ⁴ நித்³தி³ட்டோ² ச அனித்³தி³ட்டோ² ச. தத்த² ச நித்³தி³ட்டோ² து³விதோ⁴ பி⁴க்கு²னா நித்³தி³ட்டோ², தூ³தேன நித்³தி³ட்டோ²தி. அனித்³தி³ட்டோ²பி து³விதோ⁴ முக²வேவடிககப்பியகாரகோ, பரம்முக²கப்பியகாரகோதி. தேஸு பி⁴க்கு²னா நித்³தி³ட்டோ² ஸம்முகா²ஸம்முக²வஸேன சதுப்³பி³தோ⁴ ஹோதி, ததா² தூ³தேன நித்³தி³ட்டோ²பி.

கத²ம்? இதே⁴கச்சோ பி⁴க்கு²ஸ்ஸ சீவரத்தா²ய தூ³தேன அகப்பியவத்து²ம் பஹிணதி, தூ³தோ ச தம் பி⁴க்கு²ம் உபஸங்கமித்வா ‘‘இத³ம், ப⁴ந்தே, இத்த²ன்னாமேன தும்ஹாகம் சீவரத்தா²ய பஹிதம், க³ண்ஹத² ந’’ந்தி வத³தி. பி⁴க்கு² ‘‘இத³ம் ந கப்பதீ’’தி படிக்கி²பதி. தூ³தோ ‘‘அத்தி² பன தே, ப⁴ந்தே, வேய்யாவச்சகரோ’’தி புச்ச²தி, புஞ்ஞத்தி²கேஹி ச உபாஸகேஹி ‘‘பி⁴க்கூ²னம் வேய்யாவச்சம் கரோதா²’’தி ஆணத்தா வா பி⁴க்கூ²னம் வா ஸந்தி³ட்டா² ஸம்ப⁴த்தா கேசி வேய்யாவச்சகரா ஹோந்தி, தேஸம் அஞ்ஞதரோ தஸ்மிம் க²ணே பி⁴க்கு²ஸ்ஸ ஸந்திகே நிஸின்னோ ஹோதி, பி⁴க்கு² தம் நித்³தி³ஸதி ‘‘அயம் பி⁴க்கூ²னம் வேய்யாவச்சகரோ’’தி. தூ³தோ தஸ்ஸ ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் கிணித்வா தே³ஹீ’’தி க³ச்ச²தி, அயம் பி⁴க்கு²னா ஸம்முகா²னித்³தி³ட்டோ².

நோ சே பி⁴க்கு²ஸ்ஸ (பாரா. அட்ட². 2.537; வி. ஸங்க³. அட்ட². 65) ஸந்திகே நிஸின்னோ ஹோதி, அபிச கோ² பி⁴க்கு² நித்³தி³ஸதி ‘‘அஸுகஸ்மிம் நாம கா³மே இத்த²ன்னாமோ பி⁴க்கூ²னம் வேய்யாவச்சகரோ’’தி. ஸோ க³ந்த்வா தஸ்ஸ ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் கிணித்வா த³தே³ய்யாஸீ’’தி ஆக³ந்த்வா பி⁴க்கு²ஸ்ஸ ஆரோசேத்வா க³ச்ச²தி, அயமேகோ பி⁴க்கு²னா அஸம்முகா²னித்³தி³ட்டோ².

ந ஹேவ கோ² ஸோ தூ³தோ அத்தனா ஆக³ந்த்வா ஆரோசேதி, அபிச கோ² அஞ்ஞம் பஹிணதி ‘‘தி³ன்னம் மயா, ப⁴ந்தே, தஸ்ஸ ஹத்தே² சீவரசேதாபன்னம், சீவரம் க³ண்ஹேய்யாதா²’’தி, அயம் து³தியோ பி⁴க்கு²னா அஸம்முகா²னித்³தி³ட்டோ².

ந ஹேவ கோ² அஞ்ஞம் பஹிணதி, அபிச கோ² க³ச்ச²ந்தோவ பி⁴க்கு²ம் வத³தி ‘‘அஹம் தஸ்ஸ ஹத்தே² சீவரசேதாபன்னம் த³ஸ்ஸாமி, தும்ஹே சீவரம் க³ண்ஹேய்யாதா²’’தி, அயம் ததியோ பி⁴க்கு²னா அஸம்முகா²னித்³தி³ட்டோ²தி ஏவம் ஏகோ ஸம்முகா²னித்³தி³ட்டோ² தயோ அஸம்முகா²னித்³தி³ட்டா²தி இமே சத்தாரோ பி⁴க்கு²னா நித்³தி³ட்ட²வேய்யாவச்சகரா நாம. ஏதேஸு இமஸ்மிம் ராஜஸிக்கா²பதே³ வுத்தனயேனேவ படிபஜ்ஜிதப்³ப³ம்.

