2. து³தியஸுத்தந்தனித்³தே³ஸவண்ணனா

187. புன அஞ்ஞம் ஸுத்தந்தம் நிக்கி²பித்வா இந்த்³ரியவிதா⁴னம் நித்³தி³ஸிதுகாமோ பஞ்சிமானி, பி⁴க்க²வேதிஆதி³கம் ஸுத்தந்தம் த³ஸ்ஸேதி. தத்த² யே ஹி கேசீதி அனவஸேஸபரியாதா³னம், ஹி-காரோ பத³பூரணமத்தே நிபாதோ. ஸமணா வா ப்³ராஹ்மணா வாதி லோகவோஹாரவஸேன வுத்தம். ஸமுத³யந்தி பச்சயம். அத்த²ங்க³மந்தி உப்பன்னானம் அபா⁴வக³மனம், அனுப்பன்னானம் அனுப்பாத³ம் வா. அஸ்ஸாத³ந்தி ஆனிஸம்ஸம். ஆதீ³னவந்தி தோ³ஸம். நிஸ்ஸரணந்தி நிக்³க³மனம். யதா²பூ⁴தந்தி யதா²ஸபா⁴வம். ஸமணேஸூதி ஸமிதபாபேஸு. ஸமணஸம்மதாதி ந மயா ஸமணாதி ஸம்மதா. ‘‘ஸம்மதா’’தி வத்தமானகாலவஸேன வுச்சமானே ஸத்³த³லக்க²ணவஸேன ‘‘மே’’தி ஏத்த² ஸாமிவசனமேவ ஹோதி. ப்³ராஹ்மணேஸூதி பா³ஹிதபாபேஸு. ஸாமஞ்ஞத்த²ந்தி ஸமணபா⁴வஸ்ஸ அத்த²ம். ப்³ரஹ்மஞ்ஞத்த²ந்தி ப்³ராஹ்மணபா⁴வஸ்ஸ அத்த²ம். த்³வயேனாபி அரஹத்தப²லமேவ வுத்தம். அத² வா ஸாமஞ்ஞத்த²ந்தி ஹேட்டா² தீணி ப²லானி. ப்³ரஹ்மஞ்ஞத்த²ந்தி அரஹத்தப²லம். ஸாமஞ்ஞப்³ரஹ்மஞ்ஞந்தி ஹி அரியமக்³கோ³யேவ. தி³ட்டே²வ த⁴ம்மேதி பச்சக்கே²யேவ அத்தபா⁴வே. ஸயம் அபி⁴ஞ்ஞா ஸச்சி²கத்வாதி அத்தனாயேவ அதி⁴கேன ஞாணேன பச்சக்க²ம் கத்வா. உபஸம்பஜ்ஜாதி பாபுணித்வா, நிப்பா²தே³த்வா வா.

188. ஸுத்தந்தனித்³தே³ஸே பட²மம் இந்த்³ரியஸமுத³யாதீ³னம் பபே⁴த³க³ணனம் புச்சி²த்வா புன பபே⁴த³க³ணனா விஸ்ஸஜ்ஜிதா. தத்த² அஸீதிஸதந்தி அஸீதிஉத்தரம் ஸதம். பண்டி³தேஹி ‘‘அஸீதிஸத’’ந்தி வுத்தேஹி ஆகாரேஹீதி யோஜனா.

