18. மக்³க³பச்சயனித்³தே³ஸவண்ணனா

18. மக்³க³பச்சயனித்³தே³ஸே மக்³க³ங்கா³னீதி அஹேதுகசித்துப்பாத³வஜ்ஜேஸு ஸேஸசித்தேஸு உப்பன்னானி பஞ்ஞா, விதக்கோ, ஸம்மாவாசாகம்மந்தாஜீவா, வீரியம், ஸதி, ஸமாதி⁴, மிச்சா²தி³ட்டி², மிச்சா²வாசாகம்மந்தாஜீவாதி இமானி த்³வாத³ஸங்கா³னி. மக்³க³ஸ்ஸ பன ஹேதுபச்சி²மகத்தா அஹேதுகசித்தேஸு மக்³க³ங்கா³னி ந உத்³த⁴டானி. தம்ஸமுட்டா²னானந்தி இதா⁴பி கடத்தாரூபம் ஸங்க³ஹிதமேவ. வுத்தஞ்ஹேதம் பஞ்ஹாவாரே – ‘‘படிஸந்தி⁴க்க²ணே விபாகாப்³யாகதானி மக்³க³ங்கா³னி ஸம்பயுத்தகானம் க²ந்தா⁴னம் கடத்தா ச ரூபானம் மக்³க³பச்சயேன பச்சயோ’’தி. அயம் தாவேத்த² பாளிவண்ணனா.

அயம் பன மக்³க³பச்சயோ த்³வாத³ஸன்னம் மக்³க³ங்கா³னம் வஸேன டி²தோபி ஜாதிபே⁴த³தோ குஸலாதி³வஸேன சதுதா⁴, குஸலாதீ³னஞ்ச காமாவசராதி³பூ⁴மிபே⁴த³தோ த்³வாத³ஸதா⁴ பி⁴ஜ்ஜதீதி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ. ஏவம் பி⁴ன்னே பனேத்த² சதுபூ⁴மகம்பி குஸலமக்³க³ங்க³ம் பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, ட²பேத்வா ரூபாவசரம் அவஸேஸம் ஆருப்பே ஸம்பயுத்தத⁴ம்மானஞ்ஞேவ மக்³க³பச்சயேன பச்சயோதி ஸப்³ப³ம் ஜா²னபச்சயே விய வித்தா²ரேதப்³ப³ந்தி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

மக்³க³பச்சயனித்³தே³ஸவண்ணனா.