7. காமயோக³ஸுத்தவண்ணனா

96. ஸத்தமே காமயோக³யுத்தோதி பஞ்சகாமகு³ணிகோ ராகோ³ காமயோகோ³, தேன யுத்தோ காமயோக³யுத்தோ, அஸமுச்சி²ன்னகாமராக³ஸ்ஸேதம் அதி⁴வசனம். ரூபாரூபப⁴வேஸு ச²ந்த³ராகோ³ ப⁴வயோகோ³, ததா² ஜா²னனிகந்தி ஸஸ்ஸததி³ட்டி²ஸஹக³தோ ச ராகோ³, தேன யுத்தோ ப⁴வயோக³யுத்தோ, அப்பஹீனப⁴வராகோ³தி அத்தோ². ஆகா³மீதி ப்³ரஹ்மலோகே டி²தோபி படிஸந்தி⁴க்³க³ஹணவஸேன இமம் மனுஸ்ஸலோகம் ஆக³மனஸீலோ. தேனேவாஹ ‘‘ஆக³ந்தா இத்த²த்த’’ந்தி. மனுஸ்ஸத்தபா⁴வஸங்கா²தம் இத்த²பா⁴வம் ஆக³மனத⁴ம்மோ, மனுஸ்ஸேஸு உபபஜ்ஜனஸீலோதி அத்தோ². காமஞ்சேத்த² காமயோகோ³ இத்த²த்தம் ஆக³மனஸ்ஸ காரணம். யோ பன காமயோக³யுத்தோ, ஸோ ஏகந்தேன ப⁴வயோக³யுத்தோபி ஹோதீதி த³ஸ்ஸனத்த²ம் ‘‘காமயோக³யுத்தோ, பி⁴க்க²வே, ப⁴வயோக³யுத்தோ’’தி உப⁴யம்பி ஏகஜ்ஜ²ம் கத்வா வுத்தம்.

காமயோக³விஸம்யுத்தோதி ஏத்த² அஸுப⁴ஜ்ஜா²னம்பி காமயோக³விஸம்யோகோ³, தம் பாத³கம் கத்வா அதி⁴க³தோ அனாகா³மிமக்³கோ³ ஏகந்தேனேவ காமயோக³விஸம்யோகோ³ நாம, தஸ்மா ததியமக்³க³ப²லே டி²தோ அரியபுக்³க³லோ ‘‘காமயோக³விஸம்யுத்தோ’’தி வுத்தோ. யஸ்மா பன ரூபாரூபப⁴வேஸு ச²ந்த³ராகோ³ அனாகா³மிமக்³கே³ன ந பஹீயதி, தஸ்மா ஸோ அப்பஹீனப⁴வயோக³த்தா ‘‘ப⁴வயோக³யுத்தோ’’தி வுத்தோ. அனாகா³மீதி காமலோகம் படிஸந்தி⁴க்³க³ஹணவஸேன அனாக³மனதோ அனாகா³மீ. காமயோக³விஸம்யோக³வஸேனேவ ஹி ஸத்³தி⁴ம் அனவஸேஸஓரம்பா⁴கி³யஸம்யோஜனஸமுக்³கா⁴தேன அஜ்ஜ²த்தஸம்யோஜனாபா⁴வஸித்³தி⁴தோ இத்த²த்தம் அனாக³ந்த்வா ஹோதி, தத்த² பரினிப்³பா³யீ அனாவத்தித⁴ம்மோ. யஸ்ஸ பன அனவஸேஸம் ப⁴வயோகோ³ பஹீனோ, தஸ்ஸ அவிஜ்ஜாயோகா³தி³அவஸிட்ட²கிலேஸாபி ததே³கட்ட²பா⁴வதோ பஹீனா ஏவ ஹோந்தீதி, ஸோ பரிக்கீ²ணப⁴வஸம்யோஜனோ ‘‘அரஹம் கீ²ணாஸவோ’’தி வுச்சதி. தேன வுத்தம் ‘‘காமயோக³விஸம்யுத்தோ, பி⁴க்க²வே, ப⁴வயோக³விஸம்யுத்தோ அரஹம் ஹோதி கீ²ணாஸவோ’’தி. ஏத்த² ச காமயோக³விஸம்யோகோ³ அனாகா³மீ சதுத்த²ஜ்ஜா²னஸ்ஸ ஸுக²து³க்க²ஸோமனஸ்ஸதோ³மனஸ்ஸப்பஹானம் விய, ததியமக்³க³ஸ்ஸ தி³ட்டி²விசிகிச்சா²ஸீலப்³ப³தபராமாஸஸம்யோஜனபரிக்க²யோ விய ச சதுத்த²மக்³க³ஸ்ஸ வண்ணப⁴ணனத்த²ம் வுத்தோதி த³ட்ட²ப்³ப³ம். பட²மபதே³ன ஸோதாபன்னஸகதா³கா³மீஹி ஸத்³தி⁴ம் ஸப்³போ³ புது²ஜ்ஜனோ க³ஹிதோ, து³தியபதே³ன பன ஸப்³போ³ அனாகா³மீ, ததியபதே³ன அரஹாதி அரஹத்தனிகூடேன தே³ஸனம் நிட்டா²பேஸி.

