5. விராக³கதா²

விராக³கதா²வண்ணனா

28. இதா³னி மக்³க³பயோஜனபரியோஸானாய மேத்தாகதா²ய அனந்தரம் கதி²தாய விராக³ஸங்கா²தமக்³க³புப்³ப³ங்க³மாய விராக³கதா²ய அபுப்³ப³த்தா²னுவண்ணனா. தத்த² பட²மம் தாவ ‘‘நிப்³பி³ந்த³ம் விரஜ்ஜதி விராகா³ விமுச்சதீ’’தி (மஹாவ 23) வுத்தானம் த்³வின்னம் ஸுத்தந்தபதா³னம் அத்த²ம் நித்³தி³ஸிதுகாமேன விராகோ³ மக்³கோ³, விமுத்தி ப²லந்தி உத்³தே³ஸோ ட²பிதோ. தத்த² பட²மம் வசனத்த²ம் தாவ நித்³தி³ஸிதுகாமோ கத²ம் விராகோ³ மக்³கோ³திஆதி³மாஹ. தத்த² விரஜ்ஜதீதி விரத்தா ஹோதி. ஸேஸானி மக்³க³ஞாணனித்³தே³ஸே வுத்தத்தா²னி. விராகோ³தி யஸ்மா ஸம்மாதி³ட்டி² விரஜ்ஜதி, தஸ்மா விராகோ³ நாமாதி அத்தோ². ஸோ ச விராகோ³ யஸ்மா விராகா³ரம்மணோ…பே… விராகே³ பதிட்டி²தோ, தஸ்மா ச விராகோ³தி ஏவம் ‘‘விராகா³ரம்மணோ’’திஆதீ³னம் பஞ்சன்னம் வசனானம் ஸம்ப³ந்தோ⁴ வேதி³தப்³போ³. தத்த² விராகா³ரம்மணோதி நிப்³பா³னாரம்மணோ. விராக³கோ³சரோதி நிப்³பா³னவிஸயோ. விராகே³ ஸமுதா³க³தோதி நிப்³பா³னே ஸமுப்பன்னோ. விராகே³ டி²தோதி பவத்திவஸேன நிப்³பா³னே டி²தோ. விராகே³ பதிட்டி²தோதி அனிவத்தனவஸேன நிப்³பா³னே பதிட்டி²தோ.

நிப்³பா³னஞ்ச விராகோ³தி நிப்³பா³னம் விராக³ஹேதுத்தா விராகோ³. நிப்³பா³னாரம்மணதாஜாதாதி நிப்³பா³னாரம்மணே ஜாதா, நிப்³பா³னாரம்மணபா⁴வேன வா ஜாதா. தே மக்³க³ஸம்பயுத்தா ஸப்³பே³வ ப²ஸ்ஸாத³யோ த⁴ம்மா விரஜ்ஜனட்டே²ன விராகா³ ஹோந்தீதி விராகா³ நாம ஹோந்தி. ஸஹஜாதானீதி ஸம்மாதி³ட்டி²ஸஹஜாதானி ஸம்மாஸங்கப்பாதீ³னி ஸத்த மக்³க³ங்கா³னி. விராக³ம் க³ச்ச²ந்தீதி விராகோ³ மக்³கோ³தி விராக³ம் நிப்³பா³னம் ஆரம்மணம் கத்வா க³ச்ச²ந்தீதி விராகா³ரம்மணத்தா விராகோ³ நாம, மக்³க³னட்டே²ன மக்³கோ³ நாம ஹோதீதி அத்தோ². ஏகேகம்பி மக்³க³ங்க³ம் மக்³கோ³தி நாமம் லப⁴தி. இதி ஏகேகஸ்ஸ அங்க³ஸ்ஸ மக்³க³த்தே வுத்தே ஸம்மாதி³ட்டி²யாபி மக்³க³த்தம் வுத்தமேவ ஹோதி. தஸ்மாயேவ ச ஏதேன மக்³கே³னாதி அட்ட² மக்³க³ங்கா³னி க³ஹேத்வா வுத்தம். பு³த்³தா⁴ சாதி பச்சேகபு³த்³தா⁴பி ஸங்க³ஹிதா. தேபி ஹி ‘‘த்³வேமே, பி⁴க்க²வே, பு³த்³தா⁴ ததா²க³தோ ச அரஹம் ஸம்மாஸம்பு³த்³தோ⁴ பச்சேகபு³த்³தோ⁴ சா’’தி (அ. நி. 2.57) வுத்தத்தா பு³த்³தா⁴யேவ. அக³தந்தி அனமதக்³கே³ ஸம்ஸாரே அக³தபுப்³ப³ம். தி³ஸந்தி ஸகலாயபடிபத்தியா தி³ஸ்ஸதி அபதி³ஸ்ஸதி அபி⁴ஸந்த³ஹீயதீதி தி³ஸா, ஸப்³ப³பு³த்³தே⁴ஹி வா பரமம் ஸுக²ந்தி தி³ஸ்ஸதி அபதி³ஸ்ஸதி கதீ²யதீதி தி³ஸா, ஸப்³ப³து³க்க²ம் வா தி³ஸ்ஸந்தி விஸ்ஸஜ்ஜேந்தி உஜ்ஜ²ந்தி ஏதாயாதி தி³ஸா. தம் தி³ஸம். அட்ட²ங்கி³கோ மக்³கோ³தி கிம் வுத்தம் ஹோதி? யோ ஸோ அட்ட²ங்கி³கோ த⁴ம்மஸமூஹோ, ஸோ ஏதேன நிப்³பா³னம் க³ச்ச²ந்தீதி க³மனட்டே²ன மக்³கோ³ நாமாதி வுத்தம் ஹோதி. புது²ஸமணப்³ராஹ்மணானம் பரப்பவாதா³னந்தி விஸும் விஸும் ஸமணானம் ப்³ராஹ்மணானஞ்ச இதோ அஞ்ஞலத்³தி⁴கானம். அக்³கோ³தி தேஸம் ஸேஸமக்³கா³னம் விஸிட்டோ². ஸேட்டோ²தி ஸேஸமக்³க³தோ அதிவிய பஸம்ஸனீயோ. மோக்கோ²தி முகே² ஸாது⁴, ஸேஸமக்³கா³னம் அபி⁴முகே² அயமேவ ஸாதூ⁴தி அத்தோ². உத்தமோதி ஸேஸமக்³கே³ அதிவிய உத்திண்ணோ. பவரோதி ஸேஸமக்³க³தோ நானப்பகாரேஹி ஸம்ப⁴ஜனீயோ. இதீதி காரணத்தே² நிபாதோ. தஸ்மா ப⁴க³வதா ‘‘மக்³கா³னம் அட்ட²ங்கி³கோ ஸேட்டோ²’’தி வுத்தோதி அதி⁴ப்பாயோ. வுத்தஞ்ஹி ப⁴க³வதா –

