1. கபிலமச்ச²வத்து²

மனுஜஸ்ஸாதி இமம் த⁴ம்மதே³ஸனம் ஸத்தா² ஜேதவனே விஹரந்தோ கபிலமச்ச²ம் ஆரப்³ப⁴ கதே²ஸி.

அதீதே கிர கஸ்ஸபப⁴க³வதோ பரினிப்³பு³தகாலே த்³வே குலபா⁴தரோ நிக்க²மித்வா ஸாவகானம் ஸந்திகே பப்³ப³ஜிம்ஸு. தேஸு ஜேட்டோ² ஸாக³தோ நாம அஹோஸி, கனிட்டோ² கபிலோ நாம. மாதா பன நேஸம் ஸாதி⁴னீ நாம, கனிட்ட²ப⁴கி³னீ தாபனா நாம. தாபி பி⁴க்கு²னீஸு பப்³ப³ஜிம்ஸு. ஏவம் தேஸு பப்³ப³ஜிதேஸு உபோ⁴ பா⁴தரோ ஆசரியுபஜ்ஜா²யானம் வத்தபடிவத்தம் கத்வா விஹரந்தா ஏகதி³வஸம், ‘‘ப⁴ந்தே, இமஸ்மிம் ஸாஸனே கதி து⁴ரானீ’’தி புச்சி²த்வா ‘‘க³ந்த²து⁴ரம் விபஸ்ஸனாது⁴ரஞ்சாதி த்³வே து⁴ரானீ’’தி ஸுத்வா ஜேட்டோ² ‘‘விபஸ்ஸனாது⁴ரம் பூரேஸ்ஸாமீ’’தி பஞ்ச வஸ்ஸானி ஆசரியுபஜ்ஜா²யானம் ஸந்திகே வஸித்வா யாவ அரஹத்தா கம்மட்டா²னம் க³ஹேத்வா அரஞ்ஞம் பவிஸித்வா வாயமந்தோ அரஹத்தம் பாபுணி. கனிட்டோ² ‘‘அஹம் தாவ தருணோ, வுட்³ட⁴காலே விபஸ்ஸனாது⁴ரம் பூரேஸ்ஸாமீ’’தி க³ந்த²து⁴ரம் பட்ட²பேத்வா தீணி பிடகானி உக்³க³ண்ஹி. தஸ்ஸ பரியத்திம் நிஸ்ஸாய மஹாபரிவாரோ, பரிவாரம் நிஸ்ஸாய லாபோ⁴ உத³பாதி³. ஸோ பா³ஹுஸச்சமதே³ன மத்தோ லாப⁴தண்ஹாய அபி⁴பூ⁴தோ அதிபண்டி³தமானிதாய பரேஹி வுத்தம் கப்பியம்பி ‘‘அகப்பிய’’ந்தி வதே³தி, அகப்பியம்பி ‘‘கப்பிய’’ந்தி வதே³தி, ஸாவஜ்ஜம்பி ‘‘அனவஜ்ஜ’’ந்தி, அனவஜ்ஜம்பி ‘‘ஸாவஜ்ஜ’’ந்தி. ஸோ பேஸலேஹி பி⁴க்கூ²ஹி ‘‘மா, ஆவுஸோ கபில, ஏவம் அவசா’’தி வத்வா த⁴ம்மஞ்ச வினயஞ்ச த³ஸ்ஸேத்வா ஓவதி³யமானோபி ‘‘தும்ஹே கிம் ஜானாத², ரித்தமுட்டி²ஸதி³ஸா’’திஆதீ³னி வத்வா கு²ம்ஸேந்தோ வம்பே⁴ந்தோ சரதி. அத²ஸ்ஸ பா⁴து ஸாக³தத்தே²ரஸ்ஸாபி பி⁴க்கூ² தமத்த²ம் ஆரோசேஸும். ஸோபி நம் உபஸங்கமித்வா, ‘‘ஆவுஸோ கபில, தும்ஹாதி³ஸானஞ்ஹி ஸம்மாபடிபத்தி ஸாஸனஸ்ஸ ஆயு நாம, தஸ்மா படிபத்திம் பஹாய கப்பியாதீ³னி படிபா³ஹந்தோ மா ஏவம் அவசா’’தி ஓவதி³. ஸோ தஸ்ஸபி வசனம் நாதி³யி. ஏவம் ஸந்தேபி தே²ரோ த்³வத்திக்க²த்தும் ஓவதி³த்வா ஓவாத³ம் அக³ண்ஹந்தம் ‘‘நாயம் மம வசனம் கரோதீ’’தி ஞத்வா ‘‘தேன, ஆவுஸோ, பஞ்ஞாயிஸ்ஸஸி ஸகேன கம்மேனா’’தி வத்வா பக்காமி. ததோ பட்டா²ய நம் அஞ்ஞே பேஸலா பி⁴க்கூ² ச²ட்³ட³யிம்ஸு.

