1. பத்தஸிக்கா²பத³வண்ணனா

598. தேன ஸமயேனாதி பத்தஸிக்கா²பத³ம். தத்த² பத்தவாணிஜ்ஜந்தி கா³மனிக³மாதீ³ஸு விசரந்தா பத்தவாணிஜ்ஜம் வா கரிஸ்ஸந்தி. ஆமத்திகாபணம் வாதி அமத்தானி வுச்சந்தி பா⁴ஜனானி, தானி யேஸம் ப⁴ண்ட³ம் தே ஆமத்திகா, தேஸம் ஆமத்திகானம் ஆபணம் ஆமத்திகாபணம், குலாலப⁴ண்ட³வாணிஜகாபணந்தி அத்தோ².

602. தயோ பத்தஸ்ஸ வண்ணாதி தீணி பத்தஸ்ஸ பமாணானி. அட்³டா⁴ள்ஹகோத³னம் க³ண்ஹாதீதி மக³த⁴னாளியா த்³வின்னம் தண்டு³லனாளீனம் ஓத³னம் க³ண்ஹாதி. மக³த⁴னாளி நாம அட்³ட⁴தேரஸபலா ஹோதீதி அந்த⁴கட்ட²கதா²யம் வுத்தம். ஸீஹளதீ³பே பகதினாளி மஹந்தா, த³மிளனாளி கு²த்³த³கா, மக³த⁴னாளி பமாணயுத்தா, தாய மக³த⁴னாளியா தி³யட்³ட⁴னாளி ஏகா ஸீஹளனாளி ஹோதீதி மஹாஅட்ட²கதா²யம் வுத்தம். சதுபா⁴க³ம் கா²த³னந்தி ஓத³னஸ்ஸ சதுத்த²பா⁴க³ப்பமாணம் கா²த³னம், தம் ஹத்த²ஹாரியஸ்ஸ முக்³க³ஸூபஸ்ஸ வஸேன வேதி³தப்³ப³ம். தது³பியம் ப்³யஞ்ஜனந்தி தஸ்ஸ ஓத³னஸ்ஸ அனுரூபம் மச்ச²மம்ஸஸாகப²லகளீராதி³ப்³யஞ்ஜனம்.

தத்ராயம் வினிச்ச²யோ – அனுபஹதபுராணஸாலிதண்டு³லானம் ஸுகோட்டிதபரிஸுத்³தா⁴னம் த்³வே மக³த⁴னாளியோ க³ஹேத்வா தேஹி தண்டு³லேஹி அனுத்தண்டு³லம் அகிலின்னம் அபிண்டி³தம் ஸுவிஸத³ம் குந்த³மகுளராஸிஸதி³ஸம் அவஸ்ஸாவிதோத³னம் பசித்வா நிரவஸேஸம் பத்தே பக்கி²பித்வா தஸ்ஸ ஓத³னஸ்ஸ சதுத்த²பா⁴க³ப்பமாணோ நாதிக⁴னோ நாதிதனுகோ ஹத்த²ஹாரியோ ஸப்³ப³ஸம்பா⁴ரஸங்க²தோ முக்³க³ஸூபோ பக்கி²பிதப்³போ³. ததோ ஆலோபஸ்ஸ ஆலோபஸ்ஸ அனுரூபம் யாவசரிமாலோபப்பஹோனகம் மச்ச²மம்ஸாதி³ப்³யஞ்ஜனம் பக்கி²பிதப்³ப³ம், ஸப்பிதேலதக்கரஸகஞ்ஜிகாதீ³னி பன க³ணனூபகா³னி ந ஹோந்தி, தானி ஹி ஓத³னக³திகானேவ, நேவ ஹாபேதும் ந வட்³டே⁴தும் ஸக்கோந்தி. ஏவமேதம் ஸப்³ப³ம்பி பக்கி²த்தம் ஸசே பத்தஸ்ஸ முக²வட்டியா ஹேட்டி²மராஜிஸமம் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹேட்டி²மந்தம் பு²ஸதி, அயம் உக்கட்டோ² நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் உக்கட்டோ²மகோ நாம பத்தோ. ஸசே தம் ராஜிம் ந ஸம்பாபுணாதி, அந்தோக³தமேவ ஹோதி, அயம் உக்கட்டு²க்கட்டோ² நாம பத்தோ.

