12. ஆஸேவனபச்சயனித்³தே³ஸவண்ணனா

12. ஆஸேவனபச்சயனித்³தே³ஸே புரிமா புரிமாதி ஸப்³ப³னயேஸு ஸமனந்தராதீதாவ த³ட்ட²ப்³பா³. கஸ்மா பனேத்த² அனந்தரபச்சயே விய ‘‘புரிமா புரிமா குஸலா த⁴ம்மா பச்சி²மானம் பச்சி²மானம் அப்³யாகதானம் த⁴ம்மான’’ந்திஆதி³னா நயேன பி⁴ன்னஜாதிகேஹி ஸத்³தி⁴ம் நித்³தே³ஸோ ந கதோதி? அத்தனோ க³திம் கா³ஹாபேதும் அஸமத்த²தாய. பி⁴ன்னஜாதிகா ஹி பி⁴ன்னஜாதிகானம் அரூபத⁴ம்மானம் ஆஸேவனகு³ணேன பகு³ணப³லவபா⁴வம் ஸாத⁴யமானா அத்தனோ குஸலாதி³பா⁴வஸங்கா²தம் க³திம் கா³ஹாபேதும் ந ஸக்கோந்தி. தஸ்மா தேஹி ஸத்³தி⁴ம் நித்³தே³ஸம் அகத்வா யே யேஸம் வாஸனாஸங்கா²தேன ஆஸேவனேன பகு³ணதரப³லவதரபா⁴வவிஸிட்ட²ம் அத்தனோ குஸலாதி³பா⁴வஸங்கா²தம் க³திம் கா³ஹாபேதும் ஸக்கோந்தி, தேஸம் தேஹி ஸமானஜாதிகேஹேவ ஸத்³தி⁴ம் நித்³தே³ஸோ கதோதி வேதி³தப்³போ³. அத² விபாகாப்³யாகதம் கஸ்மா ந க³ஹிதந்தி? ஆஸேவனாபா⁴வேன. விபாகஞ்ஹி கம்மவஸேன விபாகபா⁴வப்பத்தம் கம்மபரிணாமிதம் ஹுத்வா வத்ததி நிருஸ்ஸாஹம் து³ப்³ப³லந்தி தம் ஆஸேவனகு³ணேன அத்தனோ ஸபா⁴வம் கா³ஹாபேத்வா பரிபா⁴வேத்வா நேவ அஞ்ஞம் விபாகம் உப்பாதே³தும் ஸக்கோதி, ந புரிமவிபாகானுபா⁴வம் க³ஹேத்வா உப்பஜ்ஜிதுந்தி. கம்மவேக³க்கி²த்தம் பன பதிதம் விய ஹுத்வா உப்பஜ்ஜதீதி ஸப்³ப³தா²பி விபாகே ஆஸேவனம் நத்தீ²தி ஆஸேவனாபா⁴வேன விபாகம் ந க³ஹிதம். குஸலாகுஸலகிரியானந்தரம் உப்பஜ்ஜமானம்பி சேதம் கம்மபடிப³த்³த⁴வுத்திதாய ஆஸேவனகு³ணம் ந க³ண்ஹாதீதி குஸலாத³யோபிஸ்ஸ ஆஸேவனபச்சயா ந ஹோந்தி. அபிச நானாஜாதிகத்தாபேதே ந ஹோந்தியேவ. பூ⁴மிதோ பன ஆரம்மணதோ வா நானாஜாதிகத்தம் நாம நத்தி². தஸ்மா காமாவசரகுஸலகிரியாமஹக்³க³தகுஸலகிரியானம்பி, ஸங்கா²ராரம்மணஞ்ச அனுலோமகுஸலம் நிப்³பா³னாரம்மணஸ்ஸ கோ³த்ரபு⁴குஸலஸ்ஸ ஆஸேவனபச்சயோ ஹோதியேவாதி அயம் தாவேத்த² பாளிவண்ணனா. அயம் பன ஆஸேவனபச்சயோ ஜாதிதோ தாவ குஸலோ அகுஸலோ கிரியாப்³யாகதோதி திதா⁴ டி²தோ. தத்த² குஸலோ பூ⁴மிதோ காமாவசரோ ரூபாவசரோ அரூபாவசரோதி திவிதோ⁴ ஹோதி, அகுஸலோ காமாவசரோவ கிரியாப்³யாகதோ காமாவசரோ ரூபாவசரோ அரூபாவசரோதி திவிதோ⁴வ, லோகுத்தரோ ஆஸேவனபச்சயோ நாம நத்தீ²தி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² காமாவசரகுஸலம் அத்தனோ அனந்தரஸ்ஸ காமாவசரகுஸலஸ்ஸேவ. யம் பனேத்த² ஞாணஸம்பயுத்தம், தம் அத்தனா ஸதி³ஸவேத³னஸ்ஸ ரூபாவசரகுஸலஸ்ஸ அரூபாவசரகுஸலஸ்ஸ லோகுத்தரகுஸலஸ்ஸாதி இமேஸம் ராஸீனம் ஆஸேவனபச்சயோ ஹோதி. ரூபாவசரகுஸலம் பன ரூபாவசரகுஸலஸ்ஸேவ. அரூபாவசரகுஸலம் அரூபாவசரகுஸலஸ்ஸேவ. அகுஸலம் பன அகுஸலஸ்ஸேவ ஆஸேவனபச்சயோ ஹோதி. கிரியதோ பன காமாவசரகிரியஸங்கா²தோ தாவ காமாவசரகிரியஸ்ஸேவ. யோ பனேத்த² ஞாணஸம்பயுத்தோ, ஸோ அத்தனா ஸதி³ஸவேத³னஸ்ஸ ரூபாவசரகிரியஸ்ஸ அரூபாவசரகிரியஸ்ஸாதி இமேஸம் ராஸீனம் ஆஸேவனபச்சயோ ஹோதி. ரூபாவசரகிரியஸங்கா²தோ பன ரூபாவசரகிரியஸ்ஸேவ, அரூபாவசரகிரியஸங்கா²தோ அரூபாவசரகிரியஸ்ஸேவ ஆஸேவனபச்சயோ ஹோதி. விபாகோ பன ஏகத⁴ம்மஸ்ஸாபி ஏகத⁴ம்மோபி வா கோசி விபாகஸ்ஸ ஆஸேவனபச்சயோ நத்தீ²தி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

ஆஸேவனபச்சயனித்³தே³ஸவண்ணனா.