கா³தா²ஸு உப⁴யந்தி உப⁴யேன, காமயோகே³ன, ப⁴வயோகே³ன ச ஸம்யுத்தாதி அத்தோ². ஸத்தா க³ச்ச²ந்தி ஸம்ஸாரந்தி புது²ஜ்ஜனா ஸோதாபன்னா ஸகதா³கா³மினோதி இமே திவிதா⁴ ஸத்தா காமயோக³ப⁴வயோகா³னம் அப்பஹீனத்தா க³ச்ச²ந்தி ஸம்ஸாரந்தி. ததோ ஏவ ஜாதிமரணகா³மினோ ஹோந்தி. ஏத்த² ஏகபீ³ஜீ, கோலம்கோலோ, ஸத்தக்க²த்துபரமோதி தீஸு ஸோதாபன்னேஸு ஸப்³ப³முது³ ஸத்தக்க²த்துபரமோ, ஸோ அட்ட²மம் ப⁴வம் ந நிப்³ப³த்தேதி, அத்தனோ பரிச்சி²ன்னஜாதிவஸேன பன ஸம்ஸரதி, ததா² இதரேபி. ஸகதா³கா³மீஸுபி யோ இத⁴ ஸகதா³கா³மிமக்³க³ம் பத்வா தே³வலோகே உப்பஜ்ஜித்வா புன இத⁴ நிப்³ப³த்ததி, ஸோ அத்தனோ பரிச்சி²ன்னஜாதிவஸேனேவ ஸம்ஸரதி. யே பன ஸகதா³கா³மினோ வோமிஸ்ஸகனயேன வினா தத்த² தத்த² தே³வேஸுயேவ மனுஸ்ஸேஸுயேவ வா நிப்³ப³த்தந்தி, தே உபரிமக்³கா³தி⁴க³மாய யாவ இந்த்³ரியபரிபாகா புனப்புனம் உப்பஜ்ஜனதோ ஸம்ஸரந்தியேவ. புது²ஜ்ஜனே பன வத்தப்³ப³மேவ நத்தி² ஸப்³ப³ப⁴வஸம்யோஜனானம் அபரிக்கீ²ணத்தா. தேன வுத்தம் –

‘‘காமயோகே³ன ஸம்யுத்தா, ப⁴வயோகே³ன சூப⁴யம்;

ஸத்தா க³ச்ச²ந்தி ஸம்ஸாரம், ஜாதிமரணகா³மினோ’’தி.

காமே பஹந்த்வானாதி காமராக³ஸங்கா²தே கிலேஸகாமே அனாகா³மிமக்³கே³ன பஜஹித்வா. சி²ன்னஸம்ஸயாதி ஸமுச்சி²ன்னகங்கா², தஞ்ச கோ² ஸோதாபத்திமக்³கே³னேவ. வண்ணப⁴ணனத்த²ம் பன சதுத்த²மக்³க³ஸ்ஸ ஏவம் வுத்தம். அரஹந்தோ ஹி இத⁴ ‘‘சி²ன்னஸம்ஸயா’’தி அதி⁴ப்பேதா. தேனேவாஹ ‘‘கீ²ணமானபுனப்³ப⁴வா’’தி. ஸப்³ப³ஸோ கீ²ணோ நவவிதோ⁴பி மானோ ஆயதிம் புனப்³ப⁴வோ ச ஏதேஸந்தி கீ²ணமானபுனப்³ப⁴வா. மானக்³க³ஹணேன சேத்த² ததே³கட்ட²தாய லக்க²ணவஸேன வா ஸப்³போ³ சதுத்த²மக்³க³வஜ்ஜோ² கிலேஸோ க³ஹிதோதி. கீ²ணமானதாய ச ஸஉபாதி³ஸேஸா நிப்³பா³னதா⁴து வுத்தா ஹோதி, கீ²ணபுனப்³ப⁴வதாய அனுபாதி³ஸேஸா. ஸேஸம் ஸுவிஞ்ஞேய்யமேவ.

ஸத்தமஸுத்தவண்ணனா நிட்டி²தா.