8. கல்யாணஸீலஸுத்தவண்ணனா

97. அட்ட²மே கல்யாணஸீலோதி ஸுந்த³ரஸீலோ, பஸத்த²ஸீலோ, பரிபுண்ணஸீலோ. தத்த² ஸீலபாரிபூரீ த்³வீஹி காரணேஹி ஹோதி ஸம்மதே³வ ஸீலவிபத்தியா ஆதீ³னவத³ஸ்ஸனேன, ஸீலஸம்பத்தியா ச ஆனிஸம்ஸத³ஸ்ஸனேன. இத⁴ பன ஸப்³ப³பரிப³ந்த⁴விப்பமுத்தஸ்ஸ ஸப்³பா³காரபரிபுண்ணஸ்ஸ மக்³க³ஸீலஸ்ஸ ப²லஸீலஸ்ஸ ச வஸேன கல்யாணதா வேதி³தப்³பா³. கல்யாணத⁴ம்மோதி ஸப்³பே³ போ³தி⁴பக்கி²யத⁴ம்மா அதி⁴ப்பேதா, தஸ்மா கல்யாணா ஸதிபட்டா²னாதி³போ³தி⁴பக்கி²யத⁴ம்மா ஏதஸ்ஸாதி கல்யாணத⁴ம்மோ. கல்யாணபஞ்ஞோதி ச மக்³க³ப²லபஞ்ஞாவஸேனேவ கல்யாணபஞ்ஞோ. லோகுத்தரா ஏவ ஹி ஸீலாதி³த⁴ம்மா ஏகந்தகல்யாணா நாம அகுப்பஸபா⁴வத்தா. கேசி பன ‘‘சதுபாரிஸுத்³தி⁴ஸீலவஸேன கல்யாணஸீலோ, விபஸ்ஸனாமக்³க³த⁴ம்மவஸேன கல்யாணத⁴ம்மோ, மக்³க³ப²லபஞ்ஞாவஸேன கல்யாணபஞ்ஞோ’’தி வத³ந்தி. அஸேக்கா² ஏவ தே ஸீலத⁴ம்மபஞ்ஞாதி ஏகே. அபரே பன ப⁴ணந்தி – ஸோதாபன்னஸகதா³கா³மீனம் மக்³க³ப²லஸீலம் கல்யாணஸீலம் நாம, தஸ்மா ‘‘கல்யாணஸீலோ’’தி இமினா ஸோதாபன்னோ ஸகதா³கா³மீ ச க³ஹிதா ஹோந்தி. தே ஹி ஸீலேஸு பரிபூரகாரினோ நாம. அனாகா³மிமக்³க³ப²லத⁴ம்மா அக்³க³மக்³க³த⁴ம்மா ச கல்யாணத⁴ம்மா நாம. தத்த² ஹி போ³தி⁴பக்கி²யத⁴ம்மா பா⁴வனாபாரிபூரிம் க³ச்ச²ந்தி. தஸ்மா ‘‘கல்யாணத⁴ம்மோ’’தி இமினா ததியமக்³க³ட்ட²தோ பட்டா²ய தயோ அரியா க³ஹிதா ஹோந்தி. பஞ்ஞாகிச்சஸ்ஸ மத்த²கப்பத்தியா அக்³க³ப²லே பஞ்ஞா கல்யாணபஞ்ஞா நாம, தஸ்மா பஞ்ஞாவேபுல்லப்பத்தோ அரஹா ‘‘கல்யாணபஞ்ஞோ’’தி வுத்தோ. ஏவமேவ புக்³க³லா க³ஹிதா ஹோந்தீதி. கிம் இமினா பபஞ்சேன? அக்³க³மக்³க³ப²லத⁴ம்மா இத⁴ கல்யாணஸீலாத³யோ வுத்தாதி அயமம்ஹாகம் க²ந்தி. த⁴ம்மவிபா⁴கே³ன ஹி அயம் புக்³க³லவிபா⁴கோ³, ந த⁴ம்மவிபா⁴கோ³தி.

