4. வஜ்ஜிபுத்தஸுத்தம்

85. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² அஞ்ஞதரோ வஜ்ஜிபுத்தகோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ வஜ்ஜிபுத்தகோ பி⁴க்கு² ப⁴க³வந்தம் ஏதத³வோச – ‘‘ஸாதி⁴கமித³ம், ப⁴ந்தே, தி³யட்³ட⁴ஸிக்கா²பத³ஸதம் [தி³யட்³ட⁴ம் ஸிக்கா²பத³ஸதம் (ஸீ.)] அன்வத்³த⁴மாஸம் உத்³தே³ஸம் ஆக³ச்ச²தி. நாஹம், ப⁴ந்தே, ஏத்த² ஸக்கோமி ஸிக்கி²து’’ந்தி. ‘‘ஸக்கி²ஸ்ஸஸி பன த்வம், பி⁴க்கு², தீஸு ஸிக்கா²ஸு ஸிக்கி²தும் – அதி⁴ஸீலஸிக்கா²ய, அதி⁴சித்தஸிக்கா²ய அதி⁴பஞ்ஞாஸிக்கா²யா’’தி? ‘‘ஸக்கோமஹம், ப⁴ந்தே, தீஸு ஸிக்கா²ஸு ஸிக்கி²தும் – அதி⁴ஸீலஸிக்கா²ய, அதி⁴சித்தஸிக்கா²ய, அதி⁴பஞ்ஞாஸிக்கா²யா’’தி. ‘‘தஸ்மாதிஹ த்வம், பி⁴க்கு², தீஸு ஸிக்கா²ஸு ஸிக்க²ஸ்ஸு – அதி⁴ஸீலஸிக்கா²ய, அதி⁴சித்தஸிக்கா²ய, அதி⁴பஞ்ஞாஸிக்கா²ய’’.

‘‘யதோ கோ² த்வம், பி⁴க்கு², அதி⁴ஸீலம்பி ஸிக்கி²ஸ்ஸஸி, அதி⁴சித்தம்பி ஸிக்கி²ஸ்ஸஸி, அதி⁴பஞ்ஞம்பி ஸிக்கி²ஸ்ஸஸி, தஸ்ஸ துய்ஹம் பி⁴க்கு² அதி⁴ஸீலம்பி ஸிக்க²தோ அதி⁴சித்தம்பி ஸிக்க²தோ அதி⁴பஞ்ஞம்பி ஸிக்க²தோ ராகோ³ பஹீயிஸ்ஸதி, தோ³ஸோ பஹீயிஸ்ஸதி, மோஹோ பஹீயிஸ்ஸதி. ஸோ த்வம் ராக³ஸ்ஸ பஹானா தோ³ஸஸ்ஸ பஹானா மோஹஸ்ஸ பஹானா யம் அகுஸலம் ந தம் கரிஸ்ஸஸி, யம் பாபம் ந தம் ஸேவிஸ்ஸஸீ’’தி.

அத² கோ² ஸோ பி⁴க்கு² அபரேன ஸமயேன அதி⁴ஸீலம்பி ஸிக்கி², அதி⁴சித்தம்பி ஸிக்கி², அதி⁴பஞ்ஞம்பி ஸிக்கி². தஸ்ஸ அதி⁴ஸீலம்பி ஸிக்க²தோ அதி⁴சித்தம்பி ஸிக்க²தோ அதி⁴பஞ்ஞம்பி ஸிக்க²தோ ராகோ³ பஹீயி, தோ³ஸோ பஹீயி, மோஹோ பஹீயி. ஸோ ராக³ஸ்ஸ பஹானா தோ³ஸஸ்ஸ பஹானா மோஹஸ்ஸ பஹானா யம் அகுஸலம் தம் நாகாஸி, யம் பாபம் தம் ந ஸேவீதி. சதுத்த²ம்.