8. நிஸ்ஸயபச்சயனித்³தே³ஸவண்ணனா

8. நிஸ்ஸயபச்சயனித்³தே³ஸே ஸஹஜாதபச்சயனித்³தே³ஸஸ்ஸ புரிமானம் பஞ்சன்னம் கோட்டா²ஸானம் வஸேன ஸஹஜாதனிஸ்ஸயனயம் த³ஸ்ஸேத்வா புன ச²ட்டே²ன கோட்டா²ஸேன புரேஜாதனிஸ்ஸயனயம் த³ஸ்ஸேதும் சக்கா²யதனம் சக்கு²விஞ்ஞாணதா⁴துயாதிஆதி³ ஆரத்³த⁴ம். தத்த² யம் ரூபம் நிஸ்ஸாயாதி வத்து²ரூபம் ஸந்தா⁴ய வுத்தம். தஞ்ஹி நிஸ்ஸாய திவிதா⁴ மனோதா⁴து, ட²பேத்வா அரூபவிபாகம் த்³வாஸத்ததிவிதா⁴ மனோவிஞ்ஞாணதா⁴தூதி இமானி பஞ்சஸத்ததி சித்தானி வத்தந்தீதி அயம் தாவேத்த² பாளிவண்ணனா. அயம்பி நிஸ்ஸயபச்சயோ ஜாதிவஸேன குஸலாதி³பே⁴த³தோ பஞ்சதா⁴வ பி⁴ஜ்ஜதி. தத்த² குஸலோ பூ⁴மிதோ சதுப்³பி³தோ⁴வ அகுஸலோ ஏகவிதோ⁴ விபாகோ சதுப்³பி³தோ⁴, கிரியஸங்கா²தோ திவிதோ⁴, ரூபம் ஏகவித⁴மேவாதி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² சதுபூ⁴மகம்பி குஸலம் பஞ்சவோகாரே ஸம்பயுத்தக்க²ந்தா⁴னஞ்சேவ சித்தஸமுட்டா²னரூபஸ்ஸ ச நிஸ்ஸயபச்சயேன பச்சயோ ஹோதி. ததா² அகுஸலம். யம் பனேத்த² ஆருப்பே உப்பஜ்ஜதி, தம் அரூபத⁴ம்மானஞ்ஞேவ நிஸ்ஸயபச்சயோ ஹோதி. காமாவசரரூபாவசரவிபாகம் பவத்தே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, படிஸந்தி⁴யம் கடத்தாரூபஸ்ஸாபி நிஸ்ஸயபச்சயோ ஹோதி. அரூபாவசரவிபாகம் ஸம்பயுத்தக்க²ந்தா⁴னம்யேவ ஹோதி. லோகுத்தரவிபாகம் பஞ்சவோகாரே; ஸம்பயுத்தகானஞ்சேவ சித்தஸமுட்டா²னரூபஸ்ஸ ச, சதுவோகாரே அரூபஸ்ஸேவ நிஸ்ஸயபச்சயோ ஹோதி. காமாவசரஅரூபாவசரகிரியா பஞ்சவோகாரே ஸம்பயுத்தகானஞ்சேவ சித்தஸமுட்டா²னரூபஸ்ஸ ச நிஸ்ஸயபச்சயோ ஹோதி, சதுவோகாரே அரூபானஞ்ஞேவ. ரூபாவசரகிரியா ஸம்பயுத்தகானஞ்சேவ சித்தஸமுட்டா²னரூபஸ்ஸ ச ஏகந்தேன நிஸ்ஸயபச்சயோ ஹோதி.

சதுஸமுட்டா²னிகரூபஸ்ஸ ச கம்மஸமுட்டா²னரூபே ஏகம் மஹாபூ⁴தம் திண்ணம், தீணி ஏகஸ்ஸ, த்³வே த்³வின்னம் மஹாபூ⁴தானம், மஹாபூ⁴தா உபாதா³ரூபானம், வத்து²ரூபம் பஞ்சவோகாரப⁴வே சதுபூ⁴மககுஸலஸ்ஸ, அகுஸலஸ்ஸ, ட²பேத்வா ஆருப்பவிபாகஞ்சேவ த்³வே பஞ்சவிஞ்ஞாணானி ச ஸேஸதேபூ⁴மகவிபாகஸ்ஸ, தேபூ⁴மககிரியஸ்ஸாதி இமேஸம் சதுன்னம் த⁴ம்மராஸீனம் நிஸ்ஸயபச்சயோ ஹோதி. சக்கா²யதனாதீ³னி பஞ்ச ஸஸம்பயுத்தானம் சக்கு²விஞ்ஞாணாதீ³னம் நிஸ்ஸயபச்சயோ ஹோதி. உதுசித்தாஹாரஸமுட்டா²னேஸு பன மஹாபூ⁴தா மஹாபூ⁴தானஞ்சேவ உபாதா³ரூபஸ்ஸ ச நிஸ்ஸயபச்சயேன பச்சயோதி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

நிஸ்ஸயபச்சயனித்³தே³ஸவண்ணனா.