2. பவிவேகஸுத்தம்

94. ‘‘தீணிமானி, பி⁴க்க²வே, அஞ்ஞதித்தி²யா பரிப்³பா³ஜகா பவிவேகானி பஞ்ஞாபேந்தி. கதமானி தீணி? சீவரபவிவேகம், பிண்ட³பாதபவிவேகம், ஸேனாஸனபவிவேகம்.

‘‘தத்ரித³ம், பி⁴க்க²வே, அஞ்ஞதித்தி²யா பரிப்³பா³ஜகா சீவரபவிவேகஸ்மிம் பஞ்ஞாபேந்தி, ஸாணானிபி தா⁴ரேந்தி, மஸாணானிபி தா⁴ரேந்தி, ச²வது³ஸ்ஸானிபி தா⁴ரேந்தி, பம்ஸுகூலானிபி தா⁴ரேந்தி, திரீடானிபி தா⁴ரேந்தி, அஜினம்பி தா⁴ரேந்தி, அஜினக்கி²பம்பி தா⁴ரேந்தி, குஸசீரம்பி தா⁴ரேந்தி, வாகசீரம்பி தா⁴ரேந்தி, ப²லகசீரம்பி தா⁴ரேந்தி, கேஸகம்ப³லம்பி தா⁴ரேந்தி, வாலகம்ப³லம்பி தா⁴ரேந்தி, உலூகபக்கி²கம்பி தா⁴ரேந்தி. இத³ம் கோ², பி⁴க்க²வே, அஞ்ஞதித்தி²யா பரிப்³பா³ஜகா சீவரபவிவேகஸ்மிம் பஞ்ஞாபேந்தி.

‘‘தத்ரித³ம், பி⁴க்க²வே, அஞ்ஞதித்தி²யா பரிப்³பா³ஜகா பிண்ட³பாதபவிவேகஸ்மிம் பஞ்ஞாபேந்தி. ஸாகப⁴க்கா²பி ஹோந்தி, ஸாமாகப⁴க்கா²பி ஹோந்தி, நீவாரப⁴க்கா²பி ஹோந்தி, த³த்³து³லப⁴க்கா²பி ஹோந்தி, ஹடப⁴க்கா²பி ஹோந்தி, கணப⁴க்கா²பி ஹோந்தி, ஆசாமப⁴க்கா²பி ஹோந்தி, பிஞ்ஞாகப⁴க்கா²பி ஹோந்தி, திணப⁴க்கா²பி ஹோந்தி, கோ³மயப⁴க்கா²பி ஹோந்தி, வனமூலப²லாஹாரா யாபேந்தி பவத்தப²லபோ⁴ஜீ. இத³ம் கோ², பி⁴க்க²வே, அஞ்ஞதித்தி²யா பரிப்³பா³ஜகா பிண்ட³பாதபவிவேகஸ்மிம் பஞ்ஞாபேந்தி.

‘‘தத்ரித³ம், பி⁴க்க²வே, அஞ்ஞதித்தி²யா பரிப்³பா³ஜகா ஸேனாஸனபவிவேகஸ்மிம் பஞ்ஞாபேந்தி அரஞ்ஞம் ருக்க²மூலம் ஸுஸானம் [ருக்க²மூலம் பு⁴ஸாகா³ரம் ஸுஸானம் (க.)] வனபத்த²ம் அப்³போ⁴காஸம் பலாலபுஞ்ஜம் பு⁴ஸாகா³ரம் [ஸுஞ்ஞாகா³ரம் (க.)]. இத³ம் கோ², பி⁴க்க²வே, அஞ்ஞதித்தி²யா பரிப்³பா³ஜகா ஸேனாஸனபவிவேகஸ்மிம் பஞ்ஞாபேந்தி. இமானி கோ², பி⁴க்க²வே, தீணி அஞ்ஞதித்தி²யா பரிப்³பா³ஜகா பவிவேகானி பஞ்ஞாபேந்தி.

