9. உபாலிஸுத்தம்

99. அத² கோ² ஆயஸ்மா உபாலி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா உபாலி ப⁴க³வந்தம் ஏதத³வோச – ‘‘இச்சா²மஹம், ப⁴ந்தே, அரஞ்ஞவனபத்தா²னி பந்தானி ஸேனாஸனானி படிஸேவிது’’ந்தி.

‘‘து³ரபி⁴ஸம்ப⁴வானி ஹி கோ² [து³ரபி⁴ஸம்ப⁴வானி கோ² (ஸீ. பீ.)], உபாலி, அரஞ்ஞவனபத்தா²னி பந்தானி ஸேனாஸனானி. து³க்கரம் பவிவேகம் து³ரபி⁴ரமம். ஏகத்தே ஹரந்தி மஞ்ஞே மனோ வனானி ஸமாதி⁴ம் அலப⁴மானஸ்ஸ பி⁴க்கு²னோ. யோ கோ², உபாலி, ஏவம் வதே³ய்ய – ‘அஹம் ஸமாதி⁴ம் அலப⁴மானோ அரஞ்ஞவனபத்தா²னி பந்தானி ஸேனாஸனானி படிஸேவிஸ்ஸாமீ’தி, தஸ்ஸேதம் பாடிகங்க²ம் – ‘ஸம்ஸீதி³ஸ்ஸதி வா உப்லவிஸ்ஸதி வா’தி [உப்பிலவிஸ்ஸதி வா (ஸீ. ஸ்யா. பீ.)].

‘‘ஸேய்யதா²பி, உபாலி, மஹாஉத³கரஹதோ³. அத² ஆக³ச்சே²ய்ய ஹத்தி²னாகோ³ ஸத்தரதனோ வா அட்³ட⁴ட்ட²ரதனோ [அட்ட²ரதனோ (ஸீ. பீ.)] வா. தஸ்ஸ ஏவமஸ்ஸ – ‘யம்னூனாஹம் இமம் உத³கரஹத³ம் ஓகா³ஹேத்வா கண்ணஸம்தோ⁴விகம்பி கி²ட்³ட³ம் கீளேய்யம் பிட்டி²ஸம்தோ⁴விகம்பி கி²ட்³ட³ம் கீளேய்யம். கண்ணஸம்தோ⁴விகம்பி கி²ட்³ட³ம் கீளித்வா பிட்டி²ஸம்தோ⁴விகம்பி கி²ட்³ட³ம் கீளித்வா ந்ஹத்வா [நஹாத்வா (ஸீ. பீ.), ந்ஹாத்வா (ஸ்யா.)] ச பிவித்வா ச பச்சுத்தரித்வா யேன காமம் பக்கமேய்ய’ந்தி. ஸோ தம் உத³கரஹத³ம் ஓகா³ஹேத்வா கண்ணஸம்தோ⁴விகம்பி கி²ட்³ட³ம் கீளேய்ய பிட்டி²ஸம்தோ⁴விகம்பி கி²ட்³ட³ம் கீளேய்ய; கண்ணஸம்தோ⁴விகம்பி கி²ட்³ட³ம் கீளித்வா பிட்டி²ஸம்தோ⁴விகம்பி கி²ட்³ட³ம் கீளித்வா ந்ஹத்வா ச பிவித்வா ச பச்சுத்தரித்வா யேன காமம் பக்கமேய்ய. தம் கிஸ்ஸ ஹேது? மஹா, உபாலி [மஹா ஹுபாலி (ஸீ. பீ.)], அத்தபா⁴வோ க³ம்பீ⁴ரே கா³த⁴ம் விந்த³தி.

