3. பத்தவக்³கோ³

1. பத்தஸிக்கா²பத³வண்ணனா

598. தேன ஸமயேனாதி பத்தஸிக்கா²பத³ம். தத்த² பத்தவாணிஜ்ஜந்தி கா³மனிக³மாதீ³ஸு விசரந்தா பத்தவாணிஜ்ஜம் வா கரிஸ்ஸந்தி. ஆமத்திகாபணம் வாதி அமத்தானி வுச்சந்தி பா⁴ஜனானி, தானி யேஸம் ப⁴ண்ட³ம் தே ஆமத்திகா, தேஸம் ஆமத்திகானம் ஆபணம் ஆமத்திகாபணம், குலாலப⁴ண்ட³வாணிஜகாபணந்தி அத்தோ².

602. தயோ பத்தஸ்ஸ வண்ணாதி தீணி பத்தஸ்ஸ பமாணானி. அட்³டா⁴ள்ஹகோத³னம் க³ண்ஹாதீதி மக³த⁴னாளியா த்³வின்னம் தண்டு³லனாளீனம் ஓத³னம் க³ண்ஹாதி. மக³த⁴னாளி நாம அட்³ட⁴தேரஸபலா ஹோதீதி அந்த⁴கட்ட²கதா²யம் வுத்தம். ஸீஹளதீ³பே பகதினாளி மஹந்தா, த³மிளனாளி கு²த்³த³கா, மக³த⁴னாளி பமாணயுத்தா, தாய மக³த⁴னாளியா தி³யட்³ட⁴னாளி ஏகா ஸீஹளனாளி ஹோதீதி மஹாஅட்ட²கதா²யம் வுத்தம். சதுபா⁴க³ம் கா²த³னந்தி ஓத³னஸ்ஸ சதுத்த²பா⁴க³ப்பமாணம் கா²த³னம், தம் ஹத்த²ஹாரியஸ்ஸ முக்³க³ஸூபஸ்ஸ வஸேன வேதி³தப்³ப³ம். தது³பியம் ப்³யஞ்ஜனந்தி தஸ்ஸ ஓத³னஸ்ஸ அனுரூபம் மச்ச²மம்ஸஸாகப²லகளீராதி³ப்³யஞ்ஜனம்.

தத்ராயம் வினிச்ச²யோ – அனுபஹதபுராணஸாலிதண்டு³லானம் ஸுகோட்டிதபரிஸுத்³தா⁴னம் த்³வே மக³த⁴னாளியோ க³ஹேத்வா தேஹி தண்டு³லேஹி அனுத்தண்டு³லம் அகிலின்னம் அபிண்டி³தம் ஸுவிஸத³ம் குந்த³மகுளராஸிஸதி³ஸம் அவஸ்ஸாவிதோத³னம் பசித்வா நிரவஸேஸம் பத்தே பக்கி²பித்வா தஸ்ஸ ஓத³னஸ்ஸ சதுத்த²பா⁴க³ப்பமாணோ நாதிக⁴னோ நாதிதனுகோ ஹத்த²ஹாரியோ ஸப்³ப³ஸம்பா⁴ரஸங்க²தோ முக்³க³ஸூபோ பக்கி²பிதப்³போ³. ததோ ஆலோபஸ்ஸ ஆலோபஸ்ஸ அனுரூபம் யாவசரிமாலோபப்பஹோனகம் மச்ச²மம்ஸாதி³ப்³யஞ்ஜனம் பக்கி²பிதப்³ப³ம், ஸப்பிதேலதக்கரஸகஞ்ஜிகாதீ³னி பன க³ணனூபகா³னி ந ஹோந்தி, தானி ஹி ஓத³னக³திகானேவ, நேவ ஹாபேதும் ந வட்³டே⁴தும் ஸக்கோந்தி. ஏவமேதம் ஸப்³ப³ம்பி பக்கி²த்தம் ஸசே பத்தஸ்ஸ முக²வட்டியா ஹேட்டி²மராஜிஸமம் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹேட்டி²மந்தம் பு²ஸதி, அயம் உக்கட்டோ² நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் உக்கட்டோ²மகோ நாம பத்தோ. ஸசே தம் ராஜிம் ந ஸம்பாபுணாதி, அந்தோக³தமேவ ஹோதி, அயம் உக்கட்டு²க்கட்டோ² நாம பத்தோ.

நாளிகோத³னந்தி மக³த⁴னாளியா ஏகாய தண்டு³லனாளியா ஓத³னம். பத்தோ²த³னந்தி மக³த⁴னாளியா உபட்³ட⁴னாளிகோத³னம். ஸேஸம் வுத்தனயேனேவ வேதி³தப்³ப³ம். அயம் பன நாமமத்தே விஸேஸோ – ஸசே நாளிகோத³னாதி³ ஸப்³ப³ம்பி பக்கி²த்தம் வுத்தனயேனேவ ஹேட்டி²மராஜிஸமம் திட்ட²தி, அயம் மஜ்ஜி²மோ நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் மஜ்ஜி²மோமகோ நாம பத்தோ. ஸசே தம் ராஜிம் ந ஸம்பாபுணாதி அந்தோக³தமேவ ஹோதி, அயம் மஜ்ஜி²முக்கட்டோ² நாம பத்தோ. ஸசே பத்தோ²த³னாதி³ ஸப்³ப³ம்பி பக்கி²த்தம் ஹேட்டி²மராஜிஸமம் திட்ட²தி, அயம் ஓமகோ நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் ஓமகோமகோ நாம பத்தோ. ஸசே தம் ராஜிம் ந பாபுணாதி அந்தோக³தமேவ ஹோதி, அயம் ஓமகுக்கட்டோ² நாம பத்தோதி ஏவமேதே நவ பத்தா. தேஸு த்³வே அபத்தா உக்கட்டு²க்கட்டோ² ச ஓமகோமகோ ச. ‘‘ததோ உக்கட்டோ² அபத்தோ ஓமகோ அபத்தோ’’தி இத³ஞ்ஹி ஏதே ஸந்தா⁴ய வுத்தம். உக்கட்டு²க்கட்டோ² ஹி ஏத்த² உக்கட்ட²தோ உக்கட்ட²த்தா ‘‘ததோ உக்கட்டோ² அபத்தோ’’தி வுத்தோ. ஓமகோமகோ ச ஓமகதோ ஓமகத்தா ததோ ஓமகோ அபத்தோதி வுத்தோ. தஸ்மா ஏதே பா⁴ஜனபரிபோ⁴கே³ன பரிபு⁴ஞ்ஜிதப்³பா³, ந அதி⁴ட்டா²னுபகா³, ந விகப்பனுபகா³. இதரே பன ஸத்த அதி⁴ட்ட²ஹித்வா வா விகப்பேத்வா வா பரிபு⁴ஞ்ஜிதப்³பா³, ஏவம் அகத்வா தம் த³ஸாஹம் அதிக்காமயதோ நிஸ்ஸக்³கி³யம் பாசித்தியந்தி தம் ஸத்தவித⁴ம்பி பத்தம் த³ஸாஹபரமம் காலம் அதிக்காமயதோ நிஸ்ஸக்³கி³யம் பாசித்தியம்.

607. நிஸ்ஸக்³கி³யம் பத்தம் அனிஸ்ஸஜ்ஜித்வா பரிபு⁴ஞ்ஜதீதி யாகு³ம் பிவித்வா தோ⁴தே து³க்கடம், க²ஞ்ஜகம் கா²தி³த்வா ப⁴த்தம் பு⁴ஞ்ஜித்வா தோ⁴தே து³க்கடந்தி ஏவம் பயோகே³ பயோகே³ து³க்கடம்.

608. அனாபத்தி அந்தோத³ஸாஹம் அதி⁴ட்டே²தி விகப்பேதீதி ஏத்த² பன பமாணயுத்தஸ்ஸபி அதி⁴ட்டா²னவிகப்பனுபக³த்தம் ஏவம் வேதி³தப்³ப³ம் – அயோபத்தோ பஞ்சஹி பாகேஹி மத்திகாபத்தோ த்³வீஹி பாகேஹி பக்கோ அதி⁴ட்டா²னுபகோ³, உபோ⁴பி யம் மூலம் தா³தப்³ப³ம், தஸ்மிம் தி³ன்னேயேவ. ஸசே ஏகோபி பாகோ ஊனோ ஹோதி, காகணிகமத்தம்பி வா மூலம் அதி³ன்னம், ந அதி⁴ட்டா²னுபகோ³. ஸசேபி பத்தஸாமிகோ வத³தி ‘‘யதா³ தும்ஹாகம் மூலம் ப⁴விஸ்ஸதி, ததா³ த³ஸ்ஸத², அதி⁴ட்ட²ஹித்வா பரிபு⁴ஞ்ஜதா²’’தி நேவ அதி⁴ட்டா²னுபகோ³ ஹோதி, பாகஸ்ஸ ஹி ஊனத்தா பத்தஸங்க²ம் ந க³ச்ச²தி, மூலஸ்ஸ ஸகலஸ்ஸ வா ஏகதே³ஸஸ்ஸ வா அதி³ன்னத்தா ஸகபா⁴வம் ந உபேதி, அஞ்ஞஸ்ஸேவ ஸந்தகோ ஹோதி, தஸ்மா பாகே ச மூலே ச நிட்டி²தேயேவ அதி⁴ட்டா²னுபகோ³ ஹோதி. யோ அதி⁴ட்டா²னுபகோ³, ஸ்வேவ விகப்பனுபகோ³, ஸோ ஹத்த²ம் ஆக³தோபி அனாக³தோபி அதி⁴ட்டா²தப்³போ³ விகப்பேதப்³போ³ வா. யதி³ ஹி பத்தகாரகோ மூலம் லபி⁴த்வா ஸயம் வா தா³துகாமோ ஹுத்வா ‘‘அஹம், ப⁴ந்தே, தும்ஹாகம் பத்தம் கத்வா அஸுகதி³வஸே நாம பசித்வா ட²பேஸ்ஸாமீ’’தி வத³தி, பி⁴க்கு² ச தேன பரிச்சி²ன்னதி³வஸதோ த³ஸாஹம் அதிக்காமேதி, நிஸ்ஸக்³கி³யம் பாசித்தியம். ஸசே பன பத்தகாரகோ ‘‘அஹம் தும்ஹாகம் பத்தம் கத்வா பசித்வா ஸாஸனம் பேஸேஸ்ஸாமீ’’தி வத்வா ததே²வ கரோதி, தேன பேஸிதபி⁴க்கு² பன தஸ்ஸ பி⁴க்கு²னோ ந ஆரோசேதி, அஞ்ஞோ தி³ஸ்வா வா ஸுத்வா வா ‘‘தும்ஹாகம், ப⁴ந்தே, பத்தோ நிட்டி²தோ’’தி ஆரோசேதி, ஏதஸ்ஸ ஆரோசனம் நபமாணம். யதா³ பன தேன பேஸிதோயேவ ஆரோசேதி, தஸ்ஸ வசனம் ஸுததி³வஸதோ பட்டா²ய த³ஸாஹம் அதிக்காமயதோ நிஸ்ஸக்³கி³யம் பாசித்தியம். ஸசே பத்தகாரகோ ‘‘அஹம் தும்ஹாகம் பத்தம் கத்வா பசித்வா கஸ்ஸசி ஹத்தே² பஹிணிஸ்ஸாமீ’’தி வத்வா ததே²வ கரோதி, பத்தம் க³ஹேத்வா ஆக³தபி⁴க்கு² பன அத்தனோ பரிவேணே ட²பேத்வா தஸ்ஸ ந ஆரோசேதி, அஞ்ஞோ கோசி ப⁴ணதி ‘‘அபி, ப⁴ந்தே, அது⁴னா ஆப⁴தோ பத்தோ ஸுந்த³ரோ’’தி! ‘‘குஹிம், ஆவுஸோ, பத்தோ’’தி? ‘‘இத்த²ன்னாமஸ்ஸ ஹத்தே² பேஸிதோ’’தி. ஏதஸ்ஸபி வசனம் ந பமாணம். யதா³ பன ஸோ பி⁴க்கு² பத்தம் தே³தி, லத்³த⁴தி³வஸதோ பட்டா²ய த³ஸாஹம் அதிக்காமயதோ நிஸ்ஸக்³கி³யம் பாசித்தியம். தஸ்மா த³ஸாஹம் அனதிக்காமேத்வாவ அதி⁴ட்டா²தப்³போ³ விகப்பேதப்³போ³ வா.

தத்த² த்³வே பத்தஸ்ஸ அதி⁴ட்டா²னா – காயேன வா அதி⁴ட்டா²தி, வாசாய வா அதி⁴ட்டா²தி. தேஸம் வஸேன அதி⁴ட்ட²ஹந்தேன ச ‘‘இமம் பத்தம் பச்சுத்³த⁴ராமீ’’தி வா ‘‘ஏதம் பத்தம் பச்சுத்³த⁴ராமீ’’தி வா ஏவம் ஸம்முகே² வா பரம்முகே² வா டி²தம் புராணபத்தம் பச்சுத்³த⁴ரித்வா அஞ்ஞஸ்ஸ வா த³த்வா நவம் பத்தம் யத்த² கத்த²சி டி²தம் ஹத்தே²ன பராமஸித்வா ‘‘இமம் பத்தம் அதி⁴ட்டா²மீ’’தி சித்தேன ஆபோ⁴க³ம் கத்வா காயவிகாரம் கரோந்தேன காயேன வா அதி⁴ட்டா²தப்³போ³, வசீபே⁴த³ம் கத்வா வாசாய வா அதி⁴ட்டா²தப்³போ³. தத்ர து³வித⁴ம் அதி⁴ட்டா²னம் – ஸசே ஹத்த²பாஸே ஹோதி ‘‘இமம் பத்தம் அதி⁴ட்டா²மீ’’தி வாசா பி⁴ந்தி³தப்³பா³. அத² அந்தோக³ப்³பே⁴ வா உபரிபாஸாதே³ வா ஸாமந்தவிஹாரே வா ஹோதி, ட²பிதட்டா²னம் ஸல்லக்கே²த்வா ‘‘ஏதம் பத்தம் அதி⁴ட்டா²மீ’’தி வாசா பி⁴ந்தி³தப்³பா³.

அதி⁴ட்ட²ஹந்தேன பன ஏககேன அதி⁴ட்டா²தும்பி வட்டதி, அஞ்ஞஸ்ஸ ஸந்திகே அதி⁴ட்டா²தும்பி வட்டதி. அஞ்ஞஸ்ஸ ஸந்திகே அயமானிஸம்ஸோ – ஸசஸ்ஸ ‘‘அதி⁴ட்டி²தோ நு கோ² மே, நோ’’தி விமதி உப்பஜ்ஜதி, இதரோ ஸாரேத்வா விமதிம் சி²ந்தி³ஸ்ஸதீதி. ஸசே கோசி த³ஸ பத்தே லபி⁴த்வா ஸப்³பே³வ அத்தனாவ பரிபு⁴ஞ்ஜிதுகாமோ ஹோதி, ந ஸப்³பே³ அதி⁴ட்டா²தப்³பா³. ஏகம் பத்தம் அதி⁴ட்டா²ய புனதி³வஸே தம் பச்சுத்³த⁴ரித்வா அஞ்ஞோ அதி⁴ட்டா²தப்³போ³. ஏதேனுபாயேன வஸ்ஸஸதம்பி பரிஹரிதும் ஸக்கா.

ஏவம் அப்பமத்தஸ்ஸ பி⁴க்கு²னோ ஸியா அதி⁴ட்டா²னவிஜஹனந்தி? ஸியா. ஸசே ஹி அயம் பத்தம் அஞ்ஞஸ்ஸ வா தே³தி, விப்³ப⁴மதி வா ஸிக்க²ம் வா பச்சக்கா²தி, காலம் வா கரோதி, லிங்க³ம் வாஸ்ஸ பரிவத்ததி, பச்சுத்³த⁴ரதி வா, பத்தே வா சி²த்³த³ம் ஹோதி, அதி⁴ட்டா²னம் விஜஹதி. வுத்தம்பி சேதம் –

‘‘தி³ன்னவிப்³ப⁴ந்தபச்சக்கா², காலம்கிரியகதேன ச;

லிங்க³பச்சுத்³த⁴ரா சேவ, சி²த்³தே³ன ப⁴வதி ஸத்தம’’ந்தி.

சோரஹரணவிஸ்ஸாஸக்³கா³ஹேஹிபி விஜஹதியேவ. கித்தகேன சி²த்³தே³ன அதி⁴ட்டா²னம் பி⁴ஜ்ஜதி? யேன கங்கு³ஸித்த²ம் நிக்க²மதி சேவ பவிஸதி ச. இத³ஞ்ஹி ஸத்தன்னம் த⁴ஞ்ஞானம் லாமகத⁴ஞ்ஞஸித்த²ம், தஸ்மிம் அயசுண்ணேன வா ஆணியா வா படிபாகதிகே கதே த³ஸாஹப்³ப⁴ந்தரே புன அதி⁴ட்டா²தப்³போ³. அயம் தாவ ‘‘அந்தோத³ஸாஹம் அதி⁴ட்டே²தி விகப்பேதீ’’தி ஏத்த² அதி⁴ட்டா²னே வினிச்ச²யோ.

