5. ஜனபத³கல்யாணீ ரூபனந்தா³தே²ரீவத்து²

அட்டீ²னம் நக³ரம் கதந்தி இமம் த⁴ம்மதே³ஸனம் ஸத்தா² ஜேதவனே விஹரந்தோ ஜனபத³கல்யாணிம் ரூபனந்தா³தே²ரிம் ஆரப்³ப⁴ கதே²ஸி.

ஸா கிர ஏகதி³வஸம் சிந்தேஸி – ‘‘மய்ஹம் ஜேட்ட²பா⁴திகோ ரஜ்ஜஸிரிம் பஹாய பப்³ப³ஜித்வா லோகே அக்³க³புக்³க³லோ பு³த்³தோ⁴ ஜாதோ, புத்தோபிஸ்ஸ ராஹுலகுமாரோ பப்³ப³ஜிதோ, ப⁴த்தாபி மே பப்³ப³ஜிதோ, மாதாபி மே பப்³ப³ஜிதா, அஹம்பி ஏத்தகே ஞாதிஜனே பப்³ப³ஜிதே கே³ஹே கிம் கரிஸ்ஸாமி, பப்³ப³ஜிஸ்ஸாமா’’தி. ஸா பி⁴க்கு²னுபஸ்ஸயம் க³ந்த்வா பப்³ப³ஜி ஞாதிஸினேஹேனேவ, நோ ஸத்³தா⁴ய, அபி⁴ரூபதாய பன ரூபனந்தா³தி பஞ்ஞாயி. ‘‘ஸத்தா² கிர ‘ரூபம் அனிச்சம் து³க்க²ம் அனத்தா, வேத³னா… ஸஞ்ஞா… ஸங்கா²ரா… விஞ்ஞாணம் அனிச்சம் து³க்க²ம் அனத்தா’தி வதே³தீ’’தி ஸுத்வா ஸா ஏவம் த³ஸ்ஸனீயே பாஸாதி³கே மமபி ரூபே தோ³ஸம் கதே²ய்யாதி ஸத்து² ஸம்முகீ²பா⁴வம் ந க³ச்ச²தி. ஸாவத்தி²வாஸினோ பாதோவ தா³னம் த³த்வா ஸமாதி³ன்னுபோஸதா² ஸுத்³து⁴த்தராஸங்கா³ க³ந்த⁴மாலாதி³ஹத்தா² ஸாயன்ஹஸமயே ஜேதவனே ஸன்னிபதித்வா த⁴ம்மம் ஸுணந்தி. பி⁴க்கு²னிஸங்கோ⁴பி ஸத்து² த⁴ம்மதே³ஸனாய உப்பன்னச்ச²ந்தோ³ விஹாரம் க³ந்த்வா த⁴ம்மம் ஸுணாதி. த⁴ம்மம் ஸுத்வா நக³ரம் பவிஸந்தோ ஸத்து² கு³ணகத²ம் கதே²ந்தோவ பவிஸதி.

சதுப்பமாணிகே ஹி லோகஸன்னிவாஸே அப்பகாவ தே ஸத்தா, யேஸம் ததா²க³தம் பஸ்ஸந்தானம் பஸாதோ³ ந உப்பஜ்ஜதி. ரூபப்பமாணிகாபி ஹி ததா²க³தஸ்ஸ லக்க²ணானுப்³யஞ்ஜனபடிமண்டி³தம் ஸுவண்ணவண்ணம் ஸரீரம் தி³ஸ்வா பஸீத³ந்தி, கோ⁴ஸப்பமாணிகாபி அனேகானி ஜாதிஸதானி நிஸ்ஸாய பவத்தம் ஸத்து² கு³ணகோ⁴ஸஞ்சேவ அட்ட²ங்க³ஸமன்னாக³தம் த⁴ம்மதே³ஸனாகோ⁴ஸஞ்ச ஸுத்வா பஸீத³ந்தி, லூக²ப்பமாணிகாபிஸ்ஸ சீவராதி³லூக²தம் படிச்ச பஸீத³ந்தி, த⁴ம்மப்பமாணிகாபி ‘‘ஏவரூபம் த³ஸப³லஸ்ஸ ஸீலம், ஏவரூபோ ஸமாதி⁴, ஏவரூபா பஞ்ஞா, ப⁴க³வா ஸீலாதீ³ஹி கு³ணேஹி அஸமோ அப்படிபுக்³க³லோ’’தி பஸீத³ந்தி. தேஸம் ததா²க³தஸ்ஸ கு³ணம் கதே²ந்தானம் முக²ம் நப்பஹோதி. ரூபனந்தா³ பி⁴க்கு²னீனஞ்சேவ உபாஸிகானஞ்ச ஸந்திகா ததா²க³தஸ்ஸ கு³ணகத²ம் ஸுத்வா சிந்தேஸி – ‘‘அதிவிய மே பா⁴திகஸ்ஸ வண்ணம் கதே²ந்தியேவ. ஏகதி³வஸம்பி மே ரூபே தோ³ஸம் கதே²ந்தோ கித்தகம் கதே²ஸ்ஸதி. யம்னூனாஹம் பி⁴க்கு²னீஹி ஸத்³தி⁴ம் க³ந்த்வா அத்தானம் அத³ஸ்ஸேத்வாவ ததா²க³தம் பஸ்ஸித்வா த⁴ம்மமஸ்ஸ ஸுணித்வா ஆக³ச்சே²ய்ய’’ந்தி. ஸா ‘‘அஹம்பி அஜ்ஜ த⁴ம்மஸ்ஸவனம் க³மிஸ்ஸாமீ’’தி பி⁴க்கு²னீனம் ஆரோசேஸி.