‘‘தீணி கோ² பனிமானி, பி⁴க்க²வே, இமஸ்மிம் த⁴ம்மவினயே பி⁴க்கு²னோ பவிவேகானி. கதமானி தீணி? இத⁴, பி⁴க்க²வே, பி⁴க்கு² ஸீலவா ச ஹோதி, து³ஸ்ஸீல்யஞ்சஸ்ஸ பஹீனம் ஹோதி, தேன ச விவித்தோ ஹோதி; ஸம்மாதி³ட்டி²கோ ச ஹோதி, மிச்சா²தி³ட்டி² சஸ்ஸ பஹீனா ஹோதி, தாய ச விவித்தோ ஹோதி; கீ²ணாஸவோ ச ஹோதி, ஆஸவா சஸ்ஸ பஹீனா ஹோந்தி, தேஹி ச விவித்தோ ஹோதி. யதோ கோ², பி⁴க்க²வே, பி⁴க்கு² ஸீலவா ஹோதி, து³ஸ்ஸீல்யஞ்சஸ்ஸ பஹீனம் ஹோதி, தேன ச விவித்தோ ஹோதி; ஸம்மாதி³ட்டி²கோ ச ஹோதி, மிச்சா²தி³ட்டி² சஸ்ஸ பஹீனா ஹோதி, தாய ச விவித்தோ ஹோதி; கீ²ணாஸவோ ச ஹோதி, ஆஸவா சஸ்ஸ பஹீனா ஹோந்தி, தேஹி ச விவித்தோ ஹோதி. அயம் வுச்சதி, பி⁴க்க²வே, ‘பி⁴க்கு² அக்³க³ப்பத்தோ ஸாரப்பத்தோ ஸுத்³தோ⁴ ஸாரே பதிட்டி²தோ’’’.

‘‘ஸேய்யதா²பி, பி⁴க்க²வே, கஸ்ஸகஸ்ஸ க³ஹபதிஸ்ஸ ஸம்பன்னம் ஸாலிக்கே²த்தம். தமேனம் கஸ்ஸகோ க³ஹபதி ஸீக⁴ம் ஸீக⁴ம் [ஸீக⁴ஸீக⁴ம் (ஸீ. ஸ்யா. கம். பீ.)] லவாபேய்ய. ஸீக⁴ம் ஸீக⁴ம் லவாபேத்வா ஸீக⁴ம் ஸீக⁴ம் ஸங்க⁴ராபேய்ய. ஸீக⁴ம் ஸீக⁴ம் ஸங்க⁴ராபேத்வா ஸீக⁴ம் ஸீக⁴ம் உப்³ப³ஹாபேய்ய [உப்³பா³ஹாபேய்ய (ஸ்யா. கம்.)]. ஸீக⁴ம் ஸீக⁴ம் உப்³ப³ஹாபேத்வா ஸீக⁴ம் ஸீக⁴ம் புஞ்ஜம் காராபேய்ய. ஸீக⁴ம் ஸீக⁴ம் புஞ்ஜம் காராபேத்வா ஸீக⁴ம் ஸீக⁴ம் மத்³தா³பேய்ய. ஸீக⁴ம் ஸீக⁴ம் மத்³தா³பேத்வா ஸீக⁴ம் ஸீக⁴ம் பலாலானி உத்³த⁴ராபேய்ய. ஸீக⁴ம் ஸீக⁴ம் பலாலானி உத்³த⁴ராபேத்வா ஸீக⁴ம் ஸீக⁴ம் பு⁴ஸிகம் உத்³த⁴ராபேய்ய. ஸீக⁴ம் ஸீக⁴ம் பு⁴ஸிகம் உத்³த⁴ராபேத்வா ஸீக⁴ம் ஸீக⁴ம் ஓபுனாபேய்ய. ஸீக⁴ம் ஸீக⁴ம் ஓபுனாபேத்வா ஸீக⁴ம் ஸீக⁴ம் அதிஹராபேய்ய. ஸீக⁴ம் ஸீக⁴ம் அதிஹராபேத்வா ஸீக⁴ம் ஸீக⁴ம் கோட்டாபேய்ய. ஸீக⁴ம் ஸீக⁴ம் கோட்டாபேத்வா ஸீக⁴ம் ஸீக⁴ம் து²ஸானி உத்³த⁴ராபேய்ய. ஏவமஸ்ஸு [ஏவஸ்ஸு (க.)] தானி, பி⁴க்க²வே, கஸ்ஸகஸ்ஸ க³ஹபதிஸ்ஸ த⁴ஞ்ஞானி அக்³க³ப்பத்தானி ஸாரப்பத்தானி ஸுத்³தா⁴னி ஸாரே பதிட்டி²தானி.

‘‘ஏவமேவம் கோ², பி⁴க்க²வே, யதோ பி⁴க்கு² ஸீலவா ச ஹோதி, து³ஸ்ஸீல்யஞ்சஸ்ஸ பஹீனம் ஹோதி, தேன ச விவித்தோ ஹோதி; ஸம்மாதி³ட்டி²கோ ச ஹோதி, மிச்சா²தி³ட்டி² சஸ்ஸ பஹீனா ஹோதி, தாய ச விவித்தோ ஹோதி; கீ²ணாஸவோ ச ஹோதி, ஆஸவா சஸ்ஸ பஹீனா ஹோந்தி, தேஹி ச விவித்தோ ஹோதி. அயம் வுச்சதி, பி⁴க்க²வே, ‘பி⁴க்கு² அக்³க³ப்பத்தோ ஸாரப்பத்தோ ஸுத்³தோ⁴ ஸாரே பதிட்டி²தோ’’’தி. து³தியம்.