விகப்பனே பன த்³வே விகப்பனா – ஸம்முகா²விகப்பனா ச பரம்முகா²விகப்பனா ச. கத²ம் ஸம்முகா²விகப்பனா ஹோதி? பத்தானம் ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா ‘‘இமம் பத்த’’ந்தி வா ‘‘இமே பத்தே’’தி வா ‘‘ஏதம் பத்த’’ந்தி வா ‘‘ஏதே பத்தே’’தி வா வத்வா ‘‘துய்ஹம் விகப்பேமீ’’தி வத்தப்³ப³ம். அயமேகா ஸம்முகா²விகப்பனா. ஏத்தாவதா நிதே⁴தும் வட்டதி, பரிபு⁴ஞ்ஜிதும் வா விஸ்ஸஜ்ஜேதும் வா அதி⁴ட்டா²தும் வா ந வட்டதி. ‘‘மய்ஹம் ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி ஏவம் பன வுத்தே பச்சுத்³தா⁴ரோ நாம ஹோதி, ததோபபு⁴தி பரிபோ⁴கா³த³யோபி வட்டந்தி.

அபரோ நயோ – ததே²வ பத்தானம் ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா தஸ்ஸேவ பி⁴க்கு²னோ ஸந்திகே ‘‘இமம் பத்த’’ந்தி வா ‘‘இமே பத்தே’’தி வா ‘‘ஏதம் பத்த’’ந்தி வா ‘‘ஏதே பத்தே’’தி வா வத்வா பஞ்சஸு ஸஹத⁴ம்மிகேஸு அஞ்ஞதரஸ்ஸ அத்தனா அபி⁴ருசிதஸ்ஸ யஸ்ஸ கஸ்ஸசி நாமம் க³ஹேத்வா ‘‘திஸ்ஸஸ்ஸ பி⁴க்கு²னோ விகப்பேமீ’’தி வா ‘‘திஸ்ஸாய பி⁴க்கு²னியா ஸிக்க²மானாய ஸாமணேரஸ்ஸ திஸ்ஸாய ஸாமணேரியா விகப்பேமீ’’தி வா வத்தப்³ப³ம், அயம் அபராபி ஸம்முகா²விகப்பனா. ஏத்தாவதா நிதே⁴தும் வட்டதி, பரிபோ⁴கா³தீ³ஸு பன ஏகம்பி ந வட்டதி. தேன பன பி⁴க்கு²னா ‘‘திஸ்ஸஸ்ஸ பி⁴க்கு²னோ ஸந்தகம்…பே… திஸ்ஸாய ஸாமணேரியா ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி வுத்தே பச்சுத்³தா⁴ரோ நாம ஹோதி. ததோபபு⁴தி பரிபோ⁴கா³த³யோபி வட்டந்தி.

கத²ம் பரம்முகா²விகப்பனா ஹோதி? பத்தானம் ததே²வ ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா ‘‘இமம் பத்த’’ந்தி வா ‘‘இமே பத்தே’’தி வா ‘‘ஏதம் பத்த’’ந்தி வா ‘‘ஏதே பத்தே’’தி வா வத்வா ‘‘துய்ஹம் விகப்பனத்தா²ய த³ம்மீ’’தி வத்தப்³ப³ம். தேன வத்தப்³போ³ – ‘‘கோ தே மித்தோ வா ஸந்தி³ட்டோ² வா’’தி? ததோ இதரேன புரிமனயேனேவ ‘‘திஸ்ஸோ பி⁴க்கூ²தி வா…பே… திஸ்ஸா ஸாமணேரீ’’தி வா வத்தப்³ப³ம். புன தேன பி⁴க்கு²னா ‘‘அஹம் திஸ்ஸஸ்ஸ பி⁴க்கு²னோ த³ம்மீ’’தி வா…பே… ‘‘திஸ்ஸாய ஸாமணேரியா த³ம்மீ’’தி வா வத்தப்³ப³ம், அயம் பரம்முகா²விகப்பனா. ஏத்தாவத்தா நிதே⁴தும் வட்டதி, பரிபோ⁴கா³தீ³ஸு பன ஏகம்பி ந வட்டதி. தேன பன பி⁴க்கு²னா து³தியஸம்முகா²விகப்பனாயம் வுத்தனயேனேவ ‘‘இத்த²ன்னாமஸ்ஸ ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி வுத்தே பச்சுத்³தா⁴ரோ நாம ஹோதி. ததோபபு⁴தி பரிபோ⁴கா³த³யோபி வட்டந்தி.

இமாஸம் பன த்³வின்னம் விகப்பனானம் நானாகரணம், அவஸேஸோ ச வசனக்கமோ ஸப்³போ³ பட²மகதி²னஸிக்கா²பத³வண்ணனாயம் வுத்தனயேனேவ வேதி³தப்³போ³ ஸத்³தி⁴ம் ஸமுட்டா²னாதீ³ஹீதி.

பத்தஸிக்கா²பத³வண்ணனா நிட்டி²தா.

2. ஊனபஞ்சப³ந்த⁴னஸிக்கா²பத³வண்ணனா

609. தேன ஸமயேனாதி ஊனபஞ்சப³ந்த⁴னஸிக்கா²பத³ம். தத்த² ந யாபேதீதி ஸோ கிர யதி³ அரியஸாவகோ நாப⁴விஸ்ஸா, அஞ்ஞத²த்தம்பி அக³மிஸ்ஸா, ஏவம் தேஹி உப்³பா³ள்ஹோ, ஸோதாபன்னத்தா பன கேவலம் ஸரீரேனேவ ந யாபேதி, தேன வுத்தம் – ‘‘அத்தனாபி ந யாபேதி, புத்ததா³ராபிஸ்ஸ கிலமந்தீ’’தி.

612-3. ஊனபஞ்சப³ந்த⁴னேனாதி ஏத்த² ஊனானி பஞ்ச ப³ந்த⁴னானி அஸ்ஸாதி ஊனபஞ்சப³ந்த⁴னோ, நாஸ்ஸ பஞ்ச ப³ந்த⁴னானி பூரேந்தீதி அத்தோ², தேன ஊனபஞ்சப³ந்த⁴னேன. இத்த²ம்பூ⁴தஸ்ஸ லக்க²ணே கரணவசனம். தத்த² யஸ்மா அப³ந்த⁴னஸ்ஸாபி பஞ்ச ப³ந்த⁴னானி ந பூரேந்தி, ஸப்³ப³ஸோ நத்தி²தாய, தஸ்மா பத³பா⁴ஜனே ‘‘அப³ந்த⁴னோ வா’’திஆதி³ வுத்தம். ‘‘ஊனபஞ்சப³ந்த⁴னேனா’’தி ச வுத்தத்தா யஸ்ஸ பஞ்சப³ந்த⁴னோ பத்தோ ஹோதி, தஸ்ஸ ஸோ அபத்தோ, தஸ்மா அஞ்ஞம் விஞ்ஞாபேதும் வட்டதி. ப³ந்த⁴னஞ்ச நாமேதம் யஸ்மா ப³ந்த⁴னோகாஸே ஸதி ஹோதி, அஸதி ந ஹோதி, தஸ்மா தஸ்ஸ லக்க²ணம் த³ஸ்ஸேதும் ‘‘அப³ந்த⁴னோகாஸோ நாமா’’திஆதி³ வுத்தம்.

த்³வங்கு³லா ராஜி ந ஹோதீதி முக²வட்டிதோ ஹேட்டா² த்³வங்கு³லப்பமாணா ஏகாபி ராஜி ந ஹோதி. யஸ்ஸ த்³வங்கு³லா ராஜி ஹோதீதி யஸ்ஸ பன தாதி³ஸா ஏகா ராஜி ஹோதி, ஸோ தஸ்ஸா ராஜியா ஹேட்டி²மபரியந்தே பத்தவேத⁴கேன விஜ்ஜி²த்வா பசித்வா ஸுத்தரஜ்ஜுக-மகசிரஜ்ஜுகாதீ³ஹி வா திபுஸுத்தகேன வா ப³ந்தி⁴தப்³போ³, தம் ப³ந்த⁴னம் ஆமிஸஸ்ஸ அலக்³க³னத்த²ம் திபுபட்டகேன வா கேனசி ப³த்³த⁴ஸிலேஸேன வா படிச்சா²தே³தப்³ப³ம். ஸோ ச பத்தோ அதி⁴ட்ட²ஹித்வா பரிபு⁴ஞ்ஜிதப்³போ³, ஸுகு²மம் வா சி²த்³த³ம் கத்வா ப³ந்தி⁴தப்³போ³. ஸுத்³தே⁴ஹி பன மது⁴ஸித்த²கலாகா²ஸஜ்ஜுலஸாதீ³ஹி ப³ந்தி⁴தும் ந வட்டதி. பா²ணிதம் ஜா²பேத்வா பாஸாணசுண்ணேன ப³ந்தி⁴தும் வட்டதி. முக²வட்டிஸமீபே பன பத்தவேத⁴கேன விஜ்ஜி²யமானோ கபாலஸ்ஸ ப³ஹலத்தா பி⁴ஜ்ஜதி, தஸ்மா ஹேட்டா² விஜ்ஜி²தப்³போ³. யஸ்ஸ பன த்³வே ராஜியோ ஏகாயேவ வா சதுரங்கு³லா, தஸ்ஸ த்³வே ப³ந்த⁴னானி தா³தப்³பா³னி. யஸ்ஸ திஸ்ஸோ ஏகாயேவ வா ச²ளங்கு³லா, தஸ்ஸ தீணி. யஸ்ஸ சதஸ்ஸோ ஏகாயேவ வா அட்ட²ங்கு³லா, தஸ்ஸ சத்தாரி. யஸ்ஸ பஞ்ச ஏகாயேவ வா த³ஸங்கு³லா, ஸோ ப³த்³தோ⁴பி அப³த்³தோ⁴பி அபத்தோயேவ, அஞ்ஞோ விஞ்ஞாபேதப்³போ³. ஏஸ தாவ மத்திகாபத்தே வினிச்ச²யோ.

அயோபத்தே பன ஸசேபி பஞ்ச வா அதிரேகானி வா சி²த்³தா³னி ஹோந்தி, தானி சே அயசுண்ணேன வா ஆணியா வா லோஹமண்ட³லகேன வா ப³த்³தா⁴னி மட்டா²னி ஹோந்தி, ஸ்வேவ பத்தோ பரிபு⁴ஞ்ஜிதப்³போ³, ந அஞ்ஞோ விஞ்ஞாபேதப்³போ³. அத² பன ஏகம்பி சி²த்³த³ம் மஹந்தம் ஹோதி, லோஹமண்ட³லகேன ப³த்³த⁴ம்பி மட்ட²ம் ந ஹோதி, பத்தே ஆமிஸம் லக்³க³தி, அகப்பியோ ஹோதி, அயம் அபத்தோ. அஞ்ஞோ விஞ்ஞாபேதப்³போ³.

615. தே²ரோ வத்தப்³போ³தி பத்தே ஆனிஸம்ஸம் த³ஸ்ஸேத்வா ‘‘அயம், ப⁴ந்தே, பத்தோ பமாணயுத்தோ ஸுந்த³ரோ தே²ரானுரூபோ, தம் க³ண்ஹதா²’’தி வத்தப்³போ³. யோ ந க³ண்ஹேய்யாதி அனுகம்பாய ந க³ண்ஹந்தஸ்ஸ து³க்கடம். யோ பன ஸந்துட்டி²யா ‘‘கிம் மே அஞ்ஞேன பத்தேனா’’தி ந க³ண்ஹாதி, தஸ்ஸ அனாபத்தி. பத்தபரியந்தோதி ஏவம் பரிவத்தேத்வா பரியந்தே டி²தபத்தோ.

ந அதே³ஸேதி மஞ்சபீட²ச²த்தனாக³த³ந்தகாதி³கே அதே³ஸே, ந நிக்கி²பிதப்³போ³. யத்த² புரிமம் ஸுந்த³ரம் பத்தம் ட²பேதி, தத்தே²வ ட²பேதப்³போ³. பத்தஸ்ஸ ஹி நிக்கி²பனதே³ஸோ ‘‘அனுஜானாமி, பி⁴க்க²வே, ஆதா⁴ரக’’ந்திஆதி³னா நயேன க²ந்த⁴கே வுத்தோயேவ.

ந அபோ⁴கே³னாதி யாகு³ரந்த⁴னரஜனபசனாதி³னா அபரிபோ⁴கே³ன ந பரிபு⁴ஞ்ஜிதப்³போ³. அந்தராமக்³கே³ பன ப்³யாதி⁴ம்ஹி உப்பன்னே அஞ்ஞஸ்மிம் பா⁴ஜனே அஸதி மத்திகாய லிம்பேத்வா யாகு³ம் வா பசிதும் உத³கம் வா தாபேதும் வட்டதி.

ந விஸ்ஸஜ்ஜேதப்³போ³தி அஞ்ஞஸ்ஸ ந தா³தப்³போ³. ஸசே பன ஸத்³தி⁴விஹாரிகோ வா அந்தேவாஸிகோ வா அஞ்ஞம் வரபத்தம் ட²பேத்வா ‘‘அயம் மய்ஹம் ஸாருப்போ, அயம் தே²ரஸ்ஸா’’தி க³ண்ஹாதி, வட்டதி. அஞ்ஞோ வா தம் க³ஹேத்வா அத்தனோ பத்தம் தே³தி, வட்டதி. ‘‘மய்ஹமேவ பத்தம் ஆஹரா’’தி வத்தப்³ப³கிச்சம் நத்தி².

617. பவாரிதானந்தி ஏத்த² ஸங்க⁴வஸேன பவாரிதட்டா²னே பஞ்சப³ந்த⁴னேனேவ வட்டதி. புக்³க³லவஸேன பவாரிதட்டா²னே ஊனபஞ்சப³ந்த⁴னேனாபி வட்டதீதி குருந்தி³யம் வுத்தம். ஸேஸமேத்த² உத்தானத்த²மேவ.

ச²ஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

ஊனபஞ்சப³ந்த⁴னஸிக்கா²பத³வண்ணனா நிட்டி²தா.

3. பே⁴ஸஜ்ஜஸிக்கா²பத³வண்ணனா

618. தேன ஸமயேனாதி பே⁴ஸஜ்ஜஸிக்கா²பத³ம். தத்த² அத்தோ², ப⁴ந்தேதி ராஜா பி⁴க்கூ² உய்யுத்தப்பயுத்தே தே²ரஸ்ஸ லேணத்தா²ய பப்³பா⁴ரம் ஸோதே⁴ந்தே தி³ஸ்வா ஆராமிகம் தா³துகாமோ புச்சி².

619-21. பாடியேக்கோதி விஸும் ஏகோ. மாலாகிதேதி கதமாலே மாலாத⁴ரே, குஸுமமாலாபடிமண்டி³தேதி அத்தோ². திணண்டு³பகந்தி திணசும்ப³டகம். படிமுஞ்சீதி ட²பேஸி. ஸா அஹோஸி ஸுவண்ணமாலாதி தா³ரிகாய ஸீஸே ட²பிதமத்தாயேவ தே²ரஸ்ஸ அதி⁴ட்டா²னவஸேன ஸுவண்ணபது³மமாலா அஹோஸி. தஞ்ஹி திணண்டு³பகம் ஸீஸே ட²பிதமத்தமேவ ‘‘ஸுவண்ணமாலா ஹோதூ’’தி தே²ரோ அதி⁴ட்டா²ஸி. து³தியம்பி கோ²…பே…. தேனுபஸங்கமீதி து³தியதி³வஸேயேவ உபஸங்கமி.

ஸுவண்ணந்தி அதி⁴முச்சீதி ‘‘ஸோவண்ணமயோ ஹோதூ’’தி அதி⁴ட்டா²ஸி. பஞ்சன்னம் பே⁴ஸஜ்ஜானந்தி ஸப்பிஆதீ³னம். பா³ஹுலிகாதி பச்சயபா³ஹுலிகதாய படிபன்னா. கோலம்பே³பி க⁴டேபீதிஏத்த² கோலம்பா³ நாம மஹாமுக²சாடியோ வுச்சந்தி. ஓலீனவிலீனானீதி ஹேட்டா² ச உப⁴தோபஸ்ஸேஸு ச க³ளிதானி. ஓகிண்ணவிகிண்ணாதி ஸப்பிஆதீ³னம் க³ந்தே⁴ன பூ⁴மிம் க²னந்தேஹி ஓகிண்ணா, பி⁴த்தியோ க²னந்தேஹி உபரி ஸஞ்சரந்தேஹி ச விகிண்ணா. அந்தோகோட்டா²கா³ரிகாதி அப்³ப⁴ந்தரே ஸம்விஹிதகோட்டா²கா³ரா.

