16. ஸாரிபுத்தஸுத்தவண்ணனா

962. ந மே தி³ட்டோ²தி ஸாரிபுத்தஸுத்தம், ‘‘தே²ரபஞ்ஹஸுத்த’’ந்திபி வுச்சதி. கா உப்பத்தி? இமஸ்ஸ ஸுத்தஸ்ஸ உப்பத்தி – ராஜக³ஹகஸ்ஸ ஸேட்டி²ஸ்ஸ சந்த³னக⁴டிகாய படிலாப⁴ம் ஆதி³ம் கத்வா தாய சந்த³னக⁴டிகாய கதஸ்ஸ பத்தஸ்ஸ ஆகாஸே உஸ்ஸாபனம் ஆயஸ்மதோ பிண்டோ³லபா⁴ரத்³வாஜஸ்ஸ இத்³தி⁴யா பத்தக்³க³ஹணம், தஸ்மிம் வத்து²ஸ்மிம் ஸாவகானம் இத்³தி⁴படிக்கே²போ, தித்தி²யானம் ப⁴க³வதா ஸத்³தி⁴ம் பாடிஹாரியம் கத்துகாமதா, பாடிஹாரியகரணம், ப⁴க³வதோ ஸாவத்தி²க³மனம், தித்தி²யானுப³ந்த⁴னம், ஸாவத்தி²யம் பஸேனதி³னோ பு³த்³தூ⁴பக³மனம் கண்ட³ம்ப³பாதுபா⁴வோ, சதுன்னம் பரிஸானம் தித்தி²யஜயத்த²ம் பாடிஹாரியகரணுஸ்ஸுக்கனிவாரணம், யமகபாடிஹாரியகரணம், கதபாடிஹாரியஸ்ஸ ப⁴க³வதோ தாவதிம்ஸப⁴வனக³மனம், தத்த² தேமாஸம் த⁴ம்மதே³ஸனா, ஆயஸ்மதா மஹாமோக்³க³ல்லானத்தே²ரேன யாசிதஸ்ஸ தே³வலோகதோ ஸங்கஸ்ஸனக³ரே ஓரோஹணந்தி இமானி வத்தூ²னி அந்தரந்தரே ச ஜாதகானி வித்தா²ரேத்வா யாவ த³ஸஸஹஸ்ஸசக்கவாளதே³வதாஹி பூஜியமானோ ப⁴க³வா மஜ்ஜே² மணிமயேன ஸோபானேன ஸங்கஸ்ஸனக³ரே ஓருய்ஹ ஸோபானகளேவரே அட்டா²ஸி –

‘‘யே ஜா²னப்பஸுதா தீ⁴ரா, நேக்க²ம்மூபஸமே ரதா;

தே³வாபி தேஸம் பிஹயந்தி, ஸம்பு³த்³தா⁴னம் ஸதீமத’’ந்தி. (த⁴. ப. 181) –

இமிஸ்ஸா த⁴ம்மபத³கா³தா²ய வுச்சமானாய வுத்தா. ஸோபானகளேவரே டி²தம் பன ப⁴க³வந்தம் ஸப்³ப³பட²மம் ஆயஸ்மா ஸாரிபுத்தோ வந்தி³, ததோ உப்பலவண்ணா பி⁴க்கு²னீ, அதா²பரோ ஜனகாயோ. தத்ர ப⁴க³வா சிந்தேஸி – ‘‘இமிஸ்ஸம் பரிஸதி மோக்³க³ல்லானோ இத்³தி⁴யா அக்³கோ³தி பாகடோ, அனுருத்³தோ⁴ தி³ப்³ப³சக்கு²னா, புண்ணோ த⁴ம்மகதி²கத்தேன, ஸாரிபுத்தம் பனாயம் பரிஸா ந கேனசி கு³ணேன ஏவம் அக்³கோ³தி ஜானாதி, யம்னூனாஹம் ஸாரிபுத்தம் பஞ்ஞாகு³ணேன பகாஸேய்ய’’ந்தி. அத² தே²ரம் பஞ்ஹம் புச்சி². தே²ரோ ப⁴க³வதா புச்சி²தம் புச்சி²தம் புது²ஜ்ஜனபஞ்ஹம், ஸேக்க²பஞ்ஹம், அஸேக்க²பஞ்ஹஞ்ச, ஸப்³ப³ம் விஸ்ஸஜ்ஜேஸி. ததா³ நம் ஜனோ ‘‘பஞ்ஞாய அக்³கோ³’’தி அஞ்ஞாஸி. அத² ப⁴க³வா ‘‘ஸாரிபுத்தோ ந இதா³னேவ பஞ்ஞாய அக்³கோ³, அதீதேபி பஞ்ஞாய அக்³கோ³’’தி ஜாதகம் ஆனேஸி.