அபரோ பி⁴க்கு² புரிமனயேனேவ தூ³தேன புச்சி²தோ நத்தி²தாய வா அவிசாரேதுகாமதாய வா ‘‘நத்த²ம்ஹாகம் கப்பியகாரகோ’’தி வத³தி, தஸ்மிஞ்ச க²ணே கோசி மனுஸ்ஸோ ஆக³ச்ச²தி, தூ³தோ தஸ்ஸ ஹத்தே² அகப்பியவத்து²ம் த³த்வா ‘‘இமஸ்ஸ ஹத்த²தோ சீவரம் க³ண்ஹேய்யாதா²’’தி வத்வா க³ச்ச²தி, அயம் தூ³தேன ஸம்முகா²னித்³தி³ட்டோ².

அபரோ தூ³தோ கா³மம் பவிஸித்வா அத்தனா அபி⁴ருசிதஸ்ஸ கஸ்ஸசி ஹத்தே² அகப்பியவத்து²ம் த³த்வா புரிமனயேனேவ ஆக³ந்த்வா வா ஆரோசேதி, அஞ்ஞம் வா பஹிணதி, ‘‘அஹம் அஸுகஸ்ஸ நாம ஹத்தே² சீவரசேதாபன்னம் த³ஸ்ஸாமி, தும்ஹே சீவரம் க³ண்ஹேய்யாதா²’’தி வத்வா வா க³ச்ச²தி, அயம் ததியோ தூ³தேன அஸம்முகா²னித்³தி³ட்டோ²தி ஏவம் ஏகோ ஸம்முகா²னித்³தி³ட்டோ², தயோ அஸம்முகா²னித்³தி³ட்டா²தி இமே சத்தாரோ தூ³தேன நித்³தி³ட்ட²வேய்யாவச்சகரா நாம. ஏதேஸு மேண்ட³கஸிக்கா²பதே³ வுத்தனயேனேவ படிபஜ்ஜிதப்³ப³ம்.

வுத்தஞ்ஹேதம் –

‘‘ஸந்தி, பி⁴க்க²வே, மனுஸ்ஸா ஸத்³தா⁴ பஸன்னா, தே கப்பியகாரகானம் ஹத்தே² ஹிரஞ்ஞம் உபனிக்கி²பந்தி ‘இமினா அய்யஸ்ஸ யம் கப்பியம், தம் தே³தா²’தி. அனுஜானாமி, பி⁴க்க²வே, யம் ததோ கப்பியம், தம் ஸாதி³தும், ந த்வேவாஹம், பி⁴க்க²வே, கேனசி பரியாயேன ஜாதரூபரஜதம் ஸாதி³தப்³ப³ம் பரியேஸிதப்³ப³ந்தி வதா³மீ’’தி (மஹாவ. 299).

ஏத்த² ச சோத³னாய பரிமாணம் நத்தி². மூலம் அஸாதி³யந்தேன ஸஹஸ்ஸக்க²த்தும்பி சோத³னாய வா டா²னேன வா கப்பியப⁴ண்ட³ம் ஸாதி³தும் வட்டதி. நோ சே தே³தி, அஞ்ஞம் கப்பியகாரகம் ட²பேத்வாபி ஆஹராபேதப்³ப³ம். ஸசே இச்ச²தி, மூலஸாமிகானம்பி கதே²தப்³ப³ம். நோ சே இச்ச²தி, ந கதே²தப்³ப³ம்.

அபரோ பி⁴க்கு² புரிமனயேனேவ தூ³தேன புச்சி²தோ ‘‘நத்த²ம்ஹாகம் கப்பியகாரகோ’’தி வத³தி, தத³ஞ்ஞோ ஸமீபே டி²தோ ஸுத்வா ‘‘ஆஹர, போ⁴, அஹம் அய்யஸ்ஸ சீவரம் சேதாபேத்வா த³ஸ்ஸாமீ’’தி வத³தி. தூ³தோ ‘‘ஹந்த³, போ⁴, த³தே³ய்யாஸீ’’தி தஸ்ஸ ஹத்தே² த³த்வா பி⁴க்கு²ஸ்ஸ அனாரோசேத்வாவ க³ச்ச²தி, அயம் முக²வேவடிககப்பியகாரகோ.

