4. மேத்தாகதா²

மேத்தாகதா²வண்ணனா

22. இதா³னி போ³ஜ்ஜ²ங்க³கதா²னந்தரம் கதி²தாய போ³ஜ்ஜ²ங்க³கதா²க³தியா ஸுத்தந்தபுப்³ப³ங்க³மாய மேத்தாகதா²ய அபுப்³ப³த்தா²னுவண்ணனா. தத்த² ஸுத்தந்தே தாவ ஆஸேவிதாயாதி ஆத³ரேன ஸேவிதாய. பா⁴விதாயாதி வட்³டி⁴தாய. ப³ஹுலீகதாயாதி புனப்புனம் கதாய. யானீகதாயாதி யுத்தயானஸதி³ஸாய கதாய. வத்து²கதாயாதி பதிட்டா²னட்டே²ன வத்து² விய கதாய. அனுட்டி²தாயாதி பச்சுபட்டி²தாய. பரிசிதாயாதி ஸமந்ததோ சிதாய உபசிதாய. ஸுஸமாரத்³தா⁴யாதி ஸுட்டு² ஸமாரத்³தா⁴ய ஸுகதாய. ஆனிஸம்ஸாதி கு³ணா. பாடிகங்கா²தி படிகங்கி²தப்³பா³ இச்சி²தப்³பா³. ஸுக²ம் ஸுபதீதி யதா² ஸேஸஜனா ஸம்பரிவத்தமானா காகச்ச²மானா து³க்க²ம் ஸுபந்தி, ஏவம் அஸுபித்வா ஸுக²ம் ஸுபதி. நித்³த³ம் ஓக்கந்தோபி ஸமாபத்திம் ஸமாபன்னோ விய ஹோதி. ஸுக²ம் படிபு³ஜ்ஜ²தீதி யதா² அஞ்ஞே நித்து²னந்தா விஜம்ப⁴ந்தா ஸம்பரிவத்தந்தா து³க்க²ம் படிபு³ஜ்ஜ²ந்தி, ஏவம் அபடிபு³ஜ்ஜி²த்வா விகஸமானமிவ பது³மம் ஸுக²ம் நிப்³பி³காரம் படிபு³ஜ்ஜ²தி. ந பாபகம் ஸுபினம் பஸ்ஸதீதி ஸுபினம் பஸ்ஸந்தோபி ப⁴த்³த³கமேவ ஸுபினம் பஸ்ஸதி. சேதியம் வந்த³ந்தோ விய பூஜம் கரோந்தோ விய த⁴ம்மம் ஸுணந்தோ விய ச ஹோதி. யதா² பனஞ்ஞே அத்தானம் சோரேஹி பரிவாரிதம் விய வாளேஹி உபத்³து³தம் விய பபாதே பதந்தம் விய ச பஸ்ஸந்தி, ந ஏவம் பாபகம் ஸுபினம் பஸ்ஸதி. மனுஸ்ஸானம் பியோ ஹோதீதி உரே ஆமுத்தமுத்தாஹாரோ விய ஸீஸே பிளந்த⁴மாலா விய ச மனுஸ்ஸானம் பியோ ஹோதி மனாபோ. அமனுஸ்ஸானம் பியோ ஹோதீதி யதே²வ ச மனுஸ்ஸானம், ஏவம் அமனுஸ்ஸானம்பி பியோ ஹோதி. தே³வதா ரக்க²ந்தீதி புத்தமிவ மாதாபிதரோ தே³வதா ரக்க²ந்தி. நாஸ்ஸ அக்³கி³ வா விஸம் வா ஸத்த²ம் வா கமதீதி மேத்தாவிஹாரிஸ்ஸ காயே அக்³கி³ வா விஸம் வா ஸத்த²ம் வா ந கமதி ந பவிஸதி, நாஸ்ஸ காயம் விகோபேதீதி வுத்தம் ஹோதி. துவடம் சித்தம் ஸமாதி⁴யதீதி மேத்தாவிஹாரினோ கி²ப்பமேவ சித்தம் ஸமாதி⁴யதி, நத்தி² தஸ்ஸ த³ந்தா⁴யிதத்தம். முக²வண்ணோ விப்பஸீத³தீதி ப³ந்த⁴னா பமுத்ததாலபக்கம் விய சஸ்ஸ விப்பஸன்னவண்ணம் முக²ம் ஹோதி. அஸம்மூள்ஹோ காலம் கரோதீதி மேத்தாவிஹாரினோ ஸம்மோஹமரணம் நாம நத்தி², அஸம்மூள்ஹோ நித்³த³ம் ஓக்கமந்தோ விய காலம் கரோதி. உத்தரி அப்படிவிஜ்ஜ²ந்தோதி மேத்தாஸமாபத்திதோ உத்தரிம் அரஹத்தம் அதி⁴க³ந்தும் அஸக்கோந்தோ இதோ சவித்வா ஸுத்தப்பபு³த்³தோ⁴ விய ப்³ரஹ்மலோகூபகோ³ ஹோதீதி ப்³ரஹ்மலோகம் உபபஜ்ஜதீதி அத்தோ².