அதீதே பரோஸஹஸ்ஸா இஸயோ வனமூலப²லாஹாரா பப்³ப³தபாதே³ வஸந்தி. தேஸம் ஆசரியஸ்ஸ ஆபா³தோ⁴ உப்பஜ்ஜி, உபட்டா²னானி வத்தந்தி. ஜேட்ட²ந்தேவாஸீ ‘‘ஸப்பாயபே⁴ஸஜ்ஜம் ஆஹரிஸ்ஸாமி, ஆசரியம் அப்பமத்தா உபட்ட²ஹதா²’’தி வத்வா மனுஸ்ஸபத²ம் அக³மாஸி. தஸ்மிம் அனாக³தேயேவ ஆசரியோ காலமகாஸி. தம் ‘‘இதா³னி காலம் கரிஸ்ஸதீ’’தி அந்தேவாஸிகா ஸமாபத்திமாரப்³ப⁴ புச்சி²ம்ஸு. ஸோ ஆகிஞ்சஞ்ஞாயதனஸமாபத்திம் ஸந்தா⁴யாஹ – ‘‘நத்தி² கிஞ்சீ’’தி, அந்தேவாஸினோ ‘‘நத்தி² ஆசரியஸ்ஸ அதி⁴க³மோ’’தி அக்³க³ஹேஸும். அத² ஜேட்ட²ந்தேவாஸீ பே⁴ஸஜ்ஜம் ஆதா³ய ஆக³ந்த்வா தம் காலகதம் தி³ஸ்வா ஆசரியம் ‘‘கிஞ்சி புச்சி²த்தா²’’தி ஆஹ. ஆம புச்சி²ம்ஹா, ‘‘நத்தி² கிஞ்சீ’’தி ஆஹ, ந கிஞ்சி ஆசரியேன அதி⁴க³தந்தி. நத்தி² கிஞ்சீதி வத³ந்தோ ஆசரியோ ஆகிஞ்சஞ்ஞாயதனம் பவேதே³ஸி, ஸக்காதப்³போ³ ஆசரியோதி.

‘‘பரோஸஹஸ்ஸம்பி ஸமாக³தானம்,

கந்தே³ய்யும் தே வஸ்ஸஸதம் அபஞ்ஞா;

ஏகோபி ஸேய்யோ புரிஸோ ஸபஞ்ஞோ,

யோ பா⁴ஸிதஸ்ஸ விஜானாதி அத்த²’’ந்தி. (ஜா. 1.1.99);

கதி²தே ச பன ப⁴க³வதா ஜாதகே ஆயஸ்மா ஸாரிபுத்தோ அத்தனோ ஸத்³தி⁴விஹாரிகானம் பஞ்சன்னம் பி⁴க்கு²ஸதானமத்தா²ய ஸப்பாயஸேனாஸனகோ³சரஸீலவதாதீ³னி புச்சி²தும் ‘‘ந மே தி³ட்டோ² இதோ புப்³பே³’’தி இமம் து²திகா³த²ம் ஆதி³ம் கத்வா அட்ட² கா³தா²யோ அபா⁴ஸி. தமத்த²ம் விஸ்ஸஜ்ஜேந்தோ ப⁴க³வா ததோ பரா ஸேஸகா³தா²தி.

