3. ததியஸுத்தந்தனித்³தே³ஸவண்ணனா

194. புன அஞ்ஞம் ஸுத்தந்தம் நிக்கி²பித்வா இந்த்³ரியவிதா⁴னம் நித்³தி³ஸிதுகாமோ பஞ்சிமானி, பி⁴க்க²வேதிஆதி³மாஹ. தத்த² ஸோதாபத்தியங்கே³ஸூதி ஏத்த² ஸோதோ அரியோ அட்ட²ங்கி³கோ மக்³கோ³, ஸோதஸ்ஸ ஆபத்தி பு⁴ஸம் பாபுணனம் ஸோதாபத்தி, ஸோதாபத்தியா அங்கா³னி ஸம்பா⁴ரானி ஸோதாபத்திஅங்கா³னி. ஸோதாபன்னதாய புப்³ப³பா⁴க³படிலாப⁴அங்கா³னி. ஸப்புரிஸஸம்ஸேவோ ஸோதாபத்திஅங்க³ம், ஸத்³த⁴ம்மஸ்ஸவனம் ஸோதாபத்திஅங்க³ம், யோனிஸோமனஸிகாரோ ஸோதாபத்திஅங்க³ம், த⁴ம்மானுத⁴ம்மபடிபத்தி ஸோதாபத்திஅங்க³ம், இமானி சத்தாரி ஸோதாபத்திஅங்கா³னி. ஸேஸா ஹேட்டா² வுத்தா ஏவ. இத³ஞ்ச இமேஸம் இந்த்³ரியானம் ஸகவிஸயே ஜேட்ட²கபா⁴வத³ஸ்ஸனத்த²ம் வுத்தம். யதா² ஹி சத்தாரோ ஸேட்டி²புத்தா ராஜாதிராஜபஞ்சமேஸு ஸஹாயேஸு ‘‘நக்க²த்தம் கீளிஸ்ஸாமா’’தி வீதி²ம் ஓதிண்ணேஸு ஏகஸ்ஸ ஸேட்டி²புத்தஸ்ஸ கே³ஹம் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ ‘‘இமேஸம் கா²த³னீயம் போ⁴ஜனீயம் தே³த², இமேஸம் க³ந்த⁴மாலாலங்காராதீ³னி தே³தா²’’தி கே³ஹே விசாரேதி, து³தியஸ்ஸ ததியஸ்ஸ சதுத்த²ஸ்ஸ கே³ஹம் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ ‘‘இமேஸம் கா²த³னீயம் போ⁴ஜனீயம் தே³த², இமேஸம் க³ந்த⁴மாலாலங்காராதீ³னி தே³தா²’’தி கே³ஹே விசாரேதி, அத² ஸப்³ப³பச்சா² ரஞ்ஞோ கே³ஹம் க³தகாலே கிஞ்சாபி ராஜா ஸப்³ப³த்த² இஸ்ஸரோவ, இமஸ்மிம் பன காலே அத்தனோ கே³ஹேயேவ ‘‘இமேஸம் கா²த³னீயம் போ⁴ஜனீயம் தே³த², இமேஸம் க³ந்த⁴மாலாலங்காராதீ³னி தே³தா²’’தி விசாரேதி, ஏவமேவ ஸத்³தா⁴பஞ்சமகேஸு இந்த்³ரியேஸு தேஸு ஸஹாயேஸு ஏகதோ வீதி²ம் ஓதரந்தேஸு விய ஏகாரம்மணே உப்பஜ்ஜமானேஸுபி யதா² பட²மஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஸோதாபத்திஅங்கா³னி பத்வா அதி⁴மோக்க²லக்க²ணம் ஸத்³தி⁴ந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. யதா² து³தியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஸம்மப்பதா⁴னானி பத்வா பக்³க³ஹணலக்க²ணம் வீரியிந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. யதா² ததியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஸதிபட்டா²னானி பத்வா உபட்டா²னலக்க²ணம் ஸதிந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. யதா² சதுத்த²ஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஜா²னானி பத்வா அவிக்கே²பலக்க²ணம் ஸமாதி⁴ந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. ஸப்³ப³பச்சா² ரஞ்ஞோ கே³ஹம் க³தகாலே பன யதா² இதரே சத்தாரோ துண்ஹீ நிஸீத³ந்தி, ராஜாவ விசாரேதி, ஏவம் அரியஸச்சானி பத்வா பஜானனலக்க²ணம் பஞ்ஞிந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தீதி.