‘‘மக்³கா³னட்ட²ங்கி³கோ ஸேட்டோ², ஸச்சானம் சதுரோ பதா³;

விராகோ³ ஸேட்டோ² த⁴ம்மானம், த்³விபதா³னஞ்ச சக்கு²மா’’தி. (த⁴. ப. 273);

தம் இத⁴ விச்சி²ந்தி³த்வா ‘‘மக்³கா³னம் அட்ட²ங்கி³கோ ஸேட்டோ²’’தி வுத்தம். ஸேஸவாரேஸுபி இமினா ச நயேன ஹேட்டா² வுத்தனயேன ச அத்தோ² வேதி³தப்³போ³.

த³ஸ்ஸனவிராகோ³திஆதீ³ஸு த³ஸ்ஸனஸங்கா²தோ விராகோ³ த³ஸ்ஸனவிராகோ³. இந்த்³ரியட்ட²தோ ப³லஸ்ஸ விஸிட்ட²த்தா இத⁴ இந்த்³ரியதோ ப³லம் பட²மம் வுத்தந்தி வேதி³தப்³ப³ம். ஆதி⁴பதேய்யட்டே²ன இந்த்³ரியானீதிஆதி³ இந்த்³ரியாதீ³னம் அத்த²விபா⁴வனா, ந விராக³ஸ்ஸ. தத²ட்டே²ன ஸச்சாதி ஸச்சஞாணம் வேதி³தப்³ப³ம். ஸீலவிஸுத்³தீ⁴தி ஸம்மாவாசாகம்மந்தாஜீவா. சித்தவிஸுத்³தீ⁴தி ஸம்மாஸமாதி⁴. தி³ட்டி²விஸுத்³தீ⁴தி ஸம்மாதி³ட்டி²ஸங்கப்பா. விமுத்தட்டே²னாதி தம்தம்மக்³க³வஜ்ஜ²கிலேஸேஹி முத்தட்டே²ன. விஜ்ஜாதி ஸம்மாதி³ட்டி². விமுத்தீதி ஸமுச்சே²த³விமுத்தி. அமதோக³த⁴ம் நிப்³பா³னம் பரியோஸானட்டே²ன மக்³கோ³தி மக்³க³ப²லபச்சவேக்க²ணாஹி மக்³கீ³யதீதி மக்³கோ³.

இமஸ்மிம் விராக³னித்³தே³ஸே வுத்தா த⁴ம்மா ஸப்³பே³பி மக்³க³க்க²ணேயேவ. விமுத்தினித்³தே³ஸே ப²லக்க²ணே. தஸ்மா ச²ந்த³மனஸிகாராபி மக்³க³ப²லஸம்பயுத்தா.

29. விராக³னித்³தே³ஸே வுத்தனயேனேவ விமுத்தினித்³தே³ஸேபி அத்தோ² வேதி³தப்³போ³. ப²லம் பனேத்த² படிப்பஸ்ஸத்³தி⁴விமுத்தத்தா விமுத்தி, நிப்³பா³னம் நிஸ்ஸரணவிமுத்தத்தா விமுத்தி. ‘‘ஸஹஜாதானி ஸத்தங்கா³னீ’’திஆதீ³னி வசனானி இத⁴ ந லப்³ப⁴ந்தீதி ந வுத்தானி. ஸயம் ப²லவிமுத்தத்தா பரிச்சாக³ட்டே²ன விமுத்தீதி ஏத்தகமேவ வுத்தம். ஸேஸம் வுத்தனயமேவாதி.

விராக³கதா²வண்ணனா நிட்டி²தா.