தத்த² இதோ புப்³பே³தி இதோ ஸங்கஸ்ஸனக³ரே ஓதரணதோ புப்³பே³. வக்³கு³வதோ³தி ஸுந்த³ரவதோ³. துஸிதா க³ணிமாக³தோதி துஸிதகாயா சவித்வா மாதுகுச்சி²ம் ஆக³தத்தா துஸிதா ஆக³தோ, க³ணாசரியத்தா க³ணீ. ஸந்துட்ட²ட்டே²ன வா துஸிதஸங்கா²தா தே³வலோகா க³ணிம் ஆக³தோ துஸிதானம் வா அரஹந்தானம் க³ணிம் ஆக³தோதி.

963. து³தியகா³தா²ய ஸதே³வகஸ்ஸ லோகஸ்ஸ யதா² தி³ஸ்ஸதீதி ஸதே³வகஸ்ஸ லோகஸ்ஸ விய மனுஸ்ஸானம்பி தி³ஸ்ஸதி. யதா² வா தி³ஸ்ஸதீதி தச்ச²தோ அவிபரீததோ தி³ஸ்ஸதி சக்கு²மாதி உத்தமசக்கு². ஏகோதி பப்³ப³ஜ்ஜாஸங்கா²தாதீ³ஹி ஏகோ. ரதிந்தி நேக்க²ம்மரதிஆதி³ம்.

964. ததியகா³தா²ய ப³ஹூனமித⁴ ப³த்³தா⁴னந்தி இத⁴ ப³ஹூனம் க²த்தியாதீ³னம் ஸிஸ்ஸானம். ஸிஸ்ஸா ஹி ஆசரியே படிப³த்³த⁴வுத்தித்தா ‘‘ப³த்³தா⁴’’தி வுச்சந்தி அத்தி² பஞ்ஹேன ஆக³மந்தி அத்தி²கோ பஞ்ஹேன ஆக³தோம்ஹி, அத்தி²கானம் வா பஞ்ஹேன ஆக³மனம், பஞ்ஹேன அத்தி² ஆக³மனம் வாதி.

965. சதுத்த²கா³தா²ய விஜிகு³ச்ச²தோதி ஜாதிஆதீ³ஹி அட்டீயதோ ரித்தமாஸனந்தி விவித்தம் மஞ்சபீட²ம். பப்³ப³தானம் கு³ஹாஸு வாதி பப்³ப³தகு³ஹாஸு வா ரித்தமாஸனம் ப⁴ஜதோதி ஸம்ப³ந்தி⁴தப்³ப³ம்.

966. பஞ்சமகா³தா²ய உச்சாவசேஸூதி ஹீனபணீதேஸு. ஸயனேஸூதி விஹாராதீ³ஸு ஸேனாஸனேஸு. கீவந்தோ தத்த² பே⁴ரவாதி கித்தகா தத்த² ப⁴யகாரணா. ‘‘குவந்தோ’’திபி பாடோ², கூஜந்தோதி சஸ்ஸ அத்தோ². ந பன புப்³பே³னாபரம் ஸந்தி⁴யதி.

967. ச²ட்ட²கா³தா²ய கதீ பரிஸ்ஸயாதி கித்தகா உபத்³த³வா. அக³தம் தி³ஸந்தி நிப்³பா³னம். தஞ்ஹி அக³தபுப்³ப³த்தா அக³தம் ததா² நித்³தி³ஸிதப்³ப³தோ தி³ஸா சாதி. தேன வுத்தம் ‘‘அக³தம் தி³ஸ’’ந்தி. அபி⁴ஸம்ப⁴வேதி அபி⁴ப⁴வேய்ய. பந்தம்ஹீதி பரியந்தே.

