21. அத்தி²பச்சயனித்³தே³ஸவண்ணனா

21. அத்தி²பச்சயனித்³தே³ஸே சத்தாரோ க²ந்தா⁴திஆதீ³ஹி ஸஹஜாதவஸேன அத்தி²பச்சயோ நித்³தி³ட்டோ². சக்கா²யதனந்திஆதீ³ஹி புரேஜாதவஸேன. யம் ரூபம் நிஸ்ஸாயாதி ஏத்த² ஸஹஜாதபுரேஜாதவஸேன அத்தி²பச்சயோ நித்³தி³ட்டோ². ஏவமயம் பாளி ஸஹஜாதபுரேஜாதானஞ்ஞேவ அத்தி²பச்சயானம் வஸேன ஆக³தா. பஞ்ஹாவாரே பன ஸஹஜாதம், புரேஜாதம், பச்சா²ஜாதம், ஆஹாரம், இந்த்³ரியந்தி இமேஸம் வஸேன ஆக³தத்தா பச்சா²ஜாதஆஹாரிந்த்³ரியவஸேனாபி அத்தி²பச்சயோ லப்³ப⁴தி. இத⁴ பன ஸாவஸேஸவஸேன தே³ஸனா கதாதி அயம் தாவேத்த² பாளிவண்ணனா.

அயம் பன அத்தி²பச்சயோ நாம து³விதோ⁴ – அஞ்ஞமஞ்ஞதோ, ந அஞ்ஞமஞ்ஞதோ. தத்த² அஞ்ஞமஞ்ஞம் திவித⁴ம் – அரூபம் அரூபேன, ரூபம் ரூபேன, ரூபாரூபம் ரூபாரூபேன. ‘‘சத்தாரோ க²ந்தா⁴ அரூபினோ’’தி ஏத்த² ஹி ஸப்³ப³சித்துப்பத்திவஸேன அரூபம் அரூபேன வுத்தம். ‘‘சத்தாரோ மஹாபூ⁴தா’’தி ஏத்த² ஸப்³ப³ஸந்ததிவஸேன ரூபம் ரூபேன. ‘‘ஓக்கந்திக்க²ணே நாமரூப’’ந்தி ஏத்த² படிஸந்தி⁴க²ந்தா⁴னஞ்சேவ வத்து²னோ ச வஸேன ரூபாரூபம் ரூபாரூபேன வுத்தம். ந அஞ்ஞமஞ்ஞம்பி திவித⁴ம் – ‘‘அரூபம் ரூபஸ்ஸ, ரூபம் ரூபஸ்ஸ, ரூபம் அரூபஸ்ஸ சித்தசேதஸிகா த⁴ம்மா’’தி ஏத்த² ஹி பஞ்சவோகாரவஸேன அரூபம் ரூபஸ்ஸ வுத்தம். ‘‘மஹாபூ⁴தா உபாதா³ரூபான’’ந்தி ஏத்த² ஸப்³ப³ஸந்ததிவஸேன ரூபம் ரூபஸ்ஸ. ‘‘சக்கா²யதனம் சக்கு²விஞ்ஞாணதா⁴துயா’’திஆதீ³ஸு வத்தா²ரம்மணவஸேன ரூபம் அரூபஸ்ஸ அத்தி²பச்சயோதி வுத்தம்.