622. படிஸாயனீயானீதி படிஸாயிதப்³பா³னி, பரிபு⁴ஞ்ஜிதப்³பா³னீதி அத்தோ². பே⁴ஸஜ்ஜானீதி பே⁴ஸஜ்ஜகிச்சம் கரோந்து வா மா வா, ஏவம் லத்³த⁴வோஹாரானி. ‘‘கோ³ஸப்பீ’’திஆதீ³ஹி லோகே பாகடம் த³ஸ்ஸேத்வா ‘‘யேஸம் மம்ஸம் கப்பதீ’’தி இமினா அஞ்ஞேஸம்பி மிக³ரோஹிதஸஸாதீ³னம் ஸப்பிம் ஸங்க³ஹேத்வா த³ஸ்ஸேஸி. யேஸஞ்ஹி கீ²ரம் அத்தி², ஸப்பிபி தேஸம் அத்தி²யேவ, தம் பன ஸுலப⁴ம் வா ஹோது து³ல்லப⁴ம் வா, அஸம்மோஹத்த²ம் வுத்தம். ஏவம் நவனீதம்பி.

ஸன்னிதி⁴காரகம் பரிபு⁴ஞ்ஜிதப்³பா³னீதி ஸன்னிதி⁴ம் கத்வா நித³ஹித்வா பரிபு⁴ஞ்ஜிதப்³பா³னி. கத²ம்? பாளியா ஆக³தஸப்பிஆதீ³ஸு ஸப்பி தாவ புரேப⁴த்தம் படிக்³க³ஹிதம் தத³ஹுபுரேப⁴த்தம் ஸாமிஸம்பி நிராமிஸம்பி பரிபு⁴ஞ்ஜிதும் வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸம் பரிபு⁴ஞ்ஜிதப்³ப³ம். ஸத்தாஹாதிக்கமே ஸசே ஏகபா⁴ஜனே ட²பிதம், ஏகம் நிஸ்ஸக்³கி³யம். ஸசே ப³ஹூஸு வத்து²க³ணனாய நிஸ்ஸக்³கி³யானி, பச்சா²ப⁴த்தம் படிக்³க³ஹிதம் ஸத்தாஹம் நிராமிஸமேவ வட்டதி. புரேப⁴த்தம் வா பச்சா²ப⁴த்தம் வா உக்³க³ஹிதகம் கத்வா நிக்கி²த்தம் அஜ்ஜோ²ஹரிதும் ந வட்டதி; அப்³ப⁴ஞ்ஜனாதீ³ஸு உபனேதப்³ப³ம். ஸத்தாஹாதிக்கமேபி அனாபத்தி, அனஜ்ஜோ²ஹரணீயதம் ஆபன்னத்தா. ‘‘படிஸாயனீயானீ’’தி ஹி வுத்தம். ஸசே அனுபஸம்பன்னோ புரேப⁴த்தம் படிக்³க³ஹிதனவனீதேன ஸப்பிம் கத்வா தே³தி, புரேப⁴த்தம் ஸாமிஸம் வட்டதி. ஸசே ஸயம் கரோதி, ஸத்தாஹம்பி நிராமிஸமேவ வட்டதி. பச்சா²ப⁴த்தம் படிக்³க³ஹிதனவனீதேன பன யேன கேனசி கதஸப்பி ஸத்தாஹம்பி நிராமிஸமேவ வட்டதி. உக்³க³ஹிதகேன கதே புப்³பே³ வுத்தஸுத்³த⁴ஸப்பினயேனேவ வினிச்ச²யோ வேதி³தப்³போ³.

புரேப⁴த்தம் படிக்³க³ஹிதகீ²ரேன வா த³தி⁴னா வா கதஸப்பி அனுபஸம்பன்னேன கதம் ஸாமிஸம்பி தத³ஹுபுரேப⁴த்தம் வட்டதி. ஸயம்கதம் நிராமிஸமேவ வட்டதி. நவனீதம் தாபேந்தஸ்ஸ ஹி ஸாமம்பாகோ ந ஹோதி, ஸாமம்பக்கேன பன தேன ஸத்³தி⁴ம் ஆமிஸம் ந வட்டதி. பச்சா²ப⁴த்ததோ பட்டா²ய ச ந வட்டதியேவ. ஸத்தாஹாதிக்கமேபி அனாபத்தி, ஸவத்து²கஸ்ஸ படிக்³க³ஹிதத்தா, ‘‘தானி படிக்³க³ஹேத்வா’’தி ஹி வுத்தம். பச்சா²ப⁴த்தம் படிக்³க³ஹிதேஹி கதம் பன அப்³ப⁴ஞ்ஜனாதீ³ஸு உபனேதப்³ப³ம். புரேப⁴த்தம்பி ச உக்³க³ஹிதகேஹி கதம் உப⁴யேஸம்பி ஸத்தாஹாதிக்கமே அனாபத்தி. ஏஸேவ நயோ அகப்பியமம்ஸஸப்பிம்ஹி. அயம் பன விஸேஸோ – யத்த² பாளியம் ஆக³தஸப்பினா நிஸ்ஸக்³கி³யம், தத்த² இமினா து³க்கடம். அந்த⁴கட்ட²கதா²யம் காரணபதிரூபகம் வத்வா மனுஸ்ஸஸப்பி ச நவனீதஞ்ச படிக்கி²த்தம், தம் து³ப்படிக்கி²த்தம், ஸப்³ப³அட்ட²கதா²ஸு அனுஞ்ஞாதத்தா. பரதோ சஸ்ஸ வினிச்ச²யோபி ஆக³ச்சி²ஸ்ஸதி.

பாளியம் ஆக³தம் நவனீதம்பி புரேப⁴த்தம் படிக்³க³ஹிதம் தத³ஹுபுரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய நிராமிஸமேவ. ஸத்தாஹாதிக்கமே நானாபா⁴ஜனேஸு ட²பிதே பா⁴ஜனக³ணனாய ஏகபா⁴ஜனேபி அமிஸ்ஸேத்வா பிண்ட³பிண்ட³வஸேன ட²பிதே பிண்ட³க³ணனாய நிஸ்ஸக்³கி³யானி. பச்சா²ப⁴த்தம் படிக்³க³ஹிதம் ஸப்பினயேனேவ வேதி³தப்³ப³ம். ஏத்த² பன த³தி⁴கு³ளிகாயோபி தக்கபி³ந்தூ³னிபி ஹோந்தி, தஸ்மா தம் தோ⁴தம் வட்டதீதி உபட்³ட⁴த்தே²ரா ஆஹம்ஸு. மஹாஸீவத்தே²ரோ பன ‘‘ப⁴க³வதா அனுஞ்ஞாதகாலதோ பட்டா²ய தக்கதோ உத்³த⁴டமத்தமேவ கா²தி³ம்ஸூ’’தி ஆஹ. தஸ்மா நவனீதம் பரிபு⁴ஞ்ஜந்தேன தோ⁴வித்வா த³தி⁴தக்கமக்கி²காகிபில்லிகாதீ³னி அபனேத்வா பரிபு⁴ஞ்ஜிதப்³ப³ம். பசித்வா ஸப்பிம் கத்வா பரிபு⁴ஞ்ஜிதுகாமேன அதோ⁴தம்பி பசிதும் வட்டதி. யம் தத்த² த³தி⁴க³தம் வா தக்கக³தம் வா தம் க²யம் க³மிஸ்ஸதி, ஏத்தாவதா ஹி ஸவத்து²கபடிக்³க³ஹிதம் நாம ந ஹோதீதி அயமேத்த² அதி⁴ப்பாயோ. ஆமிஸேன ஸத்³தி⁴ம் பக்கத்தா பன தஸ்மிம்பி குக்குச்சாயந்தி குக்குச்சகா. இதா³னி உக்³க³ஹேத்வா ட²பிதனவனீதே ச புரேப⁴த்தம் கீ²ரத³தீ⁴னி படிக்³க³ஹேத்வா கதனவனீதே ச பச்சா²ப⁴த்தம் தானி படிக்³க³ஹேத்வா கதனவனீதே ச உக்³க³ஹிதேஹி கதனவவீதே ச அகப்பியமம்ஸனவனீதே ச ஸப்³போ³ ஆபத்தானாபத்திபரிபோ⁴கா³பரிபோ⁴க³னயோ ஸப்பிம்ஹி வுத்தக்கமேனேவ க³ஹேதப்³போ³.

தேலபி⁴க்கா²ய பவிட்டா²னம் பன பி⁴க்கூ²னம் தத்தே²வ ஸப்பிம்பி நவனீதம்பி பக்கதேலம்பி அபக்கதேலம்பி ஆகிரந்தி, தத்த² தக்கத³தி⁴பி³ந்தூ³னிபி ப⁴த்தஸித்தா²னிபி தண்டு³லகணாபி மக்கி²காத³யோபி ஹோந்தி. ஆதி³ச்சபாகம் கத்வா பரிஸ்ஸாவேத்வா க³ஹிதம் ஸத்தாஹகாலிகம் ஹோதி, படிக்³க³ஹேத்வா ட²பிதபே⁴ஸஜ்ஜேஹி ஸத்³தி⁴ம் பசித்வா நத்து²பானம்பி காதும் வட்டதி. ஸசே வத்³த³லிஸமயே லஜ்ஜி ஸாமணேரோ யதா² தத்த² பதிததண்டு³லகணாத³யோ ந பச்சந்தி, ஏவம் ஸாமிஸபாகம் மோசேந்தோ அக்³கி³ம்ஹி விலீயாபேத்வா பரிஸ்ஸாவேத்வா புன பசித்வா தே³தி, புரிமனயேனேவ ஸத்தாஹம் வட்டதி.

தேலேஸு திலதேலம் தாவ புரேப⁴த்தம் படிக்³க³ஹிதம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய நிராமிஸமேவ. ஸத்தாஹாதிக்கமே பனஸ்ஸ பா⁴ஜனக³ணனாய நிஸ்ஸக்³கி³யபா⁴வோ வேதி³தப்³போ³. பச்சா²ப⁴த்தம் படிக்³க³ஹிதம் ஸத்தாஹம் நிராமிஸமேவ வட்டதி. உக்³க³ஹிதகம் கத்வா நிக்கி²த்தம் அஜ்ஜோ²ஹரிதும் ந வட்டதி, ஸீஸமக்க²னாதீ³ஸு உபனேதப்³ப³ம், ஸத்தாஹாதிக்கமேபி அனாபத்தி. புரேப⁴த்தம் திலே படிக்³க³ஹேத்வா கததேலம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய அனஜ்ஜோ²ஹரணீயம் ஹோதி, ஸீஸமக்க²னாதீ³ஸு உபனேதப்³ப³ம், ஸத்தாஹாதிக்கமேபி அனாபத்தி. பச்சா²ப⁴த்தம் திலே படிக்³க³ஹேத்வா கததேலம் அனஜ்ஜோ²ஹரணீயமேவ, ஸவத்து²கபடிக்³க³ஹிதத்தா, ஸத்தாஹாதிக்கமேபி அனாபத்தி, ஸீஸமக்க²னாதீ³ஸு உபனேதப்³ப³ம். புரேப⁴த்தம் வா பச்சா²ப⁴த்தம் வா உக்³க³ஹிதகதிலேஹி கததேலேபி ஏஸேவ நயோ.

புரேப⁴த்தம் படிக்³க³ஹிதகதிலே ப⁴ஜ்ஜித்வா வா திலபிட்ட²ம் வா ஸேதே³த்வா உண்ஹோத³கேன வா தேமேத்வா கததேலம் ஸசே அனுபஸம்பன்னேன கதம் புரேப⁴த்தம் ஸாமிஸம்பி வட்டதி. அத்தனா கததேலம் பன நிப்³ப³ட்டிதத்தா புரேப⁴த்தம் நிராமிஸமேவ வட்டதி. ஸாமம்பக்கத்தா ஸாமிஸம் ந வட்டதி, ஸவத்து²கபடிக்³க³ஹிதத்தா பன பச்சா²ப⁴த்ததோ பட்டா²ய உப⁴யம்பி அனஜ்ஜோ²ஹரணீயம், ஸீஸமக்க²னாதீ³ஸு உபனேதப்³ப³ம், ஸத்தாஹாதிக்கமேபி அனாபத்தி. யதி³ பன அப்பம் உண்ஹோத³கம் ஹோதி அப்³பு⁴க்கிரணமத்தம், அப்³போ³ஹாரிகம் ஹோதி, ஸாமபாகக³ணனம் ந க³ச்ச²தி. ஸாஸபதேலாதீ³ஸுபி அவத்து²கபடிக்³க³ஹிதேஸு அவத்து²கதிலதேலே வுத்தஸதி³ஸோவ வினிச்ச²யோ.

ஸசே பன புரேப⁴த்தம் படிக்³க³ஹிதானம் ஸாஸபாதீ³னம் சுண்ணேஹி ஆதி³ச்சபாகேன ஸக்கா தேலம் காதும், தம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய நிராமிஸமேவ, ஸத்தாஹாதிக்கமே நிஸ்ஸக்³கி³யம். யஸ்மா பன ஸாஸபமது⁴கசுண்ணாதீ³னி ஸேதே³த்வா ஏரண்ட³கட்டீ²னி ச ப⁴ஜ்ஜித்வா ஏவ தேலம் கரோந்தி, தஸ்மா தேஸம் தேலம் அனுபஸம்பன்னேஹி கதம் புரேப⁴த்தம் ஸாமிஸம்பி வட்டதி. வத்தூ²னம் யாவஜீவிகத்தா பன ஸவத்து²கபடிக்³க³ஹணே தோ³ஸோ நத்தீ²தி. அத்தனா கதம் ஸத்தாஹம் நிராமிஸபரிபோ⁴கே³னேவ பரிபு⁴ஞ்ஜிதப்³ப³ம். உக்³க³ஹிதகேஹி கதம் அனஜ்ஜோ²ஹரணீயம் பா³ஹிரபரிபோ⁴கே³ வட்டதி, ஸத்தாஹாதிக்கமேபி அனாபத்தி.

தேலகரணத்தா²ய ஸாஸபமது⁴கஏரண்ட³கட்டீ²னி வா படிக்³க³ஹேத்வா கதம் தேலம் ஸத்தாஹகாலிகம். து³தியதி³வஸே கதம் சா²ஹம் வட்டதி. ததியதி³வஸே கதம் பஞ்சாஹம் வட்டதி. சதுத்த²-பஞ்சம-ச²ட்ட²ஸத்தாமதி³வஸே கதம் தத³ஹேவ வட்டதி. ஸசே யாவ அருணஸ்ஸ உக்³க³மனா திட்ட²தி, நிஸ்ஸக்³கி³யம். அட்ட²மே தி³வஸே கதம் அனஜ்ஜோ²ஹரணீயம். அனிஸ்ஸக்³கி³யத்தா பன பா³ஹிரபரிபோ⁴கே³ வட்டதி. ஸசேபி ந கரோதி, தேலத்தா²ய க³ஹிதஸாஸபாதீ³னம் ஸத்தாஹாதிக்கமனே து³க்கடமேவ. பாளியம் பன அனாக³தானி அஞ்ஞானிபி நாளிகேரனிம்ப³கோஸம்ப³ககரமந்த³அதஸீஆதீ³னம் தேலானி அத்தி², தானி படிக்³க³ஹேத்வா ஸத்தாஹம் அதிக்காமயதோ து³க்கடம் ஹோதி. அயமேதேஸு விஸேஸோ. ஸேஸம் யாவகாலிகவத்து²ம் யாவஜீவிகவத்து²ஞ்ச ஸல்லக்கே²த்வா ஸாமம்பாகஸவத்து²கபுரேப⁴த்தபச்சா²ப⁴த்தபடிக்³க³ஹிதஉக்³க³ஹிதகவத்து²விதா⁴னம் ஸப்³ப³ம் வுத்தனயேனேவ வேதி³தப்³ப³ம்.

623. வஸாதேலந்தி ‘‘அனுஜானாமி, பி⁴க்க²வே, வஸானி பே⁴ஸஜ்ஜானி, அச்ச²வஸம், மச்ச²வஸம், ஸுஸுகாவஸம், ஸூகரவஸம், க³த்³ரப⁴வஸ’’ந்தி (மஹாவ. 262) ஏவம் அனுஞ்ஞாதவஸானம் தேலம். ஏத்த² ச ‘‘அச்ச²வஸ’’ந்தி வசனேன ட²பேத்வா மனுஸ்ஸவஸம் ஸப்³பே³ஸம் அகப்பியமம்ஸான வஸா அனுஞ்ஞாதா. மச்ச²க்³க³ஹணேன ச ஸுஸுகாபி க³ஹிதா ஹோந்தி, வாளமச்ச²த்தா பன விஸும் வுத்தம். மச்சா²தி³க்³க³ஹணேன சேத்த² ஸப்³பே³ஸம்பி கப்பியமம்ஸானம் வஸா அனுஞ்ஞாதா. மம்ஸேஸு ஹி த³ஸமனஉஸ்ஸ-ஹத்தி²-அஸ்ஸ-ஸுனக²-அஹி-ஸீஹ-ப்³யக்³க⁴-தீ³பி-அச்ச²-தரச்சா²னம் மம்ஸானி அகப்பியானி. வஸாஸு ஏகா மனுஸ்ஸவஸாவ. கீ²ராதீ³ஸு அகப்பியம் நாம நத்தி².