968-9. ஸத்தமகா³தா²ய க்யாஸ்ஸ ப்³யப்பத²யோ அஸ்ஸூதி கீதி³ஸானி தஸ்ஸ வசனானி அஸ்ஸு. அட்ட²மகா³தா²ய ஏகோதி³ நிபகோதி ஏகக்³க³சித்தோ பண்டி³தோ.

970. ஏவம் ஆயஸ்மதா ஸாரிபுத்தேன தீஹி கா³தா²ஹி ப⁴க³வந்தம் தோ²மேத்வா பஞ்சஹி கா³தா²ஹி – பஞ்சஸதானம் ஸிஸ்ஸானமத்தா²ய ஸேனாஸனகோ³சரஸீலவதாதீ³னி புச்சி²தோ ப⁴க³வா தமத்த²ம் பகாஸேதும் ‘‘விஜிகு³ச்ச²மானஸ்ஸா’’திஆதி³னா நயேன விஸ்ஸஜ்ஜனமாரத்³தோ⁴. தத்த² பட²மகா³தா²ய தாவத்தோ² – ஜாதிஆதீ³ஹி விஜிகு³ச்ச²மானஸ்ஸ ரித்தாஸனம் ஸயனம் ஸேவதோ சே ஸம்போ³தி⁴காமஸ்ஸ ஸாரிபுத்த, பி⁴க்கு²னோ யதி³த³ம் பா²ஸு யோ பா²ஸுவிஹாரோ யதா²னுத⁴ம்மம் யோ ச அனுத⁴ம்மோ, தம் தே பவக்கா²மி யதா² பஜானம் யதா² பஜானந்தோ வதே³ய்ய, ஏவம் வதா³மீதி.

971. து³தியகா³தா²ய பரியந்தசாரீதி ஸீலாதீ³ஸு சதூஸு பரியந்தேஸு சரமானோ. ட³ம்ஸாதி⁴பாதானந்தி பிங்க³லமக்கி²கானஞ்ச ஸேஸமக்கி²கானஞ்ச. ஸேஸமக்கி²கா ஹி ததோ ததோ அதி⁴பதித்வா கா²த³ந்தி, தஸ்மா ‘‘அதி⁴பாதா’’தி வுச்சந்தி. மனுஸ்ஸப²ஸ்ஸானந்தி சோராதி³ப²ஸ்ஸானம்.

972. ததியகா³தா²ய பரத⁴ம்மிகா நாம ஸத்த ஸஹத⁴ம்மிகவஜ்ஜா ஸப்³பே³பி பா³ஹிரகா. குஸலானுஏஸீதி குஸலத⁴ம்மே அன்வேஸமானோ.

973. சதுத்த²கா³தா²ய ஆதங்கப²ஸ்ஸேனாதி ரோக³ப²ஸ்ஸேன. ஸீதம் அதுண்ஹந்தி ஸீதஞ்ச உண்ஹஞ்ச. ஸோ தேஹி பு²ட்டோ² ப³ஹுதா⁴தி ஸோ தேஹி ஆதங்காதீ³ஹி அனேகேஹி ஆகாரேஹி பு²ட்டோ² ஸமானோபி. அனோகோதி அபி⁴ஸங்கா²ரவிஞ்ஞாணாதீ³னம் அனோகாஸபூ⁴தோ.

974. ஏவம் ‘‘பி⁴க்கு²னோ விஜிகு³ச்ச²தோ’’திஆதீ³ஹி தீஹி கா³தா²ஹி புட்ட²மத்த²ம் விஸ்ஸஜ்ஜேத்வா இதா³னி ‘‘க்யாஸ்ஸ ப்³யப்பத²யோ’’திஆதி³னா நயேன புட்ட²ம் விஸ்ஸஜ்ஜேந்தோ ‘‘தே²ய்யம் ந காரே’’திஆதி³மாஹ. தத்த² ப²ஸ்ஸேதி ப²ரேய்ய. யதா³விலத்தம் மனஸோ விஜஞ்ஞாதி யம் சித்தஸ்ஸ ஆவிலத்தம் விஜானேய்ய, தம் ஸப்³ப³ம் ‘‘கண்ஹஸ்ஸ பக்கோ²’’தி வினோத³யேய்ய.