‘‘அத² ஆக³ச்சே²ய்ய ஸஸோ வா பி³ளாரோ வா. தஸ்ஸ ஏவமஸ்ஸ – ‘கோ சாஹம், கோ ச ஹத்தி²னாகோ³! யம்னூனாஹம் இமம் உத³கரஹத³ம் ஓகா³ஹேத்வா கண்ணஸம்தோ⁴விகம்பி கி²ட்³ட³ம் கீளேய்யம் பிட்டி²ஸம்தோ⁴விகம்பி கி²ட்³ட³ம் கீளேய்யம்; கண்ணஸம்தோ⁴விகம்பி கி²ட்³ட³ம் கீளித்வா பிட்டி²ஸம்தோ⁴விகம்பி கி²ட்³ட³ம் கீளித்வா ந்ஹத்வா ச பிவித்வா ச பச்சுத்தரித்வா யேன காமம் பக்கமேய்ய’ந்தி. ஸோ தம் உத³கரஹத³ம் ஸஹஸா அப்படிஸங்கா² பக்க²ந்தே³ய்ய. தஸ்ஸேதம் பாடிகங்க²ம் – ‘ஸம்ஸீதி³ஸ்ஸதி வா உப்லவிஸ்ஸதி வா’தி. தம் கிஸ்ஸ ஹேது? பரித்தோ, உபாலி, அத்தபா⁴வோ க³ம்பீ⁴ரே கா³த⁴ம் ந விந்த³தி. ஏவமேவம் கோ², உபாலி, யோ ஏவம் வதே³ய்ய – ‘அஹம் ஸமாதி⁴ம் அலப⁴மானோ அரஞ்ஞவனபத்தா²னி பந்தானி ஸேனாஸனானி படிஸேவிஸ்ஸாமீ’தி, தஸ்ஸேதம் பாடிகங்க²ம் – ‘ஸம்ஸீதி³ஸ்ஸதி வா உப்லவிஸ்ஸதி வா’தி.

‘‘ஸேய்யதா²பி, உபாலி, த³ஹரோ குமாரோ மந்தோ³ உத்தானஸேய்யகோ ஸகேன முத்தகரீஸேன கீளதி. தம் கிம் மஞ்ஞஸி, உபாலி, நன்வாயம் கேவலா பரிபூரா பா³லகி²ட்³டா³’’தி? ‘‘ஏவம், ப⁴ந்தே’’.

‘‘ஸ கோ² ஸோ, உபாலி, குமாரோ அபரேன ஸமயேன வுத்³தி⁴மன்வாய இந்த்³ரியானம் பரிபாகமன்வாய யானி கானிசி குமாரகானம் கீளாபனகானி ப⁴வந்தி, ஸேய்யதி²த³ம் – வங்ககம் [வங்கம் (ஸீ. பீ.)] க⁴டிகம் மோக்க²சிகம் சிங்கு³லகம் [பிங்கு³லிகம் (ஸ்யா.), சிங்குலகம் (க.)] பத்தாள்ஹகம் ரத²கம் த⁴னுகம், தேஹி கீளதி. தம் கிம் மஞ்ஞஸி, உபாலி, நன்வாயம் கி²ட்³டா³ புரிமாய கி²ட்³டா³ய அபி⁴க்கந்ததரா ச பணீததரா சா’’தி? ‘‘ஏவம், ப⁴ந்தே’’.

‘‘ஸ கோ² ஸோ, உபாலி, குமாரோ அபரேன ஸமயேன வுத்³தி⁴மன்வாய இந்த்³ரியானம் பரிபாகமன்வாய பஞ்சஹி காமகு³ணேஹி ஸமப்பிதோ ஸமங்கி³பூ⁴தோ பரிசாரேதி சக்கு²விஞ்ஞேய்யேஹி ரூபேஹி இட்டே²ஹி கந்தேஹி மனாபேஹி பியரூபேஹி காமூபஸம்ஹிதேஹி ரஜனீயேஹி, ஸோதவிஞ்ஞேய்யேஹி ஸத்³தே³ஹி… கா⁴னவிஞ்ஞேய்யேஹி க³ந்தே⁴ஹி… ஜிவ்ஹாவிஞ்ஞேய்யேஹி ரஸேஹி… காயவிஞ்ஞேய்யேஹி போ²ட்ட²ப்³பே³ஹி இட்டே²ஹி கந்தேஹி மனாபேஹி பியரூபேஹி காமூபஸம்ஹிதேஹி ரஜனீயேஹி. தம் கிம் மஞ்ஞஸி, உபாலி, நன்வாயம் கி²ட்³டா³ புரிமாஹி கி²ட்³டா³ஹி அபி⁴க்கந்ததரா ச பணீததரா சா’’தி? ‘‘ஏவம், ப⁴ந்தே’’.