மேத்தானித்³தே³ஸே அனோதி⁴ஸோ ப²ரணாதி ஓதி⁴ மரியாதா³, ந ஓதி⁴ அனோதி⁴. ததோ அனோதி⁴ஸோ, அனோதி⁴தோதி அத்தோ², நிப்பதே³ஸதோ பு²ஸனாதி வுத்தம் ஹோதி. ஓதி⁴ஸோதி பதே³ஸவஸேன. தி³ஸாப²ரணாதி தி³ஸாஸு ப²ரணா. ஸப்³பே³தி அனவஸேஸபரியாதா³னம். ஸத்தாதிபத³ஸ்ஸ அத்தோ² ஞாணகதா²மாதிகாவண்ணனாயம் வுத்தோ, ருள்ஹீஸத்³தே³ன பன வீதராகே³ஸுபி அயம் வோஹாரோ வத்ததி விலீவமயேபி பீ³ஜனிவிஸேஸே தாலவண்டவோஹாரோ விய. அவேராதி வேரரஹிதா. அப்³யாபஜ்ஜாதி ப்³யாபாத³ரஹிதா. அனீகா⁴தி நித்³து³க்கா². அனிக்³கா⁴திபி பாடோ². ஸுகீ² அத்தானம்பரிஹரந்தூதி ஸுகி²தா ஹுத்வா அத்தபா⁴வம் வத்தயந்து. ‘‘அவேரா’’தி ச ஸகஸந்தானே ச பரே படிச்ச, பரஸந்தானே ச இதரே படிச்ச வேராபா⁴வோ த³ஸ்ஸிதோ, ‘‘அப்³யாபஜ்ஜா’’திஆதீ³ஸு வேராபா⁴வா தம்மூலகப்³யாபாதா³பா⁴வோ, ‘‘அனீகா⁴’’தி ப்³யாபாதா³பா⁴வா தம்மூலகது³க்கா²பா⁴வோ, ‘‘ஸுகீ² அத்தானம் பரிஹரந்தூ’’தி து³க்கா²பா⁴வாஸுகே²ன அத்தபா⁴வபரிஹரணம் த³ஸ்ஸிதந்தி ஏவமேத்த² வசனஸம்ப³ந்தோ⁴ வேதி³தப்³போ³தி. இமேஸு ச ‘‘அவேரா ஹோந்தூ’’திஆதீ³ஸு சதூஸுபி வசனேஸு யம் யம் பாகடம் ஹோதி, தஸ்ஸ தஸ்ஸ வஸேன மேத்தாய ப²ரதி.