975. மூலம்பி தேஸம் பலிக²ஞ்ஞ திட்டே²தி தேஸம் கோதா⁴திமானானம் யம் அவிஜ்ஜாதி³கம் மூலம், தம்பி பலிக²ணித்வா திட்டே²ய்ய. அத்³தா⁴ ப⁴வந்தோ அபி⁴ஸம்ப⁴வேய்யாதி ஏவம் பியப்பியம் அபி⁴ப⁴வந்தோ ஏகம்ஸேனேவ அபி⁴ப⁴வேய்ய, ந தத்ர ஸிதி²லம் பரக்கமேய்யாதி அதி⁴ப்பாயோ.

976. பஞ்ஞம் புரக்க²த்வாதி பஞ்ஞம் புப்³ப³ங்க³மம் கத்வா. கல்யாணபீதீதி கல்யாணாய பீதியா ஸமன்னாக³தோ. சதுரோ ஸஹேத² பரிதே³வத⁴ம்மேதி அனந்தரகா³தா²ய வுச்சமானே பரிதே³வனீயத⁴ம்மே ஸஹேய்ய.

977. கிம்ஸூ அஸிஸ்ஸாமீதி கிம் பு⁴ஞ்ஜிஸ்ஸாமி. குவம் வா அஸிஸ்ஸந்தி குஹிம் வா அஸிஸ்ஸாமி. து³க்க²ம் வத ஸேத்த² க்வஜ்ஜ ஸேஸ்ஸந்தி இமம் ரத்திம் து³க்க²ம் ஸயிம், அஜ்ஜ ஆக³மனரத்திம் கத்த² ஸயிஸ்ஸம். ஏதே விதக்கேதி ஏதே பிண்ட³பாதனிஸ்ஸிதே த்³வே, ஸேனாஸனனிஸ்ஸிதே த்³வேதி சத்தாரோ விதக்கே. அனிகேதசாரீதி அபலிபோ³த⁴சாரீ நித்தண்ஹசாரீ.

978. காலேதி பிண்ட³பாதகாலே பிண்ட³பாதஸங்கா²தம் அன்னம் வா சீவரகாலே சீவரஸங்கா²தம் வஸனம் வா லத்³தா⁴ த⁴ம்மேன ஸமேனாதி அதி⁴ப்பாயோ. மத்தம் ஸோ ஜஞ்ஞாதி படிக்³க³ஹணே ச பரிபோ⁴கே³ ச ஸோ பமாணம் ஜானேய்ய. இதா⁴தி ஸாஸனே, நிபாதமத்தமேவ வா ஏதம். தோஸனத்த²ந்தி ஸந்தோஸத்த²ம், ஏதத³த்த²ம் மத்தம் ஜானேய்யாதி வுத்தம் ஹோதி. ஸோ தேஸு கு³த்தோதி ஸோ பி⁴க்கு² தேஸு பச்சயேஸு கு³த்தோ. யதசாரீதி ஸம்யதவிஹாரோ, ரக்கி²திரியாபதோ² ரக்கி²தகாயவசீமனோத்³வாரோ சாதி வுத்தம் ஹோதி. ‘‘யதிசாரீ’’திபி பாடோ², ஸோயேவத்தோ². ருஸிதோதி ரோஸிதோ, க⁴ட்டிதோதி வுத்தம் ஹோதி.

