1. அச்சாயிகஸுத்தம்

93. ‘‘தீணிமானி, பி⁴க்க²வே, கஸ்ஸகஸ்ஸ க³ஹபதிஸ்ஸ அச்சாயிகானி கரணீயானி. கதமானி தீணி? இத⁴, பி⁴க்க²வே, கஸ்ஸகோ க³ஹபதி ஸீக⁴ம் ஸீக⁴ம் கே²த்தம் ஸுகட்ட²ம் கரோதி ஸுமதிகதம். ஸீக⁴ம் ஸீக⁴ம் கே²த்தம் ஸுகட்ட²ம் கரித்வா ஸுமதிகதம் ஸீக⁴ம் ஸீக⁴ம் பீ³ஜானி பதிட்டா²பேதி. ஸீக⁴ம் ஸீக⁴ம் பீ³ஜானி பதிட்டா²பேத்வா ஸீக⁴ம் ஸீக⁴ம் உத³கம் அபி⁴னேதிபி அபனேதிபி. இமானி கோ², பி⁴க்க²வே, தீணி கஸ்ஸகஸ்ஸ க³ஹபதிஸ்ஸ அச்சாயிகானி கரணீயானி. தஸ்ஸ கோ² தம், பி⁴க்க²வே, கஸ்ஸகஸ்ஸ க³ஹபதிஸ்ஸ நத்தி² ஸா இத்³தி⁴ வா ஆனுபா⁴வோ வா – ‘அஜ்ஜேவ மே த⁴ஞ்ஞானி ஜாயந்து, ஸ்வேவ க³ப்³பீ⁴னி ஹோந்து, உத்தரஸ்வேவ பச்சந்தூ’தி. அத² கோ², பி⁴க்க²வே, ஹோதி ஸோ ஸமயோ யம் தஸ்ஸ கஸ்ஸகஸ்ஸ க³ஹபதிஸ்ஸ தானி த⁴ஞ்ஞானி உதுபரிணாமீனி ஜாயந்திபி க³ப்³பீ⁴னிபி ஹோந்தி பச்சந்திபி.

‘‘ஏவமேவம் கோ², பி⁴க்க²வே, தீணிமானி பி⁴க்கு²ஸ்ஸ அச்சாயிகானி கரணீயானி. கதமானி தீணி? அதி⁴ஸீலஸிக்கா²ஸமாதா³னம், அதி⁴சித்தஸிக்கா²ஸமாதா³னம், அதி⁴பஞ்ஞாஸிக்கா²ஸமாதா³னம் – இமானி கோ², பி⁴க்க²வே, தீணி பி⁴க்கு²ஸ்ஸ அச்சாயிகானி கரணீயானி. தஸ்ஸ கோ² தம், பி⁴க்க²வே, பி⁴க்கு²னோ நத்தி² ஸா இத்³தி⁴ வா அனுபா⁴வோ வா – ‘அஜ்ஜேவ மே அனுபாதா³ய ஆஸவேஹி சித்தம் விமுச்சது ஸ்வே வா உத்தரஸ்வே வா’தி. அத² கோ², பி⁴க்க²வே, ஹோதி ஸோ ஸமயோ யம் தஸ்ஸ பி⁴க்கு²னோ அதி⁴ஸீலம்பி ஸிக்க²தோ அதி⁴சித்தம்பி ஸிக்க²தோ அதி⁴பஞ்ஞம்பி ஸிக்க²தோ அனுபாதா³ய ஆஸவேஹி சித்தம் விமுச்சதி.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘திப்³போ³ நோ ச²ந்தோ³ ப⁴விஸ்ஸதி அதி⁴ஸீலஸிக்கா²ஸமாதா³னே, திப்³போ³ ச²ந்தோ³ ப⁴விஸ்ஸதி அதி⁴சித்தஸிக்கா²ஸமாதா³னே, திப்³போ³ ச²ந்தோ³ ப⁴விஸ்ஸதி அதி⁴பஞ்ஞாஸிக்கா²ஸமாதா³னே’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. பட²மம்.