5. இந்த்³ரியஸமோதா⁴னவண்ணனா

204. இதா³னி ஸமாதி⁴ம் பா⁴வயதோ விபஸ்ஸனம் பா⁴வயதோ ச இந்த்³ரியஸமோதா⁴னம் த³ஸ்ஸேதுகாமோ பட²மம் தாவ உபட்டா²னகோஸல்லப்பபே⁴த³ம் நித்³தி³ஸிதும் புது²ஜ்ஜனோ ஸமாதி⁴ம் பா⁴வேந்தோதிஆதி³மாஹ. தத்த² புது²ஜ்ஜனோ ஸமாதி⁴ம் பா⁴வேந்தோதி நிப்³பே³த⁴பா⁴கி³யம் ஸமாதி⁴ம் பா⁴வேந்தோ. ஸேக்க²ஸ்ஸ வீதராக³ஸ்ஸ ச பன லோகுத்தரோபி ஸமாதி⁴ லப்³ப⁴தி. ஆவஜ்ஜிதத்தாதி கஸிணாதி³னிமித்தஸ்ஸ ஆவஜ்ஜிதத்தா, கஸிணாதி³பரிகம்மம் கத்வா தத்த² உப்பாதி³தனிமித்தத்தாதி வுத்தம் ஹோதி. ஆரம்மணூபட்டா²னகுஸலோதி தஸ்ஸ உப்பாதி³தஸ்ஸ நிமித்தஸ்ஸேவ உபட்டா²னே குஸலோ. ஸமத²னிமித்தூபட்டா²னகுஸலோதி அச்சாரத்³த⁴வீரியதாதீ³ஹி உத்³த⁴தே சித்தே பஸ்ஸத்³தி⁴ஸமாதி⁴உபேக்கா²ஸம்போ³ஜ்ஜ²ங்க³பா⁴வனாவஸேன சித்தோபஸமனிமித்தஸ்ஸ உபட்டா²னே குஸலோ. பக்³க³ஹனிமித்தூபட்டா²னகுஸலோதி அதிஸிதி²லவீரியதாதீ³ஹி லீனே சித்தே த⁴ம்மவிசயவீரியபீதிஸம்போ³ஜ்ஜ²ங்க³பா⁴வனாவஸேன சித்தபக்³க³ஹனிமித்தஸ்ஸ உபட்டா²னே குஸலோ. அவிக்கே²பூபட்டா²னகுஸலோதி அனுத்³த⁴தாலீனசித்தஸ்ஸ ஸம்பயுத்தஸ்ஸ ஸமாதி⁴ஸ்ஸ உபட்டா²னே குஸலோ. ஓபா⁴ஸூபட்டா²னகுஸலோதி பஞ்ஞாபயோக³மந்த³தாய நிரஸ்ஸாதே³ சித்தே அட்ட²ஸம்வேக³வத்து²பச்சவேக்க²ணேன சித்தம் ஸம்வேஜேத்வா ஞாணோபா⁴ஸஸ்ஸ உபட்டா²னே குஸலோ. அட்ட² ஸம்வேக³வத்தூ²னி நாம ஜாதிஜராப்³யாதி⁴மரணானி சத்தாரி, அபாயது³க்க²ம் பஞ்சமம், அதீதே வட்டமூலகம் து³க்க²ம், அனாக³தே வட்டமூலகம் து³க்க²ம், பச்சுப்பன்னே ஆஹாரபரியேட்டி²மூலகம் து³க்க²ந்தி. ஸம்பஹம்ஸனூபட்டா²னகுஸலோதி உபஸமஸுகா²னதி⁴க³மேன நிரஸ்ஸாதே³ சித்தே பு³த்³த⁴த⁴ம்மஸங்க⁴கு³ணானுஸ்ஸரணேன சித்தம் பஸாதே³ந்தோ ஸம்பஹம்ஸனஸ்ஸ உபட்டா²னே குஸலோ. உபேக்கூ²பட்டா²னகுஸலோதி உத்³த⁴தாதி³தோ³ஸவிரஹிதே சித்தே நிக்³க³ஹபக்³க³ஹாதீ³ஸு ப்³யாபாராபா⁴வகரணேன உபேக்கா²ய உபட்டா²னே குஸலோ. ஸேக்கோ²தி திஸ்ஸோ ஸிக்கா² ஸிக்க²தீதி ஸேக்கோ². ஏகத்தூபட்டா²னகுஸலோதி ஸக்காயதி³ட்டா²தீ³னம் பஹீனத்தா நேக்க²ம்மாதி³னோ ஏகத்தஸ்ஸ உபட்டா²னே குஸலோ.

