1. பச்சயானுலோமவண்ணனா

ஏவம் அனுலோமபட்டா²னாதீ³ஸு திகபட்டா²னாதி³வஸேன சதுவீஸதிஸமந்தபட்டா²னஸமோதா⁴னே பட்டா²னமஹாபகரணே யே திகாத³யோ நிஸ்ஸாய நித்³தி³ட்ட²த்தா ஏதம் திகபட்டா²னம், து³கபட்டா²னம்…பே… து³கது³கபட்டா²னந்தி வுத்தம். தே அனாமஸித்வா யேஸம் பச்சயானம் வஸேன தே திகாத³யோ விப⁴த்தா, தே பச்சயே ஏவ தாவ இமினா மாதிகானிக்கே²பபச்சயவிப⁴ங்க³ஸங்கா²தேன வாரேன உத்³தே³ஸதோ ச நித்³தே³ஸதோ ச த³ஸ்ஸேத்வா, இதா³னி யே திகாத³யோ நிஸ்ஸாய நித்³தி³ட்ட²த்தா ஏதம் திகபட்டா²னம், து³கபட்டா²னம்…பே… து³கது³கபட்டா²னந்தி வுத்தம். தே திகாத³யோ இமேஸம் பச்சயானம் வஸேன வித்தா²ரேத்வா த³ஸ்ஸேதும் ஏகேகம் திகது³கம் நிஸ்ஸாய ஸத்தஹி மஹாவாரேஹி தே³ஸனா கதா. தேஸம் இமானி நாமானி – படிச்சவாரோ, ஸஹஜாதவாரோ, பச்சயவாரோ, நிஸ்ஸயவாரோ, ஸம்ஸட்ட²வாரோ, ஸம்பயுத்தவாரோ, பஞ்ஹாவாரோதி.

தத்த² ‘‘குஸலம் த⁴ம்மம் படிச்ச குஸலோ த⁴ம்மோ’’தி ஏவம் படிச்சாபி⁴தா⁴னவஸேன வுத்தோ படிச்சவாரோ நாம. குஸலம் த⁴ம்மம் ஸஹஜாதோ குஸலோ த⁴ம்மோ’’தி ஏவம் ஸஹஜாதாபி⁴தா⁴னவஸேன வுத்தோ ஸஹஜாதவாரோ நாம. ஸோ புரிமேன படிச்சவாரேன அத்த²தோ நின்னானாகரணோ. படிச்சாபி⁴தா⁴னவஸேன பு³ஜ்ஜ²னகானம் வஸேன பன பட²மோ வுத்தோ, ஸஹஜாதாபி⁴தா⁴னவஸேன பு³ஜ்ஜ²னகானம் வஸேன து³தியோ. த்³வீஸுபி சேதேஸு ரூபாரூபத⁴ம்மவஸேன பச்சயா சேவ பச்சயுப்பன்னத⁴ம்மா ச வேதி³தப்³பா³. தே ச கோ² ஸஹஜாதாவ, ந புரேஜாதபச்சா²ஜாதா லப்³ப⁴ந்தி. ‘‘குஸலம் த⁴ம்மம் பச்சயா குஸலோ த⁴ம்மோ’’தி ஏவம் பச்சயாபி⁴தா⁴னவஸேன வுத்தோ பன பச்சயவாரோ நாம. ஸோபி புரிமவாரத்³வயம் விய ரூபாரூபத⁴ம்மவஸேனேவ வேதி³தப்³போ³. பச்சயோ பனேத்த² புரேஜாதோபி லப்³ப⁴தி. அயமஸ்ஸ புரிமவாரத்³வயதோ விஸேஸோ. தத³னந்தரோ ‘‘குஸலம் த⁴ம்மம் நிஸ்ஸாய குஸலோ த⁴ம்மோ’’தி ஏவம் நிஸ்ஸயாபி⁴தா⁴னவஸேன வுத்தோ நிஸ்ஸயவாரோ நாம. ஸோ புரிமேன பச்சயவாரேன அத்த²தோ நின்னானாகரணோ. பச்சயாபி⁴தா⁴னவஸேன பு³ஜ்ஜ²னகானம் வஸேன பன பட²மோ வுத்தோ, நிஸ்ஸயாபி⁴தா⁴னவஸேன பு³ஜ்ஜ²னகானம் வஸேன து³தியோ. ததோ பரம் ‘‘குஸலம் த⁴ம்மம் ஸம்ஸட்டோ² குஸலோ த⁴ம்மோ’’தி ஏவம் ஸம்ஸட்டா²பி⁴தா⁴னவஸேன வுத்தோ ஸம்ஸட்ட²வாரோ நாம. ‘‘குஸலம் த⁴ம்மம் ஸம்பயுத்தோ குஸலோ த⁴ம்மோ’’தி ஏவம் ஸம்பயுத்தாபி⁴தா⁴னவஸேன வுத்தோ ஸம்பயுத்தவாரோ நாம. ஸோ புரிமேன ஸம்ஸட்ட²வாரேன அத்த²தோ நின்னானாகரணோ. ஸம்ஸட்டா²பி⁴தா⁴னவஸேன பு³ஜ்ஜ²னகானம் வஸேன பன பட²மோ வுத்தோ, ஸம்பயுத்தாபி⁴தா⁴னவஸேன து³தியோ. த்³வீஸுபி சேதேஸு அரூபத⁴ம்மவஸேனேவ பச்சயா பச்சயுப்பன்னா ச வேதி³தப்³பா³. ஸத்தமவாரே பன யஸ்மா ‘‘குஸலோ த⁴ம்மோ குஸலஸ்ஸ த⁴ம்மஸ்ஸ ஹேதுபச்சயேன பச்சயோ’’திஆதி³னா நயேன தே தே பஞ்ஹே உத்³த⁴ரித்வா புன ‘‘குஸலா ஹேதூ ஸம்பயுத்தகானம் க²ந்தா⁴ன’’ந்திஆதி³னா நயேன ஸப்³பே³பி தே பஞ்ஹா நிஜ்ஜடா நிக்³கு³ம்பா³ ச கத்வா விப⁴த்தா, தஸ்மா ஸோ வாரோ பஞ்ஹானம் ஸாது⁴கம் விப⁴த்தத்தா பஞ்ஹாவாரோத்வேவ ஸங்க்²யம் க³தோ. ரூபாரூபத⁴ம்மவஸேனேவ பனேத்த² பச்சயாபி பச்சயுப்பன்னாபி வேதி³தப்³பா³.

