9. அகுஸலமூலஸுத்தம்

70. ‘‘தீணிமானி, பி⁴க்க²வே, அகுஸலமூலானி. கதமானி தீணி? லோபோ⁴ அகுஸலமூலம், தோ³ஸோ அகுஸலமூலம், மோஹோ அகுஸலமூலம்.

‘‘யத³பி, பி⁴க்க²வே, லோபோ⁴ தத³பி அகுஸலமூலம் [அகுஸலம் (ஸீ. ஸ்யா. கம். பீ.)]; யத³பி லுத்³தோ⁴ அபி⁴ஸங்க²ரோதி காயேன வாசாய மனஸா தத³பி அகுஸலம் [அகுஸலமூலம் (க.)]; யத³பி லுத்³தோ⁴ லோபே⁴ன அபி⁴பூ⁴தோ பரியாதி³ன்னசித்தோ பரஸ்ஸ அஸதா து³க்க²ம் உப்பாத³யதி [உபத³ஹதி (ஸீ. ஸ்யா. கம். பீ.)] வதே⁴ன வா ப³ந்த⁴னேன வா ஜானியா வா க³ரஹாய வா பப்³பா³ஜனாய வா ப³லவம்ஹி ப³லத்தோ² இதிபி தத³பி அகுஸலம் [இத³ம் பன ஸப்³ப³த்த²பி ஏவமேவ தி³ஸ்ஸதி]. இதிஸ்ஸமே லோப⁴ஜா லோப⁴னிதா³னா லோப⁴ஸமுத³யா லோப⁴பச்சயா அனேகே பாபகா அகுஸலா த⁴ம்மா ஸம்ப⁴வந்தி.

‘‘யத³பி, பி⁴க்க²வே, தோ³ஸோ தத³பி அகுஸலமூலம்; யத³பி து³ட்டோ² அபி⁴ஸங்க²ரோதி காயேன வாசாய மனஸா தத³பி அகுஸலம்; யத³பி து³ட்டோ² தோ³ஸேன அபி⁴பூ⁴தோ பரியாதி³ன்னசித்தோ பரஸ்ஸ அஸதா து³க்க²ம் உப்பாத³யதி வதே⁴ன வா ப³ந்த⁴னேன வா ஜானியா வா க³ரஹாய வா பப்³பா³ஜனாய வா ப³லவம்ஹி ப³லத்தோ² இதிபி தத³பி அகுஸலம். இதிஸ்ஸமே தோ³ஸஜா தோ³ஸனிதா³னா தோ³ஸஸமுத³யா தோ³ஸபச்சயா அனேகே பாபகா அகுஸலா த⁴ம்மா ஸம்ப⁴வந்தி.

‘‘யத³பி, பி⁴க்க²வே, மோஹோ தத³பி அகுஸலமூலம்; யத³பி மூள்ஹோ அபி⁴ஸங்க²ரோதி காயேன வாசாய மனஸா தத³பி அகுஸலம்; யத³பி மூள்ஹோ மோஹேன அபி⁴பூ⁴தோ பரியாதி³ன்னசித்தோ பரஸ்ஸ அஸதா து³க்க²ம் உப்பாத³யதி வதே⁴ன வா ப³ந்த⁴னேன வா ஜானியா வா க³ரஹாய வா பப்³பா³ஜனாய வா ப³லவம்ஹி ப³லத்தோ² இதிபி தத³பி அகுஸலம். இதிஸ்ஸமே மோஹஜா மோஹனிதா³னா மோஹஸமுத³யா மோஹபச்சயா அனேகே பாபகா அகுஸலா த⁴ம்மா ஸம்ப⁴வந்தி. ஏவரூபோ சாயம், பி⁴க்க²வே, புக்³க³லோ வுச்சதி அகாலவாதீ³திபி, அபூ⁴தவாதீ³திபி, அனத்த²வாதீ³திபி, அத⁴ம்மவாதீ³திபி, அவினயவாதீ³திபி.

