2. பச்சயபச்சனீயவண்ணனா

42-44. இதா³னி பச்சனீயம் ஹோதி. தம் த³ஸ்ஸேதும் ஸியா குஸலம் த⁴ம்மம் படிச்ச குஸலோ த⁴ம்மோ உப்பஜ்ஜேய்ய ந ஹேதுபச்சயாதிஆதி³ ஆரத்³த⁴ம். தத்த² அனுலோமபுச்சா²ஹி ஸமப்பமாணோவ புச்சா²பரிச்சே²தோ³. தேனேவேத்த² ‘‘யதா² அனுலோமே ஹேதுபச்சயோ வித்தா²ரிதோ, ஏவம் பச்சனீயேபி நஹேதுபச்சயோ வித்தா²ரேதப்³போ³’’தி வத்வா புன பரியோஸானே ‘‘யதா² அனுலோமே ஏகேகஸ்ஸ பத³ஸ்ஸ ஏகமூலகம், து³மூலகம், திமூலகம், சதுமூலகம் யாவ தேவீஸதிமூலகம், ஏவம் பச்சனீயேபி வித்தா²ரேதப்³ப³’’ந்தி வுத்தம். தேவீஸதிமூலகந்தி இத³ஞ்சேத்த² து³மூலகம்யேவ ஸந்தா⁴ய வுத்தம். பரியோஸானே பன ஸப்³ப³மூலகம் சதுவீஸதிமூலகம்பி ஹோதியேவ. தம் ஸப்³ப³ம் ஸங்கி²த்தமேவாதி.

திகஞ்ச பட்டா²னவரம்…பே… ச² பச்சனீயம்ஹி நயா ஸுக³ம்பீ⁴ராதி ஏத்தா²பி த்³வே பச்சனீயானி – த⁴ம்மபச்சனீயஞ்ச பச்சயபச்சனீயஞ்ச. தத்த² ‘‘குஸலா த⁴ம்மா’’தி ஏவம் அபி⁴த⁴ம்மமாதிகாபதே³ஹி ஸங்க³ஹிதானம் த⁴ம்மானம் ‘‘ந குஸலம் த⁴ம்மம் படிச்ச ந குஸலோ த⁴ம்மோ’’தி பச்சனீயதே³ஸனாவஸேன பவத்தம் த⁴ம்மபச்சனீயம் நாம. ‘‘நஹேதுபச்சயா நாரம்மணபச்சயா’’தி ஏவம் சதுவீஸதியா பச்சயானம் பச்சனீயதே³ஸனாவஸேன பவத்தம் பச்சயபச்சனீயம் நாம. தத்த² ஹேட்டா² அட்ட²கதா²யம் ‘‘திகஞ்ச பட்டா²னவரம்…பே… ச² பச்சனீயம்ஹி நயா ஸுக³ம்பீ⁴ரா’’தி அயம் கா³தா² த⁴ம்மபச்சனீயம் ஸந்தா⁴ய வுத்தா. இத⁴ பன அயம் கா³தா² த⁴ம்மானுலோமேயேவ பச்சயபச்சனீயம் ஸந்தா⁴ய வுத்தா. தஸ்மா ‘‘ச² பச்சனீயம்ஹி நயா ஸுக³ம்பீ⁴ரா’’தி அட்ட²கதா²கா³தா²ய த⁴ம்மபச்சனீயே திகபட்டா²னாத³யோ ச² நயா ஸுக³ம்பீ⁴ராதி ஏவமத்தோ² வேதி³தப்³போ³. இமஸ்மிம் பனோகாஸே ந ஹேதுபச்சயா நாரம்மணபச்சயாதி ஏவம் பவத்தே பச்சயபச்சனீயே ஏதே த⁴ம்மானுலோமேயேவ திகபட்டா²னாத³யோ ச² நயா ஸுக³ம்பீ⁴ராதி ஏவமத்தோ² வேதி³தப்³போ³.

தேஸு அனுலோமதிகபட்டா²னேயேவ குஸலத்திகமத்தஸ்ஸ வஸேன அயம் இமஸ்மிம் படிச்சவாரஸ்ஸ பண்ணத்திவாரே ஸங்கி²பித்வா புச்சா²பபே⁴தோ³ த³ஸ்ஸிதோ. ஸேஸேஸு பன திகேஸு ஸேஸபட்டா²னேஸு ச ஏகாபி புச்சா² ந த³ஸ்ஸிதா. ததோ பரேஸு பன ஸஹஜாதவாராதீ³ஸு குஸலத்திகஸ்ஸாபி வஸேன புச்ச²ம் அனுத்³த⁴ரித்வா லப்³ப⁴மானகவஸேன விஸ்ஸஜ்ஜனமேவ த³ஸ்ஸிதம். ‘‘ச² பச்சனீயம்ஹி நயா ஸுக³ம்பீ⁴ரா’’தி வசனதோ பன இமஸ்மிம் பச்சயபச்சனீயே ச²பி ஏதே பட்டா²னனயா புச்சா²வஸேன உத்³த⁴ரித்வா த³ஸ்ஸேதப்³பா³. பட்டா²னம் வண்ணயந்தானஞ்ஹி ஆசரியானம் பா⁴ரோ ஏஸோதி.