17. ஜா²னபச்சயனித்³தே³ஸவண்ணனா

17. ஜா²னபச்சயனித்³தே³ஸே ஜா²னங்கா³னீதி த்³விபஞ்சவிஞ்ஞாணவஜ்ஜேஸு ஸேஸசித்தேஸு உப்பன்னானி விதக்கவிசாரபீதிஸோமனஸ்ஸதோ³மனஸ்ஸுபேக்கா²சித்தேகக்³க³தாஸங்கா²தானி ஸத்த அங்கா³னி. பஞ்சன்னம் பன விஞ்ஞாணகாயானம் அபி⁴னிபாதமத்தத்தா தேஸு விஜ்ஜமானானிபி உபேக்கா²ஸுக²து³க்கா²னி உபனிஜ்ஜா²னாகாரஸ்ஸ அபா⁴வதோ ஜா²னங்கா³னீதி ந உத்³த⁴டானி. தத்த² பச்சி²ன்னத்தா பன ஸேஸாஹேதுகேஸுபி ஜா²னங்க³ம் ந உத்³த⁴டமேவ. தம்ஸமுட்டா²னானந்தி இதா⁴பி கடத்தாரூபம் ஸங்க³ஹிதந்தி வேதி³தப்³ப³ம். வுத்தஞ்ஹேதம் பஞ்ஹாவாரே – ‘‘படிஸந்தி⁴க்க²ணே விபாகாப்³யாகதானி ஜா²னங்கா³னி ஸம்பயுத்தகானம் க²ந்தா⁴னம் கடத்தா ச ரூபானம் ஜா²னபச்சயேன பச்சயோ’’தி. அயம் தாவேத்த² பாளிவண்ணனா. அயம் பன ஜா²னபச்சயோ ஸத்தன்னம் ஜா²னங்கா³னம் வஸேன டி²தோபி ஜாதிபே⁴த³தோ குஸலாகுஸலவிபாககிரியவஸேன சதுதா⁴ பி⁴ஜ்ஜதி, புன பூ⁴மிவஸேன சதுதா⁴; ஏகதா⁴, சதுதா⁴, திதா⁴தி த்³வாத³ஸதா⁴ பி⁴ஜ்ஜதீதி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² சதுபூ⁴மகம்பி குஸலஜா²னங்க³ம் பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, ட²பேத்வா ரூபாவசரம் அவஸேஸம் ஆருப்பே ஸம்பயுத்தத⁴ம்மானஞ்ஞேவ ஜா²னபச்சயேன பச்சயோ. அகுஸலேபி ஏஸேவ நயோ. காமாவசரரூபாவசரவிபாகம் பவத்தே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, படிஸந்தி⁴யம் ஸம்பயுத்தத⁴ம்மானஞ்சேவ கடத்தாரூபஸ்ஸ ச, ஆருப்பவிபாகம் ஸம்பயுத்தத⁴ம்மானஞ்ஞேவ, யஞ்ச ஆருப்பே லோகுத்தரவிபாகம் உப்பஜ்ஜதி, தஞ்ச. பஞ்சவோகாரே பன தம் சித்தஸமுட்டா²னரூபஸ்ஸபி ஜா²னபச்சயேன பச்சயோ ஹோதி. தேபூ⁴மகம்பி கிரியஜா²னங்க³ம் பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச. யம் பனேத்த² ஆருப்பே உப்பஜ்ஜதி, தம் ஸம்பயுத்தத⁴ம்மானஞ்ஞேவ ஜா²னபச்சயேன பச்சயோதி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

ஜா²னபச்சயனித்³தே³ஸவண்ணனா.