11. நிமித்தஸுத்தம்

103. ‘‘அதி⁴சித்தமனுயுத்தேன, பி⁴க்க²வே, பி⁴க்கு²னா தீணி நிமித்தானி காலேன காலம் மனஸி காதப்³பா³னி – காலேன காலம் ஸமாதி⁴னிமித்தம் மனஸி காதப்³ப³ம், காலேன காலம் பக்³க³ஹனிமித்தம் மனஸி காதப்³ப³ம், காலேன காலம் உபேக்கா²னிமித்தம் மனஸி காதப்³ப³ம். ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் ஸமாதி⁴னிமித்தம்யேவ மனஸி கரேய்ய, டா²னம் தம் சித்தம் கோஸஜ்ஜாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் பக்³க³ஹனிமித்தம்யேவ மனஸி கரேய்ய, டா²னம் தம் சித்தம் உத்³த⁴ச்சாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் உபேக்கா²னிமித்தம்யேவ மனஸி கரேய்ய, டா²னம் தம் சித்தம் ந ஸம்மா ஸமாதி⁴யேய்ய ஆஸவானம் க²யாய. யதோ ச கோ², பி⁴க்க²வே, அதி⁴சித்தமனுயுத்தோ பி⁴க்கு² காலேன காலம் ஸமாதி⁴னிமித்தம் மனஸி கரோதி, காலேன காலம் பக்³க³ஹனிமித்தம் மனஸி கரோதி, காலேன காலம் உபேக்கா²னிமித்தம் மனஸி கரோதி, தம் ஹோதி சித்தம் முது³ஞ்ச கம்மனியஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா ஸமாதி⁴யதி ஆஸவானம் க²யாய.

‘‘ஸேய்யதா²பி, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா உக்கம் ப³ந்தே⁴ய்ய [ப³ந்த⁴தி… ஆலிம்பதி (விஸுத்³தி⁴. 1.181 தம்டீகாயம் ச) ம. நி. அட்ட². 1.76; ம. நி. 3.360 தம்அட்ட²கதா²டீகாஸு ச பஸ்ஸிதப்³ப³ம்], உக்கம் ப³ந்தி⁴த்வா உக்காமுக²ம் ஆலிம்பேய்ய, உக்காமுக²ம் ஆலிம்பேத்வா ஸண்டா³ஸேன ஜாதரூபம் க³ஹேத்வா உக்காமுகே² பக்கி²பேய்ய [பக்கி²பதி (விஸுத்³தி⁴. 1.181)], உக்காமுகே² பக்கி²பித்வா காலேன காலம் அபி⁴த⁴மதி, காலேன காலம் உத³கேன பரிப்போ²ஸேதி, காலேன காலம் அஜ்ஜு²பேக்க²தி. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் அபி⁴த⁴மேய்ய, டா²னம் தம் ஜாதரூபம் ட³ஹேய்ய. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் உத³கேன பரிப்போ²ஸேய்ய, டா²னம் தம் ஜாதரூபம் நிப்³பா³பேய்ய [நிப்³பா³யேய்ய (ஸீ.)]. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் அஜ்ஜு²பேக்கே²ய்ய, டா²னம் தம் ஜாதரூபம் ந ஸம்மா பரிபாகம் க³ச்சே²ய்ய. யதோ ச கோ², பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் காலேன காலம் அபி⁴த⁴மதி, காலேன காலம் உத³கேன பரிப்போ²ஸேதி, காலேன காலம் அஜ்ஜு²பேக்க²தி, தம் ஹோதி ஜாதரூபம் முது³ஞ்ச கம்மனியஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா உபேதி கம்மாய. யஸ்ஸா யஸ்ஸா ச பிலந்த⁴னவிகதியா ஆகங்க²தி – யதி³ பட்டிகாய, யதி³ குண்ட³லாய, யதி³ கீ³வேய்யகே, யதி³ ஸுவண்ணமாலாய – தஞ்சஸ்ஸ அத்த²ம் அனுபோ⁴தி.

‘‘ஏவமேவம் கோ², பி⁴க்க²வே, அதி⁴சித்தமனுயுத்தேன பி⁴க்கு²னா தீணி நிமித்தானி காலேன காலம் மனஸி காதப்³பா³னி – காலேன காலம் ஸமாதி⁴னிமித்தம் மனஸி காதப்³ப³ம், காலேன காலம் பக்³க³ஹனிமித்தம் மனஸி காதப்³ப³ம், காலேன காலம் உபேக்கா²னிமித்தம் மனஸி காதப்³ப³ம். ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் ஸமாதி⁴னிமித்தம்யேவ மனஸி கரேய்ய, டா²னம் தம் சித்தம் கோஸஜ்ஜாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் பக்³க³ஹனிமித்தம்யேவ மனஸி கரேய்ய, டா²னம் தம் சித்தம் உத்³த⁴ச்சாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் உபேக்கா²னிமித்தம்யேவ மனஸி கரேய்ய, டா²னம் தம் சித்தம் ந ஸம்மா ஸமாதி⁴யேய்ய ஆஸவானம் க²யாய. யதோ ச கோ², பி⁴க்க²வே, அதி⁴சித்தமனுயுத்தோ பி⁴க்கு² காலேன காலம் ஸமாதி⁴னிமித்தம் மனஸி கரோதி, காலேன காலம் பக்³க³ஹனிமித்தம் மனஸி கரோதி, காலேன காலம் உபேக்கா²னிமித்தம் மனஸி கரோதி, தம் ஹோதி சித்தம் முது³ஞ்ச கம்மனியஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா ஸமாதி⁴யதி ஆஸவானம் க²யாய. யஸ்ஸ யஸ்ஸ ச அபி⁴ஞ்ஞாஸச்சி²கரணீயஸ்ஸ த⁴ம்மஸ்ஸ சித்தம் அபி⁴னின்னாமேதி அபி⁴ஞ்ஞாஸச்சி²கிரியாய, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதிஆயதனே.

‘‘ஸோ ஸசே ஆகங்க²தி – ‘அனேகவிஹிதம் இத்³தி⁴வித⁴ம் பச்சனுப⁴வேய்யம்…பே… (ச² அபி⁴ஞ்ஞா வித்தா²ரேதப்³பா³) ஆஸவானம் க²யா…பே… ஸச்சி²கத்வா உபஸம்பஜ்ஜ விஹரேய்ய’ந்தி, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதிஆயதனே’’தி. ஏகாத³ஸமம்.

லோணகபல்லவக்³கோ³ [லோணப²லவக்³கோ³ (ஸீ. ஸ்யா. கம். பீ.)] பஞ்சமோ.