7. அஞ்ஞமஞ்ஞபச்சயனித்³தே³ஸவண்ணனா

7. அஞ்ஞமஞ்ஞபச்சயனித்³தே³ஸே ஸஹஜாதபச்சயனித்³தே³ஸஸ்ஸ புரிமானம் திண்ணம் கோட்டா²ஸானம் வஸேன பாளி ஆக³தா. தஸ்ஸா தத்த² வுத்தஸதி³ஸாவ வண்ணனாதி புன ந க³ஹிதா. அயம்பி ச அஞ்ஞமஞ்ஞபச்சயோ ஜாதிவஸேன குஸலோ அகுஸலோ விபாகோ கிரியம் ரூபந்தி பஞ்சதா⁴ பி⁴ன்னோ. தத்த² குஸலோ பூ⁴மிதோ சதுப்³பி³தோ⁴. ஸப்³ப³ம் புரிமஸதி³ஸமேவாதி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² ஸப்³ப³ம்பி சதுபூ⁴மகம் குஸலம் அத்தனா ஸம்பயுத்தத⁴ம்மானம் அஞ்ஞமஞ்ஞபச்சயேன பச்சயோ. ததா² அகுஸலம். விபாகே பன காமாவசரரூபாவசரவிபாகம் படிஸந்தி⁴யம் வத்து²ரூபஸ்ஸ, பவத்தே ஸம்பயுத்தத⁴ம்மானஞ்ஞேவ. அரூபாவசரலோகுத்தரவிபாகம் அத்தனா ஸம்பயுத்தத⁴ம்மானஞ்ஞேவ அஞ்ஞமஞ்ஞபச்சயேன பச்சயோ. ஸப்³ப³ம்பி கிரியம் ஸம்பயுத்தத⁴ம்மானஞ்ஞேவ அஞ்ஞமஞ்ஞபச்சயேன பச்சயோ. சதுஸமுட்டா²னிகரூபஸ்ஸ கம்மஸமுட்டா²னே ஏகம் மஹாபூ⁴தம் திண்ணம், தீணி ஏகஸ்ஸ, த்³வே த்³வின்னம் மஹாபூ⁴தானம் அஞ்ஞமஞ்ஞபச்சயேன பச்சயோ. காமாவசரரூபாவசரபடிஸந்தி⁴யம் வத்து²ரூபம் விபாகக்க²ந்தா⁴னம் அஞ்ஞமஞ்ஞபச்சயேன பச்சயோ. உதுசித்தாஹாரஸமுட்டா²னேஸு மஹாபூ⁴தானேவ மஹாபூ⁴தானம் அஞ்ஞமஞ்ஞபச்சயேன பச்சயோதி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

அஞ்ஞமஞ்ஞபச்சயனித்³தே³ஸவண்ணனா.