[தீ³. நி. 1.190; ம. நி. 2.233] ‘‘இத⁴ கோ² பன வோ [வோதி நிபாதமத்தம் (அட்ட².)], உபாலி, ததா²க³தோ லோகே உப்பஜ்ஜதி அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா. ஸோ இமம் லோகம் ஸதே³வகம் ஸமாரகம் ஸப்³ரஹ்மகம் ஸஸ்ஸமணப்³ராஹ்மணிம் பஜம் ஸதே³வமனுஸ்ஸம் ஸயம் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மம் தே³ஸேதி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம், கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேதி.

‘‘தம் த⁴ம்மம் ஸுணாதி க³ஹபதி வா க³ஹபதிபுத்தோ வா அஞ்ஞதரஸ்மிம் வா குலே பச்சாஜாதோ. ஸோ தம் த⁴ம்மம் ஸுத்வா ததா²க³தே ஸத்³த⁴ம் படிலப⁴தி. ஸோ தேன ஸத்³தா⁴படிலாபே⁴ன ஸமன்னாக³தோ இதி படிஸஞ்சிக்க²தி – ‘ஸம்பா³தோ⁴ க⁴ராவாஸோ ரஜாபதோ², அப்³போ⁴காஸோ பப்³ப³ஜ்ஜா. நயித³ம் ஸுகரம் அகா³ரம் அஜ்ஜா²வஸதா ஏகந்தபரிபுண்ணம் ஏகந்தபரிஸுத்³த⁴ம் ஸங்க²லிகி²தம் ப்³ரஹ்மசரியம் சரிதும். யம்னூனாஹம் கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜேய்ய’ந்தி.

‘‘ஸோ அபரேன ஸமயேன அப்பம் வா போ⁴க³க்க²ந்த⁴ம் பஹாய மஹந்தம் வா போ⁴க³க்க²ந்த⁴ம் பஹாய அப்பம் வா ஞாதிபரிவட்டம் பஹாய மஹந்தம் வா ஞாதிபரிவட்டம் பஹாய கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜதி.

‘‘ஸோ ஏவம் பப்³ப³ஜிதோ ஸமானோ பி⁴க்கூ²னம் ஸிக்கா²ஸாஜீவஸமாபன்னோ பாணாதிபாதம் பஹாய பாணாதிபாதா படிவிரதோ ஹோதி நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ ஸப்³ப³பாணபூ⁴தஹிதானுகம்பீ விஹரதி.

‘‘அதி³ன்னாதா³னம் பஹாய அதி³ன்னாதா³னா படிவிரதோ ஹோதி தி³ன்னாதா³யீ தி³ன்னபாடிகங்கீ²; அதே²னேன ஸுசிபூ⁴தேன அத்தனா விஹரதி.

‘‘அப்³ரஹ்மசரியம் பஹாய ப்³ரஹ்மசாரீ ஹோதி ஆராசாரீ விரதோ மேது²னா கா³மத⁴ம்மா.

‘‘முஸாவாத³ம் பஹாய முஸாவாதா³ படிவிரதோ ஹோதி ஸச்சவாதீ³ ஸச்சஸந்தோ⁴ தே²தோ பச்சயிகோ அவிஸம்வாத³கோ லோகஸ்ஸ.

‘‘பிஸுணம் வாசம் பஹாய பிஸுணாய வாசாய படிவிரதோ ஹோதி, இதோ ஸுத்வா ந அமுத்ர அக்கா²தா இமேஸம் பே⁴தா³ய, அமுத்ர வா ஸுத்வா ந இமேஸம் அக்கா²தா அமூஸம் பே⁴தா³ய. இதி பி⁴ன்னானம் வா ஸந்தா⁴தா ஸஹிதானம் வா அனுப்பதா³தா, ஸமக்³கா³ராமோ ஸமக்³க³ரதோ ஸமக்³க³னந்தீ³; ஸமக்³க³கரணிம் வாசம் பா⁴ஸிதா ஹோதி.