பாணாதிஆதீ³ஸு பாணனதாய பாணா, அஸ்ஸாஸபஸ்ஸாஸாயத்தவுத்திதாயாதி அத்தோ². பூ⁴தத்தா பூ⁴தா, அபி⁴னிப்³ப³த்தாதி அத்தோ². பும் வுச்சதி நிரயோ, தம் பும் க³லந்தி க³ச்ச²ந்தீதி புக்³க³லா. அத்தபா⁴வோ வுச்சதி ஸரீரம், க²ந்த⁴பஞ்சகமேவ வா, தம் உபாதா³ய பஞ்ஞத்திமத்தஸப்³பா⁴வதோ, தஸ்மிம் அத்தபா⁴வே பரியாபன்னா பரிச்சி²ன்னா அந்தோக³தா⁴தி அத்தபா⁴வபரியாபன்னா. யதா² ச ஸத்தாதி வசனம், ஏவம் ஸேஸானிபி ருள்ஹீவஸேன ஆரோபேத்வா ஸப்³பா³னேதானி ஸப்³ப³ஸத்தவேவசனானீதி வேதி³தப்³பா³னி. காமஞ்ச அஞ்ஞானிபி ‘‘ஸப்³பே³ ஜந்தூ ஸப்³பே³ ஜீவா’’திஆதீ³னி ஸப்³ப³ஸத்தவேவசனானி அத்தி², பாகடவஸேன பன இமானேவ பஞ்ச க³ஹேத்வா ‘‘பஞ்சஹாகாரேஹி அனோதி⁴ஸோ ப²ரணா மேத்தாசேதோவிமுத்தீ’’தி வுச்சதி. யே பன ‘‘ஸத்தா பாணா’’திஆதீ³னம் ந கேவலம் வசனமத்ததோவ, அத² கோ² அத்த²தோபி நானத்தமேவ இச்சே²ய்யும், தேஸம் அனோதி⁴ஸோ ப²ரணா விருஜ்ஜ²தி. தஸ்மா ததா² அத்த²ம் அக்³க³ஹேத்வா இமேஸு பஞ்சஸு ஆகாரேஸு அஞ்ஞதரவஸேன அனோதி⁴ஸோ மேத்தாய ப²ரதி.

ஓதி⁴ஸோ ப²ரணே பன இத்தி²யோ புரிஸாதி லிங்க³வஸேன வுத்தம், அரியா அனரியாதி அரியபுது²ஜ்ஜனவஸேன, தே³வாமனுஸ்ஸா வினிபாதிகாதி உபபத்திவஸேன. தி³ஸாப²ரணேபி தி³ஸாவிபா⁴க³ம் அகத்வா ஸப்³ப³தி³ஸாஸு ‘‘ஸப்³பே³ ஸத்தா’’திஆதி³னா நயேன ப²ரணதோ அனோதி⁴ஸோ ப²ரணா ஹோதி, ஸப்³ப³தி³ஸாஸு ‘‘ஸப்³பா³ இத்தி²யோ’’திஆதி³னா நயேன ப²ரணதோ ஓதி⁴ஸோ ப²ரணா.

யஸ்மா பன அயம் திவிதா⁴பி மேத்தாப²ரணா அப்பனாபத்தசித்தஸ்ஸ வஸேன வுத்தா, தஸ்மா தீஸு வாரேஸு அப்பனா க³ஹேதப்³பா³. அனோதி⁴ஸோ ப²ரணே தாவ ‘‘ஸப்³பே³ ஸத்தா அவேரா ஹோந்தூ’’தி ஏகா, ‘‘அப்³யாபஜ்ஜா ஹோந்தூ’’தி ஏகா ‘‘அனீகா⁴ ஹோந்தூ’’தி ஏகா, ‘‘ஸுகீ² அத்தானம் பரிஹரந்தூ’’தி ஏகா. தானிபி ஹி சத்தாரி ஹிதோபஸம்ஹாரவஸேனேவ வுத்தானி. ஹிதோபஸம்ஹாரலக்க²ணா ஹி மேத்தா. இதி ‘‘ஸத்தா’’திஆதீ³ஸு பஞ்சஸு ஆகாரேஸு சதஸ்ஸன்னம் சதஸ்ஸன்னம் அப்பனானம் வஸேன வீஸதி அப்பனா ஹோந்தி, ஓதி⁴ஸோ ப²ரணே ‘‘ஸப்³பா³ இத்தி²யோ’’திஆதீ³ஸு ஸத்தஸு ஆகாரேஸு சதஸ்ஸன்னம் சதஸ்ஸன்னம் வஸேன அட்ட²வீஸதி அப்பனா. தி³ஸாப²ரணே பன ‘‘ஸப்³பே³ புரத்தி²மாய தி³ஸாய ஸத்தா’’திஆதி³னா நயேன ஏகமேகிஸ்ஸா தி³ஸாய வீஸதி வீஸதி கத்வா த்³வே ஸதானி, ‘‘ஸப்³பா³ புரத்தி²மாய தி³ஸாய இத்தி²யோ’’திஆதி³னா நயேன ஏகமேகிஸ்ஸா தி³ஸாய அட்ட²வீஸதி அட்ட²வீஸதி கத்வா அஸீதி த்³வே ஸதானீதி சத்தாரி ஸதானி அஸீதி ச அப்பனா. இதி ஸப்³பா³னிபி இத⁴ வுத்தானி அட்ட²வீஸாதி⁴கானி பஞ்ச அப்பனாஸதானி ஹோந்தி. யதா² ச மேத்தாய திவிதே⁴ன ப²ரணா வுத்தா, ததா² கருணாமுதி³தாஉபேக்கா²னம்பி வுத்தாவ ஹோதீதி வேதி³தப்³ப³ம்.