தத்த² யோ தாவ ஏஸ ஸப்³ப³பட²மோ படிச்சவாரோ நாம, ஸோ உத்³தே³ஸதோ நித்³தே³ஸதோ ச து³விதோ⁴ ஹோதி. தத்த² உத்³தே³ஸவாரோ பட²மோ, புச்சா²வாரோதிபி வுச்சதி. பண்ணத்திவாரோதிபி தஸ்ஸேவ நாமம். ஸோ ஹி குஸலாத³யோ படிச்ச குஸலாதீ³னம் ஹேதுபச்சயாதீ³னம் வஸேன உத்³தி³ட்ட²த்தா உத்³தே³ஸவாரோ, குஸலாத³யோ படிச்ச ஹேதுபச்சயாதி³வஸேன குஸலாதீ³னம் உப்பத்தியா புச்சி²தத்தா புச்சா²வாரோ, குஸலாத³யோ படிச்ச ஹேதுபச்சயாதி³வஸேன குஸலாதீ³னம் உப்பத்தியா பஞ்ஞாபிதத்தா பண்ணத்திவாரோதிபி வுத்தோ.

25-34. தத்த² ஸியா குஸலம் த⁴ம்மம் படிச்ச குஸலோ த⁴ம்மோ உப்பஜ்ஜேய்ய ஹேதுபச்சயாதி பரிகப்பபுச்சா². அயஞ்ஹேத்த² அத்தோ² – யோ குஸலோ த⁴ம்மோ உப்பஜ்ஜேய்ய ஹேதுபச்சயா, கிம் ஸோ குஸலம் த⁴ம்மம் படிச்ச ஸியாதி அத² வா குஸலம் த⁴ம்மம் படிச்ச யோ குஸலோ த⁴ம்மோ உப்பஜ்ஜேய்ய, ஸோ ஹேதுபச்சயா ஸியாதி அயமேத்த² அத்தோ². தத்த² படீதி ஸதி³ஸத்தே² வத்ததி. ஸதி³ஸபுக்³க³லோ ஹி படிபுக்³க³லோ, ஸதி³ஸபா⁴கோ³ ச படிபா⁴கோ³தி வுச்சதி. இச்சாதி க³மனுஸ்ஸுக்கவசனமேதம். உப⁴யம் ஏகதோ கத்வா படிச்சாதி படிக³ந்த்வா ஸஹுப்பத்திஸங்கா²தேன ஸதி³ஸபா⁴வேன பத்வா, தேன ஸத்³தி⁴ம் ஏகதோ உப்பத்திபா⁴வம் உபக³ந்த்வாதி வுத்தம் ஹோதி. குஸலோ த⁴ம்மோதி ஏவம் ஸஹுப்பத்திபா⁴வேன குஸலம் த⁴ம்மம் படிச்ச குஸலோ த⁴ம்மோ உப்பஜ்ஜேய்ய ஹேதுபச்சயாதி புச்ச²தி. அத² வா படிச்சாதி பச்சயம் கத்வா. தம் பன பச்சயகரணம் புரேஜாதேபி பச்சயே லப்³ப⁴தி ஸஹஜாதேபி. இத⁴ ஸஹஜாதம் அதி⁴ப்பேதம். ஸியா குஸலம் த⁴ம்மம் படிச்ச அகுஸலோதிஆதீ³ஸுபி ஏஸேவ நயோ. தத்த² கிஞ்சாபி ஸஹஜாதவஸேன குஸலம் த⁴ம்மம் படிச்ச அகுஸலோ நத்தி², இமஸ்மிம் பன புச்சா²வாரே யம்பி விஸ்ஸஜ்ஜியமானம் அத்த²தோ லப்³ப⁴தி, யம்பி ந லப்³ப⁴தி, தம் ஸப்³ப³ம் புச்சா²வஸேன உத்³த⁴டம். பரதோ பன விஸ்ஸஜ்ஜனே யம் ந லப்³ப⁴தி, தம் பஹாய யம் லப்³ப⁴தி, ததே³வ விஸ்ஸஜ்ஜிதம்.

ஏவமேத்த² புச்சா²னம் அத்த²ஞ்சேவ புச்சா²க³திஞ்ச ஞத்வா இதா³னி க³ணனவஸேன புச்சா²பரிச்சே²தோ³ வேதி³தப்³போ³. ஏத்த² ஹி ‘‘குஸலம் த⁴ம்மம் படிச்சா’’தி குஸலபத³ம் ஆதி³ம் கத்வா குஸலாகுஸலாப்³யாகதந்தா திஸ்ஸோ புச்சா², புன ததே³வாதி³ம் கத்வா குஸலாப்³யாகதாதி³வஸேன து³கப்பபே⁴த³ந்தா திஸ்ஸோ, புன ததே³வாதி³ம் கத்வா திகந்தா ச ஏகா, ஏவம் குஸலம் த⁴ம்மம் படிச்சாதி குஸலாதி³கா ஸத்த புச்சா², ததா² அகுஸலாதி³கா, ததா² அப்³யாகதாதி³கா, ததா² குஸலாப்³யாகதாதி³கா, அகுஸலாப்³யாகதாதி³கா, குஸலாகுஸலாதி³கா, குஸலாகுஸலாப்³யாகதாதி³காதி ஸப்³பா³பி ஸத்தன்னம் ஸத்தகானம் வஸேன குஸலத்திகம் நிஸ்ஸாய ஹேதுபச்சயே ஏகூனபஞ்ஞாஸம் புச்சா².

தத்த² ஏகமூலகாவஸானா நவ, ஏகமூலது³காவஸானா நவ, ஏகமூலதிகாவஸானா திஸ்ஸோ, து³கமூலஏகாவஸானா நவ, து³கமூலது³காவஸானா நவ, து³கமூலதிகாவஸானா திஸ்ஸோ, திகமூலஏகாவஸானா திஸ்ஸோ, திகமூலது³காவஸானா திஸ்ஸோ, திகமூலதிகாவஸானா ஏகாதி ஏவமேதா மூலவஸேனாபி வேதி³தப்³பா³. யதா² ச ஹேதுபச்சயே ஏகூனபஞ்ஞாஸம், ஆரம்மணபச்சயாதீ³ஸுபி ததே²வாதி ஸப்³பே³ஸுபி சதுவீஸதியா பச்சயேஸு –

ஸஹஸ்ஸமேகஞ்ச ஸதம், ச²ஸத்ததி புனாபரா;

புச்சா² ஸம்பிண்டி³தா ஹோந்தி, நயம்ஹி ஏகமூலகே.