நாளிகோத³னந்தி மக³த⁴னாளியா ஏகாய தண்டு³லனாளியா ஓத³னம். பத்தோ²த³னந்தி மக³த⁴னாளியா உபட்³ட⁴னாளிகோத³னம். ஸேஸம் வுத்தனயேனேவ வேதி³தப்³ப³ம். அயம் பன நாமமத்தே விஸேஸோ – ஸசே நாளிகோத³னாதி³ ஸப்³ப³ம்பி பக்கி²த்தம் வுத்தனயேனேவ ஹேட்டி²மராஜிஸமம் திட்ட²தி, அயம் மஜ்ஜி²மோ நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் மஜ்ஜி²மோமகோ நாம பத்தோ. ஸசே தம் ராஜிம் ந ஸம்பாபுணாதி அந்தோக³தமேவ ஹோதி, அயம் மஜ்ஜி²முக்கட்டோ² நாம பத்தோ. ஸசே பத்தோ²த³னாதி³ ஸப்³ப³ம்பி பக்கி²த்தம் ஹேட்டி²மராஜிஸமம் திட்ட²தி, அயம் ஓமகோ நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் ஓமகோமகோ நாம பத்தோ. ஸசே தம் ராஜிம் ந பாபுணாதி அந்தோக³தமேவ ஹோதி, அயம் ஓமகுக்கட்டோ² நாம பத்தோதி ஏவமேதே நவ பத்தா. தேஸு த்³வே அபத்தா உக்கட்டு²க்கட்டோ² ச ஓமகோமகோ ச. ‘‘ததோ உக்கட்டோ² அபத்தோ ஓமகோ அபத்தோ’’தி இத³ஞ்ஹி ஏதே ஸந்தா⁴ய வுத்தம். உக்கட்டு²க்கட்டோ² ஹி ஏத்த² உக்கட்ட²தோ உக்கட்ட²த்தா ‘‘ததோ உக்கட்டோ² அபத்தோ’’தி வுத்தோ. ஓமகோமகோ ச ஓமகதோ ஓமகத்தா ததோ ஓமகோ அபத்தோதி வுத்தோ. தஸ்மா ஏதே பா⁴ஜனபரிபோ⁴கே³ன பரிபு⁴ஞ்ஜிதப்³பா³, ந அதி⁴ட்டா²னுபகா³, ந விகப்பனுபகா³. இதரே பன ஸத்த அதி⁴ட்ட²ஹித்வா வா விகப்பேத்வா வா பரிபு⁴ஞ்ஜிதப்³பா³, ஏவம் அகத்வா தம் த³ஸாஹம் அதிக்காமயதோ நிஸ்ஸக்³கி³யம் பாசித்தியந்தி தம் ஸத்தவித⁴ம்பி பத்தம் த³ஸாஹபரமம் காலம் அதிக்காமயதோ நிஸ்ஸக்³கி³யம் பாசித்தியம்.

607. நிஸ்ஸக்³கி³யம் பத்தம் அனிஸ்ஸஜ்ஜித்வா பரிபு⁴ஞ்ஜதீதி யாகு³ம் பிவித்வா தோ⁴தே து³க்கடம், க²ஞ்ஜகம் கா²தி³த்வா ப⁴த்தம் பு⁴ஞ்ஜித்வா தோ⁴தே து³க்கடந்தி ஏவம் பயோகே³ பயோகே³ து³க்கடம்.