கேவலீதி ஏத்த² கேவலம் வுச்சதி கேனசி அவோமிஸ்ஸகதாய ஸப்³ப³ஸங்க²தவிவித்தம் நிப்³பா³னம், தஸ்ஸ அதி⁴க³தத்தா அரஹா கேவலீ. அத² வா பஹானபா⁴வனாபாரிபூரியா பரியோஸானஅனவஜ்ஜத⁴ம்மபாரிபூரியா ச கல்யாணகட்டே²ன அப்³யாஸேகஸுக²தாய ச கேவலம் அரஹத்தம், தத³தி⁴க³மேன கேவலீ கீ²ணாஸவோ. மக்³க³ப்³ரஹ்மசரியவாஸம் வஸித்வா பரியோஸாபேத்வா டி²தோதி வுஸிதவா. உத்தமேஹி அக்³க³பூ⁴தேஹி வா அஸேக்க²த⁴ம்மேஹி ஸமன்னாக³தத்தா ‘‘உத்தமபுரிஸோ’’தி வுச்சதி.

ஸீலவாதி ஏத்த² கேனட்டே²ன ஸீலம்? ஸீலனட்டே²ன ஸீலம். கிமித³ம் ஸீலனம் நாம? ஸமாதா⁴னம், ஸுஸீல்யவஸேன காயகம்மாதீ³னம் அவிப்பகிண்ணதாதி அத்தோ². அத² வா உபதா⁴ரணம், ஜா²னாதி³குஸலத⁴ம்மானம் பதிட்டா²னவஸேன ஆதா⁴ரபா⁴வோதி அத்தோ². தஸ்மா ஸீலதி, ஸீலேதீதி வா ஸீலம். அயம் தாவ ஸத்³த³லக்க²ணனயேன ஸீலட்டோ². அபரே பன ‘‘ஸிரட்டோ² ஸீலட்டோ², ஸீதலட்டோ² ஸீலட்டோ², ஸிவட்டோ² ஸீலட்டோ²’’தி நிருத்தினயேன அத்த²ம் வண்ணயந்தி. தயித³ம் பாரிபூரிதோ அதிஸயதோ வா ஸீலம் அஸ்ஸ அத்தீ²தி ஸீலவா, சதுபாரிஸுத்³தி⁴ஸீலவஸேன ஸீலஸம்பன்னோதி அத்தோ². தத்த² யம் ஜேட்ட²கஸீலம், தம் வித்தா²ரேத்வா த³ஸ்ஸேதும் ‘‘பாதிமோக்க²ஸம்வரஸம்வுதோ’’திஆதி³ வுத்தந்தி ஏகச்சானம் ஆசரியானம் அதி⁴ப்பாயோ.

அபரேன பன ப⁴ணந்தி – உப⁴யத்தா²பி பாதிமோக்க²ஸம்வரோ ப⁴க³வதா வுத்தோ. பாதிமோக்க²ஸம்வரோ ஏவ ஹி ஸீலம், இதரேஸு இந்த்³ரியஸம்வரோ ச²த்³வாரரக்க²ணமத்தமேவ, ஆஜீவபாரிஸுத்³தி⁴ த⁴ம்மேன பச்சயுப்பாத³னமத்தமேவ, பச்சயஸன்னிஸ்ஸிதம் படிலத்³த⁴பச்சயே ‘‘இத³மத்த²’’ந்தி பச்சவேக்கி²த்வா பரிபு⁴ஞ்ஜனமத்தமேவ. நிப்பரியாயேன பாதிமோக்க²ஸம்வரோவ ஸீலம். யஸ்ஸ ஸோ பி⁴ன்னோ, ஸோ ஸீஸச்சி²ன்னோ புரிஸோ விய ஹத்த²பாதே³ ‘‘ஸேஸானி ரக்கி²ஸ்ஸதீ’’தி ந வத்தப்³போ³. யஸ்ஸ பன ஸோ அரோகோ³, அச்சி²ன்னஸீஸோ விய புரிஸோ, தானி புன பாகதிகானி கத்வா ரக்கி²தும் ஸக்கோதி. தஸ்மா ஸீலவாதி இமினா பாதிமோக்க²ஸீலமேவ உத்³தி³ஸித்வா தம் வித்தா²ரேதும் ‘‘பாதிமோக்க²ஸம்வரஸம்வுதோ’’திஆதி³ வுத்தந்தி.

