4. ப⁴ரண்டு³காலாமஸுத்தம்

127. ஏகம் ஸமயம் ப⁴க³வா கோஸலேஸு சாரிகம் சரமானோ யேன கபிலவத்து² தத³வஸரி. அஸ்ஸோஸி கோ² மஹானாமோ ஸக்கோ – ‘‘ப⁴க³வா கிர கபிலவத்து²ம் அனுப்பத்தோ’’தி. அத² கோ² மஹானாமோ ஸக்கோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தம் கோ² மஹானாமம் ஸக்கம் ப⁴க³வா ஏதத³வோச –

‘‘க³ச்ச², மஹானாம, கபிலவத்து²ஸ்மிம், ததா²ரூபம் ஆவஸத²ம் ஜான யத்த²ஜ்ஜ மயம் ஏகரத்திம் விஹரேய்யாமா’’தி. ‘‘ஏவம், ப⁴ந்தே’’தி கோ² மஹானாமோ ஸக்கோ ப⁴க³வதோ படிஸ்ஸுத்வா கபிலவத்து²ம் பவிஸித்வா கேவலகப்பம் கபிலவத்து²ம் அன்வாஹிண்ட³ந்தோ [ஆஹிண்ட³ந்தோ (ஸ்யா. கம்.)] நாத்³த³ஸ கபிலவத்து²ஸ்மிம் ததா²ரூபம் ஆவஸத²ம் யத்த²ஜ்ஜ ப⁴க³வா ஏகரத்திம் விஹரேய்ய.

அத² கோ² மஹானாமோ ஸக்கோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் ஏதத³வோச – ‘‘நத்தி², ப⁴ந்தே, கபிலவத்து²ஸ்மிம் ததா²ரூபோ ஆவஸதோ² யத்த²ஜ்ஜ ப⁴க³வா ஏகரத்திம் விஹரேய்ய. அயம், ப⁴ந்தே, ப⁴ரண்டு³ காலாமோ ப⁴க³வதோ புராணஸப்³ரஹ்மசாரீ. தஸ்ஸஜ்ஜ ப⁴க³வா அஸ்ஸமே ஏகரத்திம் விஹரதூ’’தி. ‘‘க³ச்ச², மஹானாம, ஸந்த²ரம் பஞ்ஞபேஹீ’’தி. ‘‘ஏவம், ப⁴ந்தே’’தி கோ² மஹானாமோ ஸக்கோ ப⁴க³வதோ படிஸ்ஸுத்வா யேன ப⁴ரண்டு³ஸ்ஸ காலாமஸ்ஸ அஸ்ஸமோ தேனுபஸங்கமி; உபஸங்கமித்வா ஸந்த²ரம் பஞ்ஞாபேத்வா உத³கம் ட²பேத்வா பாதா³னம் தோ⁴வனாய யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் ஏதத³வோச – ‘‘ஸந்த²தோ, ப⁴ந்தே, ஸந்தா²ரோ, உத³கம் ட²பிதம் பாதா³னம் தோ⁴வனாய. யஸ்ஸதா³னி, ப⁴ந்தே, ப⁴க³வா காலம் மஞ்ஞதீ’’தி.

அத² கோ² ப⁴க³வா யேன ப⁴ரண்டு³ஸ்ஸ காலாமஸ்ஸ அஸ்ஸமோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பாதே³ பக்கா²லேஸி. அத² கோ² மஹானாமஸ்ஸ ஸக்கஸ்ஸ ஏதத³ஹோஸி – ‘‘அகாலோ கோ² அஜ்ஜ ப⁴க³வந்தம் பயிருபாஸிதும். கிலந்தோ ப⁴க³வா. ஸ்வே தா³னாஹம் ப⁴க³வந்தம் பயிருபாஸிஸ்ஸாமீ’’தி ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி.

