15. ஆஹாரபச்சயனித்³தே³ஸவண்ணனா

15. ஆஹாரபச்சயனித்³தே³ஸே கப³ளீகாரோ ஆஹாரோதி சதுஸந்ததிஸமுட்டா²னே ரூபே ஓஜா ஆஹாரோ நாம. ஸோ பன யஸ்மா கப³ளம் கரித்வா அஜ்ஜோ²ஹரிதோவ ஆஹாரகிச்சம் கரோதி, ந ப³ஹி டி²தோ, தஸ்மா ஆஹாரோதி அவத்வா ‘‘கப³ளீகாரோ ஆஹாரோ’’தி வுத்தம். கப³ளம் கரித்வா அஜ்ஜோ²ஹரிதப்³ப³வத்து²கத்தா வா கப³ளீகாரோதி நாமமேதம் தஸ்ஸ. அரூபினோ ஆஹாராதி ப²ஸ்ஸசேதனாவிஞ்ஞாணாஹாரா. தம்ஸமுட்டா²னானந்தி இதா⁴பி கம்மஸமுட்டா²னானி க³ஹிதானேவ. வுத்தஞ்ஹேதம் பஞ்ஹாவாரே – படிஸந்தி⁴க்க²ணே விபாகாப்³யாகதா ஆஹாரா ஸம்பயுத்தகானம் க²ந்தா⁴னம் கடத்தா ச ரூபானம் ஆஹாரபச்சயேன பச்சயோதி. அயம் தாவேத்த² பாளிவண்ணனா.

அயம் பன ஆஹாரபச்சயோ ஸங்கே²பதோ கப³ளீகாரோ ஆஹாரோ, ப²ஸ்ஸோ, சேதனா, விஞ்ஞாணந்தி சத்தாரோவ த⁴ம்மா ஹோந்தி. தத்த² ட²பேத்வா கப³ளீகாராஹாரம் ஸேஸா தயோ அரூபாஹாரா ஜாதிவஸேன குஸலாகுஸலவிபாககிரியபே⁴த³தோ சதுதா⁴ பி⁴ஜ்ஜந்தி. புன பூ⁴மிபே⁴தே³ன குஸலோ சதுதா⁴, அகுஸலோ ஏகதா⁴, விபாகோ சதுதா⁴, கிரியா திதா⁴தி ஏவம் அனேகதா⁴ பி⁴ஜ்ஜந்தி. கப³ளீகாராஹாரோ பன ஜாதிதோ அப்³யாகதோ, பூ⁴மிதோ காமாவசரோவாதி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² சதுபூ⁴மகாபி தயோ குஸலாஹாரா பஞ்சவோகாரே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச ஆஹாரபச்சயேன பச்சயோ, ட²பேத்வா பன ரூபாவசரம் அவஸேஸா ஆருப்பே ஸம்பயுத்தத⁴ம்மானஞ்ஞேவ ஆஹாரபச்சயேன பச்சயோ. அகுஸலாஹாரேஸுபி ஏஸேவ நயோ. சதுபூ⁴மகவிபாகாஹாரா பன ஸப்³ப³த்த² ஸம்பயுத்தகானம் ஆஹாரபச்சயா ஹோந்தி. காமாவசரரூபாவசரவிபாகா பனேத்த² பஞ்சவோகாரே உப்பஜ்ஜமானா பவத்தே சித்தஸமுட்டா²னரூபஸ்ஸ படிஸந்தி⁴யம் கடத்தாரூபஸ்ஸாபி ஆஹாரபச்சயா ஹோந்தி. லோகுத்தரா பன சித்தஸமுட்டா²னரூபஸ்ஸேவ, ஆருப்பே உப்பன்னா ரூபஸ்ஸ பச்சயா ந ஹோந்தி. தேபூ⁴மகாபி தயோ கிரியாஹாரா பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, காமாவசராரூபாவசரா பன ஆருப்பே ஸம்பயுத்தத⁴ம்மானஞ்ஞேவ ஆஹாரபச்சயேன பச்சயோ. சதுஸந்ததிஸமுட்டா²னோ கப³ளீகாராஹாரோ கிஞ்சாபி ‘‘இமஸ்ஸ காயஸ்ஸா’’தி அவிஸேஸதோ வுத்தோ, விஸேஸதோ பனாயமேத்த² ஆஹாரஸமுட்டா²னரூபஸ்ஸ ஜனகோ சேவ அனுபாலகோ ச ஹுத்வா ஆஹாரபச்சயேன பச்சயோ ஹோதி, ஸேஸதிஸந்ததிஸமுட்டா²னஸ்ஸ அனுபாலகோவ ஹுத்வா ஆஹாரபச்சயேன பச்சயோ ஹோதீதி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

ஆஹாரபச்சயனித்³தே³ஸவண்ணனா.