608. அனாபத்தி அந்தோத³ஸாஹம் அதி⁴ட்டே²தி விகப்பேதீதி ஏத்த² பன பமாணயுத்தஸ்ஸபி அதி⁴ட்டா²னவிகப்பனுபக³த்தம் ஏவம் வேதி³தப்³ப³ம் – அயோபத்தோ பஞ்சஹி பாகேஹி மத்திகாபத்தோ த்³வீஹி பாகேஹி பக்கோ அதி⁴ட்டா²னுபகோ³, உபோ⁴பி யம் மூலம் தா³தப்³ப³ம், தஸ்மிம் தி³ன்னேயேவ. ஸசே ஏகோபி பாகோ ஊனோ ஹோதி, காகணிகமத்தம்பி வா மூலம் அதி³ன்னம், ந அதி⁴ட்டா²னுபகோ³. ஸசேபி பத்தஸாமிகோ வத³தி ‘‘யதா³ தும்ஹாகம் மூலம் ப⁴விஸ்ஸதி, ததா³ த³ஸ்ஸத², அதி⁴ட்ட²ஹித்வா பரிபு⁴ஞ்ஜதா²’’தி நேவ அதி⁴ட்டா²னுபகோ³ ஹோதி, பாகஸ்ஸ ஹி ஊனத்தா பத்தஸங்க²ம் ந க³ச்ச²தி, மூலஸ்ஸ ஸகலஸ்ஸ வா ஏகதே³ஸஸ்ஸ வா அதி³ன்னத்தா ஸகபா⁴வம் ந உபேதி, அஞ்ஞஸ்ஸேவ ஸந்தகோ ஹோதி, தஸ்மா பாகே ச மூலே ச நிட்டி²தேயேவ அதி⁴ட்டா²னுபகோ³ ஹோதி. யோ அதி⁴ட்டா²னுபகோ³, ஸ்வேவ விகப்பனுபகோ³, ஸோ ஹத்த²ம் ஆக³தோபி அனாக³தோபி அதி⁴ட்டா²தப்³போ³ விகப்பேதப்³போ³ வா. யதி³ ஹி பத்தகாரகோ மூலம் லபி⁴த்வா ஸயம் வா தா³துகாமோ ஹுத்வா ‘‘அஹம், ப⁴ந்தே, தும்ஹாகம் பத்தம் கத்வா அஸுகதி³வஸே நாம பசித்வா ட²பேஸ்ஸாமீ’’தி வத³தி, பி⁴க்கு² ச தேன பரிச்சி²ன்னதி³வஸதோ த³ஸாஹம் அதிக்காமேதி, நிஸ்ஸக்³கி³யம் பாசித்தியம். ஸசே பன பத்தகாரகோ ‘‘அஹம் தும்ஹாகம் பத்தம் கத்வா பசித்வா ஸாஸனம் பேஸேஸ்ஸாமீ’’தி வத்வா ததே²வ கரோதி, தேன பேஸிதபி⁴க்கு² பன தஸ்ஸ பி⁴க்கு²னோ ந ஆரோசேதி, அஞ்ஞோ தி³ஸ்வா வா ஸுத்வா வா ‘‘தும்ஹாகம், ப⁴ந்தே, பத்தோ நிட்டி²தோ’’தி ஆரோசேதி, ஏதஸ்ஸ ஆரோசனம் நபமாணம். யதா³ பன தேன பேஸிதோயேவ ஆரோசேதி, தஸ்ஸ வசனம் ஸுததி³வஸதோ பட்டா²ய த³ஸாஹம் அதிக்காமயதோ நிஸ்ஸக்³கி³யம் பாசித்தியம். ஸசே பத்தகாரகோ ‘‘அஹம் தும்ஹாகம் பத்தம் கத்வா பசித்வா கஸ்ஸசி ஹத்தே² பஹிணிஸ்ஸாமீ’’தி வத்வா ததே²வ கரோதி, பத்தம் க³ஹேத்வா ஆக³தபி⁴க்கு² பன அத்தனோ பரிவேணே ட²பேத்வா தஸ்ஸ ந ஆரோசேதி, அஞ்ஞோ கோசி ப⁴ணதி ‘‘அபி, ப⁴ந்தே, அது⁴னா ஆப⁴தோ பத்தோ ஸுந்த³ரோ’’தி! ‘‘குஹிம், ஆவுஸோ, பத்தோ’’தி? ‘‘இத்த²ன்னாமஸ்ஸ ஹத்தே² பேஸிதோ’’தி. ஏதஸ்ஸபி வசனம் ந பமாணம். யதா³ பன ஸோ பி⁴க்கு² பத்தம் தே³தி, லத்³த⁴தி³வஸதோ பட்டா²ய த³ஸாஹம் அதிக்காமயதோ நிஸ்ஸக்³கி³யம் பாசித்தியம். தஸ்மா த³ஸாஹம் அனதிக்காமேத்வாவ அதி⁴ட்டா²தப்³போ³ விகப்பேதப்³போ³ வா.