க. பபே⁴த³க³ணனனித்³தே³ஸவண்ணனா

195. ஸுத்தந்தஸ்ஸ பபே⁴த³க³ணனாபுச்சா²புப்³ப³ங்க³மேவ பபே⁴த³க³ணனனித்³தே³ஸே ஸப்புரிஸஸம்ஸேவேதி ஸோப⁴னானம் புரிஸானம் ஸம்மா ஸேவனே. அதி⁴மோக்கா²தி⁴பதேய்யட்டே²னாதி அதி⁴மோக்க²ஸங்கா²தேன ஸேஸிந்த்³ரியேஸு அதி⁴பதிபா⁴வட்டே²ன, ஸேஸிந்த்³ரியானம் புப்³ப³ங்க³மட்டே²னாதி அத்தோ². ஸத்³த⁴ம்மஸவனேதி ஸதம் த⁴ம்மோ, ஸோப⁴னோ வா த⁴ம்மோதி ஸத்³த⁴ம்மோ. தஸ்ஸ ஸத்³த⁴ம்மஸ்ஸ ஸவனே. யோனிஸோமனஸிகாரேதி உபாயேன மனஸிகாரே. த⁴ம்மானுத⁴ம்மபடிபத்தியாதி ஏத்த² நவ லோகுத்தரத⁴ம்மே அனுக³தோ த⁴ம்மோ த⁴ம்மானுத⁴ம்மோ, ஸீலஸமாதி⁴பஞ்ஞாஸங்கா²தஸ்ஸ த⁴ம்மானுத⁴ம்மஸ்ஸ படிபத்தி படிபஜ்ஜனம் த⁴ம்மானுத⁴ம்மபடிபத்தி. ஸம்மப்பதா⁴னாதீ³ஸுபி ஏஸேவ நயோ.

க². சரியாவாரவண்ணனா

196. சரியாவாரேபி இமினாவ நயேன அத்தோ² வேதி³தப்³போ³. கேவலம் பட²மவாரோ இந்த்³ரியானம் உப்பாத³னகாலவஸேன வுத்தோ, சரியாவாரோ உப்பன்னானம் ஆஸேவனகாலவஸேன ச பாரிபூரிகாலவஸேன ச வுத்தோ. சரியா பகதி உஸ்ஸன்னதாதி ஹி அத்த²தோ ஏகம்.

சாரவிஹாரனித்³தே³ஸவண்ணனா

197. இதா³னி சரியாஸம்ப³ந்தே⁴னேவ சாரவிஹாரனித்³தே³ஸவஸேன அபரேன பரியாயேன இந்த்³ரியவிதா⁴னம் நித்³தி³ஸிதுகாமோ சாரோ ச விஹாரோ சாதிஆதி³கம் உத்³தே³ஸம் உத்³தி³ஸித்வா தஸ்ஸ நித்³தே³ஸமாஹ. தத்த² உத்³தே³ஸே தாவ யதா² சரந்தம் விஹரந்தம் விஞ்ஞூ ஸப்³ரஹ்மசாரீ க³ம்பீ⁴ரேஸு டா²னேஸு ஓகப்பேய்யும் – அத்³தா⁴ அயமாயஸ்மா பத்தோ வா பாபுணிஸ்ஸதி வாதி, ததா² இந்த்³ரியஸம்பன்னஸ்ஸ சாரோ ச விஹாரோ ச விஞ்ஞூஹி ஸப்³ரஹ்மசாரீஹி அனுபு³த்³தோ⁴ ஹோதி படிவித்³தோ⁴தி உத்³தே³ஸஸ்ஸ ஸம்ப³ந்தோ⁴ வேதி³தப்³போ³. உத்³தே³ஸனித்³தே³ஸே சரியா சாரோயேவ. சாரோ சரியாதி ஹி அத்த²தோ ஏகம். தஸ்மா ‘‘சாரோ’’திபத³ஸ்ஸ நித்³தே³ஸே ‘‘சரியா’’தி வுத்தம். இரியாபத²சரியாதி இரியாபதா²னம் சரியா, பவத்தனந்தி அத்தோ². ஸேஸேஸுபி ஏஸேவ நயோ. ஆயதனசரியா பன ஆயதனேஸு ஸதிஸம்பஜஞ்ஞானம் சரியா. பத்தீதி ப²லானி. தானி ஹி பாபுணியந்தீதி ‘‘பத்தீ’’தி வுத்தா. ஸத்தலோகஸ்ஸ தி³ட்ட²த⁴ம்மிகஸம்பராயிகா அத்தா² லோகத்தா²தி அயம் விஸேஸோ.

