7. அந்தக்³கா³ஹிகாதி³ட்டி²னித்³தே³ஸவண்ணனா

140. அந்தக்³கா³ஹிகாய தி³ட்டி²யா பட²மவாரே ஆகாரபுச்சா². து³தியே ஆகாரக³ஹணம். ததியே ஆகாரவிஸ்ஸஜ்ஜனம். தத்த² லோகோதி அத்தா. ஸோ அந்தோதி அஞ்ஞமஞ்ஞபடிபக்கே²ஸு ஸஸ்ஸதுச்சே²த³ந்தேஸு ஸஸ்ஸதக்³கா³ஹே ஸஸ்ஸதந்தோ, அஸஸ்ஸதக்³கா³ஹே உச்சே²த³ந்தோ. பரித்தம் ஓகாஸந்தி ஸுப்பமத்தம் வா ஸராவமத்தம் வா கு²த்³த³கம் டா²னம். நீலகதோ ப²ரதீதி நீலந்தி ஆரம்மணம் கரோதி. அயம் லோகோதி அத்தானம் ஸந்தா⁴ய வுத்தம். பரிவடுமோதி ஸமந்ததோ பரிச்சே²த³வா. அந்தஸஞ்ஞீதி அந்தவாதிஸஞ்ஞீ. அந்தோ அஸ்ஸ அத்தீ²தி அந்தோதி க³ஹேதப்³ப³ம். யம் ப²ரதீதி யம் கஸிணரூபம் ப²ரதி. தம் வத்து² சேவ லோகோ சாதி தம் கஸிணரூபம் ஆரம்மணஞ்சேவ ஆலோகியட்டே²ன லோகோ ச. யேன ப²ரதீதி யேன சித்தேன ப²ரதி. ஸோ அத்தா சேவ லோகோ சாதி அத்தானமபேக்கி²த்வா புல்லிங்க³ம் கதம், தம் சித்தம் அத்தா சேவ ஆலோகனட்டே²ன லோகோ சாதி வுத்தம் ஹோதி. அந்தவாதி அந்தோ. ஓகாஸகதோ ப²ரதீதி ஆலோககஸிணவஸேன தேஜோகஸிணவஸேன ஓதா³தகஸிணவஸேன வா ஓபா⁴ஸோதி ப²ரதி. நீலாதீ³னம் பஞ்சன்னம் பப⁴ஸ்ஸரகஸிணானம்யேவ க³ஹிதத்தா பத²வீஆபோவாயோகஸிணவஸேன அத்தாபி⁴னிவேஸோ ந ஹோதீதி க³ஹேதப்³ப³ம்.

விபுலம் ஓகாஸந்தி க²லமண்ட³லமத்தாதி³வஸேன மஹந்தம் டா²னம். அனந்தவாதி வுத்³த⁴அனந்தவா. அபரியந்தோதி வுத்³த⁴அபரியந்தோ. அனந்தஸஞ்ஞீதி அனந்தோதிஸஞ்ஞீ. தம் ஜீவந்தி ஸோ ஜீவோ. லிங்க³விபல்லாஸோ கதோ. ஜீவோதி ச அத்தா ஏவ. ரூபாதீ³னி பஞ்சபி பரிவடுமட்டே²ன ஸரீரம். ஜீவம் ந ஸரீரந்தி அத்தஸங்கா²தோ ஜீவோ ரூபஸங்கா²தம் ஸரீரம் ந ஹோதி. ஏஸ நயோ வேத³னாதீ³ஸு. ததா²க³தோதி ஸத்தோ. அரஹந்தி ஏகே. பரம் மரணாதி மரணதோ உத்³த⁴ம், பரலோகேதி அத்தோ². ரூபம் இதே⁴வ மரணத⁴ம்மந்தி அத்தனோ பாகடக்க²ந்த⁴ஸீஸேன பஞ்சக்க²ந்த⁴க்³க³ஹணம், தம் இமஸ்மிம்யேவ லோகே நஸ்ஸனபகதிகந்தி அத்தோ². ஸேஸக்க²ந்தே⁴ஸுபி ஏஸேவ நயோ. காயஸ்ஸ பே⁴தா³தி க²ந்த⁴பஞ்சகஸங்கா²தஸ்ஸ காயஸ்ஸ பே⁴த³தோ பரம். இமினா வசனேன ‘‘பரம் மரணா’’தி ஏதஸ்ஸ உத்³தே³ஸஸ்ஸ அத்தோ² வுத்தோ. ஹோதிபீதிஆதீ³ஸு ஹோதீதி மூலபத³ம். சதூஸுபி அபி-ஸத்³தோ³ ஸமுச்சயத்தோ². திட்ட²தீதி ஸஸ்ஸதத்தா திட்ட²தி, ந சவதீதி அத்தோ². ‘‘ஹோதீ’’தி பத³ஸ்ஸ வா அத்த²விஸேஸனத்த²ம் ‘‘திட்ட²தீ’’தி பத³ம் வுத்தந்தி வேதி³தப்³ப³ம். உப்பஜ்ஜதீதி அண்ட³ஜஜலாபு³ஜயோனிபவேஸவஸேன உப்பஜ்ஜதி நாம, நிப்³ப³த்ததீதி ஸம்ஸேத³ஜஓபபாதிகயோனிபவேஸவஸேன நிப்³ப³த்ததி நாமாதி அத்த²யோஜனா வேதி³தப்³பா³. உச்சி²ஜ்ஜதீதி பப³ந்தா⁴பா⁴வவஸேன. வினஸ்ஸதீதி ப⁴ங்க³வஸேன. ந ஹோதி பரம் மரணாதி புரிமபதா³னம் அத்த²விவரணம், சுதிதோ உத்³த⁴ம் ந விஜ்ஜதீதி அத்தோ². ஹோதி ச ந ச ஹோதீதி ஏகச்சஸஸ்ஸதிகானம் தி³ட்டி², ஏகேன பரியாயேன ஹோதி, ஏகேன பரியாயேன ந ஹோதீதி அத்தோ². ஜீவபா⁴வேன ஹோதி, புப்³ப³ஜீவஸ்ஸ அபா⁴வேன ந ஹோதீதி வுத்தம் ஹோதி. நேவ ஹோதி ந ந ஹோதீதி அமராவிக்கே²பிகானம் தி³ட்டி², ஹோதீதி ச நேவ ஹோதி, ந ஹோதீதி ச ந ஹோதீதி அத்தோ². அனுவாத³ப⁴யா முஸாவாத³ப⁴யா ச மந்த³த்தா மோமூஹத்தா ச புப்³ப³வுத்தனயஸ்ஸ படிக்கே²பமத்தம் கரோதி. இமேஹி பஞ்ஞாஸாய ஆகாரேஹீதி யதா²வுத்தானம் த³ஸன்னம் பஞ்சகானம் வஸேன பஞ்ஞாஸாய ஆகாரேஹீதி.

அந்தக்³கா³ஹிகாதி³ட்டி²னித்³தே³ஸவண்ணனா நிட்டி²தா.