புன பபே⁴த³க³ணனாபுச்சா²புப்³ப³ங்க³மே க³ணனானித்³தே³ஸே அதி⁴மோக்க²த்தா²யாதி அதி⁴முச்சனத்தா²ய ஸத்³த³ஹனத்தா²ய. ஆவஜ்ஜனாய ஸமுத³யோதி மனோத்³வாராவஜ்ஜனசித்தஸ்ஸ ஸமுத³யோ. ஸத்³தி⁴ந்த்³ரியஸ்ஸ ஸமுத³யோதி ஸத்³தி⁴ந்த்³ரியஸ்ஸ பச்சயோ, ஸத்³த⁴ம் உப்பாதே³ஸ்ஸாமீதி புப்³ப³பா⁴கா³வஜ்ஜனம் ஸத்³தி⁴ந்த்³ரியஸ்ஸ உபனிஸ்ஸயபச்சயோ, ஸத்³தி⁴ந்த்³ரியஜவனஸ்ஸ ஆவஜ்ஜனம் பட²மஸ்ஸ ஜவனஸ்ஸ அனந்தரபச்சயோ, து³தியஜவனாதீ³னம் உபனிஸ்ஸயபச்சயோ. அதி⁴மோக்க²வஸேனாதி ச²ந்த³ஸம்பயுத்தஅதி⁴மோக்க²வஸேன. ச²ந்த³ஸ்ஸ ஸமுத³யோதி புப்³ப³பா⁴கா³வஜ்ஜனபச்சயா உப்பன்னஸ்ஸ அதி⁴மோக்க²ஸம்பயுத்தஸ்ஸ யேவாபனகபூ⁴தஸ்ஸ த⁴ம்மச்ச²ந்த³ஸ்ஸ ஸமுத³யோ. ஸோ பன ஸத்³தி⁴ந்த்³ரியஸ்ஸ ஸஹஜாதஅஞ்ஞமஞ்ஞனிஸ்ஸயஸம்பயுத்தஅத்தி²அவிக³தவஸேன பச்சயோ ஹோதி, ச²ந்தா³தி⁴பதிகாலே அதி⁴பதிபச்சயோ ச ஹோதி, ஸோயேவ து³தியஸ்ஸ அனந்தரஸமனந்தரஅனந்தரூபனிஸ்ஸயாஸேவனனத்தி²விக³தவஸேன பச்சயோ ஹோதி. இமினாவ நயேன மனஸிகாரஸ்ஸபி யோஜனா காதப்³பா³. கேவலஞ்ஹேத்த² மனஸிகாரோதி ஸாரணலக்க²ணோ யேவாபனகமனஸிகாரோ. அதி⁴பதிபச்சயதா பனஸ்ஸ ந ஹோதி. ஸம்பயுத்தேஸு இமேஸம் த்³வின்னம்யேவ க³ஹணம் ப³லவபச்சயத்தாதி வேதி³தப்³ப³ம். ஸத்³தி⁴ந்த்³ரியஸ்ஸ வஸேனாதி பா⁴வனாபி⁴வுத்³தி⁴யா இந்த்³ரியபா⁴வம் பத்தஸ்ஸ ஸத்³தி⁴ந்த்³ரியஸ்ஸ வஸேன. ஏகத்துபட்டா²னந்தி ஏகாரம்மணே அசலபா⁴வேன பு⁴ஸம் டா²னம் உபரூபரி ஸத்³தி⁴ந்த்³ரியஸ்ஸ பச்சயோ ஹோதி. ஸத்³தி⁴ந்த்³ரியே வுத்தனயேனேவ ஸேஸிந்த்³ரியானிபி வேதி³தப்³பா³னி. ஏவமேகேகஸ்ஸ இந்த்³ரியஸ்ஸ சத்தாரோ சத்தாரோ ஸமுத³யாதி பஞ்சன்னம் இந்த்³ரியானம் வீஸதி ஸமுத³யா ஹோந்தி. புன சதுன்னம் ஸமுத³யானம் ஏகேகஸ்மிம் ஸமுத³யே பஞ்ச பஞ்ச இந்த்³ரியானி யோஜேத்வா வீஸதி ஸமுத³யா வுத்தா. பட²மவீஸதி நானாமக்³க³வஸேன த³ட்ட²ப்³பா³, து³தியவீஸதி ஏகமக்³க³வஸேன த³ட்ட²ப்³பா³தி வத³ந்தி. ஏவம் சத்தாலீஸ ஆகாரா ஹோந்தி. அத்த²ங்க³மவாரோபி இமினாவ நயேன வேதி³தப்³போ³. ஸோ பன அத்த²ங்க³மோ இந்த்³ரியபா⁴வனம் அனனுயுத்தஸ்ஸ அப்படிலத்³தா⁴ படிலாப⁴த்த²ங்க³மோ, இந்த்³ரியபா⁴வனாய பரிஹீனஸ்ஸ படிலத்³த⁴பரிஹானி அத்த²ங்க³மோ, ப²லப்பத்தஸ்ஸ படிப்பஸ்ஸத்³தி⁴அத்த²ங்க³மோ. ஏகத்தஅனுபட்டா²னந்தி ஏகத்தே அனுபட்டா²னம்.

