4. சதுத்த²ஸுத்தந்தனித்³தே³ஸவண்ணனா

198. புன பட²மஸுத்தமேவ நிக்கி²பித்வா அபரேன ஆகாரேன இந்த்³ரியானி நித்³தி³ஸதி. தத்த² கதிஹாகாரேஹி கேனட்டே²ன த³ட்ட²ப்³பா³னீதி கதிஹி ஆகாரேஹி த³ட்ட²ப்³பா³னி. கேனட்டே²ன த³ட்ட²ப்³பா³னீதி த³ட்ட²ப்³பா³காரே ச த³ட்ட²ப்³ப³ட்ட²ஞ்ச புச்ச²தி. ச²ஹாகாரேஹி தேனட்டே²ன த³ட்ட²ப்³பா³னீதி ச²ஹி ஆகாரேஹி த³ட்ட²ப்³பா³னி, தேனேவ ச²ஆகாரஸங்கா²தேனட்டே²ன த³ட்ட²ப்³பா³னி. ஆதி⁴பதேய்யட்டே²னாதி அதி⁴பதிபா⁴வட்டே²ன. ஆதி³விஸோத⁴னட்டே²னாதி குஸலானம் த⁴ம்மானம் ஆதி³பூ⁴தஸ்ஸ ஸீலஸ்ஸ விஸோத⁴னட்டே²ன. அதி⁴மத்தட்டே²னாதி ப³லவட்டே²ன. ப³லவஞ்ஹி அதி⁴கா மத்தா பமாணம் அஸ்ஸாதி அதி⁴மத்தந்தி வுச்சதி. அதி⁴ட்டா²னட்டே²னாதி பதிட்டா²னட்டே²ன. பரியாதா³னட்டே²னாதி கே²பனட்டே²ன. பதிட்டா²பகட்டே²னாதி பதிட்டா²பனட்டே²ன.

க. ஆதி⁴பதேய்யட்ட²னித்³தே³ஸவண்ணனா

199. ஆதி⁴பதேய்யட்ட²னித்³தே³ஸே அஸ்ஸத்³தி⁴யம் பஜஹதோதிஆதி³ ஏகேகஸ்ஸேவ இந்த்³ரியஸ்ஸ படிபக்க²பஜஹனவசனம் ஏகக்க²ணேபி அத்தனோ அத்தனோ படிபக்க²பஹானகிச்சஸாத⁴னே அதி⁴பதிபா⁴வஸாத⁴னத்த²ம் வுத்தம். ஸேஸானி சத்தாரி இந்த்³ரியானி தம்ஸம்பயுத்தானேவ வுத்தானி. நானாக்க²ணேஸு வா ஏகேகம் இந்த்³ரியம் து⁴ரம் கத்வா தஸ்ஸ தஸ்ஸ படிபக்க²ஸ்ஸ தம் தம் இந்த்³ரியம் ஜேட்ட²கம் கத்வா ஸேஸானி தத³ன்வயானி கத்வா வுத்தந்திபி வேதி³தப்³ப³ம். காமச்ச²ந்த³ம் பஜஹதோதிஆதி³ பன ஏகக்க²ணவஸேனேவ வுத்தம்.

க². ஆதி³விஸோத⁴னட்ட²னித்³தே³ஸவண்ணனா

200. ஆதி³விஸோத⁴னட்ட²னித்³தே³ஸே அஸ்ஸத்³தி⁴யஸம்வரட்டே²ன ஸீலவிஸுத்³தீ⁴தி அஸ்ஸத்³தி⁴யஸ்ஸ நிவாரணட்டே²ன விரதிஅத்தே²ன ஸீலமலவிஸோத⁴னதோ ஸீலவிஸுத்³தி⁴ நாம. ஸத்³தி⁴ந்த்³ரியஸ்ஸ ஆதி³விஸோத⁴னாதி ஸத்³தி⁴ந்த்³ரியஸ்ஸ உபனிஸ்ஸயவஸேன ஆதி³பூ⁴தஸ்ஸ ஸீலஸ்ஸ விஸோத⁴னா. இமினாவ நயேன ஸேஸானிபி காமச்ச²ந்தா³தி³ஸம்வரணமூலகானி ச இந்த்³ரியானி வேதி³தப்³பா³னி.