ஸோ து³ராசாரோ ஹுத்வா து³ராசாரபரிவுதோ விஹரந்தோ ஏகதி³வஸம் உபோஸத²க்³கே³ ‘‘பாதிமோக்க²ம் உத்³தி³ஸிஸ்ஸாமீ’’தி பீ³ஜனிம் ஆதா³ய த⁴ம்மாஸனே நிஸீதி³த்வா ‘‘வத்ததி, ஆவுஸோ, ஏத்த² ஸன்னிபதிதானம் பி⁴க்கூ²னம் பாதிமோக்க²’’ந்தி புச்சி²த்வா ‘‘கோ அத்தோ² இமஸ்ஸ படிவசனேன தி³ன்னேனா’’தி துண்ஹீபூ⁴தே பி⁴க்கூ² தி³ஸ்வா, ‘‘ஆவுஸோ, த⁴ம்மோ வா வினயோ வா நத்தி², பாதிமோக்கே²ன ஸுதேன வா அஸுதேன வா கோ அத்தோ²’’தி வத்வா ஆஸனா வுட்ட²ஹி. ஏவம் ஸோ கஸ்ஸபஸ்ஸ ப⁴க³வதோ பரியத்திஸாஸனம் ஓஸக்காபேஸி. ஸாக³தத்தே²ரோபி தத³ஹேவ பரினிப்³பா³யி. கபிலோ ஆயுபரியோஸானே அவீசிம்ஹி மஹானிரயே நிப்³ப³த்தி. ஸாபிஸ்ஸ மாதா ச ப⁴கி³னீ ச தஸ்ஸேவ தி³ட்டா²னுக³திம் ஆபஜ்ஜித்வா பேஸலே பி⁴க்கூ² அக்கோஸித்வா பரிபா⁴ஸித்வா தத்தே²வ நிப்³ப³த்திம்ஸு.