க. அஸ்ஸாத³னித்³தே³ஸவண்ணனா

189. அஸ்ஸாத³னித்³தே³ஸே அஸ்ஸத்³தி⁴யஸ்ஸ அனுபட்டா²னந்தி அஸ்ஸத்³தே⁴ புக்³க³லே பரிவஜ்ஜயதோ ஸத்³தே⁴ புக்³க³லே ஸேவதோ பஸாத³னீயஸுத்தந்தே பச்சவேக்க²தோ தத்த² யோனிஸோமனஸிகாரம் ப³ஹுலீகரோதோ ச அஸ்ஸத்³தி⁴யஸ்ஸ அனுபட்டா²னம் ஹோதி. அஸ்ஸத்³தி⁴யபரிளாஹஸ்ஸ அனுபட்டா²னந்தி ஏத்த² அஸ்ஸத்³த⁴ஸ்ஸ ஸத்³தா⁴கதா²ய பவத்தமானாய து³க்க²ம் தோ³மனஸ்ஸம் உப்பஜ்ஜதி. அயம் அஸ்ஸத்³தி⁴யபரிளாஹோ. அதி⁴மோக்க²சரியாய வேஸாரஜ்ஜந்தி ஸத்³தா⁴வத்து²வஸேன வா பா⁴வனாய வா வஸிப்பத்தஸ்ஸ ஸத்³தா⁴பவத்தியா விஸாரத³பா⁴வோ ஹோதி. ஸந்தோ ச விஹாராதி⁴க³மோதி ஸமத²ஸ்ஸ வா விபஸ்ஸனாய வா படிலாபோ⁴. ஸுக²ம் ஸோமனஸ்ஸந்தி ஏத்த² சேதஸிகஸுக²பா⁴வத³ஸ்ஸனத்த²ம் ஸோமனஸ்ஸவசனம். ஸத்³தி⁴ந்த்³ரியஸமுட்டி²தபணீதரூபபு²ட்ட²காயஸ்ஸ காயிகஸுக²ம்பி லப்³ப⁴தியேவ. ஸுக²ஸோமனஸ்ஸஸ்ஸ பதா⁴னஸ்ஸாத³த்தா ‘‘அயம் ஸத்³தி⁴ந்த்³ரியஸ்ஸ அஸ்ஸாதோ³’’தி விஸேஸேத்வா வுத்தம். இமினாவ நயேன ஸேஸிந்த்³ரியஸ்ஸாதா³பி யோஜேத்வா வேதி³தப்³பா³.

க². ஆதீ³னவனித்³தே³ஸவண்ணனா

190. ஆதீ³னவனித்³தே³ஸே அனிச்சட்டே²னாதி ஸத்³தி⁴ந்த்³ரியஸ்ஸ அனிச்சட்டே²ன. ஸோ அனிச்சட்டோ² ஸத்³தி⁴ந்த்³ரியஸ்ஸ ஆதீ³னவோதி வுத்தம் ஹோதி. இதரத்³வயேபி ஏஸேவ நயோ. இமே ஸமுத³யத்த²ங்க³மஸ்ஸாதா³தீ³னவா லோகியஇந்த்³ரியானமேவாதி வேதி³தப்³பா³.