இதா³னி தாஸம் சரியானம் பூ⁴மிம் த³ஸ்ஸேந்தோ சதூஸு இரியாபதே²ஸூதிஆதி³மாஹ. ஸதிபட்டா²னேஸூதி ஆரம்மணஸதிபட்டா²னேஸு. ஸதிபட்டா²னேஸுபி வுச்சமானேஸு ஸதிதோ அனஞ்ஞானி வோஹாரவஸேன அஞ்ஞானி விய கத்வா வுத்தம். அரியஸச்சேஸூதி புப்³ப³பா⁴க³லோகியஸச்சஞாணேன விஸும் விஸும் ஸச்சபரிக்³க³ஹவஸேன வுத்தம். அரியமக்³கே³ஸு ஸாமஞ்ஞப²லேஸூதி ச வோஹாரவஸேனேவ வுத்தம். பதே³ஸேதி லோகத்த²சரியாய ஏகதே³ஸே. நிப்பதே³ஸதோ ஹி லோகத்த²சரியம் பு³த்³தா⁴ ஏவ கரோந்தி. புன தா ஏவ சரியாயோ காரகபுக்³க³லவஸேன த³ஸ்ஸேந்தோ பணிதி⁴ஸம்பன்னானந்திஆதி³மாஹ. தத்த² பணிதி⁴ஸம்பன்னா நாம இரியாபதா²னம் ஸந்தத்தா இரியாபத²கு³த்தியா ஸம்பன்னா அகம்பிதஇரியாபதா² பி⁴க்கு²பா⁴வானுரூபேன ஸந்தேன இரியாபதே²ன ஸம்பன்னா. இந்த்³ரியேஸு கு³த்தத்³வாரானந்தி சக்கா²தீ³ஸு ச²ஸு இந்த்³ரியேஸு அத்தனோ அத்தனோ விஸயே பவத்தஏகேகத்³வாரவஸேன கு³த்தம் த்³வாரம் ஏதேஸந்தி கு³த்தத்³வாரா. தேஸம் கு³த்தத்³வாரானம். த்³வாரந்தி சேத்த² உப்பத்தித்³வாரவஸேன சக்கா²த³யோ ஏவ. அப்பமாத³விஹாரீனந்தி ஸீலாதீ³ஸு அப்பமாத³விஹாரவதம். அதி⁴சித்தமனுயுத்தானந்தி விபஸ்ஸனாய பாத³கபா⁴வேன அதி⁴சித்தஸங்கா²தம் ஸமாதி⁴மனுயுத்தானம். பு³த்³தி⁴ஸம்பன்னானந்தி நாமரூபவவத்தா²னம் ஆதி³ம் கத்வா யாவ கோ³த்ரபு⁴, தாவ பவத்தேன ஞாணேன ஸம்பன்னானம். ஸம்மாபடிபன்னானந்தி சதுமக்³க³க்க²ணே. அதி⁴க³தப²லானந்தி சதுப²லக்க²ணே.