அபரோ (பாரா. அட்ட². 2.538-539; வி. ஸங்க³. அட்ட². 65) பி⁴க்கு²னோ உபட்டா²கஸ்ஸ வா அஞ்ஞஸ்ஸ வா ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் த³தே³ய்யாஸீ’’தி ஏத்தோவ பக்கமதி, அயம் பரம்முக²கப்பியகாரகோதி இமே த்³வே அனித்³தி³ட்ட²கப்பியகாரகா நாம. ஏதேஸு அஞ்ஞாதகஅப்பவாரிதேஸு விய படிபஜ்ஜிதப்³ப³ம்.

ஸசே ஸயமேவ சீவரம் ஆனேத்வா தே³ந்தி, க³ஹேதப்³ப³ம். நோ சே, ந கிஞ்சி வத்தப்³பா³. தேனாஹ ‘‘ஸசே’’திஆதி³. கப்பியகாரகேதி ஸம்முகா²ஸம்முக²வஸேன சத்தாரோ கப்பியகாரகேதி அத்தோ². ‘‘தா³யகோ ஸயமேவா’’தி இமினா பி⁴க்கு²ம் படிக்கி²பதி, ந தூ³தம். தஸ்மா தூ³தேன நித்³தி³ட்டோ²பி யதா²ருசி சோதே³தும் வட்டதி. முக²ம் விவரித்வா ஸயமேவ கப்பியகாரகத்தம் உபக³தோதி முக²வேவடிககப்பியகாரகோ. ஏவந்தி ‘‘ஏஸோ கோ²’’திஆதி³னா யதா²வுத்தேன ஆகாரேன. த³ஸ்ஸிதா ஹோந்தி ஸங்கே²பதோதி அதி⁴ப்பாயோ.

வுத்தசோத³னாட்டா²னபரிமாணதோதி வுத்தசோத³னாபரிமாணதோ ச வுத்தட்டா²னபரிமாணதோ ச. ஸந்திகந்தி ஸமீபம். தத்தா²தி ஏத்த² கத²மயமத்தோ² லப்³ப⁴தீதி ஆஹ ‘‘ஸமீபத்தே² ஹி இத³ம் பு⁴ம்மவசன’’ந்தி. இத³ம் வுத்தம் ஹோதி – ‘‘க³ங்கா³யம் கோ³யூதா²னி சரந்தி, கூபே க³க்³க³கூல’’ந்திஆதீ³ஸு விய யஸ்மா ஸமீபாதா⁴ரே இத³ம் ஸத்தமீவிப⁴த்திவசனம், தஸ்மா அயமத்தோ² லப்³ப⁴தீதி. ஏவம் அகரோந்தோதி ஸாமம் வா அக³ச்ச²ந்தோ, தூ³தம் வா அபாஹேந்தோ.

அஜ்ஜண்ஹோ, ப⁴ந்தே, ஆக³மேஹீதி, ப⁴ந்தே, அஜ்ஜ ஏகதி³வஸம் அம்ஹாகம் திட்ட², அதி⁴வாஸேஹீதி அத்தோ². திகபாசித்தியந்தி அதிரேகேஸு சோத³னாட்டா²னேஸு அதிரேகஸஞ்ஞிவேமதிகஊனகஸஞ்ஞீனம் வஸேன தீணி பாசித்தியானி. திக்க²த்தும் சோத³னாய ச²க்க²த்தும் டா²னேன, ஊனகதிக்க²த்தும் சோத³னாய ஊனகச்ச²க்க²த்தும் டா²னேன லத்³தே⁴பி அனாபத்தி. அப்பிததாதி பதிட்டா²பிததா, ‘‘ஸஞ்ஞத்தோ ஸோ மயா’’திஆதி³னா (பாரா. 538) கதி²ததாதி வுத்தம் ஹோதி.

ராஜஸிக்கா²பத³வண்ணனா நிட்டி²தா.

சீவரவக்³கோ³ பட²மோ.