க³. நிஸ்ஸரணனித்³தே³ஸவண்ணனா

191. நிஸ்ஸரணனித்³தே³ஸே அதி⁴மோக்க²ட்டே²னாதிஆதீ³ஸு ஏகேகஸ்மிம் இந்த்³ரியே பஞ்ச பஞ்ச கத்வா பஞ்சன்னம் இந்த்³ரியானம் பஞ்சவீஸதி நிஸ்ஸரணானி மக்³க³ப²லவஸேன நித்³தி³ட்டா²னி. தத்த² ததோ பணீததரஸத்³தி⁴ந்த்³ரியஸ்ஸ படிலாபா⁴தி ததோ விபஸ்ஸனாக்க²ணே பவத்தஸத்³தி⁴ந்த்³ரியதோ மக்³க³க்க²ணே பணீததரஸ்ஸ ஸத்³தி⁴ந்த்³ரியஸ்ஸ படிலாப⁴வஸேன. புரிமதரஸத்³தி⁴ந்த்³ரியா நிஸ்ஸடம் ஹோதீதி தஸ்மிம் மக்³க³க்க²ணே ஸத்³தி⁴ந்த்³ரியம் புரிமதரதோ விபஸ்ஸனாக்க²ணே பவத்தஸத்³தி⁴ந்த்³ரியதோ நிக்க²ந்தம் ஹோதி. இமினாவ நயேன ப²லக்க²ணே ஸத்³தி⁴ந்த்³ரியம்பி உப⁴யத்த² ஸேஸிந்த்³ரியானிபி யோஜேதப்³பா³னி.

192. புப்³ப³பா⁴கே³ பஞ்சஹி இந்த்³ரியேஹீதி பட²மஜ்ஜா²னூபசாரே பஞ்சஹி இந்த்³ரியேஹி பட²மஜ்ஜா²னாதி³அட்ட²ஸமாபத்திவஸேன அட்ட² நிஸ்ஸரணானி, அனிச்சானுபஸ்ஸனாதி³அட்டா²ரஸமஹாவிபஸ்ஸனாவஸேன அட்டா²ரஸ நிஸ்ஸரணானி, ஸோதாபத்திமக்³கா³தி³வஸேன அட்ட² லோகுத்தரனிஸ்ஸரணானி. ஏவம் ஜா²னஸமாபத்திமஹாவிபஸ்ஸனாமக்³க³ப²லவஸேன சதுத்திம்ஸ நிஸ்ஸரணானி புரிமபுரிமஸமதிக்கமதோ நித்³தி³ட்டா²னி. நேக்க²ம்மே பஞ்சிந்த்³ரியானீதிஆதீ³னி பன ஸத்ததிம்ஸ நிஸ்ஸரணானி படிபக்க²பஹானவஸேன படிபக்க²தோ நித்³தி³ட்டா²னி. தத்த² நேக்க²ம்மாதீ³ஸு ஸத்தஸு ஸத்த நிஸ்ஸரணானி உபசாரபூ⁴மிவஸேன வுத்தானி, ப²லானி பன படிபக்க²பஹானாபா⁴வதோ ந வுத்தானி.

