4. ஸம்ப³ஹுலஅதி⁴மானிகபி⁴க்கு²வத்து²

யானிமானீதி இமம் த⁴ம்மதே³ஸனம் ஸத்தா² ஜேதவனே விஹரந்தோ ஸம்ப³ஹுலே அதி⁴மானிகே பி⁴க்கூ² ஆரப்³ப⁴ கதே²ஸி.

பஞ்சஸதா கிர பி⁴க்கூ² ஸத்து² ஸந்திகே கம்மட்டா²னம் க³ஹேத்வா அரஞ்ஞம் பவிஸித்வா க⁴டேந்தா வாயமந்தா ஜா²னம் நிப்³ப³த்தேத்வா ‘‘கிலேஸானம் அஸமுதா³சாரேன பப்³ப³ஜிதகிச்சம் நோ நிப்ப²ன்னம், அத்தனா படிலத்³த⁴கு³ணம் ஸத்து² ஆரோசேஸ்ஸாமா’’தி ஆக³மிம்ஸு. ஸத்தா² தேஸம் ப³ஹித்³வாரகோட்ட²கம் பத்தகாலேயேவ ஆனந்த³த்தே²ரம் ஆஹ – ‘‘ஆனந்த³, ஏதேஸம் பி⁴க்கூ²னம் பவிஸித்வா மயா தி³ட்டே²ன கம்மம் நத்தி², ஆமகஸுஸானம் க³ந்த்வா ததோ ஆக³ந்த்வா மம் பஸ்ஸந்தூ’’தி. தே²ரோ க³ந்த்வா தேஸம் தமத்த²ம் ஆரோசேஸி. தே ‘‘கிம் அம்ஹாகம் ஆமகஸுஸானேனா’’தி அவத்வாவ ‘‘தீ³க⁴த³ஸ்ஸினா பு³த்³தே⁴ன காரணம் தி³ட்ட²ம் ப⁴விஸ்ஸதீ’’தி ஆமகஸுஸானம் க³ந்த்வா தத்த² குணபானி பஸ்ஸந்தா ஏகாஹத்³வீஹபதிதேஸு குணபேஸு ஆகா⁴தம் படிலபி⁴த்வா தம் க²ணம் பதிதேஸு அல்லஸரீரேஸு ராக³ம் உப்பாத³யிம்ஸு, தஸ்மிம் க²ணே அத்தனோ ஸகிலேஸபா⁴வம் ஜானிம்ஸு. ஸத்தா² க³ந்த⁴குடியம் நிஸின்னோவ ஓபா⁴ஸம் ப²ரித்வா தேஸம் பி⁴க்கூ²னம் ஸம்முகே² கதே²ந்தோ விய ‘‘நப்பதிரூபம் நு கோ², பி⁴க்க²வே, தும்ஹாகம் ஏவரூபம் அட்டி²ஸங்கா⁴தம் தி³ஸ்வா ராக³ரதிம் உப்பாதே³து’’ந்தி வத்வா இமம் கா³த²மாஹ –

149. ‘‘யானிமானி அபத்தா²னி, அலாபூ³னேவ ஸாரதே³;

காபோதகானி அட்டீ²னி, தானி தி³ஸ்வான கா ரதீ’’தி.

தத்த² அபத்தா²னீதி ச²ட்³டி³தானி. ஸாரதே³தி ஸரத³காலே வாதாதபபஹதானி தத்த² தத்த² விப்பகிண்ணஅலாபூ³னி விய. காபோதகானீதி கபோதகவண்ணானி. தானி தி³ஸ்வானாதி தானி ஏவரூபானி அட்டீ²னி தி³ஸ்வா தும்ஹாகம் கா ரதி, நனு அப்பமத்தகம்பி காமரதிம் காதும் ந வட்டதியேவாதி அத்தோ².

தே³ஸனாவஸானே தே பி⁴க்கூ² யதா²டி²தாவ அரஹத்தம் பத்வா ப⁴க³வந்தம் அபி⁴த்த²வமானா ஆக³ந்த்வா வந்தி³ம்ஸூதி.

ஸம்ப³ஹுலஅதி⁴மானிகபி⁴க்கு²வத்து² சதுத்த²ம்.