3. கே²த்தஸுத்தம்

84. ‘‘தீணிமானி, பி⁴க்க²வே, கஸ்ஸகஸ்ஸ க³ஹபதிஸ்ஸ புப்³பே³ கரணீயானி. கதமானி தீணி? இத⁴, பி⁴க்க²வே, கஸ்ஸகோ க³ஹபதி படிகச்சேவ [படிக³ச்சேவ (ஸீ. பீ.)] கே²த்தம் ஸுகட்ட²ம் கரோதி ஸுமதிகதம் [ஸுமத்திகதம் (க.), ஏத்த² மதிஸத்³தோ³ கட்ட²கே²த்தஸ்ஸ ஸமீகரணஸாத⁴னே தா³ருப⁴ண்டே³ வத்ததீதி ஸக்கதஅபி⁴தா⁴னேஸு ஆக³தம். தம் ‘‘மதியா ஸுட்டு² ஸமீகத’’ந்தி அட்ட²கதா²ய ஸமேதி]. படிகச்சேவ கே²த்தம் ஸுகட்ட²ம் கரித்வா ஸுமதிகதம் காலேன பீ³ஜானி பதிட்டா²பேதி. காலேன பீ³ஜானி பதிட்டா²பேத்வா ஸமயேன உத³கம் அபி⁴னேதிபி அபனேதிபி. இமானி கோ², பி⁴க்க²வே, தீணி கஸ்ஸகஸ்ஸ க³ஹபதிஸ்ஸ புப்³பே³ கரணீயானி.

‘‘ஏவமேவம் கோ², பி⁴க்க²வே, தீணிமானி பி⁴க்கு²ஸ்ஸ புப்³பே³ கரணீயானி. கதமானி தீணி? அதி⁴ஸீலஸிக்கா²ஸமாதா³னம், அதி⁴சித்தஸிக்கா²ஸமாதா³னம், அதி⁴பஞ்ஞாஸிக்கா²ஸமாதா³னம் – இமானி கோ², பி⁴க்க²வே, தீணி பி⁴க்கு²ஸ்ஸ புப்³பே³ கரணீயானி.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘திப்³போ³ நோ ச²ந்தோ³ ப⁴விஸ்ஸதி அதி⁴ஸீலஸிக்கா²ஸமாதா³னே, திப்³போ³ நோ ச²ந்தோ³ ப⁴விஸ்ஸதி அதி⁴சித்தஸிக்கா²ஸமாதா³னே, திப்³போ³ நோ ச²ந்தோ³ ப⁴விஸ்ஸதி அதி⁴பஞ்ஞாஸிக்கா²ஸமாதா³னே’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ததியம்.