க³. அதி⁴மத்தட்ட²னித்³தே³ஸவண்ணனா

201. அதி⁴மத்தட்ட²னித்³தே³ஸே ஸத்³தி⁴ந்த்³ரியஸ்ஸ பா⁴வனாய ச²ந்தோ³ உப்பஜ்ஜதீதி ஸத்³த⁴ஸ்ஸ புக்³க³லஸ்ஸ ஸத்³தா⁴படிஸம்யுத்தம் த⁴ம்மம் ஸுத்வா வா ஸத்³தி⁴ந்த்³ரியபா⁴வனாய அஸ்ஸாத³ம் தி³ஸ்வா வா ஸத்³தி⁴ந்த்³ரியே குஸலோ த⁴ம்மச்ச²ந்தோ³ ஜாயதி. பாமோஜ்ஜம் உப்பஜ்ஜதீதி ச²ந்த³ஜாதத்தா து³ப்³ப³லபீதி உப்பஜ்ஜதி. பீதி உப்பஜ்ஜதீதி பமுதி³தத்தா ப³லவபீதி உப்பஜ்ஜதி. பஸ்ஸத்³தி⁴ உப்பஜ்ஜதீதி பீதியா பீணிதத்தா காயசித்தபஸ்ஸத்³தி⁴ உப்பஜ்ஜதி. ஸுக²ம் உப்பஜ்ஜதீதி பஸ்ஸத்³த⁴காயசித்தத்தா சேதஸிகம் ஸுக²ம் உப்பஜ்ஜதி. ஓபா⁴ஸோ உப்பஜ்ஜதீதி ஸுகே²ன அபி⁴ஸன்னத்தா ஞாணோபா⁴ஸோ உப்பஜ்ஜதி. ஸம்வேகோ³ உப்பஜ்ஜதீதி ஞாணோபா⁴ஸேன விதி³தஸங்கா²ராதீ³னவத்தா ஸங்கா²ரபவத்தியம் ஸம்வேகோ³ உப்பஜ்ஜதி. ஸம்வேஜேத்வா சித்தம் ஸமாத³ஹதீதி ஸம்வேக³ம் உப்பாதே³த்வா தேனேவ ஸம்வேகே³ன சித்தம் ஸமாஹிதம் கரோதி. ஸாது⁴கம் பக்³க³ண்ஹாதீதி லீனுத்³த⁴தபா⁴வம் மோசேத்வா ஸுட்டு² பக்³க³ண்ஹாதி. ஸாது⁴கம் அஜ்ஜு²பேக்க²தீதி வீரியஸ்ஸ ஸமம் ஹுத்வா பவத்தத்தா புன வீரியஸமதானியோஜனே ப்³யாபாரம் அகரோந்தோ தத்ரமஜ்ஜ²த்துபேக்கா²வஸேன ஸாது⁴கம் அஜ்ஜு²பேக்க²தி நாம. உபேக்கா²வஸேனாதி ஸமவாஹிதலக்க²ணாய தத்ரமஜ்ஜ²த்துபேக்கா²ய வஸேன. நானத்தகிலேஸேஹீதி விபஸ்ஸனாய படிபக்க²பூ⁴தேஹி நானாஸபா⁴வேஹி கிலேஸேஹி. விமோக்க²வஸேனாதி ப⁴ங்கா³னுபஸ்ஸனதோ பட்டா²ய நானத்தகிலேஸேஹி விமுச்சனவஸேன. விமுத்தத்தாதி நானத்தகிலேஸேஹி விமுத்தத்தா.

