6. ஞாணராஸிச²க்கனித்³தே³ஸவண்ணனா

183. இதா³னி ச²ஹி ராஸீஹி உத்³தி³ட்ட²ஞாணேஸு சதுவீஸதிஸமாதி⁴ஞாணனித்³தே³ஸே தாவ காயானுபஸ்ஸனாதீ³னம் திண்ணம் சதுக்கானம் வஸேன த்³வாத³ஸன்னம் வத்தூ²னம் ஏகேகஸ்மிம் அஸ்ஸாஸவஸேன ஏகோ, பஸ்ஸாஸவஸேன ஏகோதி த்³வே த்³வே ஸமாதீ⁴தி த்³வாத³ஸஸு வத்தூ²ஸு சதுவீஸதி ஸமாத⁴யோ ஹோந்தி. ஜா²னக்க²ணே தேஹி ஸம்பயுத்தானி சதுவீஸதிஸமாதி⁴வஸேன ஞாணானி.

த்³வாஸத்ததிவிபஸ்ஸனாஞாணனித்³தே³ஸே தீ³க⁴ம் அஸ்ஸாஸாதி ‘‘தீ³க⁴’’ந்திவுத்தஅஸ்ஸாஸதோ. கிம் வுத்தம் ஹோதி? தீ³க⁴ம் அஸ்ஸாஸஹேது ஜா²னம் படிலபி⁴த்வா ஸமாஹிதேன சித்தேன விபஸ்ஸனாக்க²ணே அனிச்சதோ அனுபஸ்ஸனட்டே²ன விபஸ்ஸனாதி வுத்தம் ஹோதி. ஏஸ நயோ உத்தரத்ராபி. தேஸம்யேவ த்³வாத³ஸன்னம் வத்தூ²னம் ஏகேகஸ்மிம் அஸ்ஸாஸவஸேன திஸ்ஸோ, பஸ்ஸாஸவஸேன திஸ்ஸோதி ச² ச² அனுபஸ்ஸனாதி த்³வாத³ஸஸு வத்தூ²ஸு த்³வாஸத்ததி அனுபஸ்ஸனா ஹோந்தி. தா ஏவ த்³வாஸத்ததி அனுபஸ்ஸனா த்³வாஸத்ததிவிபஸ்ஸனாவஸேன ஞாணானி.

நிப்³பி³தா³ஞாணனித்³தே³ஸே அனிச்சானுபஸ்ஸீ அஸ்ஸஸந்தி அனிச்சானுபஸ்ஸீ ஹுத்வா அஸ்ஸஸந்தோ, அனிச்சானுபஸ்ஸீ ஹுத்வா வத்தேந்தோதி அத்தோ². ‘‘அஸ்ஸஸ’’ந்தி ச இத³ம் வசனம் ஹேதுஅத்தே² த³ட்ட²ப்³ப³ம். யதா²பூ⁴தம் ஜானாதி பஸ்ஸதீதி நிப்³பி³தா³ஞாணந்தி கலாபஸம்மஸனதோ பட்டா²ய யாவ ப⁴ங்கா³னுபஸ்ஸனா பவத்தவிபஸ்ஸனாஞாணேன ஸங்கா²ரானம் யதா²ஸபா⁴வம் ஜானாதி, சக்கு²னா தி³ட்ட²மிவ ச தேனேவ ஞாணசக்கு²னா பஸ்ஸதி. தஸ்மா நிப்³பி³தா³ஞாணம் நாமாதி அத்தோ², ஸங்கா²ரேஸு நிப்³பி³ந்த³ஞாணம் நாமாதி வுத்தம் ஹோதி. உபரி ப⁴யதூபட்டா²னாதீ³னம் முஞ்சிதுகம்யதாதீ³னஞ்ச ஞாணானம் விஸும் ஆக³தத்தா இத⁴ யதா²வுத்தானேவ விபஸ்ஸனாஞாணானி நிப்³பி³தா³ஞாணானீதி வேதி³தப்³பா³னி.

நிப்³பி³தா³னுலோமஞாணனித்³தே³ஸே அனிச்சானுபஸ்ஸீ அஸ்ஸஸந்தி அனிச்சானுபஸ்ஸினோ அஸ்ஸஸந்தஸ்ஸ. ஸாமிஅத்தே² பச்சத்தவசனம். ப⁴யதுபட்டா²னே பஞ்ஞாதிவசனேனேவ ப⁴யதுபட்டா²னஆதீ³னவானுபஸ்ஸனானிப்³பி³தா³னுபஸ்ஸனாஞாணானி வுத்தானி ஹோந்தி திண்ணம் ஏகலக்க²ணத்தா. இமானி தீணி ஞாணானி அனந்தரா வுத்தானம் நிப்³பி³தா³ஞாணானம் அனுகூலபா⁴வேன அனுலோமதோ நிப்³பி³தா³னுலோமஞாணானீதி வுத்தானி.