தஸ்மிம் பன காலே பஞ்சஸதா புரிஸா கா³மகா⁴தகாதீ³னி கத்வா சோரிகாய ஜீவந்தா ஜனபத³மனுஸ்ஸேஹி அனுப³த்³தா⁴ பலாயமானா அரஞ்ஞம் பவிஸித்வா தத்த² கிஞ்சி படிஸரணம் அபஸ்ஸந்தா அஞ்ஞதரம் ஆரஞ்ஞிகம் பி⁴க்கு²ம் தி³ஸ்வா வந்தி³த்வா ‘‘படிஸரணம் நோ, ப⁴ந்தே, ஹோதா²’’தி வதி³ம்ஸு. தே²ரோ ‘‘தும்ஹாகம் ஸீலஸதி³ஸம் படிஸரணம் நாம நத்தி², ஸப்³பே³பி பஞ்சஸீலானி ஸமாதி³யதா²’’தி ஆஹ. தே ‘‘ஸாதூ⁴’’தி ஸம்படிச்சி²த்வா ஸீலானி ஸமாதி³யிம்ஸு. அத² நே தே²ரோ ஓவதி³ – ‘‘இதா³னி தும்ஹே ஸீலவந்தா, ஜீவிதஹேதுபி வோ நேவ ஸீலம் அதிக்கமிதப்³ப³ம், ந மனோபதோ³ஸோ காதப்³போ³’’தி. தே ‘‘ஸாதூ⁴’’தி ஸம்படிச்சி²ம்ஸு. அத² நே ஜனபத³மனுஸ்ஸா தம் டா²னம் பத்வா இதோ சிதோ ச பரியேஸமானா தே சோரே தி³ஸ்வா ஸப்³பே³ தே ஜீவிதா வோரோபேஸும். தே காலம் கத்வா தே³வலோகே நிப்³ப³த்திம்ஸு, சோரஜேட்ட²கோ ஜேட்ட²கதே³வபுத்தோ அஹோஸி.

தே அனுலோமபடிலோமவஸேன ஏகம் பு³த்³த⁴ந்தரம் தே³வலோகே ஸம்ஸரித்வா இமஸ்மிம் பு³த்³து⁴ப்பாதே³ ஸாவத்தி²னக³ரத்³வாரே பஞ்சஸதகுலிகே கேவட்டகா³மே நிப்³ப³த்திம்ஸு. ஜேட்ட²கதே³வபுத்தோ கேவட்டஜேட்ட²கஸ்ஸ கே³ஹே படிஸந்தி⁴ம் க³ண்ஹி, இதரே இதரேஸு. ஏவம் தேஸம் ஏகதி³வஸேயேவ படிஸந்தி⁴க³ஹணஞ்ச மாதுகுச்சி²தோ நிக்க²மனஞ்ச அஹோஸி. கேவட்டஜேட்ட²கோ ‘‘அத்தி² நு கோ² இமஸ்மிம் கா³மே அஞ்ஞேபி தா³ரகா அஜ்ஜ ஜாதா’’தி பரியேஸாபேத்வா தேஸம் ஜாதபா⁴வம் ஞத்வா ‘‘ஏதே மம புத்தஸ்ஸ ஸஹாயகா ப⁴விஸ்ஸந்தீ’’தி ஸப்³பே³ஸம் போஸாவனிகம் தா³பேஸி. தே ஸப்³பே³பி ஸஹபம்ஸுகீளகா ஸஹாயகா ஹுத்வா அனுபுப்³பே³ன வயப்பத்தா அஹேஸும். தேஸம் கேவட்டஜேட்ட²கபுத்தோவ யஸதோ ச தேஜதோ ச அக்³க³புரிஸோ அஹோஸி.