35-36. ததோ பரம் ஹேதுபச்சயா ஆரம்மணபச்சயாதி து³மூலகனயோ ஆரத்³தோ⁴. தத்த² ஹேதாரம்மணது³கோ…பே… ஹேதுஅவிக³தது³கோதி ஹேதுபச்சயேன ஸத்³தி⁴ம் தேவீஸதி து³கா ஹோந்தி. தேஸு ஹேதுபச்சயே விய ஹேதாரம்மணது³கேபி ஏகூனபஞ்ஞாஸம் புச்சா², தாஸு பாளியம் த்³வேயேவ த³ஸ்ஸிதா. யதா² ச ஹேதாரம்மணது³கே ஏகூனபஞ்ஞாஸம் ததா² ஹேதாதி⁴பதிது³காதீ³ஸுபி. தத்த² பட²மபுச்சா²வஸேன ஹேதாதி⁴பதிது³கோ, ஹேதானந்தரது³கோ, ஹேதுஸமனந்தரது³கோதி படிபாடியா தயோ து³கே த³ஸ்ஸேத்வா பரியோஸானே ஹேதுஅவிக³தது³கோ த³ஸ்ஸிதோ, ஸேஸம் ஸங்கி²த்தம். புச்சா²பரிச்சே²தோ³ பனேத்த² ஏவம் வேதி³தப்³போ³.

ஸஹஸ்ஸமேகஞ்ச ஸதம், ஸத்தவீஸதிமேவ ச;

து³கேஸு தேவீஸதியா, புச்சா² ஹோந்தி து³மூலகே.

37. ததோ பரம் ஹேதுபச்சயா ஆரம்மணபச்சயா அதி⁴பதிபச்சயாதி திமூலகனயோ ஆரத்³தோ⁴. தத்த² ஹேதாரம்மணது³கேன ஸத்³தி⁴ம் அதி⁴பதிபச்சயாதீ³ஸு பா³வீஸதியா பச்சயேஸு ஏகமேகஸ்ஸ யோஜனாவஸேன பா³வீஸதி திகா ஹோந்தி. தேஸு பட²மபுச்சா²வஸேன பட²மத்திகஞ்ச து³தியத்திகஞ்ச த³ஸ்ஸேத்வா பரியோஸானதிகோ த³ஸ்ஸிதோ, ஸேஸம் ஸங்கி²த்தம். யதா² பன து³கேஸு, ஏவம் திகேஸுபி ஏகமேகஸ்மிம் திகே ஏகூனபஞ்ஞாஸம் கத்வா ஸப்³பே³ஸுபி பா³வீஸதியா திகேஸு –

ஸஹஸ்ஸமேகம் புச்சா²னம், அட்ட²ஸத்ததிமேவ ச;

புச்சா² க³ணனதோ ஹோந்தி, நயம்ஹி திகமூலகே.

38. ததோ பரம் ஹேதுபச்சயா ஆரம்மணபச்சயா அதி⁴பதிபச்சயா அனந்தரபச்சயாதி சதுமூலகனயோ ஆரத்³தோ⁴. தத்த² பட²மத்திகேன ஸத்³தி⁴ம் அனந்தரபச்சயாதீ³ஸு ஏகவீஸதியா பச்சயேஸு ஏகமேகஸ்ஸ யோஜனாவஸேன ஏகவீஸதி சதுக்கா ஹோந்தி. தேஸு த்³வே சதுக்கே த³ஸ்ஸேத்வா ஸேஸம் ஸங்கி²த்தம். இதா⁴பி ஏகமேகஸ்மிம் சதுக்கே ஏகூனபஞ்ஞாஸம் கத்வா ஸப்³பே³ஸுபி ஏகவீஸதியா சதுக்கேஸு –

ஸஹஸ்ஸமேகம் புச்சா²னம், ஏகூனதிம்ஸ புனாபரா;

புச்சா² க³ணனதோ ஹோந்தி, நயம்ஹி சதுமூலகே.

ததோ பரம் பஞ்சமூலகம் ஆதி³ம் கத்வா யாவ ஸப்³ப³மூலகா தே³ஸனா கதா, தம் ஸப்³ப³ம் ஸங்கி²பித்வா ஹேட்டா² வுத்தஞ்ச உபரி வத்தப்³ப³ஞ்ச ஏகதோ கத்வா பாளியம் ‘‘ஏகமூலகம், து³மூலகம், திமூலகம், சதுமூலகம், பஞ்சமூலகம், ஸப்³ப³மூலகம் அஸம்முய்ஹந்தேன வித்தா²ரேதப்³ப³’’ந்தி நயோ த³ஸ்ஸிதோ. தத்த² ஏகமூலகாதீ³ஸு யம் வத்தப்³ப³ம், தம் வுத்தமேவ. பஞ்சமூலகே பன பட²மசதுக்கேன ஸத்³தி⁴ம் ஸமனந்தரபச்சயாதீ³ஸு ஸமவீஸதியா பச்சயேஸு ஏகமேகஸ்ஸ யோஜனாவஸேன ஸமவீஸதி பஞ்சகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி நவ புச்சா²னம், அஸீதி ச புனாபரா;

புச்சா² க³ணனதோ ஹோந்தி, நயம்ஹி பஞ்சமூலகே.

ச²மூலகே பட²மபஞ்சகேன ஸத்³தி⁴ம் ஸஹஜாதபச்சயாதீ³ஸு ஏகூனவீஸதியா பச்சயேஸு ஏகமேகஸ்ஸ யோஜனாவஸேன ஏகூனவீஸதி ச²க்கா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி நவ புச்சா²னம், ஏகதிம்ஸ ததோபரா;

புச்சா² க³ணனதோ ஹோந்தி, நயம்ஹி ச²க்கமூலகே.

ஸத்தமூலகே பட²மச²க்கேன ஸத்³தி⁴ம் அஞ்ஞமஞ்ஞபச்சயாதீ³ஸு அட்டா²ரஸஸு பச்சயேஸு ஏகமேகஸ்ஸ யோஜனாவஸேன அட்டா²ரஸ ஸத்தகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி அட்ட² புச்சா²னம், த்³வாஸீதி ச ததோபரா;

புச்சா² க³ணனதோ ஹோந்தி, நயம்ஹி ஸத்தமூலகே.

அட்ட²மூலகே பட²மஸத்தகேன ஸத்³தி⁴ம் நிஸ்ஸயபச்சயாதீ³ஸு ஸத்தரஸஸு பச்சயேஸு ஏகமேகஸ்ஸ யோஜனாவஸேன ஸத்தரஸ அட்ட²கா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி அட்ட² புச்சா²னம், தேத்திம்ஸா ச ததோபரா;

புச்சா² க³ணனதோ ஹோந்தி, நயம்ஹி அட்ட²மூலகே.

