14. விபாகபச்சயனித்³தே³ஸவண்ணனா

14. விபாகபச்சயனித்³தே³ஸே விபாகா சத்தாரோ க²ந்தா⁴தி யஸ்மா கம்மஸமுட்டா²னாபி ரூபா விபாகா ந ஹோந்தி, தஸ்மா ‘‘விபாகா’’தி வத்வா ‘‘சத்தாரோ க²ந்தா⁴’’தி வுத்தம். ஏவம் அயம் பாளி அரூபத⁴ம்மானஞ்ஞேவ விபாகபச்சயவஸேன ஆக³தா. பஞ்ஹாவாரே பன ‘‘விபாகாப்³யாகதோ ஏகோ க²ந்தோ⁴ திண்ணம் க²ந்தா⁴னம் சித்தஸமுட்டா²னானஞ்ச ரூபானம் விபாகபச்சயேன பச்சயோ. படிஸந்தி⁴க்க²ணே விபாகாப்³யாகதோ ஏகோ க²ந்தோ⁴ திண்ணன்னம் க²ந்தா⁴னம் கடத்தா ச ரூபானம் விபாகபச்சயேன பச்சயோ’’தி ஆக³தத்தா சித்தஸமுட்டா²னகம்மஸமுட்டா²னரூபானம்பி விபாகபச்சயோ லப்³ப⁴தி. இத⁴ பன ஸாவஸேஸவஸேன தே³ஸனா கதாதி அயம் தாவேத்த² பாளிவண்ணனா. அயம் பன விபாகபச்சயோ விபாகபா⁴வேன ஜாதிதோ ஏகவிதோ⁴, பூ⁴மிபே⁴த³தோ காமாவசராதி³வஸேன சதுதா⁴ பி⁴ஜ்ஜதீதி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² காமாவசரரூபாவசரவிபாகோ அத்தனா ஸம்பயுத்தத⁴ம்மானம் பவத்தே சித்தஸமுட்டா²னரூபானம் படிஸந்தி⁴யம் கடத்தாரூபானஞ்ச விபாகபச்சயோ ஹோதி. அரூபாவசரவிபாகோ ஸம்பயுத்தத⁴ம்மானஞ்ஞேவ. லோகுத்தரவிபாகோ பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, சதுவோகாரே ஸம்பயுத்தக்க²ந்தா⁴னஞ்ஞேவ விபாகபச்சயோ ஹோதீதி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

விபாகபச்சயனித்³தே³ஸவண்ணனா.