அதி⁴முச்சந்தோதி அதி⁴மோக்க²ம் கரோந்தோ. ஸத்³தா⁴ய சரதீதி ஸத்³தா⁴வஸேன பவத்ததி. பக்³க³ண்ஹந்தோதி சதுஸம்மப்பதா⁴னவீரியேன பத³ஹந்தோ. உபட்டா²பேந்தோதி ஸதியா ஆரம்மணம் உபட்டா²பேந்தோ. அவிக்கே²பம் கரோந்தோதி ஸமாதி⁴வஸேன விக்கே²பம் அகரோந்தோ. பஜானந்தோதி சதுஸச்சபஜானனபஞ்ஞாய பகாரேன ஜானந்தோ. விஜானந்தோதி இந்த்³ரியஸம்பயுத்தஜவனபுப்³ப³ங்க³மேன ஆவஜ்ஜனவிஞ்ஞாணேன ஆரம்மணம் விஜானந்தோ. விஞ்ஞாணசரியாயாதி ஆவஜ்ஜனவிஞ்ஞாணசரியவஸேன. ஏவம் படிபன்னஸ்ஸாதி ஸஹஜவனாய இந்த்³ரியசரியாய படிபன்னஸ்ஸ. குஸலா த⁴ம்மா ஆயாபேந்தீதி ஸமத²விபஸ்ஸனாவஸேன பவத்தா குஸலா த⁴ம்மா பு⁴ஸம் யாபேந்தி, பவத்தந்தீதி அத்தோ². ஆயதனசரியாயாதி குஸலானம் த⁴ம்மானம் பு⁴ஸம் யதனசரியாய, க⁴டனசரியாய பவத்தனசரியாயாதி வுத்தம் ஹோதி. விஸேஸமதி⁴க³ச்ச²தீதி விக்க²ம்ப⁴னதத³ங்க³ஸமுச்சே²த³படிப்பஸ்ஸத்³தி⁴வஸேன விஸேஸம் அதி⁴க³ச்ச²தி. த³ஸ்ஸனசரியாத³யோ வுத்தத்தா²யேவ.

ஸத்³தா⁴ய விஹரதீதிஆதீ³ஸு ஸத்³தா⁴தி³ஸமங்கி³ஸ்ஸ இரியாபத²விஹாரோ த³ட்ட²ப்³போ³. அனுபு³த்³தோ⁴தி அனுமானபு³த்³தி⁴யா. படிவித்³தோ⁴தி பச்சக்க²பு³த்³தி⁴யா. யஸ்மா அதி⁴மோக்க²ட்டா²தீ³ஸு அனுபு³த்³தே⁴ஸு படிவித்³தே⁴ஸு ச சாரோ ச விஹாரோ ச அனுபு³த்³தோ⁴ ஹோதி படிவித்³தோ⁴, தஸ்மா அனுபோ³த⁴படிவேதே⁴ஸு அதி⁴மோக்க²ட்டா²த³யோ ச நித்³தி³ட்டா².

ஏவம் ஸத்³தா⁴ய சரந்தந்திஆதீ³ஸு ஏவந்தி வுத்தப்பகாரம் நித்³தி³ஸந்தோ யதா²ஸத்³த³ஸ்ஸ அத்த²ம் நித்³தி³ஸதி. விஞ்ஞூதிஆதீ³ஸுபி யதா²ஸபா⁴வம் ஜானந்தீதி விஞ்ஞூ. விஞ்ஞாதம் ஸபா⁴வம் விபா⁴வேந்தி பாகடம் கரோந்தீதி விபா⁴வீ. அஸனி விய ஸிலுச்சயே கிலேஸே மேத⁴தி ஹிம்ஸதீதி மேதா⁴, கி²ப்பம் க³ஹணதா⁴ரணட்டே²ன வா மேதா⁴, மேதா⁴ ஏதேஸம் அத்தீ²தி மேதா⁴வீ. ஞாணக³தியா பண்ட³ந்தி க³ச்ச²ந்தி பவத்தந்தீதி பண்டி³தா. பு³த்³தி⁴ஸம்பதா³ய ஸமன்னாக³தத்தா பு³த்³தி⁴ஸம்பன்னா. ஸஹ ப்³ரஹ்மம் சரியம் உத்தமம் படிபத³ம் சரந்தீதி ஸப்³ரஹ்மசாரினோ. அபலோகனகம்மாதி³சதுப்³பி³த⁴ம் கம்மம் ஏகதோ கரணவஸேன ஏகம் கம்மம். ததா² பஞ்சவிதோ⁴ பாதிமோக்கு²த்³தே³ஸோ ஏகுத்³தே³ஸோ. ஸமா ஸிக்கா² ஏதேஸந்தி ஸமஸிக்கா², ஸமஸிக்கா²னம் பா⁴வோ ஸமஸிக்க²தா. ஸமஸிக்கா²தாதிபி பட²ந்தி. யேஸம் ஏகம் கம்மம் ஏகோ உத்³தே³ஸோ ஸமஸிக்க²தா, தே ஸப்³ரஹ்மசாரீதி வுத்தம் ஹோதி. ‘‘ஜா²னானீ’’தி வத்தப்³பே³ ஜா²னாதி லிங்க³விபல்லாஸோ கதோ. விமோக்கா²தி தயோ வா அட்ட² வா விமோக்கா². ஸமாதீ⁴தி ஸவிதக்கஸவிசாரஅவிதக்கவிசாரமத்தஅவிதக்காவிசாரா தயோ ஸமாதீ⁴. ஸமாபத்தியோதி ஸுஞ்ஞதானிமித்தாப்பணிஹிதா. அபி⁴ஞ்ஞாயோதி ச² அபி⁴ஞ்ஞா.