நவமூலகே பட²மஅட்ட²கேன ஸத்³தி⁴ம் உபனிஸ்ஸயபச்சயாதீ³ஸு ஸோளஸஸு பச்சயேஸு ஏகமேகஸ்ஸ யோஜனாவஸேன ஸோளஸ நவகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி ஸத்த புச்சா²னம், சதுராஸீதி ததோபரா;

புச்சா² க³ணனதோ ஹோந்தி, நயம்ஹி நவமூலகே.

த³ஸமூலகே பட²மனவகேன ஸத்³தி⁴ம் புரேஜாதபச்சயாதீ³ஸு பன்னரஸஸு பச்சயேஸு ஏகமேகஸ்ஸ யோஜனாவஸேன பன்னரஸ த³ஸகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி ஸத்த புச்சா²னம், பஞ்சதிம்ஸ ததோபரா;

புச்சா² க³ணனதோ ஹோந்தி, நயம்ஹி த³ஸமூலகே.

ஏகாத³ஸமூலகே பட²மத³ஸகேன ஸத்³தி⁴ம் பச்சா²ஜாதபச்சயாதீ³ஸு சுத்³த³ஸஸு பச்சயேஸு ஏகமேகஸ்ஸ யோஜனாவஸேன சுத்³த³ஸ ஏகாத³ஸகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ச² ஸதானி ச புச்சா²னம், ச²ளாஸீதி ததோபரா;

நயம்ஹி புச்சா² க³ணிதா, ஏகாத³ஸகமூலகே.

த்³வாத³ஸமூலகே பட²மஏகாத³ஸகேன ஸத்³தி⁴ம் ஆஸேவனபச்சயாதீ³ஸு தேரஸஸு பச்சயேஸு ஏகமேகஸ்ஸ யோஜனாவஸேன தேரஸ த்³வாத³ஸகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ச² ஸதானி ச புச்சா²னம், ஸத்ததிம்ஸ ததோபரா;

புச்சா² க³ணனதோ ஹோந்தி, நயே த்³வாத³ஸமூலகே.

தேரஸமூலகே பட²மத்³வாத³ஸகேன ஸத்³தி⁴ம் கம்மபச்சயாதீ³ஸு த்³வாத³ஸஸு பச்சயேஸு ஏகமேகஸ்ஸ யோஜனாவஸேன த்³வாத³ஸ தேரஸகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி பஞ்ச புச்சா²னம், அட்டா²ஸீதி புனாபரா;

புச்சா² க³ணனதோ ஹோந்தி, நயே தேரஸமூலகே.

சுத்³த³ஸமூலகே பட²மதேரஸகேன ஸத்³தி⁴ம் விபாகபச்சயாதீ³ஸு ஏகாத³ஸஸு பச்சயேஸு ஏகமேகஸ்ஸ யோஜனாவஸேன ஏகாத³ஸ சுத்³த³ஸகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி பஞ்ச புச்சா²னம், திம்ஸ சாத² நவாபரா;

புச்சா² க³ணனதோ ஹோந்தி, நயே சுத்³த³ஸமூலகே.

பன்னரஸமூலகே பட²மசுத்³த³ஸகேன ஸத்³தி⁴ம் ஆஹாரபச்சயாதீ³ஸு த³ஸஸு பச்சயேஸு ஏகமேகஸ்ஸ யோஜனாவஸேன த³ஸ பன்னரஸகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி சத்தாரி புச்சா²னம், நவுதி ச ததோபரா;

புச்சா² க³ணனதோ ஹோந்தி, நயே பன்னரஸமூலகே.

ஸோளஸமூலகே பட²மபன்னரஸகேன ஸத்³தி⁴ம் இந்த்³ரியபச்சயாதீ³ஸு நவஸு பச்சயேஸு ஏகமேகஸ்ஸ யோஜனாவஸேன நவ ஸோளஸகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி சத்தாரி சத்தா-லீஸேகா சேவ புனாபரா;

புச்சா² க³ணனதோ ஹோந்தி, நயே ஸோளஸமூலகே.

ஸத்தரஸமூலகே பட²மஸோளஸகேன ஸத்³தி⁴ம் ஜா²னபச்சயாதீ³ஸு அட்ட²ஸு பச்சயேஸு ஏகமேகஸ்ஸ யோஜனாவஸேன அட்ட² ஸத்தரஸகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி தீணி புச்சா²னம், நவுதி த்³வே புனாபரா;

புச்சா² க³ணனதோ ஹோந்தி, நயே ஸத்தரஸமூலகே.

அட்டா²ரஸமூலகே பட²மஸத்தரஸகேன ஸத்³தி⁴ம் மக்³க³பச்சயாதீ³ஸு ஸத்தஸு பச்சயேஸு ஏகமேகஸ்ஸ யோஜனாவஸேன ஸத்த அட்டா²ரஸகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதானி தீணி புச்சா²னம், தேசத்தாரீஸமேவ ச;

புச்சா² க³ணனதோ ஹோந்தி, நயே அட்டா²ரஸமூலகே.

ஏகூனவீஸதிமூலகே பட²மஅட்டா²ரஸகேன ஸத்³தி⁴ம் ஸம்பயுத்தபச்சயாதீ³ஸு ச²ஸு பச்சயேஸு ஏகமேகஸ்ஸ யோஜனாவஸேன ச² ஏகூனவீஸதிகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

த்³வே ஸதா நவுதி சேவ, சதஸ்ஸோ ச புனாபரா;

புச்சா² க³ணனதோ ஹோந்தி, நயே ஏகூனவீஸதிகே.

வீஸதிமூலகே பட²மஏகூனவீஸதிகேன ஸத்³தி⁴ம் விப்பயுத்தபச்சயாதீ³ஸு பஞ்சஸு பச்சயேஸு ஏகமேகஸ்ஸ யோஜனாவஸேன பஞ்சவீஸதிகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

த்³வே ஸதா ஹோந்தி புச்சா²னம், சத்தாலீஸா ச பஞ்ச ச;

புச்சா² க³ணனதோ ஹோந்தி, நயே வீஸதிமூலகே.

ஏகவீஸதிமூலகே பட²மவீஸதிகேன ஸத்³தி⁴ம் அத்தி²பச்சயாதீ³ஸு சதூஸு பச்சயேஸு ஏகமேகஸ்ஸ யோஜனாவஸேன சத்தாரோ ஏகவீஸதிகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

ஸதம் ச²னவுதி சேவ, புச்சா² ஹோந்தி ஸம்பிண்டி³தா;

க³ணிதா லக்க²ணஞ்ஞூஹி, ஏகவீஸதிகே நயே.