1. இந்த்³ரியவாரவண்ணனா

23. அத² மேத்தூபஸம்ஹாராகாரம் இந்த்³ரியாதி³பரிபா⁴வனஞ்ச த³ஸ்ஸேதும் ஸப்³பே³ஸம் ஸத்தானம் பீளனம் வஜ்ஜேத்வாதிஆதி³மாஹ. தத்த² பீளனந்தி அப்³ப⁴ந்தரதோ ஸரீரபீளனம். உபகா⁴தந்தி பா³ஹிரதோ ஸரீரோபகா⁴தம். ஸந்தாபந்தி யதா² ததா² வா சித்தஸந்தாபனம். பரியாதா³னந்தி பகதியா ஜீவிதாதி³பரிக்க²யம். விஹேஸந்தி பரதோ ஜீவிதவிஹேட²னம். வஜ்ஜேத்வாதி பீளனாதீ³ஸு ஏகேகம் அத்தனோ சித்தேனேவ அபனேத்வா. இமானி பீளனாதீ³னி பஞ்ச பதா³னி மேத்தோபஸம்ஹாரஸ்ஸ படிபக்க²விவஜ்ஜனவஸேன வுத்தானி, அபீளனாயாதிஆதீ³னி மேத்தோபஸம்ஹாரவஸேன. அபீளனாயாதி அபீளனாகாரேன, ஸப்³பே³ ஸத்தே மேத்தாயதீதி ஸம்ப³ந்தோ⁴. ஏவம் ஸேஸேஸுபி. மா வேரினோ மா து³க்கி²னோ மா து³க்கி²தத்தாதி இமானிபி தீணி மேத்தோபஸம்ஹாரஸ்ஸ படிபக்க²படிக்கே²பவசனானி. மா-வசனஸ்ஸ மா ஹோந்தூதி அத்தோ². அவேரினோ ஸுகி²னோ ஸுகி²தத்தாதி இமானி தீணி மேத்தோபஸம்ஹாரவசனானி. ‘‘அப்³யாபஜ்ஜா அனீகா⁴’’தி இத³ம் த்³வயம் ‘‘ஸுகி²னோ’’தி வசனேன ஸங்க³ஹிதந்தி வேதி³தப்³ப³ம். ஸுகி²தத்தாதி தஸ்ஸேவ ஸுக²ஸ்ஸ நிச்சப்பவத்தித³ஸ்ஸனம். ‘‘ஸுகி²தத்தா’’தி ச ‘‘ஸுகீ² அத்தானம் பரிஹரந்தூ’’தி ச அத்த²தோ ஏகம். ‘‘அபீளனாயா’’திஆதீ³ஹி வா அப்³யாபஜ்ஜானீக⁴வசனானி ஸங்க³ஹிதானி. அட்ட²ஹாகாரேஹீதி ‘‘அபீளனாயா’’திஆத³யோ பஞ்ச மேத்தோபஸம்ஹாராகாரா ‘‘அவேரினோ ஹோந்தூ’’திஆத³யோ தயோ மேத்தோபஸம்ஹாராகாராதி இமேஹி அட்ட²ஹாகாரேஹி. மேத்தாயதீதி ஸினிய்ஹதி. தம் த⁴ம்மம் சேதயதீதி தம் ஹிதோபஸம்ஹாரம் சேதயதி அபி⁴ஸந்த³ஹதி, பவத்தேதீதி அத்தோ². ஸப்³ப³ப்³யாபாத³பரியுட்டா²னேஹி விமுச்சதீதி மேத்தாய படிபக்க²பூ⁴தேஹி ஸப்³பே³ஹி ப்³யாபாத³ஸமுதா³சாரேஹி விக்க²ம்ப⁴னதோ விமுச்சதி. மேத்தா ச சேதோ ச விமுத்தி சாதி ஏகாயேவ மேத்தா திதா⁴ வண்ணிதா.