வீதராகோ³தி ஸப்³ப³ஸோ பஹீனராக³த்தா வீதராகோ³ கீ²ணாஸவோ. ஞாணூபட்டா²னகுஸலோதி அரஹா த⁴ம்மேஸு விக³தஸம்மோஹத்தா தத்த² தத்த² அஸம்மோஹஞாணஸ்ஸ உபட்டா²னே குஸலோ. விமுத்தூபட்டா²னகுஸலோதி அரஹத்தப²லவிமுத்தியா உபட்டா²னே குஸலோ. விமுத்தீதி ஹி ஸப்³ப³கிலேஸேஹி விமுத்தத்தா அரஹத்தப²லவிமுத்தி அதி⁴ப்பேதா.

205. விபஸ்ஸனாபா⁴வனாய உபட்டா²னானுபட்டா²னேஸு அனிச்சதோதிஆதீ³னி நிச்சதோதிஆதீ³னி ச ஸீலகதா²யம் வுத்தனயேனேவ வேதி³தப்³பா³னி. பாட²தோ பன ‘‘ஆயூஹனானுபட்டா²னகுஸலோ விபரிணாமூபட்டா²னகுஸலோ அனிமித்தூபட்டா²னகுஸலோ நிமித்தானுபட்டா²னகுஸலோ அப்பணிஹிதூபட்டா²னகுஸலோ பணிதி⁴அனுபட்டா²னகுஸலோ அபி⁴னிவேஸானுபட்டா²னகுஸலோ’’தி ஏதேஸு ஸாமிவசனேன ஸமாஸபத³ச்சே²தோ³ காதப்³போ³. ஸேஸேஸு பன நிஸ்ஸக்கவசனேன பாடோ².

206. ஸுஞ்ஞதூபட்டா²னகுஸலோதி பனேத்த² ஸுஞ்ஞதோ உபட்டா²னகுஸலோதி வா ஸுஞ்ஞதாய உபட்டா²னகுஸலோதி வா பத³ச்சே²தோ³ காதப்³போ³. யஸ்மா பன நிப்³பி³தா³விராக³னிரோத⁴படினிஸ்ஸக்³கா³னுபஸ்ஸனா அதி⁴பஞ்ஞாத⁴ம்மவிபஸ்ஸனா யதா²பூ⁴தஞாணத³ஸ்ஸனம் படிஸங்கா²னுபஸ்ஸனா விவட்டனானுபஸ்ஸனாதி இமா அட்ட² மஹாவிபஸ்ஸனா அத்தனோ ஸபா⁴வவிஸேஸேன விஸேஸிதா, ந ஆரம்மணவிஸேஸேன, தஸ்மா இமாஸம் அட்ட²ன்னம் ‘‘அனிச்சதோ உபட்டா²னகுஸலோ ஹோதீ’’திஆதீ³னி வசனானி விய ‘‘நிப்³பி³தா³தோ உபட்டா²னகுஸலோ ஹோதீ’’திஆதீ³னி வசனானி ந யுஜ்ஜந்தி. தஸ்மா ஏவ இமா அட்ட² ந யோஜிதா. ஆதீ³னவானுபஸ்ஸனா பன ‘‘ஸுஞ்ஞதூபட்டா²னகுஸலோ ஹோதி, அபி⁴னிவேஸானுபட்டா²னகுஸலோ ஹோதீ’’தி இமினா யுக³லகவசனேனேவ அத்த²தோ ‘‘ஆதீ³னவதோ உபட்டா²னகுஸலோ ஹோதி, ஆலயாபி⁴னிவேஸானுபட்டா²னகுஸலோ ஹோதீ’’தி யோஜிதாவ ஹோதீதி ஸரூபேன ந யோஜிதா. இதி புரிமா ச அட்ட², அயஞ்ச ஆதீ³னவானுபஸ்ஸனாதி அட்டா²ரஸஸு மஹாவிபஸ்ஸனாஸு இமா நவ அயோஜேத்வா இதரா ஏவ நவ யோஜிதாதி வேதி³தப்³பா³. ஞாணூபட்டா²னகுஸலோதி ஸேக்கோ² விபஸ்ஸனூபக்கிலேஸானம் அபா⁴வதோ விபஸ்ஸனாபா⁴வனாய ஞாணஸ்ஸ உபட்டா²னே குஸலோ. ஸமாதி⁴பா⁴வனாய பன நிகந்திஸப்³பா⁴வதோ ஞாணூபட்டா²னே குஸலோதி ந வுத்தோ.