அபிசேஸ அத்தி²பச்சயோ நாம ஸங்கே²பதோ க²ணத்தயப்பத்தம் நாமஞ்சேவ ரூபஞ்ச, வத்தமானா பஞ்சக்க²ந்தா⁴திபி வத்தும் வட்டதி. ஸோ ஜாதிபே⁴த³தோ குஸலாகுஸலவிபாககிரியரூபவஸேன பஞ்சதா⁴ பி⁴ஜ்ஜதி. தத்த² குஸலோ ஸஹஜாதபச்சா²ஜாதவஸேன து³விதோ⁴ ஹோதி, ததா² அகுஸலோ விபாககிரியஸங்கா²தோ ச. தேஸு குஸலோ காமாவசராதி³பே⁴தே³ன சதுதா⁴ பி⁴ஜ்ஜதி, அகுஸலோ காமாவசரோவ விபாகோ சதுபூ⁴மகோ, கிரியாஸங்கா²தோ திபூ⁴மகோ. ரூபஸங்கா²தோ அத்தி²பச்சயோ காமாவசரோவ. ஸோ பன ஸஹஜாதபுரேஜாதவஸேன து³விதோ⁴. தத்த² பஞ்ச வத்தூ²னி ஆரம்மணானி ச புரேஜாதானேவ, ஹத³யவத்து² ஸஹஜாதம் வா ஹோதி புரேஜாதம் வா. பஞ்ஹாவாரே பன ஆக³தோ ஆஹாரோ இந்த்³ரியஞ்ச ஸஹஜாதாதி³பே⁴த³ம் ந லப⁴தீதி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² சதுபூ⁴மககுஸலோபி ஸஹஜாதோ அத்தி²பச்சயோ பஞ்சவோகாரே ‘‘ஏகோ க²ந்தோ⁴ திண்ணன்னம் க²ந்தா⁴ன’’ந்திஆதி³னா நயேன அஞ்ஞமஞ்ஞம் க²ந்தா⁴னஞ்சேவ சித்தஸமுட்டா²னரூபஸ்ஸ ச ட²பேத்வா பன ரூபாவசரகுஸலம் அவஸேஸோ ஆருப்பே ஸம்பயுத்தக்க²ந்தா⁴னஞ்ஞேவ ஸஹஜாதகுஸலோ அத்தி²பச்சயேன பச்சயோ ஹோதி. சதுபூ⁴மகோ பனேஸ பஞ்சவோகாரே சதுஸமுட்டா²னிகதிஸமுட்டா²னிககாயஸ்ஸ பச்சா²ஜாதோ குஸலோ அத்தி²பச்சயேன பச்சயோ ஹோதி. அகுஸலேபி ஏஸேவ நயோ. ஸோபி ஹி பஞ்சவோகாரே ஸம்பயுத்தக்க²ந்தா⁴னஞ்சேவ சித்தஸமுட்டா²னரூபஸ்ஸ ச, சதுவோகாரே ஸம்பயுத்தக்க²ந்தா⁴னஞ்ஞேவ ஸஹஜாதாகுஸலோ அத்தி²பச்சயேன பச்சயோ. பஞ்சவோகாரே சதுஸமுட்டா²னிகதிஸமுட்டா²னிககாயஸ்ஸ பச்சா²ஜாதாகுஸலோ அத்தி²பச்சயேன பச்சயோ.

விபாகதோ பன காமாவசரரூபாவசரோ அத்தி²பச்சயோ நியமேனேவ படிஸந்தி⁴க்க²ணே க²ந்தா⁴னஞ்சேவ கடத்தாரூபஸ்ஸ ச ஸஹஜாதத்தி²பச்சயேன பச்சயோ. பவத்தே பன ஸம்பயுத்தக்க²ந்தா⁴னஞ்சேவ சித்தஸமுட்டா²னரூபஸ்ஸ ச ஸஹஜாதத்தி²பச்சயேன பச்சயோ, டி²திப்பத்தஸ்ஸ சதுஸமுட்டா²னிகதிஸமுட்டா²னிககாயஸ்ஸ பச்சா²ஜாதத்தி²பச்சயேன பச்சயோ. அரூபாவசரவிபாகோ பன ஆருப்பே உப்பன்னலோகுத்தரவிபாகோ ச அத்தனா ஸம்பயுத்தக்க²ந்தா⁴னஞ்ஞேவ ஸஹஜாதத்தி²பச்சயேன பச்சயோ. பஞ்சவோகாரே லோகுத்தரவிபாகோ ஸம்பயுத்தக்க²ந்தா⁴னஞ்சேவ சித்தஸமுட்டா²னரூபஸ்ஸ ச ஸஹஜாதத்தி²பச்சயேன பச்சயோ, சதுஸமுட்டா²னிகதிஸமுட்டா²னிககாயஸ்ஸ பச்சா²ஜாதத்தி²பச்சயேன பச்சயோ. கிரியதோ ரூபாவசரோ அத்தி²பச்சயோ ஸம்பயுத்தக்க²ந்தா⁴னஞ்சேவ சித்தஸமுட்டா²னரூபஸ்ஸ ச ஸஹஜாதத்தி²பச்சயேன பச்சயோ, சதுஸமுட்டா²னிகதிஸமுட்டா²னிககாயஸ்ஸ பச்சா²ஜாதத்தி²பச்சயேன பச்சயோ. காமாவசராரூபாவசரோ பன ஆருப்பே ஸம்பயுத்தக்க²ந்தா⁴னஞ்ஞேவ, பஞ்சவோகாரே சித்தஸமுட்டா²னரூபஸ்ஸாபி ஸஹஜாதத்தி²பச்சயேன பச்சயோ, சதுஸமுட்டா²னிகதிஸமுட்டா²னிககாயஸ்ஸ பச்சா²ஜாதத்தி² பச்சயேன பச்சயோ.