‘‘ப²ருஸம் வாசம் பஹாய ப²ருஸாய வாசாய படிவிரதோ ஹோதி. யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா, ததா²ரூபிம் வாசம் பா⁴ஸிதா ஹோதி.

‘‘ஸம்ப²ப்பலாபம் பஹாய ஸம்ப²ப்பலாபா படிவிரதோ ஹோதி காலவாதீ³ பூ⁴தவாதீ³ அத்த²வாதீ³ த⁴ம்மவாதீ³ வினயவாதீ³, நிதா⁴னவதிம் வாசம் பா⁴ஸிதா ஹோதி காலேன ஸாபதே³ஸம் பரியந்தவதிம் அத்த²ஸம்ஹிதம்.

‘‘ஸோ பீ³ஜகா³மபூ⁴தகா³மஸமாரம்பா⁴ படிவிரதோ ஹோதி. ஏகப⁴த்திகோ ஹோதி ரத்தூபரதோ, விரதோ விகாலபோ⁴ஜனா. நச்சகீ³தவாதி³தவிஸூகத³ஸ்ஸனா படிவிரதோ ஹோதி, மாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா படிவிரதோ ஹோதி, உச்சாஸயனமஹாஸயனா படிவிரதோ ஹோதி, ஜாதரூபரஜதபடிக்³க³ஹணா படிவிரதோ ஹோதி, ஆமகத⁴ஞ்ஞபடிக்³க³ஹணா படிவிரதோ ஹோதி, ஆமகமம்ஸபடிக்³க³ஹணா படிவிரதோ ஹோதி, இத்தி²குமாரிகபடிக்³க³ஹணா படிவிரதோ ஹோதி, தா³ஸிதா³ஸபடிக்³க³ஹணா படிவிரதோ ஹோதி, அஜேளகபடிக்³க³ஹணா படிவிரதோ ஹோதி, குக்குடஸூகரபடிக்³க³ஹணா படிவிரதோ ஹோதி, ஹத்தி²க³வஸ்ஸவளவபடிக்³க³ஹணா படிவிரதோ ஹோதி, கே²த்தவத்து²படிக்³க³ஹணா படிவிரதோ ஹோதி, தூ³தேய்யபஹிணக³மனானுயோகா³ படிவிரதோ ஹோதி, கயவிக்கயா படிவிரதோ ஹோதி, துலாகூடகம்ஸகூடமானகூடா படிவிரதோ ஹோதி, உக்கோடனவஞ்சனனிகதிஸாசியோகா³ படிவிரதோ ஹோதி, சே²த³னவத⁴ப³ந்த⁴னவிபராமோஸஆலோபஸஹஸாகாரா படிவிரதோ ஹோதி.

‘‘ஸோ ஸந்துட்டோ² ஹோதி காயபரிஹாரிகேன சீவரேன குச்சி²பரிஹாரிகேன பிண்ட³பாதேன. யேன யேனேவ பக்கமதி ஸமாதா³யேவ பக்கமதி, ஸேய்யதா²பி நாம பக்கீ² ஸகுணோ யேன யேனேவ டே³தி ஸபத்தபா⁴ரோவ டே³தி. ஏவமேவம் பி⁴க்கு² ஸந்துட்டோ² ஹோதி காயபரிஹாரிகேன சீவரேன குச்சி²பரிஹாரிகேன பிண்ட³பாதேன. யேன யேனேவ பக்கமதி ஸமாதா³யேவ பக்கமதி. ஸோ இமினா அரியேன ஸீலக்க²ந்தே⁴ன ஸமன்னாக³தோ அஜ்ஜ²த்தம் அனவஜ்ஜஸுக²ம் படிஸம்வேதே³தி.

‘‘ஸோ சக்கு²னா ரூபம் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் சக்கு²ந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி சக்கு²ந்த்³ரியம், சக்கு²ந்த்³ரியே ஸம்வரம் ஆபஜ்ஜதி. ஸோதேன ஸத்³த³ம் ஸுத்வா… கா⁴னேன க³ந்த⁴ம் கா⁴யித்வா… ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி மனிந்த்³ரியம், மனிந்த்³ரியே ஸம்வரம் ஆபஜ்ஜதி. ஸோ இமினா அரியேன இந்த்³ரியஸம்வரேன ஸமன்னாக³தோ அஜ்ஜ²த்தம் அப்³யாஸேகஸுக²ம் படிஸம்வேதே³தி.