தத்த² பாதிமோக்க²ந்தி ஸிக்கா²பத³ஸீலம். தஞ்ஹி யோ நம் பாதி ரக்க²தி, தம் மோக்கே²தி மோசேதி ஆபாயிகாதீ³ஹி து³க்கே²ஹீதி பாதிமோக்க²ம். ஸம்வரணம் ஸம்வரோ, காயவாசாஹி அவீதிக்கமோ. பாதிமோக்க²மேவ ஸம்வரோ பாதிமோக்க²ஸம்வரோ, தேன ஸம்வுதோ பிஹிதகாயவாசோதி பாதிமோக்க²ஸம்வரஸம்வுதோ. இத³மஸ்ஸ தஸ்மிம் ஸீலே பதிட்டி²தபா⁴வபரிதீ³பனம். விஹரதீதி தத³னுரூபவிஹாரஸமங்கி³பா⁴வபரிதீ³பனம். ஆசாரகோ³சரஸம்பன்னோதி ஹேட்டா² பாதிமோக்க²ஸம்வரஸ்ஸ, உபரி விஸேஸானுயோக³ஸ்ஸ ச உபகாரகத⁴ம்மபரிதீ³பனம். அணுமத்தேஸு வஜ்ஜேஸு ப⁴யத³ஸ்ஸாவீதி பாதிமோக்க²ஸீலதோ அசவனத⁴ம்மதாபரிதீ³பனம். ஸமாதா³யாதி ஸிக்கா²பதா³னம் அனவஸேஸதோ ஆதா³னபரிதீ³பனம். ஸிக்க²தீதி ஸிக்கா²ய ஸமங்கி³பா⁴வபரிதீ³பனம். ஸிக்கா²பதே³ஸூதி ஸிக்கி²தப்³ப³த⁴ம்மபரிதீ³பனம்.

அபரோ நயோ – கிலேஸானம் ப³லவபா⁴வதோ பாபகிரியாய ஸுகரபா⁴வதோ புஞ்ஞகிரியாய ச து³க்கரபா⁴வதோ ப³ஹுக்க²த்தும் அபாயேஸு பதனஸீலோதி பாதீ, புது²ஜ்ஜனோ. அனிச்சதாய வா ப⁴வாதீ³ஸு கம்மவேக³க்கி²த்தோ க⁴டியந்தம் விய அனவட்டா²னேன பரிப்³ப⁴மனதோ க³மனஸீலோதி பாதீ, மரணவஸேன வா தம்ஹி தம்ஹி ஸத்தனிகாயே அத்தபா⁴வஸ்ஸ பாதனஸீலோதி பாதீ, ஸத்தஸந்தானோ, சித்தமேவ வா. தம் பாதினம் ஸம்ஸாரது³க்க²தோ மோக்கே²தீதி பாதிமோக்கோ². சித்தஸ்ஸ ஹி விமோக்கே²ன ஸத்தோ விமுத்தோ. ‘‘சித்தவோதா³னா விஸுஜ்ஜ²ந்தீ’’தி (ஸம். நி. 3.100) ‘‘அனுபாதா³ய ஆஸவேஹி சித்தம் விமுத்த’’ந்தி (ம. நி. 2.206) ச வுத்தம். அத² வா அவிஜ்ஜாதி³னா ஹேதுனா ஸம்ஸாரே பததி க³ச்ச²தி பவத்ததீதி பாதி. ‘‘அவிஜ்ஜானீவரணானம் ஸத்தானம் தண்ஹாஸம்யோஜனானம் ஸந்தா⁴வதம் ஸம்ஸரத’’ந்தி (ஸம். நி. 2.124; 5.520) ஹி வுத்தம். தஸ்ஸ பாதினோ ஸத்தஸ்ஸ தண்ஹாதி³ஸம்கிலேஸத்தயதோ மோக்கோ² ஏதேனாதி பாதிமோக்கோ². ‘‘கண்டே²காலோ’’திஆதீ³னம் வியஸ்ஸ ஸமாஸஸித்³தி⁴ வேதி³தப்³பா³.