கபிலோபி ஏகம் பு³த்³த⁴ந்தரம் நிரயே பச்சித்வா விபாகாவஸேஸேன தஸ்மிம் காலே அசிரவதியா ஸுவண்ணவண்ணோ து³க்³க³ந்த⁴முகோ² மச்சோ² ஹுத்வா நிப்³ப³த்தி. அதே²கதி³வஸம் தே ஸஹாயகா ‘‘மச்சே² ப³ந்தி⁴ஸ்ஸாமா’’தி ஜாலாதீ³னி க³ஹேத்வா நதி³யா கி²பிம்ஸு. அத² நேஸம் அந்தோஜாலம் ஸோ மச்சோ² பாவிஸி. தம் தி³ஸ்வா ஸப்³பே³ கேவட்டகா³மவாஸினோ உச்சாஸத்³த³மகம்ஸு – ‘‘புத்தா நோ பட²மம் மச்சே² ப³ந்த⁴ந்தா ஸுவண்ணமச்ச²ம் ப³ந்தி⁴ம்ஸு, இதா³னி நோ ராஜா ப³ஹுத⁴னம் த³ஸ்ஸதீ’’தி. தேபி கோ² ஸஹாயகா மச்ச²ம் நாவாய பக்கி²பித்வா நாவம் உக்கி²பித்வா ரஞ்ஞோ ஸந்திகம் அக³மம்ஸு. ரஞ்ஞாபி தம் தி³ஸ்வாவ ‘‘கிம் ஏத’’ந்தி வுத்தே ‘‘மச்சோ², தே³வா’’தி ஆஹம்ஸு. ராஜா ஸுவண்ணவண்ணம் மச்ச²ம் தி³ஸ்வா ‘‘ஸத்தா² ஏதஸ்ஸ ஸுவண்ணவண்ணகாரணம் ஜானிஸ்ஸதீ’’தி மச்ச²ம் கா³ஹாபேத்வா ப⁴க³வதோ ஸந்திகம் அக³மாஸி. மச்சே²ன முகே² விவடமத்தேயேவ ஸகலஜேதவனம் அதிவிய து³க்³க³ந்த⁴ம் அஹோஸி. ராஜா ஸத்தா²ரம் புச்சி² – ‘‘கஸ்மா, ப⁴ந்தே, மச்சோ² ஸுவண்ணவண்ணோ ஜாதோ, கஸ்மா சஸ்ஸ முக²தோ து³க்³க³ந்தோ⁴ வாயதீ’’தி?

அயம், மஹாராஜ, கஸ்ஸபப⁴க³வதோ பாவசனே கபிலோ நாம பி⁴க்கு² அஹோஸி ப³ஹுஸ்ஸுதோ மஹாபரிவாரோ லாப⁴தண்ஹாய அபி⁴பூ⁴தோ அத்தனோ வசனம் அக³ண்ஹந்தானம் அக்கோஸகபரிபா⁴ஸகோ, தஸ்ஸ ச ப⁴க³வதோ ஸாஸனம் ஓஸக்காபேஸி, ஸோ தேன கம்மேன அவீசிம்ஹி நிப்³ப³த்தித்வா விபாகாவஸேஸேன இதா³னி மச்சோ² ஹுத்வா ஜாதோ. யம் பன ஸோ தீ³க⁴ரத்தம் பு³த்³த⁴வசனம் வாசேஸி, பு³த்³த⁴ஸ்ஸ ச கு³ணம் கதே²ஸி, தஸ்ஸ நிஸ்ஸந்தே³ன இமம் ஸுவண்ணவண்ணம் படிலபி⁴. யம் பி⁴க்கூ²னம் அக்கோஸகபரிபா⁴ஸகோ அஹோஸி, தேனஸ்ஸ முக²தோ து³க்³க³ந்தோ⁴ வாயதி. ‘‘கதா²பேமி நம், மஹாராஜா’’தி? ‘‘கதா²பேத², ப⁴ந்தே’’தி. அத² நம் ஸத்தா² புச்சி² – ‘‘த்வம்ஸி கபிலோ’’தி? ‘‘ஆம, ப⁴ந்தே, அஹம் கபிலோ’’தி. ‘‘குதோ ஆக³தோஸீ’’தி? ‘‘அவீசிமஹானிரயதோ, ப⁴ந்தே’’தி. ‘‘ஜேட்ட²பா⁴திகோ தே ஸாக³தோ குஹிம் க³தோ’’தி? ‘‘பரினிப்³பு³தோ, ப⁴ந்தே’’தி. ‘‘மாதா பன தே ஸாதி⁴னீ கஹ’’ந்தி? ‘‘மஹானிரயே நிப்³ப³த்தா, ப⁴ந்தே’’தி. ‘‘கனிட்ட²ப⁴கி³னீ ச தே தாபனா கஹ’’ந்தி? ‘‘மஹானிரயே நிப்³ப³த்தா, ப⁴ந்தே’’தி. ‘‘இதா³னி த்வம் கஹம் க³மிஸ்ஸஸீ’’தி? ‘‘அவீசிமஹானிரயமேவ, ப⁴ந்தே’’தி வத்வா விப்படிஸாராபி⁴பூ⁴தோ நாவம் ஸீஸேன பஹரித்வா தாவதே³வ காலம் கத்வா நிரயே நிப்³ப³த்தி. மஹாஜனோ ஸம்விக்³கோ³ அஹோஸி லோமஹட்ட²ஜாதோ.