அனுபஸம்பன்னேஹி கதனிப்³ப³ட்டிதவஸாதேலம் புரேப⁴த்தம் படிக்³க³ஹிதம் புரேப⁴த்தம் ஸாமிஸம்பி வட்டதி. பச்சா²ப⁴த்ததோ பட்டா²ய ஸத்தாஹம் நிராமிஸமேவ வட்டதி. யம் பன தத்த² ஸுகு²மரஜஸதி³ஸம் மம்ஸம் வா ந்ஹாரு வா அட்டி² வா லோஹிதம் வா ஹோதி, தம் அப்³போ³ஹாரிகம். ஸசே பன வஸம் படிக்³க³ஹேத்வா ஸயம் கரோதி, புரேப⁴த்தம் படிக்³க³ஹேத்வா பசித்வா பரிஸ்ஸாவேத்வா ஸத்தாஹம் நிராமிஸபரிபோ⁴கே³ன பரிபு⁴ஞ்ஜிதப்³ப³ம். நிராமிஸபரிபோ⁴க³ஞ்ஹி ஸந்தா⁴ய இத³ம் வுத்தம் – ‘‘காலே படிக்³க³ஹிதம் காலே நிப்பக்கம் காலே ஸம்ஸட்ட²ம் தேலபரிபோ⁴கே³ன பரிபு⁴ஞ்ஜிது’’ந்தி (மஹாவ. 262). தத்ராபி அப்³போ³ஹாரிகம் அப்³போ³ஹாரிகமேவ. பச்சா²ப⁴த்தம் பன படிக்³க³ஹிதும் வா காதும் வா ந வட்டதியேவ. வுத்தஞ்ஹேதம் –

‘‘விகாலே சே, பி⁴க்க²வே, படிக்³க³ஹிதம் விகாலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி திண்ணம் து³க்கடானம். காலே சே, பி⁴க்க²வே, படிக்³க³ஹிதம் விகாலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி த்³வின்னம் து³க்கடானம். காலே சே, பி⁴க்க²வே, படிக்³க³ஹிதம் காலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி து³க்கடஸ்ஸ. காலே சே, பி⁴க்க²வே, படிக்³க³ஹிதம் காலே நிப்பக்கம் காலே ஸம்ஸட்ட²ம், தம் சே பரிபு⁴ஞ்ஜேய்ய, அனாபத்தீ’’தி.

உபதிஸ்ஸத்தே²ரம் பன அந்தேவாஸிகா புச்சி²ம்ஸு – ‘‘ப⁴ந்தே, ஸப்பினவனீதவஸானி ஏகதோ பசித்வா நிப்³ப³ட்டிதானி வட்டந்தி, ந வட்டந்தீ’’தி? ‘‘ந வட்டந்தி, ஆவுஸோ’’தி. தே²ரோ கிரேத்த² பக்கதேலகஸடே விய குக்குச்சாயதி. ததோ நம் உத்தரி புச்சி²ம்ஸு – ‘‘ப⁴ந்தே, நவனீதே த³தி⁴கு³ளிகா வா தக்கபி³ந்து³ வா ஹோதி, ஏதம் வட்டதீ’’தி? ‘‘ஏதம்பி, ஆவுஸோ, ந வட்டதீ’’தி. ததோ நம் ஆஹம்ஸு – ‘‘ப⁴ந்தே, ஏகதோ பசித்வா ஸம்ஸட்டா²னி தேஜவந்தானி ஹோந்தி, ரோக³ம் நிக்³க³ண்ஹந்தீ’’தி? ‘‘ஸாதா⁴வுஸோ’’தி தே²ரோ ஸம்படிச்சி².

மஹாஸுமத்தே²ரோ பனாஹ – ‘‘கப்பியமம்ஸவஸா ஸாமிஸபரிபோ⁴கே³ வட்டதி, இதரா நிராமிஸபரிபோ⁴கே³ வட்டதீ’’தி. மஹாபது³மத்தே²ரோ பன ‘‘இத³ம் கி’’ந்தி படிக்கி²பித்வா ‘‘நனு வாதாபா³தி⁴கா பி⁴க்கூ² பஞ்சமூலகஸாவயாகு³யம் அச்ச²ஸூகரதேலாதீ³னி பக்கி²பித்வா யாகு³ம் பிவந்தி, ஸா தேஜுஸ்ஸத³த்தா ரோக³ம் நிக்³க³ண்ஹாதீ’’தி வத்வா ‘‘வட்டதீ’’தி ஆஹ.

மது⁴ நாம மக்கி²காமதூ⁴தி மது⁴கரீஹி நாம மது⁴மக்கி²காஹி கு²த்³த³கமக்கி²காஹி ப⁴மரமக்கி²காஹி ச கதம் மது⁴. தம் புரேப⁴த்தம் படிக்³க³ஹிதம் புரேப⁴த்தம் ஸாமிஸபரிபோ⁴க³ம்பி வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸபரிபோ⁴க³மேவ வட்டதி. ஸத்தாஹாதிக்கமே ஸசே ஸிலேஸஸதி³ஸம் மஹாமது⁴ம் க²ண்ட³ம் க²ண்ட³ம் கத்வா ட²பிதம், இதரம் வா நானாபா⁴ஜனேஸு, வத்து²க³ணனாய நிஸ்ஸக்³கி³யானி. ஸசே ஏகமேவ க²ண்ட³ம், ஏகபா⁴ஜனே வா இதரம் ஏகமேவ நிஸ்ஸக்³கி³யம். உக்³க³ஹிதகம் வுத்தனயேனேவ வேதி³தப்³ப³ம், அருமக்க²னாதீ³ஸு உபனேதப்³ப³ம். மது⁴படலம் வா மது⁴ஸித்த²கம் வா ஸசே மது⁴னா அமக்கி²தம் பரிஸுத்³த⁴ம், யாவஜீவிகம். மது⁴மக்கி²தம் பன மது⁴க³திகமேவ. சீரிகா நாம ஸபக்கா² தீ³க⁴மக்கி²கா, தும்ப³லனாமிகா ச அட்டி²பக்கா² காளமஹாப⁴மரா ஹோந்தி, தேஸம் ஆஸயேஸு நிய்யாஸஸதி³ஸம் மது⁴ ஹோதி, தம் யாவஜீவிகம்.

பா²ணிதம் நாம உச்சு²ம்ஹா நிப்³ப³த்தந்தி உச்சு²ரஸம் உபாதா³ய அபக்கா வா அவத்து²கபக்கா வா ஸப்³பா³பி அவத்து²கா உச்சு²விகதி பா²ணிதந்தி வேதி³தப்³பா³. தம் பா²ணிதம் புரேப⁴த்தம் படிக்³க³ஹிதம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ வட்டதி. ஸத்தாஹாதிக்கமே வத்து²க³ணனாய நிஸ்ஸக்³கி³யம். ப³ஹூ பிண்டா³ சுண்ணேத்வா ஏகபா⁴ஜனே பக்கி²த்தா ஹோந்தி க⁴னஸன்னிவேஸா, ஏகமேவ நிஸ்ஸக்³கி³யம். உக்³க³ஹிதகம் வுத்தனயேனேவ வேதி³தப்³ப³ம், க⁴ரதூ⁴பனாதீ³ஸு உபனேதப்³ப³ம். புரேப⁴த்தம் படிக்³க³ஹிதேன அபரிஸ்ஸாவிதஉச்சு²ரஸேன கதபா²ணிதம் ஸசே அனுபஸம்பன்னேன கதம், ஸாமிஸம்பி வட்டதி. ஸயம்கதம் நிராமிஸமேவ வட்டதி. பச்சா²ப⁴த்ததோ பட்டா²ய பன ஸவத்து²கபடிக்³க³ஹிதத்தா அனஜ்ஜோ²ஹரணீயம், ஸத்தாஹாதிக்கமேபி அனாபத்தி. பச்சா²ப⁴த்தம் அபரிஸ்ஸாவிதபடிக்³க³ஹிதேன கதம்பி அனஜ்ஜோ²ஹரணீயமேவ, ஸத்தாஹாதிக்கமேபி அனாபத்தி. ஏஸ நயோ உச்சு²ம் படிக்³க³ஹேத்வா கதபா²ணிதேபி. புரேப⁴த்தம் பன பரிஸ்ஸாவிதபடிக்³க³ஹிதகேன கதம் ஸசே அனுபஸம்பன்னேன கதம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ. ஸயம்கதம் புரேப⁴த்தம்பி நிராமிஸமேவ. பச்சா²ப⁴த்தம் பரிஸ்ஸாவிதபடிக்³க³ஹிதேன கதம் பன நிராமிஸமேவ ஸத்தாஹம் வட்டதி. உக்³க³ஹிதககதம் வுத்தனயமேவ. ‘‘ஜா²மஉச்சு²பா²ணிதம் வா கோட்டிதஉச்சு²பா²ணிதம் வா புரேப⁴த்தமேவ வட்டதீ’’தி மஹாஅட்ட²கதா²யம் வுத்தம்.

மஹாபச்சரியம் பன ‘‘ஏதம் ஸவத்து²கபக்கம் வட்டதி, நோ வட்டதீ’’தி புச்ச²ம் கத்வா ‘‘உச்சு²பா²ணிதம் பச்சா²ப⁴த்தம் நோவட்டனகம் நாம நத்தீ²’’தி வுத்தம், தம் யுத்தம். ஸீதுத³கேன கதம் மது⁴கபுப்ப²பா²ணிதம் புரேப⁴த்தம் ஸாமிஸம் வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ. ஸத்தாஹாதிக்கமே வத்து²க³ணனாய து³க்கடம். கீ²ரம் பக்கி²பித்வா கதம் மது⁴கபா²ணிதம் யாவகாலிகம். க²ண்ட³ஸக்க²ரம் பன கீ²ரஜல்லிகம் அபனேத்வா ஸோதே⁴ந்தி, தஸ்மா வட்டதி. மது⁴கபுப்ப²ம் பன புரேப⁴த்தம் அல்லம் வட்டதி, ப⁴ஜ்ஜிதம்பி வட்டதி. ப⁴ஜ்ஜித்வா திலாதீ³ஹி மிஸ்ஸம் வா அமிஸ்ஸம் வா கத்வா கோட்டிதம்பி வட்டதி. யதி³ பன தம் க³ஹேத்வா மேரயத்தா²ய யோஜேந்தி, யோஜிதம் பீ³ஜதோ பட்டா²ய ந வட்டதி. கத³லீ-க²ஜ்ஜூரீ-அம்ப³-லபு³ஜ-பனஸ-சிஞ்சாதீ³னம் ஸப்³பே³ஸம் யாவகாலிகப²லானம் பா²ணிதம் யாவகாலிகமேவ. மரிசபக்கேஹி பா²ணிதம் கரோந்தி, தம் யாவஜீவிகம்.

தானி படிக்³க³ஹேத்வாதி ஸசேபி ஸப்³பா³னிபி படிக்³க³ஹேத்வா ஏக க⁴டே அவினிப்³போ⁴கா³னி கத்வா நிக்கி²பதி, ஸத்தாஹாதிக்கமே ஏகமேவ நிஸ்ஸக்³கி³யம். வினிபு⁴த்தேஸு பஞ்ச நிஸ்ஸக்³கி³யானி. ஸத்தாஹம் பன அனதிக்காமேத்வா கி³லானேனபி அகி³லானேனபி வுத்தனயேனேவ யதா²ஸுக²ம் பரிபு⁴ஞ்ஜிதப்³ப³ம். ஸத்தவித⁴ஞ்ஹி ஓதி³ஸ்ஸம் நாம – ப்³யாதி⁴ஓதி³ஸ்ஸம், புக்³க³லோதி³ஸ்ஸம், காலோதி³ஸ்ஸம், ஸமயோதி³ஸ்ஸம், தே³ஸோதி³ஸ்ஸம், வஸோதி³ஸ்ஸம், பே⁴ஸஜ்ஜோதி³ஸ்ஸந்தி.

தத்த² ப்³யாதி⁴ஓதி³ஸ்ஸம் நாம – ‘‘அனுஜானாமி, பி⁴க்க²வே, அமனுஸ்ஸிகாபா³தே⁴ ஆமகமம்ஸம் ஆமகலோஹித’’ந்தி (மஹாவ. 264) ஏவம் ப்³யாதி⁴ம் உத்³தி³ஸ்ஸ அனுஞ்ஞாதம், தம் தேனேவ ஆபா³தே⁴ன ஆபா³தி⁴கஸ்ஸ வட்டதி, ந அஞ்ஞஸ்ஸ. தஞ்ச கோ² காலேபி விகாலேபி கப்பியம்பி அகப்பியம்பி வட்டதியேவ.

புக்³க³லோதி³ஸ்ஸம் நாம – ‘‘அனுஜானாமி, பி⁴க்க²வே, ரோமந்த²கஸ்ஸ ரோமந்த²னம். ந ச, பி⁴க்க²வே, ப³ஹிமுக²த்³வாரம் நீஹரித்வா அஜ்ஜோ²ஹரிதப்³ப³’’ந்தி (சூளவ. 273) ஏவம் புக்³க³லம் உத்³தி³ஸ்ஸ அனுஞ்ஞாதம், தம் தஸ்ஸேவ வட்டதி, ந அஞ்ஞஸ்ஸ.

காலோதி³ஸ்ஸம் நாம – ‘‘அனுஜானாமி, பி⁴க்க²வே, சத்தாரி மஹாவிகடானி தா³தும் – கூ³த²ம், முத்தம், சா²ரிகம், மத்திக’’ந்தி (மஹாவ. 268) ஏவம் அஹினா த³ட்ட²காலம் உத்³தி³ஸ்ஸ அனுஞ்ஞாதம், தம் தஸ்மிம்யேவ காலே அப்படிக்³க³ஹிதகம்பி வட்டதி, ந அஞ்ஞஸ்மிம்.

ஸமயோதி³ஸ்ஸம் நாம – ‘‘க³ணபோ⁴ஜனே அஞ்ஞத்ர ஸமயா’’திஆதி³னா (பாசி. 217) நயேன தம் தம் ஸமயம் உத்³தி³ஸ்ஸ அனுஞ்ஞாதா அனாபத்தியோ, தா தஸ்மிம் தஸ்மிம்யேவ ஸமயே அனாபத்தியோ ஹோந்தி, ந அஞ்ஞதா³.

தே³ஸோதி³ஸ்ஸம் நாம – ‘‘அனுஜானாமி, பி⁴க்க²வே, ஏவரூபேஸு பச்சந்திமேஸு ஜனபதே³ஸு வினயத⁴ரபஞ்சமேன க³ணேன உபஸம்பத³’’ந்தி (மஹாவ. 259) ஏவம் பச்சந்ததே³ஸே உத்³தி³ஸ்ஸ அனுஞ்ஞாதானி உபஸம்பதா³தீ³னி, தானி தத்தே²வ வட்டந்தி, ந மஜ்ஜி²மதே³ஸே.

வஸோதி³ஸ்ஸம் நாம – ‘‘அனுஜானாமி, பி⁴க்க²வே, வஸானி பே⁴ஸஜ்ஜானீ’’தி (மஹாவ. 262) ஏவம் வஸானாமேன அனுஞ்ஞாதம், தம் ட²பேத்வா மனுஸ்ஸவஸம் ஸப்³பே³ஸம் கப்பியாகப்பியவஸானம் தேலம் தம்தத³த்தி²கானம் தேலபரிபோ⁴கே³ன பரிபு⁴ஞ்ஜிதும் வட்டதி.

பே⁴ஸஜ்ஜோதி³ஸ்ஸம் நாம – ‘‘அனுஜானாமி, பி⁴க்க²வே, பஞ்ச பே⁴ஸஜ்ஜானீ’’தி (மஹாவ. 260-261) ஏவம் பே⁴ஸஜ்ஜனாமேன அனுஞ்ஞாதானி ஆஹாரத்த²ம் ப²ரிதும் ஸமத்தா²னி ஸப்பினவனீததேலமது⁴பா²ணிதந்தி. தானி படிக்³க³ஹேத்வா தத³ஹுபுரேப⁴த்தம் யதா²ஸுக²ம் பச்சா²ப⁴த்ததோ பட்டா²ய ஸதி பச்சயே வுத்தனயேனேவ ஸத்தாஹம் பரிபு⁴ஞ்ஜிதப்³பா³னி.

624. ஸத்தாஹாதிக்கந்தே அதிக்கந்தஸஞ்ஞீ நிஸ்ஸக்³கி³யம் பாசித்தியந்தி ஸசேபி ஸாஸபமத்தம் ஹோதி ஸகிம் வா அங்கு³லியா க³ஹேத்வா ஜிவ்ஹாய ஸாயனமத்தம் நிஸ்ஸஜ்ஜிதப்³ப³மேவ, பாசித்தியஞ்ச தே³ஸேதப்³ப³ம்.

