335. ජම්බුකජාතකං (4-4-5)
137. බ්‍රහා පවඩ්ඪකායො සො, දීඝදාඨො ච ජම්බුක;
න ත්වං තත්ථ කුලෙ ජාතො, යත්ථ ගණ්හන්ති කුඤ්ජරං.
138. අසීහො සීහමානෙන, යො අත්තානං විකුබ්බති;
කොත්ථූව [කුට්ඨූව (සී.), කුත්ථුව (ස්‍යා. පී)] ගජමාසජ්ජ, සෙති භූම්‍යා අනුත්ථුනං.
139. යසස්සිනො උත්තමපුග්ගලස්ස, සඤ්ජාතඛන්ධස්ස මහබ්බලස්ස;
අසමෙක්ඛිය ථාමබලූපපත්තිං, ස සෙති නාගෙන හතොයං ජම්බුකො.
140. යො චීධ කම්මං කුරුතෙ පමාය, ථාමබ්බලං අත්තනි සංවිදිත්වා;
ජප්පෙන මන්තෙන සුභාසිතෙන, පරික්ඛවා සො විපුලං ජිනාතීති.
ජම්බුකජාතකං පඤ්චමං.