அத² ப⁴க³வா தஸ்மிம் க²ணே ஸன்னிபதிதாய பரிஸாய சித்தாசாரம் ஓலோகேத்வா தங்க²ணானுரூபம் த⁴ம்மம் தே³ஸேதும் ‘‘த⁴ம்மசரியம் ப்³ரஹ்மசரியம், ஏததா³ஹு வஸுத்தம’’ந்தி ஸுத்தனிபாதே (ஸு. நி. 276) கபிலஸுத்தம் கதே²த்வா இமா கா³தா² அபா⁴ஸி –

334. ‘‘மனுஜஸ்ஸ பமத்தசாரினோ, தண்ஹா வட்³ட⁴தி மாலுவா விய;

ஸோ ப்லவதீ ஹுரா ஹுரம், ப²லமிச்ச²ம்வ வனஸ்மி வானரோ.

335. ‘‘யம் ஏஸா ஸஹதே ஜம்மீ, தண்ஹா லோகே விஸத்திகா;

ஸோகா தஸ்ஸ பவட்³ட⁴ந்தி, அபி⁴வட்ட²ம்வ பீ³ரணம்.

336. ‘‘யோ சேதம் ஸஹதே ஜம்மிம், தண்ஹம் லோகே து³ரச்சயம்;

ஸோகா தம்ஹா பபதந்தி, உத³பி³ந்து³வ போக்க²ரா.

337. ‘‘தம் வோ வதா³மி ப⁴த்³த³ம் வோ, யாவந்தேத்த² ஸமாக³தா;

தண்ஹாய மூலம் க²ணத², உஸீரத்தோ²வ பீ³ரணம்;

மா வோ நளம்வ ஸோதோவ, மாரோ ப⁴ஞ்ஜி புனப்புன’’ந்தி.

தத்த² பமத்தசாரினோதி ஸதிவோஸ்ஸக்³க³லக்க²ணேன பமாதே³ன பமத்தசாரிஸ்ஸ புக்³க³லஸ்ஸ நேவ ஜா²னம் ந விபஸ்ஸனா ந மக்³க³ப²லானி வட்³ட⁴ந்தி. யதா² பன ருக்க²ம் ஸம்ஸிப்³ப³ந்தீ பரியோனந்த⁴ந்தீ தஸ்ஸ வினாஸாய மாலுவாலதா வட்³ட⁴தி, ஏவமஸ்ஸ ச² த்³வாரானி நிஸ்ஸாய புனப்புனம் உப்பஜ்ஜனதோ தண்ஹா வட்³ட⁴தீதி அத்தோ². ஸோ ப்லவதீ ஹுரா ஹுரந்தி ஸோ தண்ஹாவஸிகோ புக்³க³லோ ப⁴வே ப⁴வே உப்லவதி தா⁴வதி. யதா² கிம் வியாதி? ப²லமிச்ச²ம்வ வனஸ்மி வானரோ, யதா² ருக்க²ப²லம் இச்ச²ந்தோ வானரோ வனஸ்மிம் தா⁴வதி, தஸ்ஸ தஸ்ஸ ருக்க²ஸ்ஸ ஸாக²ம் க³ண்ஹாதி, தம் முஞ்சித்வா அஞ்ஞம் க³ண்ஹாதி, தம்பி முஞ்சித்வா அஞ்ஞம் க³ண்ஹாதி, ‘‘ஸாக²ம் அலபி⁴த்வா ஸன்னிஸின்னோ’’தி வத்தப்³ப³தம் நாபஜ்ஜதி, ஏவமேவ தண்ஹாவஸிகோ புக்³க³லோ ஹுரா ஹுரம் தா⁴வந்தோ ‘‘ஆரம்மணம் அலபி⁴த்வா தண்ஹாய அபவத்தம் பத்தோ’’தி வத்தப்³ப³தம் நாபஜ்ஜதி.

