4. பச்சனீயானுலோமவண்ணனா

49-52. இதா³னி பச்சனீயானுலோமம் ஹோதி. தம் த³ஸ்ஸேதும் ஸியா குஸலம் த⁴ம்மம் படிச்ச குஸலோ த⁴ம்மோ உப்பஜ்ஜேய்ய நஹேதுபச்சயா ஆரம்மணபச்சயாதிஆதி³ ஆரத்³த⁴ம். தத்த² அனுலோமபச்சனீயபுச்சா²ஹி ஸமப்பமாணோ ஏவ புச்சா²பரிச்சே²தோ³. ஏகமூலகாதீ³ஸு சேத்த² யா புச்சா² பாளியம் ஆக³தா, யா ச ந ஆக³தா, தா ஸப்³பா³ ஹேட்டா² வுத்தனயானுஸாரேனேவ வேதி³தப்³பா³.

திகஞ்ச பட்டா²னவரம்…பே… ச² பச்சனீயானுலோமம்ஹி நயா ஸுக³ம்பீ⁴ராதி ஏத்தா²பி ஹேட்டா² வுத்தனயேனேவ த்³வே பச்சயானுலோமானி – த⁴ம்மபச்சனீயானுலோமம் பச்சயபச்சனீயானுலோமஞ்ச. தத்த² ‘‘குஸலா த⁴ம்மா’’தி ஏவம் அபி⁴த⁴ம்மமாதிகாபதே³ஹி ஸங்க³ஹிதானம் த⁴ம்மானம் ‘‘நகுஸலம் த⁴ம்மம் படிச்ச குஸலோ த⁴ம்மோ’’தி பச்சனீயானுலோமதே³ஸனாவஸேன பவத்தம் த⁴ம்மபச்சனீயானுலோமம் நாம. ‘‘நஹேதுபச்சயா ஆரம்மணபச்சயா’’தி ஏவம் சதுவீஸதியா பச்சயேஸு லப்³ப⁴மானபதா³னம் பச்சயபச்சனீயானுலோமதே³ஸனாவஸேன பவத்தம் பச்சயபச்சனீயானுலோமம் நாம. தத்த² ஹேட்டா² அட்ட²கதா²யம் ‘‘திகஞ்ச பட்டா²னவரம்…பே… ச² பச்சனீயானுலோமம்ஹி நயா ஸுக³ம்பீ⁴ரா’’தி அயம் கா³தா² த⁴ம்மபச்சனீயானுலோமம் ஸந்தா⁴ய வுத்தா. இத⁴ பன அயம் கா³தா² த⁴ம்மானுலோமேயேவ பச்சயபச்சனீயானுலோமம் ஸந்தா⁴ய வுத்தா. தஸ்மா ‘‘ச² பச்சனீயானுலோமம்ஹி நயா ஸுக³ம்பீ⁴ரா’’தி அட்ட²கதா²ய த⁴ம்மபச்சனீயானுலோமே திகபட்டா²னாத³யோ ச² நயா ஸுக³ம்பீ⁴ராதி ஏவமத்தோ² வேதி³தப்³போ³. இமஸ்மிம் பனோகாஸே நஹேதுபச்சயா ஆரம்மணபச்சயாதி ஏவம் பவத்தே பச்சயபச்சனீயானுலோமே ஏதே த⁴ம்மானுலோமேயேவ திகபட்டா²னாத³யோ ச² நயா ஸுக³ம்பீ⁴ராதி ஏவமத்தோ² வேதி³தப்³போ³.

தேஸு அனுலோமதிகபட்டா²னேயேவ குஸலத்திகமத்தஸ்ஸபி வஸேன அயம் இமஸ்மிம் படிச்சவாரஸ்ஸ பண்ணத்திவாரே ஸங்கி²பித்வா புச்சா²பபே⁴தோ³ த³ஸ்ஸிதோ. ஸேஸேஸு பன திகேஸு ஸேஸபட்டா²னேஸு ச ஏகாபி புச்சா² ந த³ஸ்ஸிதா. ததோ பரேஸு பன ஸஹஜாதவாராதீ³ஸு குஸலத்திகஸ்ஸபி வஸேன புச்ச²ம் அனுத்³த⁴ரித்வா லப்³ப⁴மானகவஸேன விஸ்ஸஜ்ஜனமேவ த³ஸ்ஸிதம். ‘‘ச² பச்சனீயானுலோமம்ஹி நயா ஸுக³ம்பீ⁴ரா’’தி வசனதோ பன இமஸ்மிம் பச்சயபச்சனீயானுலோமே ச²பி ஏதே பட்டா²னனயா புச்சா²வஸேன உத்³த⁴ரித்வா த³ஸ்ஸேதப்³பா³. பட்டா²னம் வண்ணயந்தானஞ்ஹி ஆசரியானம் பா⁴ரோ ஏஸோதி.

புச்சா²வாரவண்ணனா நிட்டி²தா.