அத² வா பாதேதி வினிபாதேதி து³க்கே²தி பாதி, சித்தம். வுத்தஞ்ஹி ‘‘சித்தேன நீயதி லோகோ, சித்தேன பரிகஸ்ஸதீ’’தி (ஸம். நி. 1.62). தஸ்ஸ பாதினோ மோக்கோ² ஏதேனாதி பாதிமோக்கோ². பததி வா ஏதேன அபாயது³க்கே² ஸம்ஸாரது³க்கே² சாதி பாதி, தண்ஹாதி³ஸம்கிலேஸோ. வுத்தஞ்ஹி ‘‘தண்ஹா ஜனேதி புரிஸம் (ஸம். நி. 1.56-57), தண்ஹாது³தியோ புரிஸோ’’தி (இதிவு. 15, 105; சூளனி. பாராயனானுகீ³திகா³தா²னித்³தே³ஸ 107) ச ஆதி³. ததோ பாதிதோ மோக்கோ²தி பாதிமோக்கோ². அத² வா பததி ஏத்தா²தி பாதி, ச² அஜ்ஜ²த்திகானி பா³ஹிரானி ச ஆயதனானி. வுத்தஞ்ஹி ‘‘ச²ஸு லோகோ ஸமுப்பன்னோ, ச²ஸு குப்³ப³தி ஸந்த²வ’’ந்தி (ஸம். நி. 1.70). ததோ ச²அஜ்ஜ²த்திகபா³ஹிராயதனஸங்கா²ததோ பாதிதோ மோக்கோ²தி பாதிமோக்கோ². அத² வா பாதோ வினிபாதோ அஸ்ஸ அத்தீ²தி பாதீ, ஸம்ஸாரோ. ததோ மோக்கோ²தி பாதிமோக்கோ². அத² வா ஸப்³ப³லோகாதி⁴பதிபா⁴வதோ த⁴ம்மிஸ்ஸரோ ப⁴க³வா பதீதி வுச்சதி, முச்சதி ஏதேனாதி மோக்கோ², பதினோ மோக்கோ² தேன பஞ்ஞத்தத்தாதி பதிமோக்கோ², பதிமோக்கோ² ஏவ பாதிமோக்கோ². ஸப்³ப³கு³ணானம் வா மூலபா⁴வதோ உத்தமட்டே²ன பதி ச ஸோ யதா²வுத்தட்டே²ன மோக்கோ² சாதி பதிமோக்கோ², பதிமோக்கோ² ஏவ பாதிமோக்கோ². ததா² ஹி வுத்தம் ‘‘பாதிமோக்க²ந்தி முக²மேதம் பமுக²மேத’’ந்தி (மஹாவ. 135) வித்தா²ரோ.

அத² வா பஇதி பகாரே, அதீதி அச்சந்தத்தே² நிபாதோ. தஸ்மா பகாரேஹி அச்சந்தம் மோக்கே²தீதி பாதிமோக்கோ². இத³ஞ்ஹி ஸீலம் ஸயம் தத³ங்க³வஸேன, ஸமாதி⁴ஸஹிதம் பஞ்ஞாஸஹிதஞ்ச விக்க²ம்ப⁴னவஸேன ஸமுச்சே²த³வஸேன ச அச்சந்தம் மோக்கே²தி மோசேதீதி பாதிமோக்க²ம். பதி பதி மோக்கோ²தி வா பதிமோக்கோ², தம்ஹா தம்ஹா வீதிக்கமிதப்³ப³தோ³ஸதோ பதி பச்சேகம் மோக்கோ²தி அத்தோ². பதிமோக்கோ² ஏவ பாதிமோக்கோ². மோக்கோ²தி வா நிப்³பா³னம், தஸ்ஸ மோக்க²ஸ்ஸ படிபி³ம்ப³பூ⁴தந்தி பதிமோக்க²ம். பாதிமோக்க²ஸீலஸம்வரோ ஹி ஸூரியஸ்ஸ அருணுக்³க³மனம் விய நிப்³பா³னஸ்ஸ உத³யபூ⁴தோ தப்படிபா⁴கோ³ விய ஹோதி யதா²ரஹம் கிலேஸனிப்³பா³பனதோதி பதிமோக்க²ம், பதிமோக்க²ம் ஏவ பாதிமோக்க²ம். அத² வா மோக்க²ம் பதி வத்ததி மோக்கா²பி⁴முக²ந்தி பதிமோக்க²ம், பதிமோக்க²மேவ பாதிமோக்க²ந்தி ஏவம் தாவேத்த² பாதிமோக்க²ஸத்³த³ஸ்ஸ அத்தோ² வேதி³தப்³போ³.