விஸஞ்ஞோகூ³பட்டா²னகுஸலோதி ‘‘காமயோக³விஸஞ்ஞோகோ³ ப⁴வயோக³விஸஞ்ஞோகோ³ தி³ட்டி²யோக³விஸஞ்ஞோகோ³ அவிஜ்ஜாயோக³விஸஞ்ஞோகோ³’’தி (தீ³. நி. 3.312) சதுதா⁴ வுத்தஸ்ஸ விஸஞ்ஞோக³ஸ்ஸ உபட்டா²னே குஸலோ. ஸஞ்ஞோகா³னுபட்டா²னகுஸலோதி காமயோக³ப⁴வயோக³தி³ட்டி²யோகா³விஜ்ஜாயோக³வஸேன சதுதா⁴ வுத்தஸ்ஸ ஸஞ்ஞோக³ஸ்ஸ அனுபட்டா²னே குஸலோ. நிரோதூ⁴பட்டா²னகுஸலோதி ‘‘புன சபரம், பி⁴க்க²வே, கீ²ணாஸவஸ்ஸ பி⁴க்கு²னோ நிப்³பா³னனின்னம் சித்தம் ஹோதி நிப்³பா³னபோணம் நிப்³பா³னபப்³பா⁴ரம் விவேகட்ட²ம் நேக்க²ம்மாபி⁴ரதம் ப்³யந்தீபூ⁴தம் ஸப்³ப³ஸோ ஆஸவட்டா²னியேஹி த⁴ம்மேஹீ’’தி (அ. நி. 10.90; படி. ம. 2.44 அத்த²தோ ஸமானம்) வுத்தகீ²ணாஸவப³லவஸேன நிப்³பா³னனின்னசித்தத்தா கீ²ணாஸவோவ நிரோத⁴ஸங்கா²தஸ்ஸ நிப்³பா³னஸ்ஸ உபட்டா²னே குஸலோ.

ஆரம்மணூபட்டா²னகுஸலவஸேனாதிஆதீ³ஸு குஸலந்தி ஞாணம். ஞாணம்பி ஹி குஸலபுக்³க³லயோக³தோ குஸலம் யதா² பண்டி³தபுக்³க³லயோக³தோ ‘‘பண்டி³தா த⁴ம்மா’’தி (த⁴. ஸ. து³கமாதிகா 103). தஸ்மா கோஸல்லவஸேனாதி அத்தோ².

207. இதா³னி சதுஸட்டி²யா ஆகாரேஹீதிஆதி³ ஞாணகதா²யம் (படி. ம. 1.107) வுத்தம்பி இந்த்³ரியகதா²ஸம்ப³ந்தே⁴ன இதா⁴னேத்வா வுத்தம். தம் ஹேட்டா² வுத்தனயேனேவ வேதி³தப்³ப³ம்.

208. புன ஸமந்தசக்கு²ஸம்ப³ந்தே⁴ன இந்த்³ரியவிதா⁴னம் வத்துகாமோ ந தஸ்ஸ அத்³தி³ட்ட²மித⁴த்தி² கிஞ்சீதிஆதி³மாஹ. தத்த² ஸமந்தசக்கூ²தி ஸப்³ப³ஞ்ஞுதஞ்ஞாணம். பஞ்ஞிந்த்³ரியஸ்ஸ வஸேனாதிஆதி³னா பஞ்சன்னம் இந்த்³ரியானம் அவியோகி³தம் த³ஸ்ஸேதி. ஸத்³த³ஹந்தோ பக்³க³ண்ஹாதீதிஆதீ³ஹி ஏகேகிந்த்³ரியமூலகேஹி பஞ்சஹி சதுக்கேஹி பஞ்சன்னம் இந்த்³ரியானம் நின்னபயோக³காலே வா மக்³க³க்க²ணே வா ஏகரஸபா⁴வம் அஞ்ஞமஞ்ஞபச்சயபா⁴வஞ்ச த³ஸ்ஸேதி. ஸத்³த³ஹிதத்தா பக்³க³ஹிதந்திஆதீ³ஹி ஏகேகிந்த்³ரியமூலகேஹி பஞ்சஹி சதுக்கேஹி பஞ்சன்னம் இந்த்³ரியானம் நிப்³ப³த்திகாலே வா ப²லகாலே வா ஏகரஸபா⁴வம் அஞ்ஞமஞ்ஞபச்சயபா⁴வஞ்ச த³ஸ்ஸேதி. புன பு³த்³த⁴சக்கு²ஸம்ப³ந்தே⁴ன இந்த்³ரியவிதா⁴னம் வத்துகாமோ யம் பு³த்³த⁴சக்கூ²திஆதி³மாஹ. தத்த² பு³த்³த⁴சக்கூ²தி இந்த்³ரியபரோபரியத்தஞாணம் ஆஸயானுஸயஞாணஞ்ச. பு³த்³த⁴ஞாணந்தி ச இத³ம் ததே³வ த்³வயம், ஸேஸம் ஹேட்டா² வுத்தத்த²மேவாதி.

இந்த்³ரியஸமோதா⁴னவண்ணனா நிட்டி²தா.

ஸத்³த⁴ம்மப்பகாஸினியா படிஸம்பி⁴தா³மக்³க³-அட்ட²கதா²ய

இந்த்³ரியகதா²வண்ணனா நிட்டி²தா.