பி⁴க்கு²னியோ ‘‘சிரஸ்ஸம் வத ரூபனந்தா³ய ஸத்து² உபட்டா²னம் க³ந்துகாமதா உப்பன்னா, அஜ்ஜ ஸத்தா² இமம் நிஸ்ஸாய விசித்ரத⁴ம்மதே³ஸனம் நானானயம் தே³ஸேஸ்ஸதீ’’தி துட்ட²மானஸா தம் ஆதா³ய நிக்க²மிம்ஸு. ஸா நிக்க²ந்தகாலதோ பட்டா²ய ‘‘அஹம் அத்தானம் நேவ த³ஸ்ஸேஸ்ஸாமீ’’தி சிந்தேஸி. ஸத்தா² ‘‘அஜ்ஜ ரூபனந்தா³ மய்ஹம் உபட்டா²னம் ஆக³மிஸ்ஸதி, கீதி³ஸீ நு கோ² தஸ்ஸா த⁴ம்மதே³ஸனா ஸப்பாயா’’தி சிந்தேத்வா ‘‘ரூபக³ருகா ஏஸா அத்தபா⁴வே ப³லவஸினேஹா, கண்டகேன கண்டகுத்³த⁴ரணம் விய ரூபேனேவஸ்ஸா ரூபமத³னிம்மத³னம் ஸப்பாய’’ந்தி ஸன்னிட்டா²னம் கத்வா தஸ்ஸா விஹாரம் பவிஸனஸமயே ஏகம் பன அபி⁴ரூபம் இத்தி²ம் ஸோளஸவஸ்ஸுத்³தே³ஸிகம் ரத்தவத்த²னிவத்த²ம் ஸப்³பா³ப⁴ரணபடிமண்டி³தம் பீ³ஜனிம் க³ஹேத்வா அத்தனோ ஸந்திகே ட²த்வா பீ³ஜயமானம் இத்³தி⁴ப³லேன அபி⁴னிம்மினி. தம் கோ² பன இத்தி²ம் ஸத்தா² சேவ பஸ்ஸதி ரூபனந்தா³ ச. ஸா பி⁴க்கு²னீஹி ஸத்³தி⁴ம் விஹாரம் பவிஸித்வா பி⁴க்கு²னீனம் பிட்டி²பஸ்ஸே ட²த்வா பஞ்சபதிட்டி²தேன ஸத்தா²ரம் வந்தி³த்வா பி⁴க்கு²னீனம் அந்தரே நிஸின்னா பாத³ந்ததோ பட்டா²ய ஸத்தா²ரம் ஓலோகேந்தீ லக்க²ணவிசித்தம் அனுப்³யஞ்ஜனஸமுஜ்ஜலம் ப்³யாமப்பபா⁴பரிக்கி²த்தம் ஸத்து² ஸரீரம் தி³ஸ்வா புண்ணசந்த³ஸஸ்ஸிரிகம் முக²ம் ஓலோகேந்தீ ஸமீபே டி²தம் இத்தி²ரூபம் அத்³த³ஸ. ஸா தம் ஓலோகேத்வா அத்தபா⁴வம் ஓலோகேந்தீ ஸுவண்ணராஜஹம்ஸியா புரதோ காகீஸதி³ஸம் அத்தானம் அவமஞ்ஞி. இத்³தி⁴மயரூபம் தி³ட்ட²காலதோ பட்டா²யேவ ஹி தஸ்ஸா அக்கீ²னி ப⁴மிம்ஸு. ஸா ‘‘அஹோ இமிஸ்ஸா கேஸா ஸோப⁴னா, அஹோ நலாடம் ஸோப⁴ன’’ந்தி ஸப்³பே³ஸம் ஸாரீரப்பதே³ஸானம் ரூபஸிரியா ஸமாகட்³டி⁴தசித்தா தஸ்மிம் ரூபே ப³லவஸினேஹா அஹோஸி.