ந காயிகேன பரிபோ⁴கே³ன பரிபு⁴ஞ்ஜிதப்³ப³ந்தி காயோ வா காயே அரு வா ந மக்கே²தப்³ப³ம். தேஹி மக்கி²தானி காஸாவகத்தரயட்டி²உபாஹனபாத³கத²லிகமஞ்சபீடா²தீ³னிபி அபரிபோ⁴கா³னி. ‘‘த்³வாரவாதபானகவாடேஸுபி ஹத்தே²ன க³ஹணட்டா²னம் ந மக்கே²தப்³ப³’’ந்தி மஹாபச்சரியம் வுத்தம். ‘‘கஸாவே பன பக்கி²பித்வா த்³வாரவாதபானகவாடானி மக்கே²தப்³பா³னீ’’தி மஹாஅட்ட²கதா²யம் வுத்தம்.

அனாபத்தி அந்தோஸத்தாஹம் அதி⁴ட்டே²தீதி ஸத்தாஹப்³ப⁴ந்தரே ஸப்பிஞ்ச தேலஞ்ச வஸஞ்ச முத்³த⁴னிதேலம் வா அப்³ப⁴ஞ்ஜனம் வா மது⁴ம் அருமக்க²னம் பா²ணிதம் க⁴ரதூ⁴பனம் அதி⁴ட்டே²தி, அனாபத்தி. ஸசே அதி⁴ட்டி²ததேலம் அனதி⁴ட்டி²ததேலபா⁴ஜனே ஆகிரிதுகாமோ ஹோதி, பா⁴ஜனே சே ஸுகு²மம் சி²த்³த³ம் பவிட்ட²ம் பவிட்ட²ம் தேலம் புராணதேலேன அஜ்ஜோ²த்த²ரீயதி, புன அதி⁴ட்டா²தப்³ப³ம். அத² மஹாமுக²ம் ஹோதி, ஸஹஸாவ ப³ஹுதேலம் பவிஸித்வா புராணதேலம் அஜ்ஜோ²த்த²ரதி, புன அதி⁴ட்டா²னகிச்சம் நத்தி². அதி⁴ட்டி²தக³திகமேவ ஹி தம் ஹோதி, ஏதேன நயேன அதி⁴ட்டி²ததேலபா⁴ஜனே அனதி⁴ட்டி²ததேலாகிரணம்பி வேதி³தப்³ப³ம்.

625. விஸ்ஸஜ்ஜேதீதி ஏத்த² ஸசே த்³வின்னம் ஸந்தகம் ஏகேன படிக்³க³ஹிதம் அவிப⁴த்தம் ஹோதி, ஸத்தாஹாதிக்கமே த்³வின்னம்பி அனாபத்தி, பரிபு⁴ஞ்ஜிதும் பன ந வட்டதி. ஸசே யேன படிக்³க³ஹிதம், ஸோ இதரம் ப⁴ணதி – ‘‘ஆவுஸோ, இமம் தேலம் ஸத்தாஹமத்தம் பரிபு⁴ஞ்ஜ த்வ’’ந்தி. ஸோ ச பரிபோ⁴க³ம் ந கரோதி, கஸ்ஸ ஆபத்தி? ந கஸ்ஸசிபி ஆபத்தி. கஸ்மா? யேன படிக்³க³ஹிதம் தேன விஸ்ஸஜ்ஜிதத்தா, இதரஸ்ஸ அப்படிக்³க³ஹிதத்தா.

வினஸ்ஸதீதி அபரிபோ⁴க³ம் ஹோதி. சத்தேனாதிஆதீ³ஸு யேன சித்தேன பே⁴ஸஜ்ஜம் சத்தஞ்ச வந்தஞ்ச முத்தஞ்ச ஹோதி, தம் சித்தம் சத்தம் வந்தம் முத்தந்தி வுச்சதி. தேன சித்தேன புக்³க³லோ அனபேக்கோ²தி வுச்சத்தி, ஏவம் அனபேக்கோ² ஸாமணேரஸ்ஸ த³த்வாதி அத்தோ². இத³ம் கஸ்மா வுத்தம்? ‘‘ஏவம் அந்தோஸத்தாஹே த³த்வா பச்சா² லபி⁴த்வா பரிபு⁴ஞ்ஜந்தஸ்ஸ அனாபத்தித³ஸ்ஸனத்த²’’ந்தி மஹாஸுமத்தே²ரோ ஆஹ. மஹாபது³மத்தே²ரோ பனாஹ – ‘‘நயித³ம் யாசிதப்³ப³ம், அந்தோஸத்தாஹே தி³ன்னஸ்ஸ ஹி புன பரிபோ⁴கே³ ஆபத்தியேவ நத்தி². ஸத்தாஹாதிக்கந்தஸ்ஸ பன பரிபோ⁴கே³ அனாபத்தித³ஸ்ஸனத்த²மித³ம் வுத்த’’ந்தி. தஸ்மா ஏவம் தி³ன்னம் பே⁴ஸஜ்ஜம் ஸசே ஸாமணேரோ அபி⁴ஸங்க²ரித்வா வா அனபி⁴ஸங்க²ரித்வா வா தஸ்ஸ பி⁴க்கு²னோ நத்து²கம்மத்த²ம் த³தே³ய்ய, க³ஹேத்வா நத்து²கம்மம் காதப்³ப³ம். ஸசே பா³லோ ஹோதி, தா³தும் ந ஜானாதி, அஞ்ஞேன பி⁴க்கு²னா வத்தப்³போ³ – ‘‘அத்தி² தே, ஸாமணேர, தேல’’ந்தி ‘‘ஆம, ப⁴ந்தே, அத்தீ²’’தி. ‘‘ஆஹர, தே²ரஸ்ஸ பே⁴ஸஜ்ஜம் கரிஸ்ஸாமா’’தி. ஏவம்பி வட்டதி. ஸேஸம் உத்தானத்த²மேவ.

கதி²னஸமுட்டா²னம், அகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம்,

திசித்தம், திவேத³னந்தி.

பே⁴ஸஜ்ஜஸிக்கா²பத³வண்ணனா நிட்டி²தா.

4. வஸ்ஸிகஸாடிகஸிக்கா²பத³வண்ணனா

626. தேன ஸமயேனாதி வஸ்ஸிகஸாடிகஸிக்கா²பத³ம். தத்த² வஸ்ஸிகஸாடிகா அனுஞ்ஞாதாதி சீவரக்க²ந்த⁴கே விஸாகா²வத்து²ஸ்மிம் (மஹாவ. 349 ஆத³யோ) அனுஞ்ஞாதா. படிகச்சேவாதி புரேயேவ.

627. மாஸோ ஸேஸோ கி³ம்ஹானந்தி சதுன்னம் கி³ம்ஹமாஸானம் ஏகோ பச்சி²மமாஸோ ஸேஸோ. கத்வாதி ஸிப்³ப³னரஜனகப்பபரியோஸானேன நிட்ட²பேத்வா. கரோந்தேன ச ஏகமேவ கத்வா ஸமயே அதி⁴ட்டா²தப்³ப³ம், த்³வே அதி⁴ட்டா²தும் ந வட்டந்தி.

அதிரேகமாஸே ஸேஸே கி³ம்ஹானேதி கி³ம்ஹானனாமகே அதிரேகமாஸே ஸேஸே.

அதிரேகத்³த⁴மாஸே ஸேஸே கி³ம்ஹானே கத்வா நிவாஸேதீதி ஏத்த² பன ட²த்வா வஸ்ஸிகஸாடிகாய பரியேஸனக்கே²த்தம் கரணக்கே²த்தம் நிவாஸனக்கே²த்தம் அதி⁴ட்டா²னக்கே²த்தந்தி சதுப்³பி³த⁴ம் கே²த்தம், குச்சி²ஸமயோ பிட்டி²ஸமயோதி து³விதோ⁴ ஸமயோ, பிட்டி²ஸமயசதுக்கம் குச்சி²ஸமயசதுக்கந்தி த்³வே சதுக்கானி ச வேதி³தப்³பா³னி.

தத்த² ஜேட்ட²மூலபுண்ணமாஸியா பச்சி²மபாடிபத³தி³வஸதோ பட்டா²ய யாவ காளபக்கு²போஸதா², அயமேகோ அத்³த⁴மாஸோ பரியேஸனக்கே²த்தஞ்சேவ கரணக்கே²த்தஞ்ச. ஏதஸ்மிஞ்ஹி அந்தரே வஸ்ஸிகஸாடிகம் அலத்³த⁴ம் பரியேஸிதும் லத்³த⁴ம் காதுஞ்ச வட்டதி, நிவாஸேதும் அதி⁴ட்டா²துஞ்ச ந வட்டதி. காளபக்கு²போஸத²ஸ்ஸ பச்சி²மபாடிபத³தி³வஸதோ பட்டா²ய யாவ ஆஸாள்ஹீபுண்ணமா, அயமேகோ அத்³த⁴மாஸோ பரியேஸனகரணனிவாஸனானம் திண்ணம்பி கே²த்தம். ஏதஸ்மிஞ்ஹி அந்தரே பரியேஸிதும் காதும் நிவாஸேதுஞ்ச வட்டதி, அதி⁴ட்டா²தும்யேவ ந வட்டதி. ஆஸாள்ஹீபுண்ணமாஸியா பச்சி²மபாடிபத³தி³வஸதோ பட்டா²ய யாவ கத்திகபுண்ணமா, இமே சத்தாரோ மாஸா பரியேஸனகரணனிவாஸனாதி⁴ட்டா²னானம் சதுன்னம் கே²த்தம். ஏதஸ்மிஞ்ஹி அந்தரே அலத்³த⁴ம் பரியேஸிதும் லத்³த⁴ம் காதும் நிவாஸேதும் அதி⁴ட்டா²துஞ்ச வட்டதி. இத³ம் தாவ சதுப்³பி³த⁴ம் கே²த்தம் வேதி³தப்³ப³ம்.

கத்திகபுண்ணமாஸியா பன பச்சி²மபாடிபத³தி³வஸதோ பட்டா²ய யாவ ஜேட்ட²மூலபுண்ணமா, இமே ஸத்த மாஸா பிட்டி²ஸமயோ நாம. ஏதஸ்மிஞ்ஹி அந்தரே ‘‘காலோ வஸ்ஸிகஸாடிகாயா’’திஆதி³னா நயேன ஸதுப்பாத³ம் கத்வா அஞ்ஞாதகஅப்பவாரிதட்டா²னதோ வஸ்ஸிகஸாடிகசீவரம் நிப்பா²தே³ந்தஸ்ஸ இமினா ஸிக்கா²பதே³ன நிஸ்ஸக்³கி³யம் பாசித்தியம். ‘‘தே³த² மே வஸ்ஸிகஸாடிகசீவர’’ந்திஆதி³னா நயேன விஞ்ஞத்திம் கத்வா நிப்பா²தே³ந்தஸ்ஸ அஞ்ஞாதகவிஞ்ஞத்திஸிக்கா²பதே³ன நிஸ்ஸக்³கி³யம் பாசித்தியம். வுத்தனயேனேவ ஸதுப்பாத³ம் கத்வா ஞாதகபவாரிதட்டா²னதோ நிப்பா²தே³ந்தஸ்ஸ இமினாவ ஸிக்கா²பதே³ன நிஸ்ஸக்³கி³யம் பாசித்தியம். விஞ்ஞத்திம் கத்வா நிப்பா²தே³ந்தஸ்ஸ அஞ்ஞாதகவிஞ்ஞத்திஸிக்கா²பதே³ன அனாபத்தி. வுத்தஞ்ஹேதம் பரிவாரே –

‘‘மாதரம் சீவரம் யாசே, நோ ச ஸங்கே⁴ பரிணதம்;

கேனஸ்ஸ ஹோதி ஆபத்தி, அனாபத்தி ச ஞாதகே;

பஞ்ஹா மேஸா குஸலேஹி சிந்திதா’’தி. (பரி. 481);

அயஞ்ஹி பஞ்ஹோ இமமத்த²ம் ஸந்தா⁴ய வுத்தோதி. ஏவம் பிட்டி²ஸமயசதுக்கம் வேதி³தப்³ப³ம்.

ஜேட்ட²மூலபுண்ணமாஸியா பன பச்சி²மபாடிபத³தி³வஸதோ பட்டா²ய யாவ கத்திகபுண்ணமா, இமே பஞ்ச மாஸா குச்சி²ஸமயோ நாம. ஏதஸ்மிஞ்ஹி அந்தரே வுத்தனயேன ஸதுப்பாத³ம் கத்வா அஞ்ஞாதகஅப்பவாரிதட்டா²னதோ வஸ்ஸிகஸாடிகசீவரம் நிப்பா²தே³ந்தஸ்ஸ வத்தபே⁴தே³ து³க்கடம். யே மனுஸ்ஸா புப்³பே³பி வஸ்ஸிகஸாடிகசீவரம் தே³ந்தி, இமே பன ஸசேபி அத்தனோ அஞ்ஞாதகஅப்பவாரிதா ஹோந்தி, வத்தபே⁴தோ³ நத்தி², தேஸு ஸதுப்பாத³கரணஸ்ஸ அனுஞ்ஞாதத்தா. விஞ்ஞதிம் கத்வா நிப்பா²தே³ந்தஸ்ஸ அஞ்ஞாதகவிஞ்ஞத்திஸிக்கா²பதே³ன நிஸ்ஸக்³கி³யம் பாசித்தியம். இத³ம் பன பகதியா வஸ்ஸிகஸாடிகதா³யகேஸுபி ஹோதியேவ. வுத்தனயேனேவ ஸதுப்பாத³ம் கத்வா ஞாதகபவாரிதட்டா²னதோ நிப்பா²தே³ந்தஸ்ஸ இமினா ஸிக்கா²பதே³ன அனாபத்தி. விஞ்ஞத்திம் கத்வா நிப்பா²தே³ந்தஸ்ஸ அஞ்ஞாதகவிஞ்ஞத்திஸிக்கா²பதே³ன அனாபத்தி. ‘‘ந வத்தப்³பா³ தே³த² மே’’தி இத³ஞ்ஹி பரியேஸனகாலே அஞ்ஞாதகஅப்பவாரிதேயேவ ஸந்தா⁴ய வுத்தம். ஏவம் குச்சி²ஸமயசதுக்கம் வேதி³தப்³ப³ம்.

நக்³கோ³ காயம் ஓவஸ்ஸாபேதி, ஆபத்தி து³க்கடஸ்ஸாதி ஏத்த² உத³கபு²ஸிதக³ணனாய அகத்வா ந்ஹானபரியோஸானவஸேன பயோகே³ பயோகே³ து³க்கடேன காரேதப்³போ³. ஸோ ச கோ² விவடங்க³ணே ஆகாஸதோ பதிதஉத³கேனேவ ந்ஹாயந்தோ. ந்ஹானகோட்ட²கவாபிஆதீ³ஸு க⁴டேஹி ஆஸித்தஉத³கேன வா ந்ஹாயந்தஸ்ஸ அனாபத்தி.

வஸ்ஸம் உக்கட்³டி⁴யதீதி ஏத்த² ஸசே கதபரியேஸிதாய வஸ்ஸிகஸாடிகாய கி³ம்ஹானம் பச்சி²ம மாஸம் கே²பேத்வா புன வஸ்ஸானஸ்ஸ பட²மமாஸம் உக்கட்³டி⁴த்வா கி³ம்ஹானம் பச்சி²மமாஸமேவ கரோந்தி, வஸ்ஸிகஸாடிகா தோ⁴வித்வா நிக்கி²பிதப்³பா³. அனதி⁴ட்டி²தா அவிகப்பிதா த்³வே மாஸே பரிஹாரம் லப⁴தி, வஸ்ஸூபனாயிகதி³வஸே அதி⁴ட்டா²தப்³பா³. ஸசே ஸதிஸம்மோஸேன வா அப்பஹோனகபா⁴வேன வா அகதா ஹோதி, தே ச த்³வே மாஸே வஸ்ஸானஸ்ஸ ச சாதுமாஸந்தி ச² மாஸே பரிஹாரம் லப⁴தி. ஸசே பன கத்திகமாஸே கதி²னம் அத்த²ரீயதி, அபரேபி சத்தாரோ மாஸே லப⁴தி, ஏவம் த³ஸ மாஸா ஹோந்தி. ததோ பரம்பி ஸதியா பச்சாஸாய மூலசீவரம் கத்வா ட²பேந்தஸ்ஸ ஏகமாஸந்தி ஏவம் ஏகாத³ஸ மாஸே பரிஹாரம் லப⁴தி. ஸசே பன ஏகாஹத்³வீஹாதி³வஸேன யாவ த³ஸாஹானாக³தாய வஸ்ஸூபனாயிகாய அந்தோவஸ்ஸே வா லத்³தா⁴ சேவ நிட்டி²தா ச, கதா³ அதி⁴ட்டா²தப்³பா³தி ஏதம் அட்ட²கதா²ஸு ந விசாரிதம். லத்³த⁴தி³வஸதோ பட்டா²ய அந்தோத³ஸாஹே நிட்டி²தா பன தஸ்மிம்யேவ அந்தோத³ஸாஹே அதி⁴ட்டா²தப்³பா³. த³ஸாஹாதிக்கமே நிட்டி²தா தத³ஹேவ அதி⁴ட்டா²தப்³பா³. த³ஸாஹே அப்பஹோந்தே சீவரகாலம் நாதிக்கமேதப்³பா³தி அயம் நோ அத்தனோமதி. கஸ்மா? ‘‘அனுஜானாமி, பி⁴க்க²வே, திசீவரம் அதி⁴ட்டா²தும் ந விகப்பேதும்; வஸ்ஸிகஸாடிகம் வஸ்ஸானம் சாதுமாஸம் அதி⁴ட்டா²தும், ததோ பரம் விகப்பேது’’ந்தி (மஹாவ. 358) ஹி வுத்தம். தஸ்மா வஸ்ஸூபனாயிகதோ புப்³பே³ த³ஸாஹாதிக்கமேபி அனாபத்தி. ‘‘த³ஸாஹபரமம் அதிரேகசீவரம் தா⁴ரேதப்³ப³’’ந்தி (பாரா. 462) ச வுத்தம். தஸ்மா ஏகாஹத்³வீஹாதி³வஸேன யாவ த³ஸாஹானாக³தாய வஸ்ஸூபனாயிகாய அந்தோவஸ்ஸே வா லத்³தா⁴ சேவ நிட்டி²தா ச வுத்தனயேனேவ அந்தோத³ஸாஹே வா தத³ஹு வா அதி⁴ட்டா²தப்³பா³, த³ஸாஹே அப்பஹோந்தே சீவரகாலம் நாதிக்கமேதப்³பா³.

