8. புப்³ப³ந்தானுதி³ட்டி²னித்³தே³ஸவண்ணனா

141. புப்³ப³ந்தாபரந்தானுதி³ட்டீ²ஸு ஸஸ்ஸதம் வத³ந்தீதி ஸஸ்ஸதவாதா³. அத² வா வத³ந்தி ஏதேனாதி வாதோ³, தி³ட்டி²க³தஸ்ஸேதம் அதி⁴வசனம். ஸஸ்ஸதந்தி வாதோ³பி ஸஸ்ஸதயோகே³ன ஸஸ்ஸதோ, ஸஸ்ஸதோ வாதோ³ ஏதேஸந்தி ஸஸ்ஸதவாதா³. ததா² ஏகச்சம் ஸஸ்ஸதந்தி வாதோ³ ஏகச்சஸஸ்ஸதோ, ஸோ ஏதேஸம் அத்தீ²தி ஏகச்சஸஸ்ஸதிகா. ததா² அந்தவா, அனந்தவா, அந்தவா ச அனந்தவா ச, நேவந்தவா நானந்தவாதி பவத்தோ வாதோ³ அந்தானந்தோ, ஸோ ஏதேஸம் அத்தீ²தி அந்தானந்திகா. ந மரதீதி அமரா. கா ஸா? ‘‘ஏவம்பி மே நோ’’திஆதி³னா (தீ³. நி. 1.62-63) நயேன பரியந்தரஹிதஸ்ஸ தி³ட்டி²க³திகஸ்ஸ தி³ட்டி² சேவ வாசா ச. விவிதோ⁴ கே²போ விக்கே²போ, அமராய தி³ட்டி²யா, வாசாய வா விக்கே²போ அமராவிக்கே²போ, ஸோ ஏதேஸம் அத்தீ²தி அமராவிக்கே²பிகா. அபரோ நயோ – அமரா நாம மச்ச²ஜாதி, ஸா உம்முஜ்ஜனனிமுஜ்ஜனாதி³வஸேன உத³கே ஸந்தா⁴வமானா க³ஹேதும் ந ஸக்கா ஹோதி, ஏவமேவம் அயம்பி வாதோ³ இதோ சிதோ ச ஸந்தா⁴வதி, கா³ஹம் ந உபக³ச்ச²தீதி அமராவிக்கே²போதி வுச்சதி, ஸோ ஏதேஸம் அத்தீ²தி அமராவிக்கே²பிகா. அதி⁴ச்சஸமுப்பன்னோதி அகாரணஸமுப்பன்னோ அத்தா ச லோகோ சாதி த³ஸ்ஸனம் அதி⁴ச்சஸமுப்பன்னம், தம் ஏதேஸம் அத்தீ²தி அதி⁴ச்சஸமுப்பன்னிகா.

புப்³ப³ந்தானுதி³ட்டி²னித்³தே³ஸவண்ணனா நிட்டி²தா.