‘‘கஸ்மா சாயம், பி⁴க்க²வே, ஏவரூபோ புக்³க³லோ வுச்சதி அகாலவாதீ³திபி, அபூ⁴தவாதீ³திபி, அனத்த²வாதீ³திபி, அத⁴ம்மவாதீ³திபி, அவினயவாதீ³திபி? ததா²ஹாயம், பி⁴க்க²வே, புக்³க³லோ பரஸ்ஸ அஸதா து³க்க²ம் உப்பாத³யதி வதே⁴ன வா ப³ந்த⁴னேன வா ஜானியா வா க³ரஹாய வா பப்³பா³ஜனாய வா ப³லவம்ஹி ப³லத்தோ² இதிபி. பூ⁴தேன கோ² பன வுச்சமானோ அவஜானாதி, நோ படிஜானாதி; அபூ⁴தேன வுச்சமானோ ந ஆதப்பம் கரோதி, தஸ்ஸ நிப்³பே³ட²னாய இதிபேதம் அதச்ச²ம் இதிபேதம் அபூ⁴தந்தி. தஸ்மா ஏவரூபோ புக்³க³லோ வுச்சதி அகாலவாதீ³திபி, அபூ⁴தவாதீ³திபி, அனத்த²வாதீ³திபி, அத⁴ம்மவாதீ³திபி, அவினயவாதீ³திபி.

‘‘ஏவரூபோ, பி⁴க்க²வே, புக்³க³லோ லோப⁴ஜேஹி பாபகேஹி அகுஸலேஹி த⁴ம்மேஹி அபி⁴பூ⁴தோ பரியாதி³ன்னசித்தோ தி³ட்டே² சேவ த⁴ம்மே து³க்க²ம் விஹரதி, ஸவிகா⁴தம் ஸஉபாயாஸம் ஸபரிளாஹம். காயஸ்ஸ ச பே⁴தா³ பரம் மரணா து³க்³க³தி பாடிகங்கா².

‘‘தோ³ஸஜேஹி…பே… மோஹஜேஹி பாபகேஹி அகுஸலேஹி த⁴ம்மேஹி அபி⁴பூ⁴தோ பரியாதி³ன்னசித்தோ தி³ட்டே² சேவ த⁴ம்மே து³க்க²ம் விஹரதி, ஸவிகா⁴தம் ஸஉபாயாஸம் ஸபரிளாஹம். காயஸ்ஸ ச பே⁴தா³ பரம் மரணா து³க்³க³தி பாடிகங்கா². ஸேய்யதா²பி, பி⁴க்க²வே, ஸாலோ வா த⁴வோ வா ப²ந்த³னோ வா தீஹி மாலுவாலதாஹி உத்³த⁴ஸ்தோ பரியோனத்³தோ⁴ அனயம் ஆபஜ்ஜதி, ப்³யஸனம் ஆபஜ்ஜதி, அனயப்³யஸனம் ஆபஜ்ஜதி; ஏவமேவம் கோ², பி⁴க்க²வே, ஏவரூபோ புக்³க³லோ லோப⁴ஜேஹி பாபகேஹி அகுஸலேஹி த⁴ம்மேஹி அபி⁴பூ⁴தோ பரியாதி³ன்னசித்தோ தி³ட்டே² சேவ த⁴ம்மே து³க்க²ம் விஹரதி, ஸவிகா⁴தம் ஸஉபாயாஸம் ஸபரிளாஹம். காயஸ்ஸ ச பே⁴தா³ பரம் மரணா து³க்³க³தி பாடிகங்கா².

‘‘தோ³ஸஜேஹி…பே… மோஹஜேஹி பாபகேஹி அகுஸலேஹி த⁴ம்மேஹி அபி⁴பூ⁴தோ பரியாதி³ன்னசித்தோ தி³ட்டே² சேவ த⁴ம்மே து³க்க²ம் விஹரதி ஸவிகா⁴தம் ஸஉபாயாஸம் ஸபரிளாஹம். காயஸ்ஸ ச பே⁴தா³ பரம் மரணா து³க்³க³தி பாடிகங்கா². இமானி கோ², பி⁴க்க²வே, தீணி அகுஸலமூலானீதி.