ஸத்தா² தஸ்ஸா தத்த² அபி⁴ரதிம் ஞத்வா த⁴ம்மம் தே³ஸேந்தோவ தம் ரூபம் ஸோளஸவஸ்ஸுத்³தே³ஸிகபா⁴வம் அதிக்கமித்வா வீஸதிவஸ்ஸுத்³தே³ஸிகம் கத்வா த³ஸ்ஸேஸி. ரூபனந்தா³ ஓலோகேத்வா ‘‘ந வதித³ம் ரூபம் புரிமஸதி³ஸ’’ந்தி தோ²கம் விரத்தசித்தா அஹோஸி. ஸத்தா² அனுக்கமேனேவ தஸ்ஸா இத்தி²யா ஸகிம் விஜாதவண்ணம் மஜ்ஜி²மித்தி²வண்ணம் ஜராஜிண்ணமஹல்லிகித்தி²வண்ணஞ்ச த³ஸ்ஸேஸி. ஸாபி அனுபுப்³பே³னேவ ‘‘இத³ம்பி அந்தரஹிதம், இத³ம்பி அந்தரஹித’’ந்தி ஜராஜிண்ணகாலே தம் விரஜ்ஜமானா க²ண்ட³த³ந்திம் பலிதஸிரம் ஓப⁴க்³க³ம் கோ³பானஸிவங்கம் த³ண்ட³பராயணம் பவேத⁴மானம் தி³ஸ்வா அதிவிய விரஜ்ஜி. அத² ஸத்தா² தம் ப்³யாதி⁴னா அபி⁴பூ⁴தம் கத்வா த³ஸ்ஸேஸி. ஸா தங்க²ணஞ்ஞேவ த³ண்ட³ஞ்ச தாலவண்டஞ்ச ச²ட்³டே³த்வா மஹாவிரவம் விரவமானா பூ⁴மியம் பதித்வா ஸகே முத்தகரீஸே நிமுக்³கா³ அபராபரம் பரிவத்தி. ரூபனந்தா³ தம்பி தி³ஸ்வா அதிவிய விரஜ்ஜி. ஸத்தா²பி தஸ்ஸா இத்தி²யா மரணம் த³ஸ்ஸேஸி. ஸா தங்க²ணம்யேவ உத்³து⁴மாதகபா⁴வம் ஆபஜ்ஜி, நவஹி வணமுகே²ஹி புப்³ப³வட்டியோ சேவ புளவா ச பக்³க⁴ரிம்ஸு, காகாத³யோ ஸன்னிபதித்வா விலும்பிம்ஸு. ரூபனந்தா³பி தம் ஓலோகேத்வா ‘‘அயம் இத்தீ² இமஸ்மிம்யேவ டா²னே ஜரம் பத்தா, ப்³யாதி⁴ம் பத்தா, மரணம் பத்தா, இமஸ்ஸாபி மே அத்தபா⁴வஸ்ஸ ஏவமேவ ஜராப்³யாதி⁴மரணானி ஆக³மிஸ்ஸந்தீ’’தி அத்தபா⁴வம் அனிச்சதோ பஸ்ஸி. அனிச்சதோ தி³ட்ட²த்தா ஏவ பன து³க்க²தோ அனத்ததோ தி³ட்டோ²யேவ ஹோதி. அத²ஸ்ஸா தயோ ப⁴வா ஆதி³த்தா கே³ஹா விய கீ³வாய ப³த்³த⁴குணபம் விய ச உபட்ட²ஹிம்ஸு, கம்மட்டா²னாபி⁴முக²ம் சித்தம் பக்க²ந்தி³. ஸத்தா² தாய அனிச்சதோ தி³ட்ட²பா⁴வம் ஞத்வா ‘‘ஸக்கி²ஸ்ஸதி நு கோ² ஸயமேவ அத்தனோ பதிட்ட²ம் காது’’ந்தி ஓலோகேந்தோ ‘‘ந ஸக்கி²ஸ்ஸதி, ப³ஹித்³தா⁴ பச்சயம் லத்³து⁴ம் வட்டதீ’’தி சிந்தேத்வா தஸ்ஸா ஸப்பாயவஸேன த⁴ம்மம் தே³ஸேந்தோ ஆஹ –