யந்தி யம் புக்³க³லம் ஏஸா லாமகபா⁴வேன ஜம்மீ விஸாஹாரதாய விஸபுப்ப²தாய விஸப²லதாய விஸபரிபோ⁴க³தாய ரூபாதீ³ஸு விஸத்ததாய ஆஸத்ததாய விஸத்திகாதி ஸங்க்²யம் க³தா ச²த்³வாரிகதண்ஹா அபி⁴ப⁴வதி. யதா² நாம வஸ்ஸானே புனப்புனம் வஸ்ஸந்தேன தே³வேன அபி⁴வட்ட²ம் பீ³ரணதிணம் வட்³ட⁴தி, ஏவம் தஸ்ஸ புக்³க³லஸ்ஸ அந்தோ வட்டமூலகா ஸோகா அபி⁴வட்³ட⁴ந்தீதி அத்தோ².

து³ரச்சயந்தி யோ பன புக்³க³லோ ஏவம் வுத்தப்பகாரம் அதிக்கமிதும் பஜஹிதும் து³க்கரதாய து³ரச்சயம் தண்ஹம் ஸஹதி அபி⁴ப⁴வதி, தம்ஹா புக்³க³லா வட்டமூலகா ஸோகா பபதந்தி. யதா² நாம போக்க²ரே பது³மபத்தே பதிதம் உத³கபி³ந்து³ ந பதிட்டா²தி, ஏவம் ந பதிட்ட²ஹந்தீதி அத்தோ².

தம் வோ வதா³மீதி தேன காரணேன அஹம் தும்ஹே வதா³மி. ப⁴த்³த³ம் வோதி ப⁴த்³த³ம் தும்ஹாகம் ஹோது, மா அஹம் கபிலோ விய வினாஸம் பாபுணதா²தி அத்தோ². மூலந்தி இமிஸ்ஸா ச²த்³வாரிகதண்ஹாய அரஹத்தமக்³க³ஞாணேன மூலம் க²ணத². கிம் வியாதி? உஸீரத்தோ²வ பீ³ரணம், யதா² உஸீரேன அத்தி²கோ புரிஸோ மஹந்தேன குதா³லேன பீ³ரணம் க²ணதி, ஏவமஸ்ஸா மூலம் க²ணதா²தி அத்தோ². மா வோ நளம்வ ஸோதோவ, மாரோ ப⁴ஞ்ஜி புனப்புனந்தி மா தும்ஹே நதீ³ஸோதே ஜாதம் நளம் மஹாவேகே³ன ஆக³தோ நதீ³ஸோதோ விய கிலேஸமாரோ மரணமாரோ தே³வபுத்தமாரோ ச புனப்புனம் ப⁴ஞ்ஜதூதி அத்தோ².

தே³ஸனாவஸானே பஞ்சஸதாபி கேவட்டபுத்தா ஸம்வேக³ம் ஆபஜ்ஜித்வா து³க்க²ஸ்ஸந்தகிரியம் பத்த²யமானா ஸத்து² ஸந்திகே பப்³ப³ஜித்வா ந சிரஸ்ஸேவ து³க்க²ஸ்ஸந்தம் கத்வா ஸத்தா²ரா ஸத்³தி⁴ம் ஆனேஞ்ஜவிஹாரஸமாபத்தித⁴ம்மபரிபோ⁴கே³ன ஏகபரிபோ⁴கா³ அஹேஸுந்தி.

கபிலமச்ச²வத்து² பட²மம்.