தத்த² ஸியா ‘‘வஸ்ஸானம் சாதுமாஸம் அதி⁴ட்டா²து’’ந்தி வசனதோ ‘‘சாதுமாஸப்³ப⁴ந்தரே யதா³ வா ததா³ வா அதி⁴ட்டா²தும் வட்டதீ’’தி. யதி³ ஏவம், ‘‘கண்டு³ப்படிச்சா²தி³ம் யாவ ஆபா³தா⁴ அதி⁴ட்டா²து’’ந்தி வுத்தம் ஸாபி, ச த³ஸாஹம் அதிக்காமேதப்³பா³ ஸியா. ஏவஞ்ச ஸதி ‘‘த³ஸாஹபரமம் அதிரேகசீவரம் தா⁴ரேதப்³ப³’’ந்தி இத³ம் விருஜ்ஜ²தி. தஸ்மா யதா²வுத்தமேவ க³ஹேதப்³ப³ம், அஞ்ஞம் வா அசலம் காரணம் லபி⁴த்வா ச²ட்³டே³தப்³ப³ம். அபிச குருந்தி³யம்பி நிஸ்ஸக்³கி³யாவஸானே வுத்தம் – ‘‘கதா³ அதி⁴ட்டா²தப்³பா³? லத்³த⁴தி³வஸதோ பட்டா²ய அந்தோத³ஸாஹே நிட்டி²தா பன தஸ்மிம்யேவ அந்தோத³ஸாஹே அதி⁴ட்டா²தப்³பா³. யதி³ நப்பஹோதி யாவ கத்திகபுண்ணமா பரிஹாரம் லப⁴தீ’’தி.

630. அச்சி²ன்னசீவரஸ்ஸாதி ஏதம் வஸ்ஸிகஸாடிகமேவ ஸந்தா⁴ய வுத்தம். தேஸஞ்ஹி நக்³கா³னம் காயோவஸ்ஸாபனே அனாபத்தி. ஏத்த² ச மஹக்³க⁴வஸ்ஸிகஸாடிகம் நிவாஸேத்வா ந்ஹாயந்தஸ்ஸ சோருபத்³த³வோ ஆபதா³ நாம. ஸேஸமேத்த² உத்தானமேவ.

ச²ஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

வஸ்ஸிகஸாடிகஸிக்கா²பத³வண்ணனா நிட்டி²தா.

5. சீவரஅச்சி²ந்த³னஸிக்கா²பத³வண்ணனா

631. தேன ஸமயேனாதி சீவரஅச்சி²ந்த³னஸிக்கா²பத³ம். தத்த² யம்பி த்யாஹந்தி யம்பி தே அஹம். ஸோ கிர ‘‘மம பத்தசீவரஉபாஹனபச்சத்த²ரணானி வஹந்தோ மயா ஸத்³தி⁴ம் சாரிகம் பக்கமிஸ்ஸதீ’’தி அதா³ஸி. தேனேவமாஹ. அச்சி²ந்தீ³தி ப³லக்காரேன அக்³க³ஹேஸி, ஸகஸஞ்ஞாய க³ஹிதத்தா பனஸ்ஸ பாராஜிகம் நத்தி², கிலமேத்வா க³ஹிதத்தா ஆபத்தி பஞ்ஞத்தா.

633. ஸயம் அச்சி²ந்த³தி நிஸ்ஸக்³கி³யம் பாசித்தியந்தி ஏகம் சீவரம் ஏகாப³த்³தா⁴னி ச ப³ஹூனி அச்சி²ந்த³தோ ஏகா ஆபத்தி. ஏகதோ அப³த்³தா⁴னி விஸும் விஸும் டி²தானி ச ப³ஹூனி அச்சி²ந்த³தோ ‘‘ஸங்கா⁴டிம் ஆஹர, உத்தராஸங்க³ம் ஆஹரா’’தி ஏவம் ஆஹராபயதோ ச வத்து²க³ணனாய ஆபத்தியோ. ‘‘மயா தி³ன்னானி ஸப்³பா³னி ஆஹரா’’தி வத³தோபி ஏகவசனேனேவ ஸம்ப³ஹுலா ஆபத்தியோ.

அஞ்ஞம் ஆணாபேதி ஆபத்தி து³க்கடஸ்ஸாதி ‘‘சீவரம் க³ண்ஹா’’தி ஆணாபேதி, ஏகம் து³க்கடம். ஆணத்தோ ப³ஹூனி க³ண்ஹாதி, ஏகம் பாசித்தியம் ‘‘ஸங்கா⁴டிம் க³ண்ஹ, உத்தராஸங்க³ம் க³ண்ஹா’’தி வத³தோ வாசாய வாசாய து³க்கடம். ‘‘மயா தி³ன்னானி ஸப்³பா³னி க³ண்ஹா’’தி வத³தோ ஏகவாசாய ஸம்ப³ஹுலா ஆபத்தியோ.

634. அஞ்ஞம் பரிக்கா²ரந்தி விகப்பனுபக³பச்சி²மசீவரம் ட²பேத்வா யம் கிஞ்சி அந்தமஸோ ஸூசிம்பி. வேடே²த்வா ட²பிதஸூசீஸுபி வத்து²க³ணனாய து³க்கடானி. ஸிதி²லவேடி²தாஸு ஏவம். கா³ள்ஹம் கத்வா ப³த்³தா⁴ஸு பன ஏகமேவ து³க்கடந்தி மஹாபச்சரியம் வுத்தம். ஸூசிக⁴ரே பக்கி²த்தாஸுபி ஏஸேவ நயோ. த²விகாய பக்கி²பித்வா ஸிதி²லப³த்³த⁴ கா³ள்ஹப³த்³தே⁴ஸு திகடுகாதீ³ஸு பே⁴ஸஜ்ஜேஸுபி ஏஸேவ நயோ.

635. ஸோ வா தே³தீதி ‘‘ப⁴ந்தே, தும்ஹாகம்யேவ இத³ம் ஸாருப்ப’’ந்தி ஏவம் வா தே³தி, அத² வா பன ‘‘ஆவுஸோ, மயம் துய்ஹம் ‘வத்தபடிபத்திம் கரிஸ்ஸதி, அம்ஹாகம் ஸந்திகே உபஜ்ஜ²ம் க³ண்ஹிஸ்ஸதி, த⁴ம்மம் பரியாபுணிஸ்ஸதீ’தி சீவரம் அத³ம்ஹ, ஸோ தா³னி த்வம் ந வத்தம் கரோஸி, ந உபஜ்ஜ²ம் க³ண்ஹாஸி, ந த⁴ம்மம் பரியாபுணாஸீ’’தி ஏவமாதீ³னி வுத்தோ ‘‘ப⁴ந்தே, சீவரத்தா²ய மஞ்ஞே ப⁴ணத², இத³ம் வோ சீவர’’ந்தி தே³தி, ஏவம்பி ஸோ வா தே³தி. தி³ஸாபக்கந்தம் வா பன த³ஹரம் ‘‘நிவத்தேத² ந’’ந்தி ப⁴ணதி, ஸோ ந நிவத்ததி. சீவரம் க³ஹேத்வா ருந்த⁴தா²தி, ஏவம் சே நிவத்ததி, ஸாது⁴. ஸசே ‘‘பத்தசீவரத்தா²ய மஞ்ஞே தும்ஹே ப⁴ணத², க³ண்ஹத² ந’’ந்தி தே³தி. ஏவம்பி ஸோ வா தே³தி, விப்³ப⁴ந்தம் வா தி³ஸ்வா ‘‘மயம் துய்ஹம் ‘வத்தம் கரிஸ்ஸதீ’தி பத்தசீவரம் அத³ம்ஹ, ஸோ தா³னி த்வம் விப்³ப⁴மித்வா சரஸீ’’தி வத³தி. இதரோ ‘‘க³ண்ஹத² தும்ஹாகம் பத்தசீவர’’ந்தி தே³தி, ஏவம்பி ஸோ வா தே³தி. ‘‘மம ஸந்திகே உபஜ்ஜ²ம் க³ண்ஹந்தஸ்ஸேவ தே³மி, அஞ்ஞத்த² க³ண்ஹந்தஸ்ஸ ந தே³மி. வத்தம் கரோந்தஸ்ஸேவ தே³மி, அகரோந்தஸ்ஸ ந தே³மி, த⁴ம்மம் பரியாபுணந்தஸ்ஸேவ தே³மி, அபரியாபுணந்தஸ்ஸ ந தே³மி, அவிப்³ப⁴மந்தஸ்ஸேவ தே³மி, விப்³ப⁴மந்தஸ்ஸ ந தே³மீ’’தி ஏவம் பன தா³தும் ந வட்டதி, த³த³தோ து³க்கடம். ஆஹராபேதும் பன வட்டதி. சஜித்வா தி³ன்னம் அச்சி²ந்தி³த்வா க³ண்ஹந்தோ ப⁴ண்ட³க்³கே⁴ன காரேதப்³போ³. ஸேஸமேத்த² உத்தானமேவாதி.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மவசீகம்மம், அகுஸலசித்தம், து³க்க²வேத³னந்தி.

சீவரஅச்சி²ந்த³னஸிக்கா²பத³வண்ணனா நிட்டி²தா.

6. ஸுத்தவிஞ்ஞத்திஸிக்கா²பத³வண்ணனா

636. தேன ஸமயேனாதி ஸுத்தவிஞ்ஞத்திஸிக்கா²பத³ம். தத்த² கோ²மந்தி கோ²மவாகேஹி கதஸுத்தம். கப்பாஸிகந்தி கப்பாஸதோ நிப்³ப³த்தம். கோஸேய்யந்தி கோஸியம்ஸூஹி கந்தித்வா கதஸுத்தம். கம்ப³லந்தி ஏளகலோமஸுத்தம். ஸாணந்தி ஸாணவாகஸுத்தம். ப⁴ங்க³ந்தி பாடேக்கம் வாகஸுத்தமேவாதி ஏகே. ஏதேஹி பஞ்சஹி மிஸ்ஸேத்வா கதஸுத்தம் பன ‘‘ப⁴ங்க³’’ந்தி வேதி³தப்³ப³ம்.

வாயாபேதி பயோகே³ பயோகே³ து³க்கடந்தி ஸசே தந்தவாயஸ்ஸ துரிவேமாதீ³னி நத்தி², தானி ‘‘அரஞ்ஞதோ ஆஹரிஸ்ஸாமீ’’தி வாஸிம் வா ப²ரஸும் வா நிஸேதி, ததோ பட்டா²ய யம் யம் உபகரணத்தா²ய வா சீவரவாயனத்தா²ய வா கரோதி, ஸப்³ப³த்த² தந்தவாயஸ்ஸ பயோகே³ பயோகே³ பி⁴க்கு²ஸ்ஸ து³க்கடம். தீ³க⁴தோ வித³த்தி²மத்தே திரியஞ்ச ஹத்த²மத்தே வீதே நிஸ்ஸக்³கி³யம் பாசித்தியம். மஹாபச்சரியம் பன ‘‘யாவ பரியோஸானம் வாயாபேந்தஸ்ஸ ப²லகே ப²லகே நிஸ்ஸக்³கி³யம் பாசித்திய’’ந்தி வுத்தம். தம்பி இத³மேவ பமாணம் ஸந்தா⁴ய வுத்தந்தி வேதி³தப்³ப³ம். விகப்பனுபக³பச்சி²மஞ்ஹி சீவரஸங்க்²யம் க³ச்ச²தீதி.

அபிசேத்த² ஏவம் வினிச்ச²யோ வேதி³தப்³போ³ – ஸுத்தம் தாவ ஸாமம் விஞ்ஞாபிதம் அகப்பியம், ஸேஸம் ஞாதகாதி³வஸேன உப்பன்னம் கப்பியம். தந்தவாயோபி அஞ்ஞாதகஅப்பவாரிதோ விஞ்ஞத்தியா லத்³தோ⁴ அகப்பியோ, ஸேஸோ கப்பியோ. தத்த² அகப்பியஸுத்தம் அகப்பியதந்தவாயேன வாயாபேந்தஸ்ஸ புப்³பே³ வுத்தனயேன நிஸ்ஸக்³கி³யம். தேனேவ பன கப்பியஸுத்தம் வாயாபேந்தஸ்ஸ யதா² புப்³பே³ நிஸ்ஸக்³கி³யம், ஏவம் து³க்கடம். தேனேவ கப்பியம் அகப்பியஞ்ச ஸுத்தம் வாயாபேந்தஸ்ஸ யதி³ பச்சி²மசீவரப்பமாணேன ஏகோ பரிச்சே²தோ³ ஸுத்³த⁴கப்பியஸுத்தமயோ, ஏகோ அகப்பியஸுத்தமயோதி ஏவம் கேதா³ரப³த்³த⁴ம் விய சீவரம் ஹோதி, அகப்பியஸுத்தமயே பரிச்சே²தே³ பாசித்தியம், இதரஸ்மிம் ததே²வ து³க்கடம். யதி³ ததோ ஊனபரிச்சே²தா³ ஹோந்தி, அந்தமஸோ அச்சி²மண்ட³லப்பமாணாபி, ஸப்³ப³பரிச்சே²தே³ஸு பரிச்சே²த³க³ணனாய து³க்கடம். அத² ஏகந்தரிகேன வா ஸுத்தேன தீ³க⁴தோ வா கப்பியம் திரியம் அகப்பியம் கத்வா வீதம் ஹோதி, ப²லகே ப²லகே து³க்கடம். கப்பியதந்தவாயேனபி அகப்பியஸுத்தம் வாயாபேந்தஸ்ஸ யதா² புப்³பே³ நிஸ்ஸக்³கி³யம், ஏவம் து³க்கடம். தேனேவ கப்பியஞ்ச அகப்பியஞ்ச ஸுத்தம் வாயாபேந்தஸ்ஸ ஸசே பச்சி²மசீவரப்பமாணா ஊனகா வா அகப்பியஸுத்தபரிச்சே²தா³ ஹோந்தி, தேஸு பரிச்சே²த³க³ணனாய து³க்கடம். கப்பியஸுத்தபரிச்சே²தே³ஸு அனாபத்தி. அத² ஏகந்தரிகேன வா ஸுத்தேன தீ³க⁴தோ வா கப்பியம் திரியம் அகப்பியம் கத்வா வீதம் ஹோதி, ப²லகே ப²லகே து³க்கடம்.

யதி³ பன த்³வே தந்தவாயா ஹோந்தி, ஏகோ கப்பியோ ஏகோ அகப்பியோ, ஸுத்தஞ்ச அகப்பியம், தே சே வாரேன வினந்தி, அகப்பியதந்தவாயேன வீதே ப²லகே ப²லகே பாசித்தியம், ஊனதரே து³க்கடம். இதரேன வீதே உப⁴யத்த² து³க்கடம். ஸசே த்³வேபி வேமம் க³ஹேத்வா ஏகதோ வினந்தி, ப²லகே ப²லகே பாசித்தியம். அத² ஸுத்தம் கப்பியம், சீவரஞ்ச கேதா³ரப³த்³தா⁴தீ³ஹி ஸபரிச்சே²த³ம், அகப்பியதந்தவாயேன வீதே பரிச்சே²தே³ பரிச்சே²தே³ து³க்கடம், இதரேன வீதே அனாபத்தி. ஸசே த்³வேபி வேமம் க³ஹேத்வா ஏகதோ வினந்தி, ப²லகே ப²லகே து³க்கடம். அத² ஸுத்தம்பி கப்பியஞ்ச அகப்பியஞ்ச, தே சே வாரேன வினந்தி, அகப்பியதந்தவாயேன அகப்பியஸுத்தமயேஸு பச்சி²மசீவரப்பமாணேஸு பரிச்சே²தே³ஸு வீதேஸு பரிச்சே²த³க³ணனாய பாசித்தியம். ஊனகதரேஸு கப்பியஸுத்தமயேஸு ச து³க்கடம். கப்பியதந்தவாயேன அகப்பியஸுத்தமயேஸு பமாணயுத்தேஸு வா ஊனகேஸு வா து³க்கடமேவ. கப்பியஸுத்தமயேஸு அனாபத்தி.