‘‘ஆதுரம் அஸுசிம் பூதிம், பஸ்ஸ நந்தே³ ஸமுஸ்ஸயம்;

உக்³க⁴ரந்தம் பக்³க⁴ரந்தம், பா³லானம் அபி⁴பத்தி²தம்.

‘‘யதா² இத³ம் ததா² ஏதம், யதா² ஏதம் ததா² இத³ம்;

தா⁴துதோ ஸுஞ்ஞதோ பஸ்ஸ, மா லோகம் புனராக³மி;

ப⁴வே ச²ந்த³ம் விராஜேத்வா, உபஸந்தோ சரிஸ்ஸதீ’’தி. –

இத்த²ம் ஸுத³ம் ப⁴க³வா நந்த³ம் பி⁴க்கு²னிம் ஆரப்³ப⁴ இமா கா³தா²யோ அபா⁴ஸித்தா²தி. நந்தா³ தே³ஸனானுஸாரேன ஞாணம் பேஸேத்வா ஸோதாபத்திப²லம் பாபுணி. அத²ஸ்ஸா உபரி திண்ணம் மக்³க³ப²லானம் விபஸ்ஸனாபரிவாஸத்தா²ய ஸுஞ்ஞதாகம்மட்டா²னம் கதே²தும், ‘‘நந்தே³, மா ‘இமஸ்மிம் ஸரீரே ஸாரோ அத்தீ²’தி ஸஞ்ஞம் கரி. அப்பமத்தகோபி ஹி ஏத்த² ஸாரோ நத்தி², தீணி அட்டி²ஸதானி உஸ்ஸாபேத்வா கதம் அட்டி²னக³ரமேத’’ந்தி வத்வா இமம் கா³த²மாஹ –

150. ‘‘அட்டீ²னம் நக³ரம் கதம், மம்ஸலோஹிதலேபனம்;

யத்த² ஜரா ச மச்சு ச, மானோ மக்கோ² ச ஓஹிதோ’’தி.

தஸ்ஸத்தோ² – யதே²வ ஹி புப்³ப³ண்ணாபரண்ணாதீ³னம் ஓத³ஹனத்தா²ய கட்டா²னி உஸ்ஸாபேத்வா வல்லீஹி ப³ந்தி⁴த்வா மத்திகாய விலிம்பேத்வா நக³ரஸங்கா²தம் ப³ஹித்³தா⁴ கே³ஹம் கரோந்தி, ஏவமித³ம் அஜ்ஜ²த்திகம்பி தீணி அட்டி²ஸதானி உஸ்ஸாபேத்வா ந்ஹாருவினத்³த⁴ம் மம்ஸலோஹிதலேபனம் தசபடிச்ச²ன்னம் ஜீரணலக்க²ணாய ஜராய மரணலக்க²ணஸ்ஸ மச்சுனோ ஆரோஹஸம்பதா³தீ³னி படிச்ச மஞ்ஞனலக்க²ணஸ்ஸ மானஸ்ஸ ஸுகதகாரணவினாஸனலக்க²ணஸ்ஸ மக்க²ஸ்ஸ ச ஓத³ஹனத்தா²ய நக³ரம் கதம். ஏவரூபோ ஏவ ஹி ஏத்த² காயிகசேதஸிகோ ஆபா³தோ⁴ ஓஹிதோ, இதோ உத்³த⁴ம் கிஞ்சி க³ய்ஹூபக³ம் நத்தீ²தி.

தே³ஸனாவஸானே ஸா தே²ரீ அரஹத்தம் பாபுணி, மஹாஜனஸ்ஸாபி ஸாத்தி²கா த⁴ம்மதே³ஸனா அஹோஸீதி.

ஜனபத³கல்யாணீ ரூபனந்தா³தே²ரீவத்து² பஞ்சமம்.