979. ஜா²னானுயுத்தோதி அனுபன்னுப்பாத³னேன உப்பன்னாஸேவனேன ச ஜா²னே அனுயுத்தோ. உபேக்க²மாரப்³ப⁴ ஸமாஹிதத்தோதி சதுத்த²ஜ்ஜா²னுபேக்க²ம் உப்பாதே³த்வா ஸமாஹிதசித்தோ. தக்காஸயம் குக்குச்சியூபசி²ந்தே³தி காமவிதக்காதி³ம் தக்கஞ்ச, காமஸஞ்ஞாதி³ம் தஸ்ஸ தக்கஸ்ஸ ஆஸயஞ்ச, ஹத்த²குக்குச்சாதி³ம் குக்குச்சியஞ்ச உபச்சி²ந்தே³ய்ய.

980. சுதி³தோ வசீபி⁴ ஸதிமாபி⁴னந்தே³தி உபஜ்ஜா²யாதீ³ஹி வாசாஹி சோதி³தோ ஸமானோ ஸதிமா ஹுத்வா தம் சோத³னம் அபி⁴னந்தே³ய்ய. வாசம் பமுஞ்சே குஸலந்தி ஞாணஸமுட்டி²தம் வாசம் பமுஞ்சேய்ய. நாதிவேலந்தி அதிவேலம் பன வாசம் காலவேலஞ்ச ஸீலவேலஞ்ச அதிக்கந்தம் நப்பமுஞ்சேய்ய. ஜனவாத³த⁴ம்மாயாதி ஜனவாத³கதா²ய. ந சேதயேய்யாதி சேதனம் ந உப்பாதே³ய்ய.

981. அதா²பரந்தி அத² இதா³னி இதோ பரம்பி. பஞ்ச ரஜானீதி ரூபராகா³தீ³னி பஞ்ச ரஜானி. யேஸம் ஸதீமா வினயாய ஸிக்கே²தி யேஸம் உபட்டி²தஸ்ஸதி ஹுத்வா வினயனத்த²ம் திஸ்ஸோ ஸிக்கா² ஸிக்கே²ய்ய. ஏவம் ஸிக்க²ந்தோ ஹி ரூபேஸு…பே… ப²ஸ்ஸேஸு ஸஹேத² ராக³ம், ந அஞ்ஞேதி.

982. ததோ ஸோ தேஸம் வினயாய ஸிக்க²ந்தோ அனுக்கமேன – ஏதேஸு த⁴ம்மேஸூதி கா³தா². தத்த² ஏதேஸூதி ரூபாதீ³ஸு. காலேன ஸோ ஸம்மா த⁴ம்மம் பரிவீமம்ஸமானோதி ஸோ பி⁴க்கு² ய்வாயம் ‘‘உத்³த⁴தே சித்தே ஸமாதி⁴ஸ்ஸ காலோ’’திஆதி³னா நயேன காலோ வுத்தோ, தேன காலேன ஸப்³ப³ம் ஸங்க²தத⁴ம்மம் அனிச்சாதி³னயேன பரிவீமம்ஸமானோ. ஏகோதி³பூ⁴தோ விஹனே தமம் ஸோதி ஸோ ஏகக்³க³சித்தோ ஸப்³ப³ம் மோஹாதி³தமம் விஹனேய்ய. நத்தி² ஏத்த² ஸம்ஸயோ. ஸேஸம் ஸப்³ப³த்த² பாகடமேவ.

ஏவம் ப⁴க³வா அரஹத்தனிகூடேன தே³ஸனம் நிட்டா²பேஸி. தே³ஸனாபரியோஸானே பஞ்சஸதா பி⁴க்கூ² அரஹத்தம் பத்தா, திம்ஸகோடிஸங்க்²யானஞ்ச தே³வமனுஸ்ஸானம் த⁴ம்மாபி⁴ஸமயோ அஹோஸீதி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய ஸாரிபுத்தஸுத்தவண்ணனா நிட்டி²தா.

நிட்டி²தோ ச சதுத்தோ² வக்³கோ³ அத்த²வண்ணனானயதோ, நாமேன

அட்ட²கவக்³கோ³தி.