නමො තස්ස භගවතො අරහතො සම්මාසම්බුද්ධස්ස

ඛුද්දකනිකායෙ

ජාතකපාළි

(පඨමො භාගො)

1. එකකනිපාතො

1. අපණ්ණකවග්ගො

1. අපණ්ණකජාතකං

1. අපණ්ණකං ඨානමෙකෙ, දුතියං ආහු තක්කිකා;

එතදඤ්ඤාය මෙධාවී, තං ගණ්හෙ යදපණ්ණකන්ති [තං ගණ්හෙය්‍ය අපණ්ණකං (ක.)].

අපණ්ණකජාතකං පඨමං.

2. වණ්ණුපථජාතකං

2. අකිලාසුනො වණ්ණුපථෙ [වණ්ණපථෙ (ක.)] ඛණන්තා, උදඞ්ගණෙ තත්ථ පපං අවින්දුං;

එවං මුනී වීරිය [මුනි විරිය (පී.), මුනි වීරිය (ස්‍යා. ක.)] බලූපපන්නො, අකිලාසු වින්දෙ හදයස්ස සන්තින්ති.

වණ්ණුපථජාතකං දුතියං.

3. සෙරිවවාණිජජාතකං

3. ඉධ චෙ නං [ඉධ චෙ හි නං (සී. පී.)] විරාධෙසි, සද්ධම්මස්ස නියාමතං [නියාමකං (ස්‍යා. ක.)];

චිරං ත්වං අනුතප්පෙසි [අනුතපෙස්සසි (සී. පී.), අනුතප්පිස්සසි (?)], සෙරිවායංව වාණිජොති.

සෙරිවවාණිජජාතකං තතියං.

4. චූළසෙට්ඨිජාතකං

4. අප්පකෙනපි මෙධාවී, පාභතෙන විචක්ඛණො;

සමුට්ඨාපෙති අත්තානං, අණුං අග්ගිංව සන්ධමන්ති.

චූළ [චුල්ල (සී.), චුල්ලක (ස්‍යා. පී.)] සෙට්ඨිජාතකං චතුත්ථං.

5. තණ්ඩුලනාළිජාතකං

5. [කිමග්ඝතී තණ්ඩුලනාළිකා ච, බාරාණසී අන්තරබාහිරානි; අස්සපඤ්චසතෙ තානි, එකා තණ්ඩුලනාළිකාති; (ස්‍යා.)] කිමග්ඝති තණ්ඩුලනාළිකාය, අස්සාන මූලාය වදෙහි රාජ [නාළිකා ච (සී.), නාළිකාය (ක. සී. අට්ඨ.)];

බාරාණසිං සන්තරබාහිරතො [බාහිරන්තං (සී.)], අයමග්ඝති තණ්ඩුලනාළිකාති [කිමග්ඝතී වණ්ඩුලනාළිකා ච, බාරාණසී අන්තරබාහිරානි; අස්සපඤ්චසතෙ තානි, එකා තණ්ඩුලනාළිකාති; (ස්‍යා.)].

තණ්ඩුලනාළිජාතකං පඤ්චමං.

6. දෙවධම්මජාතකං

6. හිරිඔත්තප්පසම්පන්නා, සුක්කධම්මසමාහිතා;

සන්තො සප්පුරිසා ලොකෙ, දෙවධම්මාති වුච්චරෙති.

දෙවධම්මජාතකං ඡට්ඨං.

7. කට්ඨහාරිජාතකං

7. පුත්තො ත්‍යාහං මහාරාජ, ත්වං මං පොස ජනාධිප;

අඤ්ඤෙපි දෙවො පොසෙති, කිඤ්ච [කිඤ්චි (ක.)] දෙවො සකං පජන්ති.

කට්ඨහාරි [කට්ඨවාහන (ක.)] ජාතකං සත්තමං.

8. ගාමණිජාතකං

8. අපි අතරමානානං, ඵලාසාව සමිජ්ඣති;

විපක්කබ්‍රහ්මචරියොස්මි, එවං ජානාහි ගාමණීති.

ගාමණිජාතකං අට්ඨමං.

9. මඝදෙවජාතකං

9. උත්තමඞ්ගරුහා මය්හං, ඉමෙ ජාතා වයොහරා;

පාතුභූතා දෙවදූතා, පබ්බජ්ජාසමයො මමාති.

මඝදෙව [මඛාදෙව (සී. පී.), දෙවදූත (ක.)] ජාතකං නවමං.

10. සුඛවිහාරිජාතකං

10. යඤ්ච අඤ්ඤෙ න රක්ඛන්ති, යො ච අඤ්ඤෙ න රක්ඛති;

ස වෙ රාජ සුඛං සෙති, කාමෙසු අනපෙක්ඛවාති.

සුඛවිහාරිජාතකං දසමං.

අපණ්ණකවග්ගො පඨමො.