‘‘தீணிமானி, பி⁴க்க²வே, குஸலமூலானி. கதமானி தீணி? அலோபோ⁴ குஸலமூலம், அதோ³ஸோ குஸலமூலம், அமோஹோ குஸலமூலம்.

‘‘யத³பி, பி⁴க்க²வே, அலோபோ⁴ தத³பி குஸலமூலம் [குஸலம் (ஸீ. ஸ்யா. கம். பீ.)]; யத³பி அலுத்³தோ⁴ அபி⁴ஸங்க²ரோதி காயேன வாசாய மனஸா தத³பி குஸலம் [குஸலமூலம் (க.)]; யத³பி அலுத்³தோ⁴ லோபே⁴ன அனபி⁴பூ⁴தோ அபரியாதி³ன்னசித்தோ ந பரஸ்ஸ அஸதா து³க்க²ம் உப்பாத³யதி வதே⁴ன வா ப³ந்த⁴னேன வா ஜானியா வா க³ரஹாய வா பப்³பா³ஜனாய வா ப³லவம்ஹி ப³லத்தோ² இதிபி தத³பி குஸலம். இதிஸ்ஸமே அலோப⁴ஜா அலோப⁴னிதா³னா அலோப⁴ஸமுத³யா அலோப⁴பச்சயா அனேகே குஸலா த⁴ம்மா ஸம்ப⁴வந்தி.

‘‘யத³பி, பி⁴க்க²வே, அதோ³ஸோ தத³பி குஸலமூலம்; யத³பி அது³ட்டோ² அபி⁴ஸங்க²ரோதி காயேன வாசாய மனஸா தத³பி குஸலம்; யத³பி அது³ட்டோ² தோ³ஸேன அனபி⁴பூ⁴தோ அபரியாதி³ன்னசித்தோ ந பரஸ்ஸ அஸதா து³க்க²ம் உப்பாத³யதி வதே⁴ன வா ப³ந்த⁴னேன வா ஜானியா வா க³ரஹாய வா பப்³பா³ஜனாய வா ப³லவம்ஹி ப³லத்தோ² இதிபி தத³பி குஸலம். இதிஸ்ஸமே அதோ³ஸஜா அதோ³ஸனிதா³னா அதோ³ஸஸமுத³யா அதோ³ஸபச்சயா அனேகே குஸலா த⁴ம்மா ஸம்ப⁴வந்தி.

‘‘யத³பி, பி⁴க்க²வே, அமோஹோ தத³பி குஸலமூலம்; யத³பி அமூள்ஹோ அபி⁴ஸங்க²ரோதி காயேன வாசாய மனஸா தத³பி குஸலம்; யத³பி அமூள்ஹோ மோஹேன அனபி⁴பூ⁴தோ அபரியாதி³ன்னசித்தோ ந பரஸ்ஸ அஸதா து³க்க²ம் உப்பாத³யதி வதே⁴ன வா ப³ந்த⁴னேன வா ஜானியா வா க³ரஹாய வா பப்³பா³ஜனாய வா ப³லவம்ஹி ப³லத்தோ² இதிபி தத³பி குஸலம். இதிஸ்ஸமே அமோஹஜா அமோஹனிதா³னா அமோஹஸமுத³யா அமோஹபச்சயா அனேகே குஸலா த⁴ம்மா ஸம்ப⁴வந்தி. ஏவரூபோ சாயம், பி⁴க்க²வே, புக்³க³லோ வுச்சதி காலவாதீ³திபி, பூ⁴தவாதீ³திபி, அத்த²வாதீ³திபி, த⁴ம்மவாதீ³திபி, வினயவாதீ³திபி.