த்³வாவீஸதிமூலகே பட²மஏகவீஸதிகேன ஸத்³தி⁴ம் நத்தி²பச்சயாதீ³ஸு தீஸு பச்சயேஸு ஏகமேகஸ்ஸ யோஜனாவஸேன தயோ த்³வாவீஸதிகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

சத்தாலீஸாதி⁴கம் ஸதம், ஸத்த சேவ புனாபரா;

புச்சா² க³ணனதோ ஹோந்தி, நயே த்³வாவீஸதிமூலகே.

தேவீஸதிமூலகே பட²மத்³வாவீஸதிகேன ஸத்³தி⁴ம் த்³வீஸு விக³தாவிக³தபச்சயேஸு ஏகமேகஸ்ஸ யோஜனாவஸேன த்³வே தேவீஸதிகா ஹோந்தி. தேஸு ஏகமேகஸ்மிம் ஏகூனபஞ்ஞாஸம் கத்வா –

அட்ட²னவுதிமேவித⁴, புச்சா² க³ணனதோ மதா;

நயம்ஹி தேவீஸதிமே, தேவீஸதிகமூலகே.

சதுவீஸதிமூலகோ பன ஸப்³ப³பச்சயானம் ஸமோதா⁴னவஸேன வேதி³தப்³போ³, தேனேவ ஸப்³ப³மூலகோதி வுத்தோ. தத்த² ஏகூனபஞ்ஞாஸமேவ புச்சா² ஹோந்தீதி ஸப்³பா³பேதா ஹேதுபச்சயபத³மேவ க³ஹேத்வா ஏகமூலகாதீ³னம் ஸப்³ப³மூலகபரியோஸானானம் வஸேன ஸத்தா²ரா தே³வபரிஸதி வித்தா²ரதோ விப⁴த்தா புச்சா² இத⁴ ஸங்கே²பேன த³ஸ்ஸிதா.

தாஸம் பன ஸப்³பா³ஸம்பி அயம் க³ணனபிண்டோ³ – ஏகமூலகனயஸ்மிஞ்ஹி ஏகாத³ஸ ஸதானி ச²ஸத்ததி ச புச்சா² ஆக³தா. ஹேதுபச்சயனயே தேனேவ மூலகேன ஏகூனபஞ்ஞாஸம் கத்வா இமஸ்மிம் ஹேதுபச்சயமூலகே க³ஹேதப்³பா³, ஸேஸா ஸேஸபச்சயமூலகேஸு பக்கி²பிதப்³பா³. து³மூலகே ஸத்தவீஸானி ஏகாத³ஸ ஸதானி, திமூலகே ஸஹஸ்ஸம் அட்ட²ஸத்ததி ச, சதுமூலகே ஸஹஸ்ஸம் ஏகூனதிம்ஸஞ்ச, பஞ்சமூலகே அஸீதாதி⁴கானி நவ ஸதானி, ச²மூலகே ஏகதிம்ஸானி நவ ஸதானி, ஸத்தமூலகே த்³வாஸீதானி அட்ட² ஸதானி, அட்ட²மூலகே தேத்திம்ஸானி அட்ட² ஸதானி, நவமூலகே சதுராஸீதானி ஸத்த ஸதானி, த³ஸமூலகே பஞ்சதிம்ஸானி ஸத்த ஸதானி, ஏகாத³ஸமூலகே சா²ஸீதானி ச² ஸதானி, த்³வாத³ஸமூலகே ஸத்ததிம்ஸானி ச² ஸதானி, தேரஸமூலகே அட்டா²ஸீதானி பஞ்ச ஸதானி, சுத்³த³ஸமூலகே ஏகூனசத்தாலீஸானி பஞ்ச ஸதானி, பன்னரஸமூலகே நவுதானி சத்தாரி ஸதானி, ஸோளஸமூலகே ஏகசத்தாலீஸானி சத்தாரி ஸத்தானி, ஸத்தரஸமூலகே த்³வானவுதானி தீணி ஸதானி, அட்டா²ரஸமூலகே தேசத்தாலீஸானி தீணி ஸதானி, ஏகூனவீஸதிமூலகே சதுனவுதானி த்³வே ஸதானி, வீஸதிமூலகே பஞ்சசத்தாலீஸானி த்³வே ஸதானி, ஏகவீஸதிமூலகே ச²னவுதிஸதம், த்³வாவீஸதிமூலகே ஸத்தசத்தாலீஸஸதம், தேவீஸதிமூலகே அட்ட²னவுதி, ஸப்³ப³மூலகே ஏகூனபஞ்ஞாஸாதி ஏவம் ஹேதுபத³ம் ஆதி³ம் கத்வா விப⁴த்தேஸு ஏகமூலகாதீ³ஸு –

சுத்³த³ஸேவ ஸஹஸ்ஸானி, புன ஸத்த ஸதானி ச;

புச்சா² ஹேதுபத³ஸ்ஸேவ, ஏகமூலாதி³பே⁴த³தோதி.

39-40. ஏவம் ஹேதுபச்சயம் ஆதி³ம் கத்வா ஏகமூலகதோ பட்டா²ய யாவ ஸப்³ப³மூலகனயா புச்சா²பே⁴த³ம் த³ஸ்ஸேத்வா இதா³னி ஆரம்மணபச்சயம் ஆதி³ம் கத்வா த³ஸ்ஸேதும் ஸியா குஸலம் த⁴ம்மம் படிச்ச குஸலோ த⁴ம்மோ உப்பஜ்ஜேய்ய ஆரம்மணபச்சயா ஹேதுபச்சயாதிஆதி³மாஹ. தத்த² ஆரம்மணபச்சயா ஹேதுபச்சயாதி ஏத்தாவதா ஆரம்மணபச்சயம் ஆதி³ம் கத்வா ஹேதுபச்சயபரியோஸானோ ஏகமூலகனயோ த³ஸ்ஸிதோ. ததோ பரம் ஆரம்மணபச்சயா அதி⁴பதிபச்சயாதி து³கமூலகம் ஆரத்³த⁴ம். தத்த² இமம் பட²மது³கஞ்சேவ ஆரம்மணாவிக³தது³கஞ்ச த³ஸ்ஸேத்வா ஸேஸம் ஸங்கி²த்தம். ஆரம்மணபச்சயா ஹேதுபச்சயாதி அயம் ஓஸானது³கோபி ந த³ஸ்ஸிதோ. ஸசே பன கத்த²சி வாசனாமக்³கே³ ஸந்தி³ஸ்ஸதி, ஸ்வேவ வாசனாமக்³கோ³ க³ஹேதப்³போ³. ததோ பரம் ஆரம்மணபச்சயவஸேன திகமூலகாத³யோ அத³ஸ்ஸேத்வாவ அதி⁴பதிபச்சயம் ஆதி³ம் கத்வா ஏககாத³யோ த³ஸ்ஸேதும் அதி⁴பதிபச்சயா, அனந்தரபச்சயா, ஸமனந்தரபச்சயா, ஸஹஜாதபச்சயா, அஞ்ஞமஞ்ஞபச்சயாதி ஏத்தகமேவ வுத்தம், தம் ஏகமூலகவஸேன வா ஸப்³ப³மூலகவஸேன வா வேதி³தப்³ப³ம்.