තස්සුද්දානං –

වරාපණ්ණක වණ්ණුපථ සෙරිවරො, සුවිචක්ඛණ තණ්ඩුලනාළිකස්සා;

හිරි පුත්තවරුත්තගාමණිනා, යො ච න රක්ඛති තෙන දසාති.

2. සීලවග්ගො

11. ලක්ඛණමිගජාතකං

11. හොති සීලවතං අත්ථො, පටිසන්ථාර [පටිසන්ධාර (ක.)] වුත්තිනං;

ලක්ඛණං පස්ස ආයන්තං, ඤාතිසඞ්ඝපුරක්ඛතං [පුරක්ඛිතං (ස්‍යා.), පුරෙක්ඛිතං (ක.)];

අථ පස්සසිමං කාළං, සුවිහීනංව ඤාතිභීති.

ලක්ඛණමිගජාතකං පඨමං.

12. නිග්‍රොධමිගජාතකං

12. නිග්‍රොධමෙව සෙවෙය්‍ය, න සාඛමුපසංවසෙ;

නිග්‍රොධස්මිං මතං සෙය්‍යො, යඤ්චෙ සාඛස්මි [සාඛස්මිං (සී. පී.)] ජීවිතන්ති.

නිග්‍රොධමිගජාතකං දුතියං.

13. කණ්ඩිජාතකං

13. ධිරත්ථු කණ්ඩිනං සල්ලං, පුරිසං ගාළ්හවෙධිනං;

ධිරත්ථු තං ජනපදං, යත්ථිත්ථී පරිණායිකා;

තෙ චාපි ධික්කිතා [ධික්කතා (?)] සත්තා, යෙ ඉත්ථීනං වසංගතාති.

කණ්ඩිජාතකං තතියං.

14. වාතමිගජාතකං

14. න කිරත්ථි රසෙහි පාපියො, ආවාසෙහි ව [වා (සබ්බත්ථ)] සන්ථවෙහි වා;

වාතමිගං ගහනනිස්සිතං [ගෙහනිස්සිතං (සී. පී.)], වසමානෙසි රසෙහි සඤ්ජයොති.

වාතමිගජාතකං චතුත්ථං.

15. ඛරාදියජාතකං

15. අට්ඨක්ඛුරං ඛරාදියෙ, මිගං වඞ්කාතිවඞ්කිනං;

සත්තහි කාලාතික්කන්තං [සත්තහි කලාහ’තික්කන්තං (සී.), සත්තකාලෙහ’තික්කන්තං (ස්‍යා.), සත්තහි කාලාහ’තික්කන්තං (පී.)], න නං ඔවදිතුස්සහෙති.

ඛරාදියජාතකං පඤ්චමං.

16. තිපල්ලත්ථමිගජාතකං

16. මිගං තිපල්ලත්ථ [තිපල්ලත්ත (ක.)] මනෙකමායං, අට්ඨක්ඛුරං අඩ්ඪරත්තාපපායිං [අඩ්ඪරත්තාවපායිං (සී. පී.)];

එකෙන සොතෙන ඡමාස්සසන්තො, ඡහි කලාහිතිභොති [කලාහතිභොති (සී. ස්‍යා. පී.)] භාගිනෙය්‍යොති.

තිපල්ලත්ථමිගජාතකං ඡට්ඨං.

17. මාලුතජාතකං

17. කාළෙ වා යදි වා ජුණ්හෙ, යදා වායති මාලුතො;

වාතජානි හි සීතානි, උභොත්ථමපරාජිතාති.

මාලුතජාතකං සත්තමං.

18. මතකභත්තජාතකං

18. එවං චෙ සත්තා ජානෙය්‍යුං, දුක්ඛායං ජාතිසම්භවො;

න පාණො පාණිනං හඤ්ඤෙ, පාණඝාතී හි සොචතීති.

මතකභත්තජාතකං අට්ඨමං.

19. ආයාචිතභත්තජාතකං

19. සචෙ මුච්චෙ [මුඤ්චෙ (සී. ස්‍යා. පී.)] පෙච්ච මුච්චෙ [මුඤ්චෙ (සී. ස්‍යා. පී.)], මුච්චමානො හි බජ්ඣති;

න හෙවං ධීරා මුච්චන්ති, මුත්ති බාලස්ස බන්ධනන්ති.

ආයාචිතභත්තජාතකං නවමං.

20. නළපානජාතකං

20. දිස්වා පදමනුත්තිණ්ණං, දිස්වානොතරිතං පදං;

නළෙන වාරිං පිස්සාම [පිවිස්සාම (සී. ස්‍යා. පී.)], නෙව [න ච (ක.)] මං ත්වං වධිස්සසීති.

නළපානජාතකං දසමං.

සීලවග්ගො දුතියො.

තස්සුද්දානං –

අථ ලක්ඛණ සාඛ ධිරත්ථු පුන, න කිරත්ථි රසෙහි ඛරාදියා;

අතිභොති වර [රස (සබ්බත්ථ)] මාලුත පාණ, මුච්චෙන නළඅව්හයනෙන භවන්ති දසාති.

