11. பச்சா²ஜாதபச்சயனித்³தே³ஸவண்ணனா

11. பச்சா²ஜாதபச்சயனித்³தே³ஸே பச்சா²ஜாதாதி யஸ்ஸ காயஸ்ஸ பச்சயா ஹோந்தி, தஸ்மிம் உப்பஜ்ஜித்வா டி²தே ஜாதா. புரேஜாதஸ்ஸாதி தேஸம் உப்பாத³தோ பட²மதரம் ஜாதஸ்ஸ ஜாதிக்க²ணம் அதிக்கமித்வா டி²திப்பத்தஸ்ஸ. இமஸ்ஸ காயஸ்ஸாதி இமஸ்ஸ சதுஸமுட்டா²னிகதிஸமுட்டா²னிகபூ⁴தஉபாதா³ரூபஸங்கா²தஸ்ஸ காயஸ்ஸ. ஏத்த² ச திஸமுட்டா²னிககாயோதி ஆஹாரஸமுட்டா²னஸ்ஸ அபா⁴வதோ ப்³ரஹ்மபாரிஸஜ்ஜாதீ³னம் காயோ வேதி³தப்³போ³. அயமேத்த² பாளிவண்ணனா. அயம் பன பச்சா²ஜாதபச்சயோ நாம ஸங்கே²பதோ ட²பேத்வா ஆருப்பவிபாகே அவஸேஸா சதுபூ⁴மகா அரூபக்க²ந்தா⁴. ஸோ ஜாதிவஸேன குஸலாகுஸலவிபாககிரியபே⁴தே³ன சதுதா⁴ பி⁴ஜ்ஜதீதி ஏவமேத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.

ஏவம் பி⁴ன்னே பனேத்த² பஞ்சவோகாரப⁴வே உப்பன்னம் சதுபூ⁴மககுஸலஞ்ச அகுஸலஞ்ச உப்பாத³க்க²ணம் அதிக்கமித்வா டி²திப்பத்தஸ்ஸ சதுஸமுட்டா²னிகதிஸமுட்டா²னிகரூபகாயஸ்ஸ பச்சா²ஜாதபச்சயோ ஹோதி. விபாகேபி ட²பேத்வா படிஸந்தி⁴விபாகம் அவஸேஸோ காமாவசரரூபாவசரவிபாகோ தஸ்ஸேவ ஏகந்தேன பச்சா²ஜாதபச்சயோ ஹோதி. லோகுத்தரோபி பஞ்சவோகாரே உப்பன்னவிபாகோ தஸ்ஸேவ பச்சா²ஜாதபச்சயோ ஹோதி. தேபூ⁴மககிரியாபி பஞ்சவோகாரே உப்பன்னாவ வுத்தப்பகாரஸ்ஸ காயஸ்ஸ பச்சா²ஜாதபச்சயோ ஹோதீதி ஏவமேத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.

பச்சா²ஜாதபச்சயனித்³தே³ஸவண்ணனா.