ஸம்வரதி பித³ஹதி ஏதேனாதி ஸம்வரோ, பாதிமோக்க²மேவ ஸம்வரோதி பாதிமோக்க²ஸம்வரோ. அத்த²தோ பன ததோ ததோ வீதிக்கமிதப்³ப³தோ விரதியோ சேதனா வா, தேன பாதிமோக்க²ஸம்வரேன உபேதோ ஸமன்னாக³தோ பாதிமோக்க²ஸம்வரஸம்வுதோதி வுத்தோ. வுத்தஞ்ஹேதம் விப⁴ங்கே³ –

‘‘இமினா பாதிமோக்க²ஸம்வரேன உபேதோ ஹோதி ஸமுபேதோ உபக³தோ ஸமுபக³தோ ஸம்பன்னோ ஸமன்னாக³தோ. தேன வுச்சதி பாதிமோக்க²ஸம்வரஸம்வுதோ’’தி (விப⁴. 511).

விஹரதீதி இரியாபத²விஹாரேன விஹரதி, இரியதி, வத்ததி. ஆசாரகோ³சரஸம்பன்னோதி வேளுதா³னாதி³மிச்சா²ஜீவஸ்ஸ காயபாக³ப்³பி⁴யாதீ³னஞ்ச அகரணேன, ஸப்³ப³ஸோ அனாசாரம் வஜ்ஜேத்வா ‘‘காயிகோ அவீதிக்கமோ, வாசஸிகோ அவீதிக்கமோ’’தி ஏவம் வுத்தபி⁴க்கு²ஸாருப்பஆசாரஸம்பத்தியா வேஸியாதி³அகோ³சரம் வஜ்ஜேத்வா பிண்ட³பாதாதி³அத்த²ம் உபஸங்கமிதும் யுத்தட்டா²னஸங்கா²தகோ³சரேன ச ஸம்பன்னத்தா ஆசாரகோ³சரஸம்பன்னோ. அபிச யோ பி⁴க்கு² ஸத்த²ரி ஸகா³ரவோ ஸப்பதிஸ்ஸோ ஸப்³ரஹ்மசாரீஸு ஸகா³ரவோ ஸப்பதிஸ்ஸோ ஹிரோத்தப்பஸம்பன்னோ ஸுனிவத்தோ² ஸுபாருதோ பாஸாதி³கேன அபி⁴க்கந்தேன படிக்கந்தேன ஆலோகிதேன விலோகிதேன ஸமிஞ்ஜிதேன பஸாரிதேன ஓக்கி²த்தசக்கு² இரியாபத²ஸம்பன்னோ இந்த்³ரியேஸு கு³த்தத்³வாரோ போ⁴ஜனே மத்தஞ்ஞூ ஜாக³ரியானுயுத்தோ ஸதிஸம்பஜஞ்ஞேன ஸமன்னாக³தோ அப்பிச்சோ² ஸந்துட்டோ² பவிவித்தோ அஸம்ஸட்டோ² ஆபி⁴ஸமாசாரிகேஸு ஸக்கச்சகாரீ க³ருசித்தீகாரப³ஹுலோ விஹரதி, அயம் வுச்சதி ஆசாரஸம்பன்னோ.

