13. கம்மபச்சயனித்³தே³ஸவண்ணனா

13. கம்மபச்சயனித்³தே³ஸே கம்மந்தி சேதனாகம்மமேவ. கடத்தா ச ரூபானந்தி கம்மஸ்ஸ கடத்தா உப்பன்னரூபானம். கம்மபச்சயேனாதி அனேகானம்பி கப்பகோடீனம் மத்த²கே அத்தனோ ப²லம் உப்பாதே³தும் ஸமத்தே²ன நானாக்க²ணிககம்மபச்சயேனாதி அத்தோ². குஸலாகுஸலஞ்ஹி கம்மம் அத்தனோ பவத்திக்க²ணே ப²லம் ந தே³தி. யதி³ த³தே³ய்ய, யம் மனுஸ்ஸோ தே³வலோகூபக³ம் குஸலகம்மம் கரோதி, தஸ்ஸானுபா⁴வேன தஸ்மிம்யேவ க²ணே தே³வோ ப⁴வேய்ய. யஸ்மிம் பன க²ணே தம் கதம், ததோ அஞ்ஞஸ்மிம் க²ணே அவிஜ்ஜமானம்பி கேவலம் கடத்தாயேவ தி³ட்டே²வ த⁴ம்மே உபபஜ்ஜே வா அபரே வா பரியாயே அவஸேஸபச்சயஸமாயோகே³ ஸதி ப²லம் உப்பாதே³தி நிருத்³தா⁴பி புரிமஸிப்பாதி³கிரியா விய காலந்தரே பச்சி²மஸிப்பாதி³கிரியாய. தஸ்மா நானாக்க²ணிககம்மபச்சயோதி வுச்சதி. சேதனா ஸம்பயுத்தகானம் த⁴ம்மானந்தி யா காசி சேதனா அத்தனா ஸம்பயுத்தகானம் த⁴ம்மானம். தம்ஸமுட்டா²னானந்தி இமினா படிஸந்தி⁴க்க²ணே கடத்தாரூபம்பி க³ண்ஹாதி. கம்மபச்சயேனாதி இத³ம் ஸஹஜாதசேதனம் ஸந்தா⁴ய வுத்தம். குஸலாதீ³ஸு ஹி யா காசி ஸஹஜாதசேதனா ஸேஸத⁴ம்மானம் சித்தபயோக³ஸங்கா²தேன கிரியாபா⁴வேன உபகாரிகா ஹோதி. தஸ்மா ஸஹஜாதகம்மபச்சயோதி வுச்சதி. அயம் தாவேத்த² பாளிவண்ணனா.

அயம் பன கம்மபச்சயோ அத்த²தோ சதுபூ⁴மிகசேதனாமத்தமேவ. ஸோ ஹி ஜாதிபே⁴த³தோ குஸலோ அகுஸலோ விபாகோ கிரியாதி சதுதா⁴ பி⁴ஜ்ஜதி. தத்த² குஸலோ பூ⁴மிதோ காமாவசராதி³வஸேன சதுதா⁴ பி⁴ஜ்ஜதி. அகுஸலோ ஏகதா⁴வ விபாகோ சதுதா⁴, கிரியா திதா⁴வாதி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² ஸஹஜாதா காமாவசரகுஸலசேதனா பஞ்சவோகாரே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, சதுவோகாரே ஸம்பயுத்தக்க²ந்தா⁴னஞ்ஞேவ ஸஹஜாதகம்மபச்சயோ ஹோதி. உப்பஜ்ஜித்வா நிருத்³தா⁴ பன அத்தனோ விபாகானம் க²ந்தா⁴னம் கடத்தா ச ரூபானம் நானாக்க²ணிககம்மபச்சயேன பச்சயோ ஹோதி. ஸா ச கோ² பஞ்சவோகாரேயேவ, ந அஞ்ஞத்த². ஸஹஜாதா ரூபாவசரகுஸலசேதனா அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபானஞ்ச ஏகந்தேனேவ ஸஹஜாதகம்மபச்சயேன பச்சயோ. உப்பஜ்ஜித்வா நிருத்³தா⁴ பன அத்தனோ விபாகானஞ்சேவ கடத்தாரூபானஞ்ச நானாக்க²ணிககம்மபச்சயேன பச்சயோ. அரூபாவசரா பன லோகுத்தரா ச ஸஹஜாதா குஸலசேதனா பஞ்சவோகாரே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபானஞ்ச, சதுவோகாரே ஸம்பயுத்தக்க²ந்தா⁴னஞ்ஞேவ ஸஹஜாதகம்மபச்சயேன பச்சயோ. உப்பஜ்ஜித்வா நிருத்³தா⁴ பனேஸா து³விதா⁴பி அத்தனோ அத்தனோ விபாகக்க²ந்தா⁴னஞ்ஞேவ நானாக்க²ணிககம்மபச்சயேன பச்சயோ. ஸஹஜாதா அகுஸலசேதனா பஞ்சவோகாரே அத்தனா ஸம்பயுத்தக்க²ந்தா⁴னஞ்சேவ சித்தஸமுட்டா²னரூபானஞ்ச சதுவோகாரே அரூபக்க²ந்தா⁴னஞ்ஞேவ ஸஹஜாதகம்மபச்சயேன பச்சயோ. உப்பஜ்ஜித்வா நிருத்³தா⁴ பன விபாகக்க²ந்தா⁴னஞ்சேவ கடத்தாரூபானஞ்ச நானாக்க²ணிககம்மபச்சயேன பச்சயோ.

காமாவசரரூபாவசரதோ விபாகசேதனா அத்தனா ஸம்பயுத்தத⁴ம்மானம் பவத்தே சித்தஸமுட்டா²னரூபானம், படிஸந்தி⁴யம் கடத்தாரூபானஞ்ச ஸஹஜாதகம்மபச்சயேன பச்சயோ. அரூபாவசரவிபாகசேதனா அத்தனா ஸம்பயுத்தத⁴ம்மானஞ்ஞேவ ஸஹஜாதகம்மபச்சயேன பச்சயோ. லோகுத்தரவிபாகசேதனா பஞ்சவோகாரே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, சதுவோகாரே அரூபஸ்ஸேவ ஸஹஜாதகம்மபச்சயேன பச்சயோ. தேபூ⁴மிகா கிரியசேதனா பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச ஸஹஜாதகம்மபச்சயேன பச்சயோ. யா பனேத்த² ஆருப்பே உப்பஜ்ஜதி, ஸா அரூபத⁴ம்மானஞ்ஞேவ ஸஹஜாதகம்மபச்சயேன பச்சயோதி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

கம்மபச்சயனித்³தே³ஸவண்ணனா.