அத² ஏகந்தரிகேன வா ஸுத்தேன தீ³க⁴தோ வா அகப்பியம் திரியம் கப்பியம் கத்வா வினந்தி, உபோ⁴பி வா தே வேமம் க³ஹேத்வா ஏகதோ வினந்தி, அபரிச்சே²தே³ சீவரே ப²லகே ப²லகே து³க்கடம், ஸபரிச்சே²தே³ பரிச்சே²த³வஸேன து³க்கடானீதி. அயம் பன அத்தோ² மஹாஅட்ட²கதா²யம் அபாகடோ, மஹாபச்சரியாதீ³ஸு பாகடோ. இத⁴ ஸப்³பா³காரேனேவ பாகடோ.

ஸசே ஸுத்தம்பி கப்பியம், தந்தவாயோபி கப்பியோ ஞாதகப்பவாரிதோ வா மூலேன வா பயோஜிதோ, வாயாபனபச்சயா அனாபத்தி. த³ஸாஹாதிக்கமனபச்சயா பன ஆபத்திம் ரக்க²ந்தேன விகப்பனுபக³ப்பமாணமத்தே வீதே தந்தே டி²தம்யேவ அதி⁴ட்டா²தப்³ப³ம். த³ஸாஹாதிக்கமேன நிட்டா²பியமானஞ்ஹி நிஸ்ஸக்³கி³யம் ப⁴வேய்யாதி. ஞாதகாதீ³ஹி தந்தம் ஆரோபேத்வா ‘‘தும்ஹாகம், ப⁴ந்தே, இத³ம் சீவரம் க³ண்ஹேய்யாதா²’’தி நிய்யாதிதேபி ஏஸேவ நயோ.

ஸசே தந்தவாயோ ஏவம் பயோஜிதோ வா ஸயம் தா³துகாமோ வா ஹுத்வா ‘‘அஹம், ப⁴ந்தே, தும்ஹாகம் சீவரம் அஸுகதி³வஸே நாம வாயித்வா ட²பேஸ்ஸாமீ’’தி வத³தி, பி⁴க்கு² ச தேன பரிச்சி²ன்னதி³வஸதோ த³ஸாஹம் அதிக்காமேதி, நிஸ்ஸக்³கி³யம் பாசித்தியம்.

ஸசே பன தந்தவாயோ ‘‘அஹம் தும்ஹாகம் சீவரம் வாயித்வா ஸாஸனம் பேஸேஸ்ஸாமீ’’தி வத்வா ததே²வ கரோதி, தேன பேஸிதபி⁴க்கு² பன தஸ்ஸ பி⁴க்கு²னோ ந ஆரோசேதி, அஞ்ஞோ தி³ஸ்வா வா ஸுத்வா வா ‘‘தும்ஹாகம், ப⁴ந்தே, சீவரம் நிட்டி²த’’ந்தி ஆரோசேதி, ஏதஸ்ஸ ஆரோசனம் ந பமாணம். யதா³ பன தேன பேஸிதோயேவ ஆரோசேதி, தஸ்ஸ வசனம் ஸுததி³வஸதோ பட்டா²ய த³ஸாஹம் அதிக்காமயதோ நிஸ்ஸக்³கி³யம் பாசித்தியம்.

ஸசே தந்தவாயோ ‘‘அஹம் தும்ஹாகம் சீவரம் வாயித்வா கஸ்ஸசி ஹத்தே² பஹிணிஸ்ஸாமீ’’தி வத்வா ததே²வ கரோதி, சீவரம் க³ஹேத்வா க³தபி⁴க்கு² பன அத்தனோ பரிவேணே ட²பேத்வா தஸ்ஸ ந ஆரோசேதி, அஞ்ஞோ கோசி ப⁴ணதி ‘‘அபி, ப⁴ந்தே, அது⁴னா ஆப⁴தம் சீவரம் ஸுந்த³ர’’ந்தி? ‘‘குஹிம், ஆவுஸோ, சீவர’’ந்தி? ‘‘இத்த²ன்னாமஸ்ஸ ஹத்தே² பேஸித’’ந்தி. ஏதஸ்ஸபி வசனம் ந பமாணம். யதா³ பன ஸோ பி⁴க்கு² சீவரம் தே³தி, லத்³த⁴தி³வஸதோ பட்டா²ய த³ஸாஹம் அதிக்காமயதோ நிஸ்ஸக்³கி³யம் பாசித்தியம். ஸசே பன வாயாபனமூலம் அதி³ன்னம் ஹோதி, யாவ காகணிகமத்தம்பி அவஸிட்ட²ம், தாவ ரக்க²தி.

640. அனாபத்தி சீவரம் ஸிப்³பே³துந்தி சீவரஸிப்³ப³னத்தா²ய ஸுத்தம் விஞ்ஞாபேந்தஸ்ஸ அனாபத்தீதி அத்தோ². ஆயோகே³திஆதீ³ஸுபி நிமித்தத்தே² பு⁴ம்மவசனம், ஆயோகா³தி³னிமித்தம் விஞ்ஞாபேந்தஸ்ஸ அனாபத்தீதி வுத்தம் ஹோதி. ஸேஸமேத்த² உத்தானத்த²மேவாதி.

ச²ஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

ஸுத்தவிஞ்ஞத்திஸிக்கா²பத³வண்ணனா நிட்டி²தா.

7. மஹாபேஸகாரஸிக்கா²பத³வண்ணனா

641. தேன ஸமயேனாதி மஹாபேஸகாரஸிக்கா²பத³ம். தத்த² ஸுத்தம் தா⁴ரயித்வாதி ஸுத்தம் துலேத்வா பலபரிச்சே²த³ம் கத்வா. அப்பிதந்தி க⁴னம். ஸுவீதந்தி ஸுட்டு² வீதம், ஸப்³ப³ட்டா²னேஸு ஸமம் கத்வா வீதம். ஸுப்பவாயிதந்தி ஸுட்டு² பவாயிதம் ஸப்³ப³ட்டா²னேஸு ஸமம் கத்வா தந்தே பஸாரிதம். ஸுவிலேகி²தந்தி லேக²னியா ஸுட்டு² விலிகி²தம். ஸுவிதச்சி²தந்தி கோச்சே²ன ஸுட்டு² விதச்சி²தம், ஸுனித்³தோ⁴தந்தி அத்தோ². படிப³த்³த⁴ந்தி வேகல்லம். தந்தேதி தந்தே தீ³க⁴தோ பஸாரணேயேவ உபனேத்வாதி அத்தோ².

642. தத்ர சே ஸோ பி⁴க்கூ²தி யத்ர கா³மே வா நிக³மே வா தே தந்தவாயா தத்ர. விகப்பம் ஆபஜ்ஜேய்யாதி விஸிட்ட²ம் கப்பம் அதி⁴கவிதா⁴னம் ஆபஜ்ஜேய்ய. பாளியம் பன யேனாகாரேன விகப்பம் ஆபன்னோ ஹோதி, தம் த³ஸ்ஸேதும் ‘‘இத³ம் கோ², ஆவுஸோ’’திஆதி³ வுத்தம்.

த⁴ம்மம்பி ப⁴ணதீதி த⁴ம்மகத²ம்பி கதே²தி, ‘‘தஸ்ஸ வசனேன ஆயதம் வா வித்த²தம் வா அப்பிதம் வா’’தி ஸுத்தவட்³ட⁴னஆகாரமேவ த³ஸ்ஸேதி.

புப்³பே³ அப்பவாரிதோதி சீவரஸாமிகேஹி புப்³பே³ அப்பவாரிதோ ஹுத்வா. ஸேஸம் உத்தானத்த²மேவாதி.

ச²ஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம்,

திசித்தம், திவேத³னந்தி.

மஹாபேஸகாரஸிக்கா²பத³வண்ணனா நிட்டி²தா.

8. அச்சேகசீவரஸிக்கா²பத³வண்ணனா

646-9. தேன ஸமயேனாதி அச்சேகசீவரஸிக்கா²பத³ம். தத்த² த³ஸாஹானாக³தந்தி த³ஸ அஹானி த³ஸாஹம், தேன த³ஸாஹேன அனாக³தா த³ஸாஹானாக³தா, த³ஸாஹேன அஸம்பத்தாதி அத்தோ², தம் த³ஸாஹானாக³தம், அச்சந்தஸம்யோக³வஸேன பு⁴ம்மத்தே² உபயோக³வசனம், தேனேவஸ்ஸ பத³பா⁴ஜனே ‘‘த³ஸாஹானாக³தாயா’’தி வுத்தம். பவாரணாயாதி இத³ம் பன யா ஸா த³ஸாஹானாக³தாதி வுத்தா, தம் ஸரூபதோ த³ஸ்ஸேதும் அஸம்மோஹத்த²ம் அனுபயோக³வசனம்.

கத்திகதேமாஸிகபுண்ணமந்தி பட²மகத்திகதேமாஸிகபுண்ணமம். இதா⁴பி பட²மபத³ஸ்ஸ அனுபயோக³த்தா புரிமனயேனேவ பு⁴ம்மத்தே² உபயோக³வசனம். இத³ம் வுத்தம் ஹோதி – ‘‘‘யதோ பட்டா²ய பட²மமஹாபவாரணா த³ஸாஹானாக³தா’தி வுச்சதி, ஸசேபி தானி தி³வஸானி அச்சந்தமேவ பி⁴க்கு²னோ அச்சேகசீவரம் உப்பஜ்ஜேய்ய, ‘அச்சேகம் இத³’ந்தி ஜானமானேன பி⁴க்கு²னா ஸப்³ப³ம்பி படிக்³க³ஹேதப்³ப³’’ந்தி. தேன பவாரணாமாஸஸ்ஸ ஜுண்ஹபக்க²பஞ்சமிதோ படா²ய உப்பன்னஸ்ஸ சீவரஸ்ஸ நிதா⁴னகாலோ த³ஸ்ஸிதோ ஹோதி. காமஞ்சேஸ ‘‘த³ஸாஹபரமம் அதிரேகசீவரம் தா⁴ரேதப்³ப³’’ந்தி இமினாவ ஸித்³தோ⁴, அத்து²ப்பத்திவஸேன பன அபுப்³ப³ம் விய அத்த²ம் த³ஸ்ஸேத்வா ஸிக்கா²பத³ம் ட²பிதம்.

அச்சேகசீவரந்தி அச்சாயிகசீவரம் வுச்சதி, தஸ்ஸ பன அச்சாயிகபா⁴வம் த³ஸ்ஸேதும் ‘‘ஸேனாய வா க³ந்துகாமோ ஹோதீ’’திஆதி³ வுத்தம். தத்த² ஸத்³தா⁴தி இமினா ஸத்³தா⁴மத்தகமேவ த³ஸ்ஸிதம். பஸாதோ³தி இமினா ஸுப்பஸன்னா ப³லவஸத்³தா⁴. ஏதம் அச்சேகசீவரம் நாமாதி ஏதம் இமேஹி காரணேஹி தா³துகாமேன தூ³தம் வா பேஸேத்வா ஸயம் வா ஆக³ந்த்வா ‘‘வஸ்ஸாவாஸிகம் த³ஸ்ஸாமீ’’தி ஏவம் ஆரோசிதம் சீவரம் அச்சேகசீவரம் நாம ஹோதீ. ச²ட்டி²தோ பட்டா²ய பன உப்பன்னம் அனச்சேகசீவரம்பி பச்சுத்³த⁴ரித்வா ட²பிதசீவரம்பி ஏதம் பரிஹாரம் லப⁴தியேவ.

ஸஞ்ஞாணம் கத்வா நிக்கி²பிதப்³ப³ந்தி கிஞ்சி நிமித்தம் கத்வா ட²பேதப்³ப³ம். கஸ்மா ஏதம் வுத்தம்? யதி³ ஹி தம் புரே பவாரணாய விப⁴ஜந்தி. யேன க³ஹிதம், தேன சி²ன்னவஸ்ஸேன ந ப⁴விதப்³ப³ம். ஸசே பன ஹோதி, தம் சீவரம் ஸங்கி⁴கமேவ ஹோதி. ததோ ஸல்லக்கே²த்வா ஸுக²ம் தா³தும் ப⁴விஸ்ஸதீதி.

650. அச்சேகசீவரே அச்சேகசீவரஸஞ்ஞீதி ஏவமாதி³ விப⁴ஜித்வா க³ஹிதமேவ ஸந்தா⁴ய வுத்தம். ஸசே பன அவிப⁴த்தம் ஹோதி, ஸங்க⁴ஸ்ஸ வா ப⁴ண்டா³கா³ரே, சீவரஸமயாதிக்கமேபி அனாபத்தி. இதி அதிரேகசீவரஸ்ஸ த³ஸாஹம் பரிஹாரோ. அகதஸ்ஸ வஸ்ஸிகஸாடிகசீவரஸ்ஸ அனத்த²தே கதி²னே பஞ்ச மாஸா, வஸ்ஸே உக்கட்³டி⁴தே ச² மாஸா, அத்த²தே கதி²னே அபரே சத்தாரோ மாஸா. ஹேமந்தஸ்ஸ பச்சி²மே தி³வஸே மூலசீவராதி⁴ட்டா²னவஸேன அபரோபி ஏகோ மாஸோதி ஏகாத³ஸ மாஸா பரிஹாரோ. ஸதியா பச்சாஸாய மூலசீவரஸ்ஸ ஏகோ மாஸோ, அச்சேகசீவரஸ்ஸ அனத்த²தே கதி²னே ஏகாத³ஸதி³வஸாதி⁴கோ மாஸோ, அத்த²தே கதி²னே ஏகாத³ஸதி³வஸாதி⁴கா பஞ்ச மாஸா, ததோ பரம் ஏகதி³வஸம்பி பரிஹாரோ நத்தீ²தி வேதி³தப்³ப³ம்.

அனச்சேகசீவரேதி அச்சேகசீவரஸதி³ஸே அஞ்ஞஸ்மிம். ஸேஸமேத்த² உத்தானத்த²மேவாதி.

கதி²னஸமுட்டா²னம் – அகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

அச்சேகசீவரஸிக்கா²பத³வண்ணனா நிட்டி²தா.

9. ஸாஸங்கஸிக்கா²பத³வண்ணனா

652. தேன ஸமயேனாதி ஸாஸங்கஸிக்கா²பத³ம். தத்த² வுத்த²வஸ்ஸா ஆரஞ்ஞகேஸூதி தே புப்³பே³பி அரஞ்ஞேயேவ விஹரிம்ஸு. து³ப்³ப³லசீவரத்தா பன பச்சயவஸேன கா³மந்தஸேனாஸனே வஸ்ஸம் வஸித்வா நிட்டி²தசீவரா ஹுத்வா ‘‘இதா³னி நிப்பலிபோ³தா⁴ ஸமணத⁴ம்மம் கரிஸ்ஸாமா’’தி ஆரஞ்ஞகேஸு ஸேனாஸனேஸு விஹரந்தி. கத்திகசோரகாதி கத்திகமாஸே சோரா. பரிபாதேந்தீதி உபத்³த³வந்தி, தத்த² தத்த² ஆதா⁴வித்வா உத்தாஸேந்தி பலாபேந்தி. அந்தரக⁴ரே நிக்கி²பிதுந்தி அந்தோகா³மே நிக்கி²பிதும். ப⁴க³வா யஸ்மா பச்சயா நாம த⁴ம்மேன ஸமேன து³ல்லபா⁴, ஸல்லேக²வா ஹி பி⁴க்கு² மாதரம்பி விஞ்ஞாபேதும் ந ஸக்கோதி. தஸ்மா சீவரகு³த்தத்த²ம் அந்தரக⁴ரே நிக்கி²பிதும் அனுஜானாதி. பி⁴க்கூ²னம் பன அனுரூபத்தா அரஞ்ஞவாஸம் ந படிக்கி²பி.