தே த⁴ம்மாதி ச²ந்தா³த³யோ த⁴ம்மா. ஏகரஸா ஹோந்தீதி விமுத்திரஸேன ஏகரஸா ஹோந்தி. பா⁴வனாவஸேனாதி ஏகரஸபா⁴வனாவஸேன. ததோ பணீததரே விவட்டந்தீதி தேன காரணேன விபஸ்ஸனாரம்மணதோ பணீததரே நிப்³பா³னாரம்மணே விவட்டனானுபஸ்ஸனாஸங்கா²தேன கோ³த்ரபு⁴ஞாணேன ச²ந்தா³த³யோ த⁴ம்மா நிவத்தந்தி, ஸங்கா²ராரம்மணதோ அபக³ந்த்வா நிப்³பா³னாரம்மணே பவத்தந்தீதி அத்தோ². விவட்டனாவஸேனாதி ஏவம் கோ³த்ரபு⁴க²ணே ஸங்கா²ராரம்மணதோ விவட்டனவஸேன. விவட்டிதத்தா ததோ வோஸஜ்ஜதீதி மக்³க³ஸமங்கி³புக்³க³லோ மக்³க³ஸ்ஸ உப்பாத³க்க²ணேயேவ து³ப⁴தோவுட்டா²னவஸேன விவட்டிதத்தா தேனேவ காரணேன கிலேஸே ச க²ந்தே⁴ ச வோஸஜ்ஜதி. வோஸஜ்ஜிதத்தா ததோ நிருஜ்ஜ²ந்தீதி மக்³க³ஸ்ஸ உப்பாத³க்க²ணேயேவ கிலேஸே ச க²ந்தே⁴ ச வோஸஜ்ஜிதத்தா தேனேவ காரணேன கிலேஸா ச க²ந்தா⁴ ச அனுப்பத்தினிரோத⁴வஸேன நிருஜ்ஜ²ந்தி. வோஸஜ்ஜிதத்தாதி ச ஆஸம்ஸாயம் பூ⁴தவசனம் கதம். கிலேஸனிரோதே⁴ ஸதி க²ந்த⁴னிரோத⁴ஸப்³பா⁴வதோ ச க²ந்த⁴னிரோதோ⁴ வுத்தோ. நிரோத⁴வஸேனாதி யதா²வுத்தனிரோத⁴வஸேன. தஸ்ஸேவ மக்³க³ஸ்ஸ உப்பாத³க்க²ணே த்³வே வோஸக்³கே³ த³ஸ்ஸேதுகாமோ நிரோத⁴வஸேன த்³வே வோஸக்³கா³திஆதி³மாஹ. த்³வேபி ஹேட்டா² வுத்தத்தா² ஏவ. அஸ்ஸத்³தி⁴யஸ்ஸ பஹானாய ச²ந்தோ³ உப்பஜ்ஜதீதிஆதீ³ஸுபி இமினாவ நயேன வித்தா²ரதோ அத்தோ² வேதி³தப்³போ³. வீரியிந்த்³ரியாதி³மூலகேஸுபி வாரேஸு ஏஸேவ நயோ. இமினாவ நயேன அதி⁴ட்டா²னட்ட²னித்³தே³ஸோபி வித்தா²ரதோ வேதி³தப்³போ³. கேவலஞ்ஹேத்த² அதி⁴ட்டா²தீதி விஸேஸோ, பதிட்டா²தீதி அத்தோ².

க⁴-ங. பரியாதா³னட்ட²பதிட்டா²பகட்ட²னித்³தே³ஸவண்ணனா

202-203. பரியாதா³னட்ட²னித்³தே³ஸே பரியாதி³யதீதி கே²பேதி. பதிட்டா²பகட்ட²னித்³தே³ஸே ஸத்³தோ⁴ ஸத்³தி⁴ந்த்³ரியம் அதி⁴மோக்கே² பதிட்டா²பேதீதி ஸத்³தா⁴ஸம்பன்னோ ‘‘ஸப்³பே³ ஸங்கா²ரா அனிச்சா து³க்கா² அனத்தா’’தி அதி⁴முச்சந்தோ ஸத்³தி⁴ந்த்³ரியம் அதி⁴மோக்கே² பதிட்டா²பேதி. இமினா புக்³க³லவிஸேஸேன இந்த்³ரியபா⁴வனாவிஸேஸோ நித்³தி³ட்டோ². ஸத்³த⁴ஸ்ஸ ஸத்³தி⁴ந்த்³ரியம் அதி⁴மோக்கே² பதிட்டா²பேதீதி ஸத்³தா⁴ஸம்பன்னஸ்ஸ புக்³க³லஸ்ஸ ஸத்³தி⁴ந்த்³ரியம் தம்யேவ ஸத்³த⁴ம் பதிட்டா²பேதி. ததா² அதி⁴முச்சந்தம் அதி⁴மோக்கே² பதிட்டா²பேதீதி. இமினா இந்த்³ரியபா⁴வனாவிஸேஸேன புக்³க³லவிஸேஸோ நித்³தி³ட்டோ². ஏவம் சித்தம் பக்³க³ண்ஹந்தோ பக்³க³ஹே பதிட்டா²பேதி, ஸதிம் உபட்டா²பேந்தோ உபட்டா²னே பதிட்டா²பேதி, சித்தம் ஸமாத³ஹந்தோ அவிக்கே²பே பதிட்டா²பேதி, அனிச்சம் து³க்க²ம் அனத்தாதி பஸ்ஸந்தோ த³ஸ்ஸனே பதிட்டா²பேதீதி ஸேஸேஸுபி யோஜனா வேதி³தப்³பா³. யோகா³வசரோதி ஸமத²யோகே³, விபஸ்ஸனாயோகே³ வா அவசரதீதி யோகா³வசரோ. அவசரதீதி பவிஸித்வா சரதீதி.

சதுத்த²ஸுத்தந்தனித்³தே³ஸவண்ணனா நிட்டி²தா.