கிரியாப்³யாகதம்

மனோதா⁴துசித்தவண்ணனா

566. வாதபுப்ப²ந்தி மோக⁴புப்ப²ம். தம் அச்சி²ன்னேபி ருக்கே² ந ப²லதி, சி²ன்னருக்க²புப்ப²ம் பன அச்சி²ன்னே ப²லேய்ய. ஏவம் அச்சி²ன்னப⁴வமூலஸ்ஸபி பவத்தமானம் யம் ந ப²லதி, தம் வாதபுப்ப²ஸதி³ஸம். இதரஸ்ஸேவ பன பவத்தமானம் சி²ன்னருக்க²புப்ப²ஸதி³ஸம். தஞ்ஹி அச்சி²ன்னே ப⁴வமூலே ப²லேய்யாதி.

கிரியமனோவிஞ்ஞாணதா⁴துசித்தவண்ணனா

568. லோலுப்பதண்ஹா பஹீனாதி இமஸ்ஸ சித்தஸ்ஸ பச்சயபூ⁴தா புரிமா பவத்தி த³ஸ்ஸிதா. இத³ம் பன சித்தம் விசாரணபஞ்ஞாரஹிதந்தி கேவலம் ஸோமனஸ்ஸமத்தம் உப்பாதே³ந்தஸ்ஸ ஹோதீதி. ஏவம் சேதியபூஜாதீ³ஸுபி த³ட்ட²ப்³ப³ம். வத்தம் கரோந்தோதி இத³ம் வத்தம் கரோந்தஸ்ஸ போ²ட்ட²ப்³பா³ரம்மணே காயத்³வாரசித்தப்பவத்திம் ஸந்தா⁴ய வுத்தம். பஞ்சத்³வாரானுக³தம் ஹுத்வா லப்³ப⁴மானம் ஸந்தா⁴ய பஞ்சத்³வாரே ஏவ வா லோலுப்பதண்ஹாபஹானாதி³பச்சவேக்க²ணஹேதுபூ⁴தம் இத³மேவ பவத்திம் ஸந்தா⁴ய தத்த² தத்த² ‘‘இமினா சித்தேன ஸோமனஸ்ஸிதோ ஹோதீ’’தி வுத்தந்தி ‘‘ஏவம் தாவ பஞ்சத்³வாரே லப்³ப⁴தீ’’தி ஆஹ. அதீதம்ஸாதீ³ஸு அப்படிஹதம் ஞாணம் வத்வா ‘‘இமேஹி தீஹி த⁴ம்மேஹி ஸமன்னாக³தஸ்ஸ பு³த்³த⁴ஸ்ஸ ப⁴க³வதோ ஸப்³ப³ம் காயகம்மம் ஞாணானுபரிவத்தீ’’திஆதி³வசனதோ (மஹானி. 156 அத்த²தோ ஸமானம்) ‘‘ப⁴க³வதோ இத³ம் உப்பஜ்ஜதீ’’தி வுத்தவசனம் விசாரேதப்³ப³ம். அஹேதுகஸ்ஸ மூலாபா⁴வேன ஸுப்பதிட்டி²ததா நத்தீ²தி ப³லபா⁴வோ அபரிபுண்ணோ, தஸ்மா உத்³தே³ஸவாரே ‘‘ஸமாதி⁴ப³லம் ஹோதி, வீரியப³லம் ஹோதீ’’தி ந வுத்தம். ததோ ஏவ ஹி அஹேதுகானம் ஸங்க³ஹவாரே ஜா²னங்கா³னி ச ந உத்³த⁴டானி. தேனேவ இமஸ்மிம்பி அஹேதுகத்³வயே ப³லானி அனுத்³தே³ஸாஸங்க³ஹிதானி. யஸ்மா பன வீரியஸ்ஸ விஜ்ஜமானத்தா ஸேஸாஹேதுகேஹி ப³லவம், யஸ்மா ச ஏத்த² விதக்காதீ³னம் ஜா²னபச்சயமத்ததா விய ஸமாதி⁴வீரியானம் ப³லமத்ததா அத்தி², தஸ்மா நித்³தே³ஸவாரே ‘‘ஸமாதி⁴ப³லம் வீரியப³ல’’ந்தி வத்வா ட²பிதம். யஸ்மா பன நேவ குஸலம் நாகுஸலம், தஸ்மா ஸம்மாஸமாதி⁴ மிச்சா²ஸமாதீ⁴தி, ஸம்மாவாயாமோ மிச்சா²வாயாமோதி ச ந வுத்தந்தி அதி⁴ப்பாயோ. ஏவம் ஸதி மஹாகிரியசித்தேஸு ச ஏதம் ந வத்தப்³ப³ம் ஸியா, வுத்தஞ்ச, தஸ்மா ஸம்மா, மிச்சா² வா நிய்யானிகஸபா⁴வாபா⁴வதோ மக்³க³பச்சயபா⁴வம் அப்பத்தா ஸமாதி⁴வாயாமா இத⁴ ததா² ந வுத்தாதி த³ட்ட²ப்³பா³.

574. இந்த்³ரியபரோபரியத்தஆஸயானுஸயஸப்³ப³ஞ்ஞுதானாவரணஞாணானி இமஸ்ஸானந்தரம் உப்பஜ்ஜமானானி யமகபாடிஹாரியமஹாகருணாஸமாபத்திஞாணானி ச இமஸ்ஸ அனந்தரம் உப்பன்னபரிகம்மானந்தரானி இமினா ஆவஜ்ஜிதாரம்மணேயேவ பவத்தந்தீதி ஆஹ ‘‘ச²…பே… க³ண்ஹந்தீ’’தி. மஹாவிஸயத்தா மஹாக³ஜோ விய மஹந்தந்தி மஹாக³ஜம்.

ரூபாவசராரூபாவசரகிரியசித்தவண்ணனா

577. இதா³னி யானி கிரியானி ஜாதானி, தானி வேதி³தப்³பா³னீதி ஏவம் யோஜனா காதப்³பா³. அத்தபா⁴வோதி பஞ்சக்க²ந்தா⁴ வுச்சந்தி.

சித்துப்பாத³கண்ட³வண்ணனா நிட்டி²தா.