ரூபஸங்கா²தோ பன அத்தி²பச்சயோ ஸஹஜாதோ, புரேஜாதோ, ஆஹாரோ, இந்த்³ரியந்தி சதுப்³பி³தோ⁴. தத்த² ஸஹஜாதரூபத்தி²பச்சயோ சதுஸமுட்டா²னவஸேன சதுதா⁴ டி²தோ. தத்த² கம்மஸமுட்டா²னோ ஏகம் மஹாபூ⁴தம் திண்ணன்னம் மஹாபூ⁴தானம், தீணி ஏகஸ்ஸ, த்³வே த்³வின்னம், மஹாபூ⁴தா உபாதா³ரூபானந்தி ஏவம் ஸஹஜாதத்தி²பச்சயேன பச்சயோ ஹோதி. படிஸந்தி⁴க்க²ணே வத்து²ரூபம் காமாவசரரூபாவசரவிபாகக்க²ந்தா⁴னம் ஸஹஜாதத்தி²பச்சயேன பச்சயோ ஹோதி. தேஸம்பி திஸமுட்டா²னிகரூபம் ஏகம் மஹாபூ⁴தம் திண்ணன்னம் மஹாபூ⁴தானம், தீணி ஏகஸ்ஸ, த்³வே த்³வின்னம், மஹாபூ⁴தா உபாதா³ரூபானந்தி ஏவம் ஸஹஜாதத்தி²பச்சயேன பச்சயோ ஹோதி. புரேஜாதத்தி²பச்சயோ பன வத்து²புரேஜாதஆரம்மணபுரேஜாதவஸேன து³விதோ⁴ ஹோதி. ஸோ து³விதோ⁴பி ஹேட்டா² புரேஜாதபச்சயே வுத்தனயேனேவ யோஜேத்வா க³ஹேதப்³போ³. ஆஹாரத்தி²பச்சயோபி ஹேட்டா² கப³ளீகாராஹாரபச்சயே யோஜிதனயேனேவ யோஜேதப்³போ³. இத⁴ பனேஸ அத்தனோ அனிருத்³த⁴க்க²ணே பச்சயபா⁴வேன அத்தி²பச்சயோதி வுத்தோ. ரூபஜீவிதிந்த்³ரியம்பி ஹேட்டா² இந்த்³ரியபச்சயே ரூபஜீவிதிந்த்³ரியயோஜனாயம் வுத்தனயேனேவ யோஜேதப்³ப³ம். இத⁴ பனேதம்பி அத்தனோ அனிருத்³த⁴க்க²ணேயேவ பச்சயபா⁴வேன அத்தி²பச்சயோதி வுத்தந்தி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

அத்தி²பச்சயனித்³தே³ஸவண்ணனா.