193. தி³ட்டே²கட்டே²ஹீதி யாவ ஸோதாபத்திமக்³கா³ தி³ட்டி²யா ஸஹ ஏகஸ்மிம் புக்³க³லே டி²தாதி தி³ட்டே²கட்டா². தேஹி தி³ட்டே²கட்டே²ஹி. ஓளாரிகேஹீதி தூ²லேஹி காமராக³ப்³யாபாதே³ஹி. அணுஸஹக³தேஹீதி ஸுகு²மபூ⁴தேஹி காமராக³ப்³யாபாதே³ஹியேவ. ஸப்³ப³கிலேஸேஹீதி ரூபராகா³தீ³ஹி. தேஸு ஹி பஹீனேஸு ஸப்³ப³கிலேஸா பஹீனா ஹோந்தி, தஸ்மா ‘‘ஸப்³ப³கிலேஸேஹீ’’தி வுத்தம். அவுத்தத்தா²னி பனேத்த² பதா³னி ஹேட்டா² வுத்தத்தா²னேவாதி. ஸப்³பே³ஸஞ்ஞேவ கீ²ணாஸவானம் தத்த² தத்த² பஞ்சிந்த்³ரியானீதி ‘‘அதி⁴மோக்க²ட்டே²னா’’திஆதீ³ஸு புப்³பே³ வுத்தேஸு டா²னேஸு தஸ்மிம் தஸ்மிம் டா²னே பஞ்சிந்த்³ரியானி பு³த்³த⁴பச்சேகபு³த்³த⁴ஸாவகானம் கீ²ணாஸவானம் யதா²யோக³ம் ததோ ததோ நிஸ்ஸடானி ஹோந்தி. இமஸ்மிம் வாரே பட²மம் வுத்தனயா ஏவ யதா²யோக³ம் கீ²ணாஸவவஸேன வுத்தா.

கத²ம் பனேதானி நிஸ்ஸரணானி அஸீதிஸதம் ஹோந்தீதி? வுச்சதே – மக்³க³ப²லவஸேன வுத்தானி பஞ்சவீஸதி, ஸமதிக்கமவஸேன வுத்தானி சதுத்திம்ஸ, படிபக்க²வஸேன வுத்தானி ஸத்ததிம்ஸாதி பட²மவாரே ஸப்³பா³னி ச²ன்னவுதி நிஸ்ஸரணானி ஹோந்தி, ஏதானியேவ து³தியவாரே கீ²ணாஸவானம் வஸேன த்³வாத³ஸஸு அபனீதேஸு சதுராஸீதி ஹோந்தி. இதி புரிமானி ச²ன்னவுதி, இமானி ச சதுராஸீதீதி அஸீதிஸதம் ஹோந்தி. கதமானி பன த்³வாத³ஸ கீ²ணாஸவானம் அபனேதப்³பா³னி? ஸமதிக்கமதோ வுத்தேஸு மக்³க³ப²லவஸேன வுத்தானி அட்ட² நிஸ்ஸரணானி, படிபக்க²தோ வுத்தேஸு மக்³க³வஸேன வுத்தானி சத்தாரீதி இமானி த்³வாத³ஸ அபனேதப்³பா³னி. அரஹத்தப²லவஸேன வுத்தானி கஸ்மா அபனேதப்³பா³னீதி சே? ஸப்³ப³பட²மம் வுத்தானம் பஞ்சவீஸதியா நிஸ்ஸரணானம் மக்³க³ப²லவஸேனேவ லப்³ப⁴னதோ. அரஹத்தப²லவஸேன நிஸ்ஸரணானி வுத்தானேவ ஹோந்தி. ஹேட்டி²மம் ஹேட்டி²மம் பன ப²லஸமாபத்திம் உபரிமா உபரிமா ந ஸமாபஜ்ஜந்தியேவாதி ஹேட்டா² தீணிபி ப²லானி ந லப்³ப⁴ந்தியேவ. ஜா²னஸமாபத்திவிபஸ்ஸனானேக்க²ம்மாதீ³னி ச கிரியாவஸேன லப்³ப⁴ந்தி. பஞ்சபி சேதானி இந்த்³ரியானி புப்³ப³மேவ படிபக்கா²னம் படிப்பஸ்ஸத்³த⁴த்தா படிபக்க²தோ நிஸ்ஸடானேவ ஹோந்தீதி.

து³தியஸுத்தந்தனித்³தே³ஸவண்ணனா நிட்டி²தா.