நிப்³பி³தா³படிப்பஸ்ஸத்³தி⁴ஞாணனித்³தே³ஸே அனிச்சானுபஸ்ஸீ அஸ்ஸஸந்தி அனந்தரஸதி³ஸமேவ. படிஸங்கா² ஸந்திட்ட²னா பஞ்ஞாதிவசனேனேவ முஞ்சிதுகம்யதாபடிஸங்கா²னுபஸ்ஸனாஸங்கா²ருபேக்கா²ஞாணானி வுத்தானி ஹோந்தி திண்ணம் ஏகலக்க²ணத்தா. ‘‘படிஸங்கா² ஸந்திட்ட²னா’’திவசனேனேவ அனுலோமஞாணமக்³க³ஞாணானிபி க³ஹிதானி ஹோந்தி. ஸங்கா²ருபேக்கா²ஞாணஅனுலோமஞாணானிபி ஹி நிப்³பி³தா³ய ஸிகா²ப்பத்தத்தா நிப்³பி³தா³ஜனனப்³யாபாரப்பஹானேன நிப்³பி³தா³படிப்பஸ்ஸத்³தி⁴ஞாணானி நாம ஹோந்தி. மக்³க³ஞாணம் பன நிப்³பி³தா³படிப்பஸ்ஸத்³த⁴ந்தே உப்பஜ்ஜனதோ நிப்³பி³தா³படிப்பஸ்ஸத்³தி⁴ஞாணம் நாம ஹோதீதி அதிவிய யுஜ்ஜதீதி. நிப்³பி³தா³னுலோமஞாணேஸு விய ஆதி³பூ⁴தம் முஞ்சிதுகம்யதாஞாணம் அக்³க³ஹேத்வா ‘‘படிஸங்கா² ஸந்திட்ட²னா’’தி அந்தே ஞாணத்³வயக்³க³ஹணம் மக்³க³ஞாணஸங்க³ஹணத்த²ம். முஞ்சிதுகம்யதாதி ஹி வுத்தே அனுலோமஞாணம் ஸங்க³ய்ஹதி, ந மக்³க³ஞாணம். மக்³க³ஞாணஞ்ஹி முஞ்சிதுகம்யதா நாம ந ஹோதி, கிச்சஸித்³தி⁴யம் ஸந்திட்ட²னதோ பன ஸந்திட்ட²னா நாம ஹோதி. அட்ட²கதா²யம்பி ச ‘‘பு²ஸனாதி அப்பனா’’தி வுத்தம். இத³ஞ்ச மக்³க³ஞாணம் நிப்³பா³னே அப்பனாதி கத்வா ஸந்திட்ட²னா நாம ஹோதீதி ‘‘ஸந்திட்ட²னா’’திவசனேன மக்³க³ஞாணம்பி ஸங்க³ய்ஹதி. நிப்³பி³தா³னுலோமஞாணானிபி அத்த²தோ நிப்³பி³தா³ஞாணானேவ ஹோந்தீதி தானிபி நிப்³பி³தா³ஞாணேஹி ஸங்க³ஹேத்வா நிப்³பி³தா³படிப்பஸ்ஸத்³தி⁴ஞாணானீதி நிப்³பி³தா³க³ஹணமேவ கதம், ந நிப்³பி³தா³னுலோமக்³க³ஹணம். தீஸுபி சேதேஸு ஞாணட்ட²கனித்³தே³ஸேஸு சதுத்த²ஸ்ஸ த⁴ம்மானுபஸ்ஸனாசதுக்கஸ்ஸ வஸேன வுத்தானம் சதுன்னம் வத்தூ²னம் ஏகேகஸ்மிம் அஸ்ஸாஸவஸேன ஏகம், பஸ்ஸாஸவஸேன ஏகந்தி த்³வே த்³வே ஞாணானீதி சதூஸு வத்தூ²ஸு அட்ட² ஞாணானி ஹோந்தி.

விமுத்திஸுக²ஞாணனித்³தே³ஸே பஹீனத்தாதி பஹானம் த³ஸ்ஸேத்வா தஸ்ஸ பஹானஸ்ஸ ஸமுச்சே²த³ப்பஹானத்தம் த³ஸ்ஸேந்தோ ஸமுச்சி²ன்னத்தாதி ஆஹ. விமுத்திஸுகே² ஞாணந்தி ப²லவிமுத்திஸுக²ஸம்பயுத்தஞாணஞ்ச ப²லவிமுத்திஸுகா²ரம்மணபச்சவேக்க²ணஞாணஞ்ச. அனுஸயவத்து²ஸ்ஸ கிலேஸஸ்ஸ பஹானேன பரியுட்டா²னது³ச்சரிதவத்து²ப்பஹானம் ஹோதீதி த³ஸ்ஸனத்த²ம் புன அனுஸயானம் பஹானம் வுத்தம். ஏகவீஸதிப²லஞாணம் ஸந்தா⁴ய பஹீனகிலேஸக³ணனாயபி ஞாணக³ணனா கதா ஹோதி, பச்சவேக்க²ணஞாணஞ்ச ஸந்தா⁴ய பஹீனகிலேஸபச்சவேக்க²ணக³ணனாய ப²லபச்சவேக்க²ணஞாணக³ணனா கதா ஹோதீதி.

ஞாணராஸிச²க்கனித்³தே³ஸவண்ணனா நிட்டி²தா.

ஸத்³த⁴ம்மப்பகாஸினியா படிஸம்பி⁴தா³மக்³க³ட்ட²கதா²ய

ஆனாபானஸ்ஸதிகதா²வண்ணனா நிட்டி²தா.