ஏகோ அம்ஸோ பா⁴கோ³, ந து³தியோதி ஏகம்ஸோ, ஏகம்ஸஸ்ஸ அத்த²ஸ்ஸ வசனம் ஏகம்ஸவசனம். ஏவம் ஸேஸேஸுபி யோஜனா காதப்³பா³. விஸேஸதோ பன ஸமம், ஸமந்தா வா ஸேதி பவத்ததீதி ஸம்ஸயோ, நத்தே²த்த² ஸம்ஸயோதி நிஸ்ஸம்ஸயோ. ஏகஸ்மிம்யேவ அனிச்ச²யதா ஹுத்வா இதரம்பி கங்க²தீதி கங்கா², நத்தே²த்த² கங்கா²தி நிக்கங்கோ². த்³விதா⁴ பா⁴வோ த்³வேஜ்ஜ²ம், நத்தே²த்த² த்³வேஜ்ஜ²ந்தி அத்³வேஜ்ஜோ². த்³விதா⁴ ஏலயதி கம்பேதீதி த்³வேள்ஹகம், நத்தே²த்த² த்³வேள்ஹகந்தி அத்³வேள்ஹகோ. நியோகே³ன நியமேன வசனம் நியோக³வசனம். நிய்யோக³வசனந்திபி பட²ந்தி. அபண்ணகஸ்ஸ அவிரத்³த⁴ஸ்ஸ நிய்யானிகஸ்ஸ அத்த²ஸ்ஸ வசனம் அபண்ணகவசனம். அவத்தா²பனவசனந்தி நிச்ச²யவசனம். ஸப்³ப³ம்பி ஹேதம் விசிகிச்சா²பா⁴வஸ்ஸ வேவசனம். பியஸ்ஸ அத்த²ஸ்ஸ ஸப்³பா⁴வதோ வசனம், பியமேவாதி பியவசனம். ததா² க³ருவசனம். ஸஹ கா³ரவேன க³ருபா⁴வேன ஸகா³ரவம். பதிஸ்ஸயனம் பதிஸ்ஸயோ பரம் க³ரும் கத்வா நிஸ்ஸயனம் அபஸ்ஸயனந்தி அத்தோ². பதிஸ்ஸவனம் வா பதிஸ்ஸவோ, நிவாதவுத்திதாய பரவசனஸவனந்தி அத்தோ². உப⁴யதா²பி பரஜேட்ட²கபா⁴வஸ்ஸேதம் நாமம். ஸஹ கா³ரவேன வத்ததீதி ஸகா³ரவம். ஸஹ பதிஸ்ஸயேன, பதிஸ்ஸவேன வா வத்ததீதி ஸப்பதிஸ்ஸயம். ‘‘ஸப்பதிஸ்ஸவ’’ந்தி வா வத்தப்³பே³ ய-காரம், வ-காரம் வா லோபம் கத்வா ‘‘ஸப்பதிஸ்ஸ’’ந்தி வுத்தம். அதி⁴கம் விஸிட்ட²ம் வசனம் அதி⁴வசனம், ஸகா³ரவஞ்ச தம் ஸப்பதிஸ்ஸஞ்சாதி ஸகா³ரவஸப்பதிஸ்ஸம், ஸகா³ரவஸப்பதிஸ்ஸம் அதி⁴வசனம் ஸகா³ரவஸப்பதிஸ்ஸாதி⁴வசனம். உப⁴யத்தா²பி வேவசனவிகப்பனானத்தவஸேன புனப்புனம் ஏதந்தி வுத்தம். பத்தோ வா பாபுணிஸ்ஸதி வாதி ஜா²னாதீ³னியேவாதி.

ததியஸுத்தந்தனித்³தே³ஸவண்ணனா நிட்டி²தா.