தத்த² த்³வே பத்தஸ்ஸ அதி⁴ட்டா²னா – காயேன வா அதி⁴ட்டா²தி, வாசாய வா அதி⁴ட்டா²தி. தேஸம் வஸேன அதி⁴ட்ட²ஹந்தேன ச ‘‘இமம் பத்தம் பச்சுத்³த⁴ராமீ’’தி வா ‘‘ஏதம் பத்தம் பச்சுத்³த⁴ராமீ’’தி வா ஏவம் ஸம்முகே² வா பரம்முகே² வா டி²தம் புராணபத்தம் பச்சுத்³த⁴ரித்வா அஞ்ஞஸ்ஸ வா த³த்வா நவம் பத்தம் யத்த² கத்த²சி டி²தம் ஹத்தே²ன பராமஸித்வா ‘‘இமம் பத்தம் அதி⁴ட்டா²மீ’’தி சித்தேன ஆபோ⁴க³ம் கத்வா காயவிகாரம் கரோந்தேன காயேன வா அதி⁴ட்டா²தப்³போ³, வசீபே⁴த³ம் கத்வா வாசாய வா அதி⁴ட்டா²தப்³போ³. தத்ர து³வித⁴ம் அதி⁴ட்டா²னம் – ஸசே ஹத்த²பாஸே ஹோதி ‘‘இமம் பத்தம் அதி⁴ட்டா²மீ’’தி வாசா பி⁴ந்தி³தப்³பா³. அத² அந்தோக³ப்³பே⁴ வா உபரிபாஸாதே³ வா ஸாமந்தவிஹாரே வா ஹோதி, ட²பிதட்டா²னம் ஸல்லக்கே²த்வா ‘‘ஏதம் பத்தம் அதி⁴ட்டா²மீ’’தி வாசா பி⁴ந்தி³தப்³பா³.

அதி⁴ட்ட²ஹந்தேன பன ஏககேன அதி⁴ட்டா²தும்பி வட்டதி, அஞ்ஞஸ்ஸ ஸந்திகே அதி⁴ட்டா²தும்பி வட்டதி. அஞ்ஞஸ்ஸ ஸந்திகே அயமானிஸம்ஸோ – ஸசஸ்ஸ ‘‘அதி⁴ட்டி²தோ நு கோ² மே, நோ’’தி விமதி உப்பஜ்ஜதி, இதரோ ஸாரேத்வா விமதிம் சி²ந்தி³ஸ்ஸதீதி. ஸசே கோசி த³ஸ பத்தே லபி⁴த்வா ஸப்³பே³வ அத்தனாவ பரிபு⁴ஞ்ஜிதுகாமோ ஹோதி, ந ஸப்³பே³ அதி⁴ட்டா²தப்³பா³. ஏகம் பத்தம் அதி⁴ட்டா²ய புனதி³வஸே தம் பச்சுத்³த⁴ரித்வா அஞ்ஞோ அதி⁴ட்டா²தப்³போ³. ஏதேனுபாயேன வஸ்ஸஸதம்பி பரிஹரிதும் ஸக்கா.

ஏவம் அப்பமத்தஸ்ஸ பி⁴க்கு²னோ ஸியா அதி⁴ட்டா²னவிஜஹனந்தி? ஸியா. ஸசே ஹி அயம் பத்தம் அஞ்ஞஸ்ஸ வா தே³தி, விப்³ப⁴மதி வா ஸிக்க²ம் வா பச்சக்கா²தி, காலம் வா கரோதி, லிங்க³ம் வாஸ்ஸ பரிவத்ததி, பச்சுத்³த⁴ரதி வா, பத்தே வா சி²த்³த³ம் ஹோதி, அதி⁴ட்டா²னம் விஜஹதி. வுத்தம்பி சேதம் –

‘‘தி³ன்னவிப்³ப⁴ந்தபச்சக்கா², காலம்கிரியகதேன ச;

லிங்க³பச்சுத்³த⁴ரா சேவ, சி²த்³தே³ன ப⁴வதி ஸத்தம’’ந்தி.

சோரஹரணவிஸ்ஸாஸக்³கா³ஹேஹிபி விஜஹதியேவ. கித்தகேன சி²த்³தே³ன அதி⁴ட்டா²னம் பி⁴ஜ்ஜதி? யேன கங்கு³ஸித்த²ம் நிக்க²மதி சேவ பவிஸதி ச. இத³ஞ்ஹி ஸத்தன்னம் த⁴ஞ்ஞானம் லாமகத⁴ஞ்ஞஸித்த²ம், தஸ்மிம் அயசுண்ணேன வா ஆணியா வா படிபாகதிகே கதே த³ஸாஹப்³ப⁴ந்தரே புன அதி⁴ட்டா²தப்³போ³. அயம் தாவ ‘‘அந்தோத³ஸாஹம் அதி⁴ட்டே²தி விகப்பேதீ’’தி ஏத்த² அதி⁴ட்டா²னே வினிச்ச²யோ.