3. කුරුඞ්ගවග්ගො

21. කුරුඞ්ගමිගජාතකං

21. ඤාතමෙතං කුරුඞ්ගස්ස, යං ත්වං සෙපණ්ණි සිය්‍යසි [සෙය්‍යසි (සී. ස්‍යා. පී.)];

අඤ්ඤං සෙපණ්ණි ගච්ඡාමි, න මෙ තෙ රුච්චතෙ ඵලන්ති.

කුරුඞ්ගමිගජාතකං පඨමං.

22. කුක්කුරජාතකං

22. යෙ කුක්කුරා රාජකුලම්හි වද්ධා, කොලෙය්‍යකා වණ්ණබලූපපන්නා;

තෙමෙ න වජ්ඣා මයමස්ම වජ්ඣා, නායං සඝච්චා දුබ්බලඝාතිකායන්ති.

කුක්කුරජාතකං දුතියං.

23. ගොජානීයජාතකං

23. අපි පස්සෙන සෙමානො, සල්ලෙභි සල්ලලීකතො;

සෙය්‍යොව වළවා ගොජො [භොජ්ජො (සී.), භොජ්ඣො (ස්‍යා. පී.)], යුඤ්ජ මඤ්ඤෙව සාරථීති.

ගොජානීය [භොජාජානීය (සී. ස්‍යා. පී.)] ජාතකං තතියං.

24. ආජඤ්ඤජාතකං

24. යදා යදා යත්ථ යදා, යත්ථ යත්ථ යදා යදා;

ආජඤ්ඤො කුරුතෙ වෙගං, හායන්ති තත්ථ වාළවාති.

ආජඤ්ඤජාතකං චතුත්ථං.

25. තිත්ථජාතකං

25. අඤ්ඤමඤ්ඤෙහි තිත්ථෙහි, අස්සං පායෙහි සාරථි;

අච්චාසනස්ස පුරිසො, පායාසස්සපි තප්පතීති.

තිත්ථජාතකං පඤ්චමං.

26. මහිළාමුඛජාතකං

26. පුරාණචොරාන වචො නිසම්ම, මහිළාමුඛො පොථයමන්වචාරී;

සුසඤ්ඤතානඤ්හි වචො නිසම්ම, ගජුත්තමො සබ්බගුණෙසු අට්ඨාති.

මහිළාමුඛජාතකං ඡට්ඨං.

27. අභිණ්හජාතකං

27. නාලං කබළං පදාතවෙ, න ච පිණ්ඩං න කුසෙ න ඝංසිතුං;

මඤ්ඤාමි අභිණ්හදස්සනා, නාගො ස්නෙහමකාසි [සිනෙහමකාසි (සී. ස්‍යා. පී.)] කුක්කුරෙති.

අභිණ්හජාතකං සත්තමං.

28. නන්දිවිසාලජාතකං

28. මනුඤ්ඤමෙව භාසෙය්‍ය, නාමනුඤ්ඤං කුදාචනං;

මනුඤ්ඤං භාසමානස්ස, ගරුං භාරං උදද්ධරි;

ධනඤ්ච නං අලාභෙසි, තෙන චත්තමනො අහූති.

නන්දිවිසාලජාතකං අට්ඨමං.

29. කණ්හජාතකං

29. යතො යතො ගරු ධුරං, යතො ගම්භීරවත්තනී;

තදාස්සු කණ්හං යුඤ්ජන්ති, ස්වාස්සු තං වහතෙ ධුරන්ති.

කණ්හජාතකං නවමං.

30. මුනිකජාතකං

30. මා මුනිකස්ස පිහයි, ආතුරන්නානි භුඤ්ජති;

අප්පොස්සුක්කො භුසං ඛාද, එතං දීඝායුලක්ඛණන්ති.

මුනිකජාතකං දසමං.

කුරුඞ්ගවග්ගො තතියො.

තස්සුද්දානං –

කුරුඞ්ගස්ස කුක්කුරගොජවරො, පුන වාළවස්සසිරිව්හයනො [සිරිවයනො (සබ්බත්ථ)];

මහිළාමුඛනාමනුඤ්ඤවරො, වහතෙ ධුර මුනිකෙන දසාති.

4. කුලාවකවග්ගො

31. කුලාවකජාතකං

31. කුලාවකා මාතලි සිම්බලිස්මිං, ඊසාමුඛෙන පරිවජ්ජයස්සු;

කාමං චජාම අසුරෙසු පාණං, මා මෙ දිජා වික්කුලවා [මායිමෙ දිජා විකුලාවා (සී. ස්‍යා. පී.)] අහෙසුන්ති.

කුලාවකජාතකං පඨමං.

32. නච්චජාතකං

32. රුදං මනුඤ්ඤං රුචිරා ච පිට්ඨි, වෙළුරියවණ්ණූපනිභා [වණ්ණූපටිභා (ස්‍යා.), වණ්ණසන්නිභා (ක.)] ච ගීවා;