‘‘ஸோ அபி⁴க்கந்தே படிக்கந்தே ஸம்பஜானகாரீ ஹோதி, ஆலோகிதே விலோகிதே ஸம்பஜானகாரீ ஹோதி, ஸமிஞ்ஜிதே பஸாரிதே ஸம்பஜானகாரீ ஹோதி, ஸங்கா⁴டிபத்தசீவரதா⁴ரணே ஸம்பஜானகாரீ ஹோதி, அஸிதே பீதே கா²யிதே ஸாயிதே ஸம்பஜானகாரீ ஹோதி, உச்சாரபஸ்ஸாவகம்மே ஸம்பஜானகாரீ ஹோதி, க³தே டி²தே நிஸின்னே ஸுத்தே ஜாக³ரிதே பா⁴ஸிதே துண்ஹீபா⁴வே ஸம்பஜானகாரீ ஹோதி.

‘‘ஸோ இமினா ச அரியேன ஸீலக்க²ந்தே⁴ன ஸமன்னாக³தோ, இமினா ச அரியேன இந்த்³ரியஸம்வரேன ஸமன்னாக³தோ, இமினா ச அரியேன ஸதிஸம்பஜஞ்ஞே ஸமன்னாக³தோ விவித்தம் ஸேனாஸனம் ப⁴ஜதி அரஞ்ஞம் ருக்க²மூலம் பப்³ப³தம் கந்த³ரம் கி³ரிகு³ஹம் ஸுஸானம் வனபத்த²ம் அப்³போ⁴காஸம் பலாலபுஞ்ஜம். ஸோ அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா.

‘‘ஸோ அபி⁴ஜ்ஜ²ம் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தம் பரிஸோதே⁴தி. ப்³யாபாத³பதோ³ஸம் பஹாய அப்³யாபன்னசித்தோ விஹரதி ஸப்³ப³பாணபூ⁴தஹிதானுகம்பீ, ப்³யாபாத³பதோ³ஸா சித்தம் பரிஸோதே⁴தி. தி²னமித்³த⁴ம் பஹாய விக³ததி²னமித்³தோ⁴ விஹரதி ஆலோகஸஞ்ஞீ ஸதோ ஸம்பஜானோ, தி²னமித்³தா⁴ சித்தம் பரிஸோதே⁴தி. உத்³த⁴ச்சகுக்குச்சம் பஹாய அனுத்³த⁴தோ விஹரதி அஜ்ஜ²த்தம் வூபஸந்தசித்தோ, உத்³த⁴ச்சகுக்குச்சா சித்தம் பரிஸோதே⁴தி. விசிகிச்ச²ம் பஹாய திண்ணவிசிகிச்சோ² விஹரதி அகத²ம்கதீ² குஸலேஸு த⁴ம்மேஸு, விசிகிச்சா²ய சித்தம் பரிஸோதே⁴தி.

‘‘ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே, விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. தம் கிம் மஞ்ஞஸி, உபாலி, ‘நன்வாயம் விஹாரோ புரிமேஹி விஹாரேஹி அபி⁴க்கந்ததரோ ச பணீததரோ சா’’’தி? ‘‘ஏவம், ப⁴ந்தே’’.

‘‘இமம்பி கோ², உபாலி, மம ஸாவகா அத்தனி த⁴ம்மம் ஸம்பஸ்ஸமானா அரஞ்ஞவனபத்தா²னி பந்தானி ஸேனாஸனானி படிஸேவந்தி, நோ ச கோ² தாவ அனுப்பத்தஸத³த்தா² விஹரந்தி.

‘‘புன சபரம், உபாலி, பி⁴க்கு² விதக்கவிசாரானம் வூபஸமா…பே… து³தியம் ஜா²னம் உபஸம்பஜ்ஜ விஹரதி. தம் கிம் மஞ்ஞஸி, உபாலி, ‘நன்வாயம் விஹாரோ புரிமேஹி விஹாரேஹி அபி⁴க்கந்ததரோ ச பணீததரோ சா’’’தி? ‘‘ஏவம், ப⁴ந்தே’’.