653. உபவஸ்ஸம் கோ² பனாதி ஏத்த² உபவஸ்ஸந்தி உபவஸ்ஸ; உபவஸித்வாதி வுத்தம் ஹோதி. உபஸம்பஜ்ஜந்திஆதீ³ஸு விய ஹி ஏத்த² அனுனாஸிகோ த³ட்ட²ப்³போ³. வஸ்ஸம் உபக³ந்த்வா வஸித்வா சாதி அத்தோ². இமஸ்ஸ ச பத³ஸ்ஸ ‘‘ததா²ரூபேஸு பி⁴க்கு² ஸேனாஸனேஸு விஹரந்தோ’’தி இமினா ஸம்ப³ந்தோ⁴. கிம் வுத்தம் ஹோதி? வஸ்ஸம் உபக³ந்த்வா வஸித்வா ச ததோ பரம் பச்சி²மகத்திகபுண்ணமபரியோஸானகாலம் யானி கோ² பன தானி ஆரஞ்ஞகானி ஸேனாஸனானி ஸாஸங்கஸம்மதானி ஸப்படிப⁴யானி; ததா²ரூபேஸு பி⁴க்கு² ஸேனாஸனேஸு விஹரந்தோ ஆகங்க²மானோ திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பேய்யாதி. யஸ்மா பன யோ வஸ்ஸம் உபக³ந்த்வா யாவ பட²மகத்திகபுண்ணமம் வஸதி, ஸோ வுட்ட²வஸ்ஸானம் அப்³ப⁴ந்தரோ ஹோதி, தஸ்மா இத³ம் அதிக³ஹனம் ப்³யஞ்ஜனவிசாரணம் அகத்வா பத³பா⁴ஜனே கேவலம் சீவரனிக்கே²பாரஹம் புக்³க³லம் த³ஸ்ஸேதும் ‘‘வுட்ட²வஸ்ஸான’’ந்தி வுத்தம். தஸ்ஸாபி ‘‘பி⁴க்கு² ஸேனாஸனேஸு விஹரந்தோ’’தி இமினா ஸம்ப³ந்தோ⁴. அயஞ்ஹி ஏத்த² அத்தோ² ‘‘வுட்ட²வஸ்ஸானம் பி⁴க்கு² ஸேனாஸனேஸு விஹரந்தோ’’தி ஏவரூபானம் பி⁴க்கூ²னம் அப்³ப⁴ந்தரே யோ கோசி பி⁴க்கூ²தி வுத்தம் ஹோதி.

அரஞ்ஞலக்க²ணம் அதி³ன்னாதா³னவண்ணனாயம் வுத்தம். அயம் பன விஸேஸோ – ஸசே விஹாரோ பரிக்கி²த்தோ ஹோதி, பரிக்கி²த்தஸ்ஸ கா³மஸ்ஸ இந்த³கீ²லதோ அபரிக்கி²த்தஸ்ஸ பரிக்கே²பாரஹட்டா²னதோ பட்டா²ய யாவ விஹாரபரிக்கே²பா மினிதப்³ப³ம். ஸசே விஹாரோ அபரிக்கி²த்தோ ஹோதி, யம் ஸப்³ப³பட²மம் ஸேனாஸனம் வா ப⁴த்தஸாலா வா து⁴வஸன்னிபாதட்டா²னம் வா போ³தி⁴வா சேதியம் வா தூ³ரே சேபி ஸேனாஸனதோ ஹோதி, தம் பரிச்சே²த³ம் கத்வா மினிதப்³ப³ம். ஸசேபி ஆஸன்னே கா³மோ ஹோதி, விஹாரே டி²தேஹி க⁴ரமானுஸகானம் ஸத்³தோ³ ஸூயதி, பப்³ப³தனதீ³ஆதீ³ஹி பன அந்தரிதத்தா ந ஸக்கா உஜும் க³ந்தும், யோ சஸ்ஸ பகதிமக்³கோ³ ஹோதி, ஸசேபி நாவாய ஸஞ்சரிதப்³போ³, தேன மக்³கே³ன கா³மதோ பஞ்சத⁴னுஸதிகம் க³ஹேதப்³ப³ம். யோ ஆஸன்னகா³மஸ்ஸ அங்க³ஸம்பாத³னத்த²ம் ததோ ததோ மக்³க³ம் பித³ஹதி, அயம் ‘‘து⁴தங்க³சோரோ’’தி வேதி³தப்³போ³.

ஸாஸங்கஸம்மதானீதி ‘‘ஸாஸங்கானீ’’தி ஸம்மதானி; ஏவம் ஸஞ்ஞாதானீதி அத்தோ². பத³பா⁴ஜனே பன யேன காரணேன தானி ஸாஸங்கஸம்மதானி, தம் த³ஸ்ஸேதும் ‘‘ஆராமே ஆராமூபசாரே’’திஆதி³ வுத்தம்.

ஸஹ படிப⁴யேன ஸப்படிப⁴யானி, ஸன்னிஹிதப³லவப⁴யானீதி அத்தோ². பத³பா⁴ஜனே பன யேன காரணேன தானி ஸப்படிப⁴யானி; தம் த³ஸ்ஸேதும் ‘‘ஆராமே ஆராமூபசாரே’’திஆதி³ வுத்தம்.

ஸமந்தா கோ³சரகா³மே நிக்கி²பேய்யாதி ஆரஞ்ஞகஸ்ஸ ஸேனாஸனஸ்ஸ ஸமந்தா ஸப்³ப³தி³ஸாபா⁴கே³ஸு அத்தனா அபி⁴ருசிதே கோ³சரகா³மே ஸதியா அங்க³ஸம்பத்தியா நிக்கி²பேய்ய.

தத்ராயம் அங்க³ஸம்பத்தி – புரிமிகாய உபக³ந்த்வா மஹாபவாரணாய பவாரிதோ ஹோதி, இத³மேகம் அங்க³ம். ஸசே பச்சி²மிகாய வா உபக³தோ ஹோதி சி²ன்னவஸ்ஸோ வா, நிக்கி²பிதும் ந லப⁴தி. கத்திகமாஸோயேவ ஹோதி, இத³ம் து³தியம் அங்க³ம். கத்திகமாஸதோ பரம் ந லப⁴தி, பஞ்சத⁴னுஸதிகம் பச்சி²மமேவ பமாணயுத்தம் ஸேனாஸனம் ஹோதி, இத³ம் ததியம் அங்க³ம். ஊனப்பமாணே வா கா³வுததோ அதிரேகப்பமாணே வா ந லப⁴தி, யத்ர ஹி பிண்டா³ய சரித்வா புன விஹாரம் ப⁴த்தவேலாயம் ஸக்கா ஆக³ந்தும், ததே³வ இத⁴ அதி⁴ப்பேதம். நிமந்திதோ பன அத்³த⁴யோஜனம்பி யோஜனம்பி க³ந்த்வா வஸிதும் பச்சேதி, இத³மப்பமாணம். ஸாஸங்கஸப்படிப⁴யமேவ ஹோதி, இத³ம் சதுத்த²ம் அங்க³ம். அனாஸங்கஅப்படிப⁴யே ஹி அங்க³யுத்தேபி ஸேனாஸனே வஸந்தோ நிக்கி²பிதும் ந லப⁴தீதி.

அஞ்ஞத்ர பி⁴க்கு²ஸம்முதியாதி யா உதோ³ஸிதஸிக்கா²பதே³ கோஸம்ப³கஸம்முதி (பாரா. 475) அனுஞ்ஞாதா தஸ்ஸா ஸம்முதியா அஞ்ஞத்ர; ஸசே ஸா லத்³தா⁴ ஹோதி, சா²ரத்தாதிரேகம்பி விப்பவஸிதும் வட்டதி.

புன கா³மஸீமம் ஓக்கமித்வாதி ஸசே கோ³சரகா³மதோ புரத்தி²மாய தி³ஸாய ஸேனாஸனம்; அயஞ்ச பச்சி²மதி³ஸம் க³தோ ஹோதி, ஸேனாஸனம் ஆக³ந்த்வா ஸத்தமம் அருணம் உட்டா²பேதும் அஸக்கோந்தேன கா³மஸீமம்பி ஓக்கமித்வா ஸபா⁴யம் வா யத்த² கத்த²சி வா வஸித்வா சீவரப்பவத்திம் ஞத்வா பக்கமிதும் வட்டதீதி அத்தோ². ஏவம் அஸக்கோந்தேன தத்தே²வ டி²தேன பச்சுத்³த⁴ரிதப்³ப³ம், அதிரேகசீவரட்டா²னே ட²ஸ்ஸதீதி. ஸேஸம் உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, அகிரியா, நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

ஸாஸங்கஸிக்கா²பத³வண்ணனா நிட்டி²தா.

10. பரிணதஸிக்கா²பத³வண்ணனா

657. தேன ஸமயேனாதி பரிணதஸிக்கா²பத³ம். தத்த² பூக³ஸ்ஸாதி ஸமூஹஸ்ஸ; த⁴ம்மக³ணஸ்ஸாதி அத்தோ². படியத்தந்தி படியாதி³தம். ப³ஹூ ஸங்க⁴ஸ்ஸ ப⁴த்தாதி ஸங்க⁴ஸ்ஸ ப³ஹூனி ப⁴த்தானி அனேகானி லாப⁴முகா²னி; ந ஸங்க⁴ஸ்ஸ கேனசி பரிஹானீதி தீ³பேந்தி. ஓணோஜேதா²தி தே³த². கிம் பனேவம் வத்தும் வட்டதீதி கஸ்மா ந வட்டதி? அயஞ்ஹி அபி⁴ஹடபி⁴க்கா² அபி⁴ஹரித்வா ஏகஸ்மிம் ஓகாஸே ஸங்க⁴ஸ்ஸத்தா²ய படியத்தா அபி⁴ஹடபடியத்தே ச உத்³தி³ஸ்ஸ ட²பிதபா⁴கே³ ச பயுத்தவாசா நாம நத்தி².

658. ஸங்கி⁴கந்தி ஸங்க⁴ஸ்ஸ ஸந்தகம். ஸோ ஹி ஸங்க⁴ஸ்ஸ பரிணதத்தா ஹத்த²ம் அனாரூள்ஹோபி ஏகேன பரியாயேன ஸங்க⁴ஸ்ஸ ஸந்தகோ ஹோதி, பத³பா⁴ஜனே பன ‘‘ஸங்கி⁴கம் நாம ஸங்க⁴ஸ்ஸ தி³ன்னம் ஹோதி பரிச்சத்த’’ந்தி ஏவம் அத்து²த்³தா⁴ரவஸேன நிப்பரியாயதோவ ஸங்கி⁴கம் த³ஸ்ஸிதம். லாப⁴ந்தி படிலபி⁴தப்³ப³வத்து²ம் ஆஹ. தேனேவஸ்ஸ நித்³தே³ஸே ‘‘சீவரம்பீ’’திஆதி³ வுத்தம். பரிணதந்தி ஸங்க⁴ஸ்ஸ நின்னம் ஸங்க⁴ஸ்ஸ போணம் ஸங்க⁴ஸ்ஸ பப்³பா⁴ரம் ஹுத்வா டி²தம். யேன பன காரணேன ஸோ பரிணதோ ஹோதி, தம் த³ஸ்ஸேதும் ‘‘த³ஸ்ஸாம கரிஸ்ஸாமாதி வாசா பி⁴ன்னா ஹோதீ’’தி பத³பா⁴ஜனம் வுத்தம்.

659. பயோகே³ து³க்கடந்தி பரிணதலாப⁴ஸ்ஸ அத்தனோ பரிணாமனபயோகே³ து³க்கடம், படிலாபே⁴ன தஸ்மிம் ஹத்த²ம் ஆரூள்ஹே நிஸ்ஸக்³கி³யம். ஸசே பன ஸங்க⁴ஸ்ஸ தி³ன்னம் ஹோதி, தம் க³ஹேதும் ந வட்டதி, ஸங்க⁴ஸ்ஸேவ தா³தப்³ப³ம். யோபி ஆராமிகேஹி ஸத்³தி⁴ம் ஏகதோ கா²த³தி, ப⁴ண்ட³ம் அக்³கா⁴பேத்வா காரேதப்³போ³. பரிணதம் பன ஸஹத⁴ம்மிகானம் வா கி³ஹீனம் வா அந்தமஸோ மாதுஸந்தகம்பி ‘‘இத³ம் மய்ஹம் தே³ஹீ’’தி ஸங்க⁴ஸ்ஸ பரிணதபா⁴வம் ஞத்வா அத்தனோ பரிணாமேத்வா க³ண்ஹந்தஸ்ஸ நிஸ்ஸக்³கி³யம் பாசித்தியம். ‘‘இமஸ்ஸ பி⁴க்கு²னோ தே³ஹீ’’தி ஏவம் அஞ்ஞஸ்ஸ பரிணாமேந்தஸ்ஸ ஸுத்³தி⁴கபாசித்தியம். ஏகம் பத்தம் வா சீவரம் வா அத்தனோ, ஏகம் அஞ்ஞஸ்ஸ பரிணாமேதி, நிஸ்ஸக்³கி³யம் பாசித்தியஞ்சேவ ஸுத்³தி⁴கபாசித்தியஞ்ச. ஏஸேவ நயோ ப³ஹூஸு. வுத்தம்பி சேதம் –

‘‘நிஸ்ஸக்³கி³யேன ஆபத்திம், ஸுத்³தி⁴கேன பாசித்தியம்;

ஆபஜ்ஜேய்ய ஏகதோ;

பஞ்ஹா மேஸா குஸலேஹி சிந்திதா’’தி. (பரி. 480);

அயஞ்ஹி பரிணாமனம் ஸந்தா⁴ய வுத்தோ. யோபி வஸ்ஸிகஸாடிகஸமயே மாதுக⁴ரேபி ஸங்க⁴ஸ்ஸ பரிணதம் வஸ்ஸிகஸாடிகம் ஞத்வா அத்தனோ பரிணாமேதி, நிஸ்ஸக்³கி³யம் பாசித்தியம். பரஸ்ஸ பரிணாமேதி, ஸுத்³தி⁴கபாசித்தியம். மனுஸ்ஸா ‘‘ஸங்க⁴ப⁴த்தம் கரிஸ்ஸாமா’’தி ஸப்பிதேலாதீ³னி ஆஹரந்தி, கி³லானோ சேபி பி⁴க்கு² ஸங்க⁴ஸ்ஸ பரிணதபா⁴வம் ஞத்வா கிஞ்சி யாசதி, நிஸ்ஸக்³கி³யம் பாசித்தியமேவ. ஸசே பன ஸோ ‘‘தும்ஹாகம் ஸப்பிஆதீ³னி ஆப⁴டானி அத்தீ²’’தி புச்சி²த்வா ‘‘ஆம, அத்தீ²’’தி வுத்தே ‘‘மய்ஹம்பி தே³தா²’’தி வத³தி, வட்டதி. அதா²பி நம் குக்குச்சாயந்தம் உபாஸகா வத³ந்தி – ‘‘ஸங்கோ⁴பி அம்ஹேஹி தி³ன்னமேவ லப⁴தி; க³ண்ஹத², ப⁴ந்தே’’தி ஏவம்பி வட்டதி.

660. ஸங்க⁴ஸ்ஸ பரிணதம் அஞ்ஞஸங்க⁴ஸ்ஸாதி ஏகஸ்மிம் விஹாரே ஸங்க⁴ஸ்ஸ பரிணதம் அஞ்ஞம் விஹாரம் உத்³தி³ஸித்வா ‘‘அஸுகஸ்மிம் நாம மஹாவிஹாரே ஸங்க⁴ஸ்ஸ தே³தா²’’தி பரிணாமேதி.

சேதியஸ்ஸ வாதி ‘‘கிம் ஸங்க⁴ஸ்ஸ தி³ன்னேன, சேதியஸ்ஸபூஜம் கரோதா²’’தி ஏவம் சேதியஸ்ஸ வா பரிணாமேதி.

சேதியஸ்ஸ பரிணதந்தி ஏத்த² நியமேத்வா அஞ்ஞசேதியஸ்ஸத்தா²ய ரோபிதமாலாவச்ச²தோ அஞ்ஞசேதியம்ஹி புப்ப²ம்பி ஆரோபேதும் ந வட்டதி. ஏகஸ்ஸ சேதியஸ்ஸ பன ச²த்தம் வா படாகம் வா ஆரோபேத்வா டி²தம் தி³ஸ்வா ஸேஸம் அஞ்ஞஸ்ஸ சேதியஸ்ஸ தா³பேதும் வட்டதி.

புக்³க³லஸ்ஸ பரிணதந்தி அந்தமஸோ ஸுனக²ஸ்ஸாபி பரிணதம் ‘‘இமஸ்ஸ ஸுனக²ஸ்ஸ மா தே³ஹி, ஏதஸ்ஸ தே³ஹீ’’தி ஏவம் அஞ்ஞபுக்³க³லஸ்ஸ பரிணாமேதி, து³க்கடம். ஸசே பன தா³யகா ‘‘மயம் ஸங்க⁴ஸ்ஸ ப⁴த்தம் தா³துகாமா, சேதியஸ்ஸ பூஜம் காதுகாமா, ஏகஸ்ஸ பி⁴க்கு²னோ பரிக்கா²ரம் தா³துகாமா, தும்ஹாகம் ருசியா த³ஸ்ஸாம; ப⁴ணத², கத்த² தே³மா’’தி வத³ந்தி. ஏவம் வுத்தே தேன பி⁴க்கு²னா ‘‘யத்த² இச்ச²த², தத்த² தே³தா²’’தி வத்தப்³பா³. ஸசே பன கேவலம் ‘‘கத்த² தே³மா’’தி புச்ச²ந்தி, பாளியம் ஆக³தனயேனேவ வத்தப்³ப³ம். ஸேஸமேத்த² உத்தானத்த²மேவ.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மவசீகம்மம், அகுஸலசித்தம், திவேத³னந்தி.

ஸமந்தபாஸாதி³காய வினயஸம்வண்ணனாய