‘‘கஸ்மா சாயம், பி⁴க்க²வே, ஏவரூபோ புக்³க³லோ வுச்சதி காலவாதீ³திபி, பூ⁴தவாதீ³திபி, அத்த²வாதீ³திபி, த⁴ம்மவாதீ³திபி, வினயவாதீ³திபி? ததா²ஹாயம், பி⁴க்க²வே, புக்³க³லோ ந பரஸ்ஸ அஸதா து³க்க²ம் உப்பாத³யதி வதே⁴ன வா ப³ந்த⁴னேன வா ஜானியா வா க³ரஹாய வா பப்³பா³ஜனாய வா ப³லவம்ஹி ப³லத்தோ² இதிபி. பூ⁴தேன கோ² பன வுச்சமானோ படிஜானாதி நோ அவஜானாதி; அபூ⁴தேன வுச்சமானோ ஆதப்பம் கரோதி தஸ்ஸ நிப்³பே³ட²னாய – ‘இதிபேதம் அதச்ச²ம், இதிபேதம் அபூ⁴த’ந்தி. தஸ்மா ஏவரூபோ புக்³க³லோ வுச்சதி காலவாதீ³திபி, அத்த²வாதீ³திபி, த⁴ம்மவாதீ³திபி, வினயவாதீ³திபி.

‘‘ஏவரூபஸ்ஸ, பி⁴க்க²வே, புக்³க³லஸ்ஸ லோப⁴ஜா பாபகா அகுஸலா த⁴ம்மா பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. தி³ட்டே²வ த⁴ம்மே ஸுக²ம் விஹரதி அவிகா⁴தம் அனுபாயாஸம் அபரிளாஹம். தி³ட்டே²வ த⁴ம்மே பரினிப்³பா³யதி.

‘‘தோ³ஸஜா…பே… பரினிப்³பா³யதி. மோஹஜா…பே… பரினிப்³பா³யதி. ஸேய்யதா²பி பி⁴க்க²வே, ஸாலோ வா த⁴வோ வா ப²ந்த³னோ வா தீஹி மாலுவாலதாஹி உத்³த⁴ஸ்தோ பரியோனத்³தோ⁴. அத² புரிஸோ ஆக³ச்சே²ய்ய குத்³தா³ல-பிடகம் [குத்³தா³லபிடகம் (ஸீ. ஸ்யா. கம். பீ.)] ஆதா³ய. ஸோ தம் மாலுவாலதம் மூலே சி²ந்தே³ய்ய, மூலே சே²த்வா பலிக²ணேய்ய, பலிக²ணித்வா மூலானி உத்³த⁴ரேய்ய, அந்தமஸோ உஸீரனாளிமத்தானிபி [உஸீரனாளமத்தானிபி (ஸீ. ஸ்யா. கம். பீ.)]. ஸோ தம் மாலுவாலதம் க²ண்டா³க²ண்டி³கம் சி²ந்தே³ய்ய, க²ண்டா³க²ண்டி³கம் சே²த்வா பா²லேய்ய, பா²லேத்வா ஸகலிகம் ஸகலிகம் கரேய்ய, ஸகலிகம் ஸகலிகம் கரித்வா வாதாதபே விஸோஸேய்ய, வாதாதபே விஸோஸேத்வா அக்³கி³னா ட³ஹேய்ய, அக்³கி³னா ட³ஹித்வா மஸிம் கரேய்ய, மஸிம் கரித்வா மஹாவாதே வா ஓபு²ணேய்ய நதி³யா வா ஸீக⁴ஸோதாய பவாஹேய்ய. ஏவமஸ்ஸ [ஏவமஸ்ஸு (ஸீ.), ஏவஸ்ஸு (க.)] தா, பி⁴க்க²வே, மாலுவாலதா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. ஏவமேவம் கோ², பி⁴க்க²வே, ஏவரூபஸ்ஸ புக்³க³லஸ்ஸ லோப⁴ஜா பாபகா அகுஸலா த⁴ம்மா பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. தி³ட்டே²வ த⁴ம்மே ஸுக²ம் விஹரதி அவிகா⁴தம் அனுபாயாஸம் அபரிளாஹம். தி³ட்டே²வ த⁴ம்மே பரினிப்³பா³யதி.

‘‘தோ³ஸஜா …பே… மோஹஜா பாபகா அகுஸலா த⁴ம்மா பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. தி³ட்டே²வ த⁴ம்மே ஸுக²ம் விஹரதி அவிகா⁴தம் அனுபாயாஸம் அபரிளாஹம். தி³ட்டே²வ த⁴ம்மே பரினிப்³பா³யதி. இமானி கோ², பி⁴க்க²வே, தீணி குஸலமூலானீ’’தி. நவமம்.