41. ததோ பரம் அவிக³தபச்சயம் ஆதி³ம் கத்வா து³மூலகமேவ த³ஸ்ஸேதும் – அவிக³தபச்சயா ஹேதுபச்சயாதிஆதி³ ஆரத்³த⁴ம். தத்த² அவிக³தஹேதுது³கோ, அவிக³தாரம்மணது³கோ, அவிக³தாதி⁴பதிது³கோதி படிபாடியா தயோ து³கே வத்வா பரியோஸானே ச அவிக³தவிக³தது³கோ ஏகோ து³கோ த³ஸ்ஸிதோ. ததோ அவிக³தபச்சயவஸேனேவ திமூலகம் த³ஸ்ஸேதும் – ‘‘அவிக³தபச்சயா ஹேதுபச்சயா ஆரம்மணபச்சயா, அவிக³தபச்சயா ஹேதுபச்சயா அதி⁴பதிபச்சயா, அவிக³தபச்சயா ஹேதுபச்சயா அனந்தரபச்சயா’’தி ஏவம் படிபாடியா தயோ திகே வத்வா ‘‘அவிக³தபச்சயா ஹேதுபச்சயா விக³தபச்சயா’’தி பரியோஸானத்திகோ வுத்தோ. ததோ அவிக³தபச்சயவஸேனேவ சதுமூலகம் த³ஸ்ஸேதும் ‘‘அவிக³தபச்சயா ஹேதுபச்சயா ஆரம்மணபச்சயா அதி⁴பதிபச்சயா, அவிக³தபச்சயா ஹேதுபச்சயா ஆரம்மணபச்சயா அனந்தரபச்சயா’’தி த்³வே சதுக்கே வத்வா ‘‘விக³தபச்சயா’’தி பத³ம் உத்³த⁴ரித்வா ட²பிதம், ஸேஸம் ஸப்³ப³ம் ஸங்கி²த்தம். தஸ்ஸ ஸங்கி²த்தபா⁴வம் த³ஸ்ஸேதும் ‘‘ஏகேகஸ்ஸ பத³ஸ்ஸ ஏகமூலகம், து³மூலகம், திமூலகம், ஸப்³ப³மூலகம் அஸம்முய்ஹந்தேன வித்தா²ரேதப்³ப³’’ந்தி வுத்தம். தஸ்மா யதா² ஹேதுபச்சயம் ஆதி³ம் கத்வா ஹேதுஆதி³பத³வஸேன ஏகமூலகே ஏகாத³ஸ புச்சா²ஸதானி ச²ஸத்ததி ச புச்சா²…பே… ஸப்³ப³மூலகே ஏகூனபஞ்ஞாஸம், ஏவம் ஆரம்மணபச்சயாதீ³ஸுபி ஏகமேகம் ஆதி³ம் கத்வா ஆரம்மணாதி³பத³வஸேன ஏகமேகஸ்ஸ பத³ஸ்ஸ ஏகமூலகே ஏகாத³ஸ புச்சா²ஸதானி ச²ஸத்ததி ச புச்சா²…பே… ஸப்³ப³மூலகே ஏகூனபஞ்ஞாஸாதி ஏகேகஸ்ஸ பத³ஸ்ஸ ஏகமூலகாதி³பே⁴தே³ ஸத்தஸதாதி⁴கானி சுத்³த³ஸ புச்சா² ஸஹஸ்ஸானி ஹோந்தி. தாஸம் ஸப்³பே³ஸுபி சதுவீஸதியா பச்சயேஸு அயம் க³ணனபரிச்சே²தோ³ –

த்³வாபஞ்ஞாஸஸஹஸ்ஸான-ட்ட²ஸதானி தீணி ஸதஸஹஸ்ஸானி;

குஸலத்திகஸ்ஸ புச்சா², அனுலோமனயம்ஹி ஸுவிப⁴த்தா.

யதா² ச குஸலத்திகஸ்ஸ, ஏவம் வேத³னாத்திகாதீ³னம்பீதி ஸப்³பே³ஸுபி த்³வாவீஸதியா திகேஸு –

ஏகஸட்டி²ஸஹஸ்ஸானி, ச² ஸதானி ஸத்தஸத்ததி;

ஸதஸஹஸ்ஸானி புச்சா²னம், திகபே⁴தே³ பபே⁴த³தோ.

ஸங்கி²த்தா வாசனாமக்³கே³.

து³கேஸு பன ‘‘ஸியா ஹேதும் த⁴ம்மம் படிச்ச ஹேதுத⁴ம்மோ உப்பஜ்ஜேய்ய ஹேதுபச்சயா’’தி ஏவம் ஹேதும் படிச்ச ஹேது, ஹேதும் படிச்ச நஹேது, ஹேதும் படிச்ச ஹேது ச நஹேது ச, நஹேதும் படிச்ச நஹேது, நஹேதும் படிச்ச ஹேது, நஹேதும் படிச்ச ஹேது ச நஹேது ச, ஹேதுஞ்ச நஹேதுஞ்ச படிச்ச ஹேது, ஹேதுஞ்ச நஹேதுஞ்ச படிச்ச நஹேது, ஹேதுஞ்ச நஹேதுஞ்ச படிச்ச ஹேது ச நஹேது சாதி ஏகமேகஸ்மிம் து³கே ஹேதுபச்சயாதீ³ஸு ஏகமேகஸ்மிம் பச்சயே நவ புச்சா² ஹோந்தி. தாஸு ஹேதுபச்சயம் ஆதி³ம் கத்வா ஏகமூலகே த்³வேஸதானி ஸோளஸ ச புச்சா² ஹோந்தி. தாஸு ஹேதுபச்சயஸ்ஸேவ அஞ்ஞேன அஸம்மிஸ்ஸா நவ புச்சா² க³ஹேதப்³பா³, ஸேஸா அட்ட² வாரேன க³ஹிதா.