கோ³சரோ பன – உபனிஸ்ஸயகோ³சரோ, ஆரக்க²கோ³சரோ, உபனிப³ந்த⁴கோ³சரோதி திவிதோ⁴. தத்த² த³ஸகதா²வத்து²கு³ணஸமன்னாக³தோ வுத்தலக்க²ணோ கல்யாணமித்தோ யம் நிஸ்ஸாய அஸுதம் ஸுணாதி, ஸுதம் பரியோத³பேதி, கங்க²ம் விதரதி, தி³ட்டி²ம் உஜுகம் கரோதி, சித்தம் பஸாதே³தி, யஸ்ஸ ச அனுஸிக்க²ந்தோ ஸத்³தா⁴ய வட்³ட⁴தி, ஸீலேன, ஸுதேன, சாகே³ன, பஞ்ஞாய வட்³ட⁴தி, அயம் உபனிஸ்ஸயகோ³சரோ. யோ பி⁴க்கு² அந்தரக⁴ரம் பவிட்டோ² வீதி²ம் படிபன்னோ ஓக்கி²த்தசக்கு² யுக³மத்தத³ஸ்ஸாவீ ஸம்வுதோ க³ச்ச²தி, ந ஹத்தி²ம் ஓலோகேந்தோ, ந அஸ்ஸம், ந ரத²ம், ந பத்திம், ந இத்தி²ம், ந புரிஸம் ஓலோகேந்தோ, ந உத்³த⁴ம் ஓலோகேந்தோ, ந அதோ⁴ ஓலோகேந்தோ, ந தி³ஸாவிதி³ஸா பேக்க²மானோ க³ச்ச²தி, அயம் ஆரக்க²கோ³சரோ. உபனிப³ந்த⁴கோ³சரோ பன சத்தாரோ ஸதிபட்டா²னா, யத்த² பி⁴க்கு² அத்தனோ சித்தம் உபனிப³ந்த⁴தி. வுத்தஞ்ஹேதம் ப⁴க³வதா –

‘‘கோ ச, பி⁴க்க²வே, பி⁴க்கு²னோ கோ³சரோ ஸகோ பேத்திகோ விஸயோ? யதி³த³ம் – சத்தாரோ ஸதிபட்டா²னா’’தி (ஸம். நி. 5.372).

இதி யதா²வுத்தாய ஆசாரஸம்பத்தியா இமாய ச கோ³சரஸம்பத்தியா ஸமன்னாக³தத்தா ஆசாரகோ³சரஸம்பன்னோ.

அணுமத்தேஸு வஜ்ஜேஸு ப⁴யத³ஸ்ஸாவீதி அப்பமத்தகேஸு அணுப்பமாணேஸு அஸஞ்சிச்ச ஆபன்னஸேகி²யஅகுஸலசித்துப்பாதா³தி³பே⁴தே³ஸு வஜ்ஜேஸு ப⁴யத³ஸ்ஸனஸீலோ. யோ ஹி பி⁴க்கு² பரமாணுமத்தம் வஜ்ஜம் அட்ட²ஸட்டி²யோஜனஸதஸஹஸ்ஸுப்³பே³த⁴ஸினேருபப்³ப³தராஜஸதி³ஸம் கத்வா பஸ்ஸதி, யோபி பி⁴க்கு² ஸப்³ப³லஹுகம் து³ப்³பா⁴ஸிதமத்தம் பாராஜிகஸதி³ஸம் கத்வா பஸ்ஸதி, அயம் அணுமத்தேஸு வஜ்ஜேஸு ப⁴யத³ஸ்ஸாவீ நாம. ஸமாதா³ய ஸிக்க²தி ஸிக்கா²பதே³ஸூதி யம் கிஞ்சி ஸிக்கா²பதே³ஸு ஸிக்கி²தப்³ப³ம், தம் ஸப்³பே³ன ஸப்³ப³ம் ஸப்³ப³தா² ஸப்³ப³ம் அனவஸேஸம் ஸமாதி³யித்வா ஸிக்க²தி வத்ததி, பூரேதீதி அத்தோ². இதி கல்யாணஸீலோதி இமினா பகாரேன கல்யாணஸீலோ ஸமானோ. புக்³க³லாதி⁴ட்டா²னவஸேன ஹி நித்³தி³ட்ட²ம் ஸீலம் ‘‘ஏவம் கோ², பி⁴க்க²வே, பி⁴க்கு² கல்யாணஸீலோ ஹோதீ’’தி வுத்தபுக்³க³லாதி⁴ட்டா²னவஸேனேவ நிக³மேத்வா ‘‘கல்யாணத⁴ம்மோ’’தி ஏத்த² வுத்தத⁴ம்மே நித்³தி³ஸிதுகாமேன ‘‘தேஸம் த⁴ம்மானம் இத³ம் ஸீலம் அதி⁴ட்டா²ன’’ந்தி த³ஸ்ஸேதும் புன ‘‘இதி கல்யாணஸீலோ’’தி வுத்தம். ஸத்தன்னம் போ³தி⁴பக்கி²யானந்திஆதி³ ஸப்³ப³ம் ஹேட்டா² வுத்தத்த²மேவ. புன கல்யாணஸீலோதிஆதி³ நிக³மனம்.

