8. தே²ரஸுத்தம்

98. ‘‘த³ஸஹி, பி⁴க்க²வே, த⁴ம்மேஹி ஸமன்னாக³தோ தே²ரோ பி⁴க்கு² யஸ்ஸம் யஸ்ஸம் தி³ஸாயம் விஹரதி, பா²ஸுயேவ விஹரதி. கதமேஹி த³ஸஹி? தே²ரோ ஹோதி ரத்தஞ்ஞூ சிரபப்³ப³ஜிதோ, ஸீலவா ஹோதி …பே… ஸமாதா³ய ஸிக்க²தி ஸிக்கா²பதே³ஸு, ப³ஹுஸ்ஸுதோ ஹோதி…பே… தி³ட்டி²யா ஸுப்படிவித்³தோ⁴, உப⁴யானி கோ² பனஸ்ஸ பாதிமோக்கா²னி வித்தா²ரேன ஸ்வாக³தானி ஹோந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ, அதி⁴கரணஸமுப்பாத³வூபஸமகுஸலோ ஹோதி, த⁴ம்மகாமோ ஹோதி பியஸமுதா³ஹாரோ அபி⁴த⁴ம்மே அபி⁴வினயே உளாரபாமோஜ்ஜோ, ஸந்துட்டோ² ஹோதி இதரீதரசீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன, பாஸாதி³கோ ஹோதி அபி⁴க்கந்தபடிக்கந்தே [அபி⁴க்கந்தபடிக்கந்தோ (க.)] ஸுஸம்வுதோ அந்தரக⁴ரே நிஸஜ்ஜாய, சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴, ஆஸவானஞ்ச க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இமேஹி கோ², பி⁴க்க²வே, த³ஸஹி த⁴ம்மேஹி ஸமன்னாக³தோ தே²ரோ பி⁴க்கு² யஸ்ஸம் யஸ்ஸம் தி³ஸாயம் விஹரதி, பா²ஸுயேவ விஹரதீ’’தி. அட்ட²மம்.