அவேரினோ கே²மினோ ஸுகி²னோதி இமானி தீணி பதா³னி புப்³பே³ வுத்தே ஆகாரே ஸங்கே²பேன ஸங்க³ஹேத்வா வுத்தானி. ஸத்³தா⁴ய அதி⁴முச்சதீதிஆதி³னா நயேன வுத்தானி பஞ்சிந்த்³ரியானி மேத்தாய ஸம்பயுத்தானியேவ. ஆஸேவனாதிஆதீ³ஸு ச²ஸு வாரேஸு ஆஸேவீயதி ஏதேஹி மேத்தாதி ஆஸேவனா. ததா² பா⁴வனா ப³ஹுலீகம்மம். அலங்காராதி விபூ⁴ஸனா. ஸ்வாலங்கதாதி ஸுட்டு² அலங்கதா பூ⁴ஸிதா. பரிக்கா²ராதி ஸம்பா⁴ரா. ஸுபரிக்க²தாதி ஸுட்டு² ஸம்ப⁴தா. பரிவாராதி ரக்க²னட்டே²ன. புன ஆஸேவனாதீ³னி அட்ட²வீஸதி பதா³னி மேத்தாய வண்ணப⁴ணனத்த²ம் வுத்தானி. தத்த² பாரிபூரீதி பரிபுண்ணபா⁴வா. ஸஹக³தாதி மேத்தாய ஸஹக³தா. ததா² ஸஹஜாதாத³யோ. பக்க²ந்த³னாதி மேத்தாய பவிஸனா, பக்க²ந்த³தி ஏதேஹி மேத்தாதி வா பக்க²ந்த³னா. ததா² ஸம்ஸீத³னாத³யோ. ஏதம் ஸந்தந்தி ப²ஸ்ஸனாதி ஏஸா மேத்தா ஸந்தாதி ஏதேஹி ப²ஸ்ஸனா ஹோதீதி ஏதம் ஸந்தந்தி ப²ஸ்ஸனா ‘‘ஏதத³க்³க³’’ந்திஆதீ³ஸு (அ. நி. 1.188 ஆத³யோ) விய நபும்ஸகவசனம். ஸ்வாதி⁴ட்டி²தாதி ஸுட்டு² பதிட்டி²தா. ஸுஸமுக்³க³தாதி ஸுட்டு² ஸமுஸ்ஸிதா. ஸுவிமுத்தாதி அத்தனோ அத்தனோ பச்சனீகேஹி ஸுட்டு² விமுத்தா. நிப்³ப³த்தேந்தீதி மேத்தாஸம்பயுத்தா ஹுத்வா மேத்தம் நிப்³ப³த்தேந்தி. ஜோதேந்தீதி பாகடம் கரோந்தி. பதாபேந்தீதி விரோசேந்தி.

2-4. ப³லாதி³வாரத்தயவண்ணனா

24-27. இந்த்³ரியவாரே வுத்தனயேனேவ ப³லவாரோபி வேதி³தப்³போ³. போ³ஜ்ஜ²ங்க³மக்³க³ங்க³வாரா பரியாயேன வுத்தா, ந யதா²லக்க²ணவஸேன. மக்³க³ங்க³வாரே ஸம்மாவாசாகம்மந்தாஜீவா மேத்தாய புப்³ப³பா⁴க³வஸேன வுத்தா, ந அப்பனாவஸேன. ந ஹி ஏதே மேத்தாய ஸஹ ப⁴வந்தி. ஸப்³பே³ஸம் பாணானந்திஆதீ³னம் ஸேஸவாரானம்பி ஸத்தவாரே வுத்தனயேனேவ அத்தோ² வேதி³தப்³போ³. மேத்தாபா⁴வனாவிதா⁴னம் பன விஸுத்³தி⁴மக்³க³தோ (விஸுத்³தி⁴. 1.240 ஆத³யோ) க³ஹேதப்³ப³ந்தி.

மேத்தாகதா²வண்ணனா நிட்டி²தா.