கா³தா²ஸு து³க்கடந்தி து³ட்டு² கதம், து³ச்சரிதந்தி அத்தோ². ஹிரிமனந்தி ஹிரிமந்தம் ஹிரிஸம்பன்னம், ஸப்³ப³ஸோ பாபபவத்தியா ஜிகு³ச்ச²னஸபா⁴வந்தி அத்தோ². ஹிரிமனந்தி வா ஹிரிஸஹிதசித்தம். ஹிரிக்³க³ஹணேனேவ சேத்த² ஓத்தப்பம்பி க³ஹிதந்தி வேதி³தப்³ப³ம். ஹிரோத்தப்பக்³க³ஹணேன ச ஸப்³ப³ஸோ து³ச்சரிதாபா⁴வஸ்ஸ ஹேதும் த³ஸ்ஸேந்தோ கல்யாணஸீலதம் ஹேதுதோ விபா⁴வேதி. ஸம்போ³தீ⁴தி அரியஞாணம், தம் க³ச்ச²ந்தி ப⁴ஜந்தீதி ஸம்போ³தி⁴கா³மினோ, போ³தி⁴பக்கி²காதி அத்தோ². அனுஸ்ஸத³ந்தி ராகு³ஸ்ஸதா³தி³ரஹிதம். ‘‘ததா²வித⁴’’ந்திபி பட²ந்தி. ‘‘போ³தி⁴பக்கி²கானம் த⁴ம்மானம் பா⁴வனானுயோக³மனுயுத்தோ’’தி யதா² யதா² புப்³பே³ வுத்தம், ததா²வித⁴ம் தாதி³ஸந்தி அத்தோ². து³க்க²ஸ்ஸாதி வட்டது³க்க²ஸ்ஸ, வட்டது³க்க²ஹேதுனோ வா. இதே⁴வ க²யமத்தனோதி ஆஸவக்க²யாதி⁴க³மேன அத்தனோ வட்டது³க்க²ஹேதுனோ ஸமுத³யபக்கி²யஸ்ஸ கிலேஸக³ணஸ்ஸ இதே⁴வ இமஸ்மிம்யேவ அத்தபா⁴வே க²யம் அனுப்பாத³ம் பஜானாதி, வட்டது³க்க²ஸ்ஸேவ வா இதே⁴வ சரிமகசித்தனிரோதே⁴ன க²யம் கீ²ணபா⁴வம் பஜானாதி. தேஹி த⁴ம்மேஹி ஸம்பன்னந்தி தேஹி யதா²வுத்தஸீலாதி³த⁴ம்மேஹி ஸமன்னாக³தம். அஸிதந்தி தண்ஹாதி³ட்டி²னிஸ்ஸயானம் பஹீனத்தா அஸிதம், கத்த²சி அனிஸ்ஸிதம். ஸப்³ப³லோகஸ்ஸாதி ஸப்³ப³ஸ்மிம் ஸத்தலோகே. ஸேஸம் வுத்தனயமேவ.

அட்ட²மஸுத்தவண்ணனா நிட்டி²தா.