அத² கோ² மஹானாமோ ஸக்கோ தஸ்ஸா ரத்தியா அச்சயேன யேன ப⁴க³வா தேனுபஸங்கமி; உபஸங்கமித்வா ஏகமந்தம் நிஸீதி³. ஏகமந்தம் நிஸின்னம் கோ² மஹானாமம் ஸக்கம் ப⁴க³வா ஏதத³வோச – ‘‘தயோ கோ²மே, மஹானாம, ஸத்தா²ரோ ஸந்தோ ஸம்விஜ்ஜமானா லோகஸ்மிம். கதமே தயோ? இத⁴, மஹானாம, ஏகச்சோ ஸத்தா² காமானம் பரிஞ்ஞம் பஞ்ஞாபேதி; ந ரூபானம் பரிஞ்ஞம் பஞ்ஞாபேதி, ந வேத³னானம் பரிஞ்ஞம் பஞ்ஞாபேதி. இத⁴ பன, மஹானாம, ஏகச்சோ ஸத்தா² காமானம் பரிஞ்ஞம் பஞ்ஞாபேதி, ரூபானம் பரிஞ்ஞம் பஞ்ஞாபேதி; ந வேத³னானம் பரிஞ்ஞம் பஞ்ஞாபேதி. இத⁴ பன, மஹானாம, ஏகச்சோ ஸத்தா² காமானம் பரிஞ்ஞம் பஞ்ஞாபேதி, ரூபானம் பரிஞ்ஞம் பஞ்ஞாபேதி, வேத³னானம் பரிஞ்ஞம் பஞ்ஞாபேதி. இமே கோ², மஹானாம, தயோ ஸத்தா²ரோ ஸந்தோ ஸம்விஜ்ஜமானா லோகஸ்மிம். ‘இமேஸம், மஹானாம, திண்ணம் ஸத்தா²ரானம் ஏகா நிட்டா² உதா³ஹு புது² நிட்டா²’’’தி?

ஏவம் வுத்தே ப⁴ரண்டு³ காலாமோ மஹானாமம் ஸக்கம் ஏதத³வோச – ‘‘ஏகாதி, மஹானாம, வதே³ஹீ’’தி. ஏவம் வுத்தே ப⁴க³வா மஹானாமம் ஸக்கம் ஏதத³வோச – ‘‘நானாதி, மஹானாம, வதே³ஹீ’’தி. து³தியம்பி கோ² ப⁴ரண்டு³ காலாமோ மஹானாமம் ஸக்கம் ஏதத³வோச – ‘‘ஏகாதி, மஹானாம, வதே³ஹீ’’தி. து³தியம்பி கோ² ப⁴க³வா மஹானாமம் ஸக்கம் ஏதத³வோச – ‘‘நானாதி, மஹானாம, வதே³ஹீ’’தி. ததியம்பி கோ² ப⁴ரண்டு³ காலாமோ மஹானாமம் ஸக்கம் ஏதத³வோச – ‘‘ஏகாதி, மஹானாம, வதே³ஹீ’’தி. ததியம்பி கோ² ப⁴க³வா மஹானாமம் ஸக்கம் ஏதத³வோச – ‘‘நானாதி, மஹானாம, வதே³ஹீ’’தி.

அத² கோ² ப⁴ரண்டு³ காலாமஸ்ஸ ஏதத³ஹோஸி – ‘‘மஹேஸக்க²ஸ்ஸ வதம்ஹி மஹானாமஸ்ஸ ஸக்கஸ்ஸ ஸம்முகா² ஸமணேன கோ³தமேன யாவததியம் அபஸாதி³தோ. யம்னூனாஹம் கபிலவத்து²ம்ஹா பக்கமேய்ய’’ந்தி. அத² கோ² ப⁴ரண்டு³ காலாமோ கபிலவத்து²ம்ஹா பக்காமி. யம் கபிலவத்து²ம்ஹா பக்காமி ததா² பக்கந்தோவ அஹோஸி ந புன பச்சாக³ச்சீ²தி. சதுத்த²ம்.