‘‘இமம்பி கோ², உபாலி, மம ஸாவகா அத்தனி த⁴ம்மம் ஸம்பஸ்ஸமானா அரஞ்ஞவனபத்தா²னி பந்தானி ஸேனாஸனானி படிஸேவந்தி, நோ ச கோ² தாவ அனுப்பத்தஸத³த்தா² விஹரந்தி.

‘‘புன சபரம், உபாலி, பி⁴க்கு² பீதியா ச விராகா³…பே… ததியம் ஜா²னம் உபஸம்பஜ்ஜ விஹரதி. தம் கிம் மஞ்ஞஸி, உபாலி, ‘நன்வாயம் விஹாரோ புரிமேஹி விஹாரேஹி அபி⁴க்கந்ததரோ ச பணீததரோ சா’’’தி? ‘‘ஏவம், ப⁴ந்தே’’.

‘‘இமம்பி கோ², உபாலி, மம ஸாவகா அத்தனி த⁴ம்மம் ஸம்பஸ்ஸமானா அரஞ்ஞவனபத்தா²னி பந்தானி ஸேனாஸனானி படிஸேவந்தி, நோ ச கோ² தாவ அனுப்பத்தஸத³த்தா² விஹரந்தி.

‘‘புன சபரம், உபாலி, பி⁴க்கு² ஸுக²ஸ்ஸ ச பஹானா…பே… சதுத்த²ம் ஜா²னம்…பே….

புன சபரம், உபாலி, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. தம் கிம் மஞ்ஞஸி, உபாலி, ‘நன்வாயம் விஹாரோ புரிமேஹி விஹாரேஹி அபி⁴க்கந்ததரோ ச பணீததரோ சா’’’தி? ‘‘ஏவம், ப⁴ந்தே’’.

‘‘இமம்பி கோ², உபாலி, மம ஸாவகா அத்தனி த⁴ம்மம் ஸம்பஸ்ஸமானா அரஞ்ஞவனபத்தா²னி பந்தானி ஸேனாஸனானி படிஸேவந்தி, நோ ச கோ² தாவ அனுப்பத்தஸத³த்தா² விஹரந்தி.

‘‘புன சபரம், உபாலி, பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி…பே….

‘‘ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி…பே….

‘‘ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம ‘ஸந்தமேதம் பணீதமேத’ந்தி நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி. தம் கிம் மஞ்ஞஸி, உபாலி, ‘நன்வாயம் விஹாரோ புரிமேஹி விஹாரேஹி அபி⁴க்கந்ததரோ ச பணீததரோ சா’’’தி? ‘‘ஏவம், ப⁴ந்தே’’.

‘‘இமம்பி கோ², உபாலி, மம ஸாவகா அத்தனி த⁴ம்மம் ஸம்பஸ்ஸமானா அரஞ்ஞவனபத்தா²னி பந்தானி ஸேனாஸனானி படிஸேவந்தி, நோ ச கோ² தாவ அனுப்பத்தஸத³த்தா² விஹரந்தி.

‘‘புன சபரம், உபாலி, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி; பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. தம் கிம் மஞ்ஞஸி, உபாலி, ‘நன்வாயம் விஹாரோ புரிமேஹி விஹாரேஹி அபி⁴க்கந்ததரோ ச பணீததரோ சா’’’தி? ‘‘ஏவம், ப⁴ந்தே’’.

‘‘இமம்பி கோ², உபாலி, மம ஸாவகா அத்தனி த⁴ம்மம் ஸம்பஸ்ஸமானா அரஞ்ஞவனபத்தா²னி பந்தானி ஸேனாஸனானி படிஸேவந்தி, அனுப்பத்தஸத³த்தா² ச விஹரந்தி. இங்க⁴ த்வம், உபாலி, ஸங்கே⁴ விஹராஹி. ஸங்கே⁴ தே விஹரதோ பா²ஸு ப⁴விஸ்ஸதீ’’தி. நவமம்.