தாஸம் து³கமூலகாதீ³ஸு தேவீஸதியா வாரேஸு ஏகேகம் நவகம் அபனேத்வா யாவ ஸப்³ப³மூலகா அயம் க³ணனபரிச்சே²தோ³ – து³கமூலகே தாவ ஏகமூலகே த³ஸ்ஸிதேஸு த்³வீஸு ஸோளஸாதி⁴கேஸு புச்சா²ஸதேஸு நவ அபனேத்வா த்³வேஸதானி ஸத்த ச புச்சா² ஹோந்தி, ததோ நவ அபனேத்வா திமூலகே அட்ட²னவுதிஸதம். ஏவம் புரிமபுரிமதோ நவ நவ அபனேத்வா சதுமூலகே ஏகூனனவுதிஸதம், பஞ்சமூலகே அஸீதிஸதம், ச²மூலகே ஏகஸத்ததிஸதம், ஸத்தமூலகே த்³வாஸட்டி²ஸதம், அட்ட²மூலகே தேபண்ணாஸஸதம், நவமூலகே சதுசத்தாலீஸஸதம், த³ஸமூலகே பஞ்சதிம்ஸஸதம், ஏகாத³ஸமூலகே ச²ப்³பீ³ஸஸதம், த்³வாத³ஸமூலகே ஸத்தரஸாதி⁴கஸதம், தேரஸமூலகே அட்டா²தி⁴கஸதம், சுத்³த³ஸமூலகே நவனவுதி, பன்னரஸமூலகே நவுதி, ஸோளஸமூலகே ஏகாஸீதி, ஸத்தரஸமூலகே த்³வாஸத்ததி, அட்டா²ரஸமூலகே தேஸட்டி², ஏகூனவீஸதிமூலகே சதுபஞ்ஞாஸம், வீஸதிமூலகே பஞ்சசத்தாலீஸம், ஏகவீஸதிமூலகே ச²த்திம்ஸம், த்³வாவீஸதிமூலகே ஸத்தவீஸ, தேவீஸதிமூலகே அட்டா²ரஸ, ஸப்³ப³மூலகே நவாதி. யதா² பனேதானி ஹேதுபச்சயவஸேன ஏகமூலகே ஸோளஸாதி⁴கானி த்³வே புச்சா²ஸதானி…பே… ஸப்³ப³மூலகே நவ, ஏவம் ஆரம்மணபச்சயாதீ³ஸுபி ஏகமேகம் ஆதி³ம் கத்வா ஆரம்மணாதி³பத³வஸேன ஏகேகஸ்ஸ பத³ஸ்ஸ ஏகமூலகே ஸோளஸாதி⁴கானி த்³வே புச்சா²ஸதானி…பே… ஸப்³ப³மூலகே நவாதி ஏகேகஸ்ஸ பத³ஸ்ஸ ஏகமூலகாதி³பே⁴தே³ த்³வே புச்சா² ஸஹஸ்ஸானி ஸத்தஸதானி ச புச்சா² ஹோந்தி. தாஸம் ஸப்³பே³ஸுபி சதுவீஸதியா பச்சயேஸு அயம் க³ணனபரிச்சே²தோ³ –

சதுஸட்டி²ஸஹஸ்ஸானி, புன அட்ட²ஸதானி ச;

புச்சா² ஹேதுது³கஸ்ஸேவ, அனுலோமனயே மதா.

யதா² ச ஹேதுது³கஸ்ஸ, ஏவம் ஸஹேதுகது³காதீ³னம்பீதி ஸப்³ப³ஸ்மிம்பி து³கஸதே –

ஸட்டி² ஸதஸஹஸ்ஸானி, சத்தாரி ச ததோபரம்;

அஸீதி ச ஸஹஸ்ஸானி, புச்சா² து³கஸதே விதூ³.

அயம் தாவ ஸுத்³தி⁴கே திகபட்டா²னே சேவ து³கபட்டா²னே ச புச்சா²னம் க³ணனபரிச்சே²தோ³.

யம் பன ததோ பரம் த்³வாவீஸதி திகே க³ஹேத்வா து³கஸதே பக்கி²பித்வா து³கதிகபட்டா²னம் நாம தே³ஸிதம், தத்த² ‘‘ஸியா ஹேதும் குஸலம் த⁴ம்மம் படிச்ச ஹேது குஸலோ த⁴ம்மோ உப்பஜ்ஜேய்ய ஹேதுபச்சயா’’தி ஏவம் த்³வாவீஸதியா திகேஸு ஏகேகம் திகம் து³கானம் ஸதேன ஸதேன ஸத்³தி⁴ம் யோஜேத்வா த³ஸ்ஸேதப்³பா³னம் புச்சா²னம் ஹேட்டா² வுத்தனயேன ஸப்³பே³ஸம் ஏகமூலகாதீ³னம் வஸேன க³ஹேத்வா பரிச்சே²தோ³ வேதி³தப்³போ³.

யம்பி ததோ பரம் து³கஸதம் க³ஹேத்வா த்³வாவீஸதியா திகேஸு பக்கி²பித்வா திகது³கபட்டா²னம் நாம தே³ஸிதம், தத்தா²பி ‘‘ஸியா குஸலம் ஹேதும் த⁴ம்மம் படிச்ச குஸலோ ஹேதுத⁴ம்மோ உப்பஜ்ஜேய்ய ஹேதுபச்சயா’’தி ஏவம் து³கஸதே ஏகேகம் து³கம் த்³வாவீஸதியா திகேஹி ஸத்³தி⁴ம் யோஜேத்வா த³ஸ்ஸேதப்³பா³னம் புச்சா²னம் ஹேட்டா² வுத்தனயேன ஸப்³பே³ஸம் ஏகமூலகாதீ³னம் வஸேன க³ஹேத்வா பரிச்சே²தோ³ வேதி³தப்³போ³.

யம்பி ததோ பரம் திகே திகேஸுயேவ பக்கி²பித்வா திகதிகபட்டா²னம் நாம தே³ஸிதம், தத்தா²பி ‘‘ஸியா குஸலம் ஸுகா²ய வேத³னாய ஸம்பயுத்தம் த⁴ம்மம் படிச்ச குஸலோ ஸுகா²ய வேத³னாய ஸம்பயுத்தோ த⁴ம்மோ உப்பஜ்ஜேய்ய ஹேதுபச்சயா’’தி ஏவம் த்³வாவீஸதியா திகேஸு ஏகேகம் திகம் ஸேஸேஹி ஏகவீஸதியா திகேஹி ஸத்³தி⁴ம் யோஜேத்வா த³ஸ்ஸேதப்³பா³னம் புச்சா²னம் ஹேட்டா² வுத்தனயேன ஸப்³பே³ஸம் ஏகமூலகாதீ³னம் வஸேன க³ஹேத்வா பரிச்சே²தோ³ வேதி³தப்³போ³.

