2. ஸோளஸஞாணனித்³தே³ஸவண்ணனா

153. ஸோளஸஹி ஆகாரேஹீதி உப⁴யபக்க²வஸேன வுத்தேஹி ஸோளஸஹி ஞாணகோட்டா²ஸேஹி. உது³சிதம் சித்தம் ஸமுது³சிதந்தி உபசாரபூ⁴மியம் சித்தம் உத்³த⁴ம் உசிதம், ஸம்மா உத்³த⁴ம் உசிதம், உபரூபரி கதபரிசயம் ஸம்மா உபரூபரி கதபரிசயந்தி அத்தோ². உது³ஜிதம் சித்தம் ஸமுது³ஜிதந்திபி பாடோ². உபரிபா⁴வாய ஜிதம், உபரிபா⁴வகரேஹி வா ஞாணேஹி ஜிதம் உது³ஜிதம். ஸமுது³ஜிதந்தி ஸமா உபரிபா⁴வாய, உபரிபா⁴வகரேஹி வா ஞாணேஹி ஜிதம். ஸமாதி சேத்த² விஸமபா⁴வபடிக்கே²போ. இமஸ்மிம் பாடே² உ, து³-இதி த்³வே த்³வே உபஸக்³கா³ ஹோந்தி. உரூஜிதம் சித்தம் ஸம்மாரூஜிதந்திபி பாடோ². ஏத்தா²பி ஜிதத்தோ²யேவ. உரூ அரூதி இத³ம் பன நிபாதமத்தமேவாதி வத³ந்தி. வீணோபமட்ட²கதா²ய தஜ்ஜிதம் ஸுதஜ்ஜிதந்தி ச அத்தோ² வுத்தோ, ஸோ இத⁴ ந யுஜ்ஜதி. ஏகத்தே ஸந்திட்ட²தீதி உபசாரபூ⁴மியம் தாவ நானாரம்மணவிக்கே²பாபா⁴வேன ஏகத்தே பதிட்டா²தி. நிய்யானாவரணட்டே²ன நீவரணாதி ஏத்த² அரதிபி ஸப்³பே³பி அகுஸலா ஆவரணட்டே²ன நீவரணாதி வுத்தா. நிய்யானாவரணட்டே²னாதி நிய்யானானம் ஆக³மனமக்³க³பித³ஹனட்டே²ன. நிய்யானவாரணட்டே²னாதிபி பாடோ², நிய்யானானம் படிக்கே²பனட்டே²னாதி அத்தோ². நேக்க²ம்மம் அரியானம் நிய்யானந்தி மக்³க³ட்டா²னம் அரியானம் நிய்யானஸங்கா²தஸ்ஸ அரியமக்³க³ஸ்ஸ ஹேதுத்தா ப²லூபசாரேன அரியானம் நிய்யானம். தேன ச ஹேதுபூ⁴தேன மக்³க³க்க²ணே அரியா நிய்யந்தி நிக³ச்ச²ந்தி. கேசி பன ‘‘நிய்யானந்தி மக்³கோ³’’தி வத³ந்தி. இத⁴ உபசாரஸ்ஸ அதி⁴ப்பேதத்தா மக்³க³க்க²ணே ச ஆலோகஸஞ்ஞாய ஸப்³ப³குஸலத⁴ம்மானஞ்ச அபா⁴வா தம் ந யுஜ்ஜதி. நிவுதத்தாதி படிச்ச²ன்னத்தா. நப்பஜானாதீதி புக்³க³லவஸேன வுத்தம்.

விஸுத்³த⁴சித்தஸ்ஸாதி உபசாரபூ⁴மியம்யேவ. க²ணிகஸமோதா⁴னாதி சித்தக்க²ணே சித்தக்க²ணே உப்பஜ்ஜனதோ க²ணோ ஏதேஸம் அத்தீ²தி க²ணிகா, உபக்கிலேஸா, க²ணிகானம் ஸமோதா⁴னோ ஸமாக³மோ பப³ந்தோ⁴ க²ணிகஸமோதா⁴னோ. தஸ்மா க²ணிகஸமோதா⁴னா, உப்பஜ்ஜமானா உபக்கிலேஸா க²ணிகப்பப³ந்த⁴வஸேன க²ணிகபரம்பராவஸேன உப்பஜ்ஜந்தி, ந ஏகசித்தக்க²ணவஸேனாதி வுத்தம் ஹோதி.

ஸோளஸஞாணனித்³தே³ஸவண்ணனா நிட்டி²தா.