விகப்பனே பன த்³வே விகப்பனா – ஸம்முகா²விகப்பனா ச பரம்முகா²விகப்பனா ச. கத²ம் ஸம்முகா²விகப்பனா ஹோதி? பத்தானம் ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா ‘‘இமம் பத்த’’ந்தி வா ‘‘இமே பத்தே’’தி வா ‘‘ஏதம் பத்த’’ந்தி வா ‘‘ஏதே பத்தே’’தி வா வத்வா ‘‘துய்ஹம் விகப்பேமீ’’தி வத்தப்³ப³ம். அயமேகா ஸம்முகா²விகப்பனா. ஏத்தாவதா நிதே⁴தும் வட்டதி, பரிபு⁴ஞ்ஜிதும் வா விஸ்ஸஜ்ஜேதும் வா அதி⁴ட்டா²தும் வா ந வட்டதி. ‘‘மய்ஹம் ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி ஏவம் பன வுத்தே பச்சுத்³தா⁴ரோ நாம ஹோதி, ததோபபு⁴தி பரிபோ⁴கா³த³யோபி வட்டந்தி.

அபரோ நயோ – ததே²வ பத்தானம் ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா தஸ்ஸேவ பி⁴க்கு²னோ ஸந்திகே ‘‘இமம் பத்த’’ந்தி வா ‘‘இமே பத்தே’’தி வா ‘‘ஏதம் பத்த’’ந்தி வா ‘‘ஏதே பத்தே’’தி வா வத்வா பஞ்சஸு ஸஹத⁴ம்மிகேஸு அஞ்ஞதரஸ்ஸ அத்தனா அபி⁴ருசிதஸ்ஸ யஸ்ஸ கஸ்ஸசி நாமம் க³ஹேத்வா ‘‘திஸ்ஸஸ்ஸ பி⁴க்கு²னோ விகப்பேமீ’’தி வா ‘‘திஸ்ஸாய பி⁴க்கு²னியா ஸிக்க²மானாய ஸாமணேரஸ்ஸ திஸ்ஸாய ஸாமணேரியா விகப்பேமீ’’தி வா வத்தப்³ப³ம், அயம் அபராபி ஸம்முகா²விகப்பனா. ஏத்தாவதா நிதே⁴தும் வட்டதி, பரிபோ⁴கா³தீ³ஸு பன ஏகம்பி ந வட்டதி. தேன பன பி⁴க்கு²னா ‘‘திஸ்ஸஸ்ஸ பி⁴க்கு²னோ ஸந்தகம்…பே… திஸ்ஸாய ஸாமணேரியா ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி வுத்தே பச்சுத்³தா⁴ரோ நாம ஹோதி. ததோபபு⁴தி பரிபோ⁴கா³த³யோபி வட்டந்தி.

கத²ம் பரம்முகா²விகப்பனா ஹோதி? பத்தானம் ததே²வ ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா ‘‘இமம் பத்த’’ந்தி வா ‘‘இமே பத்தே’’தி வா ‘‘ஏதம் பத்த’’ந்தி வா ‘‘ஏதே பத்தே’’தி வா வத்வா ‘‘துய்ஹம் விகப்பனத்தா²ய த³ம்மீ’’தி வத்தப்³ப³ம். தேன வத்தப்³போ³ – ‘‘கோ தே மித்தோ வா ஸந்தி³ட்டோ² வா’’தி? ததோ இதரேன புரிமனயேனேவ ‘‘திஸ்ஸோ பி⁴க்கூ²தி வா…பே… திஸ்ஸா ஸாமணேரீ’’தி வா வத்தப்³ப³ம். புன தேன பி⁴க்கு²னா ‘‘அஹம் திஸ்ஸஸ்ஸ பி⁴க்கு²னோ த³ம்மீ’’தி வா…பே… ‘‘திஸ்ஸாய ஸாமணேரியா த³ம்மீ’’தி வா வத்தப்³ப³ம், அயம் பரம்முகா²விகப்பனா. ஏத்தாவத்தா நிதே⁴தும் வட்டதி, பரிபோ⁴கா³தீ³ஸு பன ஏகம்பி ந வட்டதி. தேன பன பி⁴க்கு²னா து³தியஸம்முகா²விகப்பனாயம் வுத்தனயேனேவ ‘‘இத்த²ன்னாமஸ்ஸ ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி வுத்தே பச்சுத்³தா⁴ரோ நாம ஹோதி. ததோபபு⁴தி பரிபோ⁴கா³த³யோபி வட்டந்தி.

இமாஸம் பன த்³வின்னம் விகப்பனானம் நானாகரணம், அவஸேஸோ ச வசனக்கமோ ஸப்³போ³ பட²மகதி²னஸிக்கா²பத³வண்ணனாயம் வுத்தனயேனேவ வேதி³தப்³போ³ ஸத்³தி⁴ம் ஸமுட்டா²னாதீ³ஹீதி.

பத்தஸிக்கா²பத³வண்ணனா நிட்டி²தா.