யம்பி ததோ பரம் து³கே து³கேஸுயேவ பக்கி²பித்வா து³கது³கபட்டா²னம் நாம தே³ஸிதம், தத்தா²பி ‘‘ஸியா ஹேதும் ஸஹேதுகம் த⁴ம்மம் படிச்ச ஹேது ஸஹேதுகோ த⁴ம்மோ உப்பஜ்ஜேய்ய ஹேதுபச்சயா’’தி ஏவம் து³கஸதே ஏகேகம் து³கம் ஸேஸேஹி நவனவுதியா து³கேஹி ஸத்³தி⁴ம் யோஜேத்வா த³ஸ்ஸேதப்³பா³னம் புச்சா²னம் ஹேட்டா² வுத்தனயேன ஸப்³பே³ஸம் ஏகமூலகாதீ³னம் வஸேன க³ஹேத்வா பரிச்சே²தோ³ வேதி³தப்³போ³. ததா²க³தேன ஹி ஸப்³ப³ம்பேதம் பபே⁴த³ம் த³ஸ்ஸேத்வாவ தே³வபரிஸாய த⁴ம்மோ தே³ஸிதோ, த⁴ம்மஸேனாபதிஸ்ஸ பன தேன ‘‘அஜ்ஜ இத³ஞ்சித³ஞ்ச தே³ஸித’’ந்தி ஸங்கி²பித்வா நயத³ஸ்ஸனமத்தேனேவ தே³ஸனா அக்கா²தா. தே²ரேனாபி ஸங்கி²பித்வாவ வாசனாமக்³கோ³ பவத்திதோ, ஸோ தே²ரேன பவத்திதனயேனேவ ஸங்கீ³திகாலே ஸங்க³ஹம் ஆரோபிதோ.

தம் பனஸ்ஸ ஸங்கே²பனயம் த³ஸ்ஸேதும் திகஞ்ச பட்டா²னவரந்தி அயம் கா³தா² ட²பிதா. தஸ்ஸத்தோ² – திகஞ்ச பட்டா²னவரந்தி பவரம் திகபட்டா²னஞ்ச. து³குத்தமந்தி உத்தமம் ஸேட்ட²ம் து³கபட்டா²னஞ்ச. து³கதிகஞ்சேவாதி து³கதிகபட்டா²னஞ்ச. திகது³கஞ்சாதி திகது³கபட்டா²னஞ்ச. திகதிகஞ்சேவாதி திகதிகபட்டா²னஞ்ச. து³கது³கஞ்சாதி து³கது³கபட்டா²னஞ்ச. ச² அனுலோமம்ஹி நயா ஸுக³ம்பீ⁴ராதி ஏதே திகபட்டா²னாத³யோ ஸுட்டு² க³ம்பீ⁴ரா ச² நயா அனுலோமம்ஹி வேதி³தப்³பா³தி. தத்த² த்³வே அனுலோமானி – த⁴ம்மானுலோமஞ்ச பச்சயானுலோமஞ்ச. தத்த² ‘‘குஸலம் த⁴ம்மம் படிச்ச குஸலோ த⁴ம்மோ’’தி ஏவம் அபி⁴த⁴ம்மமாதிகாபதே³ஹி ஸங்க³ஹிதானம் த⁴ம்மானம் அனுலோமதே³ஸனாவஸேன பவத்தம் த⁴ம்மானுலோமம் நாம. ‘‘ஹேதுபச்சயா ஆரம்மணபச்சயா’’தி ஏவம் சதுவீஸதியா பச்சயானம் அனுலோமதே³ஸனாவஸேன பவத்தம் பச்சயானுலோமம் நாம.

தத்த² ஹேட்டா² அட்ட²கதா²யம் ‘‘திகஞ்ச பட்டா²னவரம்…பே… ச² அனுலோமம்ஹி நயா ஸுக³ம்பீ⁴ரா’’தி அயம் கா³தா² த⁴ம்மானுலோமம் ஸந்தா⁴ய வுத்தா. இத⁴ பன அயம் கா³தா² தஸ்மிம் த⁴ம்மானுலோமே பச்சயானுலோமம் ஸந்தா⁴ய வுத்தா. தஸ்மா ‘‘ச² அனுலோமம்ஹி நயா ஸுக³ம்பீ⁴ரா’’தி அட்ட²கதா²கா³தா²ய த⁴ம்மானுலோமே திகபட்டா²னாத³யோ ச² நயா ஸுக³ம்பீ⁴ராதி ஏவமத்தோ² வேதி³தப்³போ³. இமஸ்மிம் பனோகாஸே ‘‘ஹேதுபச்சயா ஆரம்மணபச்சயா’’தி ஏவம் பவத்தே பச்சயானுலோமே ஏதே த⁴ம்மானுலோமே திகபட்டா²னாத³யோ ‘‘ச² நயா ஸுக³ம்பீ⁴ரா’’தி ஏவமத்தோ² வேதி³தப்³போ³. தேஸு அனுலோமே திகபட்டா²னே குஸலத்திகமத்தஸ்ஸேவ வஸேன அயம் இமஸ்மிம் படிச்சவாரஸ்ஸ பண்ணத்திவாரே ஸங்கி²பித்வா புச்சா²பபே⁴தோ³ த³ஸ்ஸிதோ. ஸேஸேஸு பன திகேஸு ஸேஸபட்டா²னேஸு ச ஏகாபி புச்சா² ந த³ஸ்ஸிதா. ததோ பரேஸு பன ஸஹஜாதவாராதீ³ஸு குஸலத்திகஸ்ஸாபி வஸேன புச்ச²ம் அனுத்³த⁴ரித்வா லப்³ப⁴மானகவஸேன விஸ்ஸஜ்ஜனமேவ த³ஸ்ஸிதம். ‘‘ச² அனுலோமம்ஹி நயா ஸுக³ம்பீ⁴ரா’’தி வசனதோ பன இமஸ்மிம் பச்சயானுலோமே ச²பி ஏதே பட்டா²னனயா புச்சா²வஸேன உத்³த⁴ரித்வா த³ஸ்ஸேதப்³பா³. பட்டா²னம் வண்ணயந்தானஞ